itthaṃ vacaḥ suraripāvabhidhāya tatra
tūṣṇīṃ sthite vidadhadunmukhamaṭṭahāsam|
saṃrambhagarbhamiti saṃsadi vajrabāhuḥ-
rujjṛmbhitājirasamārabhatātha vaktum||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
saptatriṃśaḥ sargaḥ|
yatkāñcanākṣa bhavatā nayagarbhamukta-
mitthaṃ vacastaduśanā yadi vaktumīṣṭe|
śrutvaitadapyasuvacaṃ guruṇāpi mādṛ-
ganyo nisargajaḍadhīḥ kimivābhidadhyāt||2||
ākāramātramavalambya vibhītakasya
puṣpaṃ viḍambayatu nāma madhukaśobhām|
viṣyandimañjumakarandakaṇacchaṭārdra-
kiṃjalkatāsya kuta eva punastadīyā||3||
kiṃcittathāpyasahanatvamarātiloka-
stutyābhidhāpayati māṃ pratikūlarūpam|
vyadhātamatra nijapakṣaparigrahasya
paśyanti ye tu ditijāsta iha prayāntu||4||
vākyaṃ mamaitadaṇusāramapi grahītu-
marhāḥ stha yūyamavivekavikalpavandhyāḥ|
alpo 'pi kiṃ madhukarairmakarandareṇu-
rādīyate hi madhuno na madhūkapuṣpāt||5||
ābibhrato virasatāmathavābhyudeti
matto na gīḥ kṛtadhiyāṃ hṛdayaṃgamā vaḥ|
kṣārāmbudheḥ kuta ivāmṛtaśīkarārdra-
sāndraprabhādhavalacandrakalāprasūtiḥ||6||
ye mandarādrimapi vāsukibhogabandha-
līlāvagharṣaṇakṛśīkṛtamadhyabhāgam|
utpāṭya pāṇibhiranāhatasaṃprahāra-
helā virejurupapāditaśaktikṛtyāḥ||7||
L
ete 'pi jetumatanūtpulakāṃsakūṭa-
dordaṇḍakhaṇḍitanirargalayuddhaśauṇḍāḥ|
huṃkārasaṃbhramavalattridaśādhirāja-
baddhābhayāñjalipuṭā yudhi kena śakyāḥ||8||
(yugalakam)
siṃhīsutasya samare sahasotthitasya
śaktāḥ kathaṃcana viloladṛśaḥ purastāt|
sthātuṃ nisargataralā bata vītaśaṅka-
mācakṣva dūta yadi vaḥ pramathaplavaṃgāḥ||9||
yasyāgnicūrṇaparuṣe sarupo raṇeṣu
dīprapratāpatapane tapati trilokīm|
niryattadūṣmabharakhinnatayeva khaḍga-
dhārāgṛhe ciramuvāsa vipakṣalakṣmīḥ||10||
yasya pratāpamiva soḍhumaśaknuvadbhi-
rbandīkṛtaiḥ phaṇipuraṃdhrigaṇairbubhūve|
vaiklavyadurbalatayā śithilāyamāna-
visrastakañcukasitāṃśukacakravālaiḥ||11||
yasyāhaveṣu vavṛdhe bhayasaṃkaṭeṣu
niḥśvāsamārutaparamparayā ripūṇām|
bhīṣmoṣmaśuṣmaparipākaviśeṣadagdha-
vidveṣivaṃśaśatatīvrataraḥ pratāpaḥ||12||
uccairanāyiṣata yasya samākulatvaṃ
vidveṣiṇāmadayadāritordrumāṇām|
L
ākṛṣṭakīrtikusumastabakaiḥ kṛpāṇa-
vallīnipātapavanaiḥ prasaradbhirāśāḥ||13||
durvāravairisamarādhvarayūpabāho-
rādhatta yasya ruciraṃ caraṇāśrayā śrīḥ|
pāṇiṃ natipravaṇadurjayalokapāla-
niḥśvāsadhūsaritavibhramapuṇḍarīkam||14||
kiṃ tasya pāṇḍurayaśastuhinācalābhi-
mukhyaṃ na saṃkhyasurabhau dadhataḥ subāhoḥ|
bhānorivāmbudhitaṭāni gato vilaṅghya
tīvrībhavannadhikameva diśaḥ pratāpaḥ||15||
(ṣaḍbhiḥ kulakam)
saṃrambhapāṭaladṛśaḥ śaradabhraśubhra-
hāsasya niḥśvasitaghūrṇitameghikābhiḥ|
bheme 'sya gāḍhamiva dṛgbhiradabhrababhru-
bhrūvibhramabhrukuṭisaṃbhṛtasaṃbhramābhiḥ||16||
ujjṛmbhamāṇatimirā bhrukuṭiḥ salīla-
masyaiva saṃbhṛtarūpo vadane sphurantī|
taccitramatra yadarātivadhūmukhāni
lambālakāni paridhūsaratāmanaiṣīt||17||
prālambayaṣṭighaṭitāruṇaratnakhaṇḍa-
preṅkhanmayūkhanikurumbapiśaṅgagarmā|
asyātatāyikulaśoṇitapānagoṣṭhī-
yogyāmiva sma kurute karavālavallī||18||
asyāmalena mama vā karavālamegha-
dhārājalena raṇadurdinaḍambareṣu|
śāntiṃ sukhena navacandrakalāñchitaśrīḥ
kiṃ nīyate ditijanātha na nīlakaṇṭhaḥ||19||
pratyutphalatsuragaṇairdadṛśe mamāpi
vakṣaḥsthalātsamaramūrdhni murāricakram|
abhyujjihānamudayādrinitambabhitti-
bhāgādiva kṣatajapāṭalamarkabimbam||20||
śyāmatvameti sahasaiva mamātatāyi-
lokasya kundakalikādhavalaṃ yaśaḥ prāk|
ścyotanti kajjalaparāgamalīmasāni
paścādvilocanajalāni nitambinīnām||21||
udbhinnapīnapulakāṅkuramanyaśastra-
dhārāśatānadhigatapraṇayāmṛtārdram|
kaṇṭhagrahaṃ sapadi yasya cakāra cakra-
dhārādhikā tanurucirdayiteva rāhoḥ||22||
niṣṭhyūtaniṣṭhurakṛśānuśikhāsahasra-
dhārākarālamamareṣu vilokayatsu|
ākṣipya tatkaratalānmaṇikarṇapūra-
micchāmi kartumadhunā rabhasena cakram||23||
(yugalakam)
L
saṃmohahetumadhigamya purā kṛpāṇa-
dhārāṃ raṇeṣu madirāmiva sīrapāṇiḥ|
nūnaṃ purā patati vaḥ śithilāṅgayaṣṭi-
rāghūrṇamānarudhirāruṇalocanaśrīḥ||24||
cakrāyudho 'stu samare musalāyudho vā
śulāyudo bhavatu vā kuliśāyudho vā|
doṣṇaiva tānahamanena nihasya heti-
śūnyena dhūsaramukhacchavitāṃ nayāmi||25||
suvyaktamūjitadhiyo nayamārgalagnāḥ|
dolādhirohavidhuraṃ vihitaṃ cakārya-
mutsannameva ca tadityapi me 'bhisaṃdhiḥ||26||
kiṃ kīrtitena bahunā suranātha tāva-
dāpannatāmarasasārasahaṃsahāsam|
grīṣmoṣmaśoṣitasaraḥsadṛśaṃ karomi
taccakkrimiśritamahaṃ tava śatrusainyam||27||
tārkṣyo 'pi saṃyugamukhe nipatatyavaśyaṃ
manmuṣṭighātadalanāvidhutottamāṅgaḥ|
grāsīkṛtoragasahasraviṣānubandha-
mūrchāndhakāraghaṭanādiva mīlitākṣaḥ||28||
mandīkṛtiṣṇakaramaṇḍalabhāurordhva-
jvālājaṭālaśikhinā tritayaṃ purāṇam|
yasyeṣuṇā sakalamūrdhvagatena dūra-
makṣṇā ca manmathavapuḥ prasabhaṃ didīpe||29||
tasyāhave vinihateṣu mayānugeṣu
jyotsnāvatī kṛtaviśṛṅkhaladuḥkhadāhā|
āstāṃ jarādhavalakeśaśikheva ketu-
daṇḍāvacūlasitacāmaracakravālā||30||
(yugalakam)
cūḍāśaśāṅka iva nirmalabhāsi bhinna-
dikcakravālatimire yaśasi tvadīye|
spaṣṭātirekamupari sphurati smarāre-
śchāyaiti nūnamasurādhipa vāmanatvam||31||
ākampitatribhuvanā saruṣo lalāṭa-
paṭṭaṃ prasīda nudatu bhrukuṭistaveyam|
baddhāndhakāragahanā raṇadurdharasya
senā ca saṃprati vikampamarāticakram||32||
āyodhane mukharitāmaraśailakuñja-
guñjadguṇātanudhanurdanusūnugarbhe|
dhairyaṃ bibhartyasakalena kiyanniruddha-
deho himādrisutayā hṛdayena śaṃbhuḥ||33||
āpāṇḍupiṇḍitayaśoghanasāracūrṇa-
pūrṇāripūgaphalabhaṅgakṛtābhiyogaḥ|
ākṛṣya tasya vapuṣaḥ prasabhaṃ bhanajmi
tāmbūlarāgarabhasādiva nāgavallīḥ||24||
kalmāṣitāmalajalā jvalato lalāṭa-
netrānalasya cirasaṃbhṛtadhūmalekhām|
śītāṃśumaṇḍalaviniṣpatitāṃ harasya
tallāñchanacchavimivānugatāṃ vahantī||35||
mandākinī vrajatu mūrdhniṃ jaṭānikuñja-
jhāṃkāratāraravaḍambaritāmbaraśrīḥ|
kalpāvasānarabhasotthitabhāskarāṃśu-
tīvrāgniśalyaśarapātavaśena śoṣam||36||
(yugalakam)
caṇḍyāḥ kariṣyati raṇe mahiṣadhvajo 'pi
labdhāvakāśamadhunā kimapi sphurantyāḥ|
pādābhighātadalitāhavaśauṇḍadarpa-
kaṇḍūlakāsaravadhānuśayādivāsau||37||
utkhātadantamusalāṃ śarabhinnakumbha-
viṣyaṇṇagāḍharudhirokṣitakarṇatālām|
herambamūrtimapaviddhabisāṃ vivṛtta-
pattrāṃ karomi nalinīmiva vāraṇendraḥ||38||
uttuṅgabāhuśikharasthagitāntarikṣa-
muddāmanāgakaṭakasthitimaprakampyam|
krauñcācalendramiva māmavirugṇapakṣa-
māsādya muñcati purā na guho na śaktim||39||
kodaṇḍadaṇḍamadhunā kaladhautaśaila-
mādhāya śeṣabhujagādhipabhīṣaṇajyam|
helāvinirjitaharaḥ prasabhaṃ śareṇa
saptāpi dūramadhunaiva bhinadmi lokān||40||
caṇḍeśvarasya vidadhe sahasottamāṅga-
mābaddhavismayasurāsuracakradṛṣṭaḥ|
śārṅgāyudho jagadivākramaṇotthaṣāda-
līlābhighātadalitorukapālabandham||41||
saṅgrāmavāsaraparisphurito 'tiśobhi-
nirdhūtapāvakaśikhākapiśatviṣo 'ham|
chāyāṃ śilādatanayasya vivartayāmi
merodivākara ivāpratimapratāpaḥ||42||
krodheśvaraḥ kva mama yāsyati huṃkṛtāgni-
dhūmacchaṭāvalayitaṃ dadhadātmakaṇṭham|
L
paryāptakālakavalīkaraṇapragalbha-
tatpāśaruddhapariṇāhamivāhavāgrāt||43||
sthūlāsthikumbhaśikharaḥ karavāladāna-
lekhāṅkitaḥ pravilasatkarapuṣkaraśrīḥ|
śaktaḥ kṣaṇānmama bhujaḥ pratināgarāja-
līlāṃ dadhaddalayituṃ yudhi vīrabhadram||44||
yairāhave ditisutaiḥ samavartino 'pi
bhagnaḥ pratāpavibhavena sahaiva daṇḍaḥ|
syātsaptatantudalane bahumānapātra-
meṣāṃ uraḥ ka iva śaṃsata vīrabhadraḥ||45||
saṅgrāmasīmni mayi garjati tāranāda-
mujjhatyava'syamabhimānamarātilokaḥ|
śabdaḥ sa kesariṇa eva bhayaṃkareṇa
yena śrutena vimadībhavatībhayūthaḥ||46||
manye tadeva vacanaṃ ripuviprakāra-
roṣeṇa ruṣitadhiyaḥ samareṣu yasmin|
udbhidyate 'tiviṣamā samavartirāja-
dhānibhaṭasya bh.kuṭiḥ pratikārahetoḥ||47||
doḥ śālino raṇabhuvi sphuraṇānubandha-
bhājaḥ kṣaṇādalayataḥ subhaṭasya śatrūn|
saṃpaśyatā mṛtamukhāni paraṃ pareta-
nāthena sāmyamahamakṣama eva kartum||48||
saṅgrāmakānanamudūḍhakarālapīlu-
bandhaṃ camūracitaśobhamarātisaṃsthā|
naivādhitiṣṭhati ciraṃ subhaṭasya cāpa-
ṭāṃkāranādacakitā hariṇīva lakṣmīḥ||49||
gīrvāṇadaityasamareṣu karairvimukta-
sītkāraśīkarakarālakaṇairghaṭantām|
kumbhodaraskhalitapuṣkararandhramārga-
niṣṭhyūtamauktikagaṇairiva mattanāgāḥ||50||
kurvantvakheṭakhaṭakāmukhahastakṛṣṭi-
cakrīkṛtāni kakubho yudhi kārmukāṇi|
āsphālitakṣubhitasāgaravāridhīra-
maurvīravaśravaṇasaṃbhṛtasaṃbhramārtāḥ||51||
grāsīkarotu divasādhipameṣa karṇa-
pāśaṃ dadhatkanakakuṇḍalamaṇḍalāṅkam|
vicchinnakaṇṭhakaṭakānuśayātsalīla-
mullambitācchaharicakramivādya rāhuḥ||52||
bāṣpāmbuśīkarakaṇaughanibhena candra-
bījacchaṭā iva purā vikiratyamandam|
L
grāsīkṛte śaśini nūnamanena netra-
matrestadudbhavanimittamatīva śokāt||53||
śokānubandhakṛtajāgaragāḍhakheda-
mantaścareṣu ca marutsu vighūrṇiteṣu|
yogyānvaye 'pyasuraviprakṛtaḥ kṛśatve
saṃpratyupaitu paripīvaratāṃ samīraḥ||54||
uttuṅgamaṅgalamataṅgajajaṅgamādri-
niḥsaṅgabhaṅguraturaṅgataraṅgyamāṇam|
aṅgāritāṅgamasurāyudhavisphuliṅga-
mutsaṅgasaṅgigaganāṅganavīrayodham||55||
saccāpacakracaturacyutakāñcanottha-
nārācarecitacamūcaracakravālam|
āścaryacaryacaturāñcitacārucarca-
candrāvacūlamacirādraṇamastu caṇḍam||56||
(yugalakam)
saṃspheṭavartmani jarādhavalatviṣo 'pi
līlāprakīrṇakagaṇā iva dhirayodhāḥ|
ete 'dhirūḍharabhasāstava daityanātha
śaktāḥ prabhañjanamapīrayituṃ purastāt||57||
tigmapratāpaghaṭanābhimukheṣvabhīkṣṇa-
muddaṇḍapattrapaṭaleṣvasurādhipeṣu|
L
jyotsneva paṅkajavaneṣu niśākarasya
kīrtiḥ skhalatyakaluṣāpi mṛgāṅkamauleḥ||58||
viṣyandidānajalakuñjarakumbhabheda-
nirmuktamauktikakaṇaśramavāribinduḥ|
krudhyatkṛtāntakuṭilabhrukuṭīvibhaṅga
bhīmā mamāstu samare karavālikeyam||59||
vyūhaprapañcaracanāṃ vidadhātu śukraḥ
śaktistu nātha bhavato yudhi durnivārā|
saṃsthānamastu ruciratvavidhāyi śeṣa-
mālokayatyakaluṣā hi kanīnikākṣṇaḥ||60||
krodhātkṣaṇena sasurāsuracakravāla-
mantaṃ jagattrayamapi vyapanetumetat|
utkṣipyatāṃ raṇamukhe kṛtakālarātri-
saṃjñā karālakuṭilā karavālikābhrūḥ||61||
helāviluptanarasiṃhakaṭhorakaṇṭha-
pīṭhasphuratpṛthusaṭāghaṭitāṃsakūṭāḥ|
śauryoṣmaniṣkathitahāralatendukāta-
vāricchaṭākaṇakarālitavakṣaso 'mī||62||
aṃvādidohadarasāḥ surasaṃkṣayārtha-
muccaiḥ sphuranti tava saṃsadi daityayodhāḥ|
tejasvināṃ timiradāraṇaniścaye 'sti
kiṃ nu kvacittribhuvane 'pi nisargabhedaḥ||63||
(yugalakam)
L
loke 'tra vīrajanatāparibhogya eva
keyaṃ vibhāgaparikalpanalālasā vaḥ|
helāvarugṇahariṇā harayo yatheccha-
madhyāvasanti nanu kānanacakravālam||64||
yenātipīḍanarasasphuṭanānubandhi-
bāṣpāmbuśīkarapariplutapāṭalākṣaḥ|
kālo 'pi kaṇṭhavalitolvaṇapāṇilagna-
pāśaḥ prasahya cakṛṣe samareṣu tasya||65||
saṃkhyaṃ surairasurarājakulasya kīdṛ-
gekībhavanti nahi kesariṇaḥ kuraṅgaiḥ|
dānāndhagandhakarikumbhavibhāgabhaṅga-
dakṣasphurannakhaśikhāśikharāḥ kadācit||66||
(yugalakam)
siṃho 'stu śatrurathavādhipatirmṛgāṇāṃ
śaṃsāspadaṃ tadapi na dvayameva manye|
tasya sphuratkarajavajraśikhābhighāta-
helānipātitamataṅgajajaṅgamādreḥ||67||
itthaṃ mauktikakarṇapūrakiraṇavyājena gaṇḍasthalī-
carcācandanacarcanāmiva dadhadvīro 'valepaśriyaḥ|
L
vākyaṃ ratnaśikhākarālitaśiraḥkampābhirāmaṃ bhaṭai-
rārabdhastutibandhamandhakasadasyuktvā sa tūṣṇīmabhūt||68||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye vajrabāhuvisphūrjitaṃ nāma saptatriṃśaḥ sargaḥ|