rasarabhasayā rāgasthityā muhuḥ priyalālasaṃ
ciraguṇitayā mānāvṛtyā muhuḥ pihitaspṛham|
madhumadamudā lebhe lubhyann adurlabhavallabho
nidhuvanavidhikrīḍālambaṃ nitambavatījanaḥ|| 1 ||
Hahn 2007
- Siglum: MH07
This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.
More ▾
| Title | Kapphiṇābhyudaya |
| Author | Ratnākara |
| Physical description | |
|---|---|
| Language/Script | Sanskrit in Latin script. |
| Format | book |
| Material | paper |
| Extent | 239 pages. |
| History | |
|---|---|
| Date of production | 2007 |
| Place of origin | Kyoto |
Published in 2007 by Hōzōkan Publishing Company in Kyoto.
- MH07
XIV. Suratasaṃbhogavarṇanam
grahaguṇagurau rāge lagne vilāsamahotsave
vapuṣi sudṛśāṃ śrīprāsāde pratiṣṭhitamanmathe|
kucakalaśakaśliṣṭaiḥ sarvaḥ karaiḥ susamāhitaṃ
pulakasalilasnāto jajñe jano ratikalpakaḥ|| 2 ||
anumatam ivānetuṃ poṣaṃ tamītamasāṃ kulaṃ
diśi diśi dṛśo vinyasyantyaḥ śriyāṅkuritāñjanāḥ|
madanahutabhugdhūmacchāyaiḥ paṭair asitair vṛtāḥ
prayayur arasadbhūṣair aṅgaiḥ priyān abhisārikāḥ|| 3 ||
samadhita na yā rāgidvandvaṃ babhūva na sā sakhī
na madanavaśe yāv asthātāṃ tāv api rāginau|
mithunam iṣubhir yā vivyādha krameṇa na sa smaro
nyaviśata na yanmānagranthau na viddham abhūt tat|| 4 ||
ahamahamikāmatyā satyaṃ śarāsanayaṣṭikāṃ
kusumadhanuṣo yatnād eṇīdṛśo 'valalambire|
katham itarathā kṣībakṣībāḥ savepathubhiḥ padaiḥ
sarakasadanāllīlātalpaṃ yayur na ca saskhaluḥ|| 5 ||
stanakalaśayor ardhodaste kuraṅgadṛśo 'ṃśuke
ślathayati śanair nīvīsandhiṃ sakampakare priye|
abhimukhasukhasvedakledāj jaḍā maṇimekhalā-
cyutim iva śucā śaṅkitvāṅkāc cukūja na komalam|| 6 ||
samajani na tat prema tyaktaṃ yat īṣad apīrṣyayā
smarasukhasakhī nāsau īrṣyā vinā kalahena yā|
na khalu kalahaḥ so 'nyonyaṃ yaḥ prasādanavarjitaḥ
prasadanavidhir nāsau yūnāṃ yena na vililyire|| 7 ||
anunayagurur goṣṭhībandhaḥ sukhāsavasampadāṃ
śapathaśibiraṃ viśrabdhānāṃ dhiyāṃ pramāthibhiḥ|
avinayavacovādasthānaṃ prandhriṣu paprathe
madavilasitasyaikācāryaś ciraṃ rativibhramaḥ|| 8 ||
ratikṛti gate māyānidrāṃ puro 'rpitacumbanā
pulakapayasā matvā tattvaṃ mukhād ahṛtānanā
kṛtakaśayito nigrāhyo 'sīti udīrya kalaṃ vadhūr
vraṇitam adhare dattvā dantair apūrayata spṛhām|| 9 ||
kalahakalayā yat saṃvṛtyai trapāvanatānanā
pihitapulakodbhedaṃ subhrūś cakarṣa na kañcukam|
dayitam abhitas tām utkaṇṭhāṃ vivavrur antaraṃ
jhaṭiti taṭiti truṭyanto 'ntaḥ stanāṃśukasandhayaḥ|| 10 ||
caṭuṣu caṭule gāḍhāśleṣiny aśāntarate priye
yad aviditavat prādurbhūtaṃ mahārgham akṛtrimam|
kim api maṇitaṃ kenāpy antarvyadhāpyata kāminī
mathunamathane tad brahmāstraṃ babhūva manobhuvaḥ|| 11 ||
muhur aviśadā viśrambhārdrā muhuḥ smṛtamanyavaḥ
muhur asaralaḥ premaprahvā muhur muhur asthirāḥ|
vitathaśapathopālambājñā muhur madhurā muhuḥ|
parivavṛdhire niṣparyantā mitho mithunoktayaḥ|| 12 ||
jaghanavasanaṃ moktuṃ pāṇeḥ priyasya visarpataḥ
smaravivaśayā sabhrūbhedaṃ kareṇa sakampayā|
śithilaśithilaṃ nāryā nīvir nyarudhyata kevalaṃ
mukulitavalīvinyāsāt tu praveśapathaḥ kṛtaḥ|| 13 ||
vadananihite tāmbūlāṃśe śrite rativījitāṃ
kuvalayadṛśaḥ payo jajñe sa rāgatarus tadā|
kisalayamuco yasya cchāyām apāśritayos tayor
viṣamaviṣamaḥ kārtsnyenāstaṃ gato virahaklamaḥ|| 14 ||
vadanaśaśinaḥ sparśe śītād ivāgatavepathuḥ
stanayugalake bhrāntvā tuṅge nilīna iva śramāt|
jvalitamadanāṅgāre tanvyās tato jaghanasthale
sapulakajalaḥ patyuḥ pāṇir vilīna ivābhavat|| 15 ||
vipulapulake bibhraty oṣṭhau cucumbiṣayā calau
nibhṛtanayananyāsaṃ premṇā vilokayati priye|
samam abhimataprekṣātṛṣṇāṃ trapāṃ ca sametayā
na karakusumaṃ kṣiptaṃ dīpe na cojjhitam aṅgane|| 16 ||
truṭitaguṇatā sotkampābhiḥ karāṅgulibhiḥ kṛtā
cirataram api bhrāntvā tanvyā na kañcukasandhiṣu|
jhaṭiti vihitā labdhocchvāsaṃ stanadvitayena sā
kṛtam iha kadā sadvṛttair no manorathapūraṇam|| 17 ||
na maṇitapadair nāṅkāśleṣair na kākṣanirīkṣitair
na surabhiguṇair nāpi āhāryair ajanyata tat sukham|
paṭu parimṛjan svenāsyena srutāśrukaṇe dṛśau
yad uditaruṣas tanvyāḥ kāntaḥ kim apy anubhūtavān|| 18 ||
ratipatidhanurjyāṭaṅkāro madadvipaḍiṇḍimaḥ
sapulakajalapremaprāvṛtpayodharagarjitam|
nidhuvanayudhas tūryātodyaṃ jahāra natabhruvāṃ
jaghanasarasīhaṃsasvānaḥ śrutiṃ rasanāravaḥ|| 19 ||
śramajalakaṇakledakliṣṭaślathāṅukurapatrakaṃ
smararathadhurācakrākārabhramanmaṇikuṇḍalam|
pracalajaghanapreṅkhatkāñcīguṇāñcitaśiñjitaṃ
suratam ajani krīḍābhājām udūḍhaviparyayam|| 20 ||
vinayam aparikliṣṭaṃ śliṣṭaṃ priyaṃ paricumbanaṃ
nidhuvanavidhau yad yac cakruś cakoradṛśāṃ narāḥ|
pratividadhire tat tat teṣāṃ viśeṣaṇaśāli tāḥ
phalati sudhiyāṃ pātranyastaḥ sahasraguṇaṃ vidhiḥ|| 21 ||
haṭhavighaṭitasmeracchāyāprayatnadhutādharā
śithilavalitagrīvā kiṃ cid vivañcitacumbanā|
ramaṇasuhṛdāṃ kāntākḷptā niṣiddhakacagrahā
kṛtakakupitakrīḍā kām apy agāt kamanīyatām|| 22 ||
daśanavasane lauhityena staneṣu tathoṣmanā
madhupapaṭalīdhūmre dhūmaśriyā kabarībhare|
saruṣi hṛdaye tāsāṃ jvālākulair dṛṣi kajjalair
iti pariṇaman kandarpāgnir vibhakta ivābhavat|| 23 ||
yugalam agalat tarṣotkarṣe tarūtpalagaurayoḥ
puṭavighaṭanāt ūrvoḥ pūrvaṃ priye paripaśyati|
śrutikuvalayaṃ dīpocchittyai nirāsa yad aṅganā
jvalati rasanārocirdīpe tat āpa nirarthatām|| 24 ||
madhumadam asau saubhāgyam tat priyānunayanaṃ sa ca
pratighaviratiṃ sānvaktāpaṃ sa mānavimānanām|
smararasam asau vrīḍāmuktiṃ sa sāpi vidagdhatāṃ
dayitahṛdayasvīkāraṃ sā pupoṣa mṛgadṛśām|| 25 ||
pulakakaṇikāmuktāsaktyā karālakapolakaṃ
śramavaśacalaccakṣustāraṃ tarattilakaprabham|
amalam amilat pakṣmaśreṇyā priyāvadanaṃ yathā
suciram apibad dṛṣṭyā kāmī mukhena tathā kutaḥ|| 26 ||
tanur anuśaye gāḍhāśleṣo bhujeṣu made mahān
vapuṣi pulakodbhedī dṛṣṭau pradiṣṭanimīlanaḥ|
vacasi vicaṭac cāṭuś citte cariṣṇur anīcakair
iti ratirasāveśo yūnāṃ yayau śataśakhalatām|| 27 ||
daśanadaśanair oṣṭho mamlau na pālavakomalo
vyapahatanakhacchedād aṅgaṃ śirīṣamṛducchavi|
na bhujalatikā gāḍhāśleṣaiḥ śramaṃ lalitā yayur
yuvatiṣu kim apy avyākheyaṃ smarasya vijṛmbhitam|| 28 ||
kim upagamitā bhartrā taptadvilohavaladekatāṃ
uta ramayituḥ syūtāṅge 'ṅge śitaiḥ smarasāyakaiḥ|
vilayanam atha prāptā rāgānaloṣmabhir ity aho
na patibhujayor niṣpandāntaḥ priyā niracīyata|| 29 ||
api kṛtavatī yeṣu klāntiṃ navā navamallikā
mṛduṣu sudṛśāṃ bhāreṇeva sthitaṃ pratikarmaṇā|
alaghu vihṛtaṃ tair evāṅgair anaṅgamahāhave
kim iva sukaraṃ nārūḍhānāṃ daśām anurāginīṃ || 30 ||
ruciṣu vilasan phullan dṛkṣu kriyāsu samucchalan
bhaṇitiṣu luṭha~njṛmbhāsuudyan mukhenduṣu saṃgalan|
ratiṣu visarann aṅge svidyann adarśi mṛgīdṛśāṃ
manasi vikasann iṣṭād iṣṭo 'nuvṛttimahotsavaḥ|| 31 ||
vinayaviyutaṃ yāvad yāvat trapāparivarjitaṃ
kṛśatarakṛpaṃ yāvad yāvat samādhiparāṅmukham|
dhṛtadhṛtidhuraṃ yāvad yāvat sudīrghamanorathaṃ
yuvatiṣu mude tāvat tāvad ratāṅgam abhūnnṛṇām|| 32 ||
vyasanam acalaṃ yatrācāryo vrataṃ viṣayārdratā
suhṛd avinayo dāsaḥ premaprabhur makaradhvajaḥ|
gṛham aśithilāśleṣaḥ śayyā svarūpam abheditāṃ
ramaṇamithunāny avyākheyāṃ daśāṃ vijagāhire|| 33 ||
katham iva vayaṃ ke vā kasmin vidhāv abhavāma kiṃ
kim uditamadāḥ kiṃ sonmadāhatāḥ śayitā mṛtāḥ|
kim iva tad abhūt saukhyaṃ kiṃ vā sukhetarad ity aho
surataviratau jajñuś cintākṛto 'pi na kāminaḥ|| 34 ||
balam akṛtakaṃ bhūyāṃ viṣo viśuddhimad añjanaṃ
satatasurabhiḥ karṇottaṃsaḥ sthirasthiti jīvitam|
acaram ataraṃ śṛṅgārāṅgaṃ prasādhanam akṣayaṃ
priyacaṭuvidhiḥ strīṇām eko 'py aneka ivābhavat|| 35 ||
samabhilaṣitāśleṣe pūrve tato dhṛtasādhvase
caladavayave kāntāsaṅgāt tato viditatrape|
nibhṛtacaṭubhiś cetorucyair atho vivṛtāśayo
yuvatisurate viśrambhād dhi tatarṣa na vallabhaḥ|| 36 ||
phalam alaghu kiṃ līlāvallyāṃ gṛhaṃ nu guṇaśriyām
amṛtam atha vaikasthaṃ piṇḍīkṛtaṃ nu rasāyanam|
nidhir uta rateḥ sarvasvaṃ nu smarasya na vallabhair
iti suvadanābimboṣṭhānāṃ rasaḥ paricicchide|| 37 ||
kṣaṇam anibhṛtaṃ mlāyan mānaṃ kṣaṇaṃ kṣaṇam utsukaṃ
kṣaṇam asulabhavrīḍaṃ vācaṃ kṣaṇaṃ kṣaṇaṃ ākulam|
ṛjubhir aśaṭhās tuṣitais tuṣitāḥ prakṛṣṭaratā ratair
viviśur avaśā vaśyaiḥ pumbhiḥ priyāḥ sarasāṃ daśām|| 38 ||
ciraparicitaśrīsaṅgānāṃ ghanāñjanaśociṣāṃ
śramajalapṛṣajjāḍyāj jihmasthitiṣv atha pakṣmasu|
alabhata padaṃ nidrāmudrā vadhūjanacakṣuṣāṃ
dalakula iva śyāmābjānāṃ śilīmukhasaṃhatiḥ|| 39 ||
itthaṃ jyotsnāsamadamadirākṣī citāsu kṣapāsu
krīḍākroḍīkṛtam akṛtakotkaṇṭhaṃ āśliṣṭakaṇṭhāḥ|
ūḍhāḥ straiṇaṃ prasabham akutobhītayas te nanandur
dṛṣṭās trātuṃ kusumadhanuṣābhīkṣṇam akṣṇā śivena|| 40 ||
kapphiṇābhyudaye mahākāvye suratasaṃbhogavarṇano nāma caturdaśaḥ sargaḥ||