atha sadasi samastāyastabhūpālacakre
prakaṭitagurukopārambhasaṃrambhajṛmbhe|
vahati vilasitāni prastutāni pracaṇḍa-
pralayajaladajālāḍambarair ambarasya|| 1 ||
Hahn 2007
- Siglum: MH07
This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.
More ▾
| Title | Kapphiṇābhyudaya |
| Author | Ratnākara |
| Physical description | |
|---|---|
| Language/Script | Sanskrit in Latin script. |
| Format | book |
| Material | paper |
| Extent | 239 pages. |
| History | |
|---|---|
| Date of production | 2007 |
| Place of origin | Kyoto |
Published in 2007 by Hōzōkan Publishing Company in Kyoto.
- MH07
IV. Mantrodghāta
anadhighatanṛpājñāvighniteccheṣu duḥstha-
sthitiṣu parimṛśatsu sthūlam aṃsasthalāgram|
prabhumukhakṛtalakṣair īkṣaṇair akṣameṣu
kṣitipatiṣu raṇāyāvekṣamāṇeṣv anujñām|| 2 ||
vicalitakaraśākhaṃ nartitabhrūvilāsā-
numitanṛpatikāryāntargatavyākulatve|
vidadhati vinibaddhavyūham anyonyaṃ ārāt
kim api sunayacintāmantraṇaṃ mantritantre|| 3 ||
janitabhujavijṛmbheṣv agradūteṣu kālyāḥ
praharaṇaraṇakaṇḍūkalpitācāryakeṣu|
ahamahamikayāhaṃkāarahuṃkāragarbhaṃ
hṛdi raṇaraṇakeṣu kṣmābhṛtām ullasatsu|| 4 ||
vikaṭamukuṭaratnābhyudgatair aṃśujālair
viyati vihitaśampaṃ kampayitvottamāṅgam|
adayadaśanadaṃśaklāntibhājo 'dharasya
smitarucisudhayoccaiḥ sādhu saṃdhāya sekam|| 5 ||
vadanapavanagandhākṛṣṭadantāṃśuśubhra-
bhramarabharanibhena bhrājitavyaktavarṇām|
prasabham abhisasarja krodhavahnipratāpād
iva jitajaḍimānaṃ vācam uccaiḥ subāhuḥ|| 6 ||
mahati sati samāje jalpitair jātajāḍyaiḥ
kim api kila vivakṣur yat trapāṃ nāvagāhe|
tad idam akṛtakānāṃ prerikāṇāṃ prasaṅge
prabhusamadhigatānāṃ satkriyāṇāṃ mahattvam|| 7 ||
prakṛtiparicitatvaṃ randhrarakṣā kṣamitvaṃ
paruṣam api hitārthādhāyi vijñaptivākyam|
yaśasi rucir asādhyā dhīr alālāṭikatvaṃ
prabhuṣu bhṛśam amībhir bhrājate bhṛtyabhāvaḥ|| 8 ||
samararabhasasenāsindhusaṃdhukṣaṇenduṃ
pralayapavanam ugrakrodhacitrārciṣāṃ vaḥ|
tad iha nṛpatayo me śauryamāṇikyaśānaṃ
sadasi vacanam etat sopajoṣaṃ juṣadhvam|| 9 ||
kva bhuvanacaram asyoddama devasya tejaḥ
kisalayitam asaṃkhyaiḥ saṃkhyavīryāṅkurair vaḥ|
kva ca śikhina ivāgre bhaṅgi pātaṅgam aṅgaṃ
pratibalabalaṃ ūṣmācāntaye cintyate 'ntaḥ|| 10 ||
pṛthuphalaparibhogaiḥ poṣiteṣu prasādair
gurubhujabalasāreṣv evam asmāsu satsu|
katham anuditapūrvaḥ śatruśaṅkākalaṅko
viśati yaśasi śubhre nāyam alpo nikāraḥ|| 11 ||
anupacitabhujorjo nirjigīṣājaḍo vā
viralabalasahāyo vā sahetārivṛddhim|
pratipadaparimṛṣṭeṣv eṣu taikṣṇyād abhīkṣṇaṃ
bata vadata kim ekasyāpi sambhāvanāsti|| 12 ||
vidalitagajasenāmaṇḍalīgaṇḍaṣaṇḍaḥ
satatasamaraśauṇḍo maṇḍalāgrapracaṇḍaḥ|
nibiḍabalam akāṇḍākhaṇḍalākhaṇḍane 'pi
sphuṭayati bhujadaṇḍo nāsya kaṇḍūlatāṃ kim|| 13 ||
pratighakapilakāntiḥ kalpitānena cājau
bhrukuṭikuṭilabhīmabhrūr lalāṭāṭavīyam|
smayarasavaśahṛṣyaddṛṣṭidṛṣṭāś ca naṣṭa-
drutaripubalasenāsaṃkulā digvibhāgāḥ|| 14 ||
giritaṭavikaṭe 'tra krūravakṣaḥkavāṭe
dviradaradanakhaṇḍaḥ saṃyuge bhagnamagnāḥ|
sukhitanṛpatilakṣmīsambhṛtasmerasāndra-
smitakiraṇakarālāṃ kāntim asyodvahanti|| 15 ||
api viracitasaṃsthaḥ kṣudradoṣāndhakāra-
prasaradalanadīkṣādakṣiṇo dakṣiṇasyām|
śaradi ravir ivārāt ādadāty eṣa tīvra-
prasṛtakarasahasraḥ sarvadigbhyo 'pi sāram|| 16 ||
aviratam aviraktāḥ santi cāmī sahāyāḥ
kṣapitabahuvipakṣāḥ kṣatriyāḥ krūraśauryāḥ|
viyutam api hi yeṣām ekakālatrilokī-
kabalavidhir anicchāmātravighnād anighnaḥ|| 17 ||
dviṣadasahasahāyotsāhaśauryātibhāra-
svabhujabalasamiddhonnaddhasampattir evam|
tvam iva bhuvanabhartā bhūpate ko 'paro 'sti
tribhuvanavijigīṣāpūraṇaikapravīraḥ|| 18 ||
tad iha narapate dhīr dhīra kasmād akasmād
vijayajaladhimanthāmantharetthaṃ gatā te|
vimṛśa bhavadamarṣendūdayaikapratīkṣāṃś
calabhujabalavīcikṣobhiṇaḥ kṣatrasindhūn|| 19 ||
vidhuraripupurastrītīvraniśvāsatāpa-
vyatikarita ivoccair bhīṣmaṃ ūṣmāṇaṃ āpya|
prakaṭitaripudāho bhāti yasya pratāpaḥ
sphurati sadasi so 'yaṃ krūrakarmā suśarmā|| 20 ||
dṛḍhadhanur ayaṃ āste śauryaśauṇḍo yadīyaḥ
pṛthulapulakajālaḥ kopakampacchalena|
sucirasamaralābhodbhūtasotkarṣaharṣaḥ
prakaṭam iva vidhatte tāṇḍavaṃ bāhudaṇḍaḥ|| 21 ||
balanalagadapāṇḍyaprothakirmīrakahvā-
hvṛciyavanasurāṣṭrāndhāndhavo 'pi kruddhāndhāḥ|
pralayasamayadṛṣṭā dvādaśārkā ivaite
prakaṭayitum aśeṣaṃ ploṣi tejaḥ pravṛttāḥ|| 22 ||
nṛpa tad alam acintyair nīticintāntarāyaiḥ
saphalayatu bhujas te bhūbhṛtāṃ vāñchitāni|
asahanasahavṛddhā sāhasaikāntakāntā
vrajati na hi nṛpaśrīr dīrghatāṃ dīrghasūtre|| 23 ||
prakṛtivikṛtibhājo bhaṅgurāṅgasya bhūyaś
chalagatiṣu cariṣṇor vairivargākulasya|
satatam iti śarīrasyeva rājyasya rājan
phalam iha paralokoddhāraśuddheḥ kim anyat|| 24 ||
atibalavati śatrau tulyaśauryodaye vā
dadhati samucitatvaṃ nīticintāntarāyāḥ|
vada sunayavivakṣālakṣatāṃ yānti tūla-
plavalaghimasu rājan ke 'ṃsalāḥ kośaleṣu|| 25 ||
iyam iha nanu nītir bhīrulokasya mātā
prabhavati vijigīṣor vastunaḥ kasya siddhyai|
vahati na na vibhūteḥ śaktir agresaratvaṃ
samam idam udapādi kṣatram ugraṃ ca tejaḥ|| 26 ||
raṇasarasi vasantī sāndranistriṃśadhārā-
salilasatatasakter jātajāḍyeva lakṣmīḥ|
samabhilaṣati bhūmnā pluṣṭaduṣṭārisenā-
vanavibhavavivṛddhaṃ krodhanānāṃ pratāpam|| 27 ||
dhṛtadhanalavalīlādurvidagdhoddhatānāṃ
prabhavasi mṛdutāyai tādṛśāṃ tejasaiva|
draḍhimamayam ayo hi prāpya tejo.abhiṣaṅgād
vighaṭitakaṭhinatvaṃ yāti karmaṇyabhāvam|| 28 ||
hitadiśi guruṇāgre saṃskriyāyai tvayāpi
svarasubhagam aśiṣyasyeva tasyopadiṣṭāḥ|
durupaśayadhanārtistambhabhājo jaḍasya
śrutipatham avagāḍhuṃ na kṣamāḥ sāmavādāḥ|| 29 ||
tvayi ca dhanur adhijyaṃ dhairyadhurye dadhāne
yudhi kupitakṛtāntabhrūnibhaṃ bhītabhītaiḥ|
bhavadabhigamanighnais tyaktariktasya bhūpaiḥ
ka iva sadasi śūnye kośaleśasya bhedyāḥ|| 30 ||
tad alam ativilambyālambyatāṃ manyuvahni-
vyatikaravikarālā dhīr ahaṃkāraraudrā|
yad amṛdu yad avaśyaṃ yat prasahyorjitaṃ yad
yudhi tad upadadhānāḥ pātratāṃ yānti siddheḥ|| 31 ||
gurutaragirimanthakṣobhitākṣobhyasindhu-
vyatikararasayogyā vāsanāvāsiteva|
samabhimatavimardā raudrakarmapriyeṣu
prasarati ramamāṇā tādṛśeṣv eva lakṣmīḥ|| 32 ||
api nayananimeṣonmeṣamātraṃ samastād
aparaparibhavārti ślāghyaṃ āyuḥ kṛtārtham|
imam amalinam icchocchrāyaṃ ācchādayantaṃ
kṣaṇam api na viyuṅkte pakṣapātād iva śrīḥ|| 33 ||
jagati gatimad uccair nirvicārapravṛttaṃ
sakalam asakalaśrīr ekadeśodgatāpi|
śamayati śaśilekhā poṣi doṣāndhakāraṃ
kim api balam alaṅghyaṃ paśya tejasvitāyāḥ|| 34 ||
api kim idam udādhve krodhanāḥ śyāmaśociḥ-
śabalitasakalāśākāśavaktrais tanutraiḥ|
viracayata vapūṃṣi kṣobhitodbhidyamāna-
pratighadahanadhūmadhyāmalānīva vīrāḥ|| 35 ||
pratibalagajasainyāsannagandhānubandha-
prakaṭitapaṭudarpāsphālitaiḥ karṇatālaiḥ|
gururaṇabhaṭanādatrāsitāntāhavaśrī-
vyajanapavanalīlāṃ kuñjarāḥ kalpayantu|| 36 ||
avitatham athavaite yūyam aspṛṣṭakopāś
ciram anuditaśauryaśrānti viśrāmyataivam|
ayam ativikaṭāṃso bhāsurāsir mamājau
saphalayatu kṛtāntākāṅkṣitaṃ bāhudaṇḍaḥ|| 37 ||
kṣititalaphalake 'smin sindhusaṃsaktalekhā-
valayini bhujavegāsphālanabhrāntibhājau|
samahimahimahemakṣmādharau kiṃ kareṇa
tribhuvanajayadākṣyād akṣavad dolayāmi|| 38 ||
sadasi dalitadṛptārātisenākṣaṇottha-
kṣatajanadanimajjatkuñjarasyandanāśvā|
smaratu suciram urvī jāmadagnyaprasarpat-
paruṣaparaśupiṣṭakṣatrasargopasargam|| 39 ||
sapadi nṛpaticakraṃ prekṣatāṃ sphāritākṣaṃ
kṣitipatijayalakṣmīṃ nartyamānāṃ mamājau|
svakaratulitakāṃsyākāravedho.aṇḍakhaṇḍa-
kṣitivalayaviśeṣāśleṣasaṃghaṭṭaghoṣaiḥ|| 40 ||
bhavatu niyatimedhāmañjarījātam etaj
jaladhidalakavāṭaśliṣṭaśailālinamram|
mama suragirivṛntodbhedi bhūpīṭhapuṣpaṃ
dhṛtaghanavanamālākesaraṃ karṇapūre|| 41 ||
vihitaguruvikāsabhrājamānapravṛddhot-
kālikanṛpasarojaṃ mantharonmantham ittham|
sphuradupadhi subāhuḥ kṣubdhaṃ ākṣipya vākyaṃ
vyavalitabhujadaṇḍo vyaṃsitāṃso vyaraṃsīt|| 42 ||
vākyaṃ saubāhavaṃ tad yavanaśatadhanurbabhrujambhāmbarīṣa-
pradyotaprothapāṇḍyāḥ prasabham anupadaṃ tadrasārabdhapoṣaiḥ|
bhāvais tadbījagarbhair mukham iva carame saṃdhayaḥ saṃdadhānāḥ
parjanyaprājyagarjorjitamuditaśivāḥ sphūrjadūrjaṃ jagarjuḥ|| 43 ||
kapphiṇābhyudaye mahākāvye mantrodghāto nāma caturthaḥ sargaḥ||