Alaka: nikāraḥ paribhavaḥ. abhirāddhaṃ prasannam || 1 ||

Utpala: tam athā || abhirāddhaṃ tuṣṭaṃ ceto yasya ||

Alaka: upadā ḍhaukanikā || 2 ||

Utpala: ghana || upadīkṛtāḥ prābhṛtārtham ānītāḥ ||

Utpala: praṇi || praṇāmavaśāt kāñcanāvanau skhalitāḥ santa utpatanto ye bhramarāḥ tair muktāni śekharāṇi yeṣāṃ. tasya śarvasyānujñayeti tān prati bhagavato gauravaṃ teṣāṃ ca vinayavattvam uktam ||

Utpala: atha || dantāṃśava eva svacchatvān nirjharāḥ taiḥ snapitoṣṭhadalaṃ kṛtvā. idaṃ vakṣyamāṇaṃ ||

Alaka: akāṇḍe asamaye. śūnyatā niḥsāratvaṃ. śuṣmiṇas tejasvina iti ṛtūnāṃ saṃbodhanam. śalyaṃ duḥkham. dhūsarā malināḥ || 5 ||

Utpala: kima || akāṇḍe 'navasare. jagatāṃ viparyayaḥ kalpāntaḥ. he śuṣmiṇas tejasvinaḥ ||

Alaka: marutpatiḥ sureśaḥ. jṛmbhitam auddhatyam āvirbhāvitam || 6 ||

Utpala: bhuja || uktaviśeṣaṇe indre sthite 'pi kena daityena jṛmbhitam iti. sopahāsam iti kecit ||

Alaka: kamalāsano brahmā, kamalam āsanam asyeti. kamalam eva cāsanam āśrayaḥ. pakṣāḥ svavargyāḥ patatrāṇi ca. bhuvanam evābjasya kośaḥ karṇikā. pātuṃ rakṣituṃ āsvādayituṃ ca || 7 ||

Utpala: uditaṃ || bisakandavat tena ca komalāt kamalāsanāt brahmaṇaḥ abjaṃ ca kamalāyā lakṣmyā āsanaṃ tena anaghā nirdoṣāḥ. pakṣā mitrādidalāni patatrāṇi ca. pātuṃ rakṣituṃ āsvādayitum ca ||

Alaka: druhiṇo brahmā. tasya sargagocaraṃ, sṛṣṭiviṣayam, etad bhuvanam, kāvyam iva yuṣmābhir avadbhir yaśo vitanyate, tatkauśalasyākhyāpanāt. kāvye tu sargāḥ khaṇḍalakabhedāḥ. citrā nānāvidhāḥ, citraṃ ca cakrabandhādi. vṛttayo vyavahārāḥ, paruṣopanāgarikagrāmyāś cānuprāsajātayaḥ. kaviḥ prajāpatir api || 8 ||

Utpala: druhi || druhiṇasya vedhasaḥ sargagocaraṃ sṛṣṭiṃ rakṣadbhir bhavadbhir yaśo vistāryate. citrā vṛttayo vyāpārā yasyeti kaḥ. kecit tu kaṃ jalam avadbhir ity āhuḥ, yataḥ “apa eva sasarjādau tāsu vīryam avāsṛjat” iti L manuḥ. aparatra sargaḥ paricchedaḥ. vṛttayaḥ paruṣagrāmyopanāgarikāḥ śabdagatāḥ bhāratyādyāś cārthagatāḥ ||

Alaka: sthitavatītyādi caturbhiḥ kalāpakam. gāṃ vācam. śucir grīṣmaḥ || 9 || smara eva bāndhavas tatkṣayakāriṇi harordhvanayane serṣyahṛdaya L iva, nimīlitekṣaṇatvāt || 11 || śīkarakaṇā binduleśāḥ. puraḥ pūrvam. hriyamāṇavākya iveti vayam eva tvadanuyāyino vijñāpayāmaḥ. na yuktam asmatsaṃnidhau svayam eva vibhor abhidhātum ity abhiprāyaḥ || 12 ||

Utpala: sthita || bhagavati vācam udīrya sthitavati tūṣṇīṃbhūte śucimukhyasya grīṣmādeḥ śeṣasya ṛtumaṇḍalasya dṛṣṭipātena coditaḥ kāmākhyabandhudāhake śarvanetre sāsūya iva bhramaraiś ca vayaṃ brūma iti hriyamāṇavākya iva vasanto 'bravīd iti caturbhiḥ kriyā ||

Alaka: pratighaḥ pratibandhako hetuḥ. tatkṛtena vyapāyena bādhayā rahitā saṃvid vijñānaṃ yasya tādṛśasya hṛtpadmavartinas tava yan na viditaṃ tad iha nāsti, bhavataḥ sarvajñatvāt, ata eva jagataḥ śubhāśubheṣu karmasu bhavān eka evasākṣī. viṣṭaram āsanam. taveti “ktasya ca vartamāne” iti ṣaṣṭhī || 13 ||

Utpala: adhi || hṛdayapadmam evāsanam adhitiṣṭhataḥ bhuvanatrayavyavahāṛeṣu caikasya ananyasādhāraṇasya sākṣiṇaḥ sarvagatatvāt pratighavyapāyābhyāṃ ca pratibandhamithyātvābhyāṃ rahitā saṃvit jñānaṃ yasya satyajñānarūpasya taveśvarasya yan na viditaṃ kim ivāsti. sarvam eva te pratyakṣaṃ tat kim asmān pṛcchasīty arthaḥ ||

Alaka: saṃvidādi vijñānaiśvaryavairāgyadharmalakṣaṇaṃ tava guṇacatuṣṭayaṃ tathā prathitaṃ yathaitasya prakarṣavatīṃ sthitim āptasya sato na kiṃcid aparaṃ tāratamyabhāg atiśayam bhajate, asyaiva sātiśayatvāt. asyety anādare ṣaṣṭhī || 14 ||

Utpala: tava || tathā te saṃvidādi catuṣṭayaṃ jñānavairāgyaiśvaryadharmākhyaṃ sahajam akṛtrimaṃ niravadyaṃ ca khyātam, yathāsya jñānādeḥ sthitiṃ prāptasya sataḥ anyat tāratamyabhāk atiśayātiśayajuk na kiṃcid asti ||

Alaka: sakalasyārthajātasya satattvaṃ paramārthas tadveditā te śabdasamayāgatā na ghaṭām upaiti śabdena saṃketenotpanneti na yujyate. anyo hi parokṣam apy apūrvādi śabdamukhenaiva pratipadyate, devaḥ punar apratihatajñānajyotir brahmaṇo 'pi pāradarśī samagram āgamānapekṣayaiva sākṣāt karoti. paraṃ prakṛṣṭam, brahmety arthaḥ || 15 ||

Utpala: saha || sahajaṃ niṣpratighaṃ niṣpratibandhaṃ jñānajyotir yasya tathā parapāradṛśvanaḥ brahmatattvadarśinas tava sakalapadārthamaṇḍalasya satattvaveditā paramārthajñatā śabdasamayāgatā āgamapramāṇaprāptā satī ghaṭāṃ ghaṭanaṃ na yāti, nopapadyate. yatra hi pratyakṣaṃ vyāpriyate, na tatrāgamena kāryam ||

Alaka: aviśeṣavṛttiḥ samānā, vibhā dīptiḥ || 16 ||

Utpala: avi || yathā sūryasya grastāndhakārā sarvatra tulyavṛttiḥ prabhā, tathā tava apāstājñānatimirā niṣpratibandhā śuddhā ca matiḥ jñānabuddhir vijṛmbhate ||

Alaka: vistaraḥ samūhaḥ. prathanam atra na vivakṣitam iti “prathane vāv aśabde” iti na ghañaḥ prāptiḥ || 17 ||

Utpala: prati || mithaḥ parasparaṃ tvadābhāṣaṇakṣaṇo 'smākaṃ śreyasaḥ saṃgrahaṃ karoti ||

Alaka: cūlikasya, pañcaśikhākhyasya muneḥ, arthāḥ, “astitvam, ekatvam, L athārthavattvaṃ, pārārthyam, anyatvam, atho nivṛttiḥ | yogo viyogo, bahavaḥ pumāṃsaḥ, sthitiḥ śarīrasya ca, śeṣavṛttiḥ ||” iti daśa padārthāḥ, tadvacobhis tvam eva pañcaviṃśakaḥ puruṣo nigadyase, niḥśeṣaṃ pratipādyase. puri, śarīre, uṣitatvān nirvacanenābhidhīyase. cūlikārthāḥ sūkṣmārthāḥ, iti kecit. prakṛtiḥ kāraṇam avyaktam, vikṛtayo mahadādyāḥ, tadvilakṣaṇaḥ. yad uktam: “mūlaprakṛtir avikṛtir mahadādyāḥ prakṛtivikṛtayaḥ sapta | ṣoḍaśakas tu vikāraḥ | na prakṛtir na vikṛtiḥ puruṣaḥ ||” iti. nityatvāc ca pratiṣiddhā vastugatā dharmāḥ: “jāyate, asti, vipariṇamate, vivardhate, prakṣīyate, vinaśyati” iti ṣaḍ bhāvavikārā yena tathāvidhaḥ, niṣkriyaś ca, udāsīnatvāt || 18 ||

Utpala: prakṛteḥ || prakṛter avyaktād anyaḥ vikṛtiśūnyatāṃ gataḥ prakṛtivikṛtiśūnyatāṃ gataḥ, prakṛtivikṛtirūpabuddhyāditrayoviṃśatitattvavarjitaḥ. pratiṣiddhāś ca vastugatāḥ dharmāḥ “jāyate asti vipariṇamate vivardhate apakṣīyate vinaśyati” iti ṣaḍ bhāvavikārāḥ, yatra tathāvidho niṣkriyaś ca, draṣṭṛmātratvāt. sphuṭacūlikārthavacanaiḥ sāṃkhyais tvam eva pañcaviṃśatattvarūpaḥ puruṣo nirucyase, “puri śayanād vā” niruktenocyase. tad uktaṃ: “mūlaprakṛtir avikṛtir mahadādyāḥ prakṛtivikṛtayaḥ sapta | ṣoḍaśakaś ca vikāro na prakṛtir na vikṛtiḥ puruṣaḥ ||” “pradhānāstitvamekatvam arthavattvam akāryatā | pārārthyaṃ ca tathānaikyaṃ viyogo yoga eva ca | śeṣavṛttir akartṛtvaṃ cūlikārthā daśa smṛtāḥ ||” upaniṣadrahasyānāṃ cūleva cūlikā ||

Alaka: aho vicitram, tvam prakṛteḥ kāmukaḥ sadṛśaḥ. puruṣasya ca kāmukatvam “prakṛtim aham bhuñjīya” iti kāmanāt. tasya punar ānurūpyam ihopahāsena viparītalakṣaṇayā pratikṣipyate. tathā hi puruṣaḥ prathitaḥ prapañco vistīrṇatā yasya tādṛśena rasena rāgeṇa bhāvena ca janmanā rahitaḥ kiṃcid api kartum akṣamaḥ, niṣkriyatvāt. avapur anabhivyaktasvarūpaḥ. karaṇasya cakṣurāditrayodaśavidhasyendriyasya vṛttyā viṣayagrahaṇena śūnyaḥ; prakṛtiḥ punar etadvisadṛśarūpā, iti katham anayoḥ sāmyam? yo 'pi rasena śṛṅgārādinā bhāvena ca sāttvikādinā bahuvidhena rahitaḥ, dhanavaikalyāc ca kiṃcid api kartum asahaḥ, avapuṣ ca rūparahitaḥ, karaṇena kāmaśāstraprasiddhenotphullakādinā vṛttyā ca dhanārjanopāyena śūnyaś ca puruṣaḥ, so 'ṅganāṃ kām api kāmayate, iti citram adaḥ || 19 ||

Utpala: prathita || prathitaḥ prapañco māyāvijṛmbhā yasya rasena ca rāgeṇa bhāvena sattayā saṃsāreṇa varjito niṣkriyatvāc ca kiṃcid api vidhātum akṣamaḥ, tathānabhivyaktarūpatvād avapuḥ nīrūpaḥ ata eva karaṇānāṃ buddhikarmendriyāntaḥkaraṇabhedāt trayodaśasaṃkhyānāṃ vṛttibhiḥ śūnyaḥ san, āścaryaṃ, prakṛtes tvam sarūpaḥ kāmukaḥ, iti parihāsaḥ. kāmukapakṣe rasāḥ śṛṅgārādayaḥ, bhāvā ratyādayaḥ, teṣāṃ prapañco yathaikasya śṛṅgārasya daśaprakāratā, bhāvanāṃ ca sthāyyādibhedair ekānnapañcāśatvaṃ. sa kiṃcid api kartum ayogyaḥ, arāgakatvāt. avapuḥ, kurūpaḥ, karaṇaiḥ kāmaśāstroktaiḥ saṃpuṭādibhiḥ vṛttyā dhanādikayā rahitaḥ. nirdhano 'pi hi karaṇābhijño yoṣitām abhimato bhavati, na tūbhayahīnaḥ ||

Alaka: sāṅkhyavṛddhasya kapilamaharṣer mataviśeṣasthāḥ kṛtinaḥ sāṅkhyāḥ te tāvakaṃ paraṃ padaṃ tad alaukikam anivṛtti nāsti nivṛttiḥ punaḥ saṃsārāgamo yasmāt tādṛśaṃ pratipādayanti. daśa hetavo vītāvītākhyāḥ, tatra: “bhedānāṃ parimāṇāt, samanvayāt, śaktitaḥ pravṛtteś ca | kāraṇakāryavibhāgāt, avibhāgād vaiśvarūpyasya || kāraṇam asty avyaktam” iti prakṛtisādhanāyopanyastāḥ pañca hetavo vītāḥ. tāvanta eva te puruṣasādhakā avītāḥ. tadyathā: “saṃghātaparārthatvāt triguṇādiviparyayād adhiṣṭhānāt | puruṣo 'sti bhoktṛbhāvāt kaivalyārthaṃ pravṛtteś ca ||” iti. etadāśrayeṇa tiraskṛto viplavo nāstikavādo yaiḥ, ata eva viśuddhahṛdayāḥ || 20 ||

Utpala: katha || vītāvītarūpāṇāṃ daśānāṃ hetūnām āśrayaṇena vidhūtaḥ anyavādikṛto nāstitvādiviplavo yaiḥ, ata eva śuddhacetasaḥ sāṅkhyāḥ tat prakṛṣṭam anivṛtti ca tava paraṃ padaṃ vadanti, yat prāpya punaḥ saṃsārāvīcipāto na bhavatīty arthaḥ. tatra daśa hetavaḥ prakṛteḥ puruṣasya cāstitve pañca tad uktaṃ: “bhedānāṃ parimāṇāt samanvayāt śaktitaḥ pravṛtteś ca kāraṇakāryavibhāgād avibhāgād vaiśvarūpasya kāraṇam asty avyaktam” iti || tathā “saṃghātaparārthatvāt triguṇādiviparyayād adhiṣṭhānāt | puruṣo 'sti bhoktṛbhāvād kaivalyārthaṃ pravṛtteś ca” iti ||

Alaka: nāsty anyo viṣayo yasya tathā kṛtvā tvayi puruṣaviśeṣatvaṃ bibhrati sthitam “īśvara” iti nāma vyapadiśanti vidvāṃsaḥ, karmaṇaḥ śubhā L śubhasya phalaṃ sukhaduḥkharūpo vipākaḥ, tadanubhavaśūnye, nirāśaṃsatvāt, sarvārthatattvadarśini ca karmakleśāśayair aparāmarśāt. uktaṃ ca: “kleśakarmavipākāśayair aparāmṛṣṭaḥ puruṣaviśeṣa īśvaraḥ” iti || 21 ||

Utpala: dadha || karmaṇaḥ śubhāśubhasya yat sukhaduḥkharūpaṃ phalaṃ tadupabhogavarjite draṣṭṛmātratvāt sakalapadārthatattvajñe ca sarvavyāpitvāt puruṣaviśeṣatvaṃ dadhati tvayy eva, ananyagocaram “īśvara” iti śabdaṃ pātañjalāḥ kathayanti. yad āhuḥ: “kleśakarmavipākāśayair aparāmṛṣṭaḥ puruṣaviśeṣa īśvara iti” || 21 ||

Alaka: bandhakoṭiḥ prakṛtyādibandhanadhārā. tatsparśena kadarthitam aiśvaryam anyayoginām, prāganubhūtasaṃsāratvāt. tava tu sarvadaiva muktasya nityaikarūpatayā bhāvābhāvābhyāṃ śūnyam, ata evānagham, atiśayaśālitayā viśadam etaj jānanti mahādhiṣaṇāḥ. uktaṃ ca: “tatra niratiśayaṃ sarvajñabījam” iti || 22 ||

Utpala: dṛḍha || dṛḍhayā bandhakoṭyā prakṛtyāditattvabandhadhārayā yaḥ parāmarśaḥ saṃsparśaḥ āskanda iti bhāvaḥ, tena karṣitaṃ tanūkṛtaṃ, na anyaśaminām iva taveśvaratvaṃ śuddhadarśanā viduḥ, yatas tvadaiśvaryam anvayavyatirekaśūnyaṃ bhāvābhāvarahitaṃ, nityam ity arthaḥ. tad uktaṃ bhāṣyakṛtā: “santi hi bahavaḥ kevalinaḥ. te ca trīṇi bandhanāni hitvā kaivalyaṃ prāptāḥ. īśvarasya tattatsambandho na bhūto na bhāvī, sa tu sa L daiva muktaḥ, sadaiveśvaraḥ” iti. uktaṃ ca: “tatra niratiśayaṃ sarvajñatvabījam” iti || ||

Alaka: bhuvanāni nirmitsato druhiṇasya tasmād eva yaḥ pūrvam udābhūt sa praṇava oṃkāras tavaiva vācakaḥ, tena tvam abhidhīyase. yad uktam: “tasya vācakaḥ praṇavaḥ” iti. saha pañcabhir lakṣaṇair akārokāramakārārdhacandrabindurūpair avayavaiḥ, “brahmā viṣṇuś ca rudraś ca īśvaraś ca sadāśivaḥ | pañcadhā pañcadaivatyaḥ .....” || 23 & 24||

Utpala: bhuva || sa evaṃvidhas tavaiva vācaka iti dvābhyāṃ kriyā. uktaṃ ca: “tasya vācakaḥ praṇavaḥ” iti. yajñādikāsu sarvakriyāsu viniyogaṃ bhajate yaḥ tādṛśo bhavan, tathā ca manuḥ: “brahmaṇaḥ praṇavaṃ kuryād ā L dāv ante ca sarvathā | sravaty anoṃkṛtaṃ brahma purastāc ca viśeṣataḥ ||” iti. yaś ca pañcalakṣaṇaḥ akārokāramakārārdhacandrabindurūpo brahmaviṣṇurudreśvaraśivalakṣaṇo vā. yaṃ ca vedāḥ paramam anivṛtti padam ūcuḥ, ata eva yaṃ vācyarūpaṃ janaḥ prāpya bhūyo na jāyate. yaś ca vācyavācakayor abhedopacārād bahuvaktrapād ity ucyate “sahasraśīrṣā puruṣaḥ sahasrākṣaḥ sahasrapāt” iti śruteḥ ||

Utpala: dadha || he smarāntaka evaṃvidham api kālaṃ tvam eva svamāyayā kālayasi kṣipasi, iti dvābhyāṃ kriyā. nityatvād anādimadhyāntaṃ sarvadā sthitaṃ. nanu, sa evaṃvidho nāstīty āśaṅkyāha: kriyayā cirakṣiprādikayā krameṇa adyatanaprātastanādinā candrārkādigama

Utpala: saṃyamino yogino manaḥ tvadicchayā tām api lokottarāṃ vivekadarśaṇasthitim—anyā prakṛtir, anyaḥ puruṣa— iti niruṇaddhi īśvaraikatānatvāj jahāti, yataś citiśaktirūpasya caitanyasya viparyayād acaitanyāt prakṛtau puraskṛtavirāgabhāvanaṃ jaḍeyam akiṃcitkareti. tad uktaṃ: “dṛṣṭānuśravikaviṣayavitṛṣṇasya vaśīkārasaṃjñā vairāgyaṃ | tatparaṃ puruṣakhyāter guṇavaitṛṣṇyam |” iti ||

Utpala: tapanā || he deveśa yoginaḥ tapanādike sūryasomādau nānāvidhe lakṣyamaṇḍale dhyeyavṛnde kṛtasaṃyamāḥ dhyānādinā tadekāgrāḥ santo bhuvanādidhāmasu jagattārāvyūhādiṣu sthāneṣu aviplutā sthirā pratibhātā lokottarā tvatsvarūpā saṃvit jñānaṃ yeṣāṃ tathāvidhā bhavanti. tad uktaṃ: “bhuvanajñānaṃ sūryasaṃyamāt. candre tārāvyūhajñānam.” ityādi ||

Utpala: vyati || he bhava! yoginām asaṃvidādikaṃ trayaṃ a⸤jñānāvairāgyānaiśvaryākhyaṃ vyatikrāntavatāṃ sthityā cittaikāgryeṇa sammukhīkṛto nirodhasya bāhyaviṣayavyāvṛttendriyatārūpasya yogasya mārgo yaiḥ tathāvidhānāṃ tvadanugrahāt koṭibhūtadhiṣaṇā prāntabhūtaprajñā na na udayate udayata eva. tad uktaṃ: “tasya saptavidhā prāntabhūmiprajñā” iti. atrāpi saptaprakāratvaṃ bhāṣyakṛtoktaṃ: “parijñātaṃ heyaṃ nāsya punaḥ parijñeyam asti. kṣīṇā heyahetavo na punar eṣāṃ kṣetavyam asti. sākṣāt kṛtaṃ nirodhasamādhinā hānam. bhāvito vivekakhyātirūpo hānopāya ity eṣā catuṣṭayī kāryavimuktiḥ prajñā. cittavimuktis tu trayī.” ityādi ||

Utpala: mana || he tridaśanātha nirargalaṃ kṛtvā calātmano 'pi manaso nirupaplavāyāḥ sthiter nibandhanabhūtā yogipuruṣāṇāṃ rasanādidhāmasu jihvānāsikādisthāneṣu sugandhādiviṣayās tvadātmikās saṃvido bhavanti. tad uktaṃ: “viṣayavatī vā pravṛttir utpannā sthitinibandhinī” iti. bhāṣyakṛtāpyuktaṃ: “nāsikāgre dhārayato yā gandhasaṃvit sā gandhapravṛttiḥ | jihvāgre ra L sasaṃvid” ityādi ||

Utpala: kala || tvam aupaniṣadaiḥ vedāntavādibhiḥ evaṃvidhaḥ puruṣa uktaḥ: kaladhautalakṣaṇaḥ suvarṇavarṇaḥ, ata eva ānakhaśikhaṃ śobhanavarṇa iti pratītaḥ. yad āhuḥ: “mahatas tamasaḥ pāre puruṣaṃ jvalanaprabham” iti. pañcadhā ātmaprāṇamanovijñānānandamayatvena, tathā †sukhaduḥkhajijñāsā tapasā pratibhāsaḥ avadhāraṇaṃ anyāsaḥ nirbhāsaḥ saṃnyāsa iti pūrvavedanāmayatvaṃ ceti† ||

Utpala: sphuṭa || he guṇagaura brahmaṇā bahuvartma sāma gāyatā tvam eva gīyase, paramātmasvarūpatvāt. sphuṭaṃ kṛtvā hiṃkriyāditayā hiṃkārāditvena nidhanāntatayā ca śritaṃ pañcavidhayā bhaktyā sauṣṭhavaṃ yatra. tad uktaṃ: “āvāhalakṣmā hiṃkāraḥ prastāvaḥ pratihārakaḥ | udgītho nidhanaś ceti pañcoktāḥ sāmagītayaḥ ||” iti. kecin nidhanaśabdasya madhyārthābhidhāyitvād ādimadhyānteṣu hiṃkriyety āhuḥ ||

Utpala: sthiti || tvam eva aparāntakādiṣu saptasu gītakeṣu dhvanasi, “aparāntakam ullopyaṃ prakarīṃ madrakaṃ tathā | auveṇakaṃ sarobindum uttaraṃ gītakāni ca ||” iti. daśa śabdalakṣaṇāni yasya saḥ, tad uktaṃ: “grahāṃśau tāramandrau ca nyāso 'panyāsa eva ca | alpatā ca bahutvaṃ ca ṣāḍavauḍuvite tathā ||” iti. vibhaktāni vastūni kalārambhakakhaṇḍā yeṣu ata eva sthirāṃ sthitiṃ prāpteṣu, niyataḥ śrutīnāṃ dvāviṃśatisaṃkhyānāṃ kalādīnāṃ svarārambhakāvāntarabhedānāṃ kramo yatra tathāvidhasya svaramaṇḍalasyānugamena ṣaḍjādisaptasvarānusyūtatayā susthitāṃ ||

Utpala: saka || he hara, eṣo 'ṇur, ātmā, gūḍhārthāni madrakāṇi gāyati tvatprakṛtiṃ jijñāsuḥ san, “gītajño yadi yogena nāpnuyāt paramaṃ padaṃ | rudrasyānucaro bhūtvā tenaiva saha modate ||” iti, †. . . . vikāre ca parāṅmukhasthitiḥ jñānaśabdaḥ brahmatvāt.† tad uktaṃ: “śabdabrahmaṇi niṣṇātaḥ paraṃ L brahmādhigacchati” iti. madrakāṇy api sakalasāṃsārikādhikārebhyo yo nivṛttiḥ, tasya hetutāṃ gatāni. “vīṇāvādanatattvajñaḥ śrutijātiviśāradaḥ | tālajñaś cāprayāsena mokṣamārgaṃ niyacchati ||” iti smṛteḥ ||

Utpala : gata || he īśa somapāyinaḥ yājñikāḥ na vidyate mṛtaṃ maraṇaṃ yasmād amṛtaṃ jñānaṃ mokṣaṃ vā duhate nityāyās tṛpteḥ kāraṇatāṃ gataṃ “apāma somam amṛtā abhūma aganma jyotir avidāma devān” iti śruteḥ yac ca harisaṃstarākhyasya yājñikaprasiddhasya vratasya hetuḥ. tvāṃ ca guhānihitaṃ hṛtkuharasthaṃ guhyam ata evottamaṃ ||

Utpala: bahu || tvayi prasannamanasi praseduṣi sati yoginaḥ aṣṭavidhaṃ aṇimalaghimamahimaprāptiprākāmyeśitvavaśitvayatrakāmāvasāyitvalakṣaṇam aiśvaraṃ balaṃ pravartate. kecit tu yamaniyamāsanaprāṇāyāmapratyāhāradhāraṇādhyānasamādhibhedād aṣṭavidhaṃ balam abhidadhati. nābhica L krādibhedena bahvyo yogadhāraṇāḥ “deśabandhaś cittasya dhāraṇā” iti evaṃlakṣaṇāḥ tatkṣamatayā yuktā sthirasukhānāṃ āsanānāṃ padmāsanādīnāṃ sthitir yasya. tad uktaṃ: “sthirasukham āsanam” iti ||

Utpala: dvividhaiḥ || tvadātmikaiva sarasvatī mahatīṃ ekaviṃśatantrīṃ śatatantrīṃ vā yajñādāv upasthitā āśritā. sphuṭena sāmaghoṣeṇa madhurā sāmavedād gītasyotpatteḥ, yad uktaṃ: “jagrāha pāṭhyam ṛgvedāt sāmabhyo gītam eva ca |” iti. dvividhaiḥ śārīrair vaiṇaiś ca, tathā vādivivādisaṃvādyanuvādibhedāc catuḥprakṛtibhiḥ, svaraiḥ ṣaḍjādibhiḥ śrutīnāṃ kalādīnāṃ krameṇa sasauṣṭhavā ||

Utpala: prathi || he jagannuta, purāvidaḥ yājñavalkyādyāḥ parāvaradṛśaḥ atītānāgatadṛśvāno 'vyaktādiṣu yat neti neti kathayanti, tad eva tava tattvaṃ. tad āhuḥ: “ātmā mantavyo jñātavyo nididhyāsitavyaḥ sa eṣa virajā vipāpmā neti neti bhāvanayā labhyate” iti. sarvair upādhibhir viśeṣaṇair uparāgair vā sādhanaiś ca pramāṇai rahitam, ata evāścaryaṃ ||

Utpala: avi || śuddhadarśanā brahmavidaḥ yasya pūrṇasya vedanasya saṃvido vivartam asatyāvabhāsarūpaṃ pṛthivyaptejovāyvākāśarūpāṇām upādānakāraṇaṃ tadātmakaṃ saṃvidrūpaṃ bhavantam eva puruṣam ūcuḥ. tad āhuḥ: “ekam evedaṃ saṃvidrūpaṃ harṣaviṣādādyanekākāravivartaṃ paśyāmas tatra yatheṣṭaṃ saṃjñāḥ kriyantām” iti ||

Utpala: praṇa || yaiḥ pāñcarātro 'py āgamo 'dhītas te 'pi tvatsthānam āpnuvanti. praṇavādiḥ tathā apyayavirāmatāṃ bibhrat, tatra kila pañcāśat prakaraṇāni yeṣām oṃkāraprakaraṇam ādau apyayaprakaraṇaṃ samāptau. phaṇinā śeṣeṇa nirūpitāḥ sapta bhagavadvidyākarmakālakartavyatetikartavyatāsaṃyamākhyāḥ sapta padārthā yatra ||

Utpala: vraja || ittham āścaryarūpam avyayaṃ cākṣayaṃ vapuḥ bibhrataṃ bhavantaṃ paśyato yoginaḥ sakalā saṃvin nivartate, iti dvābhyāṃ kriyā, tasya sabījaṃ jñānaṃ nivartate nirbījam utpadyata ity arthaḥ. pādarahito 'pi gacchasītyādau virodhaḥ spaṣṭaḥ avirodhas tu bhagavadvaibhavāt. yad āhuḥ: “apādahasto javano grahītā paśyaty acakṣuḥ sa śṛṇoty akarṇaḥ | yo veda sarvaṃ na ca tasya vettā taṃ paśyato jñānanivṛttiṃ āhur” iti ||

Utpala: śaśi || he hara bhavān nirvikāra eko 'py anekāśrayapratisaṃkramavaśād bahuvidhatvaṃ pratipadyate iti dvābhyāṃ kriyā. udavasitaṃ gṛhaṃ ||

Utpala: hari || tava mahāvibhūtitāṃ paramaiśvaryaṃ dadhataḥ ata eva sarvātmano 'yaṃ vivartaḥ yat harir ekaceṣṭaḥ tadaṃśakāḥ saṃkarṣaṇapradyumnāniruddhabhedena yathāsaṃkhyaṃ tricaturbahukriyatayā vyavasthitā iti tavaivaite vivartaḥ rūpabhedā ity arthaḥ. etad ekaceṣṭatvādi pāñcarātrād anveṣṭavyam ||

Utpala: api || tvayā vibodhitaḥ san yogī buddhīndriyavyāpāroparamān nirīkṣaṇo 'pi maṇiṃ cittaratnaṃ vidhyati prāṇāpānābhyāṃ. karmendriyavyāpāraśūnyatvāc ca anaṅgulir api taṃ vayati jñānasūtreṇa †ḍambati†. tathā sarvavṛttyupaśamād agrīvo 'pi pratimuñcati dhyeye badhnāti. ajihvo 'pi taṃ pūjayatīty āścaryam. tad uktaṃ: “andho maṇim upāvidhyat tam anaṅgulir āvayat | L tam agrīvaḥ pratyamuñcat tam ajihvo 'bhyapūjayat |” iti ||

Utpala: bahu || tvam adbhutāyase iti tribhiḥ kriyā. tathā hi avikāritvād ekarūpatām api dadhat bahurūpa eva sarvāsu prakṛtiṣv avasthānāt. sanātanatvāt sthito 'pi gatvaraḥ yatrakāmāvasāyitvāt. nabhasi hṛdvyomni sthito 'py anatikrāntabhūmikaḥ uttarottaradhārāvasthānasthitatvāt. hṛtkoṭarasthitatvāc ca nikaṭastho 'pi vidūratāṃ bhajase durjñeyatvāt. [48] cidacidparaḥ cetanācetanābhyām ātmanaś ca kleśādyaparāmṛṣṭatvāt anyo 'py acidacitparaḥ tayos tvadrūpatvāc ca. atadābho nīrūpo 'pi tadābhaḥ sarvatrāvasthānāt. sphaṭikavat tadupādhivaśāt tattadākāradhārīti vā. sadasatparaḥ vyaktāvyaktābhyāṃ dṛśyā L dṛśyābhyām anyo 'py asadasatparas tvadrūpatvāt. yad uktaṃ: “na sā jīvakalā kācit santānadvayavartinī | vyāptrī śivakalā yasyām adhiṣṭhātrī na vidyate” iti. nīrūpatvād avayavaśūnyo 'pi bahuvaktrapāṇidhṛt. yad āhuḥ: “sahasraśīrṣā puruṣaḥ sahasrākṣaḥ sahasrapāt |” iti. [49] sūryabimbastho 'pi śiśiro nirvāṇadāyitvāt. sūryabimbaṃ hi bhittvā yogino yānti. candrastho 'py uṣṇasampadaṃ dadhat nalinyādiśoṣakatvāt. kecit tu sūryacandrabimbastho dakṣiṇavāmapravāhasthaḥ prāṇāpānarūpatvāc †coṣṇatvād uṣṇatvam† abhidadhati. tad uktaṃ: “sūryamadhyasthitaś candraś candramadhyagato raviḥ | ubhayor antaraṃ veda sa veda paramāṃ gatiṃ |” iti. ata evobhayātmako 'gnīṣomātmakatvāt. nirubhayātmakaś ca kaivalyadaśāvasthānāt ata evāśritabhedatvena gahanaḥ durjñeyatvāt ||

Utpala: adhi || tvaṃ kṛtināpi yat āropitena tathatātmanā vā satyarūpeṇa kenacid vibhavena nābhyupeyase, tasmād āścaryaṃ tvaṃ durgrahaḥ. tathatātmaneti bauddhasiddhāntaprasiddhatvenoktaṃ bodhivat ||

Utpala : na gati || tava sarvagatatvāt gatir nāsti, nāgatir, gamanapratibandhaḥ, sarvaśaktimattvād yatrakāmāvasāyitvāc, ca. na ca tvaṃ bahir avabhāsase 'ntar vā, sarvagato 'pi bahīrūpeṇāntārūpeṇa vā durgrāhyas tvam ity arthaḥ. ata eva dvābhyām avabhāsābhyāṃ śūnyaḥ tathataiva tavāvalambanaṃ. apuṇyavatāṃ ca na pratibhāsi ||

Utpala: avi || tvaṃ padavākyayor vācyavastuny upakārakatvaṃ gataḥ, jñānarūpatvāt. padavākyayor iti keṣāṃcit padam eva vācakaṃ, keṣāṃcit tu vākyam eveti darśanadvayaṃ prakaṭayituṃ dvayor uktiḥ. tvaṃ ca sarvātmakatvād avibhāgo 'pi sakalapadārthajātaprakāśakatvena sthitaḥ. tad uktaṃ: “ekam eva yad āmnātaṃ bhinnaśaktivyapāśrayāt | apṛthaktve 'pi śaktibhyaḥ pṛthaktveneva vartate” ||

Utpala: pari || tvaṃ nirvikāratvād ekarūpo 'pi sahajāvidyāvaśāt kartrādikārakamārgaparikalpanena vibhāgīkṛtya janair bahudhākṛtya gṛhyase. tad uktam: “ekasya sarvabījasya yasya ceyam anekadhā | bhoktṛbhoktavyarūpeṇa bhogarūpeṇa ca sthitiḥ ||” iti ||

Utpala: sakala || he śiva, yat sakalārthaśarīratvena vivartate akṣaraṃ ca nityam ata evādimadhyāntarahitaṃ jagatāṃ ca nibandhanabhūtaṃ śabdatattvaṃ tat tava vapuḥ kathayanti śābdikāḥ. tad uktaṃ: “anādinidhanaṃ brahma śabdatattvaṃ yad akṣaraṃ | vivartate 'rthabhāvena prakriyā jagato yataḥ ||” iti ||

Utpala: asamā || evaṃvidhāv api dhīdhvanī buddhiśabdau tvat tvatto vinivṛttim avāpnutaḥ, na buddhyā grāhyas tvaṃ nāpi śabdena vācyas tvam ity arthaḥ, ata evāvadheḥ parataḥ sthitāt sarvavyatikrāntāt, tau cāsya jagato vyavahārāśrayabhūtāv api, yāvān hi vyavahāraḥ sa buddhyanuviddhena śabdena kriyate. yad āhuḥ: “na so 'sti pratyayo loke yaḥ śabdānugamād ṛte” iti. L asamāptaviplavāḥ asatyabhūtatvād vikalpā eva gocarāḥ yayoḥ. tad uktaṃ: “vikalpayonayaḥ śabdā vikalpāḥ śabdayonayaḥ” iti ||

Utpala: jaga || he bhava, upaniṣatpara rahasyaniṣṭha, bhavān parāvarād dṛśyādṛśyarūpād ubhayasmād vyativṛttam anyad rūpam āśritaṃ yena, ata eva durjñeyaḥ, avisaṃsthulāṃ sthirāṃ vigatasabhāgatāṃ niravayavatvam āśritaḥ san jaganmadhye na kasyacit pratibhāsate ||

Utpala: vyati || bhavān ṣaḍavadhisthiter adhvanaḥ visabhāgatāṃ niravayavatvaṃ sarvagatatvāc ca sabhāgatāṃ gataḥ. ṣaḍavadhir adhvā yathoktaṃ: “tattvapadamantravarṇā bhuvanāni kalāḥ ṣaḍ adhvānaḥ” iti. vyatiriktā sarvātītā vṛttir yasya saḥ. athavā “ṣaṭ ava adhaḥ dhatte adhvano 'tikrāntavṛttiḥ” iti yojyaṃ. aguṇaḥ sattvarajastamorahitaḥ. guṇānāṃ ca jñānādīnāṃ sattvādīnāṃ vā prakṛtirūpatvāt sa eva sthitiḥ, ata eva teṣām adhvaguṇādīnāṃ prakṛtitvaṃ prāptas tadrūpatvāt teṣām. virodhaḥ spaṣṭaḥ ||

Utpala: api || tvaṃ buddhiviṣayād apy atītaḥ anupādhikaraṇaś ca nirviśeṣaṇaḥ, ata eva kimapi śabdena vaktum aśakyaḥ, apāstaviparyayagrahaiḥ satyajñānibhir oṃkāre ravānte ca viniviṣṭadṛṣṭibhiḥ dṛśyase, īśvaratvāt. praṇavāntaḥ pañcalakṣaṇoṃkārapakṣe bindvākhyaḥ, ekādaśavidhoṃkāravādipakṣe tu unmanyantaḥ. tad uktam: “unmanyante paraḥ śivaḥ” iti ||

Utpala: dadha || vilaṅghitaturīyavṛttitāṃ dadhataḥ turyātītasya, jīvānāṃ ca jīvanena kṛtanirāmayasthiter bhavataḥ mokṣapradaṃ padaṃ suṣumṇayā madhyamanāḍyā yoginaḥ prāpnuvanti. tvatsāyojyaṃ yāntīty arthaḥ ||

Utpala: vyava || nirvikalpajñānarūpā gaṃbhīrā mūrtir yasya tadbhāvaṃ bibhratam, ata eva durantam apāram, anapāyaṃ cākṣayam āvaraṇaśūnyaṃ ca bhavantaṃ hṛtkaṇṭhatālubhrūmadhyalakṣaṇaṃ maṇḍalacatuṣṭayaṃ bhittvā praviṣṭāḥ, bindubhedena tvatsāyojyaṃ gatā ity arthaḥ ||

Utpala: bhavadī || bhavatā ātmarūpeṇa yat preritaṃ manas tena śarīrāgnir āhanyate so 'pi prāṇāpānasamānodānavyānākhyaṃ pañcalakṣaṇaṃ dehināṃ sthitihetuṃ vāyum īrayati. tad uktam: “ātmā buddhyā samarthyārthān mano yuṅkte vivakṣayā | manaḥ kāyāgnim āhanti sa prerayati mārutam” iti ||

Utpala: adhi || he nīlakaṇṭha niṣpratibandhaṃ cittam eva sārathir yatra, buddhikarmendriyabhedāc ca daśa bāhyāni karaṇāny evāśrayās turagā yatra, tathāvidhaṃ rathaṃ āruhya aṇur ātmā viṣayeṣu śabdādiṣu carati. puri śarīre. atha ca yathā kvacit pradeśeṣu tvadicchayaivātyarthaṃ carati tathaiva ca nivartate ||

Utpala: saka || dehināṃ śrotrādisthāneṣu sthitasya sakalasya bāhvāder adhiṣṭhātṛgaṇasya tvam eva guruḥ tvadāyattatvāt tasya, hṛdvyomni ca yogibhir niravalambanasthitir asaṃprajñātasamādhigrāhyas tvam evopāsyase ||

Utpala: nici || yathā ghaṭākāśe rajaḥprabhṛtibhir vyāpte sarvāṇi aṇūnāṃ paramāṇūnāṃ maṇḍalāṇi yogaṃ na yānti tathā tvadicchayā aṇumaṇḍalāni pudgalagaṇāḥ sukhādibhiḥ saṃśleṣaṃ na yānti, prakṛtir hi sukhaduḥkhai rajastamobhir yujyate. ātmā tu bhavadicchayā nety arthaḥ ||

Utpala: hṛda || tvaṃ hṛtpadme lakṣyamāṇaparivartavibhramaḥ sphuradrūpatayā dṛśyo, jagataś cāntarātmatāṃ gataḥ, pratatam avicchinnaṃ kṛtvā, ayanadvayāśrayāḥ dakṣiṇāyanottarāyaṇasaṃśrayāḥ vāmadakṣiṇastheḍāpiṅgalākhyanāḍisaṃśrayā vā gatīḥ karoṣi ||

Utpala: śriya || trayīmayaḥ ṛgyajuḥsāmarūpo nirāmayaś cātmā yasya tathāvidhasya raveḥ ṛṅmaye śriyaṃ dadhati sāmāny eva dīdhitayo yatra tathāvidhe maṇḍale nānāvidhaiḥ pratibhāsabhedaiḥ durjñeyaḥ aṇuḥ sūkṣmaḥ puruṣaḥ yajūṃṣi avabhāsase. yajūrūpas tvam tatrety arthaḥ. uktaṃ ca: “etad yan maṇḍalaṃ khe tapati dinakṛtas tā ṛco 'rcīṃṣi yāni L dyotante tāni sāmāny ayam api puruṣo maṇḍale 'ṇur yajūṃṣi |” iti ||

Utpala: sphuṭa || tvam eva dināni ṛtūn dakṣiṇottarāyaṇe saṃvatsarādikaṃ ca kurvan sūryaḥ san jagatīṃ vitapasi. eko 'pi dvādaśabhir bhedair vividhākhyatāṃ prāpto viṣṇumūrtiś ca. yad āhuḥ: “dhātāryamā mitro varuṇo 'ṃśumān bhaga indro vivasvān pūṣā tvaṣṭā savitā viṣṇur ity asya bhedāḥ” iti ||

Utpala: saka || he deveśa, śarīriṇāṃ ca bhavadupādhikā tvadviśeṣaṇāta evānupaplavā sthitiḥ yogataś cittavṛttinirodhād upalabhyate nānyathety arthaḥ. sakalāḥ aṇavaḥ pudgalāḥ tattvāni ca prakṛtyādīny eva vapūṃṣi yeṣāṃ tadārabdhatvāt ity arthaḥ; ata eva sā sthitis tridaṇḍavat parasparapratibandhinī: tridaṇḍaṃ yathaikatamadaṇḍābhāvāt sthitiṃ na labhate, tathā kevalair aṇubhis tattvair vā na sthitir ity arthaḥ ||

Utpala: praṇi || he īśa prajāpatīnāṃ sarveṣāṃ jagadanugrahecchayā ākṛtīḥ prāṇiśarīrāṇi nirmātum icchatāṃ tvadātmakā dhiṣaṇādayo devatā mano viviśuḥ. tvanmayabuddhyādipreritās te sarvaṃ kurvanti na svaśaktyety arthaḥ. ākṛtīr anyonyavivādena viplutāḥ. anyaḥ kālakāraṇatvena tā icchati anyaś cānyatheti ||

Utpala: pravi || yā tava vidyā sarvaśaktitvād anyāḥ sakalajñānavastuvedikāḥ vidyāḥ viveśa, yāṃ gatāḥ praviṣṭās, tatrāntarbhūtāḥ parasparam abhinnatvāt, tayā sadvidyayā mokṣapratibandhakacchidā aṇur ātmā śivatām eti tvatsāyojyaṃ yāti ||

Utpala: jaga || tava janakatve sthitasya janmaśūnyasthiteḥ ajasyāta evādyavasānarahitasya guṇānāṃ jñānādīnām ādiśabdāc ca kālakāmāntādīnāṃ karmaṇāṃ saṃbhave saty api kulāśrayā stutir na saṃbhavaty ajatvāt. atha ca ta eva guṇādayaḥ santi na ca kulam iti parihāsaḥ ||

Utpala: jana || janatāyā indriyād atikrānto yogidṛśyaḥ, ata eva śuddhagocaro yo dvyaṇukādibandhaḥ paramāṇūnāṃ, dvyaṇukatryaṇukapañcāṇukādiracanāt, tadgatasya carācararūpasya kāryasya darśanāt tava akārakātmanaḥ udāsīnasyāpi ghaṭakuṃbhakāravat tatkāraṇatvaṃ budhair anumīyate. yathā ghaṭaṃ dṛṣṭvā budhais tatkartānumīyate tathā dvyaṇukādikāryadṛṣṭyā tvaṃ kāraṇatvenānumīyase ity arthaḥ ||

Utpala: nija || tava niṣpratibandhasvecchāvyavahāriṇo 'ta eva niravagrahātmanaḥ svatantrasya prayojakaśūnyāṃ kartṛtāṃ paṇḍitā ūcuḥ. sarveśatvāt tavānyaḥ prerako nāstīty arthaḥ ||

Utpala: dadhu || adhikasya prabhūtasya lokottarasya vā avikalasya samastasya śaktimaṇḍalasya sthitirūpatāṃ bibhratas tava śaktileśe kṣubhite saty etat jagat prathitapūrvoktaṣaḍbhāvavikāraṃ sattvarajastamomayam udabhūt. yadā ca tvacchaktyullāsas tadā jagajjanmety arthaḥ. uktaṃ ca: L “śaktayaḥ śaktimāṃś caiva padārthadvayam ucyate | śaktayas tu jagat kṛtsnaṃ śaktimāṃś ca maheśvaraḥ ||” tathā: “sarvāsu niṣprakampāsu viśvaṃ suptam ivābhavat | ekāpi jātasaṃkṣobhā śaktir vivṛṇute jagat ||” iti ||

Utpala: ana || anaghā pūrṇā nirdoṣā vā svasya śaktivibhavasyāvasthitir yatra, tathā paśūnāṃ saṃsāriṇāṃ pāśānāṃ ca māyīyāṇavakārmaṇānāṃ bandhanānāṃ maṇḍalād vilakṣaṇātmanaḥ patisvarūpād, bhavata eva cetanācetanaṃ bhāvajātaṃ pravartate, na tv anyataḥ ||

Utpala: ava || jñānamarīcibhir avarugṇaṃ gāḍham ajñānatimiraṃ yena tathāvidhāt bhavata eva cetanācetanā bhāvavrātāḥ agner visphuliṅgā iva nirjagmuḥ ||

Utpala: tava || sāścāryātiśayā vibhutvasthitir yasya, nityatvaṃ ca prāptasyāpi tava sakalapadārthaniṣpādanakriyāḥ kramayaugapadyābhyāṃ ghaṭanayā virodhitvaṃ na dadhati. nityasya kramayaugapadyābhyām arthakriyānupapattir iti hi tārkikāḥ. tvam tu sarvaśaktitvāt krameṇa yugapac ca sarvabhāvān karoṣīty arthaḥ ||

Utpala: tvam a || adhiṣṭhitaṃ samastaṃ śaktimaṇḍalaṃ yena, tathā sthirā pañcamantramayā īśānasadyojātavāmadevatatpuruṣāghorarūpā dehasthitir yasya, tathāvidhas tvam eva brahmaviṣṇurudrarūpatayā jagat sṛjasi pālayasi nāśayasi ca. jananadvayena parāvararūpeṇa rahitaḥ. tad uktam: “dvidhotpattimatāṃ janma parāvaram ihocyate |”, tathā: “śivaḥ svabhāvanirmuktaḥ” iti ||

Utpala: kṣubhite || tvayi kṣubhite śaktirūpeṇollasite sati, guhā gahanatvān māyābhūmitvaṃ gatā. tataś ca balvajākhyatṛṇavat jagatsargāya prakṛtir utpannā. idaṃ ṣaṭtriṃśattattvavādimate uktaṃ: prakṛteś ca triguṇatvād rajjuguṇavad itaretarāśrayeṇa niścalā guṇāḥ. yathā rajjuḥ dvābhyāṃ tribhir uta guṇaiḥ kevalatayā na tu syād evaṃ ca prakṛtiḥ, iti yāvat bhaṇati ca, “anyo 'nyabhibhavāśrayajananamithunavṛttayaś ca guṇāḥ” iti ||

Utpala: dvyaṇu || tvaṃ nānāvidham aśeṣaviṣayaṃ dvyaṇukatryaṇukādiyuktiyuktaṃ ca kāryamaṇḍalaṃ kṛtavān, atisūkṣmadṛktvāc ca sarvārthajñānavaibhavānvitaś cānumīyase ||

Utpala: vibhu || he adhīśa, tvaṃ dviprakāramāyāśaktikalayā bhāvitasthāvarajaṅgamasthitiḥ. tathā hi vibhuśaktyā vyāpikayā sarvatrasthitaḥ, prabhuśaktyā ca kāryakartā ||

Utpala: avi || tava prabhor icchayā kadācid api kvacic ca prasarasyopaghātaghaṭanā na prāptā. sarvatra sarvadā ca sā niṣpratibandhety arthaḥ. avipannāḥ pūrṇāḥ śaktaya eva tantavaḥ tatrombhitāḥ sphurantaḥ sphuṭaṃ kṛtvā vigrahāḥ prāṇiśarīrāṇi akṣāṇīndriyāṇi bhuvanāny eva ca, puṣpāṇi yathā ||

Utpala: || madhu || he guhasya skandasya pitaḥ, madhukośasampuṭavat kṛtasthitiḥ māyā, kālaniyatikalāśuddhavidyādibhiḥ tattvaiḥ sampuṭarūpeṇa baddhā, ata eva gahanā. guhā māyā tvayaiva ca kṛtā, sā ca sthitibhedaṃ na kadācid eti. yad uktaṃ: “daivī hy eṣā guṇamayī mama māyā duratyayā” iti. sā ca samalānāṃ māyīyādiguṇatrayavatāṃ amalānāṃ ca jñānināṃ aṇugaṇānāṃ ātmatattvānāṃ bandhanamandirā. tad uktam: “madhukośapuṭākārā grantheḥ puṭaparamparā | aṇūnāṃ srotasāṃ caiva saivāśrayapadaṃ gatā ||” iti ||

Utpala: vasu || yathā bhūjalātapaprabhṛti anaghaṃ nirdoṣaṃ mṛgādibhir akhaṇḍitaṃ vā bījaṃ †aṅkurānto ... † janayati, mṛdādīnām api ghaṭādijananaṃ tvadicchayety arthaḥ ||

Utpala: apare || anye, sāṃkhyāḥ, samastaśaktimaṇḍalāśritasvarūpād avyayāc cākṣayāt prakṛtitattvād buddhyādikāryacakraṃ pravartate, ity āhuḥ. yad uktaṃ: “prakṛter mahāṃs tato 'haṅkāra” ityādi. tac ca mahadādi prakṛter abhinnarūpaṃ, kāraṇasadṛśatvāt kāryasya. etat sāṃkhyamataṃ dūṣayann īśvarasyaiva kartṛtvaṃ pratipādayann āha:

Utpala: nija || acetanaṃ vastu prakṛtitattvaṃ nijasya mahadādeḥ kāryacakrasya karaṇe kim iva kartṛtāṃ pratipadyate, kartā hi cetana ucyate, ataś caitanyātmakaṃ tvām eveśvaraṃ saṃsāriṇām utpattihetuṃ kathayanti ||

Utpala: prala || sarvajagatkṣayasy anaṣṭajñānajyotir avichinnavaibhavaś ca tvam evātmatattvasampado hetur bhavasi, yathā ūrṇanābho jālakāraḥ tantusaṃhateḥ ||

Utpala: jaga || apare paṇḍitā bhavata īśvarasya samānadharmatāṃ gataṃ puruṣam abhidadhati. yato jagatām ekaṃ kāraṇaṃ, na vidyate cānyat kāraṇam ātmani yasya tathāvidham, akṣayaṃ ca, tathā guṇaiḥ sattvādibhiḥ daśābhiś ca bhāvavikārarūpābhiḥ rahitaṃ, tam āhuḥ, evaṃvidho hīśvaraḥ ||

Utpala: prakṛtī || apare bauddhāḥ samyag udayo yasmāt tathāvidhaṃ bhavantam eva niḥśreyasahetuṃ kathayanti, prakṛtyā īśvarasya ca tathā tadubhayasya caitanyādeś ca yac ceṣṭitaṃ tatprapañcena rahitam ata evānupādhikaṃ nirviśeṣaṇaṃ, pramādvitayena pratyakṣānumānābhyāṃ niścitaṃ, tritayātmakaṃ pramāṇaprameyapramitirūpaṃ, vaibhāṣikasautrāntikayogācārarūpaṃ vā. kecit tu bhavadātmakam iti paṭhanti. uktaṃ ca: “prakṛtīśobhayātmādivyāpārarahitaṃ calam | L karmatatphalasaṃbandhavyavasthādisamāśrayam || 1 || guṇadravyakriyājātisamavāyādyupādhibhiḥ | śūnyam āropitākāraṃ śabdapratyayagocaram || 2 || spaṣṭalakṣaṇasaṃyuktapramādvitayaniścitam |” iti ||

Utpala: ana || he bhava mokṣaprada, apare, mīmāṃsakāḥ, nisargavādinaḥ “na kadācid anīdṛśaṃ jagad” iti svabhāvavādinaḥ, śikhipiñchasaṃsthitivad anapekṣitakāraṇāntaraṃ saṃsāriṇāṃ janma pracakṣate, yathā mayūrapiñchaṃ na kaścic citrayati api tu svabhāvacitraṃ tathā bhavinām utpattir, ity arthaḥ. te ca mīmāṃsakāḥ gṛhītavitathatāḥ, tvaṃ hitasya kāraṇam iti paramārthaḥ ||

Utpala: prala || apare, vaiyākaraṇāḥ, uktaviśeṣanaṃ śuddhaṃ śabdatattvam eva jagatkāraṇaṃ viduḥ. yad uktaṃ: “anādinidhanaṃ brahma śabdatattvaṃ yad akṣaraṃ | vivartate 'rthabhāvena prakriyā jagato yataḥ ||” iti ||

Utpala: sama || apare, paṇḍitadhiyo bauddhāḥ, saṃvidam eva kevalāṃ jagatsthitiṃ kathayanti, “vijñānam evedaṃ sarvam” iti, ataś cotpattisthitivināśarūpasya trayasya bāhyavastugocarasyāvamardino, vijñānavāditvād bāhyārthadūṣakāḥ. saṃvidaṃ ca samayāntare 'py, anyabauddhamatabhede 'py, aghaṭamānakalpanāṃ śabdasaṃbodhaśūnyāṃ nirvikalpakarūpatvāt ||

Utpala: ubha || sthiratattvaniścayā buddhir yeṣām ata evobhayātmakena jñānajñeyasvarūpeṇa †rāgadveśābiddha . . bhena vā graheṇābhiniveśena rahitaṃ ceto yeṣāṃ te cāvya . . bhedā . . . darśanasthitiṃ† saṃśritya tava guṇena sarvajñatvādinā rañjitāḥ santa ātmanaḥ kṛtakṛtyatvaṃ manyante. mādhyamikadarśane hi na jñānaṃ jñeyam astīti sthitiḥ ||

Utpala: aṇu || kecana, vedāntinaḥ, bhavatprasādāpannajñānajyotiṣo L 'ṇum ātmānam aindriyakaṃ pratyakṣam evāhuḥ. apare tu tatpratipādinaḥ viplavāt tanmatabhedāt tvadāspadaṃ tad ātmatattvam, abhimānamātrarūpatvād apratyakṣam āhuḥ. sukhy ahaṃ duḥkhy aham ity ahaṅkāramātratvān nātmā pratyakṣa ity arthaḥ ||

Utpala: na bahiḥ || apare kṛtabuddhayaḥ, kṣapaṇakāḥ, tava śāśvatatvasya vibhutāyāś ca viparyayam anityatvaṃ avyāpakatvaṃ cāhuḥ. yatas ta evaṃ niścitāḥ śarīrapariṇāmād bahir aṇu manāg api cittvaṃ na kadācid dṛśyata iti. †kṛtaniścayāḥ pare, lokāyatikās, tava śāśvatatvasya† te hi śarīrāśrayam eva caitanyaṃ madaśaktivad ity ācakṣāṇāḥ. kṛtadhiya iti ca teṣām upahāsaḥ ||

Utpala: vyava || anye 'py avadātabuddhaya ekānekādibhedena nānāvidham ātmatattvaṃ tvām eva kathayanti. mohagahanam ajñānatimiraṃ, kaṇabhakṣaḥ kaṇādaḥ ||

Utpala: apare || nāstikāśayāḥ, “nāstīśvaraḥ” iti yeṣām āśayaḥ te, lokāyatikāḥ, saugatāḥ, tava sattām anudayādibhiḥ sādhanair apāhnuvata nyagūhan. anudayo 'prakāśanam. ādigrahaṇād anupalambhādīnāṃ parigrahaḥ. na caiṣām īśvarasādhakam anumānam ity arthaḥ. salakṣaṇavilakṣaṇatayā sādhyasāmānyarūpayā nibaddhā anavasthā anavasthitir yatra tādṛśī manujakalpitasya ūhasyānumānavṛttir yeṣām. tathā hi tanubhuvanakaraṇāni buddhimatkartṛpūrvakāṇi saṃniveśaviśiṣṭatvād ghaṭavad ityādirūpa īśvarānumāne buddhimatkartṛmātrasya tatkaraṇatvamāne siddhasādhyatā, tadviśeṣasya ca †tannimittatayā sādhyāyām†. uktaṃ ca: “viśeṣe 'nugamābhāvaḥ sāmānye siddhasādhanam” iti ||

Utpala: pratipanna || tvadvyatirekeṇa bhinnaparikalpitasya kāraṇasya pratibhāsena javañjavavirāmasya saṃsāranivṛtter bhāvanā yais tvadanugrahojjhitatvād anye śivamārgaṃ nādhyavasasuḥ, tavaiva muktiṃ prati hetutvāt.

Utpala: bhagava || “tamo moho mahāmohaḥ tāmisraś cābhidhīyate | tathā paro 'ndhatāmisro ghoraḥ pañcavidhas tv asau” iti pañcaparvaṇi viparyaye bhrāntau sthito 'sāv aṇuḥ duṣprāpam api padaṃ prāpya na kiṃcid adhigacchati, mūḍhatāṃ pratipadyate, prasādavimukhe tvayi sati ||

Utpala: api yatna || mahadādi tattvamaṇḍalam eva pratānaḥ pariṇāmarūpaḥ tatkṛtam ajñānādi nṛṇām, ātmatattvānāṃ, yatnenādhigataṃ yena tādṛśo 'pi puruṣaḥ pāśavamatānusāritām eti kapilādimunipraṇītaṃ śāstram anurudhyate, tvacchāstrāmṛtabahiṣkṛtatvāt paśuśāstrapariśīlanena baddha eva vyavatiṣṭhata ity arthaḥ ||

Utpala: avi || paśumatāny eva sūkṣmāḥ pradīpās tair anapāstamohāndhakārāḥ puruṣasaṃhatayaḥ śivaśāstrajyotiṣo 'nadhigamāt tamasaiva saṃpapṛcire saṃpṛktāḥ ||

Utpala: prakṛtir || sāṃkhyamate prakṛtir jaḍā puruṣo 'py udāsīnaḥ iti, tayoḥ karaṇāsaṃbhavāt tvam eva, caitanyena kriyayā ca prathito, bhogāpavargakāritayā sarvān anugṛhṇāsi. tvam evānugrahaṃ karoṣīty arthaḥ ||

Utpala: api || anye tvacchāstrāmṛtabahiṣkṛtāḥ, ata eva dharmaleśasya caitanyādeḥ samatayā ātmatattveśvarasāmyena bhramāt puruṣeśvarayor abheda eva sthitās, tayor antaraṃ jñātuṃ kṛtinaḥ kuśalā na bhavanti. ye tvadadhigataśivaśāstrebhyo bhavān īśvaraḥ anyaś ca pumān iti jānanti, etad eva samarthayitum āhuḥ ||

Utpala: dvividha || he bhava, śivaśāsanaprakāśako vedādītaramataprakāśakaś ca dvividho hi śabdarāśiḥ. tatra yo bhavatpraṇetṛkaḥ śivanirmitaḥ parāparayoḥ mokṣabhogarūpayoḥ phalayoḥ L hetutāṃ pratipadyate netaraḥ. kecit tu dvividho 'pi sa bhavatpraṇītaḥ śivetaramatabhedāc ca yathāsaṃkhyena mokṣabhogaphalahetur ity āhuḥ ||

Utpala: hari || tvadanugraheṇopahitaṃ tāratamyaṃ bhajate yā tathāvidheha jagati catūrūpā saṃvit, jñānajyotiḥ, pravartate, indragopakādibhiḥ prakarṣeṇa kṛto yaḥ prakāśaḥ tattulyā, tatsamā, tādṛśā sā utpadyate. tathā hi alpatamānugrahāṇāṃ khadyotavat alpatarāṇugrahāṇāṃ śukrādigrahavat tīvratarānugrahāṇāṃ candrādivat tīvratamānugrahāṇāṃ sūryavad jñānam utpadyate. tad uktam: “khadyotavan manuṣyeṣu grahavan munimaṇḍale | devānāṃ somavat sūryanirmalā parameṣṭhini ||” iti ||

Utpala: akathaṃ || anye kuśalā aviparyayāgamāt śivaśāstrāt yogamārgeṇa akathaṅkathatvaṃ tattvaviveke nissaṃśayatvaṃ prāptāḥ, tvadguṇaiś ca jñānādibhir dattāñjanā iva, punar āvirbhāvatirobhāvabhāgino na bhavanti kecana ||

Utpala: gagana || yathā gaganasthaḥ sūryaḥ kiraṇaiḥ kṣatatamāḥ tathā tvaṃ hṛdākāśaviṣṭare kṛtāvasthānaḥ †apahastitāhīnaḥ† samastaṃ cātmano vibhutvaṃ darśayitukāmaḥ prasannaḥ san nirmalair kiraṇair ātmatattvasaṃhater jñatvam unmīlitavān. ātmatattveṣu jñatā tāvat sthitā sā tu māyīyādimalatrayeṇa pihitatvaṃ tvaṃ tu tad vināśya tām unmīlayasi, ity arthaḥ ||

Utpala: citi || tvayā aṇumaṇḍalasya sakalārthavittvena caitanyaśaktiṃ sarvārthakārakatvena ca kartṛtām anugṛhṇatātmasādṛśyaṃ kriyate. anoś caitanyakartṛtve tāvat staḥ, te tv apūrṇe, anabhivyakte ca. tvayā tu te pūṛṇarūpe prakāśya tasyeśvarasāmyaṃ kriyate, ity arthaḥ ||

Utpala: bhava || he īśa, tvatto 'kṣayāt sadasadrūpāc ca ninādarūpatāṃ śabdabrahmatvaṃ bibhrat yat śāstraṃ niryayau tatstham akhaṇḍaṃ niravadyaṃ cārthatattvaṃ sadāśivo bubudhe. yad uktaṃ: “adṛṣṭavigrahāc chā L ntāt śivāt paramakāraṇāt | nādarūpaṃ viniṣkrāntaṃ śāstraṃ paramadurlabham | sadāśivaś ca tad veda ...” iti ||

Utpala: krama || tac ca śāstram āścaryabhūtaṃ krameṇa caturbhiḥ sadyojātavāmadevāghoratatpuruṣākhyair mukhair giriśaḥ provāca. bahubhedair mantrais tantrair vā saṃhitādiśāstraṃ durjñeyaṃ. anantapramukhaṃ yad rudramaṇḍalaṃ tasya yaḥ sthiraḥ sampradāyaḥ pāramparyopadeśaḥ tadgato vastuvistāro yatra tat, tair evādau loke tattadavatāraṇāt. ananteśādayo 'ṣṭau vidyeśvarāḥ. yad uktam: “ananteśaś ca sūkṣmaś cāpy ekarudraḥ śivottamaḥ | ekamūrtis trinetraś ca śrīkaṇṭhaś ca śikhaṇḍakaḥ ||” iti ||

Utpala : saka || evaṃvidhair akṣarair grathitā mātṛkā sarvāgamānāṃ māteva varṇasaṃhatiḥ tvanmukhodbhūtā śaktir, iti dvābhyāṃ kriyā. sakalasyārthavādasyābhidheyakathanasya nijaśaktitāṃ sahajasāmarthyaṃ prāptaiḥ tadārabdhatvāc chabdasya cārthapratītihetutvāt. yad uktam : “na so 'sti pratyayo loke yaḥ śabdānugamād ṛte” iti. kecit tu arthavādaśabdena vidhipraśaṃsārūpāṇi vākyāny āhuḥ, yathā pālāśyā juhvā juhuyāt “yasya parṇamayī juhūr bhavati na sa pāpaṃ ślokaṃ śṛṇoty”-ādīni. sahakāribhiś ca varṇāntaraiḥ saṃhitā viśeṣavṛttir yeṣāṃ, yathaikasya yūpaśabdasya yakāraparityāgāt kakārabhakārasakārādinyāsāc ca kūpabhūpasūpādiviśiṣṭārthāv avabodhakatvaṃ bhavati. kroḍīkṛtākhilavāṅmayatvāc ca viśvarūpatām iva prāptaiḥ. kecit tu śikṣākāroktapratyekavarṇabhedād vaiśvarūpyam āhuḥ, tadyathā ekasyākārasyāṣṭādaśa prabhedā iti. kṛtaḥ sādhakānāṃ narendrāṇām abhyudayo yena mantramaṇḍalena tasya prakṛti rūpo 'ṣṭavidho vargaḥ akacaṭatapayaśātmaka eva śarīraṃ yasyāḥ tadārabdhatvān mātṛkāyāḥ, trividhena cātmavidyāśivapūrṇena tattvena pariveṣṭitāvasthitiḥ tatrākārādivisargaparyantam ātmatattvaṃ kakārādimakārāntaṃ vidyātattvaṃ yakārādihakārāntaṃ ca śivatattvam iti ||

Utpala: bhavadā || he bhava tvanmukhotthamātṛkākṣaropanibaddhā mantrāḥ, yadā kṛtakṛtyatvād upekṣyante, tadā mokṣāya bhavanti, yadā tu bhogāyāpekṣyante, tadā saṃsāropabhogadāyinaḥ ||

Utpala: dhruva || dhruvam anapāyi ūrdhvavarti ca sarvātītaṃ mokṣākhyaṃ padam āroḍhukāmānāṃ śarīriṇāṃ tvayaiva nikhilavastupaddhatiḥ ṣaṭtriṃśattattvamālaivādhirohiṇī kṛtā. tattvajñānād avaśyaṃ niḥśreyasaprāptiḥ. nijā śaktiḥ śivaśaktir eva bhittis, tadāśrayā niḥśreṇir bhitty†ādinānāste† ||

Alaka: ...vidhāya sthita ity āścaryakṛt kasya na bhavān || ||

Utpala: api || tvaṃ vālāgraśatāṃśaparimāṇakāyo 'py eka eva yat ṣaḍupādhikāṃ ṣaḍvidhaviśeṣabhinnāṃ paddhatiṃ vidhāya sthita, ity āścaryam. ṣaṭ paddhatayas tattvādyāḥ. yad uktam: “tattvapadamantravarṇā bhuvanāni kalāḥ ṣaḍ adhvānaḥ” iti. kecit tu “sarvajñatā tṛptir anādibodhaḥ svatantratā nityam aluptaśaktiḥ anantaśaktiś ca” iti ṣaṭ paddhatayaḥ ity āhuḥ ||

Alaka: anantaḥ sarvarudrādhipas tvatpracodita eva māyāṃ sattvādiguṇatrayamayīṃ prathamam akṣobhayat, tatas tadādi māyātattvādi sitaṃ sattvaguṇasahitam asitaṃ rajastamomayaṃ ca jagat pṛthivīparyantam asṛjat, ity āgamebhyaḥ śuśruma śrutavantaḥ. uktaṃ ca: “anantakṣobhitā māyā prakṛtiṃ kṣobhayati” ityādy upakramya “raso jalaṃ kṣobhayati, gandhaś ca pṛthivīṃ tataḥ.” ityantam || 118 ||

Utpala: bhava || vayam āgamikebhyaḥ iti śuśruma, yathā tvatprerito L 'nantākhyaḥ vidyeśvara ādau sattvādiguṇavatīṃ guhāṃ māyāṃ kṣobhitavān. anantaraṃ sa eva sitaṃ sattvamayam asitaṃ rajastamomayaṃ tadādi māyātattvādi vasudhāparyantaṃ ca jagad asṛjad iti. evaṃ hi ṣaṭtriṃśatattvotpattim āhuḥ, yathā: śivaḥ, śaktiḥ, sadāśivaḥ, īśvaraḥ, śuddhavidyā, tato māyā, kalā, rāgaḥ, niyatiḥ, kālaḥ, aśuddhavidyā, puruṣaḥ, prakṛtiḥ, buddhiḥ, ahaṃkāraḥ, manaḥ, buddhikarmendriyāṇi daśa, tanmātrāṇi pañca, sṛṣṭikrameṇānulomavṛttyākāśādīni pañca mahābhūtānīti. ||

Alaka: śivasya śaktayo, vāmādyā devatāḥ, tattadrūpāḥ kriyāḥ kurvanti. tābhir eva karaṇabhūtābhiḥ kriyābhir jagad etad anantākhyo mantranāyakas tvadicchayā kṛtavān. uktaṃ ca: “śivaśaktikriyāyuktaḥ sarvamantrādhināyakaḥ | ananto vidadhe kṛtsnaṃ jagad bhagavadīritaḥ ||” iti || 119 ||

Utpala: sura || yāḥ śivaśaktayas tattadātmikā nānāvidhāḥ kriyāḥ kurvanti, tābhir eva, tvadicchayā ca, ananteśākhyaḥ sarvamantranāyakaḥ idaṃ jagan niṣpāditavān. tvatpreritaḥ tvacchaktyupādānakāraṇaś ca sa sadasad akṛtety arthaḥ. yad uktam: “śivaśaktikriyāyuktaḥ sarvamantrādhināyakaḥ | ananto vidadhe kṛtsnaṃ jagad bhagavadīritaḥ ||” iti ||

Alaka: mantranāyakā ananteśādayo jagatāṃ sthiter maryādāyāḥ pālanāditas tvadicchayaiva na calanti, tvatpreritā eva ca rakṣādihetavo bhavanti. vinirodhaḥ śaktivigamād akiṃcitkaraṇatā || 120 ||

Utpala: bhava || mantranāyakā ananteśādyāḥ tvadicchayaiva jagatāṃ vinirodhavartinām ajñatvāt sapratibandhānām ata eva pāratantryaṃ prāptānāṃ satāṃ sthiteḥ maryādāyā avasthānasya vā rakṣādikartāro na kila calanti. tvadicchāpreritās te jaganti rakṣantīty arthaḥ, yad uktam: “ananteśādayo hy ete sarvamantrādhināyakāḥ | jagatsthitiṃ prakurvanti śivecchāvidhicoditāḥ ||” iti ||

Alaka: kramāc ca kamalāsanaprabhṛtayaḥ surendrā brahmācyutaharāḥ pūrvoktadhātutrayamayatvena sattvarajastamomayatayā vā trividhāyā bhuvanasaṃhater janmādihetavas, tvatpreritā eva. sāñjanās tvadapekṣayā samalāḥ, L paśurūpatvāt. uktaṃ ca: “brahmādayo 'pi deveśāḥ sāñjanās parameśvarāt | tvaccoditā bhavanty ete jagajjanmādihetavaḥ ||” iti || 121 ||

Utpala: kama || padmāsanādayaḥ sureśāḥ brahmaviṣṇurudrās tvadapekṣayā sāñjanāḥ, paśurūpatvāt samalāḥ, tvatpreritāḥ santaḥ sattvarajastamomayadevamānuṣatiryagbhedena trividhasthiteḥ bhuvanasaṃhater utpattyādihetavaḥ. yad uktaṃ: “brahmādayo hi deveśāḥ sāñjanāḥ parameśvarāt | taccoditā bhavanty ete jagajjanmādihetavaḥ ||” iti ||

Alaka: tavāṣṭamūrtitvāt mūrtitvam upagatā ye vahnipavanaravayas, tebhyaḥ “śikṣā kalpo vyākaraṇaṃ jyotiṣaṃ chandasāṃ sthitiḥ | niruktaṃ ca” iti ṣaṇṇāṃ aṅgānāṃ sauṣṭhavena sahitā trayī ṛgyajuḥsāmalakṣaṇā yathākramam udapādi prakaṭībhūtā. uktaṃ ca:“agnivāyu ............” || 122 ||

Utpala: tava || bhavato 'ṣṭamūrtitvād ye dahanapavanārkā mūrti L tvam upagatās tebhyo yathākramaṃ sarveṣām aṅgānāṃ śikṣākalpavyākaraṇaniruktajyotiśchandasāṃ sauṣṭhavena yuktā pavitrā trayī ṛgyajuḥsāmarūpā kilotpannā. tathā ca smṛtiḥ: “agnivāyuravibhyaś ca trayaṃ brahma sanātanaṃ | dudoha yajñasiddhyartham ṛgyajuḥsāmalakṣaṇam ||” iti ||

Utpala: kara || he īśa, yo dharmo vedavartmanā sādhyate, taṃ dharmam āgamakuśalās tava sahajam anaśvarasthitiṃ ca viduḥ. yad āhuḥ: “aiśvaryaṃ caiva dharmaś ca sahasiddhaṃ catuṣṭayam” iti. śrutimārgeṇa karaṇātmatāṃ sādhakatvam upagatena. yad uktaṃ: “dharme pramīyamāṇe hi vedena karaṇātmanā” iti ||

Utpala: bhava || sphuṭaṃ kṛtvā kalāditriṃśattattvamātṛtvāt sārvakāmikā yā guhā māyā saiva bilaṃ tadantarapratibaddhāni citrāṇi bhuvanāny evāśrayo yeṣāṃ tathāvidhāḥ karaṇabhedavartinaś ca sargādyakhilavyāpārāś cakravartino bhuvanacakraṃ vartayanti ye te, brahmādayo 'nanteśādayo vā, tva L dicchayā sukhaṃ tiṣṭhanti. yad uktaṃ: “tasya devādidevasyānugrahāt sukham āsate” iti ||

Utpala: bhava || prakṛtisvabhāvaparamāṇukarmaṇāṃ, yathāsaṃkhyena paraiḥ, sāṃkhyamīmāṃsakavaiśeṣikabauddhair, uditāpi kartṛtā teṣāṃ, tvayānadhiṣṭhitātmanām ananugṛhītānāṃ śapathair api sā na ghaṭate, vicetanatvāt teṣāṃ, kartuś ca sacetanatvāt; yadā tu tvayādhiṣṭhīyante tadā teṣāṃ kartṛtvam upapadyate ||

Utpala: kala || pudgalaḥ aṇuḥ kalātattvenodbalitacaitanyo, vidyātattvena ca darśitaviṣayo, rāgākhyatattvena ca rañjitamanāḥ prakṛtibhogabhāk bhavati. yad uktaṃ: “kalodbalitacaitanyo vidyākhyāpitagocaraḥ | rāgeṇa rañjitātmāṇuḥ bhuṅkte prakṛtijān guṇān ||” iti ||

Utpala: trivi || māyaiva bilam, tasmād apakṛṣya pudgalagaṇān tvam eva malatrayam apāsyāvadātatāṃ śuddhatvaṃ nayasi, yatas tān triprakāreṇa kañcukenāvaraṇabhūtena malena vyāptān, yad uktaṃ: “te kalārāgavidyākhyaiḥ kañcukais tribhir āvṛtāḥ” iti, gahano viṣayabhoga evāvaṭas tadavapātinaḥ ||

Alaka: paśūn saṃsāriṇaḥ. tvam anugrahodgrathitapāśasaṃcayān †..... śaṣpamaṇḍalīm adhomukham icchantaḥ† kenacin muktarajjavo 'nugrahād eva mocyante. pañcadharmaṇaḥ pañcaguṇān, yad uktam: “kañcukatritayāviddhaḥ kālena kalitas tathā | niyatyāliṅgitaś ceti pañcadharmā paśuḥ smṛtaḥ ||” iti || 127 ||

Utpala: ava || viṣayāḥ śabdādaya eva śaṣpasaṃhatiḥ, tadabhilāṣukān ata evādhomukhasthitīn saṃsārāvasannān asvatantrān paśūn saṃsāriṇaḥ tvam evānugrahonmuktapāśarāśīn na na mocayasy api tu muktīkaroṣi. anyo 'pi paśūn gāḥ rajjvādibandham apāsya mocayati. tāṃś ca pañcadharmaṇaḥ, yad uktaṃ: “kañcukatritayāviddhaḥ kālena kalitas tathā | niyatyāliṅgitaś caiva pañcadharmā paśuḥ smṛtaḥ ||” iti ||

Alaka: aṇūnāṃ jīvānām iyaṃ caitanyaśaktiḥ sukhaduḥkhabhedena dviprakārā. viṣayavarti cakṣurādīndriyagocaram eva vastu sat pratipadyate sad iti jānāti, deśādivyavahitasyāparijñānāt. tāṃ tu sakalāṃ, kalātattvena veṣṭitāṃ, tvadīyā svargāpavargasādhakatvena dviprakāraiva citiśaktir askhalitavyāpārā niṣkalā ca prabodhayati, vyavahitavastudarśanayogyāṃ saṃpādayati. || 129 ||

Utpala: prati || aṇutattvasaṃbandhinī caitanyaśaktiḥ sukhaduḥkhabhedād dvividhātmatāṃ gatā askhalitavyāpārā satī gocaragataṃ sac ca vidyamānaṃ vastu pratibudhyate. yad uktaṃ: “pratyakṣaṃ vartamānaṃ ca gṛhyate cakṣurādinā” iti. tāṃ tu sakalāṃ samalāṃ tvadīyā niṣkalāścaryarūpā citiśaktiḥ prabodhayati darśanapathāvatīrṇasadrūpavastugrahaṇasamarthām āṇavīṃ citiśaktiṃ tvacchaktir vyavahitādivastudarśanayogyāṃ karotīty arthaḥ. kecit tu “āṇavī citiśaktir vastv asad api avidyāvaśāt sad iti jānāti; tāṃ tu tvaccicchaktiḥ prabodhayati avidyāto nivārayati.” ity āhuḥ ||

Alaka: paddhater abhividhau tattvādiṣaṭprakāram adhvānam abhivyāpya sthito 'pi sūkṣmaḥ puruṣaḥ svaviṣayād anyad upabhoktuṃ na samarthaḥ, ka L lāśaktyā niyantritatvāt || 130 ||

Utpala: api || eṣo 'ṇuḥ sūkṣmaḥ puruṣaḥ paddhater abhividhāv api vyavasthitaḥ saṃsārabhogamārgaṃ vyāpyāpi sthitaḥ pāśarūpatvāc cicchaktikalayā niyantritaḥ san svaviṣayād anyad bhoktuṃ na samarthaḥ ||

Alaka: yasya manas tvadviṣaye bhāvavinibandhanaṃ nibaddhabhakti, na sa māyayā tayā viḍambyate, paribhūyate. kayā tayety āha: yāpoḍhaparamārthasya saṃvṛtimato bhāvasya satsthitiṃ satyarūpam iva sthānaṃ prakāśayati. yaiva ca sphuritarūpaṃ satyabhūtam api vastu sthagayati, rūpāntareṇāvabhāsayati, vyāmoharūpatvāt. apoḍho nirastaḥ || 131 ||

Utpala: vivṛ || yasya manas tvayi bhāvanibandhanaṃ bhavadbhaktibhāvitaṃ, sa tayā tvanmāyayā na viḍambyate. yā māyā apoḍhaparamārthāṃ tattvaśūnyām apy avidyāvaśāt satīm ivāviṣkaroti sthitiṃ tathā sphuritarūpaṃ satyabhūtam api vastu sthagayaty eva ||

Alaka: sukhasaṃvittir evāmṛtanadījalāni taiḥ prakṣālyamānarūpāś caitanyavartino malā māyīyādayaḥ sarvato nivṛttim āpnuvanti tvadicchayaiva.

Utpala: sukha || he bhava, sukhasaṃvid evāmṛtanadī tajjalair abhiṣicyamānavapuṣaḥ santaś caitanyasamavetāḥ malā māyīyādayas tvadicchayā sarvato nivṛttiṃ prāpnuvanti, yathā vastrādisamavetā jalaprakṣālyamānā malā nivartante.

Alaka: śākto vibhavaḥ śaktīnaṃ mahimā. sa pratipanno bhaktyavalambito yais te tvayā prasannenānugṛhītasaṃvinmayadṛṣṭayo 'ṇavo jīvāḥ svargādiṣv apy upapattidhāmasu janmasthāneṣu karmaphalabhujo na bhavanti, muktatvāt || 133 ||

Utpala: prati || āśritaśāktavaibhavās tvayā prasannena satā anugṛhītacidrūpadarśanā aṇava ātmatattvāni teṣu nānāvidheṣūpapattisthāneṣu tanukaraṇabhuvaneṣu śubhāśubhakarmaphalabhogino na bhavanti, muktatvāt ||

Alaka: amṛtaṃ muktibījam dharmaḥ, tatsravaṇād dharmameghatvam āgate tvayi sati, ātmabinduḥ śucimauktikātmatām eti, “vivekakhyāter dha L rmameghaḥ samādhiḥ” iti dharmameghābhidhasamādhipratilambhottarakālaṃ śuddhamuktasvabhāvatāṃ pratipadyate. guhāśaye hṛtkuharavartini. sphuṭā jñānātmikā śaktir eva śuktiḥ prāṇibhedas tayā kṛtasaṃskṛtir viśadīkṛto 'ṇur eva binduḥ, tadākāratvāt. darīvartini ca jalade jalam ujjhati sati śuktyudareṇa jalabinduḥ śuddhamuktāphalatvaṃ pratipadyate. amṛtaṃ salilam api. muktiḥ prayojanaṃ yasya sa mauktikaḥ, muktaiva mauktikam. ekatra “prayojanam” iti prāgvatīyaṣ ṭhañ. ṭhag aparatra, vinayādipāṭhāt || 134 ||

Utpala: tvayi || bhavati dharmajaladatvaṃ puṇyameghatvaṃ prāpte tathā jñānāmṛtaṃ kṣarati guhāśaye ca hṛtkuharaśāyini athavā guhāśaye hṛtsthāne jñānāmṛtaṃ sravati sati sphuṭā tvanmayī jñānātmikā śaktir eva śuktiḥ prāniviśeṣas tayā kṛtasaṃskāraḥ aṇuḥ pudgala eva binduḥ śucimauktikātmatāṃ śuddhanirmuktasvarūpatvam eti. meghe ca varṣati jalabinduḥ śuktipatito muktāphalatvaṃ yāti. mauktikam iti muktiḥ prayojanam asyeti ṭhañ, aparatra muktaiva mauktikaṃ. pātañjalaiś coktaṃ “prasaṃkhyāne 'py akusīdasya sarvathā vivekakhyāter dharmameghaḥ samādhir” iti ||

Alaka: anye viṣayāḥ śabdādayaḥ. tadupasaṃhārād anupaplutair anudriktair acapalaiḥ śāntair ātmabhir antararūpaiḥ karaṇair manaḥprabhṛtibhir L uditā sthitiḥ praśamo yasya tādṛśaḥ kuśalas tvām eva vivicya sakalārthadṛk, atītānāgatādivastudarśī, bhavati yat, tad āścaryam || 135 ||

Utpala: upa || parihṛtāḥ anye bāhyāḥ śabdādayo viṣayā yenāta evānupaplutaiḥ niścalaiś cāntarātmakaraṇaiḥ manaḥprabhṛtibhir antaḥkaraṇair labdhodayā sthitir yasya; tathāvidhaḥ paṇḍito bhavantam eva kevalam avalokya tān samastān atītānāgatavartamānān arthān paśyati, tad āścaryaṃ. tvaddarśanāt sakalārthadarśanaṃ bhavatīty arthaḥ ||

Alaka: ātmaiva sūkṣmatvāt paramāṇus, tadāśrayāṃ māyīyādimalavāsanāṃ tavaiva śaktir vyapanetum kṣamā || 136 ||

Utpala: smṛti || smaraṇamātrād api saṃsārabandhacchedakasya tavaiva jñānātmikā śaktir ātmāśrayāṃ paramāṇvāśrayāṃ ca mayīyādimalavāsanāṃ tāmravartinīṃ kālikām iva nivārayituṃ kṣamā. yathā tāmrasthā kālikā pāratādinā nivāryate, tathātmaparamāṇusthā malavāsanā tvacchaktyety arthaḥ ||

Alaka: yathā tāmrasya suvarṇarūpatāpattau punar na tāmratā, tadvad ātmatattvasya tvadicchayā svacchīkṛtasya punar na malavāsanāyogaḥ. uktaṃ L ca: “rasaghṛṣṭaṃ yathā tāmraṃ na bhūyas tāmratāṃ vrajet | evaṃ yuktaḥ śivatvena na bhūyaḥ paśutāṃ vrajet ||” iti | ṛcchati vrajati || 137 ||

Utpala: pari || svām ātmīyāṃ malarūpāṃ vāsanāṃ punar ātmatattvaṃ na rcchati na prāpnoti ||

Alaka: yathā kaścid uparivartī kūpāntarapatitaṃ ghaṭaṃ rajjvā samuddharati, tathā tvaṃ prakṛtitattvacyutam ātmānam oṃkāreṇa. yad uktam: “kūpavat prakṛtiṃ vidyād ghaṭavat puruṣaṃ tathā | rajjuvac ca tathoṃkāraṃ śivo 'ṇum anukarṣati ||” iti. yas tu kūpe srastaṃ ghaṭādi tata uddharet, sa hi karaṇasahitaḥ; tvaṃ tu tathā neti citram adaḥ || 138 ||

Utpala: prakṛti || prakṛtiḥ pumān praṇava ity amī yathāsaṃkhyaṃ kūpaghaṭarajjuvat sthitāḥ. tvaṃ tu yat taduparisthitaḥ san indriyagrāmarahito 'pi dṛḍham apakarṣasi, tad āścaryaṃ. yathā kūpapālaka uparivartī kūpād rajjvā jalaghaṭam ākarṣati tathā tvaṃ prakṛtikūpapatitam ātmatattvam oṃkārarajjvāpasārayasīty arthaḥ. tad uktaṃ: “kūpavat prakṛtiṃ vidyād ghaṭavat puruṣaṃ tathā | rajjuvac ca tathoṃkāraṃ śivo 'ṇum apakarṣati” iti ||

Alaka: asau kalātattvapariṇatir antaraṅgabahiraṅgarūpatvād dviprakārā. tatra yadā māyā kalārūpeṇa pariṇamati, tadā kalārūpāvacchāditatanur māyaiva kalāpariṇatir ity ucyate, kalā cāsau pariṇatiś ceti kṛtvā. tadā ca tasyā antaraṅgabhāvaḥ. yadā tu kalāyā rāgādirūpeṇa vṛttis, tadāsau rūpāntareṇa pariṇamantī kalāpariṇatir ity ucyamānā bahiraṅgā. eṣā cānulominī, sṛṣṭikrameṇa pravartamānā satī. aṇubandhavṛttir ātmatattvasya bandhinī, saṃsārahetur ity arthaḥ. prātilomyena punas tvayaiva nirasyate, sarvatattvānāṃ vyutkrameṇa tvayy eva layāt. rāgādinirāsena tvam evāsya muktihetur ity arthaḥ || 139 ||

Utpala: iya || eṣā kalātattvapariṇatir antaraṅgabahiraṅgarūpabhedād dviprakārā sthitā. yadā māyā kalārūpeṇa pariṇamati, tadā sāntarāṅgā, yadā tu kalārāgarūpeṇa pariṇamati tadā bahiraṅgety arthaḥ. sṛṣtikrameṇānulomavartinī. aṇubandhavṛttir ātmatattvabandhakī. pratilomatas tu vināśakrameṇa tvayā nivaryate sarvatattvānāṃ tvayaiva layāt ||

Alaka: vyapalīnasāṃpratabhaviṣyanto 'rthāḥ, bhūtabhavadbhāvīni vastūni, tadbhāvaviṣayo 'ṇuḥ, ātmā, bhavati, tvat tavāśrayaṇāt—tvām eva pratipadya kālatrayagataṃ bhāvajātaṃ paśyatīty arthaḥ. atra bhāvārthasyānupayogāt tatpratyayo gaḍuprāyaḥ. nāsti padatrayaṃ jāgratsvapnasuṣuptirūpās tisro 'va L sthā yasya tat turīyaṃ padam āsthāya sthitatvāt. guṇaliṅgaśūnyatāṃ puruṣatvān nirguṇatvam aliṅgatvaṃ ca nityatvāt upajagmuṣaḥ prāptasya. liṅgam upacayāpacayādi. anye tu “liṅgaśūnyāḥ pratyastamitasakalapramāṇatvād anumānāviṣayāḥ” ity āhuḥ. tvad iti svarādiṣu darśanād avyayaṃ yuṣmadarthavṛtti ṣaṣṭhyartham ācaṣṭe. pṛthakpadam caitat. yuṣmadas tu samāso nopapadyate, vṛddhasya rājapuruṣa itivad āsāmarthyāt || 140 ||

Utpala: apa || he īśa, tvadāśrayāt, tava saṃśrayeṇa, aṇuḥ, pudgalaḥ, evaṃvidho bhavati. kīdṛk? vyapalīno vigato vartamānabhaviṣyadarthatārūpo viṣayo yasya saḥ, nitya ity arthaḥ. anayor upalakṣaṇaparatvād atītatayāpi rahitaḥ. kecit tu līnaśabdasyātītābhidhāyakatvād vyapagato līnādyarthatā viṣayo yasyeti yojayanti. tava cāpadatrayasya kālatrayarūpapadatrayaśūnyasya. kecit tu hṛtkaṇṭhatālvākhyasthānatrayātītasyety āhuḥ. tatpakṣe kṛtahṛdākāśasthiter ity avācakaṃ. guṇaiḥ sattvādibhiḥ liṅgaiś ca sūnyatāṃ prāptasya. etac ca tvadāśrayād iti samāsasthasyāpi ṣaṣṭhyantasya yuṣmadarthasya pṛthag ākṛṣṭatvād yuktaṃ. kecit tv, etad asahamānāḥ, “bhavataḥ samāśrayād” iti paṭhaṇti ||

Alaka: cākṣuṣā guṇā rūpadarśitā vaimalyaṃ vipulatā ca. puruṣasya guṇā vijñānaiśvaryadharmādirūpāḥ || 141 ||

Utpala: ravi || yathā sūryāṃśusambandhād bāhyapadārthadarśanasāmarthyarūpāś cakṣurguṇāḥ prakaṭībhavanti, tathā tvadadhiṣṭhānāt puruṣasya jñatvakartṛtvādayo guṇāḥ ||

Alaka: icchādikānām upakṣayād asahāyaḥ kevalaḥ, yaś ca sāmarthyopakṣayeṇa vikalo 'samarthaḥ sahāyarahitaś ca so 'pīśvare praseduṣi durgam api mārgaṃ gacchatīti nādbhutam || 142 ||

Utpala: vika || tvayi prasanne sati yat pumān vikalaḥ kalātattvaśūnyo jñātajñeyatvāc ca jñānādisarvaśaktikṣayān nissahāyo 'pi durāsadamokṣamārgaṃ yāti tat nāścaryaṃ. atha ca yo vikalo 'samarthaḥ sa durgasaṃsthitiṃ yātīti nādbhutam, iti kākvā ||

Alaka: amanaskā vikalpātmakamanovyāpārarahitā asaṃprajñātarūpā yogadaśaiva saṃśitaṃ tīkṣṇaṃ vrataṃ yeṣāṃ tair yogibhir amalam ātmani cāvicalarūpāṃ vyavasthitiṃ kurvad yat padam avāpyate tat tvadanugrahasya nāntarīyakam avinābhāvi. tenaiva tad avāpyata ity arthaḥ || 143 ||

Utpala: ama || amanaskā saṅkalpavikalpātmakamanovyāpāraśūnyā asaṃprajñātasamādhirūpā yogagatir yeṣāṃ tathāvidhaiḥ tīvravratair yogibhir yan nirañjanaṃ nirmalaṃ ata evātmany upaplavaśūnyāṃ sthitiṃ kurvat padaṃ prāpyate tat tavānugrahasya kila nāntarīyakam avyabhicāri. tvadanugrahāt tad avaśyam āpadyate ity arthaḥ ||

Alaka: yoga eva dharmaḥ sukṛtaṃ, tajjanitāt tvadanugrahād ātmano manasaś ca buddher yo vyatikaro bāhyārthaparityāgena sāmarasyaṃ, tato yogī na kevalaṃ svaparasaṃtānavartiny ātmani saṃyagjñānaṃ tanoti yāvat tvadicchayā viṣayāntareṣv acetaneṣv api. niścetanāny api sacetanāni karotīty arthaḥ || 144 ||

Utpala: sphuṭa || yogī sphuṭena cittavṛttinirodhātmakena yogadharmeṇa kṛtād anugrahād ata evātmanaś cetasaś ca vyatikarād bāhyārthaparityāgenaikībhāvān na kevalam ātmīye parasantānavartini cātmani tvadanugrahāt saṃvidaṃ tanoti yāvad viṣayāntareṣv acetanādiṣv api ||

Alaka: abhimāneti yugalakam. nabhasi hṛdayākāśe bhavantaṃ vilokya yogino 'pavargam adhyagur, mokṣam āpannāḥ. yan nabho 'bhimānakāryam iti nocyate, bāhyaṃ hy ākāśaṃ “prakṛter mahāṃs tato 'haṃkāraḥ” iti pāramparyeṇāhaṃkārajanyam iti, tato 'sya viśeṣaḥ || 145 ||

Utpala: abhi || tatraivaṃvidhe bāhyākāśavilakṣaṇe hṛdvyomni sthitaṃ tvāṃ dṛṣṭvā yogino 'pavargam adhyaguḥ, muktāḥ, iti dvābhyāṃ kriyā. yad dhṛdvyomny “ahaṃkārakāryam” iti na kathyate, bāhyaṃ cākāśam abhimānajanyaṃ, “prakṛter mahāns tato 'haṃkāraḥ” iti nyāyāt. yady api ca tad ahaṃkārakāryaṃ, tathāpi tatra mūlakāraṇatvād evam uktam. bāhyaṃ vyoma śabdaguṇenaivārabdhaṃ, tasyaivaṃguṇarūpatvāt ||

Alaka: upasaṃhito 'rpitas tvayā ātmīyo vibhavo yasya sa puruṣaḥ patyus tava tulyatāṃ vrajati; paśur api patiḥ saṃpadyate. bhavābhavāv āvirbhāvatirobhāvau. “vidhiḥ kriyā kalā yogaḥ śivaś ceti samāsataḥ | padārthāḥ pañca vijñeyāḥ śaive śāstre hy anuttare ||” iti. paśor api patitvabhavanam adbhutam || 147 ||

Utpala: upa || pumān paśurūpo 'pi tava patyuḥ sāmyaṃ yātīty āścaryaṃ. upasaṃhito 'rpitas tvayātmavibhavo yasya saḥ. kvacid upasaṃhṛteti pāṭhaḥ. saṃhṛta ātmavibhavo yena. abhāvasyaiva bhāvanāt bhāvābhāvau āvirbhāvatirobhāvau. pañca padārthā vidhyādayaḥ, yad uktam: “vidhiḥ kriyā kalā māyā gatiś ceti samāsataḥ | padārthāḥ pañca vijñeyāḥ” iti ||

Alaka: †...† parāparabhedena dvividhā: mokṣapradā bhogahetuś cety arthaḥ || 148 ||

Utpala: aṇu || aṇu†...†śaktiḥ parāparabhedā dvividhā mokṣapradā †...†. yad uktaṃ: “ekā bandhātmikā śaktiḥ sthitānyās tu vimuktayaḥ” ||

Alaka: he bhavodbhava hara, bhavataḥ sakāśād aṇuḥ śaktyupakṛtaikacittatāṃ jñānādibhir upakṛtaṃ mano 'dhigamya caturarthagocaragatir bhavati. dharmajñānavairāgyaiśvaryāṇi catvāri viṣayabhūtāni gacchatīty arthaḥ. bhavābhavau saṃsārāsaṃsārau. tābhyām aṇuḥ parāmṛṣṭaḥ. parameśvaras tu na tatheti tato 'sya viśeṣaḥ || 149 ||

Utpala: bhava || tvattaḥ śaktyā †....kayā† upakṛtaikacittatāṃ prāpyātmā caturarthagocaragatiḥ dharmajñānaiśvaryaviṣayo bhavati. bhavodbhavaḥ saṃsārotpattiḥ, bhavābhavaḥ saṃsāravināśaḥ, tayoḥ sthitir yasmāt utpattivināśau tvatta evety arthaḥ. pratipannaṃ pudgalād vibhaktaṃ vaibhavaṃ yena. yathātmakleśādisambandho, na tatheśvare, ity arthaḥ ||

Alaka: ghaṭasvarūpaṃ ghaṭād avyatiriktam iti dharmadharmiṇor abhedaḥ, evaṃ vṛttivṛttimator api pṛthaktvaṃ nāsti, tayor api dharmadharmirūpatvāt. uktam ca: “vṛttivṛttimator jātu na bhedaḥ pāramārthikaḥ |” iti. evaṃ ca cetaso vṛttimātranirodho yogaḥ. vṛttinirodhe tasyāpi nirodhāt, tasmād aparuddhapramāṇādivṛttikasya cittasyābhāvam eva yogam apare bruvate śūnyasamādhivādinaḥ. uktam ca: “abhāvaṃ bhāvayet tāvad yāvat tanmayatāṃ vrajet |” iti || 150 ||

Utpala: avi || he bhava dharmadharmiṇoḥ kilābhedaḥ na hi vahner dāhakatvam vyatiriktaṃ. ataś ceha na vṛttiḥ nāpi vṛttimān pṛthag asti. yad āhuḥ: “vṛttivṛttimator jātu na bhedaḥ pāramārthikaḥ |” iti. tat tasmād avaruddhavṛttino nivāritabāhyavyāpārasya cetaso 'pare śūnyasamādhivādinaḥ abhāvam eva yogam āhuḥ. yad uktaṃ: “abhāvaṃ bhāvayet tāvad yāvat tanmayatāṃ vrajet.” iti. nanu bhagavatstutau kiṃ yogavicāreṇety āha ||

Alaka: etac cāyuktam, yasmād evam abhyupagamyamāne sarva evābhāvabhāvanena viniruddhacittaḥ samādhibhāk prasajyate, yogī syāt. na ca tathā dṛṣṭaṃ. tvadicchayā tu sa yogī māyīyādimalavimukto muktim bhajate. tvadicchāvyatirekeṇa mukter aparaṃ na kāraṇam ity arthaḥ || 151 ||

Utpala: sati || evam abhyupagame, “abhāva eva yogaḥ” ity aṅgīkṛtyāviśeṣāt sarva eva niruddhacetanāmātraḥ san ayatnenaiva yogabhāk prasajyate. bhavadicchayā tu vigatamāyīyādimalaḥ mokṣabhāg bhavati, nānyatety arthaḥ. kecit tvadicchāvaśād ayatnata eva mokṣabhāk bhavatīti yojayanti ||

Alaka: he vṛṣagate, ye 'ṇavaḥ parāparabhedād dviprakāreṇa tvadanugraheṇa viṣayīkṛtatvād akalāḥ kalātattvarahitāḥ, te yathākramaṃ tava tulyatām, guhāñjanena māyīyena malena rahitā janmaprāptir yeṣām, tadbhāvaṃ ca dhārayanti. || 152 ||

Utpala: dvivi || he vṛṣabhagate, bahvalpabhedād dviprakāreṇa tvadanugraheṇa gocarīkṛtāḥ, ata evākalāḥ, kalātattvarahitāḥ, aṇavo yathāsaṃkhyaṃ tava tulyatāṃ tathā guhā māyaivāñjanaṃ tacchūnyajanmagatitvaṃ dhārayanti. yeṣu mahān anugrahaḥ, te tvatsādṛśyaṃ yānti, yeṣu tu svalpaḥ, te nivṛttamāyāmalāḥ, ity arthaḥ. ||

Alaka: he ajita, na kenacit abhibhūta, tava brahmaprajāpatīndrapitṛgandharvanāgarakṣaḥpiśācabhedād aṣṭavidhānāṃ devayonau sthitānāṃ vasudhādiṣu pṛthivyaptejovāyvākāśamanobuddhyahaṃkāreṣu yad aṇimādikam aiśvaryam aṣṭaprakāram uttarottaraṃ sthitaṃ, tat tvadicchayaiva vijṛmbhitam. parameṣṭhiniṣṭhaṃ brahmaparyantam. piśācānām aiśvaryaṃ pṛthivyām eva, rakṣasāṃ tu pṛthvīsalilayor eva, iti krameṇaikaikavṛddhyā brahmaṇaḥ sārvatrikam iti yāvat || 153 ||

Utpala: vasu || he ajita vibho tridaśayonivartināṃ brahmaprajāpatīndrapitṛgandharvanāgarakṣaḥpiśācabhedād aṣṭavidhānāṃ devayonīnāṃ vasudhādiṣu pṛthivyaptejovāyvākāśamanobuddhyahaṃkāreṣu yad aṣṭavidham aṇimādikam aiśvaryaṃ sthitaṃ, tad bhavadicchayā jṛmbhitaṃ. tvadicchā sā jṛmbhate, ity arthaḥ. tatrottarottaram ata eva parameṣṭhiniṣṭhaṃ brahmaparyantam. piśācānāṃ pṛthivyām eva, brahmaṇas tu sarvatra tad, ity arthaḥ. tat kila piśācādi brahmaparyantam ekaikavṛddhyā sthitaṃ || ||

Alaka: sarvabhāvātmakatvam upagatena tvayā samarthitam upapāditaṃ cidātmakaṃ vaibhavaṃ jñānaśaktiḥ, yasya tādṛśam eva rāgadveṣādipāśanikurumbaṃ sarvakarmasu nirupaplavaṃ ceṣṭate nirargalaṃ prasarati, anyathā tadayogāt || 154 ||

Utpala: upa || tvayā sarvadharmasvarūpatvaṃ prāptena sarvakriyāsu samarthitam upodbalitaṃ caitanyātmakaṃ vaibhavaṃ yasya tathāvidhaṃ bhuvanānāṃ pāśamaṇḍalaṃ rāgadveṣādibandhakacakraṃ nirupaplavaṃ kṛtvā ceṣṭate ||

Alaka: tavātmīyena vaibhavena sarvavyāpitayā prabhutayā ca sarvakartṛtvena śaktir apratihatā, na kvacit pratihanyate. ātmāna eva sūkṣmatvāt paramāṇavaḥ, te parāparātmasu muktibhogarūpeṣu karaṇīyavastuṣu na calanti, yadadhiṣṭhitā eva || 155 ||

Utpala: tava || he bhava tava śaktir apratihatā niṣpratibandhā ātmanaś ca vaibhavena sarvavyāpakatvena prabhutayā ca sarvakartṛtvena yuktā yayā śaktyādhiṣṭhitāḥ santaḥ ātmatattvaparamāṇavaḥ parāparātmasu mokṣabhogarūpeṣu kāryavastuṣv avatiṣṭhante, yad uktam: “na sā jīvakalā” ityādi ||

Alaka: sarve mantrās tvadātmakāḥ, sarve ca surā mantrarūpāḥ. tasmād bhūrbhuvaḥsvargarūpatayā triprakāre jagati na tad asti yat tvayā rahitaṃ syāt, uktaṃ ca: “sarve mantrātmakā devāḥ, sarve mantrāḥ śivātmakāḥ | śivātmakam idaṃ jñātvā śivam evānucintayet||” iti || 156 ||

Utpala: bhava || he bhagavan sakalamantramaṇḍalaṃ tvadātmakaṃ, devasaṃhatiś ca tadātmikā mantrātmikā. tasmād devamānuṣatiryagbhe L dāt trividhe sattvādiguṇamaye jagati tan nāsti yat tvayā śūnyaṃ. tad uktaṃ: “sarve mantrātmikā devāḥ sarve mantrāḥ śivātmakāḥ | śivātmakam idaṃ jñātvā sarvam evānucintayet ||” iti ||

Alaka: pratipūritāḥ saṃpado yābhis, tathāvidhās tava śaktayo bhuvaneṣu kāmadhenavaḥ, sarvakāmān phalantīty arthaḥ. amṛtaṃ vijñānam || 157 ||

Utpala: prati || sampāditāḥ sarvāḥ parāparātmikāḥ bhogamokṣarūpāḥ niṣpratibandhāḥ phalasaṃpado yābhiḥ tathā anivāritaṃ kṛtvā jñānāmṛtam eva payaḥ cyotante yās tathāvidhās tvacchaktayo bhuvanānāṃ kāmadhenava iva, sarvakāmapradatvāt ||

Alaka: śatarudravīrabhadrapramukhā ekottaraśataparimāṇā rudranāyakāḥ śaivaṃ padaṃ praviśanti tvadicchayaiva. kamalāsano brahmā, tatprabhṛtīnāṃ guṇāḥ sargārambhakatvādayaḥ tadanubhavaṃ yoktuṃ śīlaṃ yeṣām. “saṃpṛca”-ādisūtreṇa ghinuṇ. te hi daśasu dikṣu daśa daśa sarvordhvaṃ ca vīrabhadro †bhūtvā† brahmendrādināṃ sthitim anubhavantaḥ satatam āsate. vīra L iti vīrabhadrākhyaḥ || 158 ||

Utpala: bhava || bhavadicchayā hi niścaye tvadicchānugṛhītacetasaḥ śatarudravīrākhyapramukhā rudranāyakāḥ rudraśataṃ śaivaṃ sthānaṃ tejo vā viśanti, padmāsanādīnāṃ guṇabhogaiḥ sambandho vidyate yeṣāṃ, te kila daśa daśa, daśasu dikṣu sthitāḥ brahmendrādivac ca bhogān bhuñjate ||

Alaka: sakalasya vastuno dṛkkriyā, darśanavyāpāra, ātmā bhāvo yasyeti, ubhayatrāpi yojyam || 159 ||

Utpala: paṭa || dṛkkriyā darśanavyāpāraḥ. malaiḥ māyīyādibhiḥ pihitaṃ sat ātmatattvaṃ na kiṃcit paśyati. ||

Alaka: he anañjana māyīyādimalaviyukta, jñānādibhis tvadguṇair ujjvalitasamagraguṇaḥ puruṣo 'ñjasā kṣipram eva saṃsārapañjaraṃ dalayati, tvadāśrayād eva. “ajñatvam upaplavitā viṣayatvam anīśatā | ananudhyānam eveti pañcaite pauruṣā malāḥ” || 160 ||

Utpala: anu || he anañjana śuddhasvabhāva bhavadguṇair jñānādibhir anurañjitasamastaguṇaḥ san puruṣaḥ añjasā kṣipram eva, sphuṭaṃ vā, saṃsārapañjaraṃ vidalayati. malapañcakam ajñatvādi. yad uktaṃ: “ajñatvam upaplavatā viṣayatvam anīśītā | ananudhyānam eveti pañcaite pauruṣā malāḥ ||” iti ||

Alaka: chadaḥ pattram. tava śāsane tvadāgame patitaḥ. śivatāṃ śivasvabhāvatvam || 161 ||

Utpala: apa || yathā vaṭavṛkṣapallavaḥ paripākavaśān nīlatāṃ muktvā pītatāṃ yāti, tathātmā, śivaśāsanasthaḥ san, paśutvam apahāya śivatvam eti, śivībhavati ||

Alaka: tvadīyaiḥ saṃvidaṃśubhiś cetasi bhagnavyāmohatimire sati kuśalaḥ kalāpuruṣatattvayor vivekam adhigamyāvaśyam eva vimucyate || 162 ||

Utpala: hṛdi || tava jñānamarīcibhir avarugṇājñānatamoviplave hṛdaye niyamāt manassaṃyamāt hetoḥ kalātattvasyātmatattvasya ca vivekaṃ jñātvā yogī vimukto bhavati ||

Alaka: yathā mālinyam upagate mukure pratibimbam asphuṭatayāpi na lakṣyate, tathā bhavāṃś cetasi maline || 163 ||

Utpala: mali || malaugho māyīyādikaḥ anantaroktājñatvādiko vā ||

Alaka: he haṃsa, paramātman, sakaleṣu vastuṣv adhikāro vivartarūpā vyāvṛttir yasya tathāvidhaṃ yad ātmīyaṃ śaktimaṇḍalaṃ tatsvabhāvebhyas tanukaraṇabhuvanebhyo 'dhikaḥ prakṛṣṭas tvam eva bhavabandhanaṃ nṛṇām ātmanāṃ tanvataḥ saṃtamasasya praṇihaṃsi, mahāmohaṃ vināśayasi. “jāsiniprahaṇa” iti ṣaṣṭhī. nibirīsā nibiḍā, “nerbiḍajbirīsacau” || 164 ||

Utpala: saka || he haṃsa paramātmasvarūpa, sakaleṣu vastuṣv adhikāro yasya tathāvidhaṃ yan nijaśaktimaṇḍalaṃ tadrūpāṇi yāni vigrahākṣabhuvanāni tanukaraṇabhuvanāni, tato 'bhyadhiko vyatiriktas tvaṃ nṛṇām ātmatattvānāṃ saṃsārabandhaṃ tanvato vistārayataḥ kurvato vā. “ko 'rthaś L cetasi vedhasā vinihitas tanvyās tanuṃ tanvatā” ityādivat taneḥ karotyarthatvāt. nibirīsasampadaś ca ghanasyāndhatamasasya mahāmohasya karmabhūtasya praṇihaṃsi tad vināśayasīty arthaḥ. “jāsini”-ityādinā ṣaṣṭhī karmaṇi ||

Alaka: pratibhayā, ākasmikatvena tvatpratibhāsena vāgato jyeṣṭhādyaṣṭavidhaḥ saṃvitprakāśo yeṣāṃ, tādṛśā manasvinas, tattvādikam adhvānam ullaṅghya, vimalaṃ padam āpnuvanti, tvatsamaye sthitatvāt. samayaḥ siddhāntaḥ. yady api ca “vāmā jyeṣṭhā tathā raudrī, kālī kālānusāriṇī, kalāvikāriṇī caiva, balapramathinī tathā. sarvabhūtapramathanī, tathā caiva manonmanī.” iti vāmādyāḥ saṃvido nava, tathāpi vāmātra parivarjitā, tasyāḥ saṃsārahetutvāt || 165 ||

Utpala: prati || tava samaye tvacchāsane sthitāḥ yoginas tavaiva nirañjanaṃ nirmalaṃ śivadhāma viśanti. pratibhāgataṃ buddhigocaraprāptam aṣṭavidhaṃ jñānārciḥ yeṣāṃ. saṃvidaś cāṣṭavidhatvaṃ. yad uktaṃ: “vāmā jyeṣṭhā ca raudrī ca, kālī kālānusāriṇī, kalāvivaraṇī caiva, balapramathanī tathā, sarvabhūtapraśamanī, tathā caiva manonmanā” iti. yady apy etā nava, tathāpi vāmāyāḥ saṃsārapradatvād agrahaṇaṃ. ṣaḍvidhaṃ vartma, tattva-pada-mantra-varṇa-bhuvana-kalāsvarūpam, ullaṅghya. ||

Alaka: dadhatam ityādipañcabhiḥ kulakam.[166–170] aṇur ātmā bhavantaṃ pratipadya sukhaduḥkhādirahitacetanaḥ, “prākṛto vaikṛtaś cāpi āhaṃkārika eva ca | L sāttviko rājasaś caiva tāmasaś cāparaḥ smṛtaḥ || dharmādharmātmakaś ceti paśor bandhāṣṭakaṃ bhavet|” iti tantumayena pāśātmanā bandhanāṣṭakena ca rahito bhavān iva bhavati, niścitam eva. [170] nirāvaraṇaṃ deśakālādibhir avicchinnaṃ saṃvidātmakatvaṃ, dhruvaṃ niyamena dhārayantam, apratarkyam avijñeyam, amṛtaṃ mokṣaḥ, īśvarasya tu tathā vyapadeśas tatkāraṇatvāt “āyur ghṛtaṃ” itivat. guhāśayaṃ hṛtkuharasthaṃ. guṇeṣu sattvādiṣu bhavo gauṇo brahmādīnāṃ vigrahaḥ. gahanaṃ prayojanaṃ yasya sa gāhanikaḥ, prākṛtaḥ, vigraheśvarākhyasya prakṛtitattvādhikāriṇaḥ. gauho māyīyaḥ, ekarudrādīnāṃ teṣāṃ māyātmakatvāt. maulaś ca mūlakāraṇāt parameśvarataḥ pravṛtto megharudrādīnāṃ gaṇanāyakānāṃ tadbhāvena pratipannatvād bhinno 'nya eva śaktirūpo vigraho yasya. uktaṃ ca: “gauṇaṃ gāhanikaṃ gauhaṃ maulaṃ vā vigrahaṃ vinā | śaktibhedo 'paras tvattaḥ svādhikāraṃ karoti kaḥ ||” iti || 166 || sakalaṃ viśvātmakaṃ akalaṃ kalātattvena rahitaṃ ca. yaḥ sakalaḥ sa katham akalaḥ, iti ca virodhaḥ. plavena gatyā rahitam, sarvagatatvāt. nirupaplavam rāgādibhir aviplutam, ata evopaplavād bahirbhūtā saṃsārabāhyā sthitir yasya. ṣaṭparimāṇasya tattvāder adhvana upari sthitam, tam atikramya vartamānam, ata eva vyativṛttaṃ viśvātītaṃ śāntaṃ ca. † niḥśeṣam asamam.† anaghaṃ niravadyam. paraṃ prakṛṣṭam. śivaṃ kalyāṇam || 167 || pratibhā nūtanollekhaśāli vijñānaṃ sahajāhāryabhedena dvividhā, tam atikrāntam. tadagocaram iti yāvat. nāsti meyatvanirdeśyatvādibhir dharmair yogo yasya, tata eva tādṛśam, ata evānupākhyam anirvācyam. aṇuṃ sūkṣmam, ātmarūpatvāt, anaṇuṃ ca sthūlam, viśvātmakatvāt. atrāpi virodhaḥ, pūrvavad eva. sarvato mukhāni sarvatra prasṛtāni mūrdhādīni yasya. tathā ca paṭhyate: “yo viśvaca L kṣur uta viśvatomukho viśvatohasta uta viśvataspāt” iti || 168 || nirupaplavasthitibhir ekarūpam avasthitair nijair aṅgaiḥ pāṇyādibhiḥ sarvajñatārūpair vā hṛdādibhir dīpitaḥ sadyojātādipañcavaktraratnamayaḥ śarīragraho yasya pratyakṣādisakalapramāṇānāṃ viṣayātigā na viṣayo yā sthitis tato hetoḥ pratipattyā śūnyam apratyeyam, ata eva ca gahanam || 169 || || 170 ||

Utpala: dadha || evaṃvidhaṃ bhavantaṃ pratipadya pudgalo bhavān iva bhavati, iti pañcabhiḥ kriyā. [166–170] nirāvaraṇacitsvarūpatāṃ niṣpratighajñānātmakatvaṃ dadhataṃ, dhruvaṃ śāśvataṃ, apratarkyaṃ durjñeyaṃ, amṛtaṃ jñānātmakaṃ, guhāśayaṃ hṛtkuharasthaṃ tathā. sthirā ye gauṇāḥ sattvarajastamorūpā brahmaviṣṇurudrāḥ, gahanatvāc ca prakṛtitattvapraviṣṭāḥ, gauhāś ca māyīyāḥ, maulāś ca mūlakāraṇāc chivatattvāt prasṛtāḥ tadbhāvenāśritā bhinnāḥ, nijaśaktyā vigrahā yena, brahmādayo 'pi tavaivāṃśāḥ ity arthaḥ. || 166 || sakalaṃ sarvavyāpitvāt kalātattvena ca śūnyaṃ śivam ity arthaḥ. atha ca, yaḥ sakalaḥ sa katham akalaḥ, iti virodhaḥ plavena gatyā rahitaṃ sarvagatvāt. nirupaplavaṃ sthiraṃ niḥsaṃgatvād, anucararahitaṃ vā. bahirupaplavā saṃsārabāhyā sthitir yasya. anantaroktasya ca ṣaḍvidhasya adhvana upari, tam atītya sthitaṃ, ata eva ca vyativṛttaṃ sarvātikrāṇtaṃ śāntarūpaṃ ca. anaghaṃ niravadyaṃ prakṛṣṭaṃ ca śivatattvaṃ || 167 || pratibhādvayāt jñānātmakāt kriyātmakāc cātikrāntaṃ, ata eva ameyatādidharmayuktaṃ anupākhyatāṃ ca prāptaṃ. yad uktaṃ: “aprameyam anaupamyam anirdeśyam anāmayam” iti. aṇum ātmatattvarūpaṃ, ādidevaṃ ceśvaraṃ. yad uktaṃ: “sa pūrveṣām api guruḥ kālenānavacchedād.” iti. ananuṃ sthūlaṃ sarvagatatvāt. yaś cāṇuḥ sa katham anaṇuḥ, iti virodhaḥ. sarvato mukhāni mūrdhānaḥ pāṇayaś caraṇā īkṣaṇāni ca yasya. tathā ca śrutiḥ: “viśvataścakṣur uta viśvatomukho viśvatobāhur uta viśvataspāt|” iti || 168 || susthitibhiś ca nijair aṅgaiḥ sarvajñatvādibhiḥ dīpitaḥ sthiraś ca sadyojātādipañcavaktramayo jagadanujighṛkṣayā dehagraho yasya. tathā sarvapratyakṣadipramānagocarād atikrāntā sthitir yasyās tathāvidhayā pratipattyā śūnyam, ata eva durjñeyatāṃ gataṃ. || 169 || L vinivṛttā aṇoḥ tantumayāḥ pāśarūpā aṣṭau bandhā yasya. “prākṛto vaikṛtaś caiva āhaṅkārika eva ca | sāttviko rājasaś caiva tāmasaś cāparaḥ smṛtaḥ | dharmādharmamayaś ceti paśoḥ pāśāṣṭakaṃ bhavet |” iti. || 170 ||

Alaka: dakṣiṇāspadaṃ dakṣiṇabhāgavarty aghorākhyam || 171 ||

Utpala: vivṛtaṃ || mukham eva maṇḍalākāratvān maṇḍalaṃ dakṣiṇāspadam aghorākhyaṃ, tena kila kalpānte jagad grāsīkaroti. śatapattraṃ padmaṃ, tadvad raktaṃ sūryabimbasthānīyaṃ tālu ||

Alaka: ayugmarociḥ saptārciḥ || 173 ||

Utpala: bhava || ayugmarociḥ vahniḥ ||

Alaka: ghaṭitā acyutasya viṣṇoḥ saṃbandhinī tviḍ yasya, purāṃ dāhe hareḥ śarīkṛtatvāt. anyatra acyutāḥ sthirā hetayo jvālāḥ. dehitha pluṣṭavān asi || 174 ||

Utpala: jvalitā || ghaṭitā acyutasya hareḥ tviḍ yatra. puraploṣe kila viṣṇuḥ śarīkṛto 'bhūt. aparatra acyutā sthirā tviṭ. hetayo jvālāḥ ||

Utpala: tava || netrāgnijvaladagnidhūmavalayavatīva piṅgalā ||

Alaka: kṣaṇam iti kṣaṇam apīty arthaḥ || 176 ||

Utpala: prati || kṛṣṇarajanīmayaṃ kālarātrisvarūpaṃ ||

Alaka: kṣitir eva rathaḥ. pratibaddhena lakṣmaṇā mṛgeṇa malinasyodarasya cchavir eva madhyarandhraṃ yasya || 177 ||

Utpala: daha || kṣitir eva rathaḥ. tripuradāhe bhūḥ kila rathīkṛtā candrasūryabimbe ca cakrībabhūvatuḥ. pratibaddhaṃ tatsthaṃ lakṣma mṛgaḥ tena malinā udaracchavir eva nābhirandhraṃ yatra ||

Utpala: bahuśo || cakravālaṃ maṇḍalaṃ ||

Alaka: candrakī mayūraḥ || 179 ||

Utpala: sphuṭa || kumāracandrakī guhamayūraḥ ||

Alaka: niśāsu nṛtyatā tvayā ātmana evānukṛtiḥ kriyate, tvadvyatiriktasyāparasyānukāryasyābhāvāt. karaṇāni talapuṣpapuṭādīni, aṅgahārāḥ sthirahastādyāḥ || 180 ||

Utpala: kara || karaṇāṅgahārāḥ pūrvoktāḥ. ātmana evānukāraḥ kriyate vaibhavena vyāptajagattvāt ||

Alaka: pratipannā samāśritā gotreṇa kailāsagiriṇā ghaṭanā yena. pitṛsadma śmaśānam. mātaro vārāhyādidevatāḥ. yaḥ pratipannagargādigotraḥ sajananīke ca pitṛgṛhe tiṣṭhati, sa katham anādir ajaḥ purāṇaś ca pragīyata iti cātra virodho dhvanyate || 181 ||

Utpala: prati || gotre kailāsādrau kṛtā ghaṭanā yena, mātaro devatāviśeṣāḥ, tadyukte 'pi nṛveśmasadmani śmaśāne kṛtāvasthitiḥ. anyac ca, ya āśritaśāṇḍilyādigotraḥ sajananīke ca pitur gṛhe tiṣṭhati, sa katham anādir ajaḥ purāṇaś ca bhavatīti virodhaḥ ||

Alaka: laghūkṛtātmabhiḥ praṇāmavaśāt saṃpiṇḍitakāyaiḥ. mahattvam uttamatvam. ye nakhodarapratibimbitāḥ santo laghurūpās te kathaṃ mahāntaḥ sthūlā iti ca virodhaḥ. anayaiva bhaṅgyottaratrāpy asau yojyaḥ || 182 ||

Utpala: tava || laghūkṛtātmabhiḥ praṇāmavaśāt saṃkucitadehaiḥ sarvātiśāyi mahattvaṃ pūjyatvaṃ prāpyate. atha ca yo laghuḥ sa kathaṃ mahān iti virodhaḥ ||

Alaka: āśuśukṣaṇiḥ dahanaḥ || 183 ||

Utpala: sasurā || tvatpādapraṇatā janasaṃhatir agniśikhevādhogatiṃ na yāti ||

Alaka: mater nirvikalpakavijñānasya śabdavikalpānāṃ ca gocaratvād atikrāntarūpo viṣayatvam anāpannaḥ prakṛṣṭaḥ svabhāvo yasya. atra bhāvapra L tyayam antareṇāpi tadartho 'vagamyate, “dvyekayor dvivacanaikavacane” itivat || 184 ||

Utpala: kṣiti || matau śabdeṣu ye vikalpāḥ tadviṣayātikrāntaṃ nirvikalpakasvarūpaṃ yasya ||

Alaka: yataḥ sumater api matiśabdagocarā jñānadhvanikāraṇikāḥ kalpanā vikalpākhyās tvayi padaṃ na kurvanti, tābhir api na grāhyas tvam, tatas tvadguṇalavānāṃ ca sūktiṣu satṛṣṇenāpi mayā tadudyogān nivṛtyate || 185 ||

Utpala: sudhi || tvadīyaguṇaleśānāṃ madīyāḥ sūktayaḥ yataḥ śobhanabuddher api sambandhinyaḥ matiśabdaviṣayāḥ kalpanāḥ tvayi sthitiṃ na kurvanti, tābhir apy agrāhya ity arthaḥ, tataḥ satṛṣā sābhilāṣeṇāpi mayā viramyate maunaṃ kṛtvā sthīyate ity arthaḥ ||

Alaka: yadvaśād dūrastho 'pi dṛśyase hṛdayasthitatvād antikagato 'pi nāvalokyase, sa tava prasādo viparyayaś cāprasādaḥ kena hetunā prasarati? L tayoḥ kāraṇaṃ kathayety arthaḥ || 186 ||

Utpala: ati || atidūrastho 'py anugrahavaśād dṛśyase antikagataś ca hṛddeśastho 'py ananugrahavaśān na dṛśyase ||

Alaka: pratighaśūnyasaṃvido nirāvaraṇajñanayoginaḥ. teṣām api tava ceṣṭitam āścaryapadam || 187 ||

Utpala: atha || niṣpratighajñānānām apy āścaryāspadaṃ tvacceṣṭitaṃ ||

Alaka: himācale sthitād bhagavataḥ samutpannaṃ puruṣaṃ vayaṃ śuśruma śrutavantaḥ || 188 ||

Utpala: sukha || parvatyā sthagite mukte cakṣuṣī yasya tathāvidhāt tvat bhavataḥ nirlocanaḥ puruṣa udabhūt. tadā kila gaurīstanasparśād L bhagavataḥ kṛtārthatvam abhūt, tataś cānetraḥ puruṣo jāta iti śrūyate ||

Utpala: kṛtayā || adhigamya || cirakāla || spaṣṭam ||

Alaka: pratimallaḥ pratiyodhī, sadṛśayodhīty arthaḥ || 192 ||

Alaka: pratāpaḥ śauryaprabhāvaḥ prakṛṣṭaś ca tāpaḥ || 193 ||

Utpala: dali || pratāpaḥ prabhāvaḥ prakṛṣṭaś ca tāpaḥ ||

Alaka: vibhaṅgo vicchittiḥ || 194 ||

Alaka: karadīkṛtānāṃ daṇḍapradatvena sthāpitānām indrādīnāṃ lakṣmyāḥ samākrāntaśekharā śāsanaśrīr yasya, taduktasya śirasānuṣṭhitatvāt. bandī haṭhahṛtā yoṣit. ketanaṃ gṛhaṃ || 195 ||

Utpala: so smā || indrādīnāṃ lakṣmyā ākrāntaśekharā śāsanaśrīr yasya. yat sa ādiśati tat te mūrdhnā kurvanti, ity arthaḥ ||

Alaka: prāptakālaṃ prāptāvasaraṃ, yogyam iti yāvat. anvak paścāt. plavas tāraṇam || 196 ||

Utpala: tatprāpta || prāptakālam ucitaṃ anvak paścāt ||

Alaka: avāk adhaḥ, †apavṛttiḥ pārśvato velā vā†, ūrmikā aṅgulīyakā || 197 ||

Utpala: iti || ūrmikā karaśākhābharaṇaṃ ||