athosāhavateva śrīḥ pratītiḥ kavineva ca|
darśakena purī prāpi prasenajidadhiṣṭhitā|| 1 ||
Hahn 2007
- Siglum: MH07
This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.
More ▾
| Title | Kapphiṇābhyudaya |
| Author | Ratnākara |
| Physical description | |
|---|---|
| Language/Script | Sanskrit in Latin script. |
| Format | book |
| Material | paper |
| Extent | 239 pages. |
| History | |
|---|---|
| Date of production | 2007 |
| Place of origin | Kyoto |
Published in 2007 by Hōzōkan Publishing Company in Kyoto.
- MH07
XVI. Dūtādhikṣobha
dānadādīnadānāmbuvimardoddāmakardame|
naikapād api caskhāla caran dharmo yadantare|| 2 ||
samastambhāvayantyaḥ khaṃ sadvārāḥ sālakānanāḥ|
yā babhāra valīkāntacchāyāḥ śālā vadhūr iva|| 3 ||
iṣṭān mudā havirdhārādurdine yāti yatpathe|
yajñadhūmāsitapaṭā mokṣalakṣmī abhisārikā|| 4 ||
vibudhair apsaromatyā śatakratuparītayā|
bhūdarpaṇe 'marāvatyāḥ pratibimbāyitaṃ yayā|| 5 ||
saṃkhyākhyam adhunāpīndur yatra kuṭṭimasaṃkramāt|
lagnāṃ dhatte calaccārustrīpādālaktakacchavim|| 6 ||
na vināyakavikrāntā na durgānanarocitā|
īśvarāyatanatve 'pi na kumārāvṛtā ca yā|| 7 ||
yā cakre 'rkāṃśusamparkagaladgalvarkapāvakaiḥ|
ratnasālair dviṣaddoṣajuṣāṃ nīrājanaṃ diśām|| 8 ||
āryaloko 'rkabhāsaś ca yatra tulyaṃ mahātapāḥ|
bhūmibhāgo 'tha kavayaḥ samayā āsan vimatsarāḥ|| 9 ||
kaleḥ palāyamānasya tāpitasya sukhāgnibhiḥ|
todanair iva yā yūpair dadau diśi diśi vyathām|| 10 ||
reje vihāravicchittiḥ sugatānugrahāsitā|
sarvataś caityayā mūrtyā mokṣavallabhaṃ ādṛtā|| 11 ||
sa tāṃ satāṃ sammatātmā parītya purudhīḥ purīm|
jagāhe virajā rājadvāraṃ dūto ditadviṣaḥ|| 12 ||
abhiviśya viśāṃ patyur vidito vadatāṃ varaḥ|
sabhāṃ sambhāvanālabhyaṃ sabhyaḥ so 'bhyāsaṃ ānaśe|| 13 ||
sa reje rājake sajjan nṛpasyendor ivāntike|
tejasā tāratāreṇa tārārāśāv ivośanā|| 14 ||
taṃ tataḥ saṃtatasyandisāndracandrikacandraruk|
ūce 'ñcitaṃ sitacchāyādīprasenaḥ prasenajit|| 15 ||
āropitā trivargārthopakramaiḥ saṃkramair iva|
kac cid añcati lokeṣu līlā līlāvatīpateḥ|| 16 ||
tuṣṭiḥ prakṛṣṭā vṛṣṭā nas tvāṃ teneha prahiṇvatā|
vāsaraṃ prastuvāno hi vyanakti āśā ravir nṛṇām|| 17 ||
tejasvī api śritaḥ praiṣyaṃ prabhor vakṣyakṣayāḥ śriyaḥ|
śākhī śaṃsati śaṃsārhān namraiḥ skandhair adho nidhīn|| 18 ||
rāajñas tvayy astaṃ ākūtaṃ svāśayād api dīpyate|
syād asahyataraṃ bhānos tejo 'mbupratibimbitam|| 19 ||
tvādṛśair goptṛbhir guptā na śīryante nṛpaśriyaḥ|
mṛdo mṛdvyo 'py alaṃ voḍhum ayaḥ pakvāḥ kṛsānunā|| 20 ||
nītaṃ tejas tvayi nyāsaṃ syād bhūyaḥ sulabhaṃ prabhoḥ|
ādatte prāta etyārkaḥ sukham agnyarpitaṃ mahaḥ|| 21 ||
dūrastho 'pi diśaḥ śāsti sahāyais tvādṛśair asau|
vyomasthaṃ pāyayanty arkaṃ kitaṇāḥ pārthivān rasān|| 22 ||
artho 'naṇīyān ākhyātas tvāṃ teneha prahiṇvatā|
dāritādriṃ tṛṇastambe dantaṃ nyasyati na dvipaḥ|| 23 ||
tad ugira giraṃ karṇe vikīrṇodīrṇanirvṛtim|
tvaddṛṣṭihṛṣṭayā dṛṣṭyā mātiśāyi śrutir mama|| 24 ||
dūtākūtasudhāsūtiśrīvyaktiśaradām iti|
viracayyaucitīṃ vācāṃ virarāma mahīpatiḥ|| 25 ||
svārthecchāyamunākṛṣṭibalalāṅgalalekhikām|
dūto 'tha pratibhodgāragurvīm udagirad giram|| 26 ||
tadvṛddhisahavṛḍhāya praśno līlāñcanāya kaḥ|
nanuudayād abhinnāsthaṃ vyomny aṃśūllasanaṃ raveḥ|| 27 ||
tvat svārthasiddhyupaghno 'yaṃ madvisargaḥ prabhor iha|
vakṣyan puro'rthaṃ prastauti rūpakeṣu āmukhaṃ kaviḥ|| 28 ||
tvat sambandhe gate prauḍhiṃ bhartur bhāsyanty alaṃ śriyaḥ|
bhāsante saudhasaṃkrāntāś ciraṃ candrasya candrikāḥ|| 29 ||
bhartur evānubhāvo 'yaṃ yad itthaṃ prātibhaṃ mama|
dyumaṇidyutibhir dṛbdhaṃ darpanaṃ dṛṣṭijaihmyadam|| 30 ||
tatpreṣaṇaprabhāvo 'yaṃ tvat priyaṃ yanmayā āpyate|
ambhaso 'bhreṇa vṛṣṭasya śuktau muktātmatā bhavet|| 31 ||
vaibhave 'py anahaṃkārāḥ śāktāv api mṛdukriyāḥ|
saumyās tejasy api syuḥ ke dvitrā api bhavādṛśāḥ|| 32 ||
śaktir nītyā nayo lakṣmyā lakṣmīr maitryā guṇair asau|
ta ātmanā ātmā buddhyāsau te dhīr vācānugamyate|| 33 ||
evaṃ guṇitve 'py arhādya svārthe te jāgarūkatā|
ātmaprayojanāndhaṃ hi viyuṅkte śrīḥ śarīriṇam|| 34 ||
śrīr anarādhite te syād vandhyā vindhyapurīpatau|
tanoḥ sarvāṅgavattve 'pi syando mūrdhnaiva sādhyate|| 35 ||
tvayy evam asvapakṣe 'pi prema prastauti naḥ prabhuḥ|
lakṣmaiṇalakṣmaṇo lakṣmyā lipyate maladāyy api|| 36 ||
majjanti naivonmajjanti tatpratāpe tava śriyaḥ|
āhlādanāya kiṃ jyotsnāś candrasya sati bhāsvati|| 37 ||
vipakṣaṃ hanti tejasvī pātrasāhāyake 'rjite|
ukhānikhāto hi sukhaṃ nayaty agnir apaḥ śuṣim|| 38 ||
tava svārthāya tasyāgre sarvasvasyārpaṇaṃ kṣamam|
śūre prakāśayat kośaṃ śrīḥ śliṣyati kuśeśayam|| 39 ||
parākrāntau viṣoḍhāyāṃ laghor abhyudayo dhruvam|
pāṃsoḥ padbhyāṃ hatasya syād antarīkṣaplutiḥ puraḥ|| 40 ||
anartho nāyam alpas ta yat tubhyaṃ sa prakupyati|
sarvaṃkaṣā hi tatkrodhāḥ kallolā jaladher iva|| 41 ||
prajāpreyāṃsam enaṃ tvaṃ priyākuru virādhya mā|
dhīmatāṃ nidhanātītaṃ ārādhyārādhanaṃ dhanam|| 42 ||
na balīyo.abhibhūtasya trāṇāyātmabhuvo 'py alam|
sahaivāṃśusahasreṇa pradoṣo grasate raviṃ || 43 ||
jñātāsvādāḥ śriyo rājyaṃ bhṛtyā mitrāṇi bāndhavāḥ|
ekasya mānasyārthe kaḥ kṛtī dhanam iyat tyajet|| 44 ||
na mānam alam atyaktvā bhūtiṃ prājño 'dhigacchati|
prāg vāntadhūmajālo 'gnir jvālābhir labhate 'nvayam|| 45 ||
tejasvimaṇḍale mitre tvāṃ tatrānupraveṣakam|
pravardhamānaṃ paśyantu krameṇendum iva prajāḥ|| 46 ||
svayaṃvarasrajeva tvāṃ śliṣṭamauliṃ tadājñayā|
yāvad āyur vṛṇotu śrīr anuraktā vadhūr iva|| 47 ||
spaṣṭasāma sagarvārtham itthaṃ ūcuṣi darśake|
krūrāmarśārjitavyājaṃ vyājahāra prasenajit|| 48 ||
kvāyaṃ ārya ivākāraḥ kva cedam kaṭu durvacaḥ|
aho vivṛtasāṃkāryā durjñeyāś cittavṛttayaḥ|| 49 ||
api yatnapramṛṣṭasya malam antar anujjhataḥ|
tāmrasyeva khaloktasya śyāmikā lakṣyate puraḥ|| 50 ||
amaṅgalānāṃ maṅgalyā kauśikānām ivāsatām|
tejo dadhānā śūraśrīr dṛṣṭirogāya jāyate|| 51 ||
hiṃsrāratiṣu rauderṣu malineṣv anyabādhanam|
īrṣyāmalaṃ khaleṣu āste viṣamāśīviṣeṣv iva|| 52 ||
hlādinī api prasannāpi tavāhaṃkāratejanāt|
mūrtir jātā jalasyeva vahnitaptasya dāhikā|| 53 ||
ke yūyaṃ yeṣv iyān yātu prahvabhāvam ayaṃ janaḥ|
kūpe maṇḍūkakalpo vā vintte nānyapramāṃ khalaḥ|| 54 ||
jinoktiyuktyā kuṇayaḥ parasvasvīkṛtau vayaṃ |
yuṣmābhir avivekāt tac chaktitaucchye samarthitam|| 55 ||
amuṣyākāṇḍabhūpīṭhagrāsagardhād udañcataḥ|
velācalāya sainyābdher buddhoktistambhitodyamaḥ|| 56 ||
anyathodyānayātreva svargākrāntyudyamo 'pi naḥ|
kaivāsthā śabare vindhyabhāji bhūbhuji tāvake|| 57 ||
kiṃ te matkrodhakṛd vākyaṃ dūtye bhrātary api kṣamam|
prāśnāti prāṇahṛd bhojyaṃ bhiṣaṅmaitrye 'pi nāturaḥ|| 58 ||
parājñābhāranamitaṃ śiraḥ sādhor nirūṣmakam|
nottambhayituṃ ākṛṣya śakyaṃ guṇaśatair api|| 59 ||
viḍambanaiva puṃsi śrīḥ parapraṇatipāṃsule|
kāntiṃ kām iva kurvīta kuṇau kaṭakakaplanā|| 60 ||
kim ojaḥ satyabhaṣitvaṃ kaḥ svārtho dharmasaṃgrahaḥ|
kā dhīr ātmapramājñatvaṃ kā śrīr mānonnatir nṛṇām|| 61 ||
mūrtir arkopalasyeva mameyaṃ dāhyadagdhaye|
śūratejaḥkṛtāmarśāj jājvalīti patākinī|| 62 ||
ayaṃ samāsaḥ kartāsmi yādṛśaṃ tasya śāsanam|
tad vo vakṣyati dūtīva matsenādhūlidhoraṇī|| 63 ||
ity ojasvisabhānandasindhusaṃdīpanendunā|
vivṛtya vacasā vāñchāṃ vyaramad vasudhādhipaḥ|| 64 ||
svapakṣarūkṣādhikṣepamārutakṣubhitaujasā|
ity udyatkrodhavāgjālaṃ jājvale darśakāgninā|| 65 ||
abhyāsābhyāgatabhraṃśair abjavuaor bhūyasā jaḍaiḥ|
kāle 'py uktaṃ hitaṃ patham apathyārthe samarthyate|| 66 ||
sāmyam eti guruḥ sāmnā kṣubhyaty evāmunā laghuḥ|
śāmyaty ayo 'mbhasā taptaṃ sarpiḥ sarpati tuucchakaiḥ|| 67 ||
laghavo 'rthalavasvāmyam adadur lalitakriyāḥ|
anusvaṃ manvate śocyān śakraśukrārthapān api|| 68 ||
sthāpyamāno 'pi pathyārthe 'nāryaḥ kāluṣyam aśnute|
parivāre ciranyastaḥ spṛśati śyāmikām asiḥ|| 69 ||
śakto balīyān īśaḥ san piprīṣur atathātmanā|
atīyate yat tatrāsya kiṃ bhāvy anyad abhāvataḥ|| 70 ||
visṛṣṭas tvayi tenāham anukampyo 'nukampayā|
tat tu tvayānyathā grāhi yamāya spṛhayālunā|| 71 ||
svabhāgyaparamāṇūnāṃ śeṣo 'ṃśas te kiyān api|
ya ugram api taṃ ślāghāṃ tvadarthe sāmny acīkarat|| 72 ||
anyathā kva laghuślāghyaṃ sāma kva ca sa kapphiṇaḥ|
yācñopakramapūrvaṃ hi harir neṣṭe mṛgavraje|| 73 ||
krodhāndhakāritamukhaṃ kuṭilo malavā~njaḍaḥ|
labdhvā bahulapakṣaṃ tat tvaṃ kṛśī bhavasīnduvat|| 74 ||
abhiṣeṇayatīśe naḥ kṣubdhe vābdhau yugakṣaye|
jalpa yady alpako 'py aṃśaḥ kṣiteḥ svastho 'vaśiṣyate|| 75 ||
ko 'laṃ vyomāṅulair mātuṃ mallaḥ ko mitaye 'mbudheḥ|
atipramāś camūs tasya ko 'vadhārayituṃ kṣamaḥ|| 76 ||
paṅgor ivārṇavollaṅgaḥ śiśor iva śaśigrahaḥ|
avahāsaphalo 'yaṃ te durmānaḥ kapphiṇāśrayaḥ|| 77 ||
āpṛcchasva śiryo bhogā~njyokkuru ūrje 'ñjaliṃ vaha|
svāgatenopatiṣṭhasva cirāt āgāmukaṃ yamam|| 78 ||
iyatīm eva velāṃ te yat kṣāmyāmi virādhyate|
saiṣā kārā krudhāṃ bhartur ājñāpekṣākadarthanā|| 79 ||
yac cātha buddhir bauddhīr me niyantīti traye tataḥ|
kvopāsakas tvaṃ jaine 'rthe kva ca rājyadhvajaṃ dhanuḥ|| 80 ||
mauṇḍyaṃ vihāraḥ kāṣāyaṃ jinopaghnam idaṃ vratam|
na tu maulir na śuddhāntaṃ nāṅgalīlā dukūlinī|| 81 ||
tad amūm eva vāñchāṃ te pūrayanti purā priyām|
dhāyena mūrdhno 'smatsvāmikṣuraprāḥ kṣuravat kharāḥ|| 82 ||
sāmarṣotkarṣam ity uktvā tyaktvā goṣṭhīm agād asau|
udāttas tadudantoktyā svasenādaṃśanodyataḥ|| 83 ||
sparśārthapasparśāsāmāmarśam iva mārutam|
sadaḥ sarasvān āsvādya kṣobhaṃ ābhyājagāma saḥ|| 84 ||
kurdhodagād girām ogho raghor araghuno raghu|
vaktrād abdher mahāvartāt kṣobhārambha iva dhvaniḥ|| 85 ||
pralayārkaprabhevābhut ārohantī bhayaprabhā|
kāmpilyakīrṇā kopaśrīr aśmakeśāśmaveśmani|| 86 ||
saṃkrāntikṛt karāgreṇa malitāṅge muhur muhuḥ|
rūpam aikṣiṣṭa roṣaśrīḥ kukure mukure yathā|| 87 ||
dīrghaṃ vāgjālaṃ ākṣipya krudhaṃ nāvam iverayan|
dviṣo mīnān ivoddhartuṃ niṣādho 'bhūt samākulaḥ|| 88 ||
mumuce mucukundena kundācchā cchavir indunā|
ketubhārūṣiteneva roṣeṇa muṣitatviṣā|| 89 ||
duḥsahaṃ sahadevena deveneva pragarjatā|
ghanodaye krudhāṃ bhūmau vavṛṣe paulakaṃ payaḥ|| 90 ||
manyuyakṣmāturas tūrṇaṃ prāsādenāvasīdatā|
pratyācacakṣe sakṣobho bhiṣajeva mahābhiṣaḥ|| 91 ||
labdharandhrā surandhrasya kopaśrīr nīcavāg iva|
paraprāṇāpahārārthe pravṛttā nānvatpyata|| 92 ||
kandor amandaṃ paspande kāye kālakrudhā bhujaḥ|
kalayan kāliyasyābhāṃ kālindīhradasādinaḥ|| 93 ||
yuyuje vīryaśauryaśrīr nirbharo 'nyair aluṇṭhitaḥ|
sindūrābhaṃ mukhaṃ bhartryā madrakaḥ krodhamudrayā|| 94 ||
trasadasyoḥ sadasy udya.mstrasadasyuḥ sadasyadut|
āsādya sadyo naiḥsādyaṃ krudādityo 'dyutad dyutā|| 95 ||
drumasya krodhaviṭapo yadaiva bhuvi paprathe|
yuddhādbhutādhvanīnānāṃ tadaivocchvasitaṃ balam|| 96 ||
śaśantīṃ śaśinīvolkāṃ sāveśām aśivāṃ śibau|
bhṛkuṭīṃ vīkṣya niścikyur lokāḥ kṣatrakulakṣayam|| 97 ||
purapraveeśābhimukhe dviṭcamūtāpatāpase|
cakre sauvīravarṇasya dīpanaṃ krodhagāthakaḥ|| 98 ||
rukmāṅgadaśirāsāraiḥ śvāsāgnyūṣmavilopitaiḥ|
bhujayor vyāyataṃ vyūye varmeva śaravarmaṇā|| 99 ||
prakṣobhārambhasaṃrambhabhagnāṅgadakadambakaḥ|
jagāhe raudraṃ ākāraṃ dviṣāṃ āṭaṅkadambakaḥ|| 100 ||
mukhe taraṅgiṇī krodhāṅgārāliṅganapiṅgalā|
ajasya jihvā garjorje meghe vidyud ivādyutat|| 101 ||
manor mukham amarṣoṣṇagharmāmbhobindudanturam|
utpātāgnikaṇākīrṇam indubimbam ibābabhau|| 102 ||
dantāgrakoṣaghoṣaṃ taṃ tarṣo kārṣīd amarṣataḥ|
pratīye sa paraiḥ krūraiḥ kṛtāntadhanuṣo dhvaniḥ|| 103 ||
didīpe dūtadurvākyasindhupūrapraveśanaiḥ|
sarvātmanaivākharvojāḥ śrutābdhyaurvahutāśanaḥ|| 104 ||
sasraṃse 'ṃsadharādhāro dhundhor muktāguṇas truṭan|
viṣauṣmavellanakliṣṭaḥ krodhāher iva kañcukaḥ|| 105 ||
dṛṣṭyaikṣiṣṭāṣṭako ghṛṣṭaḥ skandhajāṃ dhūmadhārikām|
bhaṅginīṃ bhujaśayyāyāṃ śauryaśrīkabarīm iva|| 106 ||
kopoṣṇaśvasitakliṣṭakaṇṭhamālyaṃ ruror uraḥ|
akāṇḍāmodadāridryaṃ dvirephānāṃ drutaṃ dadau|| 107 ||
raṇāraṇye 'naraṇyāgner amagnor jājvaliṣyataḥ|
diśaḥ prākprabhavaś cakre krodhadhūmo 'ndhakāritā|| 108 ||
tad itthaṃ krodhasaṃrambhasambhārakṣubhitaṃ sadaḥ|
meghaughaghoraghorasya kṣayavyomnas tulām agāt|| 109 ||
tair vyudaya sadasi āsthāṃ dhmāte pradhanadundhubhau|
gṛhān vigāhyāsahyorje prasahya samanahyata|| 110 ||
prasenajid api prāpya pūjārthair iṣṭadevatām|
dṛṣṭvā daśabalādeśaṃ diśaṃ ādiśata dviṣaḥ|| 111 ||
raṇaśrīsaṃgamautukyāt saṃvarmayati rājake|
saṃjagmire 'tha sakhy eva khinnāḥ śūrastriyaḥ śucā|| 112 ||
kācit kaṇṭhāśritā patyur yuyutsor aśruvāribhiḥ|
sāñjanair lohavarmeva pinanāhāṅgasecanaiḥ|| 113 ||
bhartur aṅgaprabhābhyaṅgāt saṃgatasvarṇavarmaṇaḥ|
piṅgā puro 'ṅganānyābhūd bhṛṣṭeva virahāgninā|| 114 ||
parasyāḥ prayiyāsantaṃ bāṣpadhārāndhakāritaḥ|
priyaṃ rurodha dūrodho netradurdinanīradaḥ|| 115 ||
udastayā priyāyānyā puṇyāhotpalamālayā|
dhūmālyeva viyogo 'gner aśūnyaprakṛtir babhau|| 116 ||
anuvrandha suvisrastā kāñcīcaraṇayoḥ śucā|
anyasyā na tathārautsīd gatiṃ tat preyaso yathā|| 117 ||
sāsrā dṛṣṭir navoḍhāyāḥ patyuḥ pādāgrakīlitā|
prāvartayata khinnāyāḥ pāratantryaṃ parikrame|| 118 ||
āpraśnāyārthitā patyā priyā doḥkandalīdvayam|
yat kaṇṭhe 'kṛta tat tasya rakṣāsūtrakatām agāt|| 119 ||
mukhāmodabhramadbhṛṅgam abhinnasvedabindukam|
kāpi śokāgnibhasmāṃśaśāraśrīr āvahan mukham|| 120 ||
lipte lalāṭe bhṛṅgālī bhartṛpravasanocitam|
upādikṣad ivaiṇākṣyā lambālakalatāvratam|| 121 ||
sāñjanair aśrubhiḥ pānapārīṃ pāyayati priye|
ninye 'nyā śvāsaśokāgnidhūmaugheneva nīlatām|| 122 ||
līlāmbhojaṃ navoḍhāyāḥ savepathukare sthitam|
cāṭuneva calac cakre preyaso gativāraṇam|| 123 ||
kavāṭenārdharuddhāṅgī yātaḥ patyur vilokane|
virahakrakacakliṣṭā cchidāṃ āgād ivāparā|| 124 ||
śokaślathabhujaśliṣṭair valayaiḥ padavīṃ parā|
vyadhād baddhakramaiḥ patyuḥ pūrṇāṃ pāśaśatair iva|| 125 ||
asmitaprasavāmlānāṃ rūkṣāṃ kliṣṭoṣṭhapallavām|
priyapravāsagrīṣmoṣmā kāṃ cic cakre vadhūlatām|| 126 ||
te sāsthaṃ ca sarāgaṃ ca soṣma sā śaṃcayur bhaṭāḥ|
yayuḥ purandhrīdṛkpātair dhīdhyānais tu surāṅganāḥ|| 127 ||
tataḥ śrotātithībhūtatūryodbhaṭaravā bhaṭāḥ|
okobhyo niragus toṣād upāyebhya ivodayāḥ|| 128 ||
śūnāśvaśreṇigarjam gamajarajavasyandanasyandidarpe
sarpatsampattipattidhvanitadharadhanuḥsāyakāsārasāram|
dīpraprāsaprahāsānalasalasadasipreddhavṛddhadhvajardhi-
preṅkhanniḥsaṃkhyaśaṅkhasvanam avanibhujāṃ sainyaṃ āvirbabhūva|| 129 ||
kṣundantaḥ kṣmāṃ ketubhiḥ khaṃ likhantaḥ
kṣiṇvanto 'kṣīṇi ākṣipantaḥ kṣitidhrān|
kalpabhraṃśābhodbhaṭāḥ sainyasārhāḥ
celur yuddhāyādhvanā te śivena|| 130 ||
kapphiṇābhyudaye mahākāvye dūtādhikṣobho nāma ṣoḍaśaḥ sargaḥ||