jvalitā bhṛśaṃ tadabhiyogaruṣā vividhāyudhā ditisutādhipateḥ|
prahatānakāḥ samaralālasayā sahasainikairjaghaṭire pṛtanāḥ||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
L
L
L
L
L
L
dvācatvāriṃśaḥ sargaḥ|
śitavartmabhiḥ karatalaprahitairyudhi śuṣmiṇāṃ vidalitānnabhasaḥ|
madatṛṣṇayā karikaṭeṣvalayaḥ patitā babhuḥ
pracuracūrṇanibhāḥ||2||
kṣayakāriṇaḥ sapadipītaviṣā bhujagaśriyaṃ pratibhayā dadhataḥ|
vibhabhustarāmasicayāḥ samare haravibhramā ruciracandrarucaḥ||3||
bhujaśālināṃ karatalaprahitairbhramaṇākulairaribhirabhyahitam|
anucakrire samararatnanidheḥ salilabhramāḥ sapadi maṇḍalibhiḥ||4||
kṛtamūrchanaṃ praharatā dviṣatā karaśīkarai raṇagataḥ śiśiraiḥ|
samaśiśvasatkaripatiḥ subhaṭaṃ mahatāṃ sthitiḥ parahitapravaṇā||5||
rudhirāruṇairniśitakhaḍgahatā navamauktikairdviradakumbhataṭāḥ|
yudhi dāḍimaiḥ sadṛśavibhramatāṃ sphuṭitairdadhuḥ prakaṭabījaśataiḥ||6||
bhaṭakāminaḥ prativarūthavatīṃ rabhasād ghnataḥ samaravāsaṛhe|
pratigumphitāḥ śitisarojadalairgalitā babhuḥ sraja ivāsilatāḥ||7||
śuśubhetarāṃ maṇiśirastrabhṛtā bhujaśālinā dhṛtasamunnatinā|
sadṛśātmatāmudayasānumataḥ paribibhratā śikharavartiraveḥ||8||
udaraśrito vikaṭakumbhabhuvo navamauktikānrabhasayānusṛtaiḥ|
sadṛśaśriyaḥ śucibhiraṃśucayaiḥ śruticāmarāḥ śuśubhire kariṇām||9||
pratihāribhiḥ karikarairasakṛtparipiṇḍitaiḥ samarabhūmirabhāt|
lipisaṃhateḥ subhaṭanāmajuṣaḥ praṇavairiva prathamamālikhitaiḥ||10||
yudhi dhāvataḥ pratigajābhimukhaṃ punarapyadhādgajapateḥ saruṣaḥ|
dalitāśrayaḥ sapadi ketupaṭaḥ patito mukhe pṛthumukhacchadatām||11||
karimauktikairvigalitaiḥ śucibhiḥ subhaṭāśrayāścamaratantuśataiḥ|
varaṇasrajo grathayituṃ raṇabhūḥ surayoṣitāṃ drutamivaicchadasau||12||
surakuñjarāḥ kṣititalāskhalitaiḥ
pratimāśrayānvidadhurūrdhvagataiḥ|
kaṭakānkaraiḥ sphuṭacaṣālarucaḥ samarādhvare
vikaṭayūpagataiḥ???(samaiḥ)||13||
sphuraduccakairvikacakundaruci śravaṇāśrayaṃ gajapaterjalam|
śaśimaṇḍalaṃ taralamanvakarotprakaṭāspadaṃ giriguhānikaṭe||14||
patitodbhṛtaiḥ śravaṇaśaṅkhaśataiḥ samarāṅgaṇe śuśubhire kariṇām|
sadṛśāḥ karāḥ saralatāṃ dadhataḥ sphuṭamauktikairvikaṭavaṃśaśataiḥ||15||
yudhi ghūrṇitaṃ subhaṭamīkṣya puro dadhatī vapuḥ pulakaṇṭakitam|
smaragauravātsuravadhūrabhavadbhṛśadurvahā nijavimānabhuvaḥ||16||
kṣitimaṇḍale nimitajānuyugo gurumatsarastrikasamunnatimān|
sthagitekṣaṇo dhvajapaṭena muhurbhaṭavigrahe pariṇanāma karī||17||
raṇabhūrasau dalitavartanayā maṇighaṇṭayā hatakaricyutayā|
samaraśriyo vyarucadāśritayā sadṛśīṃ śriyaṃ kamalakarṇikayā||18||
kṛtamūrchanaṃ vyanusṛtā subhaṭaṃ yudhi jīvato vyapagatā ca tataḥ|
karimauktikairdaśanapaṅktinibhairjahase bhuvā sphuṭamiva dyuvadhūḥ||19||
śriyamuccakairdadhadalaṅghyatamāṃ nijatejasā kṣapitaśatrutamāḥ|
avaguṇṭhitaḥ samaradhūlikaṇaiḥ subhaṭo 'sphuradviśadameva tadā||20||
racitasthiteḥ pravikaṭāṃsataṭe śravaṇānilaiḥ parivṛdhasya puraḥ|
vasudhārajaḥ prabalabhaktimanā vyakirattarāṃ rabhasayeva karī||21||
sphuritā babhau gagananīlaruciḥ subhaṭāśrayā vimalakhaṅgalatā|
samarāmbudhernavatamālarucā tṭalekhayā sadṛśatāṃ dadhatī||22||
gajasaṃhaterdalayato daśanātpracuraṃ rajaḥśaśimarīcisitam|
drutamutthitaṃ yaśa ivāviralaṃ śabalā diśo vyadhita śuṣmavataḥ||23||
maṇirañjitā śaśikaleva śanaiḥ kuṭilotthitā samarasindhupateḥ|
śriyamāsadbhaṭakarāgragatā karavālikā rudhiratāmraruciḥ||24||
maṇirañjitā śaśikaleva śanaiḥ kuṭilotthitā samarasindhupateḥ|
śriyam āsadadbhaṭakarāgragatā bhujaśālino dalayataḥ pratimāḥ|
ghanamecakaṃ viṣamivodabhvatpracuraṃ rajaḥ prdhanaratnanidheḥ||25||
vidadhajjavātkuliśamuṣṭihataṃ kariṇo raṇe radanadaṇḍayugam|
subhaṭo 'karonnavaramapratimaṃ samabhiṣṭutaḥ svamapi yodhajanaiḥ||26||
pulakaṃ dadhau sakhanagharmajalā dhṛtavepathurmuhurajṛmbhata ca|
bhaṭamīkṣya khe nahi tadasti na yadvidadhe 'psarāḥ smaramayaṃ lalitam||27||
galitāḥ kṣitau śaraśikhādalitāḥ kṣatajokṣitā dviradavāladhayaḥ|
navalākṣikaiḥ śuśubhire sadṛśā yudhi cāmarairdinakarāṅgabhuvaḥ||28||
racitāspadā nihatasāditayā turagāsane sapadi śūnyatale|
dadhato mudaṃ rudhirapānakṛtāṃ yudhi babhramurvikṛtabhūtagaṇāḥ||29||
bhujaśālinā sphuradari pradhane sthagitāntaraṃ śucimarīcicayaiḥ|
samaraśriyaḥ sarasacāṭudhiyā maṇidarpaṇaṃ vidhṛtamanvakarot||30||
yudhi koṭavīrabhivilokya tadā muditātmanaḥ prakṛtanṛttavidhāḥ|
dalitāśrayairdhavalaketupaṭaistarituṃ camūrdrutamivaicchadasau||31||
parighāhatātpṛthuviṣāṇamukhātpratimā babhau nipatitā kariṇaḥ
śaradhiśriyaṃ yudhi paribhramataḥ samavartino nijaruciṃ dadhatī||32||
kṣatapuṣkarairaśivayā śivayā sa tadānakairnipatitairavanau|
raṇarākṣaso grasitumāśu camūrbahubhirmukhaiḥ sthita iva vyarucat||33||
asibhogibhiḥ sphuritaratnakaṇaiḥ kṛtaguptayaḥ sasalilābhranibhaiḥ|
samarakṣitau sphuritabhadraghaṭāḥ śriyamāsadansubhaṭasannidhayaḥ||34||
samaṇitviṣo vikaṭacāpalatā bhaṭanāyakaḥ prasabhakṛṣṭinatāḥ|
gṛhabhṛtkalā dhavalapakṣa iva vyanayatkramādatanumaṇḍalatām||35||
ghanamutthitaṃ yudhi mitho 'bhihateḥ śriyamāyayau subhaṭakhaḍgarajaḥ|
surayoṣitāṃ prakṛtasaṃvanane navamañjanaṃ drutamivācaritam||36||
yudhi śaṅkubhirbhaṭakaraprahitairdadhurunnatāḥ sphuṭaśikhaṇḍabharaiḥ|
giribhiḥ kṣaṇaṃ sadṛśatāṃ kariṇaḥ pracalākibhiḥ śirasi baddhapadaiḥ||37||
samaṇitviṣā ghaṭitamīlikayā patitaṃ bhṭātsamiti cakramadhaḥ|
kuṭilaśriyā śaśabhṛtaḥ kalayā ravimaṇḍalaṃ sahitamanvakarot||38||
bhṛśaviklavāstridaśavairivadhūstridivaukasāṃ vidadhatā vavṛdhe|
acalādhipaṃ dalayateva javāccharajanmanā yudhi raveṇa tadā||39||
vikaṭormayaḥ samarasidhupateḥ samavartinaḥ sphuṭakarāṅgulayaḥ|
śriyamāsadanvikaṭakuntalatā bhujaśālibhiḥ sarabhasaṃ bhramitāḥ||40||
navamauktikaiḥ kariśiroghaṭitairgaganacchaviḥ subhaṭakhaḍgalatā|
yudhi keśino daśanaratnakaṇaiḥ śabalīkṛtā haribhujeva babhau||41||
dviradaḥ kṣaṇāsivilūnatalānpratihāriṇaḥ karikarānavanau|
bhayapuñjitānsapadi pattripatirbhujagāniva vyadalayatsamare||42||
bhramayañjavādatanukuntalatāṃ nijatejasāsphuṭamadhaḥsthamavait|
daśanotplutaḥ pratigajāṃsagataṃ subhaṭaṃ bhaṭaḥ prahitahetiśatam||43||
kariṇi sthitaḥ pracurabhūtisite sphaṭikācale draviṇanātha iva|
amanuṣyagaṃ tadapi dharmamagātsubhaṭoparaḥ kṣapitaśatrugadaḥ||44||
maṇivartmasu pradhanavartmagatā vibabhurbhaṭāḥ sphuritacakracayāḥ|
vimalātmabhiḥ sadṛśatāṃ dadhataḥ salilāśayaiḥ pratimitoṣṇakaraiḥ||45||
galitaṃ tathā radanināṃ samare plutadiṅmukhairbahaladānajalaiḥ|
srutanirjharānabhiviśaṅkya girīnnabhaso yathā ghaṭitamambudharaiḥ||46||
kariṇāṃ mitho daśanaghaṭṭanayā viṣamārciṣā sapadi niṣpatatā|
samarājire jvalitakuntalataḥ kṣitibhṛdbabhau prakaṭadāva iva||47||
durtapātinaḥ sajalamegharuco yudhi vāhitāḥ pratibhaṭakṣataye|
nibiḍaujasaḥ śuśubhire turagāḥ śitivartmabhiḥ sadṛśatāṃ dadhataḥ||48||
bhujaśālino jigamiṣostridivaṃ samaraśriyā prakṛtamaṅgalayā|
kalaśairiva pratidiśaṃ nihitairbhaṭamastakaiḥ kṣitirabhātpatitaiḥ||49||
racitāspadā dadhati vārimucā samadehatāṃ gajapatau samade|
śriyam āsadattaḍidivāruṇitā galatāsṛjā samiti khaḍgalatā||50||
itthaṃ vijṛmbhitaruṣaḥ kṛtaratnasānu-
kampāḥ parasparajayāvahitairmanobhiḥ|
gīrvāṇadaityapṛtanā bahudhā tadānīṃ
sadvandvasaṃgararasapravaṇā babhūvuḥ||51||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye samarodghātavarṇanaṃ nāma dvācatvāriṃśaḥ sargaḥ|