U° oṃ || sargārambhe 'py ajātāya bījarūpeṇa tiṣṭhate | dhātrā kṛtapraṇāmāya gaṇādhipataye namaḥ || oṃ namo vighnahantre 'stu vighnavāraṇahāriṇe | ahīndrahāriṇe durgabhavāmbunidhitāriṇe || oṃ iha hi samagragranthārambhe svābhimatadevatāsaṅkīrtanam avaśyakartavyam iti sadācāram anupālayan | pra ⊔ nudvaitātaṅkakalaṅkitacetovṛtti tāṃ prakaṭayan ⊔ pi devatāṃ kāṃcin namasyet †santha†devatā iti | haribrahmaśivān api pratyūhaśāntaye kavis saṅkīrtayati | kaṇṭhaśriyam ityādi ⊔ |

R° oṃ namaḥ śrīśivabhaṭṭārakāya | oṃ namo vighnahartre | oṃ namaḥ srīsiddhalakṣmyai || śreyaḥ śivādvayajuṣo diśatāt sa eko vakṣojahemakalaśo girirājaputryāḥ | ṣaḍvaktrahastivadanāv amṛtaṃ yadīyaṃ pātuṃ mithaḥ kalaham ātanuto nitāntam | rakṣatu kalaherambas trijagadvandyas sa herambaḥ | bahuvidhaśṛṅgāracitaṃ yadvadanaṃ śambhunā racitam | sevakajanasiddharamāṃ tāṃ devīṃ namata siddharamām yā vandyā vibudhagaṇaiḥ stutyā yā bhūtale ca vibudhagaṇaiḥ | trinabhoṣṭi 1603 mite śāke dhaumyāyanakulodbhavaḥ kaśmīradeśavāstavyo ratnakaṇṭhābhidhaḥ sudhīḥ | vipaścinmaṇḍalīratnaratnākaramahākaveḥ gabhīravitate kāvye karoti laghupañcikām | yugmam | mahākāvyārambhe mahākaviḥ sahṛdayajanaprotsāhanārtham āśirvākyam prayuṅkte |

A° dhūrjaṭiḥ śaṃkaro yuṣmabhyaṃ sukhāni śreyāṃsi diśatād vitaratu | kīdṛśaḥ | kuvalayastabakair nīlotpalagucchair abhirāmaṃ cāru yad dāma sragdāma tattulyo vikaṭacchavir bahalakāntiḥ kālakūṭo viṣaṃ yasyāḥ, tathāvidhāṃ kaṇṭhaśriyaṃ dhārayan | ataś copahāreṣu pūjāsamayeṣu bhaktajanadayayā pīto yo dhūpadhūmas teneva malinām ity utprekṣā || atha dvitīyo 'rthaḥ—dhūrjaṭiḥ sukhāni śobhanāni svakāryakṣamāṇy aviṣayāpavartīni khānīndriyāṇi diśatāt saṃpādayatu | kīdṛśaḥ | kuvalaye bhūmaṇḍale ye stavakāḥ stotāras teṣām abhirāmasyābhilaṣitasya dāmā dātā | stavakā ity atra stautīti stavo 'jantaḥ | stava eva stavakaḥ | svārthe kaḥ | iti vyutpattir draṣṭavyā | kīdṛśīṃ kaṇṭhaśriyam | anukāḥ śṛṅgāriṇas teṣām ariḥ kāmaḥ, tathā vikaṭacchavir bhīṣaṇakāntir yaḥ kālaḥ, tayoḥ kūṭāṃ dāhikām | upahāraṃ hārasamīpe yaḥ pītaḥ kapiśo dhūpaḥ saṃtāpo 'rthāc ca hāroragaphūtkṛtāgnisaṃbandhī tadutthena dhūmeneva malinām | etena vakṣyamāṇaśabdabhaṅgādi kaṭākṣitam || 1 ||

U° dhūrjaṭiḥ śaṅkaro yuṣmabhyaṃ sukhāni śreyāṃsi dadyāt diśyāt vitaratu | kīdṛśaḥ | kuvalayastavakair nīlotpalagucchair abhirāmaṃ cāru yad dāma sragdāma tattulyo vikaṭacchavir bahalakāntiḥ kālakūṭo viṣaṃ yasyās tathāvidhāṃ kaṇṭhaśriyaṃ dhārayan | ataś ca upahāreṣu pūjāsamayeṣu | bhakta- janadayālutvāt pīto yo dhūpadhūmas teneva malinām ity utprekṣā | atha dvitīyo 'rthaḥ | dhūrjaṭiḥ sukhāni śobhanāni svakāryakṣamāṇy aviṣayāpavartīni khāni indriyāṇi diśatāt sampādayatu | kīdṛśaḥ | kuvalaye bhūmaṇḍale ye stavakāḥ stotāras teṣām abhirāmasyābhilaṣitasya dāmā dātā | stavakā ity atra stautīti stavaḥ stava eva stavaka iti vyutpattir draṣṭavyā | kīdṛśīṃ kaṇṭhaśriyaṃ | anukāḥ śṛṅgāriṇas teṣām ariḥ kāmas tathā vikaṭacchavir bhīṣaṇakāntir yaḥ kālas tayoḥ kūṭāṃ dāhikām upahāraṃ hārasamīpe yaḥ pītaḥ kapiśo dhūpas santāpo 'rthāc ca hāroragaphūtkṛtāgnisambandhī tadutthena dhūpeneva malinām | etena vakṣyamāṇaśabdabhaṅgādi kaṭākṣitam || 1 ||

R° kaṇṭhaśriyam iti | dhūrjaṭiḥ | jaṭa jhaṭa saṅghāte sarvadhātubhya itīn | jaṭir jaṭā śilā śilīti dvirūpakoṣaḥ | dhuras trailokyacinta yāḥ jaṭis saṅghāto 'tra dhūrjaṭiḥ dhūr gaṅgā jaṭā 'sya pṛṣodarāditvād ākārasyetvam iti svāmī bhrāntaḥ uktarūpeṇa jaṭisamādhānāt | dhūḥ bhārabhūtā ja†ṭā†ḥ jaṭā 'syeti kaumudī iti rāyyamukuṭīkāraḥ dhūṛjaṭiḥ śrī śivabhaṭṭārakaḥ vo yuṣmabhyaṃ sukhāni bhogāpavargarūpāṇi diśatāt vitaratu kiṃbhūtaḥ kaṇṭhasya galasya sriyaṃ śobhāṃ bibhrat śrī suśobhā lakṣmī samṛddhiṣv iti maṅkhaḥ kimbhūtāṃ kuvalayetyādiviśiṣṭāṃ kau bhūmau valate vala valla saṃvaraṇe taleḥ kayann iti bāhularkādato 'pi kayan kuvalayaṃ | kau valayaṃ śobhākaratvād ity svāmī | kuvalayaṃ syād indīvaram ity apīti vyāḍiḥ kuvalayam nīlotpalaṃ ca | kuvalayānāṃ nīlotpalānāṃ stavakāḥ gucchāḥ teṣām abhirāmaṃ dāma | mālā tadanukārī vikaṭacchaviḥ pracuraruciḥ kālakūṭo viṣaviśeṣaḥ | yasyās tāṃ | atrotprekṣām āha | upahāretyādi | śrīśivaśāsanoktā sakalaniṣkaleśvarabhairavamahāpūjā upahāraḥ tatra pītena caturdaśāṅgapinākipriyadhūpaprabhavena dhūmena malinām iveti | etasya ca vṛttasya vastusaṃvādaḥ svāmidattaviracite prācīnagranthakṛtkṛtavastuvādasaṅgrahe cakrapāṇivijaye yathā | kaṇṭhaśriyaṃ kuvalayastavakābhirāmadāmānukārivikaṭacchavikālakūṭām iti haravijakāraśrīrājānakaratnākarasya | kālakūṭarucim śyāmaṃ dadhāno maṅgalaṃ galam | diśyāt siddhārcanāpītadhūpadhūmram iveśvaraḥ | iti vararucikaveḥ | kuvalayadaladāmaśyāmasatkālakūṭadyuticayanicitā yaḥ kaṇṭhasīmā surāreḥ suramunijanapūjāghrātakṛṣṇāgurūtthapravarabahuladhūmasyāmalair vāstubhūtyai | āryabhaṭakaveḥ | evam anyeṣām api mahākavīnāṃ pratibhāsaṃvādaḥ lakṣye dṛśyate eva ye paraparidṛṣṭham arthaṃ svapne 'pi nā svādayeyuḥ | tathā coktaṃ | tasmād atra yad arthasya sārūpyam avabhāti tat | saṃvādaṃ prātibhaṃ prāhuḥ na tu puṣṇāti duṣṭatām iti || tathā ca śrīdhvanikārāḥ dhvaner yas saguṇībhūtavyaṅgyasyādvāpradarśitaḥ anenānantyam āyāti kavīnāṃ pratibhāguṇa iti ya dhvaner guṇībhūtavyaṅgyasya ca mārgaḥ prakāśitas tasya phalāntaraṃ kavipratibhānantyam | katham iti cet ato hy anyatamenāpi prakāreṇa vibhūṣitā vāṇī navatvam āyāti | pūrvārthānvayavaty api | tato hi dhvaner uktaprabhedamadhyād anyatamenāpi prakāreṇa vibhūṣitā satīvāṇīpurāt anakavinibasthārthasampeśevatyapi navatvam āyāti || tathā hy avivakṣitavācyasya dhvaneḥ prakāradvayasamāśrayeṇa navatvam pūrvārthānugame 'pi yathā smitaṃ kiñcit mugdhaṃ taralam apurodṛṣṭivibhavaḥ parispandavo mām abhinavavilāsoktir sarasaḥ gatīnāṃ ārambhaḥ kisalatalīlāparimalaḥ spṛśāntyās tām anyāṃ kim iva hi naramyaṃ mṛgadṛśaḥ ity asya || sa vibhramasmitodbhedena lolākṣyaḥ praskhalatgiraḥ nitambālasagāminyaḥ kāminyaḥ kasya na priyāḥ ity evamādiṣu ślokeṣu satsv api tiraskṛtavācyadhvanisamāśrayeṇa apūrvatvam eva pratibhāsate | evam anyatrāpi tathā dṛṣṭapūrvā api hy arthāḥ kāvye ramaparigrahāt | sarve navā ivābhānti madhumāsa iva drumāḥ iti || tad evam asmān mahākaveḥ prācīnagranthakṛtpūrvākyānugame 'pi vastusaṃvāde aduṣṭhatā iti siddham tathāpi anyo 'py artho 'tra prācīnaṭīkākārair vyākhyātas so 'py atra likhyate yathā dhūrjaṭiḥ śrīśambhuḥ vo yuṣmabhyaṃ sukhāni suśobhanāni ca tāni khāni indriyāṇi teṣāṃ śobhanatvaṃ viṣayair apratibandhāt muktyupāyam indriyajayam vaḥ kriyād ity arthaḥ kimbhūtaḥ kaṇṭhaśobhāṃ bibhrat | kiṃbhūtāṃ tāṃ kau bhūme valayaṃ bhūmaṇḍalaṃ gotrārthaḥ pṛthivī pṛthvīty amaraḥ tatra stautīti stavaḥ pacādy ac stava eva stavakaḥ stutiparapūjakajanaḥ tasya abhirāmaṃ vastu dadātīti dāmā dātā tasya te anyebhyo 'pi dṛśyate iti manin tad evam arthaḥ kṣititalavartino 'pi bhaktajanasya manaḥ priyadah kiṃbhūto dhūrjaṭiḥ anukaḥ kāmukobhika ity amaraḥ teṣām ariḥ prahantā kāmaḥ tasya tathā kālasya kṛtāntasya ca kūṭā dāhikā kuṭa dāhe dhātuḥ tādṛśīṃ kaṇṭhaśriyaṃ bibhrat kīdṛśīm iva hārasya harīkṛtasya vāsukeḥ viśeṣeṇa kaṭān viśiṣṭatayā gacchan sarvatradeśe kāle ca nirargalaprasṛtatayā pravṛttaḥ kaṭakiṭ gatau dhātuḥ vikaṭantīcchaviḥ yasyāḥ sā tathā pītaḥ kapiśakāntiḥ yo dhūpaḥ dhūpa santāpe iti dhātvarthaparyālocanayā santāpako dahanaḥ tadutthena dhūmenopagatena malinām ivātra kālakūṭakṛtaṃ kālatvaṃ yad asti tad eva pratīyamānam utprekṣā bījam āśritya vāsukiviṣāgnidhūmajanitaṃ mālinyam atiśayāyotprekṣitam iti || atra utprekṣālaṅkāraḥ sambhāvanam athotprekṣā prakṛtasya pareṇa yat | 1 | iti śrīkāvyaprakāśakāraḥ pareṇeti aprakṛtena atra ca vasantatilakā cchandaḥ proktā vasantatilakā tabhajā jagau gaḥ tagaṇaḥ bhagaṇaḥ jagaṇaḥ jagaṇaḥ gurudvayaṃ ceti | māṃsīparpaṭasilhakṣaudramalayaṃ mustāṃ śarālaṃ nakhaṃ bolaṃ kundurakam puraṃ ca tagaraṃ sarvais samaṃ gugguluṃ | sandhāyātra śaśāṅkanābhighusṛṇaṃ cāloḍya nikṣepayet marṣaṃ silharasena manditam ayaṃ dhūpaḥ pinākipriyaḥ |

A° janito 'ricamūnāṃ vimarśo vividhaprakāravicāro narasiṃho bhayarūpatvenākārādy anirdhāraṇād yena | vṛttaṃ saccaritram utkramya vartamāno yo daityo hiraṇyakaśipus tasya vadhanirvāhakam || 2 ||

U° jṛmbhā: jṛmbhāvikāsitamukham ityādiviśeṣaṇasāmarthyād dhariśabdenātra narasiṃhamūrtir bhagavāṃl lakṣyate | tadrūpaṃ vaḥ pavitrīkarotu | nakhā eva darpaṇā ādarśā āviṣkṛtaṃ pratimukhaṃ mukhapratimā garbho 'ntaḥsthita ⊔ nirvahaṇaṃ kāryasiddhiḥ rūpaṃ nārasiṃhaṃ bhīmo bhīmasena ityādivat tatrāpi mukhapratimukhagarbhāvamarśanirvahaṇākhyāḥ pañca sandhayo bhavanti | iha ca kāvye mukhādyāḥ sandhayo niṣpannā iti kaver abhiprāyaḥ || 2 ||

jṛmbheti | viśeṣanasāmarthyād harir iha narasiṃharūpo viṣṇuḥ tasya rūpaṃ saṃsthānam ākṛtyaparaparyāyaṃ vaḥ yuṣmān punātu kalimalaśodhanena pavitrīkarotu kiṃbhūtaṃ tat jṛmbhā dhyāmikā kaśmīreṣu jāmān iti bhāṣayā prasiddhā madhyadeśe hāmbhī iti khyātā ca tayā hetunā vikāsitaṃ vyāttaṃ mukham ānanaṃ yasmin tathā nakhā eva dhavalatvād darpaṇāḥ teṣu tanmadhye āviṣkṛtaṃ pratimukhaṃ pratibimbanaṃ yena tat tathā guruḥ mahān roṣaḥ garbhe 'bhyantare yasya tat | tathā | janita utpāditaḥ aricamūnāṃ śatruvāhinīnāṃ vimarśaḥ prāṇasaṃśayarūpo yena tādṛśaṃ | tathā | udvṛttaḥ tribhuvanakaṇṭako yaḥ daityaḥ hiraṇyakaśipuḥ tasya yo vadhaḥ vidaraṇaṃ tasya nirvahaṇaṃ niṣpādakaṃ | atha ca rūpaṃ rūpakaṃ nāṭakādidaśarūpakaṃ | tad iva rūpaṃ iti śabdaśaktyākṣiptā upamātra dhvanyate | tatra ca | rūpake mukhapratimukhagarbhavimarśaṇanirvahaṇākhyāḥ pañca sandhayo bhavanti bījanāmno 'rthaprakṛter avasthāviśeṣāḥ | uktaṃ ca yatra bījasamutpattir nānārtharasasambhavā | kāvye śarīrānugataṃ tad mukham parikīrtitam ityādi | tathā pañcasandhi caturvṛtticatuṣṣaṣṭyaṅgasaṃ yutaṃ ṣaṭtrimśallakṣaṇāpetuṃ nāṭakaṃ kavayo vidur iti ca | 2

A° padmāsanasya brahmaṇo yadāsanakuśeśayaṃ viṣṭarapadmaṃ tasya yat koṣacakraṃ karṇikā tad vaḥ punātu | chaṭā churaṇacarcā tayā valayito veṣṭito yo merus tena līlā sāmyam_līlāsāmyam_ | vīcisthānīyāni pattrāṇi | śailasthānīyā karṇikā || 3 ||

U° parya: padmāsanasya brahmaṇa āsanapadme yat kośacakraṃ karṇikā tad vaḥ punātu | cchaṭā cchuraṇacarcety arthaḥ | tathā valayito veṣṭito yo merus tena līlāsāmyam || 3 ||

R° paryantavarttīti | padmāsano brahmā tasya āsanaṃ āsanabhūtaṃ yat kuśeśayaṃ padmaṃ | atra kuśeśayasya sāmānyapadmavṛttitvepi viśeṣaṇasāmarthyāt kuśeśayaṃ puṇḍarīkaṃ tatra kośaḥ karṇikā | sa eva cakraṃ maṇḍalākṛti | yuṣmān | punātu sakalamalāpasaraṇena pavitrīkarotu kiṃbhūtaṃ paryante vartate iti tādṛśī paritaḥ pāṇḍurā pattrāṇāṃ paṅktiḥ yasya tat | punaḥ kiṃbhūtaṃ uddhataḥ mahākallolollolitaḥ yo dugdhasindhuḥ kṣīrārṇavaḥ tasya yāḥ vīcicchaṭāḥ tābhir valayito veṣṭitaḥ yaḥ amaraśailaḥ hemādriḥ tasya līlāṃ śobhāṃ dadhat bibhrat | atra ca ivādyanupādānāt pratīyamanopamā 3 athāto mahākavir haravijayākhyaṃ granthottamam ārabhamāṇa āha |

A° mandarādriśṛṅge jyotsnāvatī nāma nagary asti | ‘āliṅganāda—’ (1|33) ityādi ślokaṃ yāvad yāstīti nityatvād vartamānanirdeśaḥ | ‘vahanti vanitāḥ’ (īśvaro 'sti) ityādivat | surasarid gaṅgā | navārkarucīti sauvarṇatvāt | yadvā navair lokottarair arkākhyais tarubhiḥ sphaṭikair vā ruk kāntir yatra | śarvottamāṅga iva candralekhā | vṛṣadhvajaśiro 'pi gaṅgājaladhāvyamānam | tatrodgatasyārkasyeva ruk | jaṭānāṃ kapiśatvāt | śaśāṅkalekhāpi jyotsnāvatī sakaumudīkā | anyat samānam || 4 ||

U° astyu: mandarādriśṛṅge jyotsnāvatī nāma nagarī astīti | āliṅganetyādiślokaṃ yāvat kriyā astīti nityatvād vartamānanirdeśo vahanti sarita ityādivat | surasarid gaṅgā navair lokottarair arkākhyais tarubhis sphaṭikair vā ruk kāntir yatra śarvottamāṅge iva candralekhā tatra †navasya aruṇodgatasyeva† ruk kapiśatvāt | sāpi jyotsnāvatī sakaumudīkā | anyat samānam || 4 ||

R° astīti | jyotsnāvatīśabdo 'tra tantranyāyena dvirupātto viśeṣyeviśeṣane ca veditavyaḥ itiśabdaḥ prakāre nagarīpakṣe | candrakalāpakṣe itiśabdo hetau iti prakaraṇe hetau prakārādisamāptiṣu nirdarśane prakarṣe syād anutkarṣe ca sammata iti viśvaḥ mandaraśailaśṛṅge mandarākhyaparvatasānuni | jyotsnāvatī nagarī bhuvanatrayaikabhūṣā asti astīti nityapravṛttāyāṃ bhavantyāṃ vartamāne laṭ kā kasminn iva vṛṣāṅkaśirasi śrīśambhumūrdhni śaśāṅkalekhā candrakaleva | kiṃbhūte śṛṅge surasarijjalena svargaṅgājalena dhāvyamānaḥ prakṣālyamānaḥ bhāgaḥ taddeśo yasya tat tādṛśe | tathā | navārkaruci | arkaḥ sphaṭikasūryayor ity amaraḥ navaiḥ unnate bahuyojanasahasrāṇy aunnatyayukte tathā arkaiḥ sphaṭikopalaiḥ rocate dīpyate kvip tādṛśi vṛṣāṅkaśirasy api kiṃbhūte unnate utkandharatvavati tathā surasarijjalena svar gaṅgāmbhasā dhāvyamānaḥ bhāgaḥ ūrdhvabhāge yasya tat tādṛśe tathā navaḥ prātaḥkālino yaḥ arkaḥ sūryaḥ tadvat ruk dīptiḥ yasya tat tādṛśe | śrīśambhuḥ nīlo gale lohitaś ca keśeṣu nīlalohita ity āgamaḥ candrakalāpi bhuvanatrayaikabhūṣāsti | kiṃbhūtā jyotsnāvatī jyotsnā candrikā asyā astīti tādṛśī | atra śliṣṭaśabdamūlā upamā | athātaḥ ślokaikona triṃśatyā mahākulakena nagarīvarṇanaṃ vaktukāma āha |

A° padmarāgamayasadmaprabhāruṇitaṃ ca madhyagatendulekhaṃ ca | lekhāśabdo 'trārdhacandropalakṣaṇam | niśi nabhomadhye kalāmātrasyāsaṃbhavāt | narasiṃhanakhais tiryagvidāritaṃ saraktacchaṭaṃ hiraṇyakaśipor vakṣa iva | nṛsiṃhanakhabhinnaṃ sarudhiracarcaṃ vakṣa iva gaganam iti bhinnakramo 'yam ivaśabdaḥ | ‘ivena samāso vibhaktyalopaḥ pūrvapadaprakṛtisvaratvaṃ ca’ iti samāsasya nityaṃ vidhānād bhinnakramatā na yujyata iti cet, maivam | sāmarthye sati samāsena bhavitavyam | bhinnaśabdāt paraṃ cevaśabdaḥ śruto na | tenāsya sāmarthyam | anvayābhāvāt | yady evaṃ vakṣaḥśabdād anantaram asya prayogas tena ca saha samāsaḥ prāpnoti | tenaivāsya saṃsargāt | nityādhikāre ca [vacanena] vigrahasya nirāsāt | evaṃ tarhi cchandoviṣayatvād asya vākyasya na doṣaḥ | asati tatra cchandograhaṇe kathaṃ tadviṣayatvaṃ niścinuma iti cet_, asty eva tanniścayanibandhanaṃ tatrabhavato bhāṣyakārasya vyavahāraḥ| yad asau chandoviṣayam eva tatrodājahāra—‘kanye iva, vāsasī iva’ iti | anyatra ca laukikaprayoge bhinnakramam ivaśabdaṃ prayuyuje | [yathā—] ‘siṃhīrūpam iva’ ity atra siṃhīva rūpam ityartho vivakṣitaḥ | na tu rūpam iva siṃhīti | yas tu brūyāt_—‘chāndasa i(e)vāyaṃ prayogaḥ, chandasy api tathā darśanāt’ iti tanmate chandasi nityaṃ samāsavedanaṃ pūrvapadaprakṛtisvaratvam upalabhyatām iti kathaṃ bhinnakramatvam ivaśabdasya yuktiyuktaṃ syāt | laukike tu prayoge na kaścid doṣaḥ | ity alaṃ vācālatayā || 5 ||

U° yasyāṃ: padmarāgamayapadmaprabhāruṇitaṃ ca tat madhyagatendulekhaṃ ca | rekhāśabdo 'trārdhacandropalakṣaṇam niśi nabhaso madhye † kalāmātrasyāsaṃbhavāt † | narasiṃhanakhais tiryagvidāritaṃ saraktacchaṭaṃ hiraṇyakaśipor vakṣa iva || 5 ||

R° yasyām iti | sā kā ity āha yasyāṃ nagaryāṃ navāḥ nutanāḥ ye padmarāgamaṇayaḥ teṣāṃ prabhayā aruṇitā madhyagatā indulekhā ekakalātvād vakrā yasmiṃs tat tādṛśaṃ sat gaganaṃ asurādhipasya hiraṇyakaśipoḥ vakṣa ivā cakāsti rājate atra ivaśabda apadasthapadatvena bhinnakramo 'pi vakṣa ity anena saṃyojyaḥ | vakṣaḥ kimbhūtaṃ iva viṣamabhinnaṃ viṣamaṃ kṛtyābhinnaṃ kaiḥ nṛsiṃhanakharaiḥ narasiṃharūpaviṣṇoḥ nakhaiḥ svabhāvataḥ kūṭilaiḥ punaḥ kiṃbhūtaṃ sāsṛkchaṭaṃ sarudhirapaṅktiḥ | 5 |

A° jyotīrasāśmānaḥ sphaṭikamaṇayas tadaśmanāṃ gṛhāṅgaṇaṃ dugdhasindhur iva yatra sphuratkarormitayollasati bhrājate | atrotprekṣā—vadhūvadanendubimbasaṃdarśanād iveti | yo hi yoṣito vadanam indusamaṃ paśyati sa cetanācamatkṛtirūpam ullāsam āsādayati | indubimbasaṃdarśanaṃ ca dugdhodadher ullāsahetuḥ || 6 ||

U° jyotī: jyotīrasāśmānaḥ sphaṭikopalās tanmayabhavanāny eva dugdhābdhiḥ aniśaṃ sadā iti vyatireko dhvanitaḥ | ⊔ †ka† samudra ullasati || 6 ||

R° jyotīraseti sā nagarī kā ity āha | yasyāṃ nagaryāṃ jyotīrasāśmanaḥ sphaṭikamaṇayaḥ jyotīrasaś ca galvarkaḥ sphaṭikāś śāsitopala iti koṣaḥ teṣāṃ yat ajiraṃ gṛhāṅganaṃ tad eva dugdhasindhuḥ kṣīrārṇavaḥ | abhitaḥ ullasantyaḥ pracurā bahulāḥ tuṅgāḥ marīcayaḥ raśmaya eva vīcayo yasya sa tādṛśaḥ san anīśaṃ sadā ullasati bhrājate ullāsam āsādayati ca atrotprekṣā | kasmād iva vātāyaneṣu gavākṣeṣu jālamārgeṣu sthitāḥ yāḥ vadhūḥ sīmantinyaḥ tāsāṃ mukhendubimbasandarśanād iva | indubimbadarśanaṃ hi dugdhodadher ullāsahetuḥ | 6 |

A° kesaraḥ kiṃjalkaḥ || 7 ||

U° gaṇḍa: avataṃsaḥ karṇapūre 'tra pakṣmāṇi sūkṣmapakṣāḥ dadhur †dhatruḥ† || 7 ||

R° gaṇḍasthalīr iti | yasyāṃ nagaryāṃ jālamārgeṣu rateṣu nidhuvaneṣu saghanagharmajalāḥ sapracurasvedodakāḥ ata eva lagnāni avataṃsakusumebhyaḥ cyutāni kesarāgrāṇi yāsu tāḥ tādṛśīḥ gaṇḍasthalīḥ kapolabhittīḥ karmabhūtāḥ pramadā varāṅganāḥ dadhuḥ atrotprekṣā kīdṛśīr iva | abhyāpatantaḥ abhitaḥ āpatatuḥ ye madanamārgaṇāḥ kāmaśarāḥ teṣāṃ puṅkheṣu pakṣapakṣmāṇi pakṣasūkṣmalocāni tair ākulāḥ vyāptā iva | ayaṃ bhāvaḥ rateṣu avataṃsacyutakesarāgravyāptāḥ gaṇḍasthalyaḥ pramadānāṃ nāsan kintu āpuṅkhāgranimagnamadanaśarapakṣasūkṣmalomavyāptā ivāsan | ity arthaḥ | 7

A° jālamārgo gavākṣamārgaḥ | yena ca karair jālamārgo 'valambitaḥ sa aindrajālikatvād dagdham api kiṃcid utthāpayann avabhāsate | atra ca karāḥ pāṇayaḥ | jālaṃ vyājaḥ | mārgaḥ saraṇiḥ sroto [prapañco] vā | utthāpanaṃ pratyujjīvanam || 8 ||

U° sīma: karai raśmibhir utthāpayan prabodhayan taddarśanāt tāsāṃ kāmavṛddheḥ | avalambita āśrito jālamārgo gavākṣavivaradeśo yena | jālamārgaś ca kapaṭaḥ | indrajālī hi kaṃcid dagdham api hastenotthāpayati || 8 ||

R° sīmantinīti | yasyāṃ nagaryāṃ avalambitaḥ jālamargaḥ gavākṣadeśo yena sa tādṛk himāṃśuḥ himakaraḥ indumauleḥ śambhoḥ kopānalena samādhibhaṅgodbhūtena ciraṃ pūrvasmin kāle dagdham api madanaṃ karaiḥ kiraṇair eva karaiḥ pāṇibhiḥ sīmantinījanamanassu varakāminījanacitteṣu āśu śīghram eva utthāpayan uddīpayan vibhāti | atha ca yaḥ ko pi avalambitaḥ jālasya vyājasya indrajālasya mārgaḥ yena ca avalambita jālamargaḥ aindrajālikaḥ ciradagdham api kaṃcit karaiḥ pāṇisparśair utthāpayati pratyujjīvayati iti śabdaśaktyartho dhvaniḥ | 8 |

A° nitambaḥ kaṭibhāgaḥ, prasthikāpi | daśanā dantāḥ, kolambā api | kūrmī trisarikā, sairandhrīti prasiddho vīṇāviśeṣaḥ | priyasya patyur nakhānām agrakoṇaiḥ prāntabhāgair avamarśo vidāraṇam, priyaś cātirucito nakhānām agre sthito yaḥ koṇo vādanakāṣṭhikā tenāvamarśo nigharṣaṇam || 9 ||

U° yasyāṃ: daśanapaṅktiḥ radanakṣatālī priyanakhāgrāṇaṃ konaiś śikharair avamarṣeṇa kṣatena madhuraṃ kvaṇitaṃ sītkṛtaṃ yasyāḥ kāmasya kūrmī trisarikeva sāpi pṛthunitambā bṛhatprasthikā sphuraddaśanapaṅktiḥ svararacanārthaṃ kṛtakolambālī kṛśadehadaṇḍikā ca tatpakṣe pāṇijāgrasthitaḥ koṇo vādanakāṣṭhaṃ tadāhatyāṃ kalaṃ kvaṇitaṃ madhuradhvaniḥ || 9 ||

R° yasyām iti || yasyāṃ nagaryāṃ pṛthuḥ mahān pīno yaḥ nitambabimbas tasya śobhā yasyāṃ sā tathā sphuranttī daśanānāṃ radānāṃ paṅktir yasyās sā tādṛśī tathā kṛṣāṅgayaṣṭiś ca kṛśā aṅgayaṣtiḥ madhyadeśayaṣtiḥ yasyās sā rateṣu mohaneṣu priyasya bhartuḥ pāṇijānāṃ nakhānām atra koṇaiḥ yaḥ avamarṣaḥ nakhakṣatapradānarūpaḥ tena madhurakūjitaṃ yasyās sā tādṛśī aṅganā pramadā puṣpadhanuṣaḥ kāmasya kūrmī trisarikā viṇābhedaḥ sairandhrīti prasiddhā iva āsīt sairandhrīvīṇāṃ vādyabhāṇḍaviśeṣaḥ tathā ca kūrmī trisārikā 'pi pṛthuḥ mahān pīno yo nitambasya prasthikā yāḥ alāvasthānī yāyā śobhā yasyāṃ sā tādṛśī bhavati tathā spurantī daśanānāṃ kolambānāṃ kaśmīradeśabhāṣayā kūrmī iti prasiddhānāṃ paṅktiḥ yasyāṃ sā tādṛśī ca tathā kṛśā aṅgayaṣṭiḥ madhyabhāgasthānaṃ yasyās sā tādṛśī ca | tathā priyaḥ ruciratvād abhimataḥ pāṇijānāṃ nakhānam agre sthito yaḥ koṇo vādanakāṣṭikaḥ tenāvamarśo vighaṭṭanaṃ tena ca puraṃ kvaṇitaṃ yasyās sā tādṛśī ca bhavati koṇo vīṇādi vādanam ity amaraḥ atra śliṣṭaśabdanibandhanopamā | 9 |

A° ubhe eva pārśve ubhayapārśve | ubhaśabdasamānārtha ubhayaśabdo vṛttāv eva | kṣatajamasram || 10 ||

U° yatra: haricakraṃ sudarśanaḥ kṣatajaṃ rudhiraṃ || 10 ||

R° yatreti | yatra yasyāṃ nagaryāṃ ubhe eva pārśve ubhayapārśve ubhaśabdasamānārtha ubhayaśabdo vṛttāv eva | ubhayapārśvagataiḥ pārśvadvayagataiḥ pṛthubhiḥ padmarāgāṇāṃ maṇiviśeṣāṇāṃ vātāyanaiḥ jālamārgaiḥ karaṇaiḥ indranīlānāṃ maṇiviśeṣāṇāṃ bhavanaṃ gṛhaṃ cakāsti | kim iva kair ity āha | bāṇāsurasya vapuḥ hareḥ śrīkṛṣṇasya cakreṇa sudarśaṇena vilūnāḥ kṛttāḥ ye bāhavaḥ sahasraparimitāḥ teṣāṃ mūleṣu vraṇair iva | kiṃbhūtaiḥ | taiḥ kṣatajacchaṭayā rudhirapaṅktyā ārdrāṇi tādṛśaiḥ 10

A° abhyarṇaṃ samīpam || 11 ||

U°[omitted]

R° klāntim iti | yatra yasyāṃ nagaryāṃ aṅganānāṃ kāminīnāṃ ratāntasamaye ratāvasāne janitām utpannāṃ klāntikhedaṃ mānikyamandireṣu padmarāgamaṇigṛheṣu ye jālamārgāḥ tatra praviṣṭāḥ marutaḥ vāyavaḥ ślathayanti dūrīkurvanti kiṃbhūtāḥ marutaḥ abhyarṇavartinī nikaṭasthā yā suranirjhariṇī svardhuni tasyās taraṅgabhaṅgānusāreṇa śiśirāḥ śītalāḥ abhyarṇavartīty anena māṇikyagṛhānām atyaunnatyoktiḥ | 11 ||

A° yatra vadhūnāṃ gaṇḍabhuvi pratibimbitaṃ śaśiśakalam aśvetata vyarucat | sacihna lāñchanasahitam | ata eva guṇakiṇaśabalaṃ yattalaṃ prakoṣṭhāgraṃ tatsadṛśam | acchamaṇiḥ sphaṭikaḥ | nyāso nikṣepaḥ || 12 ||

U° gaṇḍa: indukhaṇḍaṃ spaṣṭalakṣma gaṇḍeṣu saṃjātapratimaṃ sadāśvetata śuśubhe | maurvīghātakiṇaśaraṃ kāmena nyāsīkṛtaṃ bhagavadbhītyā nikṣepasthāpitaṃ yad acchamaṇikhaṇḍamayaṃ sphāṭikaṃ talaṃ godhā tattvam ācarati yat || 12 ||

R° gaṇḍasthalīti | 11 | yasyāṃ nagaryāṃ rajanīṣu rātriṣu sudṛśāṃ varāṅgīnāṃ gaṇḍasthale atisvacche pratimitaṃ pratibimbitaṃ sacihnaṃ madhye kalaṅkāṅkitaṃ induśakalaṃ śaśiśakalaṃ asvetata vyarucat kiṃbhūtaṃ jyāghātapātakiṇena dhanurjyāghātapātakiṇena śaritaṃ yaṃ savalīkṛtaṃ yat mīnaketunā kāmena nyāsīkṛtaṃ nikṣiptaṃ acchamaṇikhaṇḍatalaṃ sphaṭikamaṇibhujabandhanaṃ prakoṣṭhakaṃ tad iva ācarat | tatra nyāsīkṛtaṃ kāmena sphaṭikabhujabandham ivety arthaḥ 12 |

A° jyotīrasamayībhir iṣṭakābhiś caturasraghaṭitair loṣṭakaiś cito dṛbdhaḥ | ‘iṣṭakeṣīkāmālānāṃ citatūlabhāriṣu’ iti hrasvaḥ | vapraḥ prākāraḥ | nibho vyājaḥ || 13 ||

U° yasya: sphaṭikeṣṭakābhiś citā ye abhraṃlihā bhāsvarāś ca vaprās tatprabhā dugdhābdhiṃ candradidṛkṣāgataṃ surā ūhāṃ cakruḥ | iṣṭakāśabdasyeṣṭakeṣīkamālānām iti hrasvaḥ || 13 ||

R°yasyām iti | yasyāṃ divyanagaryāṃ suraughāḥ devasamājāḥ dugdhasindhuṃ kṣīrarṇavam upagatam aśaṅkiṣata amanyanta kayā hetunā upagatam śaṅkarasya śambhoḥ śekharendusandarśanotsukatayā | kena jyotīrasānāṃ sphaṭikamaṇīnāṃ yāḥ iṣṭikāḥ caturaśraghaṭitāḥ loṣṭakāḥ pakvāḥ iṣṭikābhiś cito dṛbdaḥ yaḥ ambaracumbī dīpraḥ vapraḥ prākāraḥ tasya prabhābharaḥ kāntisamūhas tasya nibhena vyājena iṣṭakeśīkāmālānāṃ citarūlabhāriṣv iti hrasvaḥ prākāro varaṇaḥ sālaḥ syāc cayo vapram astriyām ity amaraḥ | 13 |

A° jhaṣaketanasya makaradhvajasya jhālaryo vādyabhāṇḍaviśeṣāḥ | tā api nūpurasadṛśajhāṃkāriṇyaḥ || 14 ||

U° lakṣmī: yāṃ puraṃ lakṣmīr nātyākṣīt | bhavanam eva mānasaṃ saras tatsanniveśe haṃsībhir iva śobhanā vilāso gatau kramaś cānvayaḥ | haṃsīṣu tūjjvalavilāsena gamanakrama ity āhuḥ | sanūpurarāvatvāt kāmasya jhallarībhir vādyabhāṇḍaviśeṣair iva || 14 ||

R° lakṣmīr iti | evaṃvidhābhiḥ strībhiḥ vadhūbhir yutāṃ yāṃ nagarīṃ lakṣmīḥ śobhā na ujjhāṃ cakāra nātyajat | strībhiḥ kābhiḥ bhavanaṃ gṛhaṃ purvoktakramenārthāt sphatikamayaṃ tad eva mānasaṃ mānasākhyaṃ saraḥ tatra sanniveśaḥ sthiravaravāso yāsām tādṛśībhiḥ haṃsībhiḥ varalābhiḥ punaḥ kiṃbhūtābhiḥ vilāsaś ca gatiś ca kramaḥ strīṇāṃ vyavahāraḥ padavikṣepo vā ujjvalaḥ yāsāṃ tādṛśībhiḥ punaḥ kiṃbhūtabhiḥ sahamaṇinūpurāṇāṃ ratnapādakaṭakānāṃ jhāṅkṛtena vartante yāḥ tādṛśībhiḥ strībhiḥ kābhiḥ jhaṣaketanasya kāmasya jhallaryaḥ vādyabhāṇḍaviśeṣāḥ | tābhiḥ | jhallaryo 'pi nūpuraravasadṛśajhāmkarinyāḥ || 14 ||

A° agurudhūpayor dhūmena militatvād indukaracakraṃ candrasya kiraṇacakram_, yatra śliṣyator gavākṣapidhānabhūtayor yujyamānayoḥ pidhānaphalakayor niṣpeṣeṇa kiṇayuktam iva śobhāṃ vahati | kiṇasya kṛṣṇatvāt || 15 ||

U° yasyāṃ: dhūpadhūmaśāritatvād gavākṣeṣu sauvarṇapaṭṭasandaṃśāl lagnakiṇarājīva || 15 ||

R° yasyām iti yasyāṃ nagaryām niśāsu rātriṣu ruciraḥ yaḥ agurudhūpadhūmaḥ tena kalmaṣitaṃ śavalīkṛtaṃ candrasya raśṃicakram lakṣmīm śobhām eti | utprekṣām āḥa | kīdṛśam iva pradoṣasamaye śliśyato gavākṣasya pidhānāt saṃyujyamānayoḥ kaladhautakavāṭapaṭṭayoḥ haimapidhānaphalako yoḥ sandaṃśena niśpeṣena lagnā kiṇalekhā yasya tat tādṛśam iva kiṇasya kṛṣṇatvāṭ utpreksā | kaladhautaṃ raupyahemnor ity amaraḥ || 15 ||

A° aṅganā iti śasantam || 16 ||

U° śayyā: nīlatvāt kāmakhaḍgakhaṇḍasāmyam | kusumāyudhasyeti spaṣṭākūtaṃ prastutānuguṇyam || 16 ||

R° śayyeti yatra yasyāṃ nagaryāṃ kāminām ratimandireṣu śayyāgṛhaṃ | suratakelinā yo vimardaḥ tena śīrṇāni yāni karṇāvataṃsībhūtapraphullanīlotpalapattrāṇi teṣāṃ ṣandaiḥ samūhaiḥ kīrṇaṃ vyāptam asīt atrotprekṣām āha ṣaṇḍaiḥ kair iva aṅganāḥ māninīḥ dalayataḥ khaṇḍayataḥ kusumāyudhasya kāmasya bhagnaiḥ asiśakalair iva kīrṇaṃ || 16 ||

A° āsanno yaḥ śaśikarebhyo bhaṅgaḥ kṣayas tasya bhayena hastā iva timirasya dhūmadaṇḍāḥ | sphuritā dīrghāḥ śikhā evāṅgulyo yeṣām | dīrghā śikhā koṭir yāsāṃ tathāvidhā aṅgulya iti ca || 17 ||

U° yasyāṃ: udarato 'bhyantarāt | nikaṭasthebhyaś candrakarebhyo yā bhaṅgabhīs tayā | kvacid bhaṅgadhiyeti pāṭhaḥ andhakārakartṛko yaś candrakarabhaṅgas taccikīrṣayety arthaḥ | śikhā evāṅgulyo yeṣām || 17 ||

R° yasyām iti yasyāṃ nagaryāṃ kālāgurudhūpadhūmasya daṇḍā jalamārgavivarodarataḥ prasasruḥ nirjagmuḥ ke iva āsannaḥ samīpavartīyaḥ candraḥ tasya karāḥ kiraṇāḥ ta eva karāḥ hastāḥ tebhyo yo bhaṅgaḥ nāśaḥ tasmād bhiyā bhayena andhakārasya hastā iva nirjagmuḥ kiṃbhūtās te sphuritāḥ dīrghāḥ śikhāḥ evāṅgulyaḥ dīrghāgrāṅgulyaś ca yeṣāṃ te tādṛśāḥ sphuritadīrghaśikhāṅgulikāḥ || 17 ||

A° rāgasyābhiṣaṅgasyānubandho yāsāṃ tathāvidhāś ca tāḥ pariṇāmasya vārdhakasya daśāyā avamarśo bādhas tena śūnyāś ca tāḥ | abhirāmaṃ navaṃ yadyauvanaṃ tasya pallavaḥ prasaro yāsāṃ tāḥ | pakṣe rāgasya lauhityasyānubandho vidyate yeṣāṃ tāni ca pariṇāmadaśāyāḥ paripākadaśāyā avamarśena sparśena śūnyāni navayauvanāni cājaraṭhāni pattrāṇi yāsāṃ tābhiḥ | kuñjavīthī tarugahano mārgaḥ | puraṃdhrayo mukhyayoṣitaḥ || 18 ||

U° rāgā: purandhrīpakṣe rāgaḥ priyānuraktiḥ pariṇāmadaśayā vārddhakenāvamarṣo 'bhibhavaḥ | yauvanapallavaṃ praśastaṃ tāruṇyaṃ | meruparvatagahanamārgo yathā kalpalatābhir bhāti | tatpakṣe rāga aujjvalyam pariṇāmaḥ pākaḥ navayauvanāni nibhṛtataruṇāni pattrāṇi yāsām || 18 ||

R° rāgānubandhi iti | yā nagarī purapurandhribhiḥ puranivāsimukhyastrībhiḥ ābabhāse aśobhata | kā | kābhir iva | kalpavṛkṣavallībhiḥ merugirigahanavīthī iva purapurandhribhiḥ kīdṛśībhiḥ | rāgo viṣayeṣv āsaktiḥ tadanubandhī pariṇāmadaśāyāḥ vārdhakāvasthāyāḥ avamarṣo bādhaḥ tena śūnyaḥ abhirāmaḥ navayauvanasya pallavaḥ prasaraṇam udbhedo yāsāṃ tāḥ tādṛśībhiḥ | kalpadrumavratatibhir api kimbhūtābhiḥ rāgasya lauhityasya anubandhinaḥ parināmadaśāyāḥ paripākadaśāyāḥ jīrṇatvarūpāyāś ca avamarṣeṇa sparśeṇa śūnyāḥ abhirāmāḥ navayauvanāḥ ajaraḍhāḥ pallavāḥ pattrāṇi yāsāṃ tāḥ tādṛśībhiḥ || 18 ||

A° ghaṭitāny ararāṇi kapāṭāni vidyante yeṣām | baddhamukhair iva dṛśyamānaiḥ | niśāyām api dṛśyatvam āgataiḥ | abhraṃkaṣā gaganavyāpinī || 19 ||

U°[missing]

R° vaidūryapaṭṭeti śrīmadamaracandraviracitāyām kāvyakalpalatāśikṣavṛttau sarvavarṇanastavake sphuṭaśobhanatāmraśrīḥ vidūramaṇidīdhitiḥ | ” vidūramaṇiḥ vaidūryam nīlaratnabhedaḥ tadvat iti kṛṣṇavarṇapakṣe viśeṣeṇa dūram atyarthaṃ maṇiḥ vidūramaṇiḥ sūryaḥ tadvat dīdhitayo yasyeti raktavarṇapakṣe ” iti ataḥ vidūraśabda eva sāṃyaḥ yatra yasyāṃ nagaryāṃ niśāsu rātriṣu maṇimayānāṃ harmyānāṃ paṅktiḥ kiṃbhūtaiḥ dvāraiḥ vaidūṛyeti vaidūryaṃ nīlaratnabhedaḥ tanmayapaṭṭaiḥ ghaṭite ararī kavāṭāpaṭṭe yeṣāṃ tadṛśāiḥ tathā dūrāt apāvṛtamukhair iva lakṣyamāṇaiḥ dvāraiḥ pratidiśam abhraṅkaṣāṃ śobhāṃ bibharti kimbhūtair api pihitair api || 19 ||

A° candracūḍāmaṇau smarārau | deha iti jātāv ekavacanam | deheṣv ityarthaḥ | kaṭākṣā evaṃ bāṇāḥ | bhruva eva dhanūṃṣi śarāsanāni || 20 ||

U° yasyāṃ: ⊔ adhirūḍhāḥ kaṭākṣā eva śarā yatra tathāvidhās tāsāṃ purandhrīṇāṃ bhruva eva dhanūṃṣi || 20 ||

R° yasyāṃ smaraḥ iti | yasyāṃ nagaryāṃ smaraḥ kāmaḥ paurapurandhridehe pauravaravarṇinīnāṃ dehe nirmuktabhītiḥ nirbhayaḥ āste kasmin saty api candramaulau śrīśambhau satataṃ sannihite 'pi | kiṃbhūtaḥ adhirūḍhāḥ kaṭāksā eva bāṇāḥ yeṣu tāni tādṛśāni yāni tāsāṃ paurapurandhrīṇāṃ bhruva eva śarāsanāni cāpāḥ teṣāṃ sahasreṇa kṛtātmarakṣā yasya saḥ || 20 ||

A° manmatha eva mataṅgajaḥ karī tasya dantapratimāsāmyaṃ bibhrāṇāni yatrotpalāni mukulitāny api rucā na daridrati na hīyante | atra ca deśasaubhāgyaṃ hetuḥ | bibhrantīti ‘vā napuṃsakasya’ iti num || 21 ||

U° krīḍā: manmathagajasya pratimānasāmyaṃ dadhanti kuvalayāni kartṝṇi na daridrati tadyuktāni bhavantīty arthaḥ || 21 ||

R° kriḍābjinīṣv iti yatra yasyāṃ nagaryāṃ krīḍābjinīṣu krīḍapuṣkariṇīṣu niśāsu rātrau kuvalayāni utpalāni sāndraṃ yat candraraśmicchaṭāpaṭalaṃ tena kuḍmaliṭāni saṅkucitāni manmatha eva matāṅgajaḥ hastī tasya dantakoṣasāmyaṃ dantayoḥ kośaḥ madhyabhāgaḥ pratimānaparyāyaḥ tasya sāmyaṃ tathā ca rāyamukuṭyāṃ pratimānaṃ praticchāyā gajadantāntarālayor iti rudraḥ iti pratimānasāmyaṃ bibhranti santy api kāntyā rucā na daridrati na hīyante | atra deśe saubhāgyaṃ hetuḥ | syād utpalam kuvalayam ity amaraḥ | atra kuvalayaśabdasya padmasāmānyena vṛttiḥ tathā ca bibhrantīti vā napuṃsakasyeti nutvam || 21 ||

A° kūbarī rathaḥ | ‘kūbaras tu yugaṃdharaḥ’ | vandanamālā pattrapuṣpamayī srak || 22 ||

U° māṇi: kūvarī rathaḥ toraṇasyaunnatyāt sūryāśvānāṃ ca haritavarṇatvāt toraṇaṃ nīlapallavaracitapralambhamālāyuktam iva || 22 ||

R° maṇikyeti || yatra yasyām nagaryāṃ māṇikyatoraṇaṃ padmarāgatoraṇaṃ adūre vilambamāno yaḥ tigmāṃśukūbarī sūryarathaḥ tatra turaṅgānāṃ haritāṃ śarīrabhābhiḥ śarīrakāntibhiḥ hetubhūtābhiḥ kṣaṇaṃ prātassamayakṣaṇe haritapallavaiḥ nīlavaṛṇapallavaiḥ nirmitābhiḥ vandanamālikābhiḥ pattramayībhiḥ aśūnyam iva pūṛṇaṃ ivābhāti || 22 ||

A° lāvaṇyasāhitā kāntir evāmṛtapravāhaḥ | aṭṭālam upari yuddhasthānam | tatpradhānaḥ sālaḥ purīprākāraḥ | tasya valayarūpatvād ālavālānukaraṇam || 23 ||

U° yasyāṃ: aṭṭālānāṃ yuddhasthānānāṃ śaraṇakalpānāṃ prākārāṇāṃ valayaṃ taruṇīlāvaṇyanirjharasyālavālalīlām anukaroti | cumbitaṃ spṛṣṭam || 23 ||

R° yasyām iti yasyām nagaryāṃ aṭṭālasālavalayaṃ aṭṭālam upari yuddhasthānaṃ tatpradhānaḥ sālaḥ purīprākāraḥ tasya valayaṃ vikaṭālavālalīlāṃ āsamantāj jalalavam ālāti mūlavibhujāditvāt ka iti svāmī ālūyate tarusekārthaṃ khanyate idam lūñ chedane āpūrvāt sthāgati sṛjīti ālam ālavālam iti rāyyamukuṭīkāraḥ ālavālaṃ vṛkṣasecanārthaṃ tarumūlakṛtasvalpajalādhāraḥ tasya līlāṃ viḍaṃbayati anukarotīti kiṃbhūtaṃ cumbitaṃ bhānubimbaṃ yena tat kena bhareṇa samūhena kasya taruṇīnām ye mukhendavaḥ teṣāṃ lavanyākāntivisara eva amṛtanirjhara tasya || 23 ||

A° vyaktīkṛtāvayavāḥ prakaṭīkṛtāṅgyaś candrakalāvac ca rucirarūpā mṛgīdṛśo yatra hṛdayam āvarjayanti | hāvabhāvān anu badhnātītīdṛśo yaḥ kusumāyudho 'naṅgas tasya saudhaṃ dhavalaharmyaṃ viśrāntiviṣayatayā hāso yāsām | hāvo ratyaṅgasaṃbhavaś ceṣṭāviśeṣaḥ | uktaṃ ca—‘yatrākṣibhrūvikārādyāḥ śṛṅgārākārasūcakāḥ | sa grīvārecako jñeyo hāvo ratyaṅgasaṃbhavaḥ ||’ iti | bhāvo 'bhilāṣaḥ || 24 ||

U° vyaktī: avayavā eva candrakalā unmiṣad vikasan madhuro 'nutkaṭo mugdho manojño vidagdhaś cāgrāmyo hāvo 'kṣibhṛūvikārādibhiś śṛṅgārasūcako vyapāro yasya bhāvasya ratyādes tam anubadhnāti yaḥ | kāmasya ca saudhabhūto viśrāntisthānaṃ hāso yāsām | sudhayā nirvṛttaṃ śubhraṃ hāsaś ca tathā || 24 ||

R° vyaktīkṛteti yatra yasyāṃ nagaryāṃ hṛdayaṃ haranti vaśīkurvanti kiṃbhūtāḥ vyaktīkṛtāḥ avayavāḥ yābhis tāḥ vyaktīkṛtāvayavāḥ candrakalābhirāmarūpāś ca punaḥ kiṃbhūtāḥ unmiṣan madhuro mugdhaḥ vidagdho nipuṇaḥ yo hāvaḥ | śṛṅgārabhāvo ratiḥ tajjā strīṇāṃ ceṣṭā vilāsādikā hāvaśabdenocyate strīṇāṃ vilāso bibboko vibhramo lalitaṃ tathā helā lilety amī hāvāḥ kriyāḥ śṛṅgārabhāvajāḥ ity amaraḥ tathānyatra | tatrākṣibhrūvikārādyāḥ śṛṅgārakārasūcakāḥ sa grīvārecako jñeyo hāvo ratyaṅgasambhavaḥ iti hāvaḥ strīṇāṃ ceṣṭāviśeṣaḥ bhāvo 'bhilāṣaḥ tau anubadhnāti tadanubandhī kusumāyudhasya kāmadevasya saudhaḥ nityanivāsakṛto hāso yāsāṃ tāḥ || 24 ||

A° niketo gṛham | lohita evāśrayavaśāl lauhitīkaḥ sphaṭikaḥ | ‘karkalohitādīkak’ | amandarucaḥ sūryasya priyāya | tvadanugrahād gṛhītamāhātmyair asmābhir arātayo 'vaṣṭabhyānītā itīṣṭaṃ nivedayitum | kvacit ‘aśītarucā’ iti pāṭhaḥ | tatra priyāya teṣām eva hitam ādhātuṃ raviṇā bandīkṛtāḥ śaśikarā yeṣv iti yojyam || 25 ||

U° yasyāṃ: niketanalinīṣu gṛhodyānapadminīṣu lauhitīkās sā[-] dhikā ye sopānapaṭṭās tatkāntyā cchuritatvād padmaṣaṇḍā amandarucaś caṇḍāṃśos tuṣṭaye haṭhāhṛtendukarā iva śriyaṃ vitenire || 25 ||

R° yasyāṃ iti yasyāṃ nagaryām niketanaliniṣu gṛhapuṣkariṇīṣu padmānāṃ tāmarasānāṃ ṣaṇḍāḥ samūhāḥ lakṣmīṃ śobhām atāniṣuḥ vistārayāmāsuḥ kiṃbhūtā iva aśītarucaḥ sūryasya svabhartuḥ priyāya priyam nivedayitum asmābhis tv anugrahād gṛhītamahātmyair arātayaḥ candrakiraṇā avaṣṭabhyānītā iti iṣṭaṃ nivedayitum bandīkṛtāḥ bandhanagṛhaṃ prāpita indukiraṇāḥ yais te tādṛśā iva | kiṃbhūtāś ca padmaṣaṇḍāḥ lauhitīketyādi lauhita ivāśrayavaśāl lauhitīkaḥ sphaṭikamaṇiḥ karkalohitādī kak spaṭikkamayāḥ ye sopānapaṭṭāḥ teṣāṃ rucyā vicchuritaṃ vyāptam antarālaṃ madhye yeṣāṃ te tādṛśāḥ madhyagatasphaṭikasopānarucayā ity arthaḥ || 25 ||

A° māṇikyakhaṇḍaiḥ khacitāś churitāḥ | dīptisahitā ityarthaḥ | kāścanaketūnāṃ sauvarṇapatākānām || 26 ||

U° māṇi: ketudaṇḍāś śikharibhinnameghanirgatābhis saudāmanībhir vidyudbhir ivālambhitā bhānti māṇikyakhacitatvāt || 26 ||

R° maṇikyeti | yasyāṃ nagaryāṃ suramandireṣu devagṛheṣu kāñcanamayāḥ ketudaṇḍāḥ cakāsati śobhante kiṃbhūtāḥ māṇikyakhaṇḍaiḥ padmarāgaśakalaiḥ khacitāḥ utkīrṇāḥ | ata eva viśeṣeṇa pāṭalāḥ yāḥ teṣāṃ prabhās tābhiḥ āliṅgitāḥ kābhir ivāliṅgitāḥ śikharakoṭyā uparyagreṇā vipāṭitānām abhrāṇāṃ meghānāṃ saudāmanyaḥ taḍitaḥ tābhir iva || 26 ||

A° adhiniśīthini rātrau | vibhaktyarthe 'vyayībhāvaḥ | vibhāvaryā vikāro vaibhāvaram | naiśam ity aṇ vikāre 'rthe vidheyaḥ | bhāvādau tu ‘kālāṭ ṭhañ’ iti ṭhañ eva syāt || 27 ||

U° yasyaṃ: adhiniśīthini rātrau vikāsitotpalahastatvāt | naiśāndhakāreṇa dattakarālambana ivābhisārikālokaḥ kāntaveśma yāti || 27 ||

R° yasyām iti || yasyāṃ nagaryāṃ adhiniśīthini rātrau vibhaktyarthe 'vyayībhāvaḥ purandhrilokaḥ mukhyayoṣillokaḥ āśu śīghraṃ kāntaveśma dayitagṛhaṃ vrajati | kiṃbhūtāḥ līlayā gṛhītaṃ vikacaṃ phullam utpallaṃ nīlotpalaṃ yena sa tādṛśaḥ pāṇipadmaḥ yasya saḥ ata eva vaibhāvareṇa vibhāvaryāḥ vikāraḥ vaibhāvaraṃ naiśam tenāndhakāreṇa rabhasād utkanṭḥayā dattahastāvalambana iva | vikacanīlotpalam andhakārastanīyaṃ tena dattahastāvalambana ivety arthaḥ || 27 ||

A° ākrīḍa udyānam | tāmarasinī kamalinī | kramānugatā satatam ākalitā kaiśikamadhyamasya gītaviśeṣasya śrīr yena | madhyamaṃ satatam ākarṇitavantaḥ | deśāntare 'pi tatsadṛśaṃ nādaṃ tam evādhyavasyanti | utkaṃdharastimitapādaṃ ca vidhūtapakṣaṃ ca | jātikriyāviśeṣatā svabhāvoktir uktā || 28 ||

U° ākrī: ākrīḍatāmarasinya udyānapadminyaḥ | mañjuḥ madhuraḥ | kaiśikamadhyamaḥ śuddhagīṭiviśeṣaḥ ūrdhvagrīvāḥ niścalāḥ pādavidhūtāś ca pakṣā yatra tathā kṛtveti jātiḥ || 28 ||

R° ākrīḍeti | yasyāṃ nagaryāṃ | bhavanahaṃsagaṇena gṛhapālitasarālakulena ākrīḍatāmarasinyām udyānapuṣkariṇyām pumān ākrīḍa udyānam ity amaraḥ tatra jalayantraṃ ābīśāro iti bhāṣayā prasiddhaṃ tasya mañjunādaḥ maduradhvaniḥ ākarṇyate kathaṃ utkandharaṃ ca stimitapādam ca vidhūtapakṣaṃ ca kriyāviśeṣaṇam etat mañjunādaḥ kiṃbhūtaḥ krameṇānugataḥ anukṛtaḥ kaiśikamadhyamasya śuddhagītaviśeṣasya śrīḥ śobhā yena sa tādṛk svabhāvoktir alaṅkāraḥ || 28 ||

A° aśmagarbhaṃ marakatam | harinmaṇir ityarthāntaram | pariṇāmī pariṇataḥ aṅgeṣūpasaṃkrāntaḥ | ciraṃ bahukālam upabhukto nipītaḥ || 29 ||

U° yatrā: aśmagarbhakāni marakatāni tatprakāśasyāmīkṛtatvāt pariṇataśevālarasā iva || 29 ||

R° yatrāśmagarbhaketi | yatra yasyāṃ nagaryāṃ | aśmagarbhakaḥ marakataḥ harinmaṇir iti paryāyāḥ marakatamaṇiśikhāprakāśena śyāmīkṛtāḥ santaḥ gṛhapuṣkariṇītīreṣu haṃsayūthāḥ sarālayūthāḥ ceto haranti atrotprekṣā | kiṃbhūtās te pariṇāmi paripākaṃ gataḥ ciraṃ bahukāle upabhuktaḥ āsvāditaḥ śevālasaṃhatirasaḥ jalanīlīpaṅktirasāḥ yeṣāṃ te tādṛśā iva kāraṇāguṇā hi kārye dṛśyante ity ataḥ pariṇāmaṃ gatena cirāsvāditena jalanīlīraseneva āvāptaharitimāna ity arthaḥ || 29 ||

A° harmyam uttamāgāram | pratidiśaṃ diśi diśi | ‘avyayībhāve śaratprabhṛtibhyaḥ’ iti ṭac | udabindavo jalakaṇāḥ | ‘manthaudana—’ ityādinodakaśabdasyodabhāvaḥ || 30 ||

U° yasyā: indranīlās tatprabhāspṛṣṭamadhyās tārakāḥ kuśāgralagnāvaśyājalabinduśriyaṃ prāptāḥ || 30 ||

R° yasyāṃ iti | yasyāṃ nagaryāṃ harinmaṇibhiḥ marakatamaṇibhiḥ vinirmitani yāni harmyāṇi uttamāgārāṇi teṣāṃ raśṃibhiḥ līḍhaṃ vyāptam udaraṃ madhyaṃ yeṣāṃ tādṛśāḥ niśi rātrau tārakaughāḥ tārānikarāḥ pratidisaṃ diśi diśi udbhinnāni yāni komalakuśaṅkurāṇi teṣāṃ koṭiṣu agreṣu lagnāḥ ye udabindavaḥ jalakaṇāḥ teṣāṃ paṭalasya samūhasya śriyaṃ śobhām āliliṅguḥ prāpuḥ manthaudanetyādinā udakaśabdasyodādeśaḥ || 30 ||

A° yatra śaśī tiraskṛtarucitvāt pātālāntaram iva praviśati | vailakṣyād iti bhāvaḥ | kaluṣatā kalaṅkakṛtaṃ mālinyaṃ nirvedaś ca | hṛdayaṃ madhyaṃ manaś ca || 31 ||

U° lāva: nirbharaṃ pūrṇaṃ jitakāntitvāt pratibimbavyājena yā tālam iva praviśati † yo 'py antena jīyeta sa kalapakṣadayo bhavati † || 31 ||

R° lāvanyeti yasyāṃ nagaryāṃ lāvanyena | rājanakaśrī rucakaviracitāyāṃ sahṛdayalīlāyāṃ | taraṅgidravasvabhāvāpyāyinetrapeyavyāpisnigdhamadhura iva pītimotkarṣair kasāra iva pūrṇenduvad āhlādako dharmaḥ saṃsthānamugdhim avyajño lāvanyāṃ tena nirbharāṇi purṇāni yāni purandhrīṇāṃ mukhyastrīṇāṃ mukhāni taiḥ avadhūtani jitā cchayā śobhā yasyām tādṛśaḥ ata eva hṛdayena madhyena cetasā ca kaluṣatāṃ kāluṣyaṃ kalaṅkikatvaṃ ca dadhat induḥ candraḥ niśāsu rātriṣu | maṇikuṭṭimeṣu kuṭṭimo 'strī nibaddhā bhūr ity amaraḥ teṣu bimbyamānā pratibimbyamānā yā mūrtih tasyāḥ cchālena vyajena pātālāntaḥ praviśatīva | yatpaurastrīmukharucitiraskṛtakāntitvād vailakṣeṇa pātālam iva praviśatīti bhāvaḥ || 31 ||

A° kuṭṭimāgrād vikṣipto 'nupayogān nirastaḥ | karā raśmayaḥ, karaś ca pāṇiḥ | tadāhanane patanasya yogyatvāt || 32 ||

U° prāta: gṛhakuṭṭimān mārjanīvikṣiptaratnapuṣpaprakarāvakīrṇatvād anūrupātitaśārā iva || 32 ||

R° prātar iti | yatra yasyāṃ nagaryāṃ rathyāḥ viśikhāḥ rathyā pratoli viśikhā iti amaraḥ prātassamaye cakāsati śobhante kiṃbhūtāḥ gṛhāṇām udareṣu kuṭṭimāgrāt vikṣiptaḥ anupayogān nirastaḥ yaḥ ratnāny eva kusumāni teṣāṃ prakaraḥ tena avakīrṇāḥ vyāptāḥ atrotprekṣām āha | kiṃbhūtā iva abhyudgataḥ udyan yaḥ aruṇaḥ sūryaḥ tasya karāḥ raśmayaḥ te eva karāḥ hastāḥ taiḥ pātyamāno yo nakṣattrarāśiḥ tena śavalā iva || 32 ||

A° patyur īśvarasya saṃbandhinām āliṅganānāṃ murajaviśeṣāṇāṃ nādena racitā sthitir yatra tādṛśī yā vyarucat | ‘nānāprakāre 'py avanaddhajātes tripuṣkaraṃ vādyam ihādyam āhuḥ | tatrāṅkakāliṅgyakasaṃjñakau dvāv anyas tathā cordhvakanāmadheyaḥ ||’ tasyāś ca nāyikātvapratīteḥ patyuḥ priyasyāliṅganaviṣayeṇādareṇa citā vyāptā sthitir yasyā ity api yojanā || 33 ||

U° āli: yā purī patyuḥ śabdasyābabhau ruruce āliṅgā murajaviśeṣāḥ teṣāṃ nādena racitāvasthitiḥ | sālāḥ prākārā iva jaghanaṃ tad vahantī nāyikāpi priyāliṅgane naya ādaras tenācitasthitiḥ | ata eva nīver jaghanāṃśukagranther vikāsaḥ || 33 ||

R° āliṅgeti | sā kā ity āha patyur īśvarasya saṃbandhināṃ āliṅgānāṃ svarajaviśeśāṇāṃ nādena racitasthitiḥ yatra tādṛśī yā jyotsnāvatī nagarī ābabhau vyarucat | kiṃbhūtā sālajaghanaṃ sālaḥ prākāraḥ prākāro valayas sāla ity amaraḥ sa eva jaghanaṃ udvahantī | kiṃbhūtaṃ vistāri savistāraṃ punaḥ kiṃbhūtaṃ vikāsi vistīrṇaṃ yat parikhāyāḥ jalaṃ tad eva nīvibandhaḥ yasya tat punaḥ kiṃbhūtaṃ parivartamānaḥ bahiḥ paribhraman yo nakṣatrarāśiḥ sa eva raśanāguṇo yasya tat āliṅgeti | saṅgītaśāstre | nānāprakāre 'py avanaddhajāte tripuṣkaraṃ vādyam ihādyam āhuḥ yatrāṅkakāliṅgakasaṃjñakau dvāv anyas tathā cordhvakanāmadheyaḥ | nāyikāpi | āliṅgane āśleṣe ya ādaraḥ tena citā sthitir yasyās sā tadṛśī bhavati | tathā vikāsinī vibandhanaṃ parivartamānaraśanāguṇaṃ ca jaghanaṃ vahantī bhavati || 33 || mahākulakam |

A° nirmāṇadeho deśakālādyavacchinnam icchānirmitaṃ śarīraṃ taddhaṭanā gṛhītā yena saḥ | kṣapitam arīṇāṃ cakraṃ samūho yena | kṣapitāricakraṃ sudarśano yasya sa ca | tatpakṣe aras tīkṣṇakīlaṃ tadyuktam ari | saudhaiḥ saudhavac ca dhavalā śvetā | ‘kalāvacūlaḥ’ iti pāṭhe avacūlaṃ cihnam || 34 ||

U° tāma: tāṃ vibhur adhyuvāseti upānvadyāṅvāsa ity ādhārasya karmatvam | bhuvanānām anugrahītum icchayā āttā gṛhītā nirmāṇārthaṃ svargāya śarīraghaṭanāyaiveti svātantryam uktam kṣapitam aricakraṃ śattrusamūho yena saudhaiḥ prakāraiḥ dhavalāḥ śūbhrā yadvā taiḥ dhavān taruṇān lāty ādatte yā | cakrī viṣṇuḥ yathā saudhavac śuklāṃ śeṣamūrtim adhyāste | tatpakṣe nirmāṇāpārimāṇā dehaghaṭanā | kṣapitā arayo yena yadvā † 'navaratadaityakaṇṭhakṣepāt kṣīṇā arā dhārāḥ santi † yasya tathāvidhaṃ cakraṃ sudarśano yasya || 34 ||

°R tām ahdhyuvāseti | śiśiraraśmikalāvacūlaḥ avacūlaś cihnaṃ | evaṃbhūtaḥ vibhuḥ śrīśivabhaṭṭārakaḥ tāṃ jyotsnāvatīnagarīm adhyuvāsa aśiśrayat kiṃbhūtāṃ tāṃ nagarīṃ saudhaiḥ svadhāvalitair uttamāgāraiḥ dhavalā tādṛśī kiṃbhūtaḥ śambhuḥ bhuvanānāṃ lokānāṃ anujighṛkṣayā anugrahītum icchayā ātta grhītanirmāṇadehasya deśakālādyavacchinnecchanirmitaśarīrasya ghaṭanā yena saḥ niṣkalo 'pi san visvānujighṛkṣayā ātta sakaladeha ity arthaḥ punaḥ kiṃbhūtaḥ kṣapitaṃ aricakraṃ arīṇāṃ tripurāndhakāsuradīnāṃ cakraṃ yena saḥ śambhuḥ ka iva cakrī viṣṇur iva | yathā viṣṇuḥ bhujagādhirājamūrtiṃ śeṣanāgarājamūrtiṃ adhitiṣṭhati | kiṃbhūtaṃ śeṣamurtiṃ saudhavat dhavalā śvetā tādṛśī viṣṇur api kiṃbhūtaḥ āttā nirmāṇadehaghaṭanā daśāvatāraghaṭanā yena saḥ punaḥ kiṃbhūtaḥ kṣapitāḥ saṃhāritāḥ arayaḥ madhukaiṭabhakaṃsān yāḥ yena tat tādṛśaṃ cakraṃ sudarśanākhyaṃ yasya ca tādṛśaḥ || 34 || athedānīṃ maheśvaravarṇanaṃ ślokaikonatriṃśatyā mahākulakena varṇayann āha |

A° prapannā vaśenāgatāḥ | rudrībhaviṣyatīti saptamyantaṃ vapuṣo viśeṣaṇam || 35 ||

U° yasya: prapannajanatā bhaktalokāḥ | upapannam ucitam | rudrabhaktāḥ kila tādrūpyaṃ yānti || 35 ||

R° yasyeti | prapannāḥ bhaktyullāsena śaranārtham āgatāḥ prapannajanānāṃ samūhāḥ prapannajanatāḥ yasya maheśvarasya caraṇārabindapīṭhe pādapadmapīṭhe yaḥ praṇāmaḥ daṇḍavat praṇatiḥ praṇāmena yaḥ kiṇaḥ tena śāritaṃ śavalīkṛtaṃ svalalāṭapaṭṭam udvahanti | atrotprekṣā | kīdṛśam iva | teṣām eva prapannajanānāṃ vapuṣi dehe śrīśambhuprasādāt rudrībhaviṣyati sati upapannā prāptā bhāsvatī dīptimatī ūrdhvākṣṇaḥ dahanāśritākṣṇas tṛtīyasya tārakā kanīnikā yena sa tādṛśaṃ || 35 ||

A° sāhāyakaṃ tripuradāhe sahāyatā | ‘yopadhāt—’ iti vuñ | pṛṣatkaḥ śaraḥ || 36 ||

U° pluṣya: nibiḍa[-] jūṭabandhatvāt khedākulena vāsukinā phūtkṛtaiḥ śarāgnis sandhukṣitaḥ || 36 ||

R° pluṣyann iti phaṇinā vāśukinā yasya maheśvarasya pṛṣaṭkavahṇiḥ śarāgniḥ sapadi tatkṣaṇam eva tripuradāhe sāhāyakārthaṃ phūtkṛtamārutena phūtkāravāyunā sandhukṣitaḥ sandīpitaḥ śarāgniḥ kiṃ kurvan puratrayaṃ tripuraṃ pluṣyan pluṣyamāṇaḥ kiṃbhūtena phaṇinā aviślathaṃ dṛḍhaṃ jūṭabandhena kapardabandhena yaḥ khedaḥ tenākulaḥ tādṛśena punaḥ kiṃbhūtaḥ sphuranti uddhatāni arcīṃṣi yasya saḥ || 36 ||

A° tāṇḍavitamākṛṣṭam | cāpo... || 37 |

U° āka: ākarṇaṃ tāṇḍavita ākṛṣto mandara eva dhanurdaṇḍas tatra jyātvaṃ nīto yo vāsukis tatphūtkṛtair uttho 'gnir ādhau tripuraṃ dadāha paścāc charāgniḥ || 37 ||

R° ākarṇeti | yasya maheśvarasya tripuradāhārthaṃ karṇāt ākarṇaṃ tāṇḍavita ākṛṣtaḥ yo mandaraḥ śaila eva cāpadaṇḍaḥ tatra maurvīkṛto ya uragaḥ śeṣanāgaḥ tasya phaṇāgaṇānāṃ phūtkārotthaḥ analo 'gniḥ tripuraṃ prathamaṃ dadāha tataḥ paścāt pṛṣaṭkaḥ śaraḥ viṣṇuḥ śarabhūtaḥ tripuram ādidīpat dadāha kiṃbhūtaḥ pṛṣaṭkaḥ | śarāgraphalabhūtavahniśikhāsamūhena jaṭilaḥ || 37 ||

A° 38 ||

U° mandā: lalāṭanetrāgnigālitacandrakalāniryadamṛtanirjharavac chrīr yasyāḥ || 38 ||

R° mandākinīti | yasyeśvarasya śirasi mūrdhni mandākinī svargaṅgā vibhāti kiṃbhūtā maulau mahāpralaye kālāgnirudrarūpeṇa saṃhāritabrahmakapālapaṭṭe yaḥ saṅghaṭṭaḥ saṃśleṣaḥ tena jarjarā taraṅgaghaṭā yasyās sā tādṛśī | atrotprekṣām āha | kiṃbhūtā mandākinī | ūrdhvanetratṛtīyanetrabhūtāgninā viplutaḥ dravīkṛto yaś candrakhaṇḍaḥ tasmān viṣyandamānāḥ ye śiśira amṛtanirjharāḥ teṣāṃ śrīḥ śobhā yasyāḥ sā || 38 ||

A° īrṣyānubandhakaluṣam iti prasamīkṣaṇakriyāviśeṣaṇam || 39 ||

Utpala: yasya | kṛtakeśagrahāṃ iverṣyakaluṣaṃ kṛtvā vīkṣya || 39 || gaṅgāṃ sapatnīm

R° yasyeti yasyeśvarasya anurāgavaśataḥ atipremabhareṇa kṛtaḥ kelinā kacānāṃ keśānām avamarśaḥ sparśaḥ yayā sā tādṛśīṃ gaṅgāṃ īrṣyanubandhena kaluṣaṃ kṛtvā prakarṣeṇa samīkṣya sphuṭaṃ kālakūṭaviṣaviśeṣachāyāvyājena yamunayā nadyā iva aliṅgitaḥ kaṇṭhaḥ vibhāti śobhate yathā kācit priyatamasya kṛtakeśāvamarśāṃ sapatnīṃ dṛṣṭvā asūyābandhakaluṣamanaskā priyatamaṃ gale dṛḍham āliṅgati tathety arthaḥ || 39 ||

A° abhyasūyā guṇāsahanam | roṣānubandha īrṣyāhevākaḥ | uṣṇīṣaḥ śiroveṣṭanam | pratipathaḥ svargo... | abhimukhīva krodhāveśāt || 40 ||

U° ābhā: vāsukinipīḍitajūṭabandhotthā gaṅgā gaurīviṣayerṣyayā pratīpamārgābhimukhīva || 40 ||

R° ābhātīti yasya maheśvarasya uṣṇīṣaṃ śiroveṣṭanaṃ tadbhuto yaḥ pannago vāsukiḥ tena nipīḍito yaḥ jūṭaḥ kapardaḥ tasya bandhena bhāgāḥ vibhāgāḥ tataḥ utthitā pratipathaṃ yasmāt svargāt āgatā tasyaiva mārgaṃ prati pratimukhī iva ambaram ārurukṣuḥ āroḍhum icchuḥ ābhāti | atra hetum āha | kutaḥ himaśailasya himācalasya sutā pārvatī sapatnīsthānīyā ekakāraṇotpannatvāt tasyāḥ abhyasūyayā priyatamadehārdhaharaṇena yo roṣānubandhaḥ tasmāt || 40 ||

A° pūṣā sūryaḥ | tadvaktraśeṣā yā hy aparāvaśiṣṭā sā śaraṇāgatā dṛśyate | kapālebhyo nipatito māṇibandhaḥ (?) || 41 ||

U° niṣpe: śeṣā patitāvaśiṣṭā | pūṣṇaḥ kila dakṣayajñe bhagavatā dantapaṅktiḥ śātitā || 41 ||

R° niṣpeṣeti yeneśvareṇa vidhutam kaṃpitaṃ uttamāṅgaṃ śiro yatra tat hasatā adhaḥ patantī purāṇabrahmakapālasya mūlabandhāt cyutā daśanapaṅktiḥ dantapaṅktiḥ vyalokyata | kiṃbhūtā iva | niṣpeṣāt dakṣakratuvidhvaṃse hastacapeṭayā niṣpeṣāt yat bhayaṃ bhītiḥ tayā śaraṇārtham āgataḥ yaḥ pūṣā sūryaḥ tasya vaktre śeṣāyāḥ dantapaṅkteḥ aparā avaśiṣṭā iva || 41 ||

A° bandhaparibhraṣṭaḥ śaśī yasya kareṇa kṣaṇaṃ [ciraṃ] vidadhre kṣititale mā loṭhiṣṭeti | indoḥ khaṇḍo 'rbhaka iva salīlaṃ bandīkṛto 'vaṣṭabdhaḥ | tathāvidhasya ca śiśoḥ kareṇa dhāraṇam ucitaṃ vātsalyāt palāyanabhayād vā || 42 ||

U° yasyā: gaurīvadanena jitakāntitvād indoḥ khaṇḍo bāla iva vandī kṛtas saṃvṛttaḥ || 42 ||

R° yasyeti | yasya maheśvarasya kareṇa pāṇinā ślatho yo jūṭaḥ kapardaḥ tasyāgrabandhāt cyutaḥ indoḥ candrasya khaṇḍaḥ kṣaṇaṃ abhāri dṛtaḥ ka iva arbhakaḥ indoḥ vandīkṛtaḥ bandhanāgāraṃ prāpita iva atra hetuḥ indoḥ kīdṛśasya adrirājasya himācalasya tanayā pārvatī tasyāḥ vadanam eva arabindaṃ mahotpalaṃ tasya lāvaṇyaṃ prāk nirṇītaṃ lāvanyaṃ ca kāntiḥ śobhā ca aṅgopāṅgānāṃ kādakasya rūpa tābhyāṃ salīlaṃ vijitasya ata eva vijitaḥ vandīkrīyate arbhakasya kareṇa dhāraṇam ucitam vātsalyāt palāyanabhayāt vā || 42 ||

A° eti gacchati | aśānteti cchedaḥ | parameṣṭhī brahmā tasya || 43 ||

U° mandā: gaṅgānirjharapūritarandhrabhāgotthitatāranādatvād adyāpi savedadhvanīva brahmakapālam || 43 ||

R° mandākinīti | yasya maheśvarasya śirasi parameṣṭhiśiraḥkapālaṃ brahmaśiraḥkapālaṃ śriyaṃ śobhām eti | kiṃbhūtaṃ mandākinyāḥ svargaṅgayāḥ salilasya nirjharaiḥ pūryamāṇam yat gambhīram kukṣikuharaṃ madhyarandhraṃ tasmāt udgataḥ tasyaḥ mandraḥ nādaḥ yasya tat atrotprekṣām āha | adyāpi aśāntaḥ vedadhvaniḥ yasya tat tādṛśam || 43 ||

A° tāṇḍavam uddhataṃ nṛttam | ḍambaraḥ prapañcaḥ | parikramaḥ pādasaṃcāraḥ || 44 ||

U° saṃhāra: samhāra eva rātrimukhaṃ tatra tāṇḍavaḍambaraṃ uddhatanṛttaprapañcaḥ parikramasyaikasya līlāyā avakāśārtham iva dūraṃ yānti || 44 ||

R° saṃhāreti | yasya parameśvarasya saṃhārarātrimukhe kalpāntarajanīprārambhe yat tāṇḍavaṃ uddhataṃ nṛttaṃ tasya ḍambareṣu āṭopeṣu dordaṇḍānāṃ ṣaṇḍāḥ aṣṭādaśabhujaṃ devam ity āgamokteḥ | tasya pavanenābhihatāḥ purastād agre kramāt pādakramāt adrināthāḥ aṣṭaukulaparvatāḥ himālayādyāḥ apasaranti dūrīgacchanti | kimartham iva parikramasya pādasañcārasya yā līlā tasyāḥ avakāśaghaṭanārthaṃ avakāśadānārtham iva || 44 ||

A° yasya gulphe ghaṭitā maṇḍalapūrvalekhā parivartulapradhānā maṇḍalasya vā bimbasya pūrvā prathamā lekhā kalā yasya tādṛśaḥ śaśī śirasi dhārāparyasanena viśīryamāṇamāṇikyamaṇeḥ pādakaṭakasya śobhāṃ vrajati | anukāro nṛttam | daṇḍapādo daṇḍākāratayordhvaṃgataś caraṇaḥ || 45 ||

U° yasyā: anukāro nṛttaṃ daṇḍapādākhyacārī nirvartya upacārād daṇḍapāda ity ucyate | tatra saṃlagnamaṇḍalapūrvarekhatvāt parvatānāṃ tīkṣṇāśribhir bhagnena pādakaṭakena sāṃyam || 45 ||

R° yasyeti | yasya īśvarasya anukāro nṛttaṃ tasya rabhasaḥ utkaṇṭḥā | tayā utthitaś cāsau daṇḍapādaḥ daṇḍākāratayā ūrdhvam gataś caraṇaḥ ekapādapracāro yas sa | cārīty abhidhīyate | pādābhyāṃ kramaṇaṃ yat tu rāṇaṃ nāma tad bhavet iti | dāṇḍāpāde gulphāgre saṅghaṭitā militā maṇḍalapūrvā parivartulatvapradhānā lekhā kalā yasya sa tādṛśaḥ candraḥ svamaulistaḥ paryastāḥ bhujaṣaṇḍavegena ye parvatāḥ kulāśrayāḥ teṣāṃ śitāśribhiḥ tīkṣṇāgraiḥ viśīryamāṇamāṇikyo viśīryamāṇamaṇiḥ yaḥ pādakaṭakaḥ haṃsakaḥ tasya śriyam eti | haṃsakaḥ pādakaṭaka ity amaraḥ || 45 ||

A° ucchalitāḥ paryastāḥ | cārī ekapādapracārarūpā | nṛttavicchittayaś ca samapādātipādādyāḥ | ‘ekapādapracāro yaḥ sa cārīty abhidhīyate | pādābhyāṃ kramaṇaṃ yat tu karaṇaṃ nāma tadbhavet ||’ ambaramākāśaḥ || 46 ||

U° dorda: ucchalitāḥ kṣiptāḥ cānya ekapādapracārakalpabhaumya ākāśikyaś ca samapādātikrāntādyāḥ || 46 ||

R° dordaṇḍeti yasya maheśvarasya tāṇḍaveṣu uddhatavilāsaḥ nṛtteṣu dordaṇḍaṣaṇḍasya bhujadaṇḍasamūhasya pavanenocchalitāḥ girayaḥ kulādrayaḥ vicittro yaḥ cārī vilāsaḥ ekapādapracāreṇa nāṭyavidhi | vilāsaḥ tena dalitaḥ kṣitipīṭhabandhaḥ tadādhārabhūtaḥ yeṣāṃ te tādṛśāḥ santaḥ ambaramārga eva dordaṇḍaṣaṇḍapavanavegenety bhrahmanti | atrotprekṣā | pātāle yaḥ pātaḥ tasmāc cakitāḥ iva vayaṃ pātāle mā patiṣyāma iti hetor ity arthaḥ || 46 ||

A° kālakūṭacchāyeva rātrir iti vākyoktaṃ rūpakam | kirīṭasya mauler dhāma ūrdhvasthānaṃ yaddeśe kirīṭaṃ kriyate || 47 ||

U° saṃhā: adhikandharaṃ grīvāyām ātanvī kālakūṭacchāyā rātrir iva kiṛīṭasthānasthitam dayitaṃ candraṃ pradakṣiṇīkaroti yathā | kaścit prāptottamapadaḥ kalattrasyāpi gauravāspadaṃ bhavati || 47 ||

R° saṃhāramegheti | yasya maheśvarasya salīlaṃ savilāsaṃ | adhikandharaṃ kandharāyām ullasantī | saṃhārameghāḥ kalpāntameghāḥ saṃvartakādayaḥ tadvat malinā atanuḥ mahatī kālakūṭākhyaviṣaviśeṣasya chāyā śobhā kirīṭadhāmani mukuṭasthāne baddham āspadaṃ yena sa tādṛśaṃ dayitaṃ kāntam induṃ candraṃ rātrir iva pradakṣiṇayati pradakṣiṇaṃ karoti kālakuṭachayaiva rātrir iti vākyāntam rūpakam || 47 ||

A° kalikā kalaiva || 48 ||

U° gaṅgā: śaśāṅkasya kalaiva kalikā tattulyā bisalatā || 48 ||

R° gaṅgātaraṅgeti yasyeśvarasya uttamāṅge śirasi sphurat sitaṃ kapālaṃ brahmakapālaṃ aspaṣṭaṃ abahirnirgataṃ yat cañcupuṭaṃ tena daṣṭā mṛṇālakoṭiḥ bisāgraṃ yena sa tādṛg yo haṃsaḥ sarālaḥ tasya śriyaṃ śobhāṃ vahati kiṃbhūtaṃ kapālaṃ gaṅgātaraṅgaiḥ taralaṃ yat ānanarandhraṃ mukharandhraṃ tatra cūḍāśaśāṅkasya maulisthacandrasya kalā yasya tat tādṛśaṃ || 48 ||

A° uddhūlanaṃ bhasmanā vilepanam | kūṇitaṃ saṃkocitam || 49 ||

U° sandhyā: bhasmapūrad yaḥ prabhūtabhītibharas tena kūṇitanetratvād anukāram anukṛtim iva cakāra || 49 ||

R° sandhyāsamādhīti | sandhyāyāṃ samādhiḥ cittaikatānatā tayā vinimīlitāni locanāni yena sa tādṛśasya yasya maheśvarasya anukāram anukṛtim iva hāraphaṇī vāsukiś cakāra kiṃbhūtaḥ uddhūlanārthaṃ vilepanārtham unmṛdito yo bhasmaparāgapūraḥ bhasmarajaḥsamūḥaḥ tena paryāpto viśiṣṭo yo bhītibharaḥ tena kūṇitāni saṅkocitāni kātarāṇi akṣīṇi yena sa tādṛśaḥ bhasmarajasā kūṇitekṣaṇatvaṃ sandhyāsamādhinimīlitākṣatvasyānukāraḥ || 49 ||

A° premāmṛtena pūritatvād atra hṛdaye mamāvakāśaḥ sthānaṃ na vidyate | amṛtasaṃnidhau ca viṣasyāvakāśaḥ prasaro na bhavati | saṃdhukṣitaṃ dīpitam || 50 ||

U° premā: premaivāmṛtaṃ tena plāvite pūrṇe sandhukṣitaṃ trailokyaṃ yābhis tathāvidhā agnijvālā yasya || 50 ||

R° premāmṛteneti | iti hetor iva viṣaughaḥ kālakūṭaviṣaviśeṣaughaḥ yasyeśvarasya adhikandharaṃ kandharāyāṃ padaṃ sthitiṃ babandha kiṃbhūtaḥ sandhukṣitaṃ dīpitaṃ tribhuvanaṃ yābhis tādṛśyo 'gniśikhā agnijvālāḥ yasya sa tādṛk iti kim itīty āha | girirājasutā pārvatī tadāśrayeṇa premāmṛtena premaiva amṛtaṃ tena plāvite bharite atra asmin īśvarasya hṛdaye mamāvakāśaḥ sthānaṃ nāsti na vidyate || 50 ||

A° cittavṛttivikṛter api prāg ity anvayaḥ | parīto vyāptaḥ || 51 ||

U°[ omitted ]

R° ākarṇeti | yasya īśvarasya samādhibhaṅgārthaṃ karṇāt ā | ākarṇaṃ kṛṣṭaṃ ata eva kusumebhyaḥ cyuto yaḥ reṇuḥ tena piṅgaṃ | ākarṇakṛṣṭatvāc cakrīkṛtaṃ ca yat atanu mahat śarāsanaṃ dhanuḥ puṣpamayaṃ tasya madhyasaṃsthaḥ manobhavaḥ kāmaḥ | yasya īśvarasya cittavṛttivikṛteḥ krodhāveśāt prāg api roṣāgnijvālābhiḥ parīto valita ivābhūt || 51 ||

A° yasya saroṣatayā tṛtīyam akṣi mukulībabhūva | vahnim ānetuṃ saṃkucitam | bhrukuṭyā vibhaṅgo vicchittiḥ | tasya dhanuṣaḥ kṣobho vimardaḥ || 52 ||

U° puṣpā: kṛtas tīvrasya samādheś cittaikāgryasya bhaṅgo vyutthānaṃ yatra tathā kṛtvā tasya dhanuṣaḥ kṣobhajena rajasā kiñjalkareṇunā saruṣaḥ sakrodhasya || 52 ||

R° puṣpāyudheneti | puṣpāyudhena kāmena sabhrūkuṭīvibhaṅgaṃ sabhrūbhaṅgavicchitti | dhanuṣi puṣpamaye āsphālite iṣusandhānāya āsphālite sati kṛtaḥ tīvrasamādheḥ bhedo yena tat tādṛśaṃ yasyeśvarasya ūrdhvākṣi tṛtīyaṃ netraṃ tatkṣobhajena tasya dhanuṣaḥ puṣpamayasya kṣobhaḥ tajjātena rajasā puṣparajaseva vilaṅghyamānam ākramyamānam saruṣo roṣākrāntasya [Cancelled and marked yellow.] iva mukulībabhūva taddāhāya vahniṃ bahir ānetum ivety arthaḥ || 52 ||

A° vikiran vistṛtaṃ kurvan | nedaṃ kālakūṭaṃ kiṃ tu huṃkṛtāgnidhūma ity apahnutiḥ || 53 ||

U° bhītaiḥ: bhītaiḥ kadācid asmān api dahatīti | kusumamāṛgaṇaḥ kāmaḥ || 53 ||

R° bhītair iti | kusumamārgaṇasya kāmasya yo dehadāhasamrambhaḥ tena ghorā vikṛtir yasya sa tādṛśaḥ yo maheśvaraḥ kālakūṭaṃ viṣaviśeṣaṃ vikiran iva surair devaiḥ purā dadṛśe kālakūṭaṃ kimbhūtaṃ kaṇṭhasyodaraṃ madhyaṃ tatra āspadaṃ sthānaṃ yasya tat kena anargalaṃ yat huṅkṛtaṃ sa eva agniḥ tasya dhūmaḥ tacchalena tadvyājena || 53 ||

A° laḍitam ullasitam | laṭabhā manoharāḥ || 54 ||

U° ūrdhve: ūrdhvanetrāgnijvālāpaṭale indhanatvaṃ ca prāpya kāmaḥ anaṅgo dagdhatvād vigatā[-] ṅga eva lalāmalalanānām apaṅge netraparyante padaṃ cakāra || 54 ||

R° ūrdhvekṣaṇeti | kāmena kṛtāt samādhibhaṅgāt kupitasya yasya maheśvarasya ūrdhvekṣaṇasya tṛtīyanayanasya agniśikhānāṃ yat paṭalaṃ tasya indhanatvaṃ kāṣṭhabhāvaṇam āsādya makaraketuḥ kāmaḥ sahabhrūvilāsasya laḍitena ullāsena vartate yas sa | sabhrūvilāsalaḍitaḥ tādṛśe laṭabhāṅganānām pragalbhāṅganānāṃ apāṅga eva netrā te eva padaṃ sthānaṃ | yato locanād eva tena makaraketunā dahovāptaḥ tadasūyayā laṭabhāṅganānām netrānta eva padaṃ sthānaṃ kāmo jagaj jetum akarod iti bhāvaḥ || 54 ||

A° jvālākalāpo jvālāsamūhas tasya pariṇāmaḥ paripākaḥ | ārān nikaṭāt || 55 ||

U° yasya: māyākirātarūpatvān nigūḍhaṃ yat tṛtīyanetraṃ tajjvālāpariṇater ivāruṇatviṭ || 55 ||

R° yasyeti pārtham evānugrahītum māyākirātavapuṣaḥ saruṣaḥ kruddhasya paritaḥ pāṭalatvik āraktakānti yasya maheśvarasya mukhaṃ arjunena pārthena vyaloki dadṛśe | atrotprekṣām āha bhāsvat kāntiyuktaṃ ca tat lalāṭaṃ tatra vinigūḍhaḥ māyākirāṭavapuṣtvāt pihitaḥ yaḥ vilocanāgniḥ tṛtīyanetrāgniḥ tasya yo jvālākalāpaḥ tasya pariṇāmaḥ bahissantāpakṛttvaṃ tadvaśād iva katham ārāt samīpe || 55 ||

A° patattrakhaṇḍaṃ pakṣacchedaḥ | guñjā raktikā | udakaṇṭhata aicchat || 56 ||

U° karṇā: avataṃsitamayūrapakṣmāṃ guñjāphalasrajā ca raktikāmālayā śliṣṭastanāgrāṃ gaurīm īkṣituṃ sāgni lalāṭaṃ cakṣur nigūḍhaṃ sat udakaṇṭhata sotkaṇṭham ivābhūd ity utprekṣā dhvaniḥ mūrchayaty eṣa pathikān madhau malayamāruta ityādivat || 56 ||

R° karṇāvataṃsiteti | yasya maheśvarasya sāgniḥ | vahnyaṅki[ta]ṃ cakṣuḥ tṛtīyaṃ nigūḍhaṃ māyākirātarūpatvāt pihitam api adhikābhirāmarūpāṃ girisutāṃ pārvatī[ṃ] īkṣitum avalokayituṃ udakaṇṭhata sotkaṇṭham abhūt | kiṃbhūtāṃ girisutāṃ nāthasya kirātarūpatayā | tayāpi śavarībhavantyā karṇāvataṃsitaḥ karṇāvataṃsīkṛtaḥ śikhaṇḍināṃ mayūrāṇāṃ patattraṣaṇḍaḥ pakṣasamūhaḥ yayā sā tādṛśīṃ tathā guñjaphalānāṃ raktikāphalānāṃ srajā mālayā upagūḍhaṃ āśliṣṭaṃ payodharāgraṃ stanāgraṃ yasyās tādṛśīm || 56 ||

A° vyabhidyata vyahanyata | kekī mayūraḥ | locane eva śaṅkū mayūrapicchācitau śarau || 57 ||

U° yasya: kekipiñchāḥ mayūrapakṣāḥ taiś śobhanāni kāntāni locanāny eva śaṅkavaḥ śaraviśeṣās tatpātair yasya mano devyā bhinnam || 57 ||

R° yasyeti | śavarībhavantyā pārvatyā | pārthānugrahāya kirātarūpasya yasyeśvarasya manaḥ vyabhidyata kaiḥ karṇāvataṃsīkṛtāni yāni manorāmāṇi kekipicchāni teṣāṃ sacchāyau sadṛśau yau dīrghatarau āyatatarau locanasaṅkū locane eva śaṅkū mayūrapiñcharacitau śarau tayoḥ pātās taiḥ || 57 ||

A° kirīṭī arjunaḥ | sīkarair vyāptā diśo yena īdṛśo lalāṭāt kareṇa kṛtvā yasyārjunakopaprabhavo dharmāmbhaḥkaṇanicayaś ca kare kṣiptaḥ | ‘kṝ vikṣepe’ | ‘ṛcchaty ṝtām_’ iti guṇaḥ || 58 ||

U° yasya: netroṣmākāraṇaṃ yasya tathāvidha iva kirīṭiny arjune kopāt svedakaṇanikaraḥ sīkarācitadik kṛtvā cakare vikṣiptaḥ || 58 ||

R° yasyeti | avalambitamāyākirātavapuṣaḥ yasyeśvarasya kirīṭikopāt arjunakopāt utpanno 'pi nigūḍhanetroṣmā vahnirūpanetroṣmā kāraṇam hetur yasya sa tādṛśa iva svedajalabindusamūhaḥ nirmṛjya kareṇa hastena cakare kṣiptaḥ kṝ vikṣepe dhātuḥ kathaṃ śīkarakarālitadik śīkaraiḥ svedajalakaṇaiḥ karālitāḥ vyāptāḥ diśo yatra tat tathā kṛtvā kṣiptaḥ || 58 ||

A° ardhabhāge kucaṃ pratibimbitacūḍāśaśāṅkaśakalam || 59 ||

U° līlā: ardhabhāge gaurīsambandhini dugdhābdhikallolatulyaṃ śaśikhaṇḍaṃ || 59 ||

R° līlānateti | ya īśvaraḥ svayaṃ līlayā krīḍayā ānataṃ ānanaṃ mukhaṃ yasya salīlānatānanaḥ tasya bhāvas tattā | tayā | pratibimbe vartate iti pratibimbavartī cūḍā śaśāṅkaśakalaḥ yasmin sa tādṛśaṃ kucam ekam ardhabhāge gauryardhabhāge gaurīsvarūpaḥ san paśyati sma kiṃbhūtaṃ kucaṃ dhutadugdhasindhukallolena laṅghito yaḥ sudhākalaśaḥ amṛtakalaśaḥ tasya lakṣmīṃ śobhāṃ dadhat gaurī kucasya sudhākalaśa upamānaṃ dhutadugdhasindhu kallolasya candra śakalaḥ || 59 ||

A° ......vīṇāvādanasamaye puro deśe gauryāḥ sthitatvāt | ‘kāṇḍavīṇā’ ity api pāṭhe 'yam evārthaḥ || 60 ||

U° yenā: śaurebha ⊔ kamalakorakaṃ tadagre nyastaṃ karapadmaṃ yatra bhasmanaḥ satumbavīṇā alāvuvīṇā atra sākinnarākhyā ⊔ || 60 ||

R° yeneti | adrirājatanayā pārvatī gaurīśvararūpārdhabhāge sthitā vakṣaḥ uraḥsthalaṃ bibharāṃbabhūva | kimbhūtaṃ kucakuṭmalasyāgraṃ tatra vinyastaṃ hastakamalaṃ yasmiṃs tattādṛśaṃ kena vinyastaṃ yeneśvareṇa | keṣu dhūlanavibhrameṣu bhasmoddhūlanavibhrameṣu | kiṃbhūtaṃ vakṣaḥ himācalaśilāvat vikaṭaṃ vistīrṇaṃ kīdṛśam iva bibharāṃbabhūva | satumbavīṇāniveśam iva tumbavīṇā kinnarākhyā lāvuvīṇā vādanasamaye yasyās tumbakasya purodeśe sthitiḥ kāṇḍaviṇeti pāṭhe 'pi ayam evārthaḥ || 60 ||

A° śailasutāyā mukhendubimbasya darśanaṃ jalāñjalau pratibimbitatvāt || 61 ||

U° saṃdhyā: utpulakā romāñcitā | bimbaṃ pratimā tadavalokanasukhena niścalanetraśrīḥ || 61 ||

R° sandhyājalāñjalim iti | yo maheśvaraḥ sandhyājalāñjaliṃ cireṇopojjhati tyajati atra hetuḥ dehārdhabhāgetyādi dehārdhabhāge gatā yā śailasutā pārvatī tasyāḥ ānanaṃ mukham evendubimbaṃ tasyāvalokanena yat sukhaṃ tena stimitānām īkṣaṇānāṃ śrīḥ śobhā yasya sa tādṛk pārvatyā mukhendubimbasya darśanaṃ jalāñjalau pratibimbitatvāt | kiṃbhūta īśvaraḥ sahasvedaśīkarakaṇaiḥ svedajalalavaiḥ vartate yā sasvedaśīkarakaṇā tathā utpulakā romāñcitā ca sāttvikabhāvena aṅgayaṣṭiḥ yasya || 61 ||

A° tasya saṃdheḥ parīkṣām ivārabdhukāmaṃ nayanaṃ yasya vegān niriyāya || 62 ||

U° śliṣṭo: itthaṃ parīkṣām ivārabdhum icchu sat tṛtīyaṃ netraṃ niryayau | netradvayasyātisāmīpyena draṣṭum aśaktatvāt || 62 ||

R° śliṣṭo 'nayor iti | yasya ārdhanārīśvararūpasya ity anena prakāreṇa dehārdhayoḥ parīkṣām iva ārabdhum icchuḥ| āripsu cakṣuḥ nayanaṃ tṛtīyaṃ lalāṭapaṭṭān rabhasāt vegāt niriyāya iti kim itīty āha | śliṣṭo 'nayor ityādi | anayor ghaṭitayoḥ dehārdhayoḥ sandhiḥ śliṣṭaḥ kimu bhavet kiṃ bhavati | uta anayoḥ ghaṭitayoḥ dehārdhayoḥ sandhir naiva bhavet iti parīkṣāṃ kartum iva vegena tṛtīyaṃ cakṣur alikapaṭṭān niriyāyevety arthaḥ || 62 ||

A° yasya saṃbandhino 'ṅghriyugalasyāṅgulīnāṃ nakhāṃśubhir viśadīkṛtapurodeśā vahniśikhābhiś ca kapiśāḥ praṇatiparāṇāṃ rudrāṇāṃ dṛśaḥ pāṇḍuramūlasya kamalasya śobhāṃ dhārayanti || 63 ||

U° yasya: ānatiniṣṭhānāṃ rudrāṇāṃ dṛśo yasya pādāṅgulinakhamayūkhaviṣadīkṛtapūrvabhāgās satya āpāṇḍumūlānāṃ raktapadmapattrāṇāṃ sāmyaṃ bibhrati || 63 ||

R° yasyānatipravaṇeti | yasya parameśvarasya ānatau pādapraṇatau pravaṇāḥ lagnāḥ ye rudrāḥ ekādaśa teśāṃ dṛśaḥ dṛṣṭayaḥ lalāṭasthavahniśikhābhiḥ piśaṅgyaḥ kapiśāḥ | aṅghriyugasya maheśvarasambandhinaḥ yāḥ śākhāḥ aṅgulyaḥ tāsāṃ nakhamayūkhair nirmalīkṛtapūrvodeśāḥ āsamantāt pāṇḍuramūlānāṃ paripāṇḍurapuṇḍarīkasya sitāmbhojasya pattrāṇāṃ śobhāṃ dadhati || 63 || mahākulakam athāto 'sya sargasya †niryaṇaḥ† vṛttam ekam āha |

A° siddhasādhyanāmnām amarāṇāṃ samūhās taṃ devam upacerur asevanta | caraṇayoḥ saparyā pūjā tayā bandhurā manohāriṇyaḥ, ata evāvandhyāḥ saphalāḥ saṃdhyā yeṣāṃ te || 64 ||

U° stuti: praṇāmavaśāt srastai ratnāvataṃsais sthirā bha- gavaccaraṇapūjā yeṣām ata eva bandhurā manojñā avandhyā ca saphalā sandhyā yeṣāṃ tathāvidhās siddhasādhyā anye ca devaughās tam bhagavantaṃ siṣevire | kave ratnaśabdāṅkatvāt pratisargam antaśloke † ... † || 64 || | utpalakṛte haravijayasāravivaraṇe prathamaḥ sargaḥ ||

R° stutimukhareti | siddhāś ca sādhyāś ca devay- onayaḥ amarāś ca brahmaviṣṇuśakrādyāḥ teṣām aughāḥ samūhāḥ taṃ parameśvaraṃ devaṃ pratidinaniśam upaceruḥ asevanta | kiṃbhūtās te stutyā | mukharaṃ mukhaṃ yeṣāṃ te | tathā srastāḥ pādapraṇativaśāt ratnānām avataṃsāḥ śirobhūṣaṇāni yeṣāṃ tādṛśāḥ | tathā | kiṃbhūtāḥ sthirā anaśvarā | yā caraṇasaparyā pādakamalapūjā tayā bandhurāḥ ramyāḥ avandhyāḥ saphalāḥ sandhyāḥ prātarmadhyāhnasāyantanās tisraḥ sandhyāḥ yeṣāṃ te tādṛśāḥ punaḥ kiṃbhūtāḥ sphuṭau nirmalau yau karapuṭau tayoḥ koṭyā agreṇa añjalibandhāt śliṣṭāni bhāsvanti kirīṭāni maulayo yeṣāṃ te tādṛśāḥ atra ca pratisargaṃ paryantavṛtte ratnapadaṃ prayuktavatā mahākavinā nijanāmāṅkaṃ viracitam etad mahākāvyam iti prakāśitam iti śivam || 64 || iti śrībālavṛhaspatyanujīvino vāgīśvarāṅkāparābhidheyasya śrīmadamṛtabhānusūnor mahākave rājānakaratnākarasya kṛtau haravijaye mahākāvye ratnāṅke śrīśāradācaraṇarajaḥpavitrasthalavāstavyarājanakaśrīśaṅkarakaṇṭhātmajarājānakaratnakaṇṭhakṛtāyāṃ laghupañcikāyāṃ jyotsnāvatī purīpurārivarṇanaṃ nāma prathamaḥ sargaḥ | likhitaś caiṣa mayā rājānakaratnakaṇṭhena saṃ 57 śāke 1603 |

A° ‘paryante pratisargaṃ ratnapadaṃ yatnataḥ prayuktavatā | nijanāmāṅkaṃ kavinā viracitam etan mahākāvyam ||’ iti rājānakajayānakasūnor alakasya kṛtau haravijayaviṣamapadodyote prathamaḥ sargaḥ ||