krodho 'tha tāṃ timiraviplavamandadṛṣṭi-
rābaddhavepathuratikramayogavṛddhaḥ|
ābaddhamūrdhavidhutiḥ śvasitānubandha-
pāriplavādharadalaḥ śanakairavikṣat||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
catustriṃśaḥ sargaḥ|
abhyāpatannuśanasāsuracakravāla-
huṃkāradhūmanikaro dadṛśe purastāt|
L
āliṅgitākhilavapurvratakāryapāna-
paryāptasaṃstavavaśādiva dhūmitārkaḥ||2||
vakṣaḥsthalīmalanasaṃbhriyamāṇadhūma-
lekhāvalīśabalitāṃ kupito 'gnidaṃṣṭraḥ|
ālagnapīnadayitākucakumbhapīṭha-
kālāguruprakarapatralatāmivohe||3||
saṅgrāmadohadarasasphuṭitai rarāja
pīnaṃ hiraṇyakaśipostanayasya vakṣaḥ|
sthūlāsthiśṛṅkhalanipātavirugṇakhaṇḍa-
dhārārajaḥkaluṣitakṣatajairvraṇaughaiḥ||4||
krodhānmayenaracitā bhrukuṭiḥ kirīṭa-
māṇikyaraśmikapiśaśramavāribinduḥ|
saṃhārakālarajanīva rarāja sāṃdhya-
rāgachaṭāruṇitatārakamaṇḍalaśrīḥ||5||
karṇāvataṃsavikacotpalakāntibhinna-
saṃrambhapāṭalakapolataloṃ 'sakūṭam|
rākāpradoṣa iva rāhupariplutendu-
bimbaḥ kareṇa śatadundubirāhatoccaiḥ||6||
svedāmbuśīkarakaṇaprakarāvakīrṇa-
vakṣaḥsthalavraṇadarīkuharo vikumbhaḥ|
dadhre vibhinnakarikumbhamṛgārihasta-
visrastamauktikaguhāgṛhaśailalīlām||7||
sotsekamatsaradhiyo 'nalatārakasya
niṣpeturāhavarasasphuṭitavraṇebhyaḥ|
vakṣaḥsthalīvikaṭavaprataṭābhighāta-
bhagnāmaradviradarājaviṣāṇakhaṇḍāḥ||8||
saṃrambhabhāsuraruco harikaṃdharasya
vaktreṇa saṃbhṛtarūṣaḥ sphuṭahāsabhāsā|
udgīrṇadagdhasalilārṇavabhasmadhūli-
saṃtānavāḍavamukhānukṛtirvidadhre||9||
ātāmradṛṣṭikiraṇacchuritācchadharma-
vāricchaṭākaṇaphaṇāmaṇirullasantī|
chāyākalindatanayājalajālamadhya-
magnā kalerbhrukuṭikāliyamūrtirāsīt||10||
rāhoralakṣyata mukhaṃ dṛḍhadantayantra-
niṣpeṣadhūmamalinīkṛtatālumūlam|
daityādhipaiḥ kavalitendukalaṅkapaṅka-
saṃsargadhūsaramiva pravijṛmbhamāṇam||11||
siṃhīsuto daśanapaṭṭavighaṭṭanottha-
dhūmacchaṭā bhujaganāyakabhogadīrghāḥ|
grāsīkṛtasya śaśalakṣmabhṛtaḥ kalaṅka-
lekhā ivodagiradantaritāntarikṣāḥ||12||
niṣṭhyūtayā kavalitāmṛtadhārayeva
vaktrāntarālabhuvi bhūribharādamāntyā|
L
tasyātiniṣṭhuraruṣo vikaṭāṭṭahāsa-
bhāsavabhāsitasabhābhavanaṃ babhāse||13||
svedāmbukardamitacūrṇitatārahāra-
dhūlicchaṭādhavalitātanurinduketoḥ|
vinyastacandanaraseva rarāja vairi-
lakṣmīsamāgamasamutsukamānasasya||14||
jṛmbhāvikāsigurumatsaradurnirīkṣya-
mātāmrabhānanamarājata vajrabāhoḥ|
autpātikaṃ vikaṭarandhraniruddhamadhya-
mudraśmimaṇḍalamiva sphuṭamuṣṇadhāmnaḥ||15||
kālāntakasya sakalārikulakṣayāya
dhūmacchaṭā malayato 'tha lalātapaṭṭam|
puṣpāvataṃsavigalanmakarandabindu-
pānārthinī madhupapaṅktiriva nyapaptat||16||
roṣāruṇekṣaṇamarīcivilaṅghyamāna-
kāloragādriśikharaśriyam āsasāda||17||
abhyunmiṣacchikhiśikhāpaṭalaṃ subāhu-
ranyonyabāhumalanena karadvayastham|
tvaṣṭā viṭaṅkataraṭaṅkanikuṭṭanottha-
mādhatta cakraghaṭanārthamivārkatejaḥ||18||
saṃrambhiṇaḥ kṣitisutasya kaṭhorakopa-
rāgāruṇacchavi vilokya vapustadānīm|
L
daityādhipāḥ kṣaṇamaśaṅkiṣatānapoḍha-
gāḍhorugarbhaśayanakṣatajacchaṭārdram||19||
ṭāṃkārayanvikaṭakuṭṭimapaṭṭapṛṣṭha-
maṅguṣṭhakoṭidṛḍhaṭaṅkakaṭhoraghātaiḥ|
naṣṭāṣ.adiktaṭatamaśchaṭamaṭṭahāsa-
maṭṭālakūṭabhiduraṃ vyadhitāgnidaṃṣṭraḥ||20||
cakre 'tigāḍhakarapiṣṭakarālahāra-
tārāvalīvilulitātanuccurṇapūrṇam|
vajravraṇaughamavacūrṇanakāmyayeva
saṃrambhagarbharabhasasphuṭitaṃ vidarbhaḥ||21||
kṣmāmaṇḍalaṃ bibhidivāngurupārṣṇighāta-
pātena kopakaluṣo 'tha hiraṇyanemiḥ|
cakre rasātalamadṛṣṭacarārkabimba-
saṃdarśanākulakutūhalikādraveyam||22||
vispaṣṭajihmataraceṣṭitacittavṛtti-
rutsṛṣṭasādhucaritapratipattiduṣṭaḥ|
krodhaḥ kṣaṇādavinayaikaraso 'bhyasūyāṃ
kurvanmṛgāṅkamukuṭe narakaṃ jagāhe||23||
vakṣaḥsthalīlulitahāramṛṇāladaṇḍa-
khaṇḍaḥ prakopamahiṣeṇa vigāhyamānaḥ|
L
chāyājalaughakalilaḥ kaluṣākulaśrī-
ruddāmavepathurathelvalapalvalo 'bhūt||24||
saṃvartakasya karavajraśikhānipāta-
piṣṭāṅgadāṃsaśikharotthitadhūmaketuḥ|
cāmīkarotthamaparaṃ bibharāṃcakāra
keyūrabandhamiva saṃsadi bāhudaṇḍaḥ||25||
daṣṭauṣṭhapṛṣṭhavikaṭabhrukuṭīkarāla-
tāmrānanasya karasaṃpuṭapeṣajanmā|
antaḥsthaśeṣaphaṇaratnanidhānabhūmi-
pīṭhe papāta śarabhasya kṛśānuvartiḥ||26||
saṃhāramārutadhutapralayāgniheti-
tālūracakraparimaṇḍalacakṣupoccaiḥ|
vindhyāsureṇa bhayakātaradaityadṛṣṭāṃ
caṇḍīṃ ruṣaṃ dhṛtavatā paruṣaṃ jagarje||27||
pādābhighātadalitaṃ kṣitipīṭhabandha-
magre 'nusaṃdhirabhasādiva kālacakraḥ|
cakre 'tigāḍhakarasaṃpuṭapiṣṭahāra-
tārāvalīlulitadhūlikaṇāvakīrṇam||28||
abhyuttatāma karatāmarasāvamṛṣṭa-
timyallalāṭaphalako 'stamayāya śatroḥ|
ātāmradṛṣṭiratimatsaratastamāla-
nīlacchaviḥ kṛtatamītimiro 'timāyaḥ||29||
svedodabinduśabaloṣmavilīnamauli-
viṣpandihemarasamiśratayā lalāṭe|
bhrūbhedarājirajitasya rarāja kopa-
līlāpuraṃdhricaṭulātilakāyamāna||30||
preṅkhannakhāṃśuparikalpitakaṇṭhadāma-
durdarśanaḥ parimamarśa kareṇa kopāt|
vajrābhighātavikaṭavraṇabaddhasaṃstha-
vicchinnahārakaṇakarburakānti vakṣaḥ||31||
dikcakravālamanaghasmaraghasmarendu-
maulīkṣaṇasmaraṇasaṃbhṛtasaṃbhramārdram|
krodhāgnidīprataratārakatārakākṣa-
kākṣekṣitaṃ na kathamapyaśanairadhākṣīt||32||
jṛmbhāvikāsimukhakaṃdaradṛśyamāna-
jihvālataḥ sapadi vihvalayansurārīn|
āvartagahvaraparisphuritapravāla-
vallīkarālajaladhiśriyam āpa dhundhuḥ||33||
vajraprabheṇa vikaṭāduraso vilūya
muktāphalastabakadāma vikīrṇamūdhvam|
āsannadeśaracitasthitiśītaraśmi-
tārāpuraṃdhriparivāravilāsamāpat||34||
krodhoddhatabhrukuṭibandhakabandhavaktra-
cchāyāndhakāravisaraprasaropaghātam|
L
cakruḥ karāladaśanāṃśuśikhāsahasra-
śobhābhṛtaḥ sapadi ketumato 'ṭṭahāsāḥ||35||
vajrānalo 'pyanalabhāsuraghoradṛṣṭi-
pātairdahanniva jagadgurumatsaraśrīḥ|
smeraḥ savibhramamabibhramadudgatāṃśu-
cakrāhitārkaparidhiṃ karapadmaśākhām||36||
tena krudhā dudhuvuṣoddhatamuttamāṅga-
mullāsibhiḥ kanakamaulimarīcicakraḥ|
dṛṣṭavyudastaraviraśmiriva vyadhāyi
saṃbhrāntakhecaragaṇā divasasya lakṣmīḥ||37||
saṃbhremuṣā suragaṇena vilokito 'tha
jīmutaketurabhinanditasaṃprahāraḥ|
hārānsalīlamalunāttaruṇārkabimba-
durdarśalocananipītatadātapaśrīḥ||38||
mūko 'pi bhrukuṭitaraṅgitaṃ lalāṭaṃ bibhrāṇaḥ karatalatāḍitāṃsakūṭaḥ|
saṃrambhasphuradaruṇekṣamo jagarja krodhāndho badhiritasaptalokamuccaiḥ||39||
vivartitādharavikasatkapolabhūrvicintitāhitaraṇalābhaharṣulaḥ|
vikoṣitobhayapuṭaphullatārakāmamarṣaṇo dṛśamanimeṣiṇīṃ dadhau||40||
visrabdhamaicchadavasāditavāsavoṃ 'sa-
visraṃsamānavasanaḥ savasāvaseke|
L
vyaṃsāsuraściramavisrasavisrutāsra-
visrāvanāvasikaraḥ samare visartum||41||
prahrādo vikaṭaviṭaṅkadaṃṣṭramāsyaṃ bibhrāṇaḥ karatalatāḍitāṃsakūṭaḥ|
digbhittipratiphalitāṭṭahāsabhāsā saṃhāre hara iva dattasaṃbhramo 'bhūt||42||
diksundarīsphuṭanavāṃśukamindugaura-
mānandanirbharamivāriyaśaḥ pipāsuḥ|
vyādādamandamatha kaṃdarakalpamāsya-
mātāmratālu śatadundubhirāttajṛmbham||43||
pādāghātairdānavacakrasya tadānīmāpātālaṃ dṛṣṭagabhīrātanurandhrā|
sāsūyasya krodhavaśādindukirīṭe pusphoṭa kṣmā rauravapātārthamivārāt||44||
siṃhāsanādasahanaḥ sahasojjhihāsu-
rutsāhasāhasarasena sahasramāyaḥ|
haṃsāṃsahārihasitaḥ sahasārihiṃsā-
sajjāhavo yudhi jaharṣa jahāsa coccaiḥ||45||
saṃrambhaghoratarahuṃkṛtidhūmaketu-
hetisphuliṅganikarairaśaniprabhasya|
pratyūyire sapadi hāralatā muhūrta-
mātāmraratnikarairiva dānavānām||46||
kṛtabhuvanavināśāśaṅkahuṃkāragarbhāḥ
sapadi paruṣaroṣaviṣkṛteḥ sūciromṇaḥ|
madhukarakulanīlacchāyatastārakāgrā-
jjalabhṛta iva vidyunniṣpapātojjvalārciḥ||47||
gīrvāṇarājapṛtanāḥ savicittavīrya-
sārastadāhavanirargalacittavṛttiḥ|
nācintayatkurucamūriva pāṇḍusūnu-
ruccāvacāstracaturo yudhi vipracittiḥ||48||
kulagirigarimasthānalpakāyo 'timāyaḥ
karakuliśatalenāsphālayanbhūtadhātrīm|
gurutarabharatāmyaddiggajaskandhapīṭhī-
luṭhitavidhurasaṃsthārugṇabandhāṃ cakāra||49||
cakṣmāyire kṣitibhṛtaḥ karapiṣṭahāra-
muktāśilāśakalakarkaśaśarkarābhiḥ|
abhyāhatāḥ kṣaya ivāsuracakravāla-
niḥśvāsadurdharasamīraparamparābiḥ||50||
saṃkṣobhavibhramaviśīrṇavikīrṇahāra-
muktāphalācchakarakākaṇacakravālam|
abhyutpatadditisutastanayitnucakra-
mākrāntakṛtsnabhuvanatritayaṃ tadāsīt||51||
karatalamalanotthaṃ mantharībhūtabhānu-
prabhamanalamanalpajvālamālākarālam|
L
sakalamamaravaṃśaṃ dagdhumutpādayantu
kṣayataraṇidurīkṣyaścukṣubhe kāñcanākṣaḥ||52||
bibhratyudarataramānasadṛśyamūka-
śailakṣamārabhasalaṅghanadurdharatvam|
mattā valīmukhavarūthavatīva dṛṣṭa
daityādhirājagurumatsaravikrīyāsīt||53||
teṣāmarociṣata cūrṇitapadmarāga-
ratnāṅgadaprakarapāṭaladhūlidigdhāḥ|
spaṣṭāṭṭahāsacalitātanusaṃdhibandha-
viṣyandisāndrarudhirā iva digvibhāgāḥ||54||
kalmāṣitāmbaratalāḥ pralayāvatāra-
śaṅkākulīkṛtajagattrayadṛśyamānāḥ|
ulkālatā vavṛṣire vṛṣarājaketu-
saṃrambhabhāurasurāhitadṛṣṭipātaiḥ||55||
viṣyandamānaparipītavipakṣakhaḍga-
dhārānipātasalilā iva dānavānām|
svdāmbuśīkaramuco vibabhurviśāla-
vakṣaḥsthalīṣu vikaṭavraṇakaṃdaraughāḥ||56||
āsannasaṃyugatayā sumanībabhūvu-
ruccaistarāṃ jahasurāhasatāṃsakūṭān|
L
hārāṃśca cakṣudurudasthurathāsanebhyo
mṛtyorapi kṣabhiyo na śaśaṅkire 'nye||57||
sabrahmadhūrjaṭiharīṃstridaśāṃstṛṇāya
vispaṣṭamatsaradhiyo yudhi manyamānāḥ|
daityādhipāścakamire kamalāsanāṇḍa-
mutplutya pāṭayitumutkaṭaroṣarūkṣāḥ||58||
tai rāhukopajanitapratipakṣapakṣa-
saṃhārabhītibirapākṛtadhairyabandhaiḥ|
āsthānyasau surariporbibharāṃcakāra
durdharṣatāṃ yadupateriva vṛṣṇisainyaiḥ||59||
itthaṃ ruṣendhanavinākṛtamapyadhūma-
mūrdhvekṣaṇaṃ smarariporiva dagdhakāmam|
jajvāla dānavasadaḥ pralayārkabimba-
durdarśaghoraghaṭitānalatārakaṃ tat||60||
vidadhruvasare 'tra daityacakrapralayaparisphuṭapaiśunotthitāni|
sakalabhuvanamaṇḍale 'pyasaktaṃ bhayamanimittaśatāni dāruṇāni||61||
pratidinamapavargadvārarandhrādamandaṃ
dinakṛta iva bimbādargalādīrghadaṇḍāḥ|
L
pratikakubhakalkāḥ peturulkāḥ kṣayāgne-
rbhuvanadahanahelāsūtrapātāyamānāḥ||62||
tvaṣṭṭaṭaṅkaghaṭanānikuṭṭitagrāvasāravikaṭāsthisaṃbhavam|
dhūmarāśimiva bhānumaṇḍale lagnamaikṣata kabandhamāsuram||63||
nirgacchanrajanikarasya bimbamadhyādutpātaprasaravaśna dhūmadaṇḍaḥ|
vaidagdhīṃ kuvalayadāmanīlabhāsaḥ khaḍgasya vyadhita vilagnadattamuṣṭeḥ||64||
utpātadhumamalinairnijakopacakra-
garbhacyutaiḥ pariṇatiṃ samupeyivadbhiḥ|
akīryatāśu kamalāsanapuṇḍarīka-
bījairivāmbaratalaṃ grahacakravālaiḥ||65||
abhimukhapatināśāśaṅkayeva pradīptaṃ
viviśuranalamāśā dāhayuktyā tadānīm|
sphuritavikaṭaketuvyāptadikcakravālaṃ
gaganamapi bhaviṣyatsaṃyugacchāyamāsīt||66||
kṣubhitaviṣamaveloddāmaratnākarāṇi
k.ayataruṇiruco nājīgaṇaṃstāni daityāḥ|
pratikakubhamakāṇḍoḍḍāmarākhaṇḍalaśrī-
haraṇarabhasakaṇḍūcaṇḍadordaṇḍakhaṇḍāḥ||67||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye andhakārasurabhākṣobho nāma catustriṃśaḥ sargaḥ||