gāyaṃ gāyaṃ niravadhi vadhūsaudhasenām abodhaṃ
kāmakrīḍākumudakalikākuṭmalībhāvamūlam|
itthaṃkāraṃ janitarajanījyānisaṃkalpakalpāḥ
kalyaṃ bhartre bhuvam acakathan vandino vandanābhiḥ|| 15.1
Yokochi
- Siglum: YY
Kapphiṇābhyudaya, Yuko Yokochi
More ▾
| Title | Kapphiṇābhyudaya |
| Author | Śivasvāmin |
| Physical description | |
|---|---|
| Language/Script | Sanskrit in Latin script. |
| Format | digital |
| Material | digital |
| Extent | 3 cantos so far. |
| History | |
|---|---|
| Date of production | 2020 |
| Place of origin | Kyoto |
Published in 2020 by in Kyoto.
- YY
provisional version to be revised later this year
garjājātaṃ janitajaṭharāveśam āśāsv athedaṃ
prātiprātaḥprahatamurajāmoghameghaughamuktam|
sadyaḥ saṃsthāṃ nirasisiṣate yena naibhṛtyalīnā
nidrāhaṃsī nalinanayanānetranīlābjapuñje|| 15.2
kāraṃ kāraṃ nidhuvanavidhīn utkalaklāntikṛcchrād
ārdrāṃ nidrām adhigatavatāṃ rāgabhājāṃ kathaṃ cit|
duḥkhaṃ datte vadanapavanāpūritaḥ kālyakambuḥ
śuddho 'py antyair bhavati capalo dūralambāntaraḥ san|| 15.3
dhyātāsannapratigamatamomiśrarāgodgamasya
śliṣyaddṛṣter abhimatamukhe saudhavātāyane ca|
saśvāsasyāśithilitabhujāliṅganasyojjihīte
ko 'pi svādo 'bhisaraṇavadhūtūrṇaratyutsavasya|| 15.4
atyautsukyāt paravaśadṛśo yām anirvarṇitāṅgāḥ
prāpuḥ snehe 'py aviditarasāsvādanāṃ pūrvarātre|
tām anyonyāvayavavicaraddṛṣṭi suptaprabuddhāḥ
kāmakrīḍāṃ dviguṇitarasāṃ kāmukā nirviśanti|| 15.5
srastasvāpās tudati virute tāmracūḍasya cetas
trastā rāmāntaraparigamāśaṅkanenābhisartryaḥ|
koṣaṃ bimbādhararasamayaṃ dhairyatoyālavālaṃ
bhūyo bhūyaḥ pratigamavidhau preyasaḥ pāyayanti|| 15.6
apy āviṣṭaś caṭuṣu yuvater nātmakaṇṭhātithitvaṃ
yad dorvallīvalayam aśakan netum ārdrāparādhaḥ|
ninye rantus tad uṣasi kalaṃ kambunā kūjatoccair
antaḥśūnyād api hi sumukhe vedhasi syāt phalaśrīḥ|| 15.7
jṛmbhārambhe vicalitabhujāsphālitā yā ca tanvyā
yā ca dhmātā dhvanati rajaner atyaye kambupaṅktiḥ|
rantuś ceto vyathayati tayoḥ pūrvikā nottarāvat
sāyūthye 'pi prabhavati ruje kaḥ suvṛttotsavīva|| 15.8
nidrāśeṣāruṇajaḍadṛśo 'dhyāsya talpāparāntaṃ
prāk sambuddhāḥ suratasuhṛdām aṅkam āropya pādān|
khelapreṅkhatsavalayabhujāvalli saṃvāhayanti
prātaḥ premaśriya iva gṛhe vigrahiṇyo gṛhiṇyaḥ|| 15.9
labdhvā bodhaṃ divasakariṇaḥ kīrṇanakṣatramālaṃ
dīrghād asmād gaganaśayanād ujjihānasya darpāt|
sajjaddānodakatulamalo jarjarābhīṣurajjur
bhraśyaty eṣa praśithila iva śrotraśaṅkhaḥ śaśāṅkaḥ|| 15.10
ālokenātanutamatamomoṣakenāpy amūṣāṃ
naivāsmābhir jitam urudṛśāṃ viprayogāndhakāram|
itthaṃ bibhraty avanataśikhair ātmabhir dahyamānā
vrīḍāveśād iva ratigṛhe pāṇḍimānaṃ pradīpāḥ|| 15.11
jyotsnājālānvayikarakulaṃ gauravasyaikam oko
jyotiścakraṃ paricitam amūm aṅgalagnāṃ niśāṃ ca|
saṃtyajyenduḥ pravasati javāl lāghavaṃ dūram āptaḥ
pānthaiḥ panthā na hi na sugamo 'nūḍhabhūyiṣṭhabhāraiḥ|| 15.12
rāgikrīḍāmalitakusumāmodadhūpāṅgarāga-
śleṣaślāghyaṃ parimalam asatkutsam āditsateva|
abhyāveṣṭuṃ ratigṛhaguhāṃ gandhavāhena kālyaṃ
preryante 'mī param ararayo harmyavātāyanānām|| 15.13
talpatyāgāvasaravidhutā dūram airāvaṇāṅgād
utsarpantī divasapavanair bhūtidhūlicchaṭeva|
dīrghāṃ kṛtvodayagiriśiraḥśreṇisīmantalekhāṃ
prāhṇālokacchavir atha diśi vyajyate vāsavasya|| 15.14
ānandāśruprasarasarasair īkṣitaiś cakranāmnām
abhyāvṛttipraguṇanihitair dhautadhautāntikeva|
āvirbhāvapraṇayidivasālokaliptā malaughair
meghair dūraṃ dig amarapates tāmasais tyajyate 'sau|| 15.15
līlodastāruṇakaraparāmarśavattārakāntā
vyāttenāhnaḥ śvasanasurabhiśvāsabhājā mukhena|
bhāsvatpādaprasaraṇasamātanyamānāmbareyaṃ
prātas tūryair iva khagarutair jṛmbhate vāsaraśrīḥ|| 15.16
yāvad yāvad yuvativalitotsaṅgavidyādharāṅga-
krīḍākḷptaklamaśamasukhāḥ svargavātā vahanti|
tāvat tāvat taralataralaṃ tārakācakram eti
klāntiṃ vṛntaślathimavad iva bhraṃśi phullaṃ dyuvallyāḥ|| 15.17
āvīśvāsopamamarud adhiprācyaśailāśmaśayyaṃ
kurvāṇāyāṃ divi navanavāṃ vāsarasya prasūtim|
āvirbhāvo bhavati rudhirāsāravisrasya sadyaḥ
sāṃkrandanyāṃ kakubhi kalalasyeva sandhyātapasya|| 15.18
dainyaṃ daivād upakṛtikṛti klāntikīrṇe 'vatīrṇe
nāśvāsāya prakṛtimahatām āśayo nojjihīte|
yat tejobhis taralitatamoviplavaiḥ plāvitormer
indor aṅkaṃ diśati patato niścayāt paścimābdhiḥ|| 15.19
āśāvallīkisalayatatir vyomanīlābhravidyut
prācyādrīndradvipapatiśiraścīnapiṣṭābhivṛṣṭiḥ|
dhvāntacchāyātaparucir ahaḥkālakālāhijihvā
rājaty eṣā ghanakaṣadṛṣatsvarṇalekhāgrasandhyā|| 15.20
śokaṃ kokāḥ kumudam alayaś candrapādā digantān
dīpā vartīr abhimatabhujābhyantaraṃ cābhisartryaḥ|
jaihmyaṃ kāṣṭhā niṣadanam ibhā barhiṇo vāsayaṣṭīr
vyomopāntās timirapaṭalīṃ tulyam eva tyajanti|| 15.21
vāraṃ vāraṃ malitakusumāmodasammardamiśraṃ
pītvā pītvā madhuparimalaṃ vāsageheṣu vāyuḥ|
kṣībaḥ kṣībaḥ kṣaṇam api mṛgaprekṣaṇīnām atṛpyan
bhūyo bhūyaḥ surabhiṣu luṭhaty unnateṣu staneṣu|| 15.22
ānītasyāvatamasamalair maṃsalair vipralambhaṃ
jyotsnājāle jala iva śuciny ādito majjayitvā|
kāṣṭhāsaṅgajvalanata iva kvāthyamānaṃ kaṣāyaṃ
sandhyārāgaṃ divasarajakaḥ kalpayaty ambarasya|| 15.23
āvaśyāyātiśayaśiśirair āplutās tīrthatoyair
yuktā muktāmalajalakaṇasyandinībhiḥ śikhābhiḥ|
hastair homopakaraṇasamitpuṣpabarhirvihastair
viprā vedā iva savapuṣo vahniśālaṃ viśanti|| 15.24
pūṣṇā naktaṃ nihitamahasaś cityacitrārciṣo 'mī
pītvā pītvā vidhihutam upāsannasānnāyyam ājyam|
tejaḥpratyarpaṇam iva puraḥ saṃvidhātuṃ kharāṃśor
ārohanti jvaladuruśikhāśreṇiniśreṇibhir dyām|| 15.25
gopīhastaiḥ stanamukharasaśleṣitacyāvitāsyās
tarṣāt kṣīrasnutirutim athotkarṇam ākarṇayantaḥ|
gobhir līḍhājaṭharakakudāḥ sampratīkṣanta ete
ghoṇāsvādollasitarasanās tarṇakā dohaniṣṭhām|| 15.26
netrākṛṣṭivyatikaravaladdaṇḍadaṣṭāṅgulīnāṃ
cakrācchoṭocchalitakalaśīśīkarārdrāmbarāṇām|
bhugnābhugnabhramibhujalatābhaṅgibhinnastanīnāṃ
manthe kunthaddadhani harate vellitaṃ vallavīnām|| 15.27
hīnāṅgānām api hi niyatāsevināṃ nūnam ādau
vyañjanty eva śriyam alaghavaḥ svām upekṣyāpi lakṣmīm|
nītaḥ pūṣṇā yad ayam udayaṃ svodayāt pūrvam eva
prāptas tejo bhuvanaracanāsūri dūrād anūruḥ|| 15.28
yāvad yāval lalitaracanācāru caṅkramyate 'sau
sīmni vyomnaḥ śitimaṇiśilākuṭṭimābhe dinaśrīḥ|
tāvat tāvat taruṇatapanātāmratāpacchalena
drāg ārdrārdraṃ patati caraṇālaktakacchāyam asyāḥ|| 15.29
ambhojeṣu ślathadalaviśannaiśatoyāṃśaśīta-
sparśabhraśyatsvapanam alinām jhaṅkṛtaṃ śrūyate 'ntaḥ|
preṅkhatpādaprasaraṇavidhi prāpnuvantyāḥ prabodhaṃ
mañjīrāṇām iva jhaṇajhaṇāśiñjitaṃ mañju lakṣmyāḥ|| 15.30
aṅge strībhiḥ priyaparimalāśaṅkayā ślāghitaśrīḥ
kiñjalkāśāśrayibhir alibhiḥ saṃghaśaḥ saṃghitaughaḥ|
kṣībaiḥ sāsthaṃ sthitamadhudhiyā rukmapārīṣu dṛṣṭaḥ
kalyaṃ kālīyakakapilimābhyeti bālātapo 'yam|| 15.31
tejorāśau bhuvanajaladheḥ plāvitāśātaṭāntaṃ
bhānau kumbhodbhava iva pibaty andhakārotkarāmbhaḥ|
sadyo mādyanmakarakamaṭhasthūlamatsyā ivaite
yānty antaḥsthāḥ kulaśikhariṇo vyaktivartma krameṇa|| 15.32
dhvāntaṃ dhāmnā dhavitum avituṃ lokam ālokalakṣmyā
prāptasyādrir vahati śirasā bhāskarasyaiṣa pādān|
prāyas tuṅgaprakṛtibhir iha ślāghanīyodyamebhyaḥ
satkārārthavyatikaraśuci vyajyate gauravaṃ hi|| 15.33
pratyakpādaprakaṭakaṭakinyāsapūrvavyudasta-
prācyaprāñcaccaraṇanaṭanottānitāmandatundāḥ|
ārohanti ślathacalavalaccāmaraiḥ kandharāgraiḥ
phenacchāyācchuritaharito hāridaśvāḥ kham aśvāḥ|| 15.34
saṃdhyādhyānapraguṇitajapair mantravādipradhānair
dṛṣṭā mṛṣṭe gaganamukure 'mutra kṛtvāvatāram|
naṣṭān naṣṭāñ jhagiti jagato lambhayantī padārthān
eṣā toṣaṃ diśati manasaḥ pūṣamūrtiprasenā|| 15.35
śaileṣv arkopalatalalaladvahnitalpasthaleṣu
sthitvā sthitvā tata iva tataṃ saṃgataiḥ ploṣadoṣam|
āśvāsāya sphuṭaṃ iva śanaiḥ śītale padmaṣaṇḍe
sampraty etair avataravidhiḥ sādhyate sūryapādaiḥ|| 15.36
āmṛdnantas tama iva saraḥsīmni sambhūya paṅkaṃ
tārāsārthair iva patiśucā phenakaiḥ śliṣṭapādāḥ|
bhānty ādaṣṭasphuṭabisalatācuñcubhiś cañcucakraiś
cakrā vandīkṛtavirahakṛccandralekhā ivaite|| 15.37
vṛtte patyuḥ pravasanavidhau rātrirājaḥ kalatraṃ
klāntaklāntām abhi kumudinīṃ mantharaṃ tasthivāṃsaḥ|
tatkiñjalkaprasaradhavalā bibhratīha dvirephāś
cintājihmasthitapalitavatkañcukicchāyam ete|| 15.38
svacchāyātarjitendudyuti nikhilajanānandasaṃdhānabandhu
lakṣmīsāraṃ śiraḥsu sthiram avanibhṛtām uhyamānaṃ samūhaiḥ|
utkhātāśeṣadoṣaṃ saha tava yaśasā labdhadikcakracaryaṃ
stād bhāsvanmaṇḍalāgrasphuritakṛtam adaḥ suprabhātaṃ sukhāya|| 15.39
iti giram upakarṇya māgadhīyāṃ
ślathaśayanaḥ suhṛdo gṛhe 'pi ratvā|
svapuram atha śivaṃ pratīpam etya
kṣitipatir āsta sa darśakapratīkṣaḥ|| 15.40
kapphiṇābhyudaye mahākāvye prabhātavarṇano nāma pañcadaśaḥ sargaḥ||