atha tām aviśan nīlamaṇimandirasaṃkulām |
vindhyabhūmim iva vyaktagaṇḍaśailāṃ gaṇādhipaḥ || 1 ||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
dvātriṃśaḥ sargaḥ |
padmarāgamayāṭṭālaprakāśena prathīyasā |
gaganāmbhodhigarbhaurvavahninā racitaśriyam || 2 ||
vicitrasthānakopetāḥ sukumārāṅgavartanāḥ |
nṛtte citre ca dadhatīm ākṣiptahṛdayāḥ striyaḥ || 3 ||
pauraiḥ sadāśeṣabhogabhāgbhir vaikuṇṭhavibhramam |
bibhradbhir āhitābhikhyāṃ samudragṛhakāspadaiḥ || 4 ||
dadhatīṃ madhyamagrāmamūrchanāprakriyām iva |
sakalopanatodārapauravīracitāṃ śriyam || 5 ||
pravālapāṇibhir vallīḥ pāṇipadmaiś ca yoṣitaḥ |
padmānanaiś ca nalinīr bibhratīm upaśobhitāḥ || 6 ||
aśasā(bhūyasā) talpalopāttamanoharataratviṣam |
mātaṅgapṛṣṭhavaṃśorvīm iva vistṛtadīrghikām || 7 ||
bibhradbhir geyavaidagdhīm upakaṇṭhakṛtāspadaiḥ |
tālākṣaracitābhikhyaiḥ kānanair upaśobhitām || 8 ||
sasūkṣmatilakāṃ vaktracchāyāṃ gārutmatīm iva |
giraṃ ca sāmṛtodgārāṃ dadhatīr dadhuṣīṃ striyaḥ || 9||
antaryuktān mahāmātraiḥ patadgrahaśatākulān |
niśāntāndadhatīm arkakṛtānakaluṣatviṣaḥ || 10 ||
adṛṣṭanigrahasthānāṃ prauḍhavādavidhām iva ||
sadācāryāhitacchāyāṃ nṛttalīlāviḍambinīm || 11 ||
bhinnaṃ layam iva tredhā drutamadhyavilambitam |
valibhaṅgaṃ dadhānābhiḥ kṛtaśobhāṃ puraṃdhribhiḥ || 12 ||
daśanenduprabhālokaiḥ svacchamānasanirjharaiḥ |
madanastabakodbhedaiḥ strīṇāṃ hāsair virājitām || 13 ||
naktaṃ nakṣatramālābhiḥ kṛtamūrdhavibhūṣaṇaiḥ |
alindā nākulaṃ harmya gajair bibhradbhir ācitām || 14 ||
satkāñcanaparīkṣāyāḥ sadṛśīṃ dṛṣṭihāriṇīm |
nikaṣopalasallekhām adabhrāṃ bibhratīṃ śriyam || 15 ||
śubhaprastāvanāhṛdyāṃ prakhyātodāttanāyakām |
nānārthaprakṛtiślāghyāṃ nāṭakaprakriyām iva || 16 ||
vyāptāṃ kṛtayugasthāsnusthitiṃ bhogibhir uddhataiḥ |
rathasaṃsthām ivoṣṇāṃśo rathyāvalivirājitām || 17 ||
anāptagotraskhalanām avipakṣām iva striyam |
śubhaprakṛtivistārāṃ vīṇāvādyavidhām iva || 18 ||
(aṣṭādaśabhiḥ kulakam)
sārdhacandrapatākatvaṃ dadhatas tena vīkṣitāḥ |
tasyām asaṃyutā hastā iva devagṛhāḥ puraḥ || 19 ||
vyaloki vismayavatā śubhamadhyamadarśanaḥ||
sīmantinījanas tena dadhan mādhyamikaśriyam || 20 ||
sa kāñcanojjvalās tasyāṃ visphuranmaṇibandhanāḥ |
alaṃkārāvalīr bāhulatāś caikṣata subhruvām || 21 ||
prāptānalasanāthatvaṃ tena tatra gṛhāvalī |||
paṭalopahṛtacchāyā damayantīva vīkṣitā || 22 ||
tenaikṣyata sudhāpāṇḍucchāyasanmānasālayā| |
nagaryā dadhatī sāmyaṃ krīḍākamalinī puraḥ || 23 ||
mahān apy anahaṃkāraprasūtir avalokitaḥ |
tārako'py amunā bibhral loko'nakṣigataḥ śriyam || 24 ||
vidagdhamaṇḍalīm ārād goṣṭhībandhamanoramām |
sadākṛtigaṇopetāṃ sadvṛttiṃ sa vyalokayat || 25 ||
tenāṅganājanas tasyām anapekṣitabhūṣaṇaḥ |
svarūpaśobhayākrāntaḥ śakrahasta ivekṣitaḥ || 26 ||
jaharṣa sāmānyaguṇadravyasaṃyogasusthitām |
tāṃ kaṇavratasiddhāntaprakriyām iva vīkṣya saḥ || 27 ||
saṃkrāntayāñjanacchāyadehapratimayātha saḥ |
praviśansphaṭikāgārān aindranīlān ivākarot || 28 ||
apūrvadarśanākutakutūhalavaladṛśaḥ |
ditijāstaṃ visṛṣṭānyakartavyā niravartayan || 29||
tatparijñānaśūnyena cetasāhitakautukāḥ|
papracchur maṇḍalībandhaiḥ ko'yam ity asurā mithaḥ || 30 ||
anyair vijñāyamānatvād anyasyābhiniveditām |
sa śṛṇvann ātmano'bhikhyāṃ rājamārgān alaṅghayat || 31 ||
muktāpravālavaidūryaprāyaratnapariṣkṛtāḥ |
jahau niṣadyāvīthīḥ sa sindhuvelāviḍambinīḥ || 32||
prāptavān atha daityendrasiṃhadvāraṃ vibhūtimat |
trailokyasaṃniveśasya pratyādeśam iva sthitam || 33 ||
sanāgayakṣadaiteyavasvādityamarudgaṇam |
anekāś caryasaṃdohaṃ viśvarūpam iva sthitam || 34 ||
nānāsuragaṇākīrṇaṃ purīdarpaṇabhūtale |
adṛṣṭapārasaṃsārapratibimbam ivotthitam || 35 ||
(tilakam)
vikāsikiṃśukacchāyād vanād iva vibhāvasoḥ |
tatkṣaṇāpahṛtān pattraśukān aikṣata savyathaḥ || 36 ||
candrāṃśugaurasatpaṃkṣabālabhārān pracetasaḥ |
dadarśa vāhahaṃsāṃś ca cāmarāṃś ca hṛtānasau || 37||
caturdiksphaṭikāgāraprabhākṣīrapariplutam |
dadarśa coccaiḥśravasam uttiṣṭhan tam ivodadheḥ || 38 ||
trailokyalakṣmyāḥ sa dadhallīlādolām ivāgrataḥ |
vilolamuktāprālambavyājenaikṣata toraṇam || 39 ||
dadarśa toraṇāmuktāś caṇḍīsiṃhasaṭāvalīḥ |
utpātendukalā daityapralayāśaṃsinīr iva || 40 ||
adṛśyamānaparyantān arpaṇīyakarān asau |
dadarśa vividhān rājño digvibhāgān ivāgatān || 41 ||
utkhātaśeṣamāṇikyakaṇṭhakāśūnyakaṃdharān |
rabhasāliṅgitasvaḥstrīstanavāsāvilorasaḥ || 42 ||
bhartuḥ prasādalabdhāni devayānāni satvaram |
nirgatyārohato daityarājaputrān dadarśa saḥ || 43 || (yugalakam)
athādhibhūmi vinyastakarajānubhir ādarāt |
nyavedyata dvāragataḥ sa bhartre pratihartṛbhiḥ || 44 ||
avajñācirasaṃrodhamuktayaitviti tadgirā |
nirdiśyamānamārgastaiḥ sa daityendrasado'viśat || 45 ||
bhāsvanmaṇiśirodaityabhogimaṇḍalasaṃkulam |
taddehamalinacchāyātimiraplavapūritam || 46 ||
vaidūryakuṭimacchāyajalanirbharasaṃplavam |
praviṣṭavān athaikṣiṣṭa pātālam iva tatsadaḥ || 47 || (yugmam)
tatra siṃhāsanāsīnāṃ tamālaśyāmalatviṣam |
sphuradaṃṣṭrānanāṃ mūrtiṃ kauśikīm iva bibhratam || 48 ||
kuṇḍalātaparatnāṃśubālātapavilaṅghitam |
bibhrāṇam animitte'pi roṣāruṇam ivānanam || 49 ||
cāmarādhūnanavyagrakarapaṅkajayāniśam |
niṣevyamāṇam abhitas trailokyavijayaśriyā || 50 ||
bibhrāṇaṃ śoṇamāṇikyabhūṣāṃśucchuritaṃ vapuḥ |
aśāntavajrasaṃpātavāhniśeṣam iva kvacit || 11 ||
jayakuñjaranakṣatramālām amalamauktikām |
dadhataṃ vikaṭāṃ hāralatāṃ pīnena vakṣasā || 52 ||
diṅnāgadānaviṣyandakatapattrāṅkuraśriyaḥ |
bibhrataṃ bhuvanābhogavanatālatarūn bhujān || 53 ||
keyūrāsitaratnāṃśujaladhārāś ca bibhratam |
vajrānalaśikhādāhaśāntihetor iva srutāḥ || 14 ||
uraḥsthale niṣaṇṇāyā ratnaparyaṅkavibhramam |
bibhrataṃ diggajādhīśadantabhaṅgaṃ suraśriyaḥ || 55 ||
dadarśāndhakam ābaddhamadhyaṃ kanakaśṛṅkhalaiḥ |
nitambaparivṛttārkaraśmirekham ivācalam || 16 || (navabhiḥ kulakam)
trailokyaśrīkareṇostamālānībhūtadordrumam |
vilokyeṣannataśirā vinayāt praṇanāma saḥ || 17 ||
atha bāhuṃ prasāryārād diṅnāgakarapīvaram |
ita ity asurendreṇa nirdiṣṭaṃ svayam antike || 58 ||
hemapīṭham asau citraratnajālapariṣkṛtam |
adhyāsta lokasaṃvartamegho merum ivonnatam || 59 || (yugalakam)
atha lambhitasatkāraṃ tam uvācāndhakāsuraḥ |
dantajyotsnāchalenāriyaśaḥpītam ivodgiran || 60 ||
gaurīvigrahasaṃdhānasamāsāditanirvṛteḥ |
gaṇeśa kuśalaṃ kaccid avyāhati pinākinaḥ || 61 ||
cireṇa bata kenāpi hetunā smṛtigocaram |
āgacchāma vayaṃ śaṃbhor yeneha tvāṃ vyasarjayat || 62 ||
jayalakṣmyopagūḍhasya purā jitamarutvataḥ |
na mamāṅgeṣu saṃjātas tādṛśaḥ pulakodgamaḥ || 63 ||
nirvyājaprītipiśunaḥ śaśiśekharaśāsanāt |
īyuṣi tvayi sauhārdarasasyandini yādṛśaḥ || 64 || (yugalakam)
ime vajakaṇā harṣasphuṭadvraṇamukhotthitāḥ |
romāñcodgamakārkaśyam aṅgeṣv adhikayanti me || 65 ||
saptalokādhipatyena na tathonnatim āgatāḥ |
yathāviṣkṛtasadbhāvabhavasaṃbhāvitā vayam || 66 ||
kartavyaṃ tan na paśyāmi kṛtakṛtyo'pi dhūrjaṭiḥ |
yac cetasi nidhāya tvaṃ prāhiṇodas madantikam || 67 ||
tadāvedaya saṃdeśam indumauler vivakṣitam |
kutūhali dadāty asmān mano nodāsituṃ yataḥ || 68 ||
ity ukte tena dantāṃśupuṣpitādharapallavaḥ |
avāptāvasaro vaktuṃ dūta ity upacakrame || 69 ||
kalyāṇīṃ giram utsraṣṭuṃ viralā eva jānate |
satyāṃ rekhāṃ vilikhituṃ citrakarmavido yathā || 70 ||
yad evam ādarārūḍho bahumānāspadaṃ tvayā |
kriyate kuśalapraśnas tenādya kuśalī vibhuḥ || 71 ||
yaśoṃśubhāsuracchāyaḥ kṣatadaurgatyaviṣṭhavaḥ |
vibhātyanarghaḥ saṃsārasāgaraikamaṇirbhavān || 72 ||
sārambhatve'pi satataṃ vispaṣṭaparighaṭṭanam |
tava jātaṃ dviṣaccakraṃ śuṣkaṃ geyam ivāpadam || 73 ||
tvayā naiyāyikeneva satpakṣāśrayaśālinā |
hetau vidadhatā yatnaṃ parapakṣo nirākṛtaḥ || 74 ||
uparyeva tava sthāsnu śaraccandrāṃśupāṇḍuram |
yaśaś chattram ivābhāti cchattraṃ yaśa ivojjvalam || 79 ||
vaidagdhīṃ bibhṛyuḥ śailā niḥsāritamarutvataḥ |
vajrānalaśikhājālapluṣṭapakṣāḥ kathaṃ nu te || 76 ||
sphuraty adhitaṭaṃ sindhoryāmuktākiraṇacchaṭā |
sā vaḥ saṃkocitāristrīmukhābjā kīrticandrikā || 77 ||
pluṣyaty arīn pratāpas te nirvāpayati cāparān ||
dāhātmakatvam adhikaṃ vahner aikāntikaṃ punaḥ || 78 ||
krūre'pi mārdavopetā vāmācāre'pi dakṣiṇāḥ |
pāpe'pi śuddhamatayas tvādṛśā bhuvi durlabhāḥ || 79 ||
anekajanyaśobhī tvaṃ bhartālaṃkṛtavigrahaḥ |
tvamūhithāmuktakarām asaṅgo'pi jayaśriyam || 80 ||
daśām anuguṇāṃ dagdhvā nādhāraṃ tāpayaty alam |
na snehaṃ kṣapayaty uccair vaṃśadīpo'paro bhavān || 81 ||
vyajeṣṭhā gocarātītaṃ guṇagauravato'dhikam |
agādham api dugdhābdhiṃ surāsuraviloḍitam || 82 ||
kathaṃ śaśadharādhīnavṛddhikṣayatayāniśam |
sādṛśyaṃ tava dugdhodasindhunā yaśaso bhavet || 83 ||
viralās tvādṛśā loke dordaṇḍadalitadviṣaḥ |
nirdagdhāśeṣabhuvanāḥ kiyanto vahnayaḥ kṣaye || 84 ||
svacchaṃ bimbitaniḥśeṣanītisaṃgrahasusthitam |
tvam eva mānasaṃ dhatse prajñāvibhramadarpaṇam || 85 ||
dordaṇḍadalitoddāmasaṅgrāmārātimaṇḍalaḥ |
na bibharṣi guṇottuṅgo garvam anyāsurendravat || 86 ||
guṇāṃs tava girāṃ nātho vakti tenāthavāpy alam |
sindhos taṭeṣu sikatākaṇān gaṇayitāsti kaḥ || 87 ||
iti saṃsadi vakturme citraṃ yat kṣīyate na vāk |
kva vā kāvyavikalpānāṃ guṇānāṃ ca tavāvadhiḥ || 88 ||
itthaṃ pratāpasaṃpattiparākrāntamahībhṛtaḥ |
na kulyotsādanaṃ yuktaṃ tava grīṣmaraver iva || 89 ||
evam āha vibhurmānyaṃ jagatsargasthitikrame |
niyujya druhiṇopendrāv audāsīnye'smi nirvṛtaḥ || 90 ||
surāsuracamūvaṃśasaṃtānasthitir āsadat |
kaśyapo mānasotpattisaṃmatāṃ parameṣṭhinaḥ || 91 ||
sa labdhvātmabhuvo'nujñāṃ citrasargacikīrṣayā ||
upāyatātmano yogyā vidhivaddakṣakanyakāḥ || 92 ||
danudityaditiṣvāsāmudabhūvaṃstataḥ kramāt |
dānavāś caiva daityāś ca devāś ca balaśālinaḥ || 93 ||
prātikūlikatāṃ matvā mithas teṣāṃ svayaṃbhuvā |
vāsaḥ pātālamūle ca sumerau ca vyabhajyata || 94 ||
praśāntaraṇasaṃrambhaṃ svadharmāvasthitaprajam |
tena niḥśeṣamevāsīt trailokyam anupaplavam || 95 ||
atha durvāradordaṇḍadarpakaṇḍūpratāritaḥ |
ācchinaddhāma devānāṃ hiraṇyākṣamahāsuraḥ || 96 ||
sa jaghne suraśatrūṇāṃ miṣatāṃ kroḍamūrtinā |
trailokyopāplavārakṣābaddhakakṣeṇa śauriṇā || 97 ||
ninye ca marutāṃ patyur nihatyāsuramaṇḍalam |
trailokyaśrīḥ punar līlācāmaravyagrahastatām || 98 ||
yāte kāle'tha durvāradarpakaṇḍūtidurdharaḥ ||
hiraṇyakaśipur jiṣṇos tām etya punar ācchinat || 99 ||
tadvakṣo'dadaradvajradhārādalanakarkaśam |
nṛsiṃhamūrtinakharair nakharāntair janārdanaḥ || 100 ||
ittham anyāṃś ca jagato viprakartṝn mahāsurān |
anayaddīptacakrāgnijvālāpañjarayantraṇām || 101 ||
jyotsnā candrakrameṇaiva kṣīyate vṛddhim eti ca |
śūrāṇāṃ ca raṇe kīrtir gatā na vinivartate || 102||
tadarhanty adhunā prāgvad avigrahaparigrahāḥ|
rasātalanivāsena saṃvibhāgaṃ mahāsurāḥ || 103 ||
pureva lokapālānāṃ daityānāṃ ca niratyayā |
anāviṣkṛtasaṃrambhā sthitiri astu yathāyatham || 104 ||
dhāmāny adhyūṣuṣām itthaṃ premṇā nijanijāni vaḥ |
santv āviṣkṛtavisrambhāḥ parasparagṛhāgamāḥ || 105 ||
śāsati tvayi pātālaṃ tridivaṃ ca puraṃdare |
sasurāsuracakrasya trailokyasyāstv anāmayam || 106 ||
nivartite virodhe'pi yuvayor adhunā mithaḥ |
apahastitaniḥśeṣavairaṃ prema vivardhatām || 107 ||
atisaṃgharṣataḥ sindhumandarācalayoḥ purā |
prāk kālakūṭasaṃbhāraḥ paścād amṛtam utthitam || 108 ||
iti sthite samutsṛṣṭavigrahaikarasasthiteḥ |
marutvatā samaṃ manye sakhyameva tava kṣamam || 109 ||
yasya hāralatānyāsabhāsurā phenasaṃhatiḥ |
vyāvartamānā namuceḥ kaṭhinaṃ kaṇṭham acchinat || 110 ||
yasyādyāpi dadhaty ete vajravicchinnapakṣatīḥ |
sābhrāḥ pārśvabhuvo baddhavraṇapaṭṭā ivādrayaḥ || 111 ||
yasyāntarvajradahanajvālājālam iva jvalat |
cakāra nīrasaṃ daityanārīhṛdayamaṇḍalam || 112 ||
taṃ dordaṇḍamadoddāmadaityadānavasūdanam |
vajrodbhāsikaraṃ ko vā mittraṃ na bahu manyate || 113|| (cakkalakam)
suraiḥ sahāmarākrīḍakalpavallīgṛheṣu vaḥ |
āpānagoṣṭībandhena bandhuprītir vivardhatām || 114 ||
sadānanirjhareṣv ārād gaṇḍaśaileṣu dantinām |
anāyasamukhās tāvan nipatantu śilīmukhāḥ || 115 ||
avāptanarakāsaṅgā mānubhūvanmahāsurāḥ ||
krūrāsipattrasaṃpātanirargalakadarthanām || 116 ||
suraditi(danu)sutadaityakanyakānāṃ sarabhasam āplutikelilīlayāmbhaḥ |
bhavatu kucataṭīnitambabimbaskhalanavijarjaramambarāpagāyāḥ || 117 ||
ity abhyudīrya giram ujjvaladantaratna-
niryatprabhādhavalitāṃ virarāma dūtaḥ|
tasthau taduttaraviśeṣaparīpsayā ca
daityādhipasya vadane vinidhāya dṛṣṭim || 118 ||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye dūtavyāhāro nāma dvātriṃśaḥ sargaḥ |