ityaṭṭahāsavacanādatha jṛmbhamāṇa-
saṃrambhabhīṣaṇatarabhrukuṭīvibhaṅgam|
caṇḍeśvareṇa nijadehabharāvaśīrṇa-
māṇikyapīṭhanibiḍāśrayasaṃdhi cele||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
trayodaśaḥ sargaḥ|
nirvyūḍhasaṃgarabharasya kareṇa bāhoḥ
keyūraśoṇamaṇidīdhitidhātudigdham|
kumbhasthalaṃ karipateriva tīvramanyu-
rāsphālayansaparuṣadhvanimaṃsapīṭham||2||
kārṣāṇavī karapuṭonmalanādanalpa-
kopasya piṅgitadigantaramutpatantī|
ulkeva tasya sakalāsuracakravāla-
sarvapraṇāśapiśunā śuśubhe śubhārciḥ||3||
tasyāgravartibhiralakṣyata tīvrakopa-
saṃrambhavibhramabhṛtaḥ suracakravālaiḥ|
ākṛṣṭipāśatulanāṃ dadhatī vipakṣa-
pakṣaśriyaḥ kuṭilitā surasaṃsadi bhrūḥ||4||
tiryagvivartanavaladvikaṭāṃsakūṭa-
helāvimardarabhasotthitadhūmalekham|
kaṇṭhaṃ dadhatprakṛtiniṣṭhurakālakūṭa-
kūṭāsitacchavimivendukalākirīṭaḥ||5||
keyūraśoṇamakarīmaṇicakravāla-
niryatprabhāruṇitamauktikakarṇapūraḥ|
kṣīrodasindhuriva gauraruciḥ pravāla-
vallīprabhāvalayalaṅghitaphenacakraḥ||6||
nirmucya dhūrjaṭisadasyabhilaṅghitauṣṭha-
bālapravālaviṭapāṅkurakoṭibhāgam|
kopānalākulitadurdharadhairyasindhu-
phenacchaṭāpaṭalavibhramamaṭṭahāsam||7||
ākopakampitaśirāḥ sahasojjihāsu-
rāpṛcchyamāna iva mānimanāstitikṣām|
vākyaṃ jagāda gaṇanāthanutipragalbha-
matyurjitaṃ raṇanayāntaratattvavedī||8||
(kalāpakam)
prajñāṃ namāmi bhuvaneṣu vicitrarūpā-
mādyāṃ giraṃ ca sakalavyavahārahetum|
vaktuṃ yadāśrayavaśena mamāpi dhairya-
mukte tvayāpi gaṇanāyaka nītigarbham||9||
mārgatraye 'pyavihataprasarā manojña-
śabdaśrutiḥ śucitayānugatāñcitaśrīḥ|
jahnorivāśu tanayā ghaṭamānakarṇa-
dhārā manoharati kasya satāṃ na vāṇī||10||
suptaprabuddhavadanargalamunmiṣanti
yāsu śrutāṣu sudhiyāmapi dhīvikalpāḥ|
ścyotanti tāḥ kimapi tanmadhu hṛdyarūpa-
marthyā giraḥ śravaṇahārigabhīrabandhāḥ||11||
kāryaṃ suniścitamupakṣipatīha mantra-
carcāsu nītinipuṇaḥ pariṇāmaramyam|
bījaṃ prajāpatiruvāpa tadarghyamapsu
yasmādadaḥ samudabhūtkamalāsanāṇḍam||12||
ślāghyāṃ vikāsaghaṭanāṃ vacaseyuṣā tva-
mābibhratā daśanadīdhitipakṣmalakṣmīm|
śaṃsāspadatvamupajagmitha saumya kalpa-
śākhīva ratnakusumastabakena nūnam||13||
vākyaṃ tava śravaṇahāri vinirgataṃ ya-
detadgaṇādhipa mukhānna tadatra citram|
āhlādahetumani'saṃ na jagattrayasya
syandiṣyate kathamivāmṛtamindubimbāt||14||
manye 'bhidhātumabudhātra sarasvatīti
līlāgṛhītavikacāruṇapuṇḍarīkam|
saṃskārakāryavaśapuñjitasaptaloka-
jihvāvitānamiva hastatalaṃ vahantī||15||
ukte tvayāpi pariniṣṭhitanītigarbha-
mitthaṃ vikalap'satasaṃkulatāmavāpte|
vaktavyameva hi mayā saviśeṣamatra
naivāsti kiṃcidanapāśritatāratamyam||16||
dordaṇḍadarparabhasapratibaddhavṛtti-
mutsāhamutsasṛjuṣāṃ bhajatāṃ ca nītim|
nyakṣeṇa kāryagahanaṃ viṣamīkaroti
puṃsāmupāyakalanāghanamārutaughaḥ||17||
brahmāpyudīrayatu sāma samīkadarpā-
dbhedaṃ janavrajamukhāni ca yāntvalaṃ vaḥ|
L
dānaṃ mataṅgajaghaṭā vitarantvamanda-
mūrikṛto yudhi mayā ditijeṣu daṇḍaḥ||18||
te mandavīryagatayaḥ sphuṭamanya eva
sāmādimantharaparākramamāsate ye|
ye tu prasahya dalayanti vipakṣacakra-
mākramya te jagati khaḍgaviṣāṇakalpāḥ||19||
eko guṇo guṇaśatādapi tāvadeṣa
saṃpratyananyasadṛśaḥ kimivātra ṣaḍbhiḥ|
yenendusundarayaśaḥ paṭalātapatra-
daṇḍatvameti tava pīvara eṣa bāhuḥ||20||
eṣā viḍambitabhujaṃgamabhogakāṣa-
kārśyāṅkamadhyaviṣamasthitamandarādriḥ|
ekaiva yatra guhahastagatā vibhāti
śaktiśca tatra tisṛbhiḥ kimivāparābhiḥ||21||
preṅkhacchikhaṇḍabharaśobhivapuḥ kalinda-
kanyāhradaśriyamagādhatayā dadhānam|
śakto raṇe dalayituṃ pracalākiketu-
rahnāya kāliyamivāhitamacyutaśrīḥ||22||
saṅgrāmavāsabhavane niyataṃ niṣaṇṇā
niḥsaṃśayaṃ vidadhati pratipakṣalakṣmīm|
saṃvāhikāṃ caraṇayoḥ karikumbhapīṭha-
pīnonnatastanakṛtāspadayoḥ samarthāḥ||23||
āropyate bhaṭajanena śarāsanāgra-
koṭiṃ samīkabhuvi yo guṇabandhapāśaḥ|
ākṛṣya tena tarasā taralatvamāptā
saṃyamyate dṛḍhataraṃ pratipakṣalakṣmīḥ||24||
tejasvino nanu vidheyamiyatpinaṣṭi
duṣṭātmanāṃ yadanapekṣitadeśakālaḥ|
daivānubhāvavaśato vanagocaro 'pi
kiṃ śrīphalaṃ kathayatāparathā na bhuṅkte||25||
deśo na so 'sti na kṛtāsthitireṣa yatra
kālaṃ vibhoḥ praṇudatastadapekṣayā kim|
mithyāvikalpajanitārivināśavighna-
nighnāḥ kimevamadhunāśritaśaṅkamāddhe||26||
kṣīṇo 'pi dūramavalambata eva nūna-
mavyāhatāṃ jagati kāryadhurāṃ mahasvī|
kiṃ locanotsavavidhāyikalāvaśeṣa-
rūpo 'pi śītakiraṇaḥ kurute na rātrim||27||
ambhonidhiṃ pralayakālavilaṅghitātma-
maryādamastamayaniṣprabhamuṣṇaraśmim|
ālokya dhīramanaso hṛdayena nūna-
muccairhasanti vipadi sthiradhairyarūpāḥ||28||
utprekṣya nūnamabhaye 'pi bhayaṃ nisarga-
bhīrurnitāntamupagacchati viklavatvam|
pañcatvameti nitarāṃ sucikitsito 'pi
śaṅkāviṣavyatikareṇa vimūchitaḥ san||29||
vistīrṇatādi gaganodadhibhūbhṛtāṃ ya-
ścakre sa saṃkaṭamanāḥ sphuṭamanya eva|
yena vyadhāyi mahatāṃ hṛdayeṣvanāpta-
paryantavṛtti tadasāvaparo 'sti vedhāḥ||30||
jṛmbhāparītavadanāḥ śvasitānubandha-
bhājaḥ prakampivapuṣo 'ruṇarūkṣanetrāḥ|
roṣajvarākuladhiyaḥ subhaṭāḥ kṛpāṇa-
dhārājalaṃ samabhilaṣyatha he na kasmāt||31||
krodhānalasya hṛdayaṃ bhrukuṭerbhruvaśca
dantacchadā daśanakoṭivilaṅghanānām|
skandhāśca nirdayakarābhihaterbhaṭā vaḥ
svādhīnagocaratayaiva diśanti hāsam||32||
helānirastapavanā gurusaṃprahāra-
rīḍhāsahāḥ surabhaṭāḥ paṭutāṃ vahantī|
uccai raṭiḥ sapadi śītalatāṃ karoti
pūtkeva vaktravisṛtoṣmajuṣāṃ dviṣāṃ vaḥ||33||
saṃvāditāmajahato dalitādrikūṭa-
kalpakṣayaprasṛtacaṇḍasamīraṇānām|
kasminnirargalabhujārgalacaṇḍadarpa-
niṣpiṣṭadānavabhaṭā na cakāstha saṃkhye||34||
kretuṃ yaśāṃsi samarāpaṇiṣu pragalbha-
minduprabhādhavalabhāṃsi kṛtaspṛhāṇām|
L
ceto dunoti bhavatāmanutāpahetuḥ
kasmātpareṇa kṛta eṣa na mānabhaṅgaḥ||35||
saṃhārakālaśikhitīvrataro 'pi manyu-
ruttaṃsalūniphala eva sa eṣa jātaḥ|
chinnā itīva bhavatāṃ kiraṇacchaṭābhi-
rete hasanti maṇikuṭṭimasīmni hārāḥ||36||
svacchaṃ suvṛttamanurāgi haridvayasyā-
līlāgṛhītamadhunāpi yaśaḥ prakāśam|
śvāsānilā malinayanti na bāhudaṇḍa-
darpaśriyo lalitavibhramadarpaṇaṃ vaḥ||37||
śauryaśriyā nahi daridritha saṃyugeṣu
pāraṃ gatāḥ stha ca dhiyā nayamārgasindhoḥ|
chinnaṃ kimatra bhavatāṃ yadalīkaśaurya-
śauṭīryaśātravanikāradaśāṃ sahadhve||38||
(yugmam)
unmūlitakṣitibhṛtāṃ sahasā sahelaṃ
suskandhatāṃ ca dadhatāmapareritānām|
vistīrṇamambaramiva pralayānalānāṃ
saṅgrāmavartma bhavatāṃ hi vihāramārgaḥ||39||
saṃvidrate jagati ke na yathāśu yūya-
māśākarīndrakarapīvarabāhudaṇḍāḥ|
līlāvarugṇadṛḍhasaṃdhicaturmukhāṇḍa-
khaṇḍadvayaṃ viparivartayituṃ samarthāḥ||40||
unmūlitāmarabhuvāṃ raṇasaṃkaṭeṣu
śakyaṃ na vaḥ kalayituṃ hṛdayaṃ pareṣām|
abhyuddhṛtakṣitibhṛtāṃ pralayagameṣu
niṣkampameva gaganaṃ hi samīraṇānām||41||
ākarṇya durviṣahamapyariviprakāra-
mitthaṃ nayāntaritanāmabhayopagūḍhāḥ|
hastābhighātakṛtarandhrapathaiḥ pṛthivyā
jihrītha kiṃ na sahasā talamapraviṣṭāḥ||42||
rūḍhā ciraṃ bhuvanakānanacakravāla-
mūle vipāṇḍurayaśaḥstabakojjvalaśrīḥ|
kasmātkaroti bhavatāmadhunā na moha-
meṣātatāyiviṣapādapakīrtivallī||43||
daityapratāpatapanātapa eṣa tāpa-
mabhyuddhṛtāmaravadhūvadanendukāntiḥ|
kasmānna vaḥ prakurute vinikocitendu-
raśmicchaṭādhavalakīrtikumudvatīkaḥ||44||
mandīkaroti bhavatāmasurapratāpa-
vahniḥ kṣaṇādbhuvanamandirakoṭarasthām|
kīrtiṃ nirargalatareṇa viṣoṣmaṇāśu
dīpaprabhāmiva bhujaṃgamadṛṣṭipātaḥ||45||
saṃkalpa eṣa raṇadurlalitaḥ kṣaṇena
vācātra kālamusalasya vipūrito naḥ|
mandākinīṃ prathitapuṇyaguṇāṃ vihāya
ratnākaraṃ ka iva pūrayituṃ kṣamo 'nyaḥ||46||
saṃpaśyato 'ntaramihāsumatāṃ visāri-
sattvaṃ balādadhikamityapi me vitarkaḥ|
siṃho nipātayati caṇḍacapeṭayaiva
pṛṣṭhena tūdvahati kuñjaram aṣṭapādaḥ||47||
gambhīragarjitaravaśravaṇotthabhīti-
naśyatkuraṅgakakulasya karālamūrteḥ
lābho 'sti kaḥ kaṭhinakuñjaracakravāla-
kumbhasthalīvidalanād aparo mṛgāreḥ||48||
śabdāntarāṇi khalu sānta pṛthagvidhāni
yairvyāptameva jagadavyatikīrṇarūpaiḥ|
dānāmbu śoṣayati yaḥ kariṇāṃ śruto 'pi
ko 'pyanya eva hariṇādhipateḥ sa nādaḥ||49||
helāvinirjitaripusphuṭaśauryalakṣmī-
līlāniketavikaṭonnatacandraśālām|
vistāriṇīṃ subhaṭavaṃśahimādrigaṅgāṃ
kīrtiṃ na yānti raṇavartmani tīrthakākāḥ||50||
aprāptahāripariṇāmaguṇā kadāci-
dā janmano 'pi virasā mama sā daśābhūt|
L
kiṃ nīrasā jalapṛṣajjaladherupaiti
muktāphalatvamiha śuktipuṭāntareṣu||51||
saṅgrāmalābharabhasena bhaṭaiḥ salīla-
māsphālitāśca jayakuñjarakumbhabhāgāḥ|
nākaukasāṃ vigalitāśca vipakṣacakra-
sīmantinīstanataṭāspadatārahārāḥ||52||
nistriṃśaghātadalitadvipakumbhapīṭha-
nirmuktamauktikakaṇaprakarāvakīrṇe|
saṅgrāmavāsabhavane 'bhimatā jigīṣo-
stīkṣṇaiḥ śilīmukhanakhairvaśameti lakṣmīḥ||53||
pratyagraratnakiraṇacchuraṇābhirāma-
mambhodanīlamabhito 'dhivasatyabhīkṣṇam|
vakṣaḥsthalaṃ madhuriporiva tīkṣṇavartma-
paṭṭaṃ pariplavatayā rahitādṛtā śrīḥ||54||
saṃvādinī niyatamasya surārideha-
cchāyeti cañcalatayā rahitātra lakṣmīḥ|
śaṅke śaradgagananīlarucau kṛpāṇa-
paṭṭe 'nuraktahṛdayāracayatpratiṣṭhām||55||
utsṛjya paṭcaraṇacāraṇacakravāla-
gītastutāṃ navakuśeśayakośaśayyām|
vīrānurāgarabhasena vasatyabhīkṣṇaṃ
śaṅke salīlamasipattravane 'pi lakṣmīḥ||56||
dordaṇḍanirjitariporjagati prasaṅga-
labhyeṣu nāsti vibhaveṣu kadācidāsthā|
tejasvinaḥ karajajarjaritebhakumbha-
kūṭasya mauktikagaṇeṣu harerivāryāḥ||57||
vyāghātaviplutamaho vidhuraṃ bataita-
dasthānasaṃbhramatiraskṛtadhairyabandhāḥ|
yūyaṃ yadevamadhunā bhujaśālino 'pi
grāsīkṛtā viṣamanītipiśācikābhiḥ||58||
uttiṣṭhatāsurapateḥ śarakāṇḍapāṇḍu-
cchāyāni saṃprati yaśāṃsi hatasya saṃkhye|
dhautāñjanāstrasalilaplutatatpuraṃghri-
gaṇḍasthalāni ca malīmasatāṃ vrajantu||59||
daityādhirājamakarākaraloḍanāya
saṃrambhiṇo mayi jayāmṛtalābhahetoḥ|
āropayantu vibudhā bhasmīśa tāva-
dadyaiva mandaramivātanukūrmapṛṣṭhe||60||
ślāghyaḥ sa eva kalaśo bhuvaneṣu yasmā-
dutthāya vandyamahimā surakāryahetoḥ|
ambhodhimekaculakena vivartamāna-
vaikuṇṭhakūrmaśaphareṇa papāvagastyaḥ||61||
hetoḥ kuto 'pyasadṛśāduditā garīyaḥ
kāryaṃ nisargaguravaḥ sphuṭamārabhante|
L
utthāya kiṃ na kalaśādapi sindhunātha-
mudvīcimālamapibadbhagavānagastyaḥ||62||
kṣmāmaṇḍalaṃ sakalameva saratnarāśi-
vistārinemivalayaṃ raṇabaddhakakṣyaḥ|
cakrīkaroti subhaṭaḥ śravaṇāntakṛṣṭa-
maurvīlatena dhanuṣā samameva nūnam||63||
baddhāspadā ditijanāyakacakravāla-
paṅkodare bahuguṇoddhriyatāmidānīm|
nākaśriyaḥ paribhavātanuvahnidāha-
śānticchayā dhavalakīrtimṛṇālavallī||64||
saṃhārasindhumiva kāñcanaśailakūṭa-
bhāge sphurattaraṇidīdhitidurnirīkṣām|
adyaiva dānavakulapralayāya tāva-
dāropayāmi dhanuṣi drutamatra maurvīm||65||
viśliṣyadākulanirargalagaṇḍaśaila-
cakrābhighātavidhurīkṛtatigmabhāsaḥ|
kodaṇḍadaṇḍaghaṭitānpṛthucārukīrti-
rāyodhanārthamavanervivinajmi śailān||66||
bāṇāsanāgravikaṭāṭanigāḍhabandha-
saṃbhāvitārtiriva saṃyugamūrdhni maurvī|
āsphālitā nadatu me baḍavānalasya
heticchaṭodadhitaraṅgahateva tāram||67||
kodaṇḍakoṭimadhiropayati sma bāhu-
śālī samīkabhuvi yāṃ nanu saiva maurvī|
L
lakṣmīsamāgamanakīrtivinirgamaika-
vispaṣṭapaddhativilāsamamuṣya dhatte||68||
kreṃkārameva dhanuṣaḥ śravaṇāntakṛṣṭa-
maurvīpragāḍhaparimaṇḍalitasya saṃkhye|
oṃkāramakṣatamavaimi vipakṣapakṣa-
lakṣmīsalīladṛḍhakarṣaṇamūlamantram||69||
ekāṃ gamāgamanapaddhatimeva gaurvīṃ
kīrtiśriyau bhaṭajanasya hi dhāvamāne|
nūnaṃ parasparakaṭhorakucābhighāta-
vicchinnahāradhavalāmakhilāṃ vidhattaḥ||70||
uddāmamadarpanikaṣapratipakṣasaṃpa-
dutsadanena kṛtavigrahavalguśobhāḥ|
snātāśca kīrtisalilaiḥ surabhībhavanti
nūnaṃ yaśaḥ parimalena parākramāḍhyāḥ||71||
cetohareṇa harakaṇṭharucā prakāma-
puṇyātmakatvamaniśaṃ dadhatā garīyaḥ|
ātmānamāśu subhaṭaḥ samare punāti
nistriṃśapuṣkarajalena kṛtābhiṣekaḥ||72||
niṣkaṇṭakībhavatu saṃprati nātha viśva-
metatprasīda vṛṣaketana dehyanujñām|
grāsīkarotu valanākulitaḥ kṛpāṇa-
siṃhīsuto 'hitayaśaḥśaśimaṇḍalaṃ vaḥ||73||
bhasmāvadātarucayo vinipatya dikṣu
ghorāndhakārakaluṣāṃ pramathādhināthāḥ|
bhindantu dānavacamūmadhunāṭṭahāsa-
cchedā iva pralayakālaniśāṃ smarāreḥ||74||
saṅgrāmabhūmiradhunā bhuvanādhinātha
vṛndāvanasthitirivāstu surāsurāṇām|
vispaṣṭapītavasanādaratātigāḍha-
raktāṅganocitaśivābhimatavrajaśrīḥ||75||
kaṅkālasaṃkulamaśaṅkitakākakaṅka-
saṃketadhāma raṇavartma śaśāṅkamaule|
ṭāṃkārikārmukaviṭaṅkapaṭaṅkamastu
ṭaṅkāṅkasaṃkaṭaviśaṅkaṭakaṅkaṭaṃ vaḥ||76||
nistriṃśalūnavikaṭāsthikaṭhorakaṇṭha-
pīṭhāpaviddhaśirasaṃ yudhi daityanātham|
abhraṃkaṣagraśikharaskhalitārkabimba-
mastāvanīdhramiva paśyatu jīvalokaḥ||77||
kāryā vitarkaghaṭanā na kadācidūrdhva-
māyodhanāvataraṇe bata ko vicāraḥ|
L
ānandaśūnyamamarārikulaṃ sureśa
kurve smitānugamavandhyamayaṃ samādhiḥ||78||
kiṃ cintyate 'nyadapi durbalalokacitta-
meṣo 'ñjalirmadhuramaṅgalagītigarbham|
bhāsvatkarālakaravālavilūnapīna-
pīlūnnataśravaṇamaṇḍalatālavṛntam||79||
ānandanirbharanabhaścaracakramukta-
puṣpopakāranipatanmadhupāvalīkam|
senāvamardadalitāvanidhūlidhūpa-
dhūmacchaṭāśabalitākhiladigvibhāgam||80||
preṅkhadgadādalitakuñjarakarṇaśaṅkha-
dhūlicchaṭāpaṭalavarṇakakardamāṅkam|
abhyāpatatsubhaṭamanmathakṛṣyamāṇa-
kodaṇḍanirgataśarāśaniluptadhairyam||81||
saṅgrāmavāsagṛhamucchritadantidanta-
paryaṅkamutpulakamaṇḍalagaṇḍabhittiḥ|
āliṅganātirabhasena jayaśriyo 'ya-
madyaiva tāvadadhitiṣṭhatu rājalokaḥ||82||
(kalāpakam)
adyāvaskandalīlācalitabalaparisyandakharvīkṛtorvī-
saṃrambhottambhanāsthonnamitabharanamatkaṃdharāsaṃdhirāstām|
L
śeṣo 'pi sphāraphullatsphuṭaṣṭathulaphaṇātphūtkṛtāgnisphuliṅga-
sphūrjatsaṃdohasaṃdehitavikaṭaśikhāmaṇḍalīratnaṣaṇḍaḥ||83||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛto ratnāṅke haravijaye mahākāvye caṇḍeśvaradaṇḍopanyāso nāma trayodaśaḥ sargaḥ|