User Tools

Sitemap • Trace: • hv-47-k

Kāvyamālā

  • Siglum: K

Kāvyamālā Edition of the Haravijaya. Transcript based on an old e-text from Diwakar and Rabi Acharya.

More ▾
Title Haravijaya
Author Ratnākara
Physical description
Language/Script Sanskrit in Devanāgarī script.
Format book
Material paper
Extent 708 pages.
History
Date of production 1890
Place of origin Bombay

Published in 1890 by Nirṇaya-Sāgara Press in Bombay.

  • K
L

saptacatvāriṃśaḥ sargaḥ|

saṅgrāma mūrdhni dalitāsura cakravālā-
m ālokya tatra vikasat pulaka prabandhāḥ|
ābaddha gocara pariṣṭhita vāk prapañcaṃ
saṃtuṣṭuvur bhagavatīm iti siddhasādhyāḥ||1||
kiṃ citram atra dalitaṃ ripu cakravāla-
m etat tvayā janani yat prasabhaṃ raṇāgre|
nirbhindatī bhavana varti niśāndhakāra-
m āścarya dhāma nahi dīpa śikhā kadācit||2||
dor daṇḍa dṛpta manasaḥ subhaṭā vipakṣam
anye 'pi yad raṇa mukheṣu parājayante|
tac chaktirūpam anaghasthiti saṃ.................
.........sa bhāga paramāṇu vijṛmbhitaṃ te||3||
daityaiḥ purā suracamūsu vinirjitāsu
tadguptikāraṇavaśādasamāptaśaktiḥ|
dhyātvā sanātanapadaṃ kila śaṃkareṇa
sṛṣṭāsi nānyajitajīvanibandhavṛttiḥ(?)||4||
nistriṃśamudvahasi saṃprati nīlakaṇṭha-
kaṇṭhaprahbāsadṛśa ityanurāgahetoḥ|
huṃkārasaṃbhramacalatsakalātatāyi-
cakrā na jātu raṇalālasayā punastvam||5||
āyodhaneṣu sakalāmaracakravālair
ālokitā tvam asurādhipa.................|
vistāridarpaṇamivodaradeśalagnam
abhraṃkaṣoṣṇakaramaṇḍalam udvahantī||6||
kārkaśyam aśmanikarād iva saṃyugeṣu
dūrvāpravālakalayā(kavalā)d iva ............ṛaṅge(raṅgamaṅge)|
L
saṃkrāntim āpad iva devi himasthalībhyo
hāsacchavis tava tuṣāragirer vipāṇḍuḥ||7||
mārgaṃ purā kila sahasraruco rurutsu-
rudyannagastyamunināpi niṣiddhavṛttiḥ|
vindhyācalastvayi guhāgṛhabhāji sapta-
lokādhikaṃ dhruvamavāpa samunnatatvam||8||
saṃcintya rūpamatulaṃ tava puṣpaketu-
dāhānutāpavaśataḥ śvasitoṣṇavātān|
ākṛṣṭakaṇṭhakuharāspadakālakūṭa-
kūṭānalāniva mumoca mṛgāṅkamauliḥ||9||
sadmājiraṃ tava nabhaścaracakravāla-
puṣpopakāranipatanmadhupāvalīkam|
vicchinnabhaktabhavabandhanalohapāśa-
jālāvakīrṇamiva rājati mekalādrau||10||
nistriṃśaghātavinikṛttapaśūpahāra-
jīvā ivāpya sugatiṃ paridīpyamānāḥ|
vindhyādrikaṃdarajuṣo bhuvanāndhakāra-
nirbhedino 'ntikagatāstava bhānti dīpāḥ||11||
brahmāṇḍaśaṅkhamupapāditakaṇṭhabhāga-
randhraṃ viniḥśvasitamārutapūrṇagarbham|
saṃhārarātriṣu vipūrayasi tvameta-
mālambya bhairavavapuḥ prasabhaṃ karābhyām||12||
āviṣkṛtapralayadurdharakālarātri-
mūrterudaravikaṭāvayavāntareṣu|
paryāptimeti tava saṃhṛtasaptaloka-
lokāsthisaṃbhṛtiśatairapi maṇḍanaṃ kim||13||
L
nirmāṃsatādhavalarāhuśiraḥkapāla-
kāṃsyāgrapītabhuvanakṣatajāsavaśrīḥ|
viśrāṇayasyatanutatpiśitāvadaṃśa-
leśānuviddhadaśanāmba na kasya bhītim||14||
āhanyamānakanakācalalāḍanottha-
nādānubandhādhirīkṛtasaptalokam|
kalyāṇi vādayasi kālavibhāvarīṣu
padmāsanāṇḍavikaṭordhvakavāṭaghaṇṭām||15||
helāviniḥśvasitapītakaṭhorakaṇṭha-
nāḍīnirargalagalatkṣayasāgarāmbhaḥ|
rūpaṃ bibharṣi valayīkṛtasaptasaṃkhya-
dvīpoṣṇaraśmikiraṇāvahiśailacakram||16||
saṃhārakālarabhasotthitadhūmaketu-
nirdagdhasaptabhuvanendhanajo na mātaḥ|
manye lalāṭataṭapuṇḍrakamātrake 'pi
paryāptimeti tava bhasmaparāgapuñjaḥ||17||
aurvo nirargalakarālaśikhāsahasra-
bhasmīkṛtārṇavajalastava jāṭharo 'gniḥ|
śvāsāstavaiva marutaḥ pralayāgameṣu
helānipātitakulācalacakravālāḥ||18||
vakṣaḥsthalīvinimitāmaraśailadaṇḍa-
lagnendukhaṇḍanavabhāsvadalābupātrām|
āśrāvayasyatanuśeṣaśarīratantra-
tantrīguṇāṃ pralayarātriṣu kāṇḍavīṇām||19||
L
saṃkalpakalpitaviśaṅkaṭakaṇṭhabhāga-
mantaḥsthasaptajalaśevadhivāripūrṇam|
brāhmāṇḍameva sahasā vidadhāsi caṇḍi
līlākamaṇḍalumimaṃ pralayāgameṣu||20||
vaikuṇṭhacakraparikalpitaśaṅkhapattra-
saṃruddharandhravikarālavilambipāśam|
karṇaṃ bibharṣi bhagavatyabhirāmameka-
manyaṃ ca hemagirikāñcanatālapattram||21||
abhyucchvasatphaṇapalāśakarālajihva-
pratyagrapakṣmanikurumbaśarīranālam|
karṇe 'vataṃsayasi pāṇḍurapuṇḍarīka-
śobhaṃ bhavāni bhujagādhipamapyanantam||22||
astodayādrinamitonnamitārkacandra-
vistīrṇabimbamaṇikandukakīrṇahastā|
cikrīḍitha tvamiha caṇḍi kumārabhāva-
mātasthuṣī bhuvanavismayanīyamūrtiḥ||23||
tārakvaṇaḍḍamarukā karusīṣu caṇḍi
saṃhārakālamuditā vicarasyamandam|
skandhādhiropitaviṭaṅkavirañcikāya-
ka"kālabhāganinadatsamavartighaṇṭā||24||
eṣā vibhāti tava devi kapālapaṅkti-
ruttaṃsitā dalitaśaṅkhavipāḍuratviṭ|
saṃvartakālakalitotkaṭavahniheti-
bhasmokṛtākhilakulācalamaṇḍalaśrīḥ||25||
L
raktacchaṭāśavalakuñjararājakṛtti-
saṃchāditastanataṭāmba bibhāsi kālī|
paurandarī digiva bāladviākarāṃśu-
bhinnāntarālatimirasthagitodayādriḥ||26||
ābhīlatāṃ brajasi pāṇinakhāgraśukti-
līlāgṛhītasakaloddhatasaptasindhuḥ|
pādā'Ngadīkṛtakarālasahasraraśmi-
dhāmāvadhikṣititalā pralayāgameṣu||27||
yogeśvarīruciracakrakarālanābhi-
baddhāsthabhairavahṛdaṅkagatāṃ janastvām|
dhyāyannasaṃkalitasaṃkaṭaśokaśaṅku-
śaṅkaḥ śaśāṅkamukhi śaṃkaratāmupaiti||28||
brahmaprapañcapariniṣṭhitabhedasāma
gāyantyaviplutamanāḥ pralayotsavāgre|
śarvāṇi vādayasi dīdhiticakravāla-
tantrīguṇāñcitaśaśāṅkakalāvipañcīm||29||
vispaṣṭapāṭaladalaprakarāyamāṇa-
māṇikyadīdhitiviṭaṅkatalāṅgulīkaḥ|
abhyudvahanbhuvanapaṅkajameṣa bhāti
hastastavaiva bhujagādhipabhogadīrghaḥ||30||
kleśaspratānagahanāpratipannapāra-
saṃsārakānanakaṭhorakuṭhāradhārā|
sphūrjatyanuttaratiraskṛtatāpavartma-
medhāmṛtasrutiraho tvayi bhaktirekā||31||
saṃspṛśyamānamabhitastuhinotkareṇa
yadyutsṛjenna kamalaṃ kamalākṣi lakṣmīm|
L
tena sphurannakhamaṇiprabhayāvalīḍhaḥ
saṃprāpnuyāccaraṇa eṣa tavopamānam||32||
saṃdehitāruṇadalāṅgulipādapadma-
pīṭhotthasaurabhabharākulitaṃ vibhāti|
saṃbhāvya kṛṣṇarajanīti samāgataṃ tvāṃ
sevārasāttama ivātanu bhṛṅgacakram||33||
saṃvādibimbaphalamujjvalakambukaṇṭhi
tāmbūlarāgaparipāṭalamoṣṭhayugmam|
ābhāsi tatkṣaṇanipītapaśūpahāra-
viṣyandiśoṇitarasārdramivodvahantī||34||
ardhaṃ śaśāṅkaśakalābharaṇena gāḍha-
rāgopagūḍhamanasā vapuṣor 'pitaṃ te|
niḥśeṣameva hṛdayaṃ punaravyalīka-
mānopaghātaghaṭanaṃ didiśe tvayāsai||35||
pre"khatphaṇāmaṇimayūkhaśikhābhilakṣya-
prālambakambu raśanāspadamecakāhiḥ|
kālī vibhāsi bhagavatyupahārapīta-
dhūpotthadhūmapariṇāmavaśādiva tvam||36||
uṣṇīṣabandhadṛḍhapīḍitakaṇṭhapīṭha-
phullatphaṇāphalakavāsukiphūtkṛtotthāḥ|
tvāṃ caṇḍipāvakaśikhāḥ paritoṣayanti
saṃ'soṣitābhrasaritaḥ śirasi smarāreḥ||37||
bhāsi tvamamba rajanī śaśalakṣmaśāra-
madhyaṃ dadhatyasakalāmṛtaraśmibimbam|
L
vispaṣṭapaṅkapaṭalāvilarandhramārga-
tiryaksthitasphuradaraṇyakapālakalpam||38||
preṅkhajjapākusumakomalacandanāmbu-
carcāṅkapīnapariṇāhipayodharaśrīḥ|
śobhāṃ bibharṣi bhagavatyupagūḍhasāṃdhya-
rāgeva kṛṣṇarajanītvamupāgatā tvam||39||
sevāśritojjvalakarāmburuhāśrayaṃ te
tatsaṃ'srayātparijanatvamivopanetum|
chāyāndhakāritaguhāgṛhagarbhabhāgā
vīrāḥ karālakaravālalatā diśanti||40||
āliṅgitā iva ca vīranikhātakhaḍga-
paṭṭāṃśubhirjanani vindhyaguhāniketāt|
lakṣmīṃ vahanti śabarāḥ sajalāmbuvāha-
cchāyāḥ kṛtārghavidhayastava niṣpatantaḥ||41||
aṅkādhirūḍhaguhacandrakiṇastavāmba
nṛttopahārasavikāsaśikhaṇḍakhaṇḍāḥ|
vindhyādrikaṃdaraguhāgṛhasaṃniveśa-
bhājo vahanti śikhinaḥ parivāralīlām||42||
nistriṃśaghātavinikṛttapaśūpahāra-
raktacchaṭācchuraṇaśobhi gṛhājiraṃ te|
dhatte harapraṇatiroṣagṛhītasaṃdhyā-
bandīśatānvitamivāniśamamba lakṣmīm||43||
tvattaḥ prabhāvamahitā bhuvanatrayasya
nānāphalaprasavasaṃbhṛtihetubhūtāḥ|
L
vidyāḥ prasūtimasamāmadhijagmuramba
hemādrisānusaraṇeriva kalpavallyaḥ||44||
tattvatrayīkṛtapadāṣṭavibhedavarga-
niḥśeṣavāṅmayanibandhanavarṇarāśim|
svargāpavargaphalasaṃpadananyahetu-
māmnāyamātaramuśanti purāvidastvām||45||
sarvaprapañcaparivarjitanirvikāra-
śāntātivṛttaparatattvaśivātmavṛttiḥ|
sūkṣmātisūkṣmagahanaprakṛtiḥ śikheti
sauṣuptamaṇḍalagatā paradīpyase tvam||46||
lokānsisṛkṣuradhitiṣṭhati yāmabhīkṣṇa-
mīśastvayā prakṛtikāraṇatāṃ dadhatyā|
granthau sthitaṃ puṭaparamparayā tvayādi-
madhyāvasānarahitāṃ sthitimīyivatyā||47||
vispaṣṭasaptadaśakasthiti gauri liṅga-
māśritya tiṣṭhasi vibhoḥ phalabhoktṛśaktiḥ|
jñānātmanastvamakhileṣu ca vigraheṣu
cidrūpatāmupagatā kila bhautikeṣu||48||
kleśendhanotkaranirargaladāvavahni-
jvālāhatāvatamasā kila bhāvanā tvam|
abhyāsayogavaśato jananī jinānā-
mālokaheturuditā jinaśāsanasthaiḥ||49||
bodhiprakarṣamadhirūḍhavato jinasya
sopānapaṅktiruditā muditādibhūmiḥ|
spaṣṭaprakārayugalādhimukhaṃ samādhe-
rabhraṃśabhāgbhuvanadhāriṇi dhāraṇī tvam||50||
L
kleśendhanaughaghaṭanāsravavartmavahni-
jvālā jinasya jananītvamupoḍhamohā|
prajñā tvameva hatasaṃtamasāmba tasya
jainairabhīkṣṇamuditā bhavabhaṅgahetuḥ||51||
akṣuṇṇamārgayugabhaṅgadaśāvyatīta-
vispaṣṭamārgagativartmarathādhirūḍhaiḥ|
tvaṃ kīrtitābhayanirātmakatāvalagna-
rūpā bhavāni matipāramiteti boddhaiḥ||52||
kleśapratānagahanapratibandhaśūnya-
skandhapravāhaparihārinimittamekaḥ|
aṣṭāṅga eṣa parinirvṛtaye tvayaiva
saṃdarśito 'tigahanaḥ sugatasya mārgaḥ||53||
garbhīkṛtāvadhutasaṃtamasānubandha-
saṃvitprakāśaviṣamīkṛtayānamārgaiḥ|
āryāvalokabhuvi lokitasaṃbhavā ca
tārā tvamamba kathitābjakulaprasūtiḥ||54||
prāptābhisaṃdhiparatāmanuvṛttilagna-
gauṇasthitiḥ sthitasitātiśayādabhīkṣṇam|
vidyeti sarvabahulākhiladṛṣṭisaṃjñā
saṃkarṣaṇī nigaditā kila śāsane tvam||55||
ābadhya yatra natimuttamayogayoga-
bhāji vrajanti pa(ya)tayo 'dhipateḥ sayuktvam|
sādhāraṇā tvamapavargaphalaikahetu-
rekāyanairabhihitā bhagavatyaliṅgā||56||
L
śīrṣaiḥ sahasraśirasā puruṣeṇa sāma-
gītirvibhedagahanapratipannaśākhā|
tvaṃ gīyase śrutisukhā ruciraprapañca-
pañcaprakārapariniṣṭhitacārubhaktiḥ||57||
bhogāpavargasukhasādhanasaptakoṭi-
saṃkhyānamantragaṇanāyakatāṃ dadhatyā|
kṛtsnaṃ tvayaiva gaganāmṛtadhārayaita-
dāpyāyyate jagadanekaguṇaprapañcam||58||
śāntā śivāgamapadaṃ paramiśitustva-
mādyā kalā kila kalātritayaikahetuḥ|
tattvaṃ vyatītya bhavatīṃ sthitimabhyupetya
dīrghājavañjavajuṣo na bhavanti yuktāḥ||59||
brahmānanebhya uditā kila pañcadhā tvaṃ
pañcabhya eva bhuvanatrayasiddhihetuḥ|
vidyāvibhāvitavicitrapavitramantra-
stotraprapañcarucirasthitirañcitaśrīḥ||60||
yaṃ jñānaliṅgamativṛttavikalpacakra-
mutkrāntamuttamadhiyaḥ sakalārthacitrāḥ|
udgīthamāhurabhito 'bhividhāya viśva-
mekaṃ sthitaṃ sakalasādhanadharmaśūnyam||61||
vyāpya sthito jagati yaḥ sakalā giraśca
yaśca praviśya kila tā api dhāturīḍyam|
yaṃ sarvatomukhamatharvagiraśca hetu-
mālambamūlamavadātadhiyo vadanti||62||
L
nirbhidya gaṇḍataṭamātmabhuvaḥ kilāśu
yenodayāya jagatāmudiyāyi pūrvam|
yadrūpamāśritavivartavikārabhedaṃ
brahma dvidhāsthitamuśanti parāvarajñāḥ||63||
yaddvāramuṣṇakiraṇasya vadanti saura-
maudumbaraṃ ca kavayaḥ kila tālusāhvam|
yastriprakārakalanāsubhagatvameti
yogābhiyuktamanasāṃ padamavyavastham||64||
vyāpīti haṃsa iti tāra iti sma śukra
ityucyate ya iha vaidyuta ityanantaḥ|
tristhānatādi viṣayaṃ ca yamāmananti
brahmāmalaṃ trividhabhedavivarti yuktāḥ||65||
brahmā maheśvaraguruśca purā kilaita-
dākāśavatsvakṛtasaṃnidhimetya sāṅgam|
vedaṃ prajāpataya ūcaturekameva
tasyāpi yo mukhamiti prathitaḥ pṛthivyām||66||
nirdiśyate jagati yaḥ kila śabdatattva-
bhāvārthanāmasuguṇapraṇidhānadṛśyaḥ|
yasminnilīnamanasaḥ sukhaduḥkhamoha-
saṃvedanena rahitāśca bhavanti yuktāḥ||67||
yaḥ kīrtyate śrutiṣu copaniṣatsvaśeṣa-
vidyānareṣu ca phaladvayaheturekaḥ|
utthāpitapraguṇasaṃskṛtayaśca yena
tadvācyatāmupagatāḥ kila santi vedāḥ||68||
L
brahmādidaivatamayaṃ paramaṃ pavitra-
micchanti yaṃ sutapasāyamanaṃ dvijendrāḥ|
āruhya yaṃ sapadi kūbariṇaṃ vrajanti
mārgaṃ sudurgamanargalameva yuktāḥ||69||
yaṃ saṃvidādimayamāhuranekabhedaṃ
yaścākṣuṣaḥ puruṣa ityabhidhīyate a|
yaṃ taittirīyaka uśanti rasādikoṣa-
cakrasya hetumavadātadhiyaśca koṣam||70||
aspaṣṭavaikṛtaviviktavikāracakra-
hetorniyamya na kadāidatādavasthyam|
kṛcchreṇa nābhihṛdayāmbujakoṭarasthaṃ
paśyantyaviplutasamādhidṛśo yamāryāḥ||71||
vispaṣṭamātmaniratāḥ sudhiyo vikalpa-
śūnyaṃ samādhimavalambya samūḍhasattvāḥ|
vindanti yaṃ vitamasaḥ kila nistaraṅga-
bhaṅgodadhipratinidhisthitamātmasattvam||72||
svargopabhogasukhadānanirargalaṃ ya-
micchanti yajñapuruṣaṃ munayaḥ ṣaḍaṅgam|
kṣiptāhutiḥ śikhimukhe kila yasya samya-
gutsṛṣṭavṛṣṭimupatiṣṭhat uṣṇaraśmim||73||
syātkāraṇaṃ yadi na śāsvatikatvayukta-
mucyeta nityamiti cennahi kāraṇaṃ tat|
ākṣepayugmamiti bādhakamānaśūnyaṃ
śaktiṣvabhīkṣṇamaviropitavṛti yasya||74||
tādāmyabhedarahitāvanicandrabhāsva-
dātmānilānalanabhaḥsalilena dehe|
L
vyāpyākhilaṃ sthitavatā parameśvareṇa
yena nyaṣedhi jagato 'parakartṛbhāvaḥ||75||
brahmapratiṣṭhaparamāṇuśarīragarbha-
baddhāspadonnatakuśeśayakarṇikāṅke|
viśrāntamucchikhanipātagatapradīpa-
dīpākṛtipratimamapratikṛtyavastham||76||
ghoṣākṣarasvaranirākṛtamapyakaṇṭhya-
tālavyamavyayamanāsikamapratiṣṭham|
niḥsaṃcaravyatikarapratisaṃcarātma-
dehaprabhñjanaviśālarathādhirūḍham||77||
prajñāghanaṃ sthiracatuścaraṇatvamāpta-
madvaitatāsamarasaṃ parimṛṣṭakūṭam|
jyotiḥ paraṃ yadamṛtaṃ hṛdi cākaśīti
nediṣṭhamapyavigalattamasāṃ daviṣṭham||78||
sthityarthamasya jagataḥ kthamapyupādhi-
bhedādabinnamapi yatpratipannabhedam|
yaccāpi satyamaniśaṃ hṛdayapratiṣṭha-
mānandarūpamamṛtaṃ munayo gṛṇanti||79||
no tāmyate diśi divākarapāvakairya-
dbhāsā ca yasya sakalaṃ vyavabhāsyate 'daḥ|
vidyāsatattvamiti ca prakṛtiḥ paraiti
śaktiśca yasya bhagavānaravindanābhaḥ||80||
varṇeṣu vācakatayā rahiteṣu satsu
vāktatvamakramamapākṛtabhedarūpam|
L
sphoṭabhidhānamiti yaṃ kathayanti śābdāḥ
pratyakṣatavikalavastusatattvayogāḥ||81||
dravyādibhedaparikalpanayā pramāṇa-
sūtrairvibhajya bhuvi ṣoḍaśabhedabhinnam|
vyākhyātavānkaṇacaraśca samakṣamakṣa-
pādaśca yasya bhagavāṃstanumaprakampyām||82||
yasmājjalādiva ca budbudacakravāla-
metajjagatsamudapādi vibhinnarūpam|
niḥśeṣabījanikarāntaralabdhaśakti-
rvāgīśvarī ca vinivartata eva yasmāt||83||
yasyodapādi manasaḥ kila śītaraśmi-
rakṣṇoṃ 'śumānkaṭitaṭādapi cāntarīkṣam|
avyākṛto vikurute bhagavānavidyā-
granthiṃ ca yo vinihitaṃ puruṣo guhāyām||84||
jñānāgnivipruṣa imāḥ kila yanmukhotthā
yaścākṣaraḥ kṣaṇamatha kṣaratāmupetaḥ|
saṃyogato jagati bhāvagatādvibhāti
yadrūpaśūnyamapi saṃhitasarvarūpam||85||
hrasvaṃ na dīrghamatha na plutamapyaliṅga-
mekaṃ vibhaktivacanapratibhāgaśūnyam|
saṃtarpitākhilajagatparameṇa dhāmnā
yaccāstitārahitabhāvavikāraśūnyam||86||
vyāvṛttirasti na kutaścidapīha yasya
yasmadavastuviṣayasthitivipralabdhāḥ|
āvirbhavanti vividhasthitihetukārya-
cakraprapañcapariṇāmayujaḥ padārthāḥ||87||
L
bhogapavargaphalasādhanahetubhāva-
mabhyāgatā bhuvanasādhanatāṃ dadhānāḥ|
yasmācca bindusarasaḥ kila saptamantra-
koṭyo 'bhrasindhava ivāskhalitā nirīyuḥ||88||
ātmāntarāvagamavattritayāpratītau
vāgātmani sthita ihātiśayena sūkṣme|
rūpasya yaḥ prakaṭanāya nijasya śabda-
bhāvena bhāvitajagatparivartane sma||89||
prāptānimānprakṛtijānakhilānvikārā-
nyo 'laṃkārotyaniśamapravibhāgirūpaḥ|
tīrthapravāhagahaneṣu pṛthagvidheṣu
yaddṛṣṭibhedavinibandhanamāmananti||90||
tristhānatādiyutamādivirāmaśunyaṃ
viśvasya nābhimacaraṃ carato dhruvasya|
nisṭhyūtavāṅmayamajo hariratmabhūśca
śaṃsanti yaṃ kṛtadhiyo gurudhāraṇārdhyam||91||
oṃ tatsadityamitatparamaṃ tṛtīya-
kāyāvamarśagahanāgamabodhisaṃvit|
āvedavandhyadhṛtidhutaghanānupāśo
vāgīśvaro janani sa praṇavo mukhaṃ te||92||
(dvātriṃśadbhiḥ kulakam)
nāḍīsahasrasaśirāmbaragarbhavartma-
saṃcāracātura(?)karī tdṛdi saṃniviṣṭā|
śaktis tvam eva paramātmaparāparārtha-
brahmārkamaṇḍalagamāgamagūḍhaguptiḥ||93||
L
spaṣṭībhavadgaganagañjacitiprakarṣam
ātmīkṛtākhilasatattvagatiprapañcam|
kāpi tvam eva nanu dāśavalāvabodha(?)-
sattvānubhāvaparameśvaradevatādyā||94||
jihvā triviṣṭapasadāmamṛtasya mārga-
mājyaṃ dvijāñjuhuvuṣaḥ śikhini pradīpte|
yattigmaraśmikiraṇāḥ paramasya puṃsaḥ
sthānaṃ nayanti tadasau tava śaktijṛmbhā||95||
jyotirmayīmakaraṇendriyavṛttimādya-
haṃsākṣarasthitimayīṃ vihitāmayārghyām|
śrīkaṇṭhamukhyaguruṣoḍaśavīramūrti-
mutphullaśaktikamalāsanatāmupetām||96||
śaktitrayprathitaśūlakarāṃ śivāya
dhāmnā jaganti sakalānyavabhāsayantīm|
kallolasaṃkulaparāmṛtasaṃpadaṃ tvāṃ
dhyāyantī bhairavatanuṃ kila kaulikāsthāḥ||97||
pratyaṅgasaṃgatapataṅgakarābhibhāvi-
koṭitrayonnataviśaṅkaṭatigmahetiḥ|
sūkṣmā sanātanatanuśca nanu tvameva
māyākalāsu śakalīkaraṇaikahetuḥ||98||
cakrāśritatriśikhakoṭigatāravinda-
satkarṇikāsanagatāmiha kaulikastvām|
dhyātvaiti śaktipatitāṃ sthirabhairavāṅka-
vṛttiṃ parāparavibhedavatīṃ jano 'yam||99||
ātasthuṣaḥ ṣaḍavadhisthitavartmamātṛ-
cakrasya ṣaḍavadhisthitavartmamātṛ-
cakrasya caṇḍi pṛthusūkṣmaśariravṛttiḥ|
L
khyātā tvameva jagati pratipannaviśva-
rūpā kilākṣaramayī parameśaśaktiḥ||100||
āsthāya ruddhabhuvanā vasudhādikāśca
sarvādivigrahatayānavamāḥ sphurantīḥ|
tāstāḥ kriyā vidadhato janatāhitāya
śaktiḥ kilāpratihatā parameśitustvam||101||
tvaṃ kāraṇasya janasnīti bhavāni śakti-
ruktātmavīryagatayākhilabījamātrā|
viśvaṃ krameṇa jananātmikayā vicitra-
metatsṛjatyavihataprasaraṃ tvayā tat||102||
brahmā prajāpatiravakṣadṛgādivartma
yadvadvahnivātataraṇīḥ kila yajñasiddhyai|
tasminnuśanti bhavatīṃ bhuvanasya hetu-
mekāmajāṃ janani lohitaśuklakṛṣṇām||103||
śaktistvamapratihatā nanu mānasīti
vāgīśvarī nigaditā sitabinducitrā|
tvāṃ nābhimāhuramṛtāmamṛtasya sapta-
kaumārikaṃ kimapi cakramupāśritāṃ tu||104||
saṃdarśitākhilajagadgatagocarā tu
tattvaprakāśananirargaladīpikā tvam|
vidyā parāparavibhedavatī bhavāni
bhogāpavargasukhaheturaviplutāṇoḥ||105||
bhinnaprakārasamavāyaviviktavarṇa-
saṃphullaśaktikusumastabakārcitaśrīḥ|
brahmottamadrumalatāmalanābhrirāma-
vistārimūrtirapavargaphalapradā tvam||106||
L
māyāniśāndhatamasastimitāṃśurāśi-
bhadrāṇḍamaṇḍalamalaṃ paridīpyate yat|
tasya prabhāsi bhagavatyativṛttasūrya-
koṭīsahasrarucirastamitāndhakārā||107||
nākopabhogasukhasādhanaheturamba
puṃsastvameva viditāṣṭavidhā bhavantī|
sūkṣmaṃ pradhānapuruṣāntaramapyalakṣya-
mekā tvameva viśinaṣṭi samādhibhājaḥ||108||
sadvṛttisaṃsthitiraviplutavarṇabīja-
garbhā gṛhītahṛdayā kaladhautagaurī|
brahmāsanasya varavarṇini karṇikā tva-
mabhyunnatā sakalavāṅmayapaṅkajasya||109||
yeṣāṃ jagatpravicayādhigamādupaiti
sālokyamāśu matimatyanaghaśrutīnām|
tvaṃ chandasāṃ kila jagatyadhidevatā tvaṃ
teṣāmaghaughaśamaheturupājihīthāḥ||110||
khyātā maheśvaranirañjanatāṃ dadhānā-
stārādikā jagati yāḥ kila śaktayo 'ṣṭau|
tanmadhyavṛttiragalā paridīpyase tva-
mekāpavargasukhadā śivaśaktirādyā||111||
tattvaṃ bhavāni niraśaktiśivātmakaṃ ya-
detattridhā stitamuśanti parāvarajñāḥ|
tatrāṇḍamaṇḍalamalaṃ samabobudhastva-
mādyā matiḥ samanuvartitakāraṇecchā||112||
niḥśreṇirīśituranugrahasauṣṭhavena
viśleṣitatrividhabandhanaviplavānām|
L
prāptyai sanātanapadasya ca ṣaṭprakāra-
sopānapaddhatirasi prathitā tvamūrdhvam||113||
lokeṣvanādinidhanaṃ parivartate 'rtha-
tattvena yatprakṛtikāraṇaśabdatattvam|
brahmākṣaraṃ śivamayaṃ guṇagauri tasya
nirjagmiṣā(?)nanatalāt kila mātṛkā tvam||114||
yogābhiyogapaṭavo 'dhisamādhi.................
mūrchaddhanasthitiraṇatkṛtitāradīrgham|
udgītham om iti yad akṣaram āmananti
tasya tvam eva nirupaplutir īrayitrī||115||
jyotirmukhaṃ vitaraṇādiṣu pañcabheda-
vispaṣṭakārakatayāmba vivartase yat|
brahma svatantramiha kevalamapyakartṛ
tasya kriyā phalavatī tvamamoghaśaktiḥ||116||
yasya kṣitiśca caraṇau gaganaṃ ca nābhiḥ
śrotre diśastaraṇirīkṣaṇamagnirāsyam|
dyauruttamāṅgamapi tasya vibhoḥ kila tva-
muttaṃsitoḍukusumastabakojjvalasrak||117||
pañcāśadañcitatarākṣaracakravāla-
saṃpuritodaraguhā nanu mātṛkā tvam|
tānyeva vāṅmayanibandhanatāṃ gatāni
śimbīiva gauri phalakāni puraḥ prasūṣe||118||
śaktiḥ sthitoparipathaḥ kila ṣaḍvidhasya
bhedatrayasthitimatī parameṣṭhinastvam|
L
nirviplavā vikalamantragaṇapraroha-
heturnamaskṛtiriti praṇavādiruktā||119||
atyagnibhagnatimiraprasarāṃ bhavāni
viprāḥ paṭhanti bhavatīmiha sāmidhenīm|
dhenustvamapratighakāmadudhānaghā ca
niḥśeṣanirjaramayī prathitā madhuścyut||120||
pītvāśu divyamamṛtaṃ sukhino bhavanti
yogābhiyogamanaso yadapoḍhaduḥkhāḥ|
tvaṃ tanmayī hagavati kṣayamīyivāṃsa-
māpyāyayasyaniśameva himāṃśumekā||121||
śaktyā tvayānavamayā kila śaṃkarasya
niṣkṛṣya pudgalagaṇānbhavabandhasindhoḥ|
dīkṣavirugṇanibirīsadurantapāśa-
cakrānnayatyaniśamūrdhvamanantanāthaḥ||122||
bhrūmadhyavarti bhagavatyupadhānayoga-
śaktiḥ kila sphaṭikavatsphuṭacitravarṇam|
dhyātaṃ nṛṇāṃ phalati tattvamanekadhā ya-
ttasyāmalā śivapadasya śikhā tvamekā||123||
ekādhikasphuradaśītipadā tvameva
vidyāvitānajananī parameśaśaktiḥ|
bhogāpavargasukhadā bhuvanatrayasya
tvayyeva mantranicayā rcitapratiṣṭhāḥ||124||
yatsūtramasya jagato bahudhāgamaṃ ca
sāṃkhyairanādiparikalpitamamba tattvam|
tasyotthitā paramakāraṇataḥ kilātma-
lābhaikaheturuditā śivaśāsane tvam||125||
L
ānandarūpamamṛtaṃ nirupākhyabhūmiṃ-
paṅktātigaṃ stimitavāridhivārikalpam|
yanneti netyupaniṣatsvabhidhīyate ca
vijñaptimātramanupādhi nirīhamanyaiḥ||126||
tasyeśituḥ sakaladharmavinākṛtatva-
mavyākṛteḥ śritavato 'dbhutavṛttirekā|
vyapāraśaktiranaghā vasudhādiṣu tva-
mekaiva tiṣṭhasi vibhorjagato niyantrī||127||
sthūlātmanāti'sayasūkṣmatayā ca gauri
brahma sthitaṃ sakalamekamapi dvidhā yat|
jyotirmayaṃ janani tasya vapurvigāhya
bāhyaṃ tvamantaramatha śriyameṣi śaktiḥ||128||
sūkṣmā kalāmṛtakalāmṛtasaṃbhavā tva-
mekendriyābhipatitasthitiyogadṛśyā|
śītāṃśubhāskarahutāśasamutthitā ca
dedīpyase 'ndhatimiracchidurāmalārciḥ||129||
chandodhidaivatamatiprathitā kila tva-
mādhyātmikī halahalāmba sarasvatīti|
bāhyāparā tu pṛthupīnanitambabimba-
keśastanādharayugādimanoramaśrīḥ||130||
āseduṣīśrutimukhatvamanekabhinna-
saṃkhyākṣaraprakṛtiraprakṛtivyavasthā|
tvaṃ brahmavarcasamayī ca vikāsitejaḥ
prāptā kila dvijamukhāmbujarājahaṃsī||131||
bhāsvatshasrakarakaustubhakālakṛṣṇa-
vakṣaḥsthalapraṇayadurlalitā vibhāsi|
L
lakṣmīstvameva karapallavasaṃniviṣṭa-
padmāsanāṇḍanavavibhramapuṇḍarīkā||132||
rātristvameva navavibhramamaṇḍalāccha-
ratnāyamānamuḍumaṇḍalamunmayūkham|
mātarvyadhāḥ pṛthukapālakavāṭasaṃdhi-
bandhābhirāmabhuvanāṇḍasamudgakasya||133||
vistāraśāliśaśimaṇḍalaskarṇikāṅka-
tārāpathāmburuhamadhyakṛtapratiṣṭhām|
tvāṃ cintayannamṛtavṛṣṭimivākiranti-
matyeti sādhakajanaḥ sahasaiva mṛtyum||134||
ye vā pibanti surabhestava tāludeśa-
madhyasthite stanamadhīśvarī lambamānam|
āpyāyitāstadamṛtena vimuktimārga-
māyānti te sakalahāvavikāraśūnyāḥ||1365||
saṃvartavāridaghaṭāsu śatahrdātva-
māsādya visphurasi kāñcanakāṣagaurī|
arcistvameva vaḍavāmukhapāvakasya
bhasmīkaroṣi sakalānapi sindhunāthān||136||
saṃkocaśaktiśithilīkkṛtapattrasaṃdhi-
randhrotthitapracurakesarasaurabhāṇām|
naiśāndhakārabhidurāruṇadhāmni bodha-
bandhustvameva rucirāmburuhākarāṇām||137||
tvaṃ candrika kumudakānanacakravāla-
nidrānubandhaśithilatvanimittamindoḥ|
lakṣmīstvameva navakaustubharaśmiśāra-
vakṣaḥsthalapraṇayadurlalitā murāreḥ||138||
L
brāhmītvamucchvasitapaṅkajaviṣṭarastha-
mūrtirvimānaracitāspadarājahaṃsā|
vispaṣṭasāmaghaṭanairvadanaiścaturbhi-
rābhāsi nītiriva cāruguṇābhyupāyaiḥ||139||
tāmbūlapaṅkarasarāgamivoṣṭhabimba-
mudrāniveśaghaṭitāviratapraveśam|
śaṅkhena gauri dadhatā hṛdaye 'nurāga-
mābhāsi saṃyugamukheṣu ca vaiṣṇavī tvam||140||
krodhābhitāmranayanatrayajṛmbhamāṇa-
jvālājaḍīkṛtapinākaśikhākṛśānuḥ|
māheśvarī tvamasi maulimṛgāṅkaraśmi-
saṃdehitāmarasarijjladhautajūṭā||141||
śobhāṃ bibharṣi śikhivāhanadevatā tva-
mambhojakomalakarāgragṛhītaśaktiḥ|
līleva sindhumathanasya bhujaṃgabhoga-
kāṣāhitakraśimamadhyamahīdhramūrtiḥ||142||
jvālākalāpavikaṭāñjalipītadaitya-
senāśatakṣatajavahnikarāladhāram|
vajraṃ tvameva dadhatī nayanairvibhāsi
nīlotpalairiva śaradvikasadbhiraindrī||143||
cāmuṇḍayā viracitāñjali baddhahasta-
śākhānakhāṃśubharanihnutamaulicandraḥ|
mātastvayā natśirāḥ kriyate 'sthibhasma
bhājā śmaśānagṛhadevatayeva śaṃbhuḥ||144||
vistāripotrapihitārkavijṛmbhamāṇa-
daṃṣṭrāṃśubhinnatimirāmbaradiṅmukhaśrīḥ|
L
chāyāchalena bhagavatyavagāḍhasindhu-
madhye virājasi varāhamukhī tvameva||145||
svargāpavargaphalasādhanahetubhāva-
mātasthuṣo mukhamadhīśvari vedarāśeḥ|
gāyatryasi dvijajanānanapuṇḍarīka-
khaṇḍābirāmaviniketanarājahaṃsī||146||
sāvitryapi sphuritavaktramṛgāṅkabimba-
cchāyānimīlitavilocanapaṅkajaśrīḥ|
ratnākṣasūtravalayaṃ parivartayantī
tārākulaṃ janani rātririvāvabhāsi||147||
āpīya saptabhuvanopahitopahāra-
nirdagdhadhūpapaṭalotthitamamba bhūyaḥ|
ācchāditārkakaramudgirasīva dhūma-
mūrdhvekṣaṇānalaśikhāvalikajjalaugham||148||
saṃcintya kāsarasurārivadhaṃ kaṭhora-
mutpaśyati tridaśadaityagaṇe kṛtānte|
ātmīyasairibhavināśabhiyeva caṇḍi
saṃyacchati sma na yamastvayi bhaktinamrān||149||
pādānatāstava bhavāni nakhātmadarśa-
bimbādhirūḍhatanudehatayā prapannāḥ|
sadyaḥ praṇāmasukṛtāhitavālakhilya-
rūpā iva śriyamudañjalayo bhajante||150||
phūtkāramuktahutabhugbhujagendrahāra-
saṃsaktaśṛṅkhalapayodharakumbhabhāgā|
śobhāṃ bibharṣi guruniścayayogasiddhi-
rutkṛṣṭamantragaṇaratnanidhānabhūstvam||151||
L
vīkṣyāgrataḥ śabarakṛttapaśūpahāra-
raktacchaṭārdrapiśitāśanaśauṇḍatāṃ te|
jātāsthiśeṣavapurujjhitamāṃsadeha-
yantrā bhayādiva virājati revatīyam||152||
śobhāṃ bibharti tava nirmaladantapaṅkti-
niryanmayūkhanikurumbatayāmba vaktram|
līlāgṛhītakavalīkṛtamāṃsakunda-
gaurāsthidaṇḍamiva lolakarālajihvam||153||
pādāgrakoṇahatadundubhitāranāda-
mākarṇya saṃyugamukhe tava vajrapāṇeḥ|
anyānakāhatiparāṅmukhatāṃ jagāma
nūnaṃ vipakṣarahitā punaramba senā||154||
anyonyayuddharabhasāhatirugṇacūḍā-
viṣyandiśoṇitarasairiva laṅghayanti|
saṃsaktavindhyagirikaḍmaramandirāgra-
bhāgā na śāsanavidhiṃ tava tāmracūḍāḥ||155||
preṅkhatkapālakusumasragapoḍhabhogi-
hāraṃ bhayānakamadhīśvari rūpametat|
cetaḥ punastava dayāmṛdu saptaloka-
bhogāpavargaphalasādhanabaddhakakṣam||156||
pādāravindayugasaṃsmaraṇābhilāṣa-
pūtātmanāṃ tava sureśvari mānavānām|
utsṛjya lohanigaḍā nijarūpamāśu
māṇikyapādakaṭakaśriyamāśrayante||157||
velātaṭacalanitambaśilābhighāta-
saṃśīryamaṇavikaṭormighaṭāsahasraḥ|
L
tvāṃ dhyāyatāmanudinaṃ plavabhaṅgasetu-
mabhyeti nīlamaṇikuṭṭimatāṃ payodhiḥ||158||
tvatpādayugmamaniśaṃ smaratāṃ karāla-
dhūmāvalīśabalitasphuraduddhatārciḥ|
viṣyandisāndramakarandahṛtālivṛnda-
mandārakānanatalatvamupaiti vahniḥ||159||
viṣyandamānamadadurdinagaṇḍabitti-
bhāgāstavāmba vipineṣvapi vidravanti|
stamberamāścaraṇasaṃsmaraṇena siṃha-
saṃghātaraudraravajātabhayā ivārāt||160||
daṃṣṭrākarālavadanāḥ sphuradagniheti-
piṅgordhvakeśarucayo 'ruṇaraudranetrāḥ|
atyantahiṃsramanaso 'pi tavānatānāṃ
naktaṃcarā jagati gauri vahanti maittrīm||161||
tvatsaṃśrayāngirinadīkuharāntarāla-
vṛttiḥ surañjitamukho na hinasti nūnam|
uddāmadānajalakuñjarakumbhakūṭa-
ku.ṭākakoṭikarajakrakajo 'pi siṃhaḥ||162||
phūtkāramuktadahanā vididaṅkṣavo 'pi
roṣāruṇekṣaṇarucastvayi bhaktibhājām|
āśīviṣāḥ sphuritakesararūpaghora-
jihvā vahanti vikacotpaladāmalīlām||163||
utkhātaśātakaravālalatāḥ karāla-
kodaṇḍadaṇḍavisarā vijighāṃsavo 'pi|
bandhutvametya vinatāṃstava tārayanti
kāntāradurgapatitāndhruvamamba caurāḥ||164||
L
itthaṃ pramaviṣayalaṅghi laghutvamukta-
māhātmyamohitavibodhitaviṣṭapāyai|
tubhyaṃ namaḥ pratibalāvalitāmarendra-
dṛṣṭiprasādanakṛte nanu caṇḍikāyai||165||
itthaṃ stutestava vayaṃ viratāḥ svaśakti-
śūnyatvato na bhagavatyabhilāṣabhaṅgāt|
āsvādayantyamṛtaśīkarabinduvarṣa-
mabhyeti kasya rasanāvirasāmavasthām||166||
iti tava guṇavādāḥ kilāsmājjanani yadarjitamasti puṇyajātam|
pratisamayamiyaṃ tvadaṅghripūjābhiratiphalā tvayi tena no 'stu
bhaktiḥ||167||
praśamaya mahāmohātaṅkaṃ vidhatsva sunirmalāṃ
dṛśamanudinaṃ kūṭībhūtaṃ tiraskuru kilbiṣam|
vighaṭaya dṛḍhānpāśagranthīnbhavavyatiṣaṅgiṇo
na tava viphalā pādāmbhojasmṛtiḥ praṇatātmanām||168||
itthaṃ nākinikāyanirmitanutiprāñcatprapañcaśruti-
prauḍhībhūtaśubhaprasādaviśadaśrīmaṇḍanācaṇḍikā|
sāhaṃkārahutāśahuṃkṛtakṛtatrāsā trilokīsadāṃ
sādaṃ sā ditijendradānavaghaṭāṃ ninyetarāmāyudhaiḥ||169||
tattatkālaṃ kālarātriprakopakrūrārambhottambhanaṃ varjayadbhiḥ|
āsede 'nyair dainyam aprāptadaityaiḥ(?) śaureḥ śūrair antikaṃ ratnasānau||170||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye caṇḍīstotraṃ nāma saptacatvāriṃśaḥ sargaḥ|

Page Tools