lakṣmīṃ dadhāvudayaśailatirohitendu-
drāghiṣṭadīdhitiśikhābhujamañjarīkā|
bhauracchaviḥ surapaterath dikkrameṇa
nīlaprabhaṃ timirakañcukamutkṣipantī||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
L
L
L
L
L
L
L
L
L
L
viṃśaḥ sargaḥ|
utpitsati sma divamabdhisarovagāha-
grastocchvasattimiraśevalavallarīkā|
velāvikīrṇamaṇiśuktiśatacchlen
potairiva vyanusṛtā śaśimūrtihaṃsī||2||
garbhīkṛtaurvaviṣamānalatāpadāha-
mūrcchānubandhaśamanopakṛtena tena|
tatkālatālatarutuṅgatarormiṇendu-
ranvāyi dūramiva saspṛhamabdhinārāt||3||
bibhratsalakṣya jaladhestalabhāgalagna
paṅkacchaṭāṅkamiva bimbamanuṣṇaraśmiḥ|
śyāmākalindatanayājalabudbudāccha-
tārāgaṇastabakitaṃ viyadārurukṣata||4||
vicchāyatāmakṛt yo mama bharturindo-
raṃśucchaṭābhirudayannavadhūya bimbam|
paśyāmi bhānumudadhau patitaṃ tamadri-
śṛṅgeṣvitīva navacandrikayādhyarohi||5||
tāvattiraskṛtakuśeśayakhaṇḍakānti-
niḥspandatārakaniśāmukhavartinīndoḥ|
L
vispaṣṭāpāṭalima śailaśikhāśicumbi
saṃdhyā sudhāvisaravarṣi lileha bimbam||6||
ākṣiptatāmarasakānanacakravāla-
bhābhiḥ kramādudayaśailatirohitaśrīḥ|
indurniśatimiramaṇḍalabādhyamāna-
māśiśvasajjagadivordhvamukhairmayūkhaiḥ||7||
bhāti sma pakṣmakuṭilodayaśailaśṛṅga-
bhāgāspadābhinvakuṅkumapaṅkagaurī|
abhyāpatanmadanakūbaricakraśīrṇa-
māṇikyanemiśakalākṛtirindulekhā||8||
rejetarāmudayaśailaśikhāśrimūla-
lagnātha bhagnatimirā kuṭilā kalendoḥ|
raktāruṇā namucikaṇṭhavivartamāna-
phenacchaṭāvalayavibhramamāvahantī||9||
vispaṣṭalakṣmaśabalīkṛtamadhyabhāga-
bimbārdhatāmadhipatirdadhadoṣadhīnām|
viṣyandidānajalaśīkaraśāritābhra-
mātaṅgakarṇaśikharākṛtirāvirāsīt||10||
apsargavibhramabhṛti stimite 'ndhakāra-
rāśau diśaḥ sthagayati sphuṭapaṅkapīne|
uttiṣṭhaducchvasitakuṅkumakoṣagaura-
mālakṣyate sma kanakāṇḍamivendubimbam||11||
vyaktāvacūlakaluṣodaramindubimba-
mābaddharāgamudayādrigataṃ vyarājat|
saṃvādinirgataviriñcavibhinnamadhya-
vaikuṇṭhanābhinalinotthitabījakoṣam||12||
ābaddharāgamudagādudayādrimūrdhni
naisargikīṃ dhavalatāmapahāya bimbam|
nirdhutakesaraparāgavilaṅghyamāna-
nidrāvibhuktakumudacchadagauramindoḥ||13||
cetoharasphuritakesaradantahāsa-
mudvīkṣitāḥ kumudinībhiradhipradoṣam|
rejuḥ kadarthanabhayādaravindavṛnda-
kāntyāśritā iva navoditacandrapādāḥ||14||
vispaṣṭacihnamudayādriviṭaṅkakūṭa-
saṃghaṭṭajarjaratayeva saradhramindoḥ|
bimbaṃ krameṇa vigalannavasāṃdhyarāga-
raktacchaṭaṃ nabhasi pāṇḍuratāmayāsīt||15||
nidrāvimuktanavatindukapāṇḍubhāsi
bimbe prasusruvuṣi nākanadīṃ himāṃśoḥ|
chāyā śriyaṃ hariṇalakṣmamayī babhāra
niryatkalindatanayājalaveṇikāśrīḥ||16||
pratyagralakṣmamalinodarakānti bimba-
mindurbabhāra navakundadalāvadātam|
vakṣo halīva dṛḍhadhenukapaścimārdha-
preṅkhatkhurāgraśikharollikhitavraṇāṅkam||17||
lakṣmacchalopahitapīvarapaṅkapiṇḍa-
kalmāṣamadhyamatanupratibimbamindoḥ|
lakṣmīṃ dadhāvadhijalaṃ ghaṭamānahāri-
rūpaṃ bhramatsarasi kālakulālacakram||18||
kalmāṣitaṃ śaśakalaṅkalavena madhya-
bhāge babhāra paripāṇḍuramindubimbam|
vistrastamecakagajājinapallavāgra-
candrāvataṃsaśucibhasmasitāṃsalīlām||19||
bhāti sma madhyaghaṭitāspadakālakūṭa-
sacchāyalāñchanaruciḥ pariṇāhibimbaḥ|
kṣīrāmburāśiriva mandaraśailamūla-
līlāvivṛttiparimaṇḍalitaḥ śaśāṅkaḥ||20||
vispaṣṭacihnamacakādudayādrilagna-
mālekhyabhittiphalakaṃ smaradevatāyāḥ|
tadvibhramāhitamaṣīmalapaṅkavarti-
vinyastapattramakarāṅkamivendubimbam||21||
abhrājatānilavilolitasāṃdhyarāga-
piṅgīkṛtābhraśikharakṣaṇalabdhasaṃstham|
L
śītāṃśubimbamuragāśananīyamāna-
māṇikyabhāsurasudhākalaśābhirāmam||22||
pratyagrapakṣaghaṭanena niśāvatāra-
rāmeṣuṇā sapadi vāsarakrauñcakuñje|
nirdārite sphuṭamayukchadanacchadācchā
nirgacchati sma śaśidīdhitihaṃsapaṅktiḥ||23||
aurvāgnihetiparimarśavilīnamadhya-
bhāgo nu sindhujaṭharāduditaḥ salakṣmā|
karpūracūrṇarucicārumarīcikurca-
nirdhautadikkamarucatkaṭhinetarārciḥ||24||
unnidrakundadhavalagrahacakravāla-
puṣpotkarā bhuvanakananasīmni reje|
śyamālatā hariṇalakṣmamiṣeṇa candra-
bimbālavālavalayādiva niṣpatantī||25||
saṃvādameṣyati mamāgurupaṅkadigdha-
pattrāvalīśabalagaṇḍapuraṃdhrivaktraḥ|
kalmāṣitaṃ kimamunāpi na bimbameta-
dutprekṣya lāñchanamitīva babhāra candraḥ||26||
āśritya śītarucinā sakalena jāti-
sāmānyamutthitavatā nayanānmaharṣeḥ|
ānandabhārabharamantharatā vyadhāyi
tatpakṣapātarabhasādiva locanānām||27||
śiñjāravaṃ sapadi mantramudīrayansvaṃ
naktaṃmukhe vighaṭamānapalāśayantram|
saṃrabhya sādhaka vighaṭamānapalāśayantram|
saṃrabhya sādhaka ivāttarasopabhoga-
mabhyāvi'satkumudagarbhagṛhaṃ dvirephaḥ||28||
apāṇḍudīdhitiśikhānikarāvakīrṇa-
vistīrṇabimbapariṇāhatayā himāṃ"uḥ|
unmūlitāmbarasarijjalalagnapadma-
nālāvakīrṇasurakuñjaravibhramo 'bhūt||29||
kṣīrodavīcidhavalairnijabimbabhāgbhi-
rabhrājatābhrasaraṇaiḥ kiraṇaiḥ śaśāṅkaḥ|
saṃkocanābhayamivārthayituṃ saroja-
khaṇḍasya komalamṛṇālaśatairvilanaiḥ||30||
lāvaṇyakāntiparimṛṣṭakalaṅkalekha-
maprāptapattraracanāsu vilāsinīnām|
chāyāgataṃ navamadhūkavipāṇḍurāsu
gaṇḍasthalīṣvadhikamaśvitadidubimbam||31||
jyotsnātupāranikarasthagitāntarikṣa-
diṅmaṇḍalaḥ śiśirakāla ivāmṛtāṃśuḥ|
āliṅganānyaśithilāni diśanpriyāṇā-
makleśayannavakuśeśayakhaṇḍakāntim||32||
bhittvā viṣāñjanamivāśu dṛśāṃ vighāta-
hetuṃ niśātimiravṛndamanindyarūpaiḥ|
L
saṃdānitacchadapuṭāni karairamanda-
mindorakhindata kulānyaravindinīnām||33||
saireyakastabakanīlamathāndhakāra-
mutsṛjya bhogamalināmbaranirviśeṣam|
saṃvivyurāśu kakubhaḥ kaladhautagaura-
minduprabhāpaṭalakalpalatādugūlam||34||
abhyudgate śaśini śaṅkhadalāvadāta-
preṅkhanmayūkhakhacitāmbaradigvibhāge|
tāpicchanīlamabhavadvivarānusāri
vaibhāvaraṃ vigaladambha ivāndhakāram||35||
bhānorasaṃnidhivaśāttimireṇa sārdha-
mahnāya saṃgatimavāpya kumudvatībhiḥ|
candrodaye kumudakukṣigatāstadīya-
garbhadviṣaḥ sukhamasāviṣata dvirephāḥ||36||
śiśrīṣubhistanuvikāsadalatpalāśa-
koṣāḥ śanaiḥ kumudinīrnabhasi bhramadbhiḥ|
candrāṃśujarjaritaśeṣaghanānubandha-
naiśāndhakārasadṛśairatami dvirephaiḥ||37||
lokāntarāśrayiṇi gharmaghṛṇau krameṇa
yairutthitairbhuvanamūrṇunuve tamobhiḥ|
tānīndureva vicakāra karotkareṇa
sādhāraṇatvarahitā mahatāṃ hi śaktiḥ||38||
hitvā śanaiḥ śitimiva tvacamandhakāra-
cchāyāṃ ni'soḍupaṭalasphaṭikākṣasūtrā|
gaurī babhūva rucirāgurupaṅkapatra-
sacchāyalakṣmaśaśimaṇḍalagaṇḍabhittiḥ||39||
sparśotsavaṃ vidadhatībhiramandarāga-
maṅgāni manmathavatāmiva sundarībhiḥ|
jahlādire kumudinīvipināni gāḍha-
māliṅgitāni śaśidīdhitimaṇḍalībhiḥ||40||
utsāritasya taraṇeḥ kiraṇacchaṭābhi-
rindoḥ karaiśca tamaso 'bhihatasya naktam|
vispaṣṭacāruracanāḥ surasundarīṇā-
mālambanatvamagamanniva keśahastāḥ||41||
bhindansudhānivahavāhibhirandhakāra-
maṃśūtkarairudajihīta ca śītaraśmiḥ|
saṃkocaduḥkhamaharacca kumudvatīnāṃ
santaḥ parārthaghaṭane nahi vighnanighnāḥ||42||
āluṅkhitā dalitaśaṅkhavipāṇḍurābhi-
rindoḥ prabhābhiratha kairavapadmakhaṇḍāḥ|
unnidrabaddhadalakuṅmalanīḍalīna-
dīnadvirephapaṭalāḥ parito babhūvuḥ||43||
saudheṣu śītakiraṇasya karacchaṭābhi-
rāpāṇḍurābhirabhitaḥ pratipheluṣībhiḥ|
L
paryastasāndrabhujatāryatamaḥprabandha-
mandhaṃ jagatpunarayujyata cakṣuṣārāt||44||
ādāya dagdhabahalāgurudhupadhūma-
paṅkaṃ kapolaphalakeṣu surāṅganānām|
pattrāṅgulīriva rasārdratayā vidhitso-
rindorgavāks.avivareṣu karā nipetuḥ||45||
lakṣmīṃ dadhuḥ śiśiraraśmiruco gavākṣa-
niryūhaniryadasitāgurudhūmaśārāḥ|
paryastamandaravighurṇitadugdhasindhu-
viccicchaṭā iva pariplutakālakūṭāḥ||46||
srastāndhakāravasanāṃ rajanīpuraṃdhri-
māliṅgati priyasudhāstruti diksakhībhiḥ|
dūraṃ mṛṇālaśakalāmalatanmayūkha-
hāsacchaṭāñcitamukhībhirivāpasastre||47||
saṃkocajihmitakuśeśayakośadhauta-
kauśeyakomalaśaśāṅkaruco 'vakāśāḥ|
rejurdiśāmadhiniśaṃ viśadaprakāśāḥ
kāśā ivopaśaradaṃ śamitāndhakārāḥ||48||
sārdhaṃ krameṇa kakubho 'tha kumudvatībhi-
rucchvāsalābhaviśadasthitidūradṛśyāḥ|
prāptā vikāsamacakāsiṣuraindavībhi-
raṃśucchaṭābhiravadhūtaniśāndhakārāḥ||49||
līlānipītabharamūrchitakairavīya-
khaṇḍacchadacchaviriva cchuritāmbaraśrīḥ|
L
indordudhāva dhavalaḥ kalakaṇṭhakaṇṭha-
kālāndhakārakaluṣāḥ kakubhaḥ karaughaḥ||50||
pratyagrapītanavakairavakhaṇḍalakṣmī-
lāvaṇyakāntibhirivātanupāṇḍimābiḥ|
kīrṇā diśo dalitasaṃtamasānubandha-
mindoradīpiṣata dīdhitidīpikābhiḥ||51||
diksundarīghanapayodharabhāratāra-
hārāḥ sudhāsrutikarālamaṇipravālāḥ|
bhittvā śanaistimiramañjanapuñjanīla-
mānuñjurindukiraṇā jagadañjasārāt||52||
pauraṃdarīṃ diśamapojjhya viluptarāga-
saṃpatkṣaṇājjiamiṣatyadhunā pratīcīm|
anyāḥ prasādayati nirjitapuṇḍarīka-
śobhāgrapādapatanaiḥ kakubhaḥ salīlam||53||
naiśānilāhatiparasparaghaṭyamāna-
saṃphullakairavatayālikulapraṇādaiḥ|
uktveti hastatalatāḍanayeva naktaṃ
naktaṃcaraściramahāsi kumudvatībhiḥ||54||
(yugalakam)
indīranīrakaṇakaṇṭakitā vikīrṇa-
parṇā vavurdalitapaṅkajakuṅmalāgrāḥ|
śītā niśīthamaruto nibhṛtadvirepha-
śephālikākusumanirbharagandhavāhāḥ||55||
bhāti sma mārutavidhūtapalāśarandhra-
labdhapraveśaśiśirāṃśumarīciśārām|
chāyāṃ vineśuṣi ravau dadhatī tarūṇāṃ
saṃvītacitramṛgacarmapaṭeva bhūmiḥ||56||
pratyagraphenadhavalā nabhasi prasastru-
rullaṅghitoḍunikarāḥ śiśirāṃśubhāsaḥ|
udraśmiratnasikatākaṇacakravāla-
mandākinījalataraṅgaghaṭāyamānāḥ||57||
preṅkhatkaṭhoraśatapattrapalāśamūla-
pāṇḍakṣapākaramarīcivilaṅghitā dyauḥ|
uttambhanākulajagatkṣayakālakola-
daṃṣṭrā prakāśadhavalakṣitivibhramābhūt||58||
bhāti sma saṃvalitatārakacakravāla-
candrātapacchuraṇapāṇḍuramantarikṣam|
bibhrajjarājaraṭhajihmagadīrghabhoga-
muktasphuradvikaṭakañcukapaṭṭalīlām||59||
nirdhautatārataruṇacchavitārakaugha-
kalmāṣitena nabhasā bibharāṃbabhūve|
niḥśeṣaśoṣitajalaplavapaṅkagarbha-
dṛśyāvarugṇabisakandajalāśayaśrīḥ||60||
jihmīkṛtābjanayanaṃ śvasanānubandha-
kampākulasthiti vipāṇḍuratāṃ dadhatyā|
saṃkocamāpa jarayeva kṛtāvamarśa-
mindutviṣā kamalakānanacakravālam||61||
candraprabhāmukulitaṃ salilātirikta-
nālaṃ sasarpa kamalaṃ niśi cakravākī|
ābibhratī hṛṣitapakṣmatanūruhaika-
pādasthitonmukhavidūragakāntaśaṅkām||62||
āplāvitāvanitale navacandrikāmbu-
pūre nimagnamatha kairavacakravālam|
uttāralagnamiva mandasamīrapāta-
pāriplavīkṛtapalāśabhujaṃ vyarājat||63||
vaikuṇṭhaśaṅkhadhavalābjavibhedakuṇṭha-
sotkaṇṭhakairavakarālakarotkarenduḥ|
śyāmeti rātriragamatsphuṭamarthaśūnya-
paryāyatāṃ kṣatatamaḥparipāṇḍuraśrīḥ||64||
paryāptajṛmbhaṇabharasphuṭanānubandhi-
pattrāṅgulīnikarakairavacāruhastā|
utkṣiptaṣaṭpadaghaṭāmukharomarāji-
rinduṃ vilokya sahasā kumudinyathāsīt||65||
indoḥ karairatanukausumasaukumārya-
bhāgbhirmanobhuva iveṣubhirāhatābhiḥ|
udgīrṇagandhakumudānanamūḍhanaiśa-
gharmodabindubhirajṛmbhi kumudvatībhiḥ||66||
ścyotatsudhāśiśiranirjharaśīkarārdra-
candrāṃśurāśiparimṛṣṭakarālakoṣāḥ|
padmākarāḥ sapadi saṃcukucurniśītha-
śītārditā iva dalāmbarasaṃvṛtāṅgāḥ||67||
preyaḥ samāgamasukhārdrapuraṃdhrinirya-
dānandabāṣpakaṇikāśiśiro nabhasvān|
bandhakramādhigatatānavatāratamya-
saugandhikotthaghanasaurabhasaṃpadāsīt||68||
niḥśeṣameva surabhiṃ mama kopagandha-
māvāndinakṣayamarunmama maiṣa moṣīt|
itthaṃ bhiyeva kamalaṃ kalayāṃcakāra
saṃkocasaṃkaṭaviśaṅkaṭakuṅmalatvam||69||
spṛṣṭā na yā dinakarāṃśubhirahni vahni-
garbhairapi kvacana caklamurambujinyaḥ|
mamlustarāṃ śaśikarairapi tāḥ sudhārdrai-
rakṣuṇṇavāmacaritā bata padmanetrāḥ||70||
pātuṃ madhūnyadhikumudvati baddharāga-
muddhūtapakṣati madhuvratamutpatantam|
śliṣyatsarojadalasaṃpuṭapīḍitāṅghri-
mīrṣyāvaśādiva kuśeśayinī babandha||71||
sādhyaṃ na tajjagati yanna kalāvato 'sti
candraḥ karaiḥ sakaladiṅmukhakarṇapūraiḥ|
viṣyaṇṇavārivisarāḥ parito nināya
yaccandrakāntadṛṣado 'pi tadārdrabhāvam||72||
saṃkocadhūsaramakāri sarojakhaṇḍa-
magre yadasya śaśinā paripīḍya pādaiḥ|
tena sphuradvikaṭakesaradantapaṅkti
toṣādivātiviśadaṃ kumudaṃ jahāsa||73||
saṃdhukṣitāsamaśareṇa karairavāpta-
nidrā satī kumudinī śaśināvamṛṣṭā|
huṃkāriṇīva bubudhe kumudodarastha-
kūjanmadhuvratakulakvaṇitānubandhaiḥ||74||
preyoṃśumālivirahavyasanānubandha-
mūrchānimīlitasarojadṛśo nalinyāḥ|
nyastāḥ salīlamabhavannuparīndunāpi
khedāya komalamarīcimṛṇāladaṇḍāḥ||75||
kallolapīvarapayodharapṛṣṭhabhāga-
mākṛṣya vīcivalibhaṅgabhuvaṃ ca candraḥ|
āvartanābhinihitāgrakaraścakāra
raktābjinīṃ mukhanimīlitapadmanetrām||76||
paryucchvasatsaralakesarakāñcanottha-
nārācacakraparipūritakukṣirandhram|
īṣadvibhinnamukulānanamindubhābhi-
rādatta kairavamanaṅganiṣaṅgalīlām||77||
jyotsnāmayaṃ yadamṛtaprabhameghamukta-
mambhaḥ papāta kumudacchadaśuktikoṣe|
L
tatsthūlalagnarajanījalabindujāla-
vyājena mauktikakaṇatvamabhiprapede||78||
udbhinnakaṇṭakabharātpulakānubandha-
paryākulā kumudinī muditā pradoṣe|
dhūtāravindarucicandrakarapraṇoda-
cakrībhavatkumudacārukucā cakāśe||79||
paryāptanirmalakareṇa karaiḥ sudhārdraiḥ
saṃbhāvitāni na himadyutināpi netum|
ninye jalāni niśi nirviṣatāmagastyaḥ
kārye kvacidbhavati kasyacideva śaktiḥ||80||
āskanda dūramudayaṃ madayasva manda-
mānandayenduvadanā madanāvidūnāḥ|
krūraṃ tamaḥ kira karaiḥ kuru korakāgra-
bhaṅgaṃ ca kairavakulasya karālakāntaiḥ||81||
cañcvagracumbanavikuñcitakesarāsu
saṃcārayāñcitadalāsu ca cañcarīkān|
kundāvadātavidaladdaladīrghadaṇḍa-
dūroditāsu muditāsu kumudvatīṣu||82||
saṃdhehi pattrapaṭalaṃ paṭupuṇḍarīka-
khaṇḍasya maṇḍaya diśaḥ sphuṭamaṇḍalaśrīḥ|
saṃkṣobhayoddalanadohadalīladola-
kallolakāṇḍakalilaṃ salilaṃ ca sindhoḥ||83||
saṃdhukṣaya smaramavandhyaśaraprabandha-
saṃdhānabandhurasamādhi dhanurdhunānam|
dhairyaṃ vidhūnaya vadhūṣu vivardhamāna-
mānoddhuraṃ vidhurabandhuvirodhinīṣu||84||
pārīḥ prasādaya ca pānaparamparāsu
karpūrapāṃsupaṭalībhiriva prabhābhiḥ|
ityācaranrucirarocirarocatendu-
rarcaikacarcajanalocanacakravālaḥ||85||
(pañcabhiḥ kulakam)
pātālāntaśchavīva ghanāṃ śeṣabhogaprakāśaḥ
kaṇṭhacchāyāmiva paśupateraṭṭahāso 'bhinīlām|
vikṣipyārānnabhasi tamasāṃ maṇḍalīṃ ratnarāśe-
rdattollāsaḥ śaśabhṛdamalaśrīścakāsāṃcakāra||86||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye candrodayavarṇano nāma viṃśa sargaḥ|