iti rātrimukhe samaṃ priyairghaṭamānāsu cakoradṛṣṭiṣu|
aparāḥ priyaviprayogato bhṛśamāsedurupaplutāṃ daśām||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
caturviṃśaḥ sargaḥ|
smarakārmukayaṣṭivibhramaṃ kuṭilā cāndramasī kalāvahat|
dadhati sma tadīritāḥ śarā iva tanvyāstadabhīṣavo vyathām||2||
na tadā tamaso 'bhavatkvacicchaśidhāmnaśca viśeṣadarśanam|
akarotsutanoryadandhatāṃ ciramasyā virahe vijṛmbhitam||3||
kusumeṣupṛṣatkapakṣajaḥ paridhunvanvirahāśuśukṣaṇim|
adhṛtadraḍhimāṇi subhruvāṃ hṛdayāntyāśu dadāha mārutaḥ||4||
ka ivaiti vipadvatīha no pratikūlatvamadoṣavānapi|
sudṛśo virahe 'mṛta(sravāḥ śaśibhāso)pa yadūhuragnitām||5||
pratibimbitavallabhākṛtau gurumūrchātimiraiḥ sma dūyate|
api cetasi dhūsarīkṛte śvasitairdarpaṇavattadāparā||6||
kusumaṃ nijabandhanādiva prasabhaṃ dakṣiṇamārutāhatam|
nyapatannijasaṃnieśataḥ sukumāraṃ kuṭilabhruvo manaḥ||7||
madanasya śarāsanāśrayāmaparāṃ jyāmiva kartumicchatā|
visatantutatistanau sthitā marutādhūyata vāmacakṣuṣaḥ||8||
pratipannasamāgamaṃ priye śramasaṃvegavaśādivāyatam|
hṛdayaṃ śvasiti sma nirbharaṃ gurucintābharabhārapīḍitam||9||
vijahīhi śucaṃ purā tava vyapayātyeṣa viyogasaṃjvaraḥ|
kṣaṇamāśvasihi vyapohituṃ vyasanaṃ dhīratayā hi śakyate||10||
cirakalavataṃsitotpalaspṛhayā mañjurutaiḥ paribhraman|
iti dhīrayati sma kāmapi śravaṇopāntamivaitya ṣaṭpadaḥ||11||
(yugalakam)
iha vallabhaviprayogataḥ praviśantyujjhitaśaṅkamādhayaḥ|
vyadhita vraṇitaṃ śaraiḥ smaro vivṛtadvāramitīva tanmanaḥ||12||
aviluptaparamparāsthitairdayitapremavimarṣavistaraiḥ|
kṛtatīrtha ivādhṛtistanoravatāraṃ kurute sma mānase||13||
asamāptavikalpasaṃkulasmarasaṃkalpanibaddhamālayā|
atidairghyabhṛteva subhruvaḥ sasṛpe bhāvanayānuvallabham||14||
na ca kārśyadaśāṃ natabhruvaṃ madano jyāṃ ca śarāsanāṭanim|
sumanaḥsukumāravigrahāṃ virarāmāpaghṛṇo 'dhiropayan||15||
kṛtacandanapaṅkacarcanāmaparāṃ tāpadhṛto vyadhuḥ kṣaṇāt|
guruśoṣakṛśāṃ sarojinīmiva sugrīṣmakabhaṅgavāsarāḥ||16||
sphuṭasaurabhasaṃpadāgatā madhupā niḥśvasitānilāṃstanoḥ|
papureva tadūṣmaviplutāḥ sukhamevādhikaduḥkhasādhanam||17||
niśitairaśarīramārgaṇairhṛdayasya kṣatimīyuṣaḥ kṣaṇāt|
śaśicandrikayāñcitabhruvaḥ paruṣaṃ kṣārarajaśchaṭāyitam||18||
virahānalatāpaviplavavyathayevāśu palāyanonmukham|
aparā hṛdayaṃ na pāṇinā gurucintānihitena nārudhat||19||
abhinanmadanastathā śaraiḥ sudṛśaścittaśaravyamutsukam|
na punaḥ pratisaṃdadhau yathā tadabhinnāṃśavinākṛterdhanuḥ||20||
taṭabhūmirivāparā babhau makarāṅgena vivṛddhimīyuṣā|
niśi locanaśuktisaṃpuṭacyutabāṣpodakabindumauktikā||21||
apanidramadhūkapāṇḍurā sudṛśo 'dṛśyata gaṇḍamaṇḍalī|
gamitāśrujalaplavairiva kraśimākīrṇatayātinimnatām||22||
surabhiśvasitānilāgatāḥ kṛtamūrchā madhupāyino 'parām|
anayanbhṛśamākulātmatāmuragāścandanakandalīmiva||23||
bhavanonnatacandraśālikāśayane dīrghaviyogabhītitaḥ|
prathamaṃ priyakaṇṭhavartinī niśi nidrāmabhajatkṣaṇaṃ na yā||24||
aparekṣitumāhitaspṛhā dayitaṃ svapnavitīrṇadarśanām|
bata tāmapi bahvamaṃstayattadaho kāryagatervicitratā||25||
(yugalakam)
abalatvamupeyuṣī tathā virahe kācidatābhyadutsukā|
vinimīlitapakṣmapīḍitaṃ kathamapyaśrujalaṃ yathāmucat||26||
pratimapatitāṃ sakhīva tāṃ gurutāpopaśamāya subhruvam|
vyadhitāntarupāgatārdratāṃ śaśikāntopalasālabhañjikā||27||
śaśino jaladherudīyuṣo gurutadgarbhaviṣāgnineva tām|
upagūḍhaśikhā marīcayo ghanamūrchākulitāṃ niśi vyadhuḥ||28||
vibhabhau ghanasārasaṃhatirnihitā snigdhasakhījanaistanau|
sudṛśo 'śrukadarthanābhayādgalitā gaṇḍatalādiva cchaviḥ||29||
smaratāpabhareṇa vibhramā na parimlānimavāpuradbhutam|
sudṛśastarupallavā iva smitapuṣpābharaṇojjvalaśriyaḥ||30||
karamarpitamānane dadhau smarajṛmbhāsu pidhānalīlayā|
galitāñjanadhūsaraṃ vadhūḥ śvasitaiḥ pluṣṭamivātanūṣmabhiḥ||31||
vinimīlitalocanāmbujā dadhatī kaṇṭakitāṃ tanutvacam|
nalinīva śaśāṅkaraśmibhirdrutamamlāyata kācidutsukā||32||
virahānala...................ṭattanuṭāṃkāra ivopaśuśruve|
śayanīkṛtaphullapaṅkajasphuṭapakṣmāspadaṣaṭpadāravaḥ||33||
dayitāgamane 'pi bhāvinīṃ sthitimālokya vikalpasaṃbhṛtaiḥ|
vidadhe pulakādibhistanau sakṛdabhyāsa ivāñcitabhruvaḥ||34||
vyajanīkṛtapadminīdalaskhalitairdūramivānilairvapuḥ|
samupodvalito mṛgīdṛśaḥ saviśeṣaṃ madanānalo 'dahat||35||
lulitālakavallarīkatāṃ dadhatā pāṇitale niṣeduṣā|
aparākhyadanālapantyapi smarasaṃtāpadaśāṃ mukhendunā||36||
śaśabhṛnmaṇihārayaṣṭayo na śamāyotpalacakṣuṣo 'bhavan|
smarasaṃjvaraśoṣitocchalacchaviviṣyanditavāribindavaḥ||37||
virahe mṛgaśāvacakṣuṣāmayugāntapralaye vijṛmbhite|
navapaṅkajakomalaṃ yayāvahimāpātavivarṇatāṃ vapuḥ||38||
dayite cirayatyanukramādviyadāskandati candramaṇḍale|
bhṛśamutkalikākulā muhurmumuhurmūḍhamanorathāḥ striyaḥ||39||
jagrāha nūnamatuṣāramarīcibimba-
madhyapraveśanapunaruktivaśotthamauṣṇyam|
yadviprayuktataruṇījanadehadāha-
m induḥ spṛśankaraśikhāvalibhiś cakāra||40||
āścaryametadasamaṃ makarandabindu-
saṃdohavarṣibhirapi prasavātmakairyat|
vāmabhruvāṃ virahaviplutacetanānāṃ
saṃśoṣyate tanuraho viśikhaiḥ patadbhiḥ||41||
digdhā ivodadhiviloḍanavibhramottha-
lakṣmacchalocchalitahālahalacchaṭābhiḥ|
mūrchāṃ vyadhuḥ śaśabhṛtaḥ kiraṇāḥ sudhāmbu-
viṣyandino 'pi virahāturasundarīṇām||42||
nṛṣṭiṃ navāṃ rasamayīṃ vikiratyamanda-
mātaṅkadāyini śaśāṅkaghane ghanorvāḥ|
L
sthūlāśrubindukaṇamauktipaṅktirāvi-
rāsīnnirāyatavilocanaśuktigarbhāt||43||
anyādṛgapyaparathaiva janasya nūnaṃ bhāvasthitirbhavati viplutacittavṛtteḥ|
naktaṃkarasya kiraṇāḥ sudhayā yadārdrāḥ preyoviyogavidhurāstaruṇīradhākṣuḥ||44||
vikṣiptavellahalabāhulatāḥ karābja-
raktāṅgulīdalamarīcimadhucchaṭābhiḥ|
tāḥ saṃvibhāgamiva paṅkajasaṃstarasya
saṃtāpaśuṣkamakarandakaṇasya cakruḥ||45||
niḥśvāsamārutaparāhatapuṇḍarīka-
paryaṅkapiṅgalaparāgakaṇāpadeśāt|
reje viyogaśikhibhītipalāyamāna-
gaurātmadehaparamāṇugaṇeva kācit||46||
srastā bhujābjaśayanānmaṇikuṭṭimastha-
raktāravindamukhalagnanakhāṃśulekhā|
udgrīvahaṃsaśiśucuñcuvikṛṣyamāṇa-
sūtrā mṛṇālakalikeva tanorabhāsīt||47||
tanvyāḥ śaśāṅkaśakalaṃ pratibimbitaṃ sa-
dacche kapolaphalake vidadhāra lakṣmīm|
cetonimagnaniśitasmarabāṇaśalya-
niṣkarṣaṇānihitakaṅkamukhāyamānam||48||
śayyīkṛtaikakarapaṅkajasaṃniṣaṇṇa-
macchaṃ kapolaphalakaṃ vidadhāra kācit|
L
saṃdhukṣitasmarakṛśānuśikhāśatasya
roddhuṃ ruṣeva śaśinaḥ pratimāvakāśam||49||
itthaṃ visaṃsthuladaśāḥ sudṛśo babhūvu-
rindūdayalollasitaratnanidhau pradoṣe|
ujjṛmbhamāṇaramaṇaprathamānurāga-
mānapravāsavidhurasthitivipralambhāḥ||50||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye virahavarṇano nāma caturviṃśaḥ sargaḥ|