śrutvāsya vācam iti taṃ vikaṭāṭṭahāsa-
phenacchaṭācchuritadiktaṭam agnidaṃṣṭraḥ |
cukṣobha sindhur iva saṃsadi kālakūṭa-
rekhākarālavikaṭabhrukuṭīvibhaṅgaḥ || 1 ||
Kāvyamālā 22, OCR
- , ,
- Known as: , (NCC).
- Siglum: KOCR
Kāvyamālā from OCR-Here only canto 3
More ▾
| Title | Haravijaya |
| Commentary | Viṣamapadoddyota |
| Author | Ratnākara |
| Commentator | Alaka |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- KOCR
Lekādaśaḥ sargaḥ |
L⸤agnigarbho gaṇas tām nītigarbhām giram ākarṇya vakṣyamāṇanayena kṣubhitavān_ || 1 ||
saṃvartavāridaghaṭāvikaṭābhinīla-
cchāyāndhakārakaluṣīkṛtadigvibhāgām |
ābhaṅginīṃ bhrukuṭim utkaṭakopavahni-
veṇīlatām iva babandha sa kālarātreḥ || 2 ||
ābha⸤ṅginīm īṣatkuṭilām_ || 2 ||
vyāvṛttimaṇḍalitaromalatālavāla-
cakrāyamānavikarālakaṇāni kopāt |
sasyandire sadasi gharmajalāni tasya
tanvanti ratnakavacaśriyam āśudehe || 3 ||
romāṇy eva latās tāsu kuṇḍalitatvād ālavālacakratvam ā⸤carantaḥ kaṇā yeṣām_ | tanvanti kurvāṇāni || 3 ||
krodhastathāsya vavṛdhe bhrukuṭīvibhaṅga-
lekhātaraṅgitalalāṭataṭānanāgraḥ |
bhartur yathānadhigatoddhataśāsano 'pi
saṃhartum āśu bhuvanatritayaṃ sa aicchat || 4 ||
4 ||
tasya ghnataḥ karatalena karālam aṃsa-
kūṭaṃ ruṣā nakhamayūkhaśikhāḥ khacantyaḥ |
ūhuḥ kaṭhorabhujapañjarapuñjyamāna-
durvāravikramamṛgendrasaṭāvilāsam || 5 ||
puñjyamāno badhyamānaḥ || 5 ||
aucityaśāli saruṣo vacanaṃ vivakṣo
tasyāhatāṃsaśikharasya vivṛttilīlā |
Lsannāyikeva sadasi pratipannapīṭha-
mardā rarāja kuṭilonnamitāñcitabhrūḥ || 6 ||
⸤pratipannaḥ saṃpannaḥ pīṭhasyāsanasya mardo yasyāḥ | pūjyād deśād āgato vidagdhaś ca nāyakasuhṛL⸤tpīṭhamardaḥ | uktaṃ ca*—‘avibhavas tu śarīramātro mallikāphenakaṣāyamātraparicchadaḥ pūjyā⸤d deśād āgataḥ kalāsu vicakṣaṇas tadupadeśena goṣṭhyāṃ veśe ca sādhayed ātmānam iti pīṭhamardaḥ |’ ⸤iti || 6 ||
- ⸤1. vātsyāyanena kāmasūtre (1|4).
hṛtpuṇḍarīkam iva tasya suraiḥ saroṣa-
pādābhighātakṛtarandhrapathena pṛthvyāḥ |
pātālakukṣikuhare maṇiraśmirāga-
piṅgaṃ vyaloki pṛthuśeṣaphaṇāsahasram || 7 ||
hṛtpadmam iva bhūmer amaraiḥ śeṣasya phaṇa...sahasraṃ dṛṣṭam_ || 7 ||
bibhratsa saurabhabharākuladvirepha-
mālaṃ maṇistabakakarṇaśikhāvataṃsam |
aṃsopadhānabhujatalpaniviṣṭayeva
lakṣmyārpitaṃ nijakarād vikacāravindam || 8 ||
8 ||
utsarpidarpajaladhisphuradūrmisaṃgha-
saṃghaṭṭaghorataraghoṣanibhāravaśrīḥ |
līlāvivṛttanijadehabharāvarugṇa-
ratnāsanāśithilasaṃdhir idaṃ babhāṣe || 9 ||
utsarpī samu⸤llasandarpa auddhatyaṃ yasya || 9 ||
(yugalakam_)
satyaṃ girā tava vibhūṣita eva nīti-
mārgo nisargagahano 'pi gaṇendra guryvā |
ekaiva sā jalanidher udiyāya candra-
lekhā samaskuruta yā śitikaṇṭhajūṭam || 10 ||
tavaiva girā nītimārgo bhūṣitaḥ | yataḥ sā gurvī gaha⸤nārthā | samaskuruta samapūjayat_ | ‘saṃparyupebhyaḥ karotau bhūṣaṇe’ iti suṭ_ || 10 ||
utpadyate jagati ko 'pi sa eka eva
yasyoktiṣu sphurati sarvamanoramo 'rthaḥ |
anyaḥ sa kalpaviṭapī maṇimañjarīṣu
cintāmaṇiḥ stabakatām upayāti yasya || 11 ||
anyo L⸤vilakṣaṇaḥ || 11 ||
Lkṣobhaṃ na yā vrajati jātu nayārthatattva-
garbhā parā tava gaṇādhipa sātra vāṇī |
paṅkatvam eti na madhusthitikāraṇaṃ yā
sānyaiva saṃbhṛtaguṇā kusumasya dhūliḥ || 12 ||
nayasyārthatattvaṃ paramārthaḥ | tadgarbhatvād vikāraṃ yā na gacchati | ‘ādī⸤navaṃ vrajati jātu na yā’ iti kvacit pāṭhaḥ | tatrādīnavaṃ doṣaṃ yā na yāti kvacid ityarthaḥ | ⸤madhu mākṣikam_ || 12 ||
ākāradāruṇatayāpi mamānvitasya
vākyaṃ vilakṣaṇam abhiplutituccharūpam |
asthāsnu tūlam iva śālmalipādapasya
saṃśrūyamāṇam upayāsyati hāsyatāṃ vaḥ || 13 ||
vilakṣaṇaṃ tvaduktād anyādṛśaṃ durbhagaṃ ca | abhiplutir nītimārgā⸤n avagāhanam ūrdhvaṃ gatiś ca, tayā tuccharūpam asārātmakam_ | asthāsnu nirupayogatvād vinaśvaraṃ ⸤bhūmāvalabdhapadaṃ ca | tūlaṃ kārpāsajātīyam_ || 13 ||
helāparibhramaṇamaṇḍalitena yasya
nīlatviṣāridalanād asinā raṇeṣu |
vaktreṇa manmatharipor iva nirmalāṭṭa-
hāsacchaṭā vicakare bhuvaneṣu kīrtiḥ || 14 ||
heletyādikalāpakam_ | vicakare ⸤vikīrṇā || 14 ||
sa jyotiriṅgaṇagaṇair iva vajramuṣṭi-
ghātocchaladvikaṭakaṅkaṭavahnileśaiḥ |
yasyājidurdinamukheṣu kṛpāṇamegha-
dhārā jahāra ripupaṅkajakoṣalakṣmīm || 15 ||
jyotiriṅgaṇāḥ khadyotāḥ | ‘vajravatkarkaśo muṣṭir vajramuṣṭir udāhṛtaḥ | ⸤yadi vā vajramuṣṭyākhyam āyudhaṃ paricakṣate ||’ dhārā aśriḥ saṃtataṃ ca varṣam_ | koṣo gañjaḥ ⸤karṇikā ca | lakṣmīḥ suvarṇādisaṃpadabhikhyā ca || 15 ||
yasyāśu kīrtibakulāvalirātatāyi-
senāvadhūvrajamukhaskhalitaiḥ salīlam |
ninyevikāsam asakṛnnavaraktaśīdhu-
gaṇḍūṣasekavisarai raṇakānaneṣu || 16 ||
mukham agraṃ vadanaṃ ca || 16 ||
Ltasyāpi nāma bhavataḥ sakalārthaśāstra-
tattvāvagāhanagabhīram atipragalbham |
ākarṇya vākyam amarā nayamārgaśāli
śaṅke bhavanti saviśeṣaraṇābhilāṣāḥ || 17 ||
L⸤arthaḥ pṛthivyāḥ pālanaṃ lābhaś ca, tatpratipādakaṃ śāstram arthaśāstraṃ daṇḍanītiḥ | nayamārga⸤śāly api vākyaṃ bhavataḥ śrutvā niścitam amarā viśeṣeṇa raṇābhilāṣiṇa eva bhavanti | ⸤ripoś caturthopāyasādhyatvāt_ || 17 ||
(kalāpakam_)
uddāmadānavavarūthavatīsamīka-
saṃmardayogyam aparaṃ kṣitipīṭhapṛṣṭam |
nirmitsyamānam iva paśya hariṃ saroṣa-
ratnāṅgadaprakarapeṣaparāgapuñjaiḥ || 18 ||
samīkaṃ saṅgrāmaḥ || 18 ||
saṃrambhagarbhagurumanyujuṣas trilokīṃ
kurvanti sāṃpratam amī musalāyudhasya |
śvāsā vighūrṇanavisaṃsthulatigmaraśmi-
bimbāhitā niyatadeśadinatriyāmām || 19 ||
saṃrambho yuddhaviṣaya ⸤āṭopaḥ || 19 ||
bhītiṃ tanoti vikaṭabhrukuṭīvilāsa-
velladviṣadrumalatāṅkalalāṭasānuḥ |
krodheśvarakṣitidharaḥ pratipakṣakopa-
kalpāvasānapavanāhitatīvrakampaḥ || 20 ||
20 ||
saṃvartameghamalinacchaviraprakampa-
kopasya huṃkṛtihutāśanadhūmavartiḥ |
ābhāty amuṣya kavalīkṛtakāladeha-
cchāyeva vaktrakuharād abhiniṣpatantī || 21 ||
aprakampakopo nāma yathārthanāmā gaṇaḥ | vartiḥ śikhā || 21 ||
bhrūbhaṅgam eṣa vidadhāti yathā yathā ca
saṃrambhapāṭalavilocanatāṃ vidhatte |
Lniṣpiṣṭahāralatapāṇipuṭo yathā ca
pekṣyaty avaśyam acireṇa tathāsurāṇām || 22 ||
⸤asurāṇāṃ pekṣyati dānavānāṃ cūrṇayiṣyati | ‘jāsiniprahaṇa—’ ityādinā ṣaṣṭhī || 22 ||
roṣānubandhadṛḍhapīḍitadantapaṭṭa-
saṃghaṭṭavahnim iva tarpayati triśūlam |
tatkoṭiniṣṭhuravidaṣṭanijauṣṭhapṛṣṭha-
viṣyandisāndrarudhirāhutibhiḥ purastāt || 23 ||
L⸤śūlam āyudhaṃ vahnim ivābhicārāya raktāhutibhis tarpayati | tasya devatātmakatvāt_ || 23 ||
kālī maṣīmalamalīmasamāṃsalārci-
r uddāmadhāmakaravālakarālabāhuḥ |
durgāhatāṃ pralayakālanavābhrakāya-
sacchāyakāliyalayā yamuneva dhatte || 24 ||
⸤maṣī dravarūpaṃ kajjalam_ | durgāhatā durāsadatvaṃ duravagāhatā ca | layaḥ saṃśleṣaḥ || 24 ||
stamber amānanam amuṃ vikaṭā viṣāṇa-
daṇḍaprabhā kumudakhaṇḍavipāṇḍuraśrīḥ |
mandākinīva gurusaṃgarabaddhakakṣya-
m eṣā vicumbati mukhe tanayapriyatvāt || 25 ||
⸤kakṣyā samudyogaḥ || 25 ||
lajjānatānanatayā raṇaśauṇḍadarpa-
kaṇḍūyanadrumabhujo 'tra vibhāvyate 'sau |
māṇikyakuṭṭimamayūkhajalaṃ viṣāṇa-
līlāmṛṇālaśakalena pibann ivaitat || 26 ||
raṇarasikānāṃ darpakaṣaṇe druma eva bhujo yasya saḥ || 26 ||
vākyaṃ tavaitad iti śuśruvuṣaḥ salīla-
m ākṣiptanītigahanaṃ sadasīndumauleḥ |
paśyādhunātivimalāpi guhasya vaktra-
cchāyā gaṇādhipa malīmasatāṃ bibharti || 27 ||
27 L⸤||
ekībhaviṣyati raṇe karavālaghāta-
bhītipraṇaśyadasureśvaradarśanotthaiḥ |
Lhāsāṃśubhis tava yaśaḥ stabakāyamāna-
m āśālatāsu śiśirāṃśumarīciśubhram || 28 ||
28 ||
pratyarthino madabharoddhurakaṃdharasya
śaktiṃ dadhad dalitabhūdharasāragurvīm |
kīrtiṃ mṛṇāladhavalām aham uddharāmi
dantārgalāṃ gaṇapater iva kārtikeyaḥ || 29 ||
mado dānam api | śaktim āyudham api | bhūdharā rājānaḥ | bhūdharaś ca giriḥ krau⸤ñcākhyaḥ | kārtikeyaḥ kumāraḥ || 29 ||
kiṃ kālakhañjanikarair mama jṛmbhamāṇa-
vātāpibhiḥ sphuradariṣṭadurantaśalyaiḥ |
tāndaivadagdhavapuṣo raṇamantareṇa
naṣṭātmanaḥ prathamam eva na vettha kasmāt || 30 ||
jṛmbhamāṇo vātāpir nāma dānavo yeṣu | sphura⸤nn ariṣṭaś cāriṣṭakāsuro yeṣu | durantaś ca viṣamaḥ śalyanāmāsuro yeṣu | tādṛśair api kālakhañja⸤nāmnām asurāṇāṃ nikarair mama kiṃ śakyate vidhātum_ | te hi vātūlatayā balavantaṃ vātam āpnu⸤vanto 'riṣṭena ca vināśasūcakopasargeṇa durantaśalyā durabhibhavādhayaḥ kālakhañjāḥ kāla⸤vaśena vaikalyam upagatā iti yathārthanāmānaḥ | tataḥ prāg api samarān naṣṭarūpān amūn kim iti ⸤nāvagacchasi | yenaivaṃ sahajam api tejaḥ samutsṛjya nītiviṣayam eva saṃvidhānaṃ vidhīyata ⸤ityarthaḥ || 30 ||
avyāhataprasaratāṃ bhuvanatraye 'pi
prāptābhravartma paripūrayatu kṣaṇān naḥ |
pratyagrapattramakarā suranātha jahnu-
kanyeva sindhusalilaṃ yudhi bāṇapaṅktiḥ || 31 ||
patrāṇi pakṣāsta eva makarāḥ prāṇibhedāste pratyaṃgrā yasyāḥ . pratyagrapa-
śrāśca makarāśca yasyāḥ || 31 ||
āpāṇḍurībhavatu vaḥ pratipakṣapakṣa-
nārījanasya vadanaṃ pativiprayoge |
duḥkhāgnidagdhahṛdayendhanabhasmadhūli-
puñjair ivābhihatam ucchvasitavyudastaiḥ || 32 ||
32 ||
saṅgrāmaraṅgabhuvi cārutarāṅgaśobhā-
saṃdarbhavaty atirasād dviṣato 'pasārān |
Lsannartakīva vidadhātu kṛpāṇadhārā-
lagnena śauryavibhavena padaṃ jayaśrīḥ || 33 ||
aṅgāni hastyaśvarathapattayo mukhādīni ca | aL⸤pasārāḥ palāyanāni nṛttaviśeṣāś ca | dhārā tālabhedo 'pi | yathā dhārāśritena sāmarthyā⸤n nṛttavibhavena raṅgabhuvi nartakī padaṃ karoti tathādhārāśritenaiva śauryavibhavena raṇabhuvi tajjaya⸤śrīḥ padaṃ karotītyarthaḥ || 33 ||
ālakṣyatāṃ kṣititalaṃ dṛḍhavajramuṣṭi-
niṣpiṣṭakuñjaraghaṭonnatakumbhamuktaiḥ |
muktāphalaiḥ sphuritadīdhitipakṣmapaṅkti-
śauryadrumastabakavibhramam ākṣipadbhiḥ || 34 ||
muktāphalair upalakṣitaṃ kṣititalam ālakṣyatāṃ vilokyatām_ | ⸤pakṣmāṇi kesarāḥ || 34 ||
saṃrambhavibhramabhṛtāṃ yudhi manyugarbha-
m ujjhantu gharmajalaśīkrabinduvṛṣṭīḥ |
sārdhaṃ lalāṭakaṭakā bhavatām arāti-
sīmantinījanavilocanabāṣparpūraiḥ || 35 ||
lalāṭapaṭṭā dharmodakabinduvarṣāṇi muñcantu | arivadhūnāṃ bā⸤ṣpapūraiḥ saha | te 'pi binduvarṣāṇi muñcantu || 35 ||
āyodhane gajaghaṭāvikaṭāsthikūṭa-
kumbhasthalaskhalitakhaḍgakhaḍatkṛtir vaḥ |
antardadhātu madhuraṃ jayaśabdatāra-
kolāhalaṃ nabhasi khecarasaṃhatīnām || 36 ||
36 ||
saṃsphoṭavisphuṭarasasphuṭitavraṇottha-
raktacchaṭāciraruco gajagaṇḍameghāḥ |
muñcantu dānajalavṛṣṭim amānasasya-
kṣetraṃ vidhātum adhunā suravairicakram || 37 ||
mānasasyābhāvo 'mānasaṃ hṛ⸤dayarahitatvam_ | arthābhāvo 'vyayībhāvaḥ | tasya kṣetram āspadam asuracakraṃ kartuṃ ca gajagaṇḍaja⸤ladā madajalavarṣaṃ muñcantu samararasāt_ | ghanā api amānam aparimitaṃ sasyaṃ yasya tādṛśaṃ ⸤kṣetram ādhātuṃ varṣam ujjhanti | saṃsphoṭaḥ saṅgrāmaḥ | aciraruk_ saudāmanī || 37 ||
abhyarṇatauṇikavikīrṇavikarṇaghāta-
rugṇāmarārikarikarṇam udīrṇasattvam |
Ltūrṇaṃ vitīrṇabhayam astu raṇaṃ nidāgha-
saṃśīrṇajīrṇataruparṇavanāyamānam || 38 ||
tūṇena jaL⸤yanti tauṇikā dhanurbhṛtaḥ | vikarṇāḥ śarāḥ || 38 ||
niṣpiṣṭalocanayugaṃ dṛḍhavajramuṣṭi-
piṣṭāsthikūṭaśirasaṃ vidadhe surārim |
vajrābhighātadalitātanukūṭakoṭi-
visrastaratnaśakalāñjanaśailakalpam || 39 ||
kūṭaḥ samūhaḥ | vidadhe karomi | ⸤kūṭa śikharam_ || 39 ||
prāpya kriyāsamabhihāram ahaṃ prakarṣa-
paryantavartinam upoddhṛtaśailaśṛṅgān |
saṃhāramāruta iva prasabhaṃ kṣuṇadmi
saṅgrāmasīmni tarasā suraśatruśailān || 40 ||
kriyāḥ kṣodanasyāṅgabhūtāḥ saṃdarśanaprārthanādhyavasāyāḥ | tāsāṃ ⸤samabhihāraḥ paunaḥpunyam_ || 40 ||
saṃbhrāntavibhramavatīkarapuṇḍarīka-
dhūtā vipāṇḍuraruco mama cāmaraughāḥ |
utpādayanti bata śokajarāmivāri-
helānikārakaluṣīkṛtacittavṛtteḥ || 41 ||
vibhramavatī vilāsinī || 41 ||
tīvrātmano dalayataḥ karavajramuṣṭi-
ghātena dānavakulācalacakravālam |
vyāpāritā yudhi bhaṭaiḥ kṛpaṇāḥ kṛpāṇa-
paṭṭā bhavanti mama nūnam amī purastāt || 42 ||
kṛpaṇā akiṃci⸤tkarāḥ || 42 ||
āropito 'pi sakalāsurasaṃprahāra-
bhāro bharāya na bhaviṣyati me 'tra bāhau |
saṃhārakolavapuṣaḥ khagaketanasya
daṃṣṭrāgrabhāga iva ratnavatīniveśaḥ || 43 ||
saṃprahārabhāro raṇadhurā saṃniveśito 'pi mama bhuje bharāya na bhaviṣyati | ⸤harer iva daṃṣṭrāgrabhāge kṣitiniveśaḥ | kolaḥ sūkaraḥ | ratnavatī bhūḥ | ‘ḍūbhṛña dhāraṇe’ iL⸤ty asya ghami bhāraḥ | ‘ma bharaṇe’ ity asya tu bharaḥ || 43 ||
Luddāmakuñjaraghaṭonatakumbhapīṭha-
mardo hitāhavakalāsu vicakṣaṇo 'ham |
tāṃ nāyikām iva jayaśriyam ābhimukhya-
m eko nayāmi nayanirviṣayaikavṛttiḥ || 44 ||
kumbhā eva pīṭhāni tāni ⸤mṛdnāti yaḥ | pīṭhamardaś ca pūrvokto nāyakasuhṛt_ | sa nayaparāṅmukho 'pi kalāvicakṣaṇata⸤yaiva nārīm abhimukhīkaroti | nayaḥ sāntvanam api || 44 ||
lakṣmīm akhaṇḍanavasū raṇabhūmir etu
nānādhvajāṃśukakṛtāṃ suradāruṇāsau |
adyaiva deva hariṇārahitā himādri-
sānusthalīva pṛthuvaṃśakarīrarāśiḥ || 45 ||
asau raṇabhūmir adyaiva dhvajānā⸤m aṃśukaiḥ kṛtāṃ lakṣmīm etu | akhaṇḍanāḥ kṣatirahitā vasavo devaviśeṣā yasyām_ | surair dāru⸤ṇā viṣamā haribhyām indropendrābhyāmarahitā sahitā | pṛthuvaṃśān bhadrajātiyuktatayā vi⸤pulapṛṣṭhanāḍīkān kariṇa īrayanti ye yodhās teṣāṃ rāśir yasyām iti gamakatvād vyadhikaraṇa⸤rūpo bahuvrīhiḥ | sā ca himādreḥ sānusthalīva | sā tu nānāvidhebhyo 'dhvabhyaḥ pathibhyo jātāṃ ⸤śukaiś ca kṛtāṃ lakṣmīm eti | suradāruṇā devadārudrumeṇa | tathā akhaṇḍānāṃ navānāṃ ca sūra⸤ṇānāṃ ... tṛṇaviśeṣāṇāṃ vā rāśayo yasyāṃ tādṛśī ca || 45 ||
kailāsaśailam iva bāhubalena loka-
m unmūlayantam ahitaṃ bahudoṣam ekaḥ |
tīvrārtinādamukharaṃ caraṇena nātha
niṣpīḍya saṃprati tavānukaromi līlām || 46 ||
ahaṃ bahudoṣaṃ doṣabahula⸤mārtadhvanibhir mukharaṃ cāhitam andhakam eva caraṇena niṣpīḍya tava līlām anukaromi | tvam api ⸤hi bahudoṣaṃ viṃśatibhujasahitaṃ rāvaṇaṃ caraṇenāṅghriṇā kevala eva niṣpīḍitavān_ || 46 ||
saṅgrāmavartmani bhayānakatāṃ gatena
cakreṇa nātha dadhatāpi sudarśanatvam |
rāhor ahāri hariṇāśu yadottamāṅga-
m āsaṃs tadā ditisutāḥ kva samīkaśauṇḍāḥ || 47 ||
L⸤sudarśanatvaṃ ca surūpatā sudarśana ity abhidhānaṃ ca || 47 ||
Letena kiṃ nu kavalīkṛtasūryacandra-
bimbena rāhuśirasā sphuratāntarikṣe |
cāmuṇḍayā kim iti muṇḍam akhaṇḍam eta-
d utkṛtya māṃsam adhunā dhriyate na pāṇau || 48 ||
nabhasi sphuratā anena rāhoḥ ⸤śirasā kim_ | na kiṃcit kāryam ityarthaḥ | etac ca śiraścāmuṇḍayā māṃsam utkṛtya kim iti ⸤pāṇau muṇḍaṃ na vidhīyate | muṇḍakaraṇa eva yogyatvāt_ | candrasūryayos tu kavalanamuktam upahā⸤sāyaiva tasyābhinirvṛtteḥ | muṇḍaṃ śavaśirosthiśeṣam_ || 48 ||
baddhe balau balavatā madhusūdanena
bhinne hiraṇyakaśipau ca sakāñcanākṣe |
duraṃ vyapāstam adhunā bhujadaṇḍadarpa-
kaṇḍūvinodanasukhaṃ danujāhave vaḥ || 49 ||
kāñcanākṣo hiraṇyākṣaḥ ⸤|| 49 ||
tadvāḍavaṃ vadanamātraṃ manaucitīstha-
m aurvānalaḥ katham ivādhivased udarciḥ |
tasyāspadaṃ kavalitākhilavāhinīśa-
tigmatviṣaḥ kupitavīrakṛtāntavaktram || 50 ||
aurvānalo vaḍavāyā mukhaṃ katham adhivased adhiśayīta | tasyānucitatvāt_ | ⸤ucitasya bhāva aucitī | striyām īkāraḥ ṣyaṅaḥ ṣitkaraṇāt_ | tasya tu vā⸤hinīśair jaladhibhiḥ kavalitacaṇḍatejasa āspadaṃ kṛtāntāyamānasya vīrasyaiva vadanam_ | ⸤kim ity ākāṅkṣāyām_ | aucitīstham ity apekṣyam arthasāmarthyāt_ || 50 ||
tejasvitām upagato 'pi mṛduḥ prakṛtyā
kārye kvacin na khalu gaṇyata eva nūnam |
madhye kilāhutibhujām atanuprakāśa-
m icchanti pañcatapasas tapanaṃ na candram || 51 ||
āhutibhujo 'gnayaḥ | ⸤pañcatapasaḥ pañcatejaḥsu tapaścarataḥ || 51 ||
udvṛttamattakarikūbarivājipatti-
duḥsaṃcaratvam upajagmuṣi saṃgarāgre |
kṛttārikaṇṭhaghanaśoṇitapaṅkilāpi
nistriṃśayaṣṭir amalaiva bhaṭasya pāṇau || 52 ||
amalaiva niyamena dyotate | kṛtakāryatvāt_ L⸤|| 52 ||
Ltejo vikāsi dadhataḥ karacakravāla-
līlāgṛhītakakubhaḥ śucimaṇḍalasya |
bhānordinasthitir ivāparivṛttiśūnya-
m aikātmyam eva bhajate kṣitipasya lakṣmīḥ || 53 ||
karā daṇḍā raśmayaś ca || 53 ||
jyotsnāvitānaparipāṇḍuruco na jātu
kīrter jano bhajati bhājanatāṃ vijihmaḥ |
daṇḍatvam eti kuṭilo jayavaijayantyāḥ
pratyagrakaṇṭakaśikhājaṭilo na vaṃśaḥ || 54 ||
54 ||
tucchopamānapadavīm upajagmuṣāpi
niḥsāratām api gatena jaḍātmavṛtteḥ |
kroḍe nyadhāyi hariṇena padaṃ yad asya
candrasya paśyta phalaṃ tad anūṣmatāyāḥ || 55 ||
ūṣmā saṃtāpo garvaś ca || 55 ||
taj jāḍyasaṃbhṛtivijṛmbhitam eva tasya
tejasviśabdasadṛśaṃ vidadhāti nāsau |
nirhrīka indur asakṛttapanāvadhūta-
cchāyo 'py udeti niśi yat pratikāraśūnyaḥ || 56 ||
56 ||
ājanmano 'pi capalā niyamena tatra
lakṣmīḥ kathaṃ na nivased aravindakhaṇḍe |
tiṣṭhanti yasya pariṇāmaśucāvakhaṇḍa-
koṣasthiter guṇagaṇāḥ sakṛd eva daṇḍe || 57 ||
⸤pariṇāmaśuciḥ paripākapāṇḍuraḥ paryantanirdoṣaś ca | sakṛdyogapadyena | daṇḍo nālaṃ caturthaś coL⸤pāyaḥ || 57 ||
śāntiṃ na yāty aparathā paraviprakāra-
pāṃsur jagaty atanusaṃbhṛtir eṣa tāvat |
tigmābhitāpaśamanāya kṛpāṇamegha-
dhārājalāny aviralaṃ na patanti yāvat || 58 ||
58 ||
Lādhāradhāmni racitasthitir alpake 'pi
tucche 'pi tejasi parisphurati sphuṭaṃ śrīḥ |
dīpo 'pi muñcati śikhāṃ bhavanāndhakāra-
nirvāsanāya kim utāvasare pravīraḥ || 59 ||
ādhāro dīpasya tailam_ | tasya dhāma pātram_ | muñcatīti mu⸤ktir udvamanaṃ bandhotsāraṇaṃ ca | śikhā jvālā cūḍāś ca | andhakāraṃ mūrtam api daityādi || 59 ||
anyeṣu satsv api nisargavinirmaleṣu
manye mahājanadhurāṃ katicid vahanti |
ekaḥ sa kambur udabhūd vimalo 'mburāśe-
r yaḥ pūryate madhuripor mukhamārutena || 60 ||
⸤kambuḥ śaṅkhaḥ || 60 ||
tigmatviṣaḥ parimitākhilamānam eva
tejaḥ prakāśitajagatsthitam atra bimbe |
tejasvinaḥ punar aparyavasānam eva
manye tad atra hṛdaye nivasaty asahyam || 61 ||
mānaṃ parimāṇam_ | paryavasānam iyat tā || 61 ||
bhrūbhaṅgam āśu diśatolbaṇaroṣarūkṣa-
m akṣṇoś ca rāgam upapādayatāsahiṣṇoḥ |
vāmabhruvām atanumānaparigraheṇa
ceto dunoty abhimukhaṃ sphurito 'dharo 'pi || 62 ||
vāmabhuvām api ⸤saṃbandhy adharo mānavaśād abhimukhaṃ sphuritaś cittam asahiṣṇor upatāpayati, kiṃ punar arātir evaṃ ⸤sphuritaḥ | athavā mānavaśād asahanaśīlasya puṃsaḥ saṃbandhyadharaḥ sphuritaḥ strīṇām api mā⸤nasaṃ dunoti, kiṃ puna viṃjigīṣūṇām ityarthaḥ || 62 ||
vistāraśālini hṛdi prathimānam āpya
lokās trayaḥ kila vasanti rathāṅgapāṇeḥ |
saptāpi dhīrahṛdaye savikāsam eva
tiṣṭhanti te sphuṭam iti sma mamaiṣa tarkaḥ || 63 ||
mamaiṣa tarko bhavatīty adhyāhṛtasya bha⸤vateḥ smo bhūtakālāvac chedaṃ dyotayati || 63 ||
Lājanmano 'py akṛtapūrvatayā pareṣāṃ
sādhāraṇatvarahitāṃ puruṣaprakāṇḍaḥ |
pratyagratārakaguṇāṃ nijapauruṣasya
cchāyāṃ vimuñcati niśām iva śītaraśmiḥ || 64 ||
tārayanti bhayād vipado veti tārakāḥ L⸤śaraṇyā nakṣatrāṇi ca || 64 ||
kāryaṃ bhavet kvacana kiṃcid aṇīyasāpi
sthūlair alaṃ tanubhṛtām upayogavandhyaiḥ |
kṣmābhṛttaṭeṣu varam astu tṛṇolapādi
kiṃ gaṇḍaśailanikaraiḥ pṛthugaṇḍakalpaiḥ || 65 ||
bahūnām atra mahatāṃ saṃnidhau kim evaṃ bhavatā kṣadrakeṇābhi⸤dhīyata ity āśaṅkyāha—kāryam iti | tanubhṛtāṃ madhye svalpatareṇāpi kāryaṃ kvacid bhavet_ | ⸤upayuktatvāt_ | tṛṇolapaṃ balvajākhyaṃ tṛṇam_ | tasya ca tanīyaso 'pi yuktatābhyupagamo ra⸤jjvādikāryakaraṇāt_ | gaṇḍaḥ piṭakaḥ || 65 ||
niṣṭhyūtadīdhitiśikhādalitāndhakāra-
rāśir varaṃ maṇir asau tanur apy anarghaḥ |
kṣoṇībhṛtāṃ kaṭakavartmani kiṃ nu kṛtya-
m aṃśuśriyā virahitair nanu gaṇḍaśailaiḥ || 66 ||
varaṃ maṇir iti liṅgabhedena nirdeśaḥ sā⸤mānyopakramāt_ || 66 ||
lūtākṛto varam asau jagatīha tantu-
r āruhya nākam adhirohati kīṭako yam |
astācalasya śirasonnatiśālinā ki-
m ālambanaṃ na taraṇeḥ patato divo yat || 67 ||
lūtākṛto jālakāraracitaḥ | latākṛto jālakārasyeti tu ṣaṣṭhīṃ ⸤kecid ācakhyuḥ || 67 ||
tuṅgātmatāstaśikharasya mudhaiva bhāno-
r nālambanaṃ bhavati yat samaye prapitsoḥ |
ślāghyaḥ sa tāmarasanālaguṇo 'pi daitya-
bhītyā yam etya marutāṃ patir ālalambe || 68 ||
marutāṃ patiḥ surendraḥ || 68 ||
āplāvitakṣititalā vaḍavāgninaiva
sā dahyatāṃ jalanidher varam ambhasāṃ śrīḥ |
Lśaktā na yonnatikṛto vapuṣaḥ pramārṣṭu-
m aṅkotthitasya śaśino 'pi kalaṅkalekhām || 69 ||
unnatikṛto jaladher evollasāL⸤hetoḥ || 69 ||
ūrdhvaṃ gatābhir avaṭāspadapādapasya
śākhāśikhābhir alam unnatiśālinībhiḥ |
ślāghyām adhogatim api skhalatāṃ kadāci-
d ālambakāraṇam avaimi jaṭāvalīnām || 70 ||
avaṭaḥ śvabhram_ | jaṭā mūlāni || 70 ||
bhrūbhaṅgam āracaya niṣṭhuraroṣarūkṣa-
m udvartayekṣaṇapuṭau daśa dantavāsaḥ |
hārāṃl lunīhi paripiṇḍḍhi mithaḥ karāgra-
yugmaṃ jahi kṣititalaṃ paṭupārṣṇighātaiḥ || 71 ||
bhrūbhaṅgam āracaya bhrukuṭim āraca⸤yati | ‘samuccaye 'nyatarasyām’ iti loṭ_ | tasya ca hirādeśaḥ | evam udvartayetyādau | ⸤piṇḍḍhīti piṣerdhitvaṣṭutvajaśtveṣu kṛteṣu rūpam_ | jahīti ‘hanter jaḥ’ iti jabhāve kṛte || 71 ||
āsphālayāṃsaśiharaṃ śikharānukāri
garjābhranādamukharasthiti bhinddhi dhairyam |
itthaṃ vṛthā viphalamatsaram īhamāna-
m etan na saṃprati vibhāti sadaḥ smarāreḥ || 72 ||
⸤viphalaḥ śatrudhvaṃsākaraṇāt_ || 72 ||
(yugalakam_)
na bhrūvibhaṅgaracanā vadane na cāṃsa-
deśāhatir na daśanacchadadaṃśayogaḥ |
krodhānubhāvaghaṭanena vinā kṣaye 'gni-
r bhasmīkaroti bhuvanāni ca duḥsahārciḥ || 73 ||
73 ||
helāvaropitakulācalacakravāla-
lokāpavartanasamarthabhujāḥ kva yūyam |
saṃrambha eṣa ca visaṃvadadānanendu-
bimbadyutiḥ kva bhavatāṃ ditijāhaveṣu || 74 ||
avaropitaṃ nirloṭhitam_ | (apasado 'dhamaḥ) L⸤|| 74 ||
Lsaṃkṣepa eṣa gadito vacanaprapañca-
saṃcodanena kim ivorjitatejasāṃ vaḥ |
daityendraḍāmarasamīkaniyogam eva
vākyārtham atra mama kiṃ vibudhā manudhve || 75 ||
ḍāmarāḥ śūrāḥ | teṣāṃ samare niyogam eva madvākyasyābhidheyaṃ kim iti nāvaga⸤cchata | tasyaiva sāṃpratam ucitatvāt_ | niyogaḥ preraṇaṃ bhāvanā ca | niyogam eva ca vākyārthaṃ ⸤budhāḥ kecid amaṃsata || 75 ||
vighaṭitaguruparvotsedham abhyunmiṣan me
dahatu ditijavaṃśaṃ krodhahuṃkāravahniḥ |
punar api puruhūtaḥ svāṃ purīṃ ratnasānā-
vadhivasatu pureva stūyamānaḥ suraughaiḥ || 76 ||
parvāṇy utsavāḥ saṃdhayaś ca | utsedho bāhulyam unnatatvaṃ ca | ⸤ditijānāṃ vaṃśo 'nvayaḥ | ditijo 'ndhaka eva vaṃśo veṇuḥ | ratnasānuḥ sumeruḥ || 76 ||
⸤iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānaka⸤śrīratnākarasya kṛtau ratnāṅke haravijaye mahākāvye 'gnidaṃṣṭrārabhaṭī⸤varṇanaṃ nāmaikādaśaḥ sargaḥ |
⸤iti rājānakajayānakasūnor alakasya kṛtau haravijayaviṣamapadoddyota ekādaśaḥ sargaḥ ||