niryāya khecarapuraṃdhriratopabhoga-
yogyāntaropavanakalpalatānikuñjam|
L
rociṣṇuratnanikurambanitambabhāga-
viśrāntabhāskararathaṃ sa tamāluloke||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
caturthaḥ sargaḥ|
abhyāhatāhimakaraḥ sphuradacchatārā-
prastāratārakiraṇotkarānturaśrīḥ|
mūlena yasya mathitaḥ sakalo 'mburāśi-
ratyunnatena śikhareṇa ca nākamārgaḥ||2||
āloḍanāya suradaityagaṇena sindho-
rāropite sapadi yatra kavāṭaṣṭaṣṭham|
sasmāra kūrmapatirādivarāhapāda-
pīṭhīkṛtastadatibhūribharasya nūnam||3||
yasyātivelaparivartavivartamāna-
toyendhanānalaśikhāvalayena dadhre|
dugdhāmbudhau niravalambananākamārga-
visrastasūryapariveṣaviḍambakatvam||4||
baddhāspadā galitanirjharagharmavāri-
nirdhautagaṇḍavadanā kamaṭhasya pṛṣṭhe|
yasyākulaṃ sapuruṣāyitavibhrameva
mūrtirnitambavalanena jahāra cetaḥ||5||
yasyāmburāśipayasā samameva mantha-
pīḍāmivābhipatanena viśaṅkya gāḍham|
udgrīvakūrmaviṣamaśvasitavyudasta-
vīcīni nirjharajalāni yayuḥ pratīpam||6||
ākṛṣṭivegavigaladbhujagendrabhoga-
nirmokapaṭṭapariveṣṭatayāmburāśeḥ|
manthavyathāvyupaśamārthamivāśu yasya
mandākinī ciramaveṣṭata pādamūle||7||
kalmāṣayansapadi yaḥ pṛthumadhyabhaga-
mārādadṛśyata nabhaścaracakravālaiḥ|
līlāvivṛttiparimaṇḍaladugdhasindhu-
śītāṃ'subimbapariṇāhamṛgāvacūlaḥ||8||
ābhoginetraparivartanavibhrameṇa
mūrtyā nitambavalanākulatāṃ vahantyā|
yasyāśanairaviralotkalikākalāpa-
paryākulaṃ hṛdayamambunidhirmamantha||9||
yasyormibhirmathanakālavijṛmbhitāmbhāḥ
kṣīrodasindhurapahastitakaustubhāni|
nyāsīcakāra suradaityahaṭhāpahāra-
bhītyeva ratnapaṭalāni gṛhāgṛheṣu||10||
rolambasaṃkulakarāladalāravinda-
saṃbaddhahaṃsavalayāmalasindhutoyam|
siddhāvaruddhamaṇikaṃdaragāḍharāsa-
saṃrambhaghorahariṇārighanābhirāmam||11||
(bhāṣāsamāveśaḥ)
kallolabhaṅgaghaṭitapratibimbacakra-
maikṣiṣṭa yaṃ pṛthuni kūrmakavāṭapṛṣṭhe|
tuṅgaṃ vibhajya bahudheva vapurbhramanta-
māloḍanāya jaladheḥ suradaityalokaḥ||12||
(yugalakam)
yasminbhramatyanuvivartanaviplavārta-
kūrmādhirājakarajoddhṛtaratnakhaṇḍaiḥ|
vicchāyatā bhujagarājaphaṇairarugṇa-
pātālatālutimiraistarasādhijagme||13||
yasyonmiṣatpralayameghaghaṭāsahasra-
vidyutkarālarasanena taṭījalārdrāḥ|
vyattānanena phaṇinodadhimanthagaḍha-
khedādapāyiṣata kaṃdararandhravātāḥ||14||
yasyācakāsati taṭībhuva nīlagaṇḍa-
śailā nijacchaviviluptaraviprakāśāḥ|
kṣīrāmbudhermathanasaṃbhṛtakālakūṭa-
piṇḍā ivoddhatataraṅga'satavyudastāḥ||15||
ścyotastu kaṃdaradarīnikarānpraviśya
dugdhārṇavotthitasudhārasasīkareṣu|
L
ambhobhṛtaḥ prakaṭapattrapuṭālavāla-
līlāṃ dadhuḥ kṛtapadā yadupatyakāsu||16||
kurvanti yasya kaṭakeṣvamalendranīla-
ratnasthalānyudadhimanthavighūrṇitasya|
vyāvṛttilolaśikharāgravipāṭyamāna-
tārāpathasskhalitakhanḍaśātānukāram||17||
daṃṣṭrāgṛhītagurusaṃbhramabhūtadhātrī-
paryastakātaratarekṣaṇapātapītam|
yacchṛṅganirjharajalastrutibhirdudhāva
pātālapaṅkakaluṣaṃ vapurādikolaḥ||18||
sthūlendranīlakaṭakaprtibimbyamāna-
mābhāti yasya śaśalakṣmaniruddhamadhyam|
kṣīrodakūrmapatiṣṭaṣṭhamivādikola-
vinyastapādaśabalīkṛtamindubimbam||19||
yasyāndhakāranikurambabhido nitamba-
sīmni prabhāprakaraśāritadigvibhāgān|
dṛṣṭvā maṇīngrahavimugdhamanā niśāsu
saṃcāra eva dṛśamāśu karoti bāhyaḥ||20||
yo bījayanniva niṣaṇṇarathaṃ taṭeṣu
śūnyāmbarabhramaṇakhinnamaśītaraśmim|
ābhāti dūragatakaṃdararandhravāta-
pātabhramīvalitavāridatālavṛntaiḥ||21||
preṅkhatkarālakuruvindaśilānitamba-
baddhāspadaṃ kṣaṇamaśītamarīcibimbam|
yasya tviṣānubhimate sadṛśatvamāpta-
mūṣmāyamāṇamadhisānu kṛtapratiṣṭhāḥ||22||
spaṣṭābhilakṣyaramaṇīyakuśaprasūti-
ravyāhatā muniniketakṛtāspadaśrīḥ|
sānusthitirjanakarājasuteva bhāsva-
daṅkollapallavatayā śriyameti yasya||23||
naktaṃ vilagnadhavalagrahacakrabāla-
durlakṣyasaurabhabharānumitātmarūpaiḥ|
abhyānataḥ kusumarāśibhirucchavasadbhi-
rābhānti yasya kaṭake kaladhautavallyaḥ||24||
saṃkrīḍato vikaṭaratnaśilāsu cakra-
cītkāratāraravapūritadikpurastāt|
yasyādhisānu ravikūbariṇo bhavanti
moghīkṛtastava giraḥ khalu vālakhilyāḥ||25||
āsannabhanumasitopalajālanaddha-
sopānatīranalinīnatanāgayūtham|
nākādhirūḍhanavanīlamālavallī-
baddhvāndhakāragahanātanusānukuñjam||26||
(piśācabhāṣāsamāveśaḥ)
ābaddhavāsukiphaṇāgaṇaphūtkṛtāgni-
tāpasphuṭadvikaṭakoṭiśikhāśmakūṭam|
kodaṇḍamindumukuṭaḥ svabharakṣamaṃ ya-
mādāya dānavapurīḥ kila nirbibheda||27||
(yugalakam)
bhettuṃ purāsurapurīḥ parameśvareṇa
bāṇāsanīkṛtatanuḥ pratanotyabhikhyām|
yo 'dyāpyamuktabhujagādhipadīrghabhoga-
jyābandhabandhura iva strutanirjharāmbhaḥ||28||
cāpatmanaḥ śaśikalābharaṇārdhabhaga-
lagnādrijākarasarojaniviṣṭamuṣṭeḥ|
yasyoragādhipaguṇena ghanābhyaghāni
tatkambupaṅktiravanaddhatalāyamānā||29||
bhartuḥ sthitārdhavapuṣi sphuṭagāḍhabandha-
tāmyatphaṇīndraphaṇaphūtkṛtakātarāpi|
muṣṭigrahaṃ girisutā ślathayanna yasya
bhāvānuraktahṛdayaḥ kurute n kiṃ vā||30||
uttāpitaḥ pralayakālavijṛmbhamāṇa-
saṃrambhakarkaśakṛśānuśikhāsahastraiḥ|
nirvāpayanniva nitambabhuvo vibhāti
yo 'dyāpi kaṃdaramukhaskhalitairmarudbhiḥ||31||
vispaṣṭadantarucayaḥ pṛthugaṇḍaśaila-
śobhā nitāntavikaṭonnatavaṃśakuñjāḥ|
yasyabhirāmaguṇataṃ dadhati pradeśāḥ
sajjāvaṭavīraṇahitā gajayūthapāśca||32||
yasyotpatanpratidinaṃ saviśeṣameva
nālaṃ vilaṅghayitumunnatiśāli śṛṅgam|
āyāsitāruṇakarordhvavikṛṣyamāṇa-
preṅkhatkhalīnamukhavājiratho vivasvān||33||
yasyācakāsati nirargalanīrabhāra-
bhūribhramadbhramaramecakabheghacakrāḥ|
adyāpi lokaparivartadaśākṛśānu-
dhūmākulā iva guhāgṛharandhrabhāgāḥ||34||
līlāvilolakalakaṇṭhavihaṃgakeli-
kolāhalākulakulāyakulāmalāṅke|
kakkolakandakadalīlavalīlavaṅga-
mālālalāmajalamañjulakūlakacche||35||
(bhāṣāṣaṭkasamāveśaḥ)
yasminsalīlamasitonnatagaṇḍaśaila-
nāgaḥ karoti vikarālakarāvamarṣāt|
raktātapābhinavapallavabhaṅgamarka-
bimbālavālavalayasya dinadrumasya||36||
L
(yugmam)
yo 'bhraṃkaṣaṃ śikharamutkaṭapadmarāga-
rakṣaprabhāpaṭalapāṭalitaṃ bibharti|
saudāminīkapilakesaramālabhāri-
nīlābhrapatragaganotpalanāladaṇḍam||37||
yasya prabhāvipulahārahitaiḥ stanāgraiḥ
ślāghyā tribhirvalimukhaiḥ kṛtamadhyaśobhaiḥ|
lakṣmīṃ puraṃdhrijanatā maṇimaṇḍitaiti
sādhuśthitiśca munibhiḥ kaṭakāntareṣu||38||
pāścātyabhāgamavalokayatāṃ śaśāṅka-
bimbasya lakṣmamalaśūnyatayā parītam|
utsaṅgasaṅgimṛgatāgamikatvameti
tuṅgeṣu yasya śikhareṣu kṛtāspadānām||39||
ākṣiptacetasamanuttarasānutarṣa-
saccāṣakāntaracitasthitikesaraughaiḥ|
uttaṃsanīlanalinairiva yo bibharti
lakṣmīṃ nitambavalayaiḥ sapalāśacakraiḥ||40||
yasyopāntagataṃ niśāsu nayataḥ śyāmāśmaraśmicchaṭā-
saṃtānaiḥ śiśiratviṣaḥ puṭakinīpattraśriyaṃ maṇḍalam|
L
cakre ratnataṭeṣu kānanabhuvaścūḍāśaśāṅkaprabhā-
saṃkocapraviluptapaṅkajavanacchāyā bhramandhurjaṭiḥ||41||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye mandaravarṇano nāma caturthaḥ sargaḥ|