ityambudhau śaśadharodayalabdhatoṣa-
mullāsivīcibhujasaṃbhṛtanṛttaśobhe|
L
āsannavallabhajanāgamanaḥ puraṃdhri-
lokaḥ prasādhanavidhāvavadhānamādhāt||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
trayoviṃśaḥ sargaḥ|
preṅkhannakhaskhalitacandramarīcayo 'tha
lakṣmīṃ puraṃdhricaraṇā bibharāṃbabhūvuḥ|
preyaḥsu bhāvi(?) vinateṣvaparādhavatsu
mūrtaṃ prasādamiva saṃbhṛtamudvahantaḥ||2||
āviṣkṛtātiśayanirbhararāgasaṃpa-
dāsāditātinibirīsanitambabimbaḥ|
sthāne babhāra surakāmavatījanasya
caṇḍātakaḥ pulakabandhamanoharatvam||3||
vinyastayāvakarasāruṇasāndrarāga-
bhāsvannakhaikacaraṇāṅgulipaṅktirābhāt|
bhīroraśokaviṭapiprasavapraklṛpta-
śalyorumanmathaśilīmukhapañcakaśrīḥ||4||
rāmājanena nibiḍaṃ kaladhautakāñcī
baddhā śilātalaviśālanitambabimbe|
udbhinnakomalamanoramaromavallī-
ratnālavālavalayasya vilāsamāpat||5||
baddhāstu nāma bhavatī vanitā nitamba-
bimbe purā bhavati te rata eva mokṣaḥ|
mā bhūnmudhaiva mukharā virutairitīva
kāñcīmuvāca caraṇābharaṇaṃ raṇantīm||6||
madhye sthitā śithilabandhanabhāgapāda-
padmāgrapātikaladhautakarālakāñcyāḥ|
L
śobhāṃ babhāra racitāñcitahemavapra-
cakrāṃ kṣaṇaṃ kusumaketupurīva kācit||7||
kāñcīguṇairviracitā jaghaneṣu lakṣmī-
rlabdhā sthitiḥ stanataṭeṣu ca ratnahāraiḥ|
no bhūṣitā vayamitīva nitambinīnāṃ
kārśyaṃ nirargalamadhāryata madhyabhāgaiḥ||8||
lāvaṇyakāntijalaśaivalavallarībhi-
rakṣuṇṇapuṣpaśarakānanapadminībhiḥ|
śobhāṃ puraṃdhijanatā bibharāṃcakāra
hārāśmagarbhakaśikhākiraṇacchaṭābhiḥ||9||
tārāvalīdyutiranamrakucadvayānta-
rālambinī bhṛśamaśobhata hārayaṣṭiḥ|
abhyunmiṣannavakuśeśayakośayugma-
bhinnānanā bisalateva vilāsavatyāḥ||10||
hārasya madhyagata indumaṇirmṛgāṅka-
pādāvamarśagalitaiḥ sudṛśo jalaughaiḥ|
mūkīcakāra raśanāguṇamārdratantuṃ
madhyasthatāmapi dadhattaralo na bhūtyai||11||
ceto 'haratkucayugaṃ maṇihārayaṣṭi-
madhyasphuranmarakatāṃśuvilaṅghitāgram|
līlāgṛhītanavaśevalavallarīka-
cañcvagrakokayugavibhramamañcitorvāḥ||12||
kṛcchreṇa yannibiḍasaṃvalitāṅgulīka-
hastāmbujetarakareritamapyanahyat|
L
preyasyanīyuṣi śucā galati sma tatra
śūnye kṣaṇena balayaṃ tadarālakeśyāḥ||13||
pratyekameva viniveśitadṛśyapuṅkha-
bhāgābhirāmanakhakoṭiśilīmukhābhiḥ|
tūṇīrayaṣṭibhirivābhibabhe smarasya
līlāprasāritapuraṃdhrikarāṅgulībhiḥ||14||
prāptasya sāmikṛtamaṇḍanadehayaṣṭi-
rarcālatākisalaye lalanā salīlam|
rāgaṃ nijoṣṭharucake viniveśayantī
kācidvyadhatta hṛdaye hṛdayeśvarasya||15||
ślāghyātmanā daśanakoṭikṛtakṣaten
sa.prāpya cumbanasukhānubhavaṃ tadānīm|
rāgaḥ kuśeśayadṛśāmadhareṣu nāga-
valīdalena yadabhāri kimadbhutaṃ tat||16||
tāmbūlarāgarucirādharamadhyabhāga-
rekhā jahāra hṛdayaṃ hariṇekṣaṇāyāḥ|
utkṛṣṭacāpajhaṣaketukṛpāṇayaṣṭi-
dhāranipātakṛtasakṣatajavraṇaśrīḥ||17||
bhāti sma kācana tiraskṛtabimbakānti-
dantacchadonmiṣitadīdhitimaṇḍalaśrīḥ|
antaḥpraviṣṭabharasaṃbhṛtapuṣpabāṇa-
nārācagarbhamakarandamivodgirantī||18||
lāvaṇyakāntiramalā malinātra mā bhū-
dbhītyā sakhīti vililekha na pattralekhām|
akleśayatpunaramūṃ pratimāgatendu-
bimbaprabhādhikataraṃ taruṇīkapole||19||
gaṇḍasthalaṃ lakucakuṅmalapāṇḍuśobhā-
mabhyucchvasattilakapattralatābhirāmam|
chāyāniṣaṇṇahariṇāṅkamadhatta puṣpa-
kodaṇḍakānanamivonnatamaṅganāyāḥ||20||
sāvarṇyanihnutavipāṇḍuramaṇḍalasya
gaṇḍasthalībhuvi tuṣāraruco 'parasyāḥ|
spaṣṭābhilakṣyavapuṣā mṛganābhipattra-
patrāvalīruciratanyata lakṣmaṇaiva||21||
bibhratyarājadasitāgurupaṅkadigdha-
patrrāvalīviracanāśabalaṃ kapolam|
ālokakuṇḍalaśikhāruṇaratnadīpa-
niṣṭhyūtakajjalaviliptamivāñcitabhrūḥ||22||
bhāti sma paryuṣitakesarapuṣpapāṇḍu-
gaṇḍasthalīviracitāgurupattralekhā|
vāmabhruvo rajatabhittivilagnakāla-
vallīvilāsamasamānaguṇaṃ vahantī||23||
tiryakkṛtānanahimāṃśukarālahasta-
śākhānakhāṃśubharasāndrataraprakāśam|
L
subhrūrarājata vilambini karṇapāśe
māṇikyakuṇḍalamudaṃśu niveśayantī||24||
lāvaṇyakāntivisarāmṛtavāñchayeva
bibhratsudhānikaranirbharatāmapīnduḥ|
chāyāchalena nipapāta vadhūkapole
saṃtoṣavānbhavati ko guṇavānguṇeṣu||25||
saṃśikṣitāṃ lalitavibhramaceṣṭitāni
pāriplavakṣaṇagatāni mṛgo 'ṅganāyāḥ|
ityādarādiva śaśī pratimāchalena
svacche kapolaphalake vasatiṃ cakāra||26||
lāvaṇyakāntisalilasrutidhautalakṣma-
lekhaḥ kapolaphalake pratimāniṣaṇṇaḥ|
akṣuṇṇameva vibabhau hariṇena mukta-
madhyastanoḥ śravaṇapāśabhayādivenduḥ||27||
śyāmīkṛte nipatatā navalodhrareṇu-
bhasmotkareṇa parimārjanavāñchayārāt|
kaṃdarpadarpaṇa ivendukarāḥ puraṃdhri-
gaṇḍasthale kamalakāntimuṣo nipetuḥ||28||
ālokyatonnatapayodharapṛṣṭhabhāga-
bimbāgataśravaṇakāñcanakuṇḍalaikā|
sajjīkṛtaprakaṭacakracatuṣṭayāṅka-
saṃcāripuṣpaśarakambalivāhyakaśrīḥ||29||
ekāṃ pinaddhanirupaplavacandrabimba-
vistārśāliśucidīdhitiśaṅkhapattrām|
bibhratyarājadaparā taruṇī viṭaṅka-
tāṭaṅkamaṅkitatalāṃ śravaṇāgrapālīm||30||
sthūlendranīladaradanturamadhyabhāga-
muktāphalagrathitavibhramakarṇapūrā|
śobhāṃ babhāra ramaṇī nibhṛtadvirepha-
kalmāṣitastabakakomalakalpavallyāḥ||31||
kāntiprakarṣamanapekṣya parātmatattvaṃ
hartuṃ pragalbhata idaṃ jalasaṃgameṣu|
itthaṃ rūṣeva rurudhe nijasaṃniveśa-
bhūmirdṛśāyatadṛśaḥ śravaṇotpalasya||32||
pāriplavasphuritatārakacakravāla-
nīlotpalasphuṭataratviṣi dīrghikāyām|
vispaṣṭamañjanarajaśchaṭayā dvirepha-
paṅktyeva pakṣmaladṛśo dṛśi saṃnipete||33||
bhrūlekhayā kuṭilapakṣmadṛśaḥ śalākā-
nyastāñjanādhikavilīnarucā vyaroci|
karṇāśritotpalagalanmakarandapāna-
lobhādivopagatayā madhupāyipaṅktyā||34||
cakre lalāṭabhuvamindumukhījanasya
kastūrikātilakabinduramandaśobhām|
L
saṃcāripuṣpaśarakuñjarapādacakra-
mudrāniveśa iva kardamadhūsaraśrīḥ||35||
dolāyamānacaṭulātilakaṃ lalāṭa-
paṭṭaṃ lalāmalalitaśriyam udvahantī|
ekībhavatsuraśarāsanaśītaraśmi-
khaṇḍāṅkitāmanucakāra divaṃ natabhrūḥ||36||
naiśāndhakāranikareṇa sahāviruddha-
mekatra sādhu yadi saṃniviśeta tejaḥ|
baddhāspadā mṛgadṛśaḥ śaśilekhayā ta-
dāsādayetsadṛśatāṃ kacahastabhūmiḥ||37||
uddhūtadhūlimakarandakaṇārdramukta-
nidrasphuradvalanapuñjitacārupuṣpāḥ|
utsṛṣṭadairghyaghaṭanāḥ kabarīṣu gāḍha-
bandhāḥ puraṃdhribhiravatsata cāru śeṣāḥ||38||
gantuṃ priyāntikamatho rabhasena keśa-
saṃskāradhūmanikaraṃ karabhorvastāḥ|
śītāṃśudīdhitiśikhādalitaṃ vireju-
rutpādayantya iva śārvaramandhakāram||39||
lāvaṇyakāntikaluṣīkaraṇāya tāsā-
mālībhajena racitaḥ paramaṅgarāgaḥ||
L
sthairyaṃ jagāma dayitāgamabhāvanottha-
dharmāciteṣu na cirādapi vigraheṣu||40||
lakṣyīkṛtaṃ smṛtibhuvā bibharāṃcakāra
śobhāṃ vapuḥ sarasakuṅkumakardamāṅkam|
nirmuktapuṣpaśarakesarasāndradhūli-
saṃpātapiṅgitamivādhikamaṅganāyāḥ||41||
vinyasya bhūpaṇaśatāni mudhaiva deha-
kāntiḥ kuśeśayadṛśā kaluṣīkṛteyam|
cārubhruvaḥ pratimito 'cchakapolabhitti-
bhāge gabhastibhiratīva jahāsa candraḥ||42||
vyaktāṅgarāgaghanasaurabhabaddhavāñcha-
vyāvartanākulaśilīmukhacakravālā|
durvāramāraśarapātabhayena loha-
varmāntarālaghaṭiteva rarāja kācit||43||
jahrurmanāṃsi saralonnatacārunāsā
vaṃśāḥ payodharamṛdaṅgabhṛtastaruṇyaḥ|
dolāyamānamaṇikuṇḍalakāṃsyatālāḥ
saṃgītabhūmaya iva smaralāsakasya||44||
śṛṅgāriṇī dhṛtamadojjvalakāladhauta-
kakṣyā kalāpakarapuṣkaracāruśobhā|
bhāti sma kāmakariṇīva pinaddhahāra-
nakṣatramālakucakumbhataṭā varorūḥ||45||
āhlādahetuniravadyaśarīrayaṣṭi-
lāvaṇyakāntikaluṣīkaraṇena tāsām|
L
āsītkuśeśayadṛśāmayathārthataiva
paryastabhāsvararucāmapi bhūṣaṇānām||46||
preyogṛhāgamanabhāvanayānyacetāḥ
svacche dhṛte savayasā gṛhacandrabimbe|
bhūṣāviśeṣaracanāsadasadviveka-
śūnyaiva kācidavalokayati sma vaktram||47||
citraprasādhanaparigrahaśobhivaktra-
mālokya darpaṇatale muhurucchvasantyāḥ|
matvābhisaṃdhimabhivallabhadhāma baddha-
rāgā yayāvanuditāpi vidagdhadūtī||48||
eṣā gataiva nibirīsanitambabimba-
bhāreṇa pakṣmaladṛśaḥ kriyate tu vighnaḥ|
yāntyā itīva dayitāntakameṇadṛṣṭe-
ragre jagāma gadituṃ laghu cittavṛttiḥ||49||
śrotrābhirāmamupakalpya rasārdravṛtte-
rabhyeyuṣo dayitavāridharasya śabdam|
ramyābhyapadyata vidūrabhuveva nāryā
paryucchvasatpulakaratnaśalākaya śrīḥ||50||
preyāṃsamīkṣitumathekṣaṇatārakasya
dūrādapāṅgapadavīmabhidhāvato 'syāḥ|
ānandabāṣpajalabindunibhena sāndrāḥ
svedāmbuśīkarakaṇā iva saṃnipetuḥ||51||
kācidvikalparacitākṛticittanātha-
gāḍhopagūhanarasasrutadharmaleśaiḥ|
L
lāvaṇyakāntijalamajjanlagnabindu-
vṛndāmivābhṛta tanuṃ sphuṭaromaharṣām||52||
bhītā vadhūrabhimukhaṃ na śaśāka bhartu-
rudvīkṣituṃ yadaciroḍhatayā kathaṃcit|
pṛṣṭhāgatasya vadanaṃ śvasitāhate 'tha
paśyantyadūyata tadasphuṭamātmadarśe||53||
kācidvidhūsaritakāntimadhatta datta-
duḥkhāsikādharamaṇiṃ cirayatyabhīṣṭe|
niḥśvāsamārutaparamparayānubandhi-
roṣandhakārakaluṣīkṛtayev bhinnam||54||
prāptaḥ sabhītirasitāgurupaṅkapattra-
bhaṅgamavaikṣata puraṃdhrijanasy kāntaḥ|
antarvyalīkacakitaḥ sphuraṇānubandhi-
mānāgnidhūmakaluṣāmiva gaṇḍalekhām||55||
kṣī(hrī)ṇo 'pi mugdhavadane 'nuśayāptiheto-
rvācyastvayā na khalu vipriyameṣa kiṃcit|
spaṣṭāgasi priyatame sudṛśo na bāṣpa-
stambho virūkṣamabhidhātumadāditīva||56||
kānte praṇemuṣi kṛtāgasī tadvataṃsa-
puṣpādhivāsasurabhau vibabhau taruṇyāḥ|
bhrāmyanmadhuvratagaṇaścaraṇāravinda-
pārśve muhūrtamasitopalanūpuraśrīḥ||57||
saṃsaktakajjalakareṇa vilocanāmbu-
pūraplavaṃ prasabhamunmṛjatā sarāgam|
hastīkṛtaḥ kṛśatanorabhavatpriyeṇa
mānāndhakāra iva ratyupabhogavighnaḥ||58||
kṛṣṇāyatānamitapārśvanitambacumbi-
veṇīlatānanagatatripatākapāṇiḥ|
sācīkṛtabhru vinimīlitalocanātha
kācitpuraḥ smararasātkamiturjajṛmbhe||59||
anyā punaḥ sarabhasordhvaviviktabhāsva-
duttānakarkaṭakarasthitibāhuyaṣṭiḥ|
utkṣiptamūlakuṭilīkṛtakuñcitabhrū-
lekhātaraṅgitakarālalalāṭapaṭṭā||60||
preṅkhannitambataṭacumbikarālakāla-
veṇīlatonnamitapīnapayodharaśrīḥ|
dīrghībhavattanutarodaraluptapārśva-
bhāgā vivartavalanaṃ vapuṣaścakāra||61||
(yugalakam)
tāsāmapāṅgapadavīvyatiriktanīla-
tāratvi.o lalitavīkṣitvibhrameṣu|
āvṛttipītabharanirgatakajjalaugha-
dhūlicchaṭā iva dṛśo dadhati sma lakṣmīm||62||
prāptāḥ pradoṣasamaye sphuradindranīla-
koṣābhirāmaśititārakamaṇḍalābhiḥ|
dṛgbhiḥ savibhramamapāyiṣatāvadhūta-
mānāndhakāramaravindadṛśāṃ yuvānaḥ||63||
tāsāṃ dṛśastaralatārakacakravāla-
pakṣmacchaṭāṃśuśabalīkṛtagaṇḍabhāgāḥ|
ācikṣipuḥ priyamanāṃsi jhaṣāvacūla-
līlāvaśīkaraṇavibhramavartayastāḥ||64||
priyatamamavalokyāpāśrayādutpatantyāḥ
sarabhasamaparasyāḥ pādamūle salīlam|
nyapatadatha karāgrādaccharatnātmadarśaḥ
śaśadhara iva vaktracchāyayā nirjitaśrīḥ||65||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye prasādhanavarṇano nāma trayoviṃśaḥ sargaḥ|