akharvam aurvāgnim ivodadheḥ plutaṃ
phaṇīśvaraśvāsasamīraṇeraṇaiḥ|
jvalatprabhāḍambaracumbitāmbaraṃ
prakṛṣṭam aikṣiṣṭa sa candanācalam|| 1 ||
Hahn 2007
- Siglum: MH07
This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.
More ▾
| Title | Kapphiṇābhyudaya |
| Author | Ratnākara |
| Physical description | |
|---|---|
| Language/Script | Sanskrit in Latin script. |
| Format | book |
| Material | paper |
| Extent | 239 pages. |
| History | |
|---|---|
| Date of production | 2007 |
| Place of origin | Kyoto |
Published in 2007 by Hōzōkan Publishing Company in Kyoto.
- MH07
VI. Parvatavarṇanam
śritaṃ tyajadbhiḥ śamibhiḥ śarīrād
arīn atāntaṃ badarīnatāntam|
śriyaṃ śrayantaṃ śakunipravṛtta-
madāravaprāṃśu madāravaprām|| 2 ||
ṣṭhyūtāmbaraplāvi viśālaśṛṅgaṃ
jyotīrasajyotiṣam aṅkasūteḥ|
bālasya saṃdarśanakāmyayendor
dyāṃ kṣubdhadugdhābdhim ivojjihānam|| 3 ||
amandam udyadvasudhāmahāsā
sudhāmahāsānum alaṃcakāra|
uddāmadhīradhvanikuñjarā yaṃ
nikuñjarāyaṃ dadhatī taṭorvī|| 4 ||
yasyāgrabhūḥ śyāmalameghamālā-
saṃnaddhajāmbūnadasānur eti|
kāntiṃ nitāntajvaladujjvalārcir-
uddhūmadāvānalamālinīva|| 5 ||
yatrālasaprakramasārasālaṃ
masārasālaṃ dadhatī dhinoti|
ākrīḍabhūr acchidurāparāge
durāparāge 'pi ratiṃ dadhānā|| 6 ||
yatkānane viśramakāmyayeva
sacandanāśleṣaviśeṣaśīte|
nijoṣmabhīṣmārcirudūḍhatāntir
dadāti dīptāṃśur asavyayātrām|| 7 ||
paraṃ padaṃ kāmicamūratānāṃ
voḍhāram urvīṃ sacamūratānām|
indur vyanakty āśu vihāyasā yaṃ
sadaṃśumattām avihāya sāyaṃ || 8 ||
tadutsukāntaś carabandhubhūbhṛd-
abhyarthanapreraṇayeva nūnam|
karoti yasyāvaratāya kukṣau
vīcīkarākarṣaṇam amburāśiḥ|| 9 ||
samudratārambharatā yadaṅke
samudratāraṃ bharatāndhavāyāḥ|
vibhāvayanti sma yato niśānāṃ
vibhāv ayanti smayato layaṃ bhāḥ|| 10 ||
athācalālokanalolalocanaṃ
vilokya viśrambhabhuvā bhuvaḥ patim|
jage vacaś cāṭu vicitrabāhunā
giraḥ suhṛtsaukhyaphalāni vāgmināṃ || 11 ||
kusumasudhām alayo 'ga-
styanute yasminnn apuḥ sudhāmalayo 'gaḥ|
suravasudhā malayo 'ga-
syaindrasyāsthaiṣa so 'sudhāmalayogaḥ|| 12 ||
|| pādaikaikayamakam ||
udbhūtadhātudhṛtakuṅkumapaṅkapiṅga-
tuṅgottamāṅgabhṛtapuṣkalapuṣparāśeḥ|
dyaur aṅkam asya dayiteva tatoḍuhāri-
hārādhirohati dharādharanāyakasya|| 13 ||
naya samayāva mayā vaḥ
proktaṃ prītiṃ gatāmayāvama yāvaḥ|
gāṃ samayā vama yāva
srāviṇam adriṃ prakāmayāvam ayāvaḥ|| 14 ||
dvipadīpadatālayogabhāsaḥ
sahasāraṅgavarāharāsabhājaḥ|
dadhate rasabhāvilāsyaśobhāṃ
samam eṣo 'drir imā naṭastriyaś ca|| 15 ||
eṣaiva sā niyatam asya śiro'grabhūmir
bhavyā sabhā maghavato 'hitare 'phalo 'pām|
nāyaṃ tapovanabhuvaṃ ca bibharty adūra-
bhavyāsabhām aghavatohitarephalopām|| 16 ||
prakṛtivikāsinā kaṭakinā sutarām
abhimatasāmajātatarasā balinā|
alam acalaḥ samākramitum eṣa mahīṃ
nanu nayavartmaneva nṛpatir vapuṣā|| 17 ||
vahati govrajamaṇḍalaṃ ārtatā
hṛd ayam utkaṭakambalavallavi|
iha raghor akaronmṛgayāṃ mahā-
hṛdayamut kaṭakaṃ balavallavi|| 18 ||
premodayārdramanasāṃ na hi kāminīnāṃ
preyasy asahyam iha kiṃ cid atīva vaktum|
asya dyucumbini taṭe taraṇer nalinyaḥ
śliṣṭaṃ pibanty api jagattrayatāpi tejaḥ|| 19 ||
iha yā ghnatī khagasabhāratīrāmayān
uditā sarit tarusabhāratīrā mayā|
dhriyate priyo 'tra rasabhā ratī rāma yā
smarasaṃgamād alasabhāratīrāmayā|| 20 ||
iha viracitaśuddhavarṇaśobhā
suratarujākaraṇehitasvabhāvā|
lasati navasudhāmarālatārā
naṭavaniteva raseṣu kānaneṣu|| 21 ||
ghaṇṭāvalī vahati na sthitim atra naddha-
kācāravāṃ śakavalādaratoraṇeṣu|
ṣaḍ vairijeṣu muniparṣad alabdhaśaktiḥ
kā cāravāṃśakavalādarato raṇeṣu|| 22 ||
kṛtanandanāgadamanaṃ kṣamayā
gatam arhatāṃ śubhavibhāmahanam|
bhṛtadakṣiṇāśam atijātiruciṃ
praṇamanty amuṃ jinam iveha janāḥ|| 23 ||
ko nāma nātithir ihāśramakanyakānāṃ
vācā rameta madhurasvarayā rasena|
sarvatra śāntir uciteti ca dharmavṛttāv
ācāram etam adhur asvarayārasena|| 24 ||
asyotsaṅgāsaṅgi maṇiprākaṭamūrteḥ
sampaśyantyaś cāruṇi cāmīkaravapre|
svaḥsundaryaḥ kalpitam ākalpam analpaṃ
ratnādarśaṃ maṅgalam ity eva vahanti|| 25 ||
sphuṭayati kaṭakorvīr asya bibhrat karaughaṃ
viśadanavam asannādīprabhopatyakā māḥ|
api madayati bhṛṅgas tāpasīḥ puṣpite 'smin
viśadanavamasannādī prabho patyakāmāḥ|| 26 ||
mandāramandirapurandaranandanorvī-
mandīkṛtodyadaramandarakandaraśrīḥ|
utkandakundadalasundarasinduvāra-
saṃdohasāndramakarandamado 'yam āste|| 27 ||
bibharti bhūr atra vanaṃ karāla-
kālīyakāmānalatāpamiddham|
nāśīśamat strī ramaṇasya kaṇṭhe
kālīyakāmānalatāpam iddham|| 28 ||
ākarṇitā vikalakomalakinnarastrī-
gītakriyāśravaṇarodhitarathyaraṅgaḥ|
naśyannimeṣamunimaṇḍaladṛṣṭidṛṣṭaḥ
prāpto 'tra dīrghayati vāsaram uṣṇaraśmiḥ|| 29 ||
iha palvalacāriṇāṃ rave
bisaromanthakaṣāyatā rasāt|
jaladher adhikaḥ saro'mbhasāṃ
visaro manthakaṣāyatārasāt|| 30 ||
mandasyandaṃ sundaravidyādharanārī
gītadhvānaṃ bandhuram ākarṇya rasena|
nānātālanyāsajuṣaḥ śikṣitum uccair
abhyasyantīva pratinādair iha daryaḥ|| 31 ||
sarati maruti nāmbu haṃsasvanaiḥ
kalam akaṇi śaśāka kā sā ratā|
viraham iha ca soḍhum atrocchvasat
kalamakaṇiśaśākakāsāratā|| 32 ||
surapoṣayāvikalahārayoccakair
atikālakāntakaravāladhārayā|
madanārtayā nasamarāgatāntayā
bhuvi bhāti śūraśabaraśriyāpy ayam|| 33 ||
iha vahati sariti saṃśrita-
naladamayantīratā rase vāviralam|
sthitayuvamithunāsya taṭī
naladamayan tīratārasevāvir alam|| 34 ||
nairmalyapratiphalitasphuṭo bhruśārāḥ
śarvaryāṃ marakataratnasānubhāgāḥ|
kahlārocchvasitasaraḥsamūhabhāso
bhṛṅgāṇāṃ vidadhati vipralambham asmin|| 35 ||
puṇyātmaiṣa girir vinopakaraṇaiḥ prastauti śāliśriyaḥ
kedāreṣu madārasatkurarayākārān alinyāsataḥ|
padmān āvahate tathā parimalān asmin vahantaḥ kṛtāḥ
ke dāreṣu madārasatkurarayākārā nalinyā sataḥ|| 36 ||
dṛṣṭyā kurvann āsravāntaṃ sravantīr
bibhrāṇo 'yaṃ sābhrarandhraḥ purandhrīḥ|
śuddhaḥ śuddhāntaśriyaṃ saṃvidhatte
kroḍakrīḍādakṣiṇo dakṣiṇābdheḥ|| 37 ||
nandakā nollasallāsahaṃsā na vaḥ
kānanaṃ prāpya līlāsahaṃ sānavaḥ|
bibhrate hāritāṃ hāsadā mālayā
ramyayā śākhināṃ hā sadā mālayā|| 38 ||
pravighaṭitavikaṭadalapaṭalapuṭa-
sphuṭadhavalakamalakuharacaladaliḥ|
tvadabhigamanarasarabhasataralita-
prakaṭanayana iva vahati rucam ayam|| 39 ||
yoṣāṃ pṛṣanmarud akārayata priyāṅka-
vāsaṃ na hāsarasi kāṅ kurarājire 'ṇuḥ|
atra priyeva nalinī natim eti bhānāv
āsannahāsarasikāṅkurarājireṇuḥ|| 40 ||
vṛṣṭicchedāśaṃsicalākhaṇḍalacāpa-
bhrāntitrāsāyāsaparimlāpitapiñchān|
ratnacchāyocchrāyasamācchāditameghaḥ
prāvṛṭkāle 'pi vyathayaty eṣa mayūrān|| 41 ||
amuṃ nidānaṃ vidur āyatīnāṃ
neha prabhāvāś chidurā yatīnām|
atrātanoḥ kārmukaṃ āvileṣu
nālakṣyate nāyaka mā vileṣu|| 42 ||
atyujjvalormikamahākaṭakaprakāśam
uccair udūḍhaghanasāraparāgapūram|
madhye niṣaṇṇadinanāyakaṃ āhur enaṃ
hemāṅgadeham iva bhūbhujam arthabhājam|| 43 ||
asyākuṇṭhā nīlakaṇṭhe 'pakaṇṭha-
mārākalpā jayyajalpākarāmā|
varyā kuryāt kasya nānandam eṣā
sārādhanyādhānadhānyādharā sā|| 44 ||
sa śivam iha sadākṛtiprakāśaṃ
na ca viṣameṣu madena samprayuktam|
svarucikapiśitāṃsamāṃsam adrir
vahati yuvānam ayaṃ na yakṣacakram|| 45 ||
yo nāma yogabhṛd iha pratanoti buddhīḥ
sa hi āgamastimitamandarasānutattvam|
prāpte 'tha śṛṅgam atituṅgatayābhibhūta-
sahyāgamastimitamandarasānutattvam|| 46 ||
gururandhrasamīraṇānuṣaṅgāt
tarubhiḥ sānuṣu saṃtataṃ caladbhiḥ|
klamino 'ntakam īyataḥ kharāṃśor
vyajanair vījayatīva vājino 'yam|| 47 ||
asmai vismāyibhāse nanu namati na kaḥ pāpināṃ vṛttim uccair
akṣodīyānapātre 'dhvani dhanamalināṃ sārasāṃyātrikāṇām|
dhatte līlāṃ gatiḥ sā bhṛśam iha sudṛśāṃ kānane caiṣa dhatte
rakṣodīyānapātre dhvanidhanamalināṃ sālasāṃyātrikāṇām|| 48 ||
uccoccacandanatarūttarasālasakta-
sarpaprasarpiphaṇaphūtkṛtadhūmadhūtam|
atraitya locanakulaṃ taraṇes turaṅgā
raṅgatkṣayekṣubhitakūbari kūṇayanti|| 49 ||
bhayāpanībhūribhayāpanī bhūr
anāvilāsyāmaranāvilāsyā|
virājatībhāravirājatī bhā
varājirā mādhavarājirāmā|| 50 ||
rāgopāttair yuvabhir iva suśṛṅgārair
gosaṃghātair upavanaratisaṃcāraiḥ|
aśrāntyaiva śramaśamanasaromanthair
loke notpadyata iha nacirād uccaiḥ|| 51 ||
bhavati kuñjadarīṃ gahanāṃ girer
aviramaj janakāmam ahānitaḥ|
ratigṛhāṃś ca bibharty ayam uccakai
ravir amajjanakāmam ahānitaḥ|| 52 ||
śayitakarālakañcukikule kumudvatīnāṃ
gahanagṛhe 'sya sālabahule sakhīva saukhyam|
diśati niśi praveśya śanakaiḥ priyendupādān
vikaṭakavāṭapaṭṭavivṛtivratātra vātyā|| 53 ||
vapuṣi lalitāṃ bhūṣāṃ patyā purandhrijanaḥ kucair
navanakhacitair uccakrāntair atītanadānate|
iha maṇimayaiḥ sindhuprītyai tarattarubhis taṭair
navanakhacitair uccakrāntair atītanadānate|| 54 ||
prāgbhāradīrghadṛśadujjhitanirjharāmbu-
lambipravāhavikarālakaraḥ karoti|
sindūrasundaraparāgapiśaṅgamūrdhā
rambhāvijṛmbhitarado 'yam ibhānukāram|| 55 ||
kamaladalāvalī sthalam ihādhitiṣṭhati niraṅkuśā kuśacarad-
galadalasādaraṃ kumudayoṣitaṃ na rajanīkaropamalayā|
vrajati ca tṛptim atra hi rucā cirasya parirabhya rāgarabhasād
galadalasādaraṃ kumudayoṣitaṃ na rajanīkaro 'pamalayā|| 56 ||
lakṣmīlakṣyair lakṣaśa indīvaranīlaiḥ
phenasphītais tīrthabalair nāgapatīnām|
vyāpto bhūbhṛt saravata eṣo 'nuvidhatte
harṣotphullallocanasaṃghasya maghonaḥ|| 57 ||
iha bhūḥ samūḍhanavanīratāvaryamā
nutim arhati pramadanī ratāv aryamā|
bhramati pravṛddharati mekhalāpaddhatiṃ
munir ātanoti ca śame khalāpaddhatim|| 58 ||
dehaṃ parodayadhiyeha sa bodhisattvaḥ
patye bhujaṅgamabhuje patatāṃ nivedya|
nirmokamaṇḍalam aśaṅkitam aṅkasaṅgi
nāgīmukhāmburuhacumbanacuñcuvakre|| 59 ||
acala eṣaś cakāsti suraśriyāṃ
kurarakīśakirātatayānayā|
jagati kuñjasuvāsyararājitaṃ
kurarakīśakirātatayānayā|| 60 ||
amī dṛśyante 'dreḥ savidhajaladhidvīpaluṭhitāḥ
suparṇakṣuṇṇānām iha phaṇavatām asthinicayāḥ|
vikarṣaty adbhir yā sudaragatanāśa.thitamatiś
calair vīcīhastair jaṭharaśikhinidhyāpanadhiyā|| 61 ||
vikasati marud iha mṛducala-
dalikamalanalohitena vadanenāyam|
subhaṭaḥ śliṣyati kopād
alikamalanalohitena vadanenāyam|| 62 ||
adhiśirasam ihāsau ratnarambhā mukhāgre
sphuritarucirapatraḥ prāpya bimbapratiṣṭhām|
karaparigatadhātūddhūtareṇur vivasvān
bhavati saralanālottālatāmrotpalaśrīḥ|| 63 ||
priyājanaṃ prāptarasaḥ kalāsu
tyāgī caraṃ sa prasaraṃ ca gītyā|
iha priyaś cumbati cārucāṭu-
līlāvile talpatale vilālī|| 64 ||
dhyānāṣṭake gataviparyayaṃ āryasatyair
dṛptendriyāḥ śamavino 'tra vipaśyanāḍhyāḥ|
dhātutrayāpacayataḥ pratisaṃvidarham
arhattvam ucchvasadabhijñam avāpnuvanti|| 65 ||
suratāsthayā praṇatatā suratāḥ
samayaṃ gatāḥ smaravilāsamayam|
dadate pramodam iha kundada te
dayitehinaḥ svarabhasād ayi te|| 66 ||
stauti kesarikulaṃ drutanāgī
markaṭaṃ kṛtrimadañcitayānaḥ|
grīvayā mudam agamac ca gariṣṭhā
markaṭaṃ kṛtrimadañcitayānaḥ|| 67 ||
ihāsthito niyamasamutthayā muniḥ
samuccakair adhita rucā ripūṣaṇam|
giriṃ tatair imam api nā ādade priyā
samuccakair adhitarucāripūṣaṇam|| 68 ||
syandanasya śikharair asau satāṃ
dakṣiṇodyatirayaṃ prabhāvataḥ|
āsravān iha ca bodhabandhurād
akṣiṇod yatir ayaṃ prabhāvataḥ|| 69 ||
nārīsaṃhatir atra pātum aśituṃ rantuṃ varītuṃ varaṃ
dātuṃ gātum udāsitā mayugatā nāsāratā lāsinī|
rājījīvapatatriṇāṃ sthitim iyaṃ ratnasthalīṣu ādarād
ātuṅgā tu mudā sitāmayugatānā āsāratālāsinī|| 70 ||
nāryo diśantī āgasi rāgayukter
asāma yūnāṃ na ca codayante|
nāṭyāya ceto 'tra ca nāṭakīyā
rasā mayūnāṃ na ca codayante|| 71 ||
ruciracitapramodalavalīkalatābhavanaḥ
smaram ayatīritāratim itārikanāvadaraḥ|
ruciracitapramo dalavalīkalatābhavanaḥ
sma ramayatīritāratimitārikanāvadaraḥ|| 72 ||
|| samudgakaḥ ||
dagdham api smaraṃ ghaṭayati sphuṭam upavanabhūr
atra parāgatā sumanasā manasijavanataḥ|
ghaṭṭanato 'tra sa vṛṣagaṇaḥ kriyata iha rater
atraparāgatāsumanasām anasi javanataḥ|| 73 ||
vividhudhutatapāpā rarakṣa kṣapāpā
khakhananajajapāpāya yatra trapāpā|
na nagagajajapāpāvavapraprapāpā
mama raravi vipāpābha bhadra drapāpā|| 74 ||
|| āvalis ||
itthaṃ guṇā diśati te sukham alpam urvī
sārāvatāsamavanā vivarāhitāntā|[vivara-ahi-tāntā]
sphītaprasaktaphalinī saphalā phaleṣu-
sārāvatā samavanā vivarāhitāntā|| 75 ||
vahati mahāmahamahatī vādanavāsānatān asau ānadavā|
haratī ca taṭī padyāntajavā vādanavāsā natānasā vānadavā|| 76 ||
|| yamakapratilomabandhaḥ ||
yogāt ādhāraḥ kurvāṇāṃ kuvalayavasatilayabalo nutarṣabharocitaḥ
mālā no nāpannāgāraḥ sakalam avasudhavaśaraṇo 'nukampikapotakaḥ|
mañjūṣābhāsā mantrī mā nalinavanaviśadahitataḥ kule khalatākaro
nākāṃśor ājīvair hīnaḥ samararasita visarati vayaḥ sa māgadharājitaḥ|| 77 ||
|| mahāyamakam ||
eṣa mahībhṛt pravidadhad aśanaiḥ śāśvatikāśritaśuciśaśibhābhiḥ
kairavamānaṃ surasavanam itaḥ sāgarayojananayanadagehaḥ|
dyām avadārya sthita iha śikharais tuṅgataṭas trijagati nanu nītaḥ
kair avamānaṃ surasavanamitaḥ sāgarayo jananayanadagehaḥ|| 78 ||
vāsavāsatānyamānamānyatā savāsavā
tāpanīyanīlapālyapālanīyanīpatā|
sīmatārapādapā supād apāratāmasī
hīmatāsibhā cakāsti kācabhāsitā mahī|| 79 ||
|| pratipādapratilomaḥ ||
asmin āste saiddhaṃ sainyaṃ nayanayanam anamam avamavamam amama
śākhāṃ śītaṃ śliṣyaty uccair ahir ahitarataravir aviratam atama|
bibhraty ambho nadyaḥ kīrṇaṃ śaraśaraṇaraṇarasika sikatilatila
hemakṣodair antaḥkrīḍā śakaśakalikalikalakalakamahima hi|| 80 ||
|| āvalis ||
pulakabhuvāmbunā naṭasabhā satām iha rasodayasya vikalā
navabharatān atāyanavidhāv adhāvi nayatānatārabhavana|
bhavati na ceha candanavanaṃ viṣaktaviṭapaughaśaṅkaṭatayā
dinakaratāpapāṭitaśilātalāśitaṭipāpatārakanadi|| 81 ||
|| lalitaṃ yugmapratilomaḥ ||
netrākṛṣṭer ihādhivrajam alasalasadvallavīdorlatābhiḥ
kīryante śikaraughāḥ sakalaśi valatā nāvanītāmathāpi|
śṛṅgaśreṇī ca tuṅgāṅgaṇamaṇir amunādhaḥkṛtāśeṣaśailā
kurvāṇenātmatuṣṭiṃ sakalaśivalatā nāv anītām athāpi|| 82 ||
kapphiṇābhyudaye mahākāvye paratavarṇano nāma ṣaṣṭhaḥ sargaḥ||