sarvajñatādiguṇagocaram āyayau yā
dhyeyā yato 'pi yatibandhur abodhi bodhiḥ|
sā satyanirdhutacaturvidhavibhramārtir
mūrtir dṛśāṃ diśatu dāśabalī śivaṃ vaḥ|| 1 ||
Hahn 2007
- Siglum: MH07
This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.
More ▾
| Title | Kapphiṇābhyudaya |
| Author | Ratnākara |
| Physical description | |
|---|---|
| Language/Script | Sanskrit in Latin script. |
| Format | book |
| Material | paper |
| Extent | 239 pages. |
| History | |
|---|---|
| Date of production | 2007 |
| Place of origin | Kyoto |
Published in 2007 by Hōzōkan Publishing Company in Kyoto.
- MH07
I. Nagarīnarendravarṇanam
namo buddhāya|
asti prathā paramadaityasukhāyanābhiḥ (?)
syūtā (?) gajānanaguhāvasitādhivindhyam|
līlāvatīti nagarī kalitāpadānā
durgeva bhāvitaraṇā hariṇāṅkanena|| 2 ||
yā tuṅgasaudhatalakīlitaketudaṇḍa-
ṣaṇḍair javāj jalamucām abhipāṭitānām|
utsaṅginībhir avataṃsapatākikābhir
bandhaṃ vyadhād iva divi vraṇapattikābhiḥ|| 3 ||
yatrānvakāri calacīnajavaijayantī-
vinyāsaśāraśikharair bhṛśam aindranīlaiḥ|
okobhir ākulamaruddalitadyusindhu-
vikṣiptavīcivalayasya vihāyasaḥ śrīḥ|| 4 ||
digdantidānajaladhūsaradhāmni vindhya-
skandhe samiddhamaṇinaddhatalena yasyāḥ|
sauvarṇasālavalayena nikāṣapaṭṭa-
mūrcchanmahārajatarājirucā vireje|| 5 ||
tiṣṭhan yadaṅkabhuvi cāmaradhūtam antas
talpopabhuktapaṭavāsaparāgapāṃsum|
śṛṅgāravān iva gavākṣamukhaiḥ smayāt sma
tāmbūlam udgirati vibhramavāsavargaḥ|| 6 ||
yasyāṃ vilāsabhavaneṣu gavākṣajāla-
prājyapraveśaviśadāḥ kṣitiṣu kṣapāyām|
kāntāvimardisuratatruṭitāvamukta-
muktāvalīvilasitaṃ dadhur indupādāḥ|| 7 ||
dhvāntānuviddha iva nīlaśilālayānāṃ
bhābhiḥ sasandhya iva śoṇadṛśadgṛhāṇām|
jyotsnāvamṛṣṭa iva sādhu ca saudhadhāmnāṃ
yāṃ īyivān ravir aho bubudhe triyāmām|| 8 ||
yatrendranīlamaṇikhaṇḍagavākṣabhāñji
jyotīrasodavasitāni samatvaṃ īyuḥ|
kallolalolanavilolitakālakūṭa-
kālīkṛtāmbukuharasya payaḥpayodheḥ|| 9 ||
śyāmāśmaveśmaśikharāvalitulyakāla-
saṃkrāntatārataraṇipratimā babhau yā|
kālīva kalpavilayotsavakalpyamāna-
veṣārpitārkakulamaṇḍanamaulimālyā|| 10 ||
sphārasphuṭasphaṭikakūṭakuṭīr niviṣṭa-
nīlāśmanirmitagavākṣamarīcimiśrāḥ|
yā kālakaṇṭharucisaṃkaraśaṃkarāṭṭa-
hāsacchaṭācchapaṭalapratimā babhāra|| 11 ||
rociṣṇucīnapaṭacañcalacīracāru-
cchāyānibhā nabhasi yatra babhūva gaṅgā|
uttālatālutalacumbitameghabhūṣu
prāsādapaddhatiṣu śāśvatavaijayantī|| 12 ||
udghāṭanotkaṭakavāṭapuṭadhvanīni
vyāttāni nīlamaṇimandiragopurāṇi|
yasyāṃ dadarśa vikasadvikaṭāṭṭahāsa-
saṃghaṭṭarāhuvadanāvaṭatarkato 'rkaḥ|| 13 ||
śayyālayeṣv asitapadmavataṃsarājir
yasyāṃ rarāja ramaṇair upabhuktamuktā|
uddāmamanmathamahebhavikīrṇaśīrṇa-
khelaskhalatsphuṭaviśṛṅkhalaśṛṅkhalaśrīḥ|| 14 ||
āmuktamauktikakarālataleṣu yasyām
atyantahāriṣu harinmaṇikuṭṭimeṣu|
hiṇḍīrapiṇḍaparipāṇḍutaḍāgatoya-
tarṣaprakarṣarabhasāḥ patagā nipetuḥ|| 15 ||
yatropabhogabhavaneṣu vilāsinīnāṃ
helāvamuktiparikuṇḍalitākṛtīni|
dāmāni babhrur abhito maṇimekhalānāṃ
kandarpakūbariparicyutacakralīlām|| 16 ||
nīlābhrakānanakarālatamālavallīr
ākāśadigdviradadānanadīr adīnāḥ|
yā sādhusaudhaparipāṇḍurapuṇḍarīka-
ṣaṇḍālinīr avahatāgurudhūmaveṇīḥ|| 17 ||
acchinnadānajalasaṃtatisiktabhūbhir
ārūḍhadīrghasudṛḍhapratimānanair yā|
nīcair agamyagatim unnatiṃ āśrayadbhir
bhreje gṛhair jayagajair iva rājalakṣmīḥ|| 18 ||
yā saptasaptirathasaptibhir ākṛtīnāṃ
jyotīrasopalabhuvi pratipheluṣīṇām|
ālokanena vahamānavahatturaṅgī-
śaṅkaiḥ svaghoṣaghaṭayā bibharāṃ babhūve|| 19 ||
digdantidṛptapariṇāmanikhātabhagna-
dantaprabhāṅkurakarālatalāni yasyām|
nīlāśmatoraṇataṭāni vimugdhahaṃsāḥ
svacchāmbunūtanamṛṇālarasād apaśyan|| 20 ||
nīlair vilāsaśayanīyagṛheṣu yasyāṃ
līlāvimardalulitair nalināvataṃsaiḥ|
ūhuḥ śriyaṃ mṛgadṛśāṃ makarāṅkamuktair
ākarṣapāśavalayair iva bhūmibhāgāḥ|| 21 ||
sparśair diśan kusumakārmukanarmakarma-
gharmormimarmaritamarmasu śarma śītaiḥ|
yatrāśliṣanmarud anirmadanarmadāmbu-
kallolaśīkarakarālitaśailaśānuḥ|| 22 ||
tasyām ahīnakaṭakaḥ sphuṭavīrabhadraḥ
sampṛktaśaktimahimā bhṛtabhūtiśobhaḥ|
bhūbhṛd babhūva bahudarśanabhogyamūrtiḥ
śrīkapphiṇaḥ prabhur ivendukalāvacūlaḥ|| 23 ||
ullāsya kālakaravālanavāmbuvāhaṃ
devena yena jaraṭhorjitagarjitena|
nirvāpitaḥ sakala eva raṇe ripūṇāṃ
dhārājalais trijagati jvalitaḥ pratāpaḥ|| 24 ||
yaḥ saṅgare gurubhaṭodbhaṭadhairyadhūti-
svādhyāyasādhanapuraḥpraṇavāyamānam|
huṃkāram antakadhanurdhvanidurdharaugha-
grastāhitājagarajāgaram ujjagāra|| 25 ||
uttambhyamānam anubandhikabandhabandha-
skandhāndharandhrarudhiraplutipūradaṇḍaiḥ|
chāyāvidhāyi dhṛtaśauryaguṇānuguṇyaṃ
tāpaṃ jahāra bhuvi yasya yaśovitānam|| 26 ||
śūrapratāparavimaṇḍalarāhujihvā
vaihvalyato ripubhir āhavadevatābhrūḥ|
pratyarthikīrtiyamunābalalāṅgalāgra-
lekhā vyaloki yudhi yatkaravālavallī|| 27 ||
dṛptebhakumbhanipatatkaravālayaṣṭi-
niṣpiṣṭamauktikagaṇodgatadhūlilekhā|
yenocchvasacchiśiraraśmimayūkhakāntir
utpetuṣī nabhasi kīrtir iva vyaloki|| 28 ||
yaḥ khaḍganirdalitaniṣṭhuravairikaṇṭha-
niṣṭhyūtaṃ ākṣipad aniṣṭhitatantravṛttiḥ|
ātmapratāpapaṭavānavicitrasūtra-
saṃtānatantutulam asraśirāsahasram|| 29 ||
agrāhi nīvrajavijarjarakakṣakūṭa-
jūṭair ghaṭāghaṭitakākakulākṣamālaiḥ|
dīkṣeva vikṣataviṭaṅkakuṭīkapota-
bhasmatripuṇḍrakadharair yadarātisaudhaiḥ|| 30 ||
śokāndhaśātravavadhūnayanapraṇāla-
nirvāhitāsrajalasiktatayeva yasya|
śauryadrumaḥ samadhita dviṣatāṃ gṛheṣu
śākhāśiphānicitanīvramayīm avasthām|| 31 ||
khedāvilā bakulaṃ ākulatācitena
cittena cūtam atimuktakam uktakaṣṭāḥ|
śokād aśokam avamā navamālikāṃ ca
tyāge purāṃ yadariyoṣita āmamantran|| 32 ||
dīrṇadviṣaddvipaśirovisṛtair viśuddhi-
sabrahmacāribhir anuvrajanecchayeva|
ārohato nabhasi yadyaśasaḥ sitasya
muktāphalair atirayād udaphāli lolaiḥ|| 33 ||
khaḍgāgrabhinnaripukuñjararājakumbha-
kṣobhād alakṣitasamullasitāsitaśrīḥ|
muktāphalaprakaravṛṣṭir adhaḥ patantī
yenārikīrtir iti sādaraṃ āluloke|| 34 ||
saṃghaṭṭajarjarabhujābharaṇāruṇāśma-
puṣyatparāgapaṭapāṃsulamāṃsalāṃsāḥ|
pṛthvībhṛtaḥ satatasaṃnidhiśāliśaurya-
tejo'ṅkurāṅkitabhujā iva yaṃ praṇemuḥ|| 35 ||
jīrṇatruṭatpaṭalarandhraniviṣṭavṛṣṭi-
kledācitacyutiparapracalatvaco 'ntaḥ|
pratyarthivāsagṛhabhittibhuvo yadīya-
bhītyeva citraracitān mumucuḥ patīn svān|| 36 ||
darpāndhagandhagajakumbhakavāṭakuṭṭa-
saṃkrāantinighnaghanaśoṇitaśoṇaśociḥ|
vīrair vyaloki yudhi kopakaṣāyakāntiḥ
kālīkaṭākṣa iva yasya kare kṛpāṇaḥ|| 37 ||
bhadrātmano duradhirohatanor viśāla-
vaṃśonnateḥ kṛtaśilīmukhasaṃgrahasya|
yasyānupaplutagateḥ paravāraṇasya
dānāmbusekasubhagaḥ satataṃ karo 'bhūt|| 38 ||
atyāyatair niyamakāribhir uddhatānāṃ
cintyaiḥ prajābhir anapāyamayair upāyaiḥ|
śaurir bhujair iva caturbhir adaḥ sadā yo
lakṣmīvilāsabhavanair bhuvanaṃ babhāra|| 39 ||
tejasvitāvirahiṇo laghimānam etya
jāḍyaṃ śritāḥ praśamitāyatayo 'dhidoṣāḥ|
grīṣmāvasānadivasā iva yasya loke
saṃkocaṃ īyur arayaḥ parihīṇamānāḥ|| 40 ||
kāṣṭhāntarajvalitatīvratarapratāpa-
siddhāṃ prakalpitakareṇa mahīm ahīnām|
bhuktvā yaśo 'rthakṛtanirvṛti viśvayātrā-
pātreṇa yeṇa mahatā rabhasena pītam|| 41 ||
yasya prayāṇasamaye karikarṇatāla-
kīrṇais turaṅgakhurakuṭṭanadīrṇadehaiḥ|
śrāntair digambaravilaṅghanato nipatya
revāpayāṃsi papire pṛtanārajobhiḥ|| 42 ||
prājyapratāpajajayārjitarājako 'pi
niṣkaṇṭakāni bhuvanāny api yaḥ praśāsat|
caryāṃ caraiś ciram acārayata prajānāṃ
ācāratucchacaritā vibhave 'pi nāryāḥ|| 43 ||
iti niratiśayaśrīśīlaśauryaśruto 'sau
diśi diśi nṛpaceṣṭāś cintayan maṇḍalotthāḥ|
jvalitavijayirājyaprājyatejāḥ prajānāṃ
śivam amṛtam analpaṃ prāpa kīrtipravāham|| 44 ||
stotrāhnikāṅkasya kāśmīrabhaṭṭaśivasvāminaḥ kṛtau kapphiṇābhyudaye śivāṅke nagarīnarendravarṇano nāma prathamaḥ sargaḥ||