atheṣadādhūtatamo'nubandhā
prācyāṃ ruciḥ ketakadhūlivarṇā|
eṣyanniśānāthacariṣṇurathya-
rathyārajorājir ivāvirāsīt|| 12.1
Yokochi
- Siglum: YY
Kapphiṇābhyudaya, Yuko Yokochi
More ▾
| Title | Kapphiṇābhyudaya |
| Author | Śivasvāmin |
| Physical description | |
|---|---|
| Language/Script | Sanskrit in Latin script. |
| Format | digital |
| Material | digital |
| Extent | 3 cantos so far. |
| History | |
|---|---|
| Date of production | 2020 |
| Place of origin | Kyoto |
Published in 2020 by in Kyoto.
- YY
krāman krameṇāmbaragocare 'pi
balakṣimālakṣyata dhautadhiṣṇyaḥ|
āvirbhavadvallabhacandrasaṅga-
kṣapāvapuścandanacūrṇacāruḥ|| 12.2
śrīḥ śītaraśmer dadṛśe 'tha dṛśyā
śākryām udañcattimirākulānām|
āśvāsanoktīr jagatāṃ vivakṣoḥ
smitaprabhevonmiṣitā maghonaḥ|| 12.3
tamobhir ādhūsaritādhunaiva
doṣākulā sāmpratam eva bhūtvā|
saivābabhau rātrir upāyatīndau
samāgamaḥ kasya satāṃ na bhūtyai|| 12.4
atha kramān mugdhamṛṇālakanda-
saundaryagarbhā nudatī tamāṃsi|
lekhodagād indradiśaḥ sitāṃśor
airāvaṇasyeva viṣāṇakoṭiḥ|| 12.5
kelikriyāśakrakarāgrakṛṣṭa-
śacīkacasrastavataṃsaśobhaiḥ|
indor amandaiḥ khacitā mayūkhaiḥ
paurandarī sundaratāṃ dadhe dik|| 12.6
kadambadāmādhikagauram indor
viṣaktam ūhe suradhāmni dhāma|
uṣānilārūṣitakalpavallī-
pariplutaprauḍhaparāgalīlām|| 12.7
ārohato dhiṣṇyapadaṃ himāṃśor
ambhonidher garbhagṛhān nirīya|
sopānarājīṣv iva rājitāsu
viśaśramur vīcicamūṣu pādāḥ|| 12.8
darīṣu dūraṃ tamaso 'bhiyāteḥ
palāyanādhvānam ivāvaroddhum|
samaṃ sametyaiva śaśāṅkapādair
ācakrame bhūdharacakravālam|| 12.9
āsādya sadyo dyutalaṃ mayūkhais
tamaḥ śaśī prāg jagatāṃ jahāra|
mahātmanām unnatamārgalābhe
nānyopakārāt karaṇīyam anyat|| 12.10
dyām ujjihānaḥ paripāṭalābhāḥ
prabhāḥ payodheś ciram ācakarṣa|
dikkāminīmaṇḍalamaṇḍanāya
pravālavallīr iva śītaraśmiḥ|| 12.11
śikhābhir āśliṣṭa ivaurvavahner
atyulbaṇāṃ pāṭalatāṃ prapannaḥ|
sindhos taraṅgair iva nudyamāno
javāj jagāhe gaganaṃ mṛgāṅkaḥ|| 12.12
tārāsu tārāpathabhittibhāge
tirodadhatyā vapuṣo viśeṣān|
purāṇacitrapratimopamāsu
jyotsnāsudhākūrcikayā nipete|| 12.13
tataḥ karākrānticalatkuraṅga-
cchāyaḥ spṛśan karkaṭavriścikādīn|
tutoda nīlaṃ timirebhavṛndaṃ
jyotsnāsaṭāṅko hariṇāṅkasiṃhaḥ|| 12.14
śyāmāṃ samāśliṣya sarāgam indau
nabhastalaṃ talpam ivādhirūḍhe|
tamomucaḥ sakhya ivocchvasatyo
diśaḥ śanair dūram athāpasasruḥ|| 12.15
veṇīṣu mūrcchām iva samprayāntaḥ
kapolayor lāsyam ivādadhānāḥ|
smiteṣv athocchvāsam ivodvahanto
vilāsinīḥ śiśliṣur indupādāḥ|| 12.16
dadau tathoddīpitamanmathārtiḥ
śaśī prabhāmattatayonmadatvam|
vilaṅghayāmāsa yathā pravṛddho
bhuvo 'pi mūrtiṃ makarāvacūlaḥ|| 12.17
kṛtopakāre hi niveśayanti
prāṇair api pratyupakāram āryāḥ|
tathā hi labdhvābhyudayaṃ samudrād
avīvṛdhat taṃ śaśabhṛt svadhāmnā|| 12.18
staneṣv ivāmbhoruhakuṭmaleṣu
kṛtvā karaiḥ pīḍanam ārdrarāgaḥ|
nayan vikāsaṃ kumudānanāni
kāmīva vāpīṣu lalāsa candraḥ|| 12.19
nipītasaṃdhyāmadirārasāyāṃ
nidrājuṣi kṣībatayā kṣapāyām|
kumudvatīṃ cumbitum āttakampo
bimbacchalenopasasarpa candraḥ|| 12.20
kadambadhūlīdhavalena dhāmnā
samedhayan kairavakorakāni|
manobhidaḥ puṣpaśarasya sakhyuś
cakre 'strasaṃdhānam ivoḍurājaḥ|| 12.21
athādade tatkṣaṇamātravighna-
vimṛṣṭarātrikṣayakhedinībhiḥ|
tvarāślathagranthigaladvibhūṣaṃ
prasādhanaśrīḥ priyavallabhābhiḥ|| 12.22
prāṇeśadūtīpraṇayārdravākya-
pramodaparyāptavihāsinībhiḥ|
dadhe tadā dṛṣṭibhir eva tāsāṃ
vilāsakarṇotpalamaṇḍanaśrīḥ|| 12.23
ratatvarāveśasakampapāṇi-
vinyāsaśaithilyadharair vadhūnām|
ratau puraḥ pātam ivāmṛśadbhir
nāsthāyi gāḍhaṃ kabarīṣu puṣpaiḥ|| 12.24
hārāvalī gāḍhatarapriyāṅga-
saṅge vidhatte vyavadhiṃ krudheva|
autsukyakampocchvasitaiḥ stanāgrair
āmucyamānā nunude 'ṅganānām|| 12.25
abandhi tābhiḥ kaṭhināvakṛṣṭa-
saṃdhānasūtrāṅkitapāṇiśākham|
ucchvāsipīnastanapūryamāṇaḥ
kṛcchrāt truṭatkañcukakoṇasandhiḥ|| 12.26
saṃlāpayantyā dayitasya dūtīṃ
vadhvā vibhūṣāṃ ca niveśayantyāḥ|
prasannatā kāpi mukhasya jajñe
veṣaśriyā nu priyavārtayā nu|| 12.27
bimbacchalena smaravāsagehe
tanvyāḥ kapole 'vatatāra candraḥ|
jagajjigīṣonmiṣitasya sakhyuḥ
sabhājanāyeva manobhavasya|| 12.28
ābibhratī babhru babhau natabhrūḥ
kālīyakīyaṃ tilakaṃ lalāṭe|
nimagnaniḥśeṣanavasmareṣu-
svarṇajvalatpuṅkhamukhāṅkiteva|| 12.29
guṇagrahotpīḍanapuñjyamāna-
śroṇītaṭāgrasphuṭadṛśyanābhim|
nakhāṃśukalmāṣitanīvibandhaṃ
babandha kāñcīṃ jaghane ghanoruḥ|| 12.30
śuddhena sadvṛttatayānvitena
nigūhaneṣv ārasatā salīlam|
purandhridoṣkandalikāsv asañji
patyeva gāḍhaṃ valayavrajena|| 12.31
rarāsa ramyaṃ rasanā śanair yat
tadā tad evājani jṛmbhamāṇam|
nitambaśayyārasikasya nāryāḥ
prabodhatūryaṃ makaradhvajasya|| 12.32
ālambi mañjūjjvalaśiñjitena
natabhruvo nūpuramaṇḍalena|
unmāthino manmathakuñjarasya
viśṛṅkhalaṃ śṛṅkhalapāśakaśrīḥ|| 12.33
priyotsukāyā jaghanena kāñcyāḥ
kaṇṭhena hārasya viruddhabandhe|
mitho ratānandam iva pradātuṃ
kṛto visargaḥ svaparicchadasya|| 12.34
tiraskriyāyāḥ parihārahetor
jyotsnākṛtāyāḥ śaraṇaṃ prapannām|
dadhuḥ sarojaśriyam aṅghrilagnāṃ
nāryo navālaktakavigraheṇa|| 12.35
mṛgīdṛśām aṅgalatānuṣaṅgi-
lāvaṇyalakṣmīpihitaprabheṇa|
yathāvad apy ākalitena tāsāṃ
sphuṭā na lebhe pratikarmaṇā śrīḥ|| 12.36
asmin kṣaṇe kāmiṣu tīvrakāmā
manorathānvakṣam asaṃgateṣu|
tā menire bhāram ivāṅgabhūṣāṃ
sahyāntarāyā hi na rāgavṛttiḥ|| 12.37
sakhyai vadantī priyavṛttam ekā
sūtkāpi saṃketam agāc cireṇa|
kathā hi viśvāsini rāgabhājāṃ
priyārthagarbhā na paraiti niṣṭhām|| 12.38
sakhīkathākautukinaṃ natabhrūr
anvagniṣaṇṇaṃ dayitaṃ viveda|
sasmeravaktrābhimukhasthitālī-
kanīnikāntaḥpratibimbadṛṣṭyā|| 12.39
vidhūtadīpaṃ bhavane bhramantyā
sthitvā ciraṃ talpam athāśrayantyā|
muhur gavākṣekṣitamārgavīthyā
pratyaikṣi kṛcchrād dayitaḥ kayāpi|| 12.40
kṛtāgasām apy anumenire tāḥ
sakhībhir abhyānayanaṃ priyānām|
tad eva hi prema sa caiva rāgo
na sthāyitāṃ yatra bibharti kopaḥ|| 12.41
kelikrameṇa priyam ākṣipantam
anvakṣam āgatya pidhānam akṣṇoḥ|
sparśāturā saṃspṛśantī cirasya
tadaṅgam ekā na kilābhijajñe|| 12.42
atṛptam ucchvāsataraṅgitāni
sabāṣpakaṇtḥaskhalitākṣarāṇi|
prāpto 'nudehaṃ niśaśāma kāntaḥ
sakhīṣu saṃdeśapadāni tanvyāḥ|| 12.43
priye vadhūr yat sahasābhyupete
vrīḍād vyadhattāvanatiṃ mukhendoḥ|
prāg utsukaṃ kātaram iṣṭadṛṣṭāv
atarjayat tena ruṣeva cetaḥ|| 12.44
ardhāvabaddhacyutaveṇipuṣpā
sālaktakāgrāṅgulir ārdragātrī|
bhraṣṭāṅkasaṃsaktavilepaśukti-
siktāṃśukaikā priyam abhyudasthāt|| 12.45
śaśāṅkasaṃgharṣam ivāvalambya
kṛtānuyātrāḥ prasabhaṃ tamobhiḥ|
āmodamattālikulākulāṅgyo
nāthān athoccair abhisasrur anyāḥ|| 12.46
saṃdhyānṛttabhramiśivabhujābhraṃśibhasmaughabhāsi
jyotsnāpūre param iti jagad vyaśnuvāne himāṃśoḥ|
ekaikātmaprabhavaviśikhasyūtagātrair ivātho
rāgidvandvair jhagiti ghaṭanā gāḍham anyonyam ūhe|| 12.47
kapphiṇābhyudaye mahākāvya candrodayaprasādhanavarṇano nāma dvādaśaḥ sargaḥ||