kaṇṭhaśriyaṃ kuvalayastabakābhirāma-
dāmānukārivikaṭacchavikālakūṭām|
bibhrat sukhāni diśatād upahārapīta-
dhūpotthadhūmamalinām iva dhūrjaṭir vaḥ||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
prathamaḥ sargaḥ|
jṛmbhāvikāsitamukhaṃ nakhadarpaṇānta-
rāviṣkṛtapratimukhaṃ gururoṣagarbham|
L
rūpaṃ punātu janitāricamūvimarśam
udvṛttadaityavadhanirvahaṇaṃ harer vaḥ||2||
paryantavartiparipāṇḍurapattrapaṅkti-
padmāsanāsanakuśeśayakoṣacakram|
yuṣmān punātu dadhad uddhatadugdhasindhu-
vīcicchaṭāvalayitāmaraśailalīlām||3||
asty unnate surasarijjaladhāvyamāna-
bhāge navārkaruci mandaraśailaśṛṅge|
jyotsnāvatīti nagarī bhuvanatrayaika-
bhūṣā vṛṣāṅkaśirasīva śaśāṅkalekhā||4||
yasyāṃ niśāsu gaganaṃ navapadmarāga-
sadmaprabhāruṇitamadhyagatendulekham|
vakṣo nṛsiṃhanakharair asurādhipasya
sāsṛkchaṭaṃ viṣamabhinnam ivācakāsti||5||
jyotīrasāśmabhavanājiradugdhasindhur
atyunmiṣatpracuratuṅgamarīcivīciḥ|
vātāyanasthitavadhūvadanendubimba-
saṃdarśanād aniśam ullasatīva yasyām||6||
gaṇḍasthalīḥ saghanagharmajalā rateṣu
lagnāvataṃsakusumacyutakesarāgrāḥ|
abhyāpatanmadanamārgaṇapuṅkhapakṣa-
pakṣmākulā iva dadhuḥ pramadāś ca yasyām||7||
sīmantinījanamanaḥsu samādhibhaṅga-
kopānalena ciradagdham apīndumauleḥ|
utthāpayan madanam āśu karair vibhāti
yasyāṃ himāṃśur avalambitajālamārgaḥ||8||
yasyāṃ rateṣu pṛthupīnanitambabimba-
śobhā sphuraddaśanapaṅktikṛśāṅgayaṣṭiḥ|
L
kūrmīva puṣpadhanuṣaḥ priyapāṇijāgra-
koṇāvamarśamadhurakvaṇitāṅganāsīt||9||
yatrendranīlabhavanaṃ pṛthupadmarāga-
vātāyanair ubhayapārśvagatair vibhāti|
bāṇāsurasya haricakravilūnabāhu-
mūlavraṇair iva vapuḥ kṣatajacchaṭārdraiḥ||10||
klāntiṃ ratāntajanitāṃ ślathayanti yatra
māṇikyamandiragavākṣapathapraviṣṭāḥ|
abhyarṇavartisuranirjhariṇītaraṅga-
bhaṅgānusāraśiśirā maruto 'ṅganānām||11||
gaṇḍasthalapratimitaṃ sudṛśāṃ sacihna-
m aśvetatenduśakalaṃ rajanīṣu yasyām|
jyāghātapātakiṇaśāritamīnaketu-
nyāsīkṛtācchamaṇikhaṇḍatalāyamānam||12||
yasyām aśaṅkiṣata śaṃkaraśekharendu-
saṃdarśanotsukatayopagataṃ suraughāḥ|
jyotīraseṣṭakacitāmbaracumbidīpra-
vapraprabhābharanibhena ca dugdhasindhuḥ||13||
lakṣmīr na yāṃ bhavanamānasasaṃniveśa-
haṃsībhir ujjvalavilāsagatikramābhiḥ|
L
strībhir yutāṃ samaṇinūpurajhāṃkṛtābhi-
r ujjhāṃcakāra jhaṣaketanajhallarībhiḥ||14||
yasyāṃ niśāsu rucirāgurudhūpadhūma-
kalmāṣitaṃ śaśabhṛtaḥ karacakravālam|
śliṣyadgavākṣakaladhautakavāṭapaṭṭa-
saṃdaṃśalagnakiṇalekham ivaiti lakṣmīm||15||
śayyāgṛhaṃ suratakelivimardaśīrṇa-
karṇāvataṃsavikacotpalapattrakhaṇḍaiḥ|
yatrāṅganā dalayataḥ kusumāyudhasya
bhagnaiḥ kṛpāṇaśakalair iva kīrṇam āsīt||16||
yasyāṃ salīlam asitāgurudhūpadhūma-
daṇḍā gavākṣavivarodarataḥ prasasruḥ|
āsannacandrakarabhaṅgabhiyāndhakāra-
hastā iva sphuritadīrghaśikhāṅgulīkāḥ||17||
rāgānubandhipariṇāmadaśāvamarśa-
śūnyābhirāmanavayauvanapallavābhiḥ|
kalpadrumavratatibhiḥ kanakādrikuñja-
vīthīva yā purapuraṃdhribhir ābabhāse||18||
vaidūryapaṭṭaghaṭitāraribhir niśāsu
dūrād apāvṛtamukhair iva dṛśyamānaiḥ|
dvārair bibharti pihitair api yatra lakṣmī-
m abhraṃkaṣā pratidiśaṃ maṇiharmyapaṅktiḥ||19||
yasyāṃ smaraḥ satatasaṃnihite 'pi candra-
cūḍāmaṇau vasati paurapuraṃdhridehe|
nirmuktabhītir adhirūḍhakaṭākṣabāṇa-
tadbhrūśarāsanasahasrakṛtātmarakṣaḥ||20||
krīḍābjinīṣu na daridrati sāndracandra-
raśmicchaṭāpaṭalapāṭalitāni kāntyā|
bibhranti manmathamataṅgajadantakoṣa-
saṃvāditāṃ kuvalayāni niśāsu yasyām||21||
māṇikyatoraṇam adūravilambamāna-
tigmāṃśukūbarituraṅgaśarīrabhābhiḥ|
yatra kṣaṇaṃ haritapallavanirmitābhi-
r ābhāty aśūnyam iva vandanamālikābhiḥ||22||
yasyāṃ bhareṇa galatas taruṇīmukhendu-
lāvaṇyakāntibisarāmṛtanirjharasya|
aṭṭālasālavalayaṃ vikaṭālavāla-
līlāṃ viḍambayati cumbitabhānubimbam||23||
vyaktīkṛtāvayavacandrakalābhirāma-
rūpā haranti hṛdayaṃ hariṇāyatākṣyaḥ|
yatronmiṣanmadhuramugdhavidagdhahāva-
bhāvānubandhikusumāyudhasaudhahāsāḥ||24||
yasyāṃ niketanalinīṣu ca lauhitīka-
sopānapaṭṭarucivicchuritāntarālāḥ|
lakṣmīm atāniṣur amandarucaḥ priyāya
bandīkṛtendukiraṇā iva padmakhaṇḍāḥ||25||
māṇikyakhaṇḍakhacitāḥ suramandireṣu
yasyāṃ cakāsati vipāṭalatatprabhābhiḥ|
āliṅgitāḥ śikharakoṭivipāṭitābhra-
saudāminībhir iva kāñcanaketudaṇḍāḥ||26||
yasyāṃ vrajaty adhiniśīthini kāntaveśma
līlāgṛhītavikacotpalapāṇipadmaḥ|
vaibhāvareṇa rabhasāt timireṇa datta-
hastāvalambana ivāsta puraṃdhrilokaḥ||27||
ākrīḍatāmarasinījalayantramañju-
nādaḥ kramānugatakaiśikamadhyamaśrīḥ|
utkaṃdharastimitapādavidhūtapakṣa-
m ākarṇyate bhavanahaṃsagaṇena yasyām||28||
yatrāśmagarbhakamayūkhaśikhāprakāśa-
śyāmīkṛtā bhavanapuṣkariṇītaṭeṣu|
ceto haranti pariṇāmi ciropabhukta-
śevālasaṃhatirasā iva haṃsayūthāḥ||29||
yasyāṃ harinmaṇivinirmitaharmyaraśmi-
līḍhodarāḥ pratidiśaṃ niśi tārakaughāḥ|
udbhinnakomalakuśāṅkurakoṭilagna-
naiśodabindupaṭalaśriyam āliliṅguḥ||30||
lāvaṇyanirbharapuraṃdhrimukhāvadhūta-
cchāyo dadhat kaluṣatāṃ hṛdayena yasyām|
indur niśāsu maṇikuṭṭimabimbyamāna-
mūrticchalena viśatīva rasātalāntaḥ||31||
prātaś cakāsati gṛhodarakuṭṭimāgra-
vikṣiptaratnakusumaprakarāvakīrṇāḥ|
abhyudgatāruṇakarāhatipātyamāna-
nakṣatrarāśiśabalā iva yatra rathyāḥ||32||
āliṅganādaracitasthitir ābabhau yā
patyur vikāsiparikhāvalinīvibandham|
vistārisālajaghanaṃ parivartamāna-
nakṣatraratnaraśanāguṇam udvahantī||33||
(iti purīvarṇanam)
tām adhyuvāsa bhuvanānujighṛkṣayātta-
nirmāṇadehaghaṭanaḥ kṣapitāricakraḥ|
cakrīva saudhadhavalāṃ bhujagādhirāja-
mūrtiṃ vibhuḥ śiśiraraśmikalākirīṭaḥ||34||
yasya prapannajanatāś caraṇāravinda-
pīṭhapraṇāmakiṇaśāritam udvahanti|
rudrībhaviṣyati vapuṣy upapannabhāsva-
dūrdhvākṣitārakam iva sma lalāṭapaṭṭam||35||
pluṣyatpuratrayam aviślathajūṭabandha-
khedākulena phaṇinā sphuraduddhatārciḥ|
sāhāyakārtham iva phūtkṛtamārutena
saṃdhukṣitaḥ sapadi yasya pṛṣatkavahniḥ||36||
ākarṇatāṇḍavitamandaracāpadaṇḍa-
maurvīkṛtoragaphaṇāgaṇaphūtkṛtotthaḥ|
L
asyādidīpad analaḥ prathamaṃ tato 'gni-
jvālākalāpajaṭilas tripuraṃ pṛṣatkaḥ||37||
mandākinī śirasi maulikapālapaṭṭa-
saṃghaṭṭajarjarataraṅgaghaṭā vibhāti|
yasyordhvanetraśikhiviplutacandrakhaṇḍa-
viṣyandamānaśiśirāmṛtanirjharaśrīḥ||38||
yasyānurāgavaśataḥ sphuṭakālakūṭa-
cchāyāchalena kṛtakelikacāvamardām|
īrṣyānubandhakaluṣaṃ prasamīkṣya gaṅgā-
m āliṅgito yamunayeva vibhāti kaṇṭhaḥ||39||
ābhāti yasya himaśailasutābhyasūyā-
roṣānubandhavaśato 'mbaram ārurukṣuḥ|
uṣṇīṣapannaganipīḍitajūṭaratna-
bhāgotthitā pratipathābhimukhīva gaṅgā||40||
niṣpeṣabhīti śaraṇāgatapūṣavaktra-
śeṣāpareva hasatā vidhutottamāṅgam|
yena vyalokyata purāṇakapālamauli-
bandhacyutā daśanapaṅktir adhaḥ patantī||41||
yasyādrirājatanayāvadanāravinda-
lāvaṇyakāntivijitasya salīlam indoḥ|
bandīkṛto 'rbhaka iva ślathajūṭakoṭi-
bandhacyutaś ciram abhāri kareṇa khaṇḍaḥ||42||
mandākinīsalilanirbharapūryamāṇa-
gambhīrakukṣikuharodgatatāranādam|
adyāpi yasya śirasi śriyam ety aśānta-
vedadhvanīva parameṣṭhiśiraḥkapālam||43||
saṃhārarātrimukhatāṇḍavaḍambareṣu
dordaṇḍakhaṇḍapavanābhihatāḥ purastāt|
yasya kramād apasaranti parikramaika-
līlāvakāśaghaṭanārtham ivādrināthāḥ||44||
yasyānukārarabhasotthitadaṇḍapāda-
gulphāgrasaṃghaṭitamaṇḍalapūrvarekhaḥ|
paryastaparvataśitāśriviśīryamāṇa-
māṇikyapādakaṭakaśriyam eti candraḥ||45||
dordaṇḍakhaṇḍapavanocchalitā vicitra-
cārīvilāsadalitakṣitipīṭhabandhāḥ|
yasya bhramanti girayo 'mbaramārga eva
pātālapātacakitā iva tāṇḍaveṣu||46||
saṃhārameghamalinātanukālakūṭa-
cchāyā salīlam adhikaṃdharam ullasantī|
L
yasya pradakṣiṇayatīva kirīṭadhāma-
baddhāspadaṃ dayitam indum upetya rātriḥ||47||
gaṅgātaraṅgataralānanarandhralagna-
cūḍāśaśāṅkakalikaṃ sphurad uttamāṅge|
aspaṣṭacañcupuṭadaṣṭamṛṇālakoṭi-
haṃsaśriyaṃ vahati yasya sitaṃ kapālam||48||
saṃdhyāsamādhivinimīlitalocanasya
yasyānukāram iva hāraphaṇī cakāra|
uddhūlanonmṛditabhasmaparāgapūra-
paryāptabhītibharakūṇitakātarākṣaḥ||49||
premāmṛtena girirājasutāśrayeṇa
na plāvite 'tra hṛdaye 'sti mamāvakāśaḥ|
yasyādhikaṃdharam itīva padaṃ babandha
saṃdhukṣitatribhuvanāgniśikho viṣaughaḥ||50||
ākarṇakṛṣṭakusumacyutareṇupiṅga-
cūrṇīkṛtātanuśarāsanamadhyasaṃsthaḥ|
prāk cittavṛttivikṛter api roṣavahni-
jvālāparīta iva yasya manobhavo 'bhūt||51||
puṣpāyudhena kṛtatīvrasamādhibheda-
m āsphālite dhanuṣi sabhrukuṭīvibhaṅgam|
tatkṣobhajena rabhasena vilaṅghyamāna-
m ūrdhvākṣi yasya saruṣo mukulībabhūva||52||
bhītaiḥ puraḥ kusumamārgaṇadehadāha-
saṃrambhaghoravikṛtir dadṛśe surair yaḥ|
kaṇṭhodarāspadam anargalahuṃkṛtāgni-
dhūmacchalena vikirann iva kālakūṭam||53||
ūrdhvekṣaṇānalaśikhāpaṭalendhanatva-
m āsādya yasya kupitasya samādhibhaṅgāt|
cakre padaṃ makaraketur apāṅga eva
sabhrūvilāsalaḍite laṭabhāṅganānām||54||
yasya vyaloki saruṣo mukham arjunena
māyākirātavapuṣaḥ paripāṭalatviṭ|
bhāsvallalāṭavinirūḍhavilocanāgni-
jvālākalāpapariṇāmavaśād ivārāt||55||
karṇāvataṃsitaśikhaṇḍipatatrakhaṇḍāṃ
guñjāphalasragupagūḍhapayodharāgrām|
yasyekṣituṃ girisutām adhikābhirāma-
rūpāṃ nigūḍham udakaṇṭhata sāgni cakṣuḥ||56||
yasya vyabhidyata manaḥ sutarāṃ kirāta-
rūpasya śailasutayā śabarībhavantyā|
karṇāvataṃsitamanoharakekipiccha-
sacchāyadīrghataralocanaśaṅkupātaiḥ||57||
yasyāvalambitakirātatanor nigūḍha-
netroṣmakāraṇa ivāśu kirīṭikopāt|
L
svedodabindunikaraś cakare kareṇa
nirmṛjya sīkarakarālitadig lalāṭāt||58||
līlānatānanatayā pratibimbavarti-
cūḍāśaśāṅkaśakalaṃ kucam ardhabhāge|
yaḥ paśyati sma dadhataṃ dhutadugdhasindhu-
kallolalaṅghitasudhākalaśasya līlām||59||]
yenādrirājatanayākucamaṇḍalāgra-
vinyastahastakamalaṃ bibharāṃbabhūve|
vakṣo himācalaśilāvikaṭaṃ satumba-
vīṇāniveśam iva dhūlanavibhrameṣu||60||
saṃdhyājalāñjalim apojjhati yaś cireṇa
sasvedasīkarakaṇotpulakāṅgayaṣṭiḥ|
dehārdhabhāgagataśailasutānanendu-
bimbāvalokanasukhastimitekṣaṇaśrīḥ||61||
śliṣṭo 'nayoḥ kimu bhaved uta naiva saṃdhi-
r dehārdhayor ghaṭitayor iti tatparīkṣām|
āripsu yasya rabhasād iva cakṣur ardha-
nārīśvarasya niriyāya lalāṭapaṭṭāt||62||
yasyānatipravaṇarudradṛśo 'ṅghriyugma-
śākhānakhāṃśuviśadīkṛtapūrvabhāgāḥ|
L
āpāṇḍumūlaparipāṭalapuṇḍarīka-
pattraśriyaṃ dadhati vahniśikhāpiśaṅgyaḥ||63||
stutimukharamukhās taṃ srastaratnāvataṃsāḥ
sthiracaraṇasaparyābandhurāvandhyasaṃdhyāḥ|
pratidinam upaceruḥ siddhasādhyāmaraughāḥ
sphuṭakarapuṭakoṭiśliṣṭabhāsvatkirīṭāḥ||64||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye purāripurīvarṇano nāma prathamaḥ sargaḥ|