kurvannaṅgaklāntimarkaprakāśo gacchantībhirmanyunevāṅganābhiḥ|
phullannīlāmbhojasaṃvādinetracchāyāpātaiḥ khaṇḍaśo 'tha vyadhāyi||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
aṣṭādaśaḥ sargaḥ|
āśāplāvisvacchalāvaṇyakāntijyotsnāpūrāpahnutānyapyaśeṣam|
chattrāṇyuccairdhāryamāṇāni tāsāṃ haimaiḥ pāṇḍūnyanvamīyanta daṇḍaiḥ||2||
tiryagjyotsnāpāṇḍubhāsā dhṛtena cchattreṇānyā rājati sma vrajantī|
vaktrendoḥ svinmaṇḍalāgreṇa cañcanmuktādāmoddāmatārāgaṇena||3||
ramyābhogairgauratāmudvahadbhiḥ prauḍhasyendorbimbaśobhāmavāptaiḥ|
chattraiśchāyātāni sīmantinīnāṃ vaktraiścārāccārunetrābhirāmaiḥ||4||
baṃhīyastvaṃ nākanarījanasya chattracchāyāmaṇḍalairīyavadbhiḥ|
tadvaktrendugrāsagardhāvatīrṇairākīrṇorvī saiṃhikeyairivāsīt||5||
mārgoddhūtā dhūlayo dhūsaratvaṃ māsāṃ kārṣuḥ svacchalāvaṇyakānteḥ|
vallyo 'dhunvanvātanunnānitīva strīṇāmārādvallarīcāmaraughān||6||
kāñcīnaddhaiḥ sthūlabimbairnitambaiḥ saṃbādhatvaṃ vartmanaḥ kurvatībhiḥ|
mandaṃ jagme 'thāṅgalekhāniṣaṇṇasphūrjatkaṃdarpātibhārādivābhiḥ||7||
pratyuptānāṃ hemapādāṅgadeṣu strīṇāṃ bhāge padmarāgopalānām|
abhraṣṭo 'pi cchāyayā nihnutaḥ sannāpa vyaktiṃ yāvakīyo rasaughaḥ||8||
agre yāntaṃ kānanālokanecchāvyagratvāttvaṃ vīkṣito no mayeti|
vyājādākhyadvallabhaṃ pīvarābhyāmāhatyārātkāpi pṛṣṭhe stanābhyām||9||
gacchantīnāṃ nūpurakvāṇakṛṣṭā haṃsaśreṇyo dhṛṣṭamagre sarantyaḥ|
gaṇḍābhogairapyahāsyanta bhāsvatpāṇḍucchāyāhāsabhāvena tāsām||10||
spaṣṭāgaskaṃ jīviteśaṃ vidhūya pratyāsannaṃ manyunāgre vrajantīm|
ālīvārādbandhaśaithilyahetoḥ kāñcī kāṃcitpādapātinyarautsīt||11||
sīmantinyāḥ saṃsarantyāḥ salīlaṃ vartmanyārātpīnatuṅgastanāgrāt|
prālambena cchinnasūtreṇa pete yogyaḥ pātaḥ sarvathā nirguṇānām||12||
yā pādānāmujjvalā śrīramīṣāmambhojānāṃ sā kuto 'bhyeti mugdhāḥ|
mañjīraugho mañjunā śiñjitena prītyetīva vyājahārātha haṃsān||13||
lakṣmyādhārairbhaṅgurāpāṅgabhṛṅgaśreṇicchāyāśāritāśāvakāśaiḥ|
amlāyadbhirvibhramāmbhojakhaṇḍairambhorūḍhairāpi mārge vikāsaḥ||14||
ullaṅghyātha spaṣṭatāmbūlavallījālāśliṣyatkesarānsānumārgān|
haṃsavrātāsevitasvarṇapadmacchāyāmāpuḥ syandinīminduvaktrāḥ||15||
śānteḥ śaśvatsajjalābhāṃ niṣadyāṃ puṇyāṃ loke vīcibhaṅgapragalbhām|
pratyāsīdatpuṣkarāvartakaughāṃ prāptāṃ kalpāpāyavelāvilāsam||16||
nidrāmudrārecitasvarṇapadmāṃ padmacchāyāśītalasvacchatoyām|
toyodgacchadvīcivikṣiptahaṃsāṃ haṃsaśeṇīśāritottānatīrām||17||
(tilakam)
saṃsarpantyā maṅktumetyādhirodhaḥ sīmantinyā nirjitānvīkṣya gatyā|
valgadvīcikṣobhabhinnaṃ tadāmbho muktāsthatvenaiva haṃsānnirāsthat||18||
āyāntīnāṃ nirmalāmbhaḥ kaṇaughavyājālakṣyasvacchamuktāphalārgham|
satkārāyevābjinīpattrapātraṃ mandākinyā saṃdadhe sundarīṇām||19||
kācittīrotsaṅgasaṃsthā mimaṅkṣuḥ sarvāṅgīṇasvacchalāvaṇyakāntiḥ|
atyutsukyapreritenānurāgādabhyutthāyāliṅgitevāmbhasāsīt||20||
sparśenāṅgānyāśu nirvāpayantyaḥ svacchacchāyālokanetrābhirāmāḥ|
rāmāstasminsnigdhavaidūryanīle vyomnīvānuṣṇāṃśubhāso nipetuḥ||21||
tīrotsaṅgāttuṅgatāmādadhānādbhraśyantīnāmāśu sīmantinīnām|
ambhobhāge nirjhariṇyā gurutvāttāsāṃ pete pīvaraiḥ prāṅnitambaiḥ||22||
bhraśyanmālyā viślathatkeśahastā truṭyattārasphārahārāvalīkā|
prāvartiṣṭākṛṣṭasaṃbhogalakṣmī rambhorūṇāṃ majjanārambhalīlā||23||
āyāntīnāṃ tīrahaṃsīninādastāsaṃ jigye mekhalābhiryakābhiḥ|
ākramyāntarmatsareṇeva sindhormūkāvasthāstā vyadhātkṣubhyadambhaḥ||24||
baddhatrāsā ratnasopānapaṭṭakṣobhodgacchallolakallolamambhaḥ|
ālambyaikāvātaratkāntahastaṃ pīḍāgāḍhaṃ tatsapatnyāśca cetaḥ||25||
śītālutvādapyanicchurnimaṅktuṃ kācittoyaṃ cittanāthānurodhāt|
rodhaḥsīmno nimnagāyā jagāhe kiṃ tatpremṇā kāryate yanna lokaḥ||26||
sāsūyāntaḥ kācidaṅge 'nyanārīgātrāllagnaṃ vallabhasyāṅgarāgam|
krīḍāvyājācchṛṅgakāmbhaḥprahārairunmārṣṭi sma smarevaktrāmbujaśrīḥ||27||
mārdaṅgībhistālalīlābhirāmaṃ hastāmbhojairāhate 'mbhasyamandam|
bhrūnartakyo vellitavyājanṛttavyākṣepeṇa preyaso jahnurārāt||28||
saprāsaṅgā sinduvāraprasūnasragvaidagdhīṃ bibhratī sundarīṇām|
valgadvicivyālaviśliṣṭavellanirmokaśrīrvyadyutatphenapaṅktiḥ||29||
āmagnānāṃ vīcipāriplavormibhrāmyanmīnonmeṣicakṣustadambhaḥ|
viṣvagvṛttiṃ kautukeneva tāsāmāṅgīṃ śobhāmaṅganānāmapaśyat||30||
siktāmbhobhiḥ kāpi dūrātsapatnīnāmagrāhaṃ dāhasaṃvegamāpat|
śāntiṃ bheje 'nukṣitāpītarā svāṃ saṃjñāṃ śrutvā kīrtitāṃ vallabhena||31||
strīvakṣojasphālanotthā nadantaḥ pātuṃ padmeṣūrmayaḥ ṣaṭpadānām|
kiṃjalkālīṃ no daduḥ kiṃ vidhattāmudvṛttairvā saṃgato 'nyajjalaughaḥ||32||
maṅktvā preyānīyivānambhaso 'ntaryatpaśyantyāṃ roṣarūkṣaṃ sapatnyām|
āśiśleṣa smeravaktrāṃ striyaṃ tatsāphalyaṃ sā tatprasādasya mene||33||
sādṛśyaṃ yaiḥ kalpyate strīmukhānāṃ phullāmbhojaiste 'samīcīnabodhāḥ|
ityālocyevāntaraṃ tacchriyo 'bhūdvīcivrātaḥ sphītaphenasmitaśrīḥ||34||
dūrādeva strīmukhaupamyalakṣmīṃ yatsaṃprāptā yūyametāvadastu|
hrīheturvo 'bhyarṇatetīva bhṛṅgairāśiñjanairabhyadhīyanta padmāḥ||35||
vīkṣya bhraṣṭaṃ karṇapūrīkṛtaṃ sallīlāvatyāḥ phullanīlāravindam|
mandākinyāṃ kīrṇamarṇaḥkaṇaughaiḥ sodaryatveneva padmaṃ vyarodīt||36||
uttaṃsādāvutpalānyaṅganānāṃ yānyāsaṃstānyūrbhijālāni jahnuḥ|
tasthāvambhorūḍhamabjaṃ tathaiva syātsādhyaḥ ko baddhamūlo jalānām||37||
āropya tvāmaṅganaipādhikarṇaṃ nūnaṃ netracchāyayādhaḥ karoti|
ityambhojaṃ vīcihastaistanūjasnehenevāpāharatkṣubhyadambhaḥ||38||
saṃsargeṇāvāptamambho 'tibhūmiṃ karṇārūḍhānyutpalānyaṅganānām|
udgcchadbhirnarmaṇevormihastairhṛtvā dūraṃ phenahāsaṃ vyatānīt||39||
romāñcālīmañcitāṃ kampamūrvoḥ śītavyājātsītkṛtaṃ cādhitoyam|
kācitpreyaḥkāmarāgotthamagre pratyagroḍhā spaṣṭamahnoṣṭa sakhyāḥ||40||
vīcikṣobhāvirbhavatsaṃbhramatvātkāntaṃ kācitsasvaje jātasaukhyā|
prāyeṇotthaṃ śreyase vikriyāpi prādurbhūtā kalpate komalānām||41||
rodhohaṃsasvanalakṣmīṃ vyajeṣṭa spaṣṭaṃ yaḥ strīmekhalānāṃ ninādaḥ|
vicchinno 'sau sajjalaughairitīva srotasvinyā phanehāso vitene||42||
kallolaughairghaṭṭitasyendugaurī haṃsavrātasyeva dehacchaviśrīḥ|
bhraṣṭā reje kāminīnāṃ kucāgrakṣobhodbhūtā phenaphāliḥ sphurantī||43||
lolenoccaiḥ pāṭalāvṛntabhāsā dīrgheṇorbhivrātasaṃpiṇḍitena|
veṇīdaṇḍenāpyate smāṅganāyāḥ pātālotthavyālabhogānukāraḥ||44||
romāñcaughaṃ bibhratī śītatoyasparśeneva preyasābhyetya dūrāt|
vyātyukṣībhirnirjitānyāttahāsaṃ paryaṣvañjivyañjitaprema subhrūḥ||45||
ādāyaikā padmanālāgrasūtraṃ rugṇairambhaḥkrīḍayāgre vikīrṇaiḥ|
muktājālaiḥ kartumaihiṣṭaṃ hāraṃ kasya syādvā maugdhyabhājo vivekaḥ||46||
krīḍāmardātsubhruvo ratnakamborbhagnasyācchā koṭirakliṣṭakāntiḥ|
prabhraśyantī toyarāśeradhastāttārāmārgādindulekheva reje||47||
pakṣmaśreṇīpattraśobhābhirāmapreṅkhallīlāluṅkhitāpāṅgapuṅkhāḥ|
tābhirmuktā dṛṣṭibāṇāstadānīṃ niḥsāraṅgāṃ cakrire kānanorvīm||48||
sārdhaṃ strīṇāṃ vallabhairmajjatīnāmudvṛttatvādbhajyamānāḥ stanāgraiḥ|
rodhohaṃsavrātamāsustaraṅgā niḥsāmarthye śaktatāho jaḍānām||49||
ścyotallāvaṇyāmṛtaṃ nirbharatvādūrmivrātairgāḍhamāpīya bhūyaḥ|
abhyudveme ghūrṇamānairivāsāṃ saṃkṣobhāvirbhāviphenacchalena||50||
svacchacchāye bimbitaṃ gaṇḍabhāge vibbokinyāḥ phullanīlāravindam|
sevārthīvālakṣyatopāntavarti pratyāhartuṃ kāntisarvasvamakṣṇaḥ||51||
labdhvā nābhīmaṇḍalāntaḥ praveśaṃ kurvaṃllīlāsphālanaṃ strīstaneṣu|
kallolaugho 'mānivātmanyayāsīttoṣāveśādudbharībhūya rodhaḥ||52||
dhaute 'pyakṣṇorañjane vīcibhaṅgairnaisargikyā hānirāsīnna lakṣmyāḥ|
yenārabdhaṃ yanna tatra vyapete tasyābhāvājjāyate 'tiprasaṅgaḥ||53||
pratyāsanne vīcibhaṅge muhūrtaṃ bimbāyātā kāpyakāśiṣṭa dhṛṣṭam|
utkīrṇoccaiḥ sphāṭikastambhabhittau spaṣṭākārā putrikeva sphurantī||54||
lekhāḥ sītā bibhratī madhyabhājaḥ subhrūranyā kāmakedārabhūmiḥ|
āpyāyiṣṭa preyaso hastapadmakṣiptairambhaḥśīkaraiḥ siktamūrtiḥ||55||
ścyotatpādālaktakāmbhastaraṅgavyāsaṅgenābaddharāgāṅghrivaktrāḥ|
rodholekhāvartino dhārtarāṣṭrāstāsāmagre rājahaṃsā ivāsan||56||
kallolaughābhyāhatebhyastadānīṃ tadgātrebhyaścyotatā candanena|
nītaṃ lāvaṇyāmṛteneva gaurīṃ chāyāmāsīdambu saṃdigdhaphenam||57||
visrastaḥ sankautukenāgrabhāñji vyālolāgraḥ kāminīkeśahastaḥ|
vistāratvaṃ vīcijālena nītaḥ padmānīvājīgaṇanirjhariṇyāḥ||58||
vyātyukṣīccāpreritenāmbhasārātsiktā kācitpreyasā na pratīpam|
prāgalbhiṣṭāhantumenaṃ navoḍhā hrīrvaiyātyaṃ hanti lajjādhanānām||59||
sthūlocchvāsā nirbharaṃ vādayantī gāḍhotkampoccaistarāṃ dantavīṇām|
śītārta nu prāptakāmajvarā nu bhreje romāñcāñcitāṅgī natabhrūḥ||60||
spaṣṭapreṅkhatpakṣmaśobhābhirāmairnetraiḥ strīṇāṃ dikṣu kāntiṃ kiradbhiḥ|
phullannīlāmbhoruhaiśca sravantyāḥ saṃgharṣeṇa vyāvahāsīva tene||61||
aspardhiṣṭāmbhoruhaṃ yattaruṇyā vaktreṇārācchāyayā jīyamānam|
tatsaṃvavre nirjhariṇyā tadānīṃ phenavrātairvrīḍayevonmiṣadbhiḥ||62||
abhrājiṣṭa prerito mūrdhni bhartuḥ sīmantinyā majjanārambhanāṭye|
kampodrekānnirgalattoyaśeṣaḥ phenavrātaḥ pāṇḍupuṣpāñjaliśrīḥ||63||
vicchinnānāṃ tārahārāvalīnāṃ lagnairambhaḥ śīkarairunmiṣadbhiḥ|
pratyājahre śrīḥ puraṃdhristaneṣu svacchairyogaḥ saṃpade kasya nasyāt||64||
mā drākṣurmāṃ bhraṣṭamanyāni bhīroḥ karṇotsaṅgādutpalānyambhasīti|
hrīteneva kvāpi saṃcintya vīcikṣobhājjagme karṇapūrotpalena||65||
chāyāṃ bibhradvāsare 'pyakṣataśrīśchātodaryā gamyarūpo na rāhoḥ|
nidrātaṅkaṃ paṅkajānāmakurvanvyadyotiṣṭāpūrva evānanenduḥ||66||
vaktracchāyānirjitāmbhojaśobhaṃ roṣeṇeva strījanasyekṣaṇāni|
ambhaścakre vīcidhautāñjanāni svalpaḥ prītyai viprakāro 'pyarātau||67||
hārapreṅkhattāramuktāphalaughajyotsnājālavyājato nirbharatvāt|
asyandiṣṭevācchalāvaṇyavṛṣṭiṃ pīnottuṅgaḥ sundarīṇāṃ stanaughaḥ||68||
anyastrīdṛgdāhidhautāṅgarāgaspaṣṭapreṅkhatpāṇijārdrakṣatāṅkam|
chātodaryāśchādayantī kucāgraṃ sāsūyatvaṃ phenapālī cakāra||69||
niḥśvāsānāṃ saurabhādāpatiṣṇūnrolambaughānvārayantīḥ karāgraiḥ|
vyālolākṣī kācidāripsateva krīḍālolā kandukakṣepavṛttim||70||
pratyāsannāṃ kāṃcidambhojanālairālokyaiva preyasā hanyamānām|
bibhratyanyā vaktramābaddhakopātāmracchāyaṃ vivyathe 'nāhatāpi||71||
saṃgrathyādātkāṃcanāmbhojamālāṃ yāmudvoḍhā rāgabhājo ramaṇyāḥ|
ploṣaṃ cakre sā nikārānalasya jvālevānyastrīdṛśorvisphurantī||72||
kiṃ padmo 'sau līnabhṛṅgo 'ṅganāyāḥ kiṃ vā hastaḥ sendranīlormikāṅkaḥ|
maṅktvā toye kāntayotkṣiptamitthaṃ saṃśiśye 'nyaḥ pāṇimālokya dūrāt||
preṅkhannārādutthito vīcibhaṅgairadhyārūḍhaḥ śīkaraughaḥ stanāgram|
gaṇḍābhogaṃ cumbati smāṅganāyāḥ kaḥ syānnoccaiḥsthānalābho guṇāya||74||
bhūtārthaiva śreyasī nanvabhikhyāḥ kor 'tho 'mībhiścintayetīva tāsām|
oṣṭhādakṣṇoryāvakaṃ kajjalaughaṃ toyaṃ ninye candanaṃ ca stanāgrāt||75||
vīkṣya bhraṣṭaṃ karṇapūrīkṛtaṃ sallīlāvatyāḥ phullanīlāravindam|
citraṃ yanme nāpadeṣeti toṣānnṛttārambhīvābjabhūrmau cakampe||76||
sīmantinyā niṣpatantī mukhendoḥ pātuṃ lāvaṇyāmṛtasyeva dṛṣṭim|
nirbhinnaṃ satkairavaṃ vīcibhaṅgairvyādādārādādarādānanāgram||77||
rugṇonnidrāmbhojakhaṇḍāstadānīṃ mandākinyāḥ kṣobhamāpādayantīḥ|
sānusvārairniḥsvanairbhṛṅgacakraṃ saṃbhramyeva bhrāmyadagre nyaṣedhīt||78||
vīcivrātābhyāhataḥ kuṇḍalāgraspaṣṭāghātakvāṇaramyaṃ ramaṇyāḥ|
astraṃsiṣṭa svāśrayātkarṇapūraḥ pātyante no ke jalaughaiḥ suvṛttāḥ||79||
yā paryāse yoṣitāṃ candanāmbhaḥ prāleyaughenābhipatya sravantyām|
netrāṇyārātsaiva raktāravindacchāyāsāmyātpāṭalānyālalambe||80||
prabhraṣṭaḥ sankarṇapūrastadānīṃ dhāmātmīyaṃ sindhutoyāvilaśrīḥ|
bhūyo nādhyāropyate smāṅganābhiḥ pratyāpattirbhraṃśabhājāṃ durāpā||81||
līlāmbhojātpakṣmadhūliḥ piśaṅgī no tanvaṅgyā manmathaṃ nādidīpat|
candrottaṃsasyeva netrāttṛtīyādagnijvālābhyutthitā visphurantī||82||
vīcikṣobhādujjihānaṃ muhūrtaṃ bimbauṣṭhīnāṃ baudbudaṃ cakravālam|
aikṣiṣṭārādvaktracandrānusārijyotiścakracchāyamacchaṃ yuvaughaḥ||83||
hāraiḥ prāptāḥ spaṣṭaguñjāphalasrakchāyaiḥ śobhāṃ kuṅkumāmbhaḥ piśaṅgaiḥ|
tāḥ padminyāḥ patrapālīṃ vasānā līlāmūhuḥ śābarīṇāṃ vadhūnām||84||
nirjityāpi cchāyayā locanānāmambhojaughaṃ tasthuṣīstāstadānīm|
mūḍho lokaḥ pa"kajākṣīrabocaddurlaṅghyāho rūḍharūpā pratītiḥ||85||
vyaktaṃ netracchāyayā jīyamānaṃ lajjāveśāddṛṣṭimārgaṃ jihāsat|
mandākinyāmāhataṃ vīcibhaṅgairaspandiṣṭendīvaraṃ sundarīṇām||86||
vīcikṣobhādutthitaḥ phenapuñjo viṣvagvyāptavyāyataśroṇibimbaḥ|
sīmantinyā nyasyamāno muhūrtaṃ śobhāṃ bheje pāṇḍucaṇḍātakasya||87||
prabhraṣṭānāmaṃśukānāṃ tadānīṃ phenavrātairvīcibhaṅgacchaṭotthaiḥ|
lagnairārātstrījanasya staneṣu prāpi sthānyādeśasaṃbandhilakṣmīḥ||88||
prāptābhikhyā muktaśaithilyabhāgbhirveṇīdaṇḍairdrāghimāṇaṃ dadhānaiḥ|
kṣepotkṣepāyastapādāravindavrātāghātapreṅkhadūrbhipratānam||89||
sthūlābhogaiḥ kṛṣṇamāṇā nitambaistoyasyāntastāḥ stanaiścātituṅgaiḥ|
kṛcchrātklāmyanmadhyadoḥkandalīkāḥ saṃplutyārādvallabhānāliliṅguḥ||90||
(yugalakam)
bimboṣṭhīnāṃ vibhramā hāriṇo 'tha drāganyonyāsaktahastāravindāḥ|
niryāntīnāṃ jāhnavīraṅgabhūmeḥ piṇḍībandhā nartakīnāmivāsan||91||
bhāti sma kāntamiva kāpi rasādidṛkṣu-
rāviṣkṛtekṣaṇacatuṣṭayamānanendum|
nirdhautapattraracanācchakapolabhāga-
bhittidvayapratimitotpalamudvahantī||92||
kalloladolanadalatkanakāravinda-
pakṣmāvalīlulitasāndraparāgapiṅgam|
L
strīṇāṃ payaḥ priyakarairabhinudyamāna-
mantaḥ kṛtāsthamapi rañjayati sma cetaḥ||93||
tāsāṃ kucasthalavimardavijarjarāmbu-
vīcicchaṭāśiśiraśīkarabindukīrṇe|
sparśādalakṣyata kuśeśayinīpalāśa-
garbhe viśīrṇanavamauktikahārapaṅktiḥ||94||
pratyagramajjanarasārdratayā gurūṇi
lālāṭabhittiluṭhitānyalakāni tāsām|
āghrātumutpalamivāmalagaṇḍabhitti-
bimbāgataṃ vikacakomalapattramīṣuḥ||95||
antaḥ praviśya makarandarasaṃ pipāsu-
rnārīkucasya navagauraruco 'ṅghripātaiḥ|
nidrālukāñcanakuśeśayaśaṅkicetāḥ
śliṣyanmuhurmadhukaro mukhamullilekha||96||
lāvaṇyakāntisalilaplutamāpa lakṣmī-
mālakṣyakāntakarajakṣatarāji nāryāḥ|
vaptuṃ vapurlalitavibhramabījamuṣṭi-
mākṛṣṭasīramiva kāmakṛṣīvalena||97||
sindhorathobhayakarāgranipīḍitoda-
bhārādrakuntalakalāpamanoharābhiḥ|
nirdhautakajjalajalaughakadarthitāccha-
lāvaṇyakāntiparipāṇḍuragaṇḍabhābhiḥ||98||
preṅkhannakhāṃśunikurumbaviḍambyamāna-
toyotkarastrutikarasthagitastanībhiḥ|
gāḍhocchvasajjahanalagnajalacchaṭārdra-
tanvaṃśukāhitagurūddharaṇakramābhiḥ||99||
vīcicchaṭāpaṭalapaṅkilaratnapaṭṭa-
sopānapaddhatipariskhalanākulābhiḥ|
tatkālasaṃbhramanilīnamanojñadatta-
hastāvalambamudatāri nitambinībhiḥ||100||
(tilakam)
jaghanaphalakāsphālakṣubhyattaraṅgatateḥ kramā-
ttridaśasarito ratnakṣodasthalīpulināśrayāḥ|
nyavasata sitānyuttiryātha striyo vasanāni tā
jaladharakulānīva svacchāḥ śaraddivasaśriyaḥ||101||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye jalakrīḍāvarṇano nāmāṣṭādaśaḥ sargaḥ|