sthito 'tha saudhonnatacandriśālikātale vibhuḥ klṛptamahārghasaṃstare|
iti priyāmaṅkagatāmabhāṣata kṣapākarasya śriyamīkṣya hāriṇīm||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
ekaviṃśaḥ sargaḥ|
ito 'dhunāviṣkṛtalakṣma lakṣyatāṃ niśākarasyotthitamatrilocanāt|
vibhāti tanvaṅgi tadīyatārakatviṣāvalīḍhodaravartma maṇḍalam||2||
vidhitsunā kelimivodayaśritā nijaprabhākuṅkumavāsamuṣṭibhiḥ|
parāhataṃ pakṣmalameṇalakṣmaṇā nimīlayatyambujanetramabjinī||3||
sphuṭaṃ parāsekaparāṅmukhātmanaḥ sthirā vibhūtirvimalasya jāyate|
sthitaṃ jagadvyāpya tathāhi tāmasaṃ natāṅgi niḥśeṣitametadindunā||4||
asau śaśāṅkaḥ kurute samunnatāḥ kumudvatīnāṃ kumudastanāvalīḥ|
nijaprabhāhāralatāvibhūṣaṇāḥ ṣaḍaṅghrikālāgurupattrabhaṅginīḥ||5||
vigāḍhatoyaḥ pratimāchalādasau navo 'ruṇatvaṃ gamito nu candramāḥ|
madhucchaṭāśīkaravārivarṣibhiḥ kumudvatīkairavahastasaṃpuṭaiḥ||6||
dadhatyamūrmilitapaṅkajekṣaṇāḥ kṣaṇādavaśyāyakaṇaiḥ karālitāḥ|
kuśeśayinyo dayitārkabhāvanāsamucchalatsvedajalā iva śriyam||7||
niśākṛtā bimbamukhena pāṭalaprabhāsavaṃ prattamasau kumudvatī|
apāvṛtottānitakairavānanā ciraṃ natabhrūḥ pibatīva saspṛham||8||
vidārya daṃṣṭrāṅkurakomalatviṣā niśāndhakārādrikulaṃ svalekhayā|
bibhartyasāvādivarāhavibhramaṃ sadā tu lakṣmodvahanena candramāḥ||9||
anena te pūrṇakapolabhittinā ka eva vaktreṇa kṛśodari smayaḥ|
bibharti lakṣmīṃ pratimāsamutthitaṃ niśākarasyedṛśameva maṇḍalam||10||
mṛṇālinīndoḥ spṛśataḥ karaiḥ krudhā vivartayantīva ku'seśayānanam|
bibharti pṛṣṭhāgatayā kṛtaśriyaṃ dvirephaveṇīlatayāmbujastanam||11||
sphuṭaṃ patantī śaśicandrikāmbudhau niśāgame 'pīyata śuktisaṃpuṭaiḥ|
kuto nu tābhyo 'mbudamuktāvāriṇo vipāṇḍumuktāphalasaṃbhavo 'nyathā||12||
niśākare kesaradhūlikuṅkumacchaṭāpiśaṅgāgrakare viśeṣakam|
vidhitsatīva ślathabhṛṅgamaṇḍalībhrūvā sthitaṃ kairavakānanaśriyā||13||
kumudvatī kairavahastamucchvasaddalāṅgulīkaṃ śriyam eti bibhratī|
avāptapārśvasthitabhṛṅgamaṇḍalīkṛtāvanaddhāsitakambuvibhramam||14||
adhikṣapaṃ lakṣitakāminīmano manobhavasya kṣipataḥ śilīmukhān|
tadīyapakṣāvalisaṃbhṛtā iva krameṇa śītāḥ prasaranti mārutāḥ||15||
śilīmukhaiḥ śekharasaurabhāhṛtairbhramadbhiretyopari baddhamaṇḍalam|
śriyaṃ cikīrṣadbhirivābhisārikāḥ svakāntaveśma sthagitāḥ prayāntyamūḥ||16||
vyadhāyi saṃkocavidhūsarendunā kimityasau svādurapui padminī|
itīva taṃ nindati ṣaṭpadaḥ svanaiḥ sadānukūle hi jano 'nurajyate||17||
kumudvatīnāṃ pratibimbitāṃ jale vijihmavīciśrutipāśamadhyagām|
adaḥ sphuranmaṇḍalaśaṅkhapattratāṃ bibharti suśroṇi mṛgāṅkamaṇḍalam||18||
mṛṇālinīnāṃ nibiḍīkṛtāruṇacchadāṅgulīdanturacārukoṭibhiḥ|
pinahyate 'mbhoruhapādamaṇḍalairdvirephamālāmaṇinūparāvaliḥ||19||
kumudvatībhirmakarandakuṅkumacchaṭāpiśaṅgāmbuvipūritodaraḥ|
savibhramaṃ kairavaśṛṅgakotkaraḥ kṣapākaraṃ hantumiva vyudasyate||20||
nabhaḥsamudrodaraphenasaṃhatirnagendranāgādhipabhūticarcikā|
niśīthinīkalpalatāṃśukāvalirniśākarasya śriyam eti
candrikā||21||
iti smaroddīpini candraśekhare vibhurvivṛtte samaye svasaṃnibhe|
himādrikanyāmabhidhāya sādaraṃ sa sāṃdhyavelāvidhitatparo 'bhavat||22||
avandatānanditamānsastatastanuṃ sa saṃdhyāmaravindajanmanaḥ|
murārinābhīhradapadmaviṣṭaraprakīrṇareṇucchuraṇādivāruṇām||23||
apāvṛtauṣṭhāntaralabdhanirgamairjapakriyāyāṃ daśanāṃśumaṇḍalaiḥ|
babhau śiraśchidrapathapraveśibhiḥ surasravantyā iva dhūrjaṭirjalaiḥ||24||
udagranāsāviniṣṭacakṣuṣaḥ piśaṅgapakṣmāvalimelanakramāt|
sarocanārekhamivāsya vahnimallalāṭapaṭṭaṃ vidadhe vilocanam||25||
nibaddhapadmāsanapādapaṅkajasphuṭāruṇottānatalapravartitaiḥ|
vilupyamānātanukaṇṭhamaṇḍalaprabhāndhakāracchaviraṃśurāśibhiḥ||26||
avāptanābhivyatiṣaṅgavisphuratprabhāruṇottānakarāmbujadvayaḥ|
sthirāṃsapīṭhaḥ sa samādhigocaraṃ cirāya dadhyau kimapīnduśekharaḥ||27||
(yugalakam)
vyatītasaṃkhyātigapaṅkajāsanavyapāśrayāmbhoruhabījanirmitam|
nijākṣasūtraṃ nijamudrayā japankarāntareṇābjarucaṃ vyavartayat||28||
vilokayantī girirājakanyakā tathā ca taṃ dhyānanīilitekṣaṇam|
babhāra saṃdhyātaparāgapāṭalāmivonmiṣatkopakaṣāyitāṃ dṛśam||29||
samanyuniḥ śvāsasamīraṇoṣmabhiḥ kadarthyamānāruṇadhūsarādharā|
dvirephamālāṅkitamugdhapallavāṃ vasantalakṣmīmatha sā vyaḍambayat||30||
samāptasaṃdhyāvidhirīśvaro 'pi tāṃ vilokya koṣātparivṛtya tasthuṣīm|
rasārdragarbhairbahusāntvanakramaiḥ prasādayāmāsa cireṇa sasmitaḥ||31||
madhūpanītaṃ jayayā niśākaraprabhāvataṃsaṃ samayajñayā tataḥ|
vinidrakalpadrumasūnasaṃbhavaṃ kramādamuṃ pāyayate sma sasmitaḥ||32||
kapolabhāgena sadāruṇatviṣā jahāra cetaḥ śaśiśekharasya sā|
vipākapiṅgena phalena bibhratī lateva raktādharapallavā śriyam||33||
tayā viyuktāṃ kila kokakāminīṃ vilokayantyā bhavanābjinīgatām|
bhayācyatāśaṅkitaviprayogayā śarīrabhāgasthitiminduśekharaḥ||34||
tayā samaṃ so 'pi viyogabhītimānnyveśayattāṃ tanusābhisīmani|
prakarṣataḥ premaguṇasya nāsti tanna vallabhasya kriyate yadīpsitam||35||
kathaṃ nu saṃdhyānatiṣu prayokṣyate kareṇa me matsarakhinnamañjaliḥ|
śiraḥsthagaṅgājalaśīkaracchaṭā tuṣāraśītāpi na māṃ na dhakṣyati||36||
iti priyasyārdhaśarīrasaṃsthitau kṣaṇaṃ vikalpākulamānasā satī|
babhūva tatsaṃśrayakātarā punarna gaṇyate premaṇi doṣadūṣaṇam||37||
(yugalakam)
vimuktapārśvasya bhujaṃgaśekharasphuratkaṇāphūtkṛtakātarairiva|
kirīṭacandrasya marīcimaṇḍalaiḥ piśaṅgajūṭāntarapuñjitaiḥ sthitam||38||
vidhuṃtuḍopaplutabhāgavisphurannavārkabimbopamamagnipiṅgalam|
vilīnabhāgāntaramiśramūrdhvagaṃ vibhāti cakṣurdadhadardhatārakam||39||
niveśitasyāntarasīmni cakṣuṣo nimīlitārālakarālapakṣmaṇaḥ|
vidhīyate bhāvanayaiva tatkṣaṇaṃ priyānanāmbhoruhadarśanotsavaḥ||40||
lalāṭalekhāvalibhaṅgamuccakaiḥ samāsajantyāntaravartmani bhruvā|
manorathārūḍhaharekṣaṇakriyā savibhramotkṣepadaśā nivedyate||41||
apāṅgbhāgaṃ rabhasādapāśritaḥ salīlamabhyāsavaśena tārakaḥ|
adṛṣṭakāntānanakhedamantharaṃ kathaṃcidevotkatayāpi vartate||42||
prasaktatāmbūlakalaṅkadhūsarāṃ śriyaṃ dadhatyādharamadhyalekhayā|
sphuṭeva mūrtidvitayasya peśalā vibhāgasīmā saralā viracyate||43||
stanasya romāñcabharāvalambinaḥ śarīrabhāgaṃ viśato 'numīyate|
vilocane mīlitapakṣmasaṃpuṭe manoramasparśasukhodayotsavaḥ||44||
niṣiddhadehārdhaniveśavibhramaṃ kṛśatvayogaṃ prati baddhakopayā|
sabhaṅgurabhrūlatayeva kevalaṃ balicchalānmadhyabhuvā vyavasthitam||45||
manoramāntarviniveśanirvṛteravāptavistāraguṇodaye 'dhikam|
nitambabhāge maṇimekhalāguṇo bhareṇa vicchinnaguṇaḥ patatyadhaḥ||46||
iti priyasyācalarājakanyayā śarīrabhāge kṛtasaṃniveśayā|
jagatsu saubhāgyaguṇairanyagairvyajīyatāśeṣanitambinījanaḥ||47||
(daśabhiḥ kulakam)
ekatra pannagamayī sajalābhranīla-
cchāyā kaṭīrakataṭe kṛtasaṃniveśā|
vyāvartitakaṇṭhakuharāspadakālakūṭa-
toyāśayasrutivilāsamadhatta kāñcī||48||
śobhāṃ babhāra jaghane glapitāndhakara-
manyatra ratnaraśanā madhuraṃ raṇantī|
lāvaṇyakāntisarasīpulināyamāna-
vistāraśālijaghanasthalahaṃsapaṅktiḥ||49||
adhyūru śītakiraṇābharaṇasya kāntiṃ
kalmāṣamāpa mṛgacarma viṣajyamānam|
L
bibhratkirīṭaśaśidarśanabaddharāga-
tārādhṛtāgatasitetarapakṣmalakṣmīm||50||
visargasūkṣmacchaviśāramambaraṃ vicitrakāñcīguṇaratnaraśmibhiḥ|
vilagnamanyatra sa pañcarāgatāmivodvahaccāru taraṅgitaṃ babhau||51||
parasparapremavijṛmbhito 'nayościrāya yogo 'stu śarīrabhāgayoḥ|
dadhau tulākoṭikaśiñjitacchalāditīva gaurīcaraṇastadāśiṣam||52||
nṛtyatparikramabharānatabhūmipīṭha-
niṣpiṣṭaratnaśirasaṃ khalu mā kṛthā mām|
bhasmāvadāta iti śeṣa ivendumaule-
rbhogī babhau kaṭakitaścaraṇāgralagnaḥ||53||
sevāgatāmṛtakarapratibimbgarbhaṃ
vakṣaḥsthalārdhamabhṛtonnatamindumauliḥ|
antaḥpraveśaparimaṇḍalalakṣyamāṇa-
gaurīpayodharamivācchatayā parītam||54||
saṃdhyāhitotsavavikāsamahīnakāñcī-
dāmābhirāmamaniśaṃ vikaṭākṣavaktram|
lakṣmīmanuttamahimāṃśukalāñchitaṃ sa-
dāviścakāra śivayorvapurityabhinnam||55||
anyonyamanmathasukhānubhavānubandha-
niḥspandamīlitavilocanayostadānīm|
L
ceṣṭāstayorudabhavannavibhinnacitta-
saṃtānaparyavasitā vinibaddhavācaḥ||56||
iti rasapoṣayuktimadanujjhitavṛtti guṇavyapāśrayaṃ
prathitaśubhāṅgalakṣaṇamapūrvakṛtipravaṇātmatāṃ dadhat|
kaviriva nāṭakaṃ ghaṭitasaṃdhi vidhāya śaśāṅkaśekharaḥ
śikharisutārdhamardhavapuṣi pramadānvitamānaso 'bhavat||57||
itthaṃ bhūyo viyogajvaravisaradaśopaplavacchedahetoḥ
spaṣṭapremānubandhaṃ sthitavati dayitādeharatnena miśre|
harṣotkarṣānnipeturvapuṣi purariporekalakṣyāstadānī-
mārścaryodvṛttatārāḥ pravikasitapuṭā dṛṣṭayaḥ pārṣadānām||58||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye gaurīśvaradehārdhavarṇano nāmaikaviṃśaḥ sargaḥ|