uttasthuṣyatha divasārdhaśaṅkhaśabde rāmābhistadanucarāḥ savibhramābhiḥ|
uccetuṃ tarukusumāni mandarādrernirjagmurmuditadhiyaḥ kṛtānuyātrāḥ||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
saptadaśaḥ sargaḥ|
taṃ nānāphalarasapānasaṅgamatavyāvalgatkapikaraluptamātuluṅgam|
kalpāntotthitapavanābhighātasākṣivyāvṛttivyatikararatnagaṇḍaśailam||2||
prabhrāmyatsurapuradīrghikodagāhavyāsaktadvipakaraśīkarokṣitārkam|
kuñjāntaḥ phaitamṛgendranādalīlāvitrasyaccamaracamūracakravālam||3||
udvellattaṭakaladhautakalpavalīsaṃtānastimitataḍidvilāsamegham|
saṃbhuktatridaśavadhūviśīrṇabhūṣāratnāṃśucchuritaguhāgṛhāgrabhittim||4||
sthūlāśmapratiphaladacchanirjharāmbhonirdhūtatridaśavadhūratāntakhedam|
prabhrāmyadravirathavājivaktraniryatphenaughastabakitaratnasānukuñjam||5||
svacchāmbhaḥ kaṭakasarastaṭāntakūjatkādambīdalitamṛṇālakāṇḍakhaṇḍam|
dāvāgnivyatikaradahyamānabhūripratyagrāgurumavalokya remire te||6||
(pañcabhiḥ kulakam)
lāvaṇyaglapitaśaranniśākarāṇi śyāmānāmiva paripaśyatāṃ mukhāni|
taccitraṃ sugatatayā yadanvitānāṃ pādānāmaviralarāgatāvirāsīt||7||
bibhrāṇā vipulakabandhatāṃ jayantyo niḥśeṣaṃ bhuvanamudīrṇakambunādāḥ|
pratyagrojjvalakaravālikāstaruṇyastanvānā ruciratarāṅgadopaśobhām||8||
aṅgānāmasamaratāntatābhirāmāṃ bibhratyaḥ śriyamasiropaghātabhājām|
bhūyasyovanamanu nāyakānuyātāstāḥ senā iva kusumāyudhasya celuḥ||9||
(yugalakam)
yāntīnāṃ vijitavinidrapaṅkajānāṃ pādānāṃ kumudavanāni saṃmadena|
mañjīrakvaṇitavikṛṣyamāṇahaṃsavyājenānugamamiva vyadhurvadhūnām||10||
kāntānāṃ kucakalaśairyathāyathohe tuṅgatvaṃ vyavadadhadānanendulakṣmīm|
tāmudvīkṣitumiva taistathā tathāptairvistāraṃ kṣitiravatastare nitambaiḥ||11||
visraste tridaśapuraṃdhriruttarīye paśyantī dayitanakhakṣataṃ stanāgre|
caskhālānavahitacittavṛtti yāntī premāho kvacidapi nekṣate vyapāyam||12||
ālokya priyatamacumbicakrāṅkasphuradaravindavṛndamambhaḥ|
autsukyātkila jaghanālasāḥ priyāṇāṃ kaṇṭhāntaḥ praṇihitadorlataṃ yayustāḥ||13||
nyasyantī sapadi padāni tatpadeṣu svedāmbhaḥ kaṇakakarālitāni paścāt|
saṃcele dayitatamasya vartmanaikā premāho vividhavidhiprapañcadakṣam||14||
kasyāścillalitagatāgataiḥ prayāntyāḥ saṃsaktaṃ bhujalatayā vighaṭyamānaḥ|
cakrandāsulabhanitambapātaśaṅkāsaṃmohādiva maṇimekhalākalāpaḥ||15||
mā smaiṣāṃ pathi paruṣe kadarthanā bhūtpādānāmiti dayayeva komalānām|
svacchāyākisalayasaṃstaraḥ purastādātene 'ruṇamaṇinūpurairvadhūnām||16||
klāmyantyāḥ pratipathamāśu vījitāyāḥ sakhyārānnavaśikhipicchanālagauraḥ|
kasyāścidvimalakapolabimbitaśrīruttaṃsastabakapade prakīrṇako 'bhūt||17||
anyasyā dayitakarāvalambipāṇestatsparśāhitapulakānubandhabhājaiḥ|
gacchantyāḥ pathi vicakāsa vaktraśobhā nīvī ca ślathitanitambabimbavāsāḥ||18||
sarpantyāḥ kisalayapāṇinā muhūrtaṃ śliṣyantī tarugahane 'bhiveṣṭya dūrāt|
śyāmāyāstanumabhimīta madhyabhāgaṃ kasyāścitprakaṭakutūhaleva vallī||19||
gacchantyastanukhagajālapādamudrānyāsānāmudadhipuraṃdhrisaikatānām|
sundaryaḥ sarasanakhakṣatāvacūlaistulyatvaṃ vikaṭakaṭīrakaiḥ śaśaṃsuḥ||20||
uttānasthitivikarālakālajaṅghavyākośāṅgulikhagapādanirviśeṣam|
saṃsthānaṃ tanutaranālapattramagre nārobhiḥ pratipathamaikṣyataurubūkam||21||
tāḥ śobhādhigataparasparopamānaṃ śrotrākṣistanakarapādamudvahantyaḥ|
sadvartmasthitimapi pakṣmapaṅktimūhuryajjihmāṃ tadavamatāmiva prapede||22||
āhlādaṃ śiśiratarāvamarśahṛdyāḥ kurvatyo 'dhikamapariplavaprakāśāḥ|
aurvaryaḥ sphuradaghanāvalambibimbā bimboṣṭhyo bibabhurapūrvavidyutastāḥ||23||
ākṣiptapriyatamacetasā tadānīṃ puṣpeṣusphuṭamavatāvadhānayogam|
paryāptasvarapadatālasacchriyoccairgāndharvasthitiratha yauvatena tene||24||
ābhāsvatkiraṇakarālaratnahārapratyagrāṃ dadhadalakāspadāmabhikhyām|
vaidagdhīṃ yuvatijano 'tha puṣpakāñcīchāyāvāndraviṇapaterivālambe||25||
tuṅgatvaṃ kucakalaśeṣvanāthaṅganānāṃ vistāraṃ vikaṭakaṭīrakasthalīṣu|
madhyeṣu kramimadaśāṃ śaśaṃsa loko bhāveṣu sthitirucitā janasya śasyā||26||
L
prāptānāmabalatayāpi niḥsahatvaṃ bhraṣṭānāṃ na tu balibhāvalagnatāyāḥ|
uttuṅgaiḥ kucakalaśairabhāri tāsāṃ sadvṛttairapi caturaśratāśrayā śrīḥ||27||
vispaṣṭadraḍhimaguṇābhirāmarūpaiḥ satsthānasthitibhiranūnalakṣaṇāḍhyaiḥ|
rāmāṇāṃ karaṇagaṇairivāṅgahārā nājahnuḥ śriyamatha mauktikairna hārāḥ||28||
śṛṅgārasthitiramaṇīyanarmagarbhavyāpārātanurasanāyakānuyātā|
rambhorūratha caturaṅkalāñchitaśrīḥ pratyagrāmatanuta nāṭikeva śobhām||29||
bibhratyā samakaraketanaśriyoccaiḥ pratyagrāmadharadalapravālavallīm|
mārgasthaṃ hariṇadṛśā janaṃ harantyā lāvaṇyaṃ jalanidhivelayeva bheje||30||
saṃspaṣṭaścaraṇatalena pakṣmalākṣyā saṃsaktaiḥ stabakaśatairaśokavṛkṣaḥ|
kṣepīyaḥ pathi vikasallatākulo 'bhūnmārgasthaḥ ka iva na bhājanaṃ vibhūteḥ||31||
nanvasminrataguruṇā samaṃ nikuñje viśramya vyapanaya tāvadadhvakhedam|
ityārādakṛta navāṃśukāñcalāgravyāsaktā vratatirivārthanāṃ ramaṇyāḥ||32||
anyasyā guru jaghanaṃ babhāra paścādayāntyāḥ sphuṭamadhikaṃ sagauravatvam|
paśyantyāṃ pratiyuvatau sarāgamenāṃ yatkāntaściramanupālayāṃcakāra||33||
anvīye madhukaramaṇḍalena tāvatsaṃsarpannupavanamārutaḥ sugandhiḥ|
yāvatstrīparimalagocaro na lebhe ko nādyaṃ tyajati padaṃ viśeṣalābhāt||34||
prastāve navamadhumāsanāṭakasya sthitvāntargahanalatātiraskariṇyāḥ|
prārabdhā parabhṛtanartakena kūjā straiṇasya śrutimaharatprarocanameva||35||
bibhrāṇaṃ vasanamivāntarāpi cūtaṃ sāmodasthiti girikarṇikābhirāmam|
gāṇikyaṃ savikaṭahāratāṃ dadhattatkṣmābhartustaṭamanu kānanaṃ ca reje||36||
nirvāṇasthitimapavartitailamuccairavyāptaṃ na mṛdumarudvidhīyamānam|
taṃ prātastanamiva dīpakaṃ vilokya straiṇena dviguṇaratābhilāṣatāpe||37||
bibhrāṇaḥ kanakamayaṃ nu bījakośavyājenātanucaṣakaṃ kuśeśayinyāḥ|
utkṣiptastaraladalāṅgulirvyaloki śyāmābhiḥ kara iva bhāskarasya padmaḥ||38||
gacchantaḥ pathi ghaṭitā nikuñjadeśe viśrāntāḥ kvacana parasparaṃ yuvānaḥ|
sauhārdaṃ vidadhurayantraṇaṃ kriyāṇaṃ visrambhaḥ suhṛdi phalaṃ nanu pradhānam||39||
vāmabhrūmukhamadirāsugandhisekavyāsaṅgasphuṭabakuladrumaprasūnam|
bhṛṅgālīcaraṇavidhūtapakṣmamālāparyastastabakaparāgaparibhadram||40||
udgacchannavalavalīlavaṅgapuṣpapratyagrātanutarasaurabhābhirāmam|
dikcakrasphuradanubandhigandhaphullanmandārastabakamadhuprasaṅgibhṛṅgam||41||
sacchayaṃ vipinamanupraviśya pārśvavyāsaktapriyakaralagnapāṇipadmaḥ|
praścyotannavamakarandapānalīlāvisrambhātiśayasukhopalabdhanidraiḥ||42||
aikṣiṣṭa bhramarakulaiḥ kṛtaṃ gurutvaṃ valīināṃ yuvatijanastadā natānām|
kasyārthī na bhavati gauravāya loke saṃpannābhimataphalaḥ samāśrito vā||43||
(cakvalakam)
ābaddhakramaharikampyamānasālā sā rāmābhigamasamākulā tadānīm|
laṅkeva sphuṭaśukasāraṇā vanorvī babhrāje ghanarucirakṣasānuviddhā||44||
ākarṣanmadhurasaśīkarānvanebhyaḥ śephālīkusumakaṣāyagndhagarbhaḥ|
ānandaṃ marudatanottanudarīṇāṃ kaḥ śreyānadhikaguṇatvamāpya na syāt||45||
eko 'pi prasavśaraḥ sa kena sahyo nānātmā kimu gaṇanātigocaro yaḥ|
tadbhinne hṛdi caritārtha eva kāmo māninyāṃ na unarabhūdadhijyacāpaḥ||46||
vāsantyaḥ kusumabhṛtaśca kundavallyo graiṣmyaśca pratigiri pāṭalāḥ praphullāḥ|
anyonyaṃ yuvatijanasya mānabhaṅgaprāgalbhyaṃ vyatijahasustarāmivārāt||47||
rāmāṇāṃ navanavamālikāvikāsapratyagraprasavatiraskṛtaṃ tadānīm|
prārambhe pariṇatimāpa mānadhairyaṃ sugrīṣme mukulamivātha kundapuṣpam||48||
pratyagrāṅkuraracitaśriyaṃ vanālī bibhrāṇā viṭapatatiṃ sapattrinādām|
abhyarṇā śaradiva nimnagātaṭorvīmānandaṃ vyatanuta mattakāśinīnām||49||
utsṛya pravikacacūtayaṣṭimuccaistṛṣṇāndhā api paribabhramurdvirephāḥ|
kāntāsye śvasitasugandhini prakarṣānnaivārtā laghuni pade bhavanti dhīrāḥ||50||
saṃsthānaṃ dadhadupari cchadatrayasya tretāgnisthitisadṛśaṃ nitambinībhiḥ|
nṛtyantyāḥ pavanavaśāllatāṅganāyāḥ kāṅgūlaḥ kara iva pallavo vyaloki||51||
bibhrāṇairadhikaguṇatvamaṅganānāṃ hastāgraiḥ prasabhamakāri pallavānām|
pratyagrojjvalanijaśobhayā sarāgairbhagnānāmapi punarukta eva bhaṅgaḥ||52||
mūlasthapriyanakhamaṇḍanasya bāhorutkṣepātpratiyuvatiṃ vidūnayantyāḥ|
āditsordrumaviṭapāgravartipuṣpaṃ pu.patve 'pyamṛtaphalatvameva bhīroḥ||53||
śliṣyantyā viṭapaśikhāśrayaprasūnavyāditsāsarabhasacetasastaruṇyāḥ|
aprāptaprasavaphalodayo 'pi śākhī saṃpattiṃ phalabharaśālinīmavāpa||54||
śākhāgrasthiti kusumaṃ tarorjighṛkṣuryatpīnastanavinatā śaśāka nāptum|
tatrāsīdrataguruṇā vilūya datte pratyakṣaṃ pratiyuvateḥ samunnatā strī||55||
bibhrāṇai rasabhraśālitāmabhīkṣṇaṃ rāgaśrīsamudayaśobhibhistadānīm|
divyastrīkarajaparikṣataistarūṇāṃ tāruṇyaṃ saphalamabhāri pallavaughaiḥ||56||
bhagnānāmagaṇitatadvipattidoṣairvallīnāṃ madhu kusumeṣvapāyi bhṛṅgaiḥ|
yuktānāṃ taralatayā malīmasānāṃ na svārthātkvacidatiricyate 'nurodhaḥ||57||
kurvāṇā pṛthuni vadhūrnitambabimbe visrastaṃ vasanamanāsthadurvinītam|
vispaṣṭāmanurahasaṃ priyasya nānyā na vyāñjīnnidhuvanalālasāṃ sphurantīm||58||
bhrūkṣepānugatanikuñjadattadṛṣṭerākūtaṃ sapadi niśemuṣī priyasya|
tadvartmanyaviśata kācidiṅgitajñā no kārye kvacana bhavanti dīrghasūtrāḥ||59||
niḥśvāsairaviralasaurabhairvikṛṣṭaḥ śyāmāyāḥ karakamalena saṃbhramantyāḥ|
babhrāmābhimukhamapākṛto 'pi bhṛṅgaḥ paryāptaṃ na khalu malīmasasya dhārṣṭyam||60||
kāntānāṃ karakamalairanaukahānāṃ lupteṣu prasabhamupetya pallaveṣu|
dhūtānāmupavanavāhibhiḥ samīraiḥ kiṃ citraṃ yadasumanaskatāvirāsīt||61||
vyāviddhā madhukarapaṅktidhūmyayārādābhāsīdadhikamaśokapādapasya|
pluṣyantī sapadi manāṃsi māninīnāmātāmracchavirabhiluṅkhiteva vallī||62||
nīlābjaṃ śravaṇavataṃsatāṃ taruṇyā yadbhartrā vikacamanīyatānataṃ sat|
ātmānaṃ vimalakapoladarpaṇasthaṃ tacchobhātiśayaparītamaikṣateva||63||
na śreyānsamamadhikaśriyā virodho yuktātra praṇatiritīva pīvarorvāḥ|
uttaṃsotpalamavanamya dūramakṣṇaḥ prāstāvītstavamiva cañcarīkaśabdaiḥ||64||
ātāmrāsitadhavalaiḥ prasūnavṛkṣaiḥ stheyobhiḥ kṛtavasatisthitestadānīm|
vyātasthe smaraṇabhuvo vanasthalīṣu sthūlabhaiściramavisaṃsthulasphulaśrīḥ||65||
paryaśrustrutiparipāṭalatvamakṣṇoḥ kurvāṇaṃ manasi manoramaṃ vyalīkam|
māninyo raja iva cakṣuṣi praviṣṭaṃ saṃrambhasphuradadharā na paryamṛṣyan||66||
kurvāṇāmadhitaru sugrahe 'pi puṣpe hastāgraṃ sapadi yuvā svayaṃ praditsuḥ|
rambhorūmarudhadanekayuktibhedaiḥ premāho racayitumahite 'nukūlam||67||
naikatra śravasi tathā sahematāḍītāṭaṅke 'pyakṛta vadhūḥ prasādhitāsthām|
anyatra priyakarakṛṣṭalambapālīvinyastacchadasubhage yathābhyamitram||68||
anyasyāḥ surabhimukhānilāvakṛṣṭā vaktrendoḥ pṛthupariveśacakrabandham|
bhṛṅgāṇāṃ tatirakarotpatattravātavyādhūtastabakavataṃsadhūlijālaiḥ||69||
unnidracchadamupadeti puṣpamārādānītaṃ dayitatamena menakāśrīḥ|
vibbokāñcitavinihiñcitottamāṅgā vāmorūrabhimukhamagrahītsapatnyāḥ||70||
vyatyāsāddayitatamena kāpi nāmnaḥ prattāyāmapi sumanasyamarpahetoḥ|
saṃrambhasphuradadharāruṇekṣaṇaśrīstaccittraṃ yadasumanaskatāṃ prapede||71||
viśrāmyatkucayugalorasi priyasya smerānyā mṛducaraṇāgradurniviṣṭa|
ādāya skhalanapadaṃ viloladṛṣṭiḥ kaṇṭhāntaḥ praṇihitabāhukandalīkā||72||
saṃrambhonnamitanitāntatāntamadhyā bhūyo 'pi sthitimadhijagmuṣī kathaṃcit|
āmodāpahṛtamadhuvrataṃ natabhrūruttaṃsaṃ śirasi babandha bandhuraśrīḥ||73||
(yugalakam)
kasyāściddayitakarābjayojitena śrotrāgre taruṇatamālapallavena|
dhūmenāviratamivābhihanyamānaṃ bāṣpāmbhaḥ pratiyuvatermumoca cakṣuḥ||74||
nīrandhravratatitirohite 'parasyāḥ sāśaṅkaṃ dayitatame babhūva cetaḥ|
adhyāste hṛdayamakṛtrimapriyāṇāṃ kāntānāmatibahumatsaro hyanaṅgaḥ||75||
saṃbādhādvirahitavallabhā tadānīṃ gāyantī raṇaraṇakāttapañcamaikā|
nirlakṣaṃ kusumaparigrahāya subhrūḥ saṃdaṃśaṃ suciramababhramatkarāgram||76||
spaṣṭākṣibhruvavikṛtiprapañcaśobhī śrṅgārākṛtipiśuno vipakṣavāmaḥ|
sagrīvānirupamarecako jajṛmbhe rambhorvā dayitavilokanena hāvaḥ||77||
rāmāṇāṃ drumaviṭapāgrajanmapuṣpavyāditsārabhasavaśātsavepathubhyaḥ|
hāraughaiḥ pravigalitaṃ payodharebhyo nodvṛttaiḥ saha guṇināṃ cirāya yogaḥ||78||
nepathye masṛṇamanorame kṛtāsthā śṛṅgārāñcitarasaśālitāṃ vahantī|
kāntasya pramadamudāranṛttalīlā rambhorūratanuta kaiśikīva vṛttiḥ||79||
saṃphullannavanavapuṣpaśekharāṅke niḥśaṅkaṃ madhu papuṣībhirantarāle|
kāntānāṃ citarasasaṃcitena ceto rāmābhirmadakilakiñcitena jahre||80||
bibhrāṇā śrutisukhatāṃ manoramaśrīryāntīnāṃ vanabhuvi mattakāśinīnām|
māyūrī kalavirutiḥ svarāśrayatvaṃ saṃprāptā vyatanuta mārjaneva śobhām||81||
prāptāyā rahasi manorameṇa yogaṃ rāmāyāḥ pramadabharotthamīkṣaṇāmbhaḥ|
pattrālīṃ sapadi dudhāva gaṇḍabhittāvaśreyo jagati bhavejjaḍānna keṣām||82||
akṣuṇṇā bata śatamanyutā taveyaṃ sāścaryā subhaga vinirmame vidhātrā|
niḥśaṅkaṃ vidadhata eva gotrabhedaṃ vajraste nivasati vāci yanna pāṇau||83||
ityārādabhidadhuṣīṃ punaḥ sapatnīnāmnaivāvanataśirā yuvānunīṣuḥ|
bāṣpāmbhaḥplutanayanāṃ vijṛmbhitāntaḥ saṃtāpāmapi yuvatiṃ vyadhātsahāsām||84||
(yugalakam)
vīkṣyārādvanabhuvi cūtaśākhivallīṃ valgantīṃ kusumaṣṭaṣatkahastabhallīm|
nirmānā yuvatirabhūdrate vidheyā nautsukyāṃ vrajati hi ramyadarśanātkaḥ||85||
uttuṅgadrumakusumagrahābhilāṣāduttānīkṛtavadanaśriyo 'vataṃsaḥ|
sasraṃse yuvatijanasya karṇamūlādārūḍho vinipatatīti nātra citram||86||
kāntāyāḥ kusumarajo vilocanasthaṃ yatpreyānvadanasamīraṇairnirāsthat|
tenaiva pratiyuvateḥ samīpabhājaḥ kāluṣyaṃ yugalamanāyi dūramakṣṇoḥ||87||
utkṣiptā kusumajighṛkṣayā tadānīṃ tanvaṅgyāḥ sadupalapattramaṇḍanaśrīḥ|
aklāmyadujalatikātisaukumāryātsadvṛttairapi khalu khedameti kaścit||88||
vibhrāṇe sphuṭataraśuṣkavarṇageyasthānīye nirupamavaktrapāṇiśobhām|
vicchittiṃ vapuṣi vilokya vallabhāyāḥ prāṇeśo vipulavilocanotsavo 'bhūt||89||
ābadhya srajamabhidhāviparyayeṇa śyāmāyā dadadativaimanasyabhājaḥ|
vailakṣyāgamaparipāṇḍurānano 'nyo niḥspandasthitirakarojjharaṅkaśaṅkām||90||
sāgaske suhṛdi savepathutvamāpa svedāmbhaḥplutapulakāṅkurotkarāsīt|
ādātuṃ sutanuriyeṣa cāvahitthaṃ premāho yuvatiṣu maugdhyadurvidagdham||91||
utsṛjya sphuṭaravarṇaśobhamārānnirgandhaṃ yuvatijano 'tha karṇikāram|
āditsuḥ surabhitayā lavaṅgamabhyaidākārādapi guṇa eti vallabhatvam||92||
bhrāmyadbhirdhanamakarandaśīdhupānavyāsaṅgapramuditamānasaistadānīm|
saṃrambhādaliyuvabhirvitanyamāno na strībhirna navalatotsavaḥ śaśaṃse||93||
saugandhyādaviralakāntisaukumāryāttadvaktrairatha vijitaḥ sarojakhaṇḍaḥ|
bhṛṅgaughaiḥ kvacidapi nādhyavatsyatārādvañcyante na khalu parairviśeṣaniṣṭhāḥ||94||
bibhratyaḥ prakṛtimanoramākṛtitvaṃ tā mālyagrathanavikalpaśilpadakṣāḥ|
prāṇeśānatha saviśeṣameva jahruḥ sādhīyo harati guṇāntareṇa guṇyaḥ||95||
ślakṣṇatvaṃ viralavilepanaśriyastā bibhratyo ruciratarāṅgavartanābhiḥ|
sadrūpāḥ salalitanāṭyacitrabhittīrālokyābhimatajanaḥ pupoṣa toṣam||96||
gacchanti prakṛtimanoramāḥ kadācitkālena sphuṭamasatā guṇena yogam|
niḥśvāsaśvasanaparamparābhirāsāṃ saugandhyaṃ yaducitamāpi karṇikāraiḥ||97||
preyasyā nibiḍanitambabimbaśobhāmāditsuḥ kusumamayīṃ vidhāya kāñcīm|
yāmārātsarasamanā yuvopaninye saṃsargātpratiyuvateḥ kṛtāparādhaḥ||98||
prāptastatsmaraṇasaroṣapāṭalākṣyā sasmerānananalinastayā babandhe|
prāyeṇa hyananuguṇe vidhāvupaiti dhyātor 'thaḥ pariṇatimanyathaiva puṃsām||99||
(yugalakam)
niḥśvāsāvadhutapayodharā vihāravyāpārādvanabhuvi mamluṣī tadānīm|
svedāmbhaḥkaṇanikaraṃ mumoca subhrūḥ śephālī pavanahateva puṣpavarṣam||100||
pramlānāñcitapuṭatāmarālakeśyā bibhrāṇā nipatitatārakābhirāmā|
anyasyā vipinavihāravibhrameṇa śrāntāyā dayitatamaṃ jahāra dṛṣṭiḥ||101||
bhrāntāyā giritaṭakānane mṛgākṣyāḥ prekṣyatvaṃ dayitatamasya jagbhivāṃsaḥ|
svidyantya babhuravalagnabinducitrāḥ prottuṅgastanataṭavartino nakhāṅkāḥ||102||
prāptāyāḥ kisalayapāṇinopakaṇṭhaṃ kasyāścitkusumarajobhirāsajadbhiḥ|
ālīva drutamalikhallatā kapole nirdhautāṃ śramasalilena pattravallīm||103||
sarvartugrathitamanoramaśriyo 'drāvunnidrastabakabhṛto yathāviśeṣam|
bhṛṅgebhyo bhṛśataramasvadanta vallyo bhāvānāṃ bhavati kutaḥ prakarṣaniṣṭhā||104||
ākṛṣyāṃśukamamalaṃ navoḍhavadhvāstaddṛṣṭiprakaṭakutūhalasya bhartuḥ|
vispaṣṭaṃ vratatiradarśayanmukhenduṃ bhavyānāṃ bhavati yatastator 'thasiddhiḥ||105||
pātratvaṃ manasijalāsakasya yātā nartitvā kusumavihāranāṭakānte|
viṣkambhasthitiviśadapraveśamārgānnirjamuḥ kamaladṛśo 'tha kānanāṅkāt||106||
spaṣṭehāmṛgḍimavīthikaṃ sadaṅkavyāyogaṃ tadanu vihṛtya niḥsahāṅgyaḥ|
atyākṣuḥ sphuṭadaśarūpakavyavasthaṃ manthādrermaṇitaṭakānanaṃ ramaṇyaḥ||107||
bibhrāṇaṃ diśi diśi rāsakaṅkalīlāṃ nānānvānugataviśālatālaśobham|
sundaryaḥ kathamapi tadvanaṃ jahustā ramyāḥ syuḥ ka iva hi sutyajāḥ padārthāḥ||108||
preyobhiḥ samamavagāhya kānanorvīṃ dehārdhasthitiriva śūliśailaputryoḥ|
rāmābhirna rucirasaikatābhirāmā nāloki tridaśataraṅgiṇī vidūrāt||101||
kūjantīṃ madhukaramaṇḍalīṃ purastādālokya stabakitakovidāralīnām|
prauḍhatvāddayitatamena kāpi sārdhaṃ prastāvaṃ vyatanuta kovidā ralīnām||110||
bhāti sma vallabhakaragrathitaṃ nitamba-
bimbāvalambi raśanāguṇadāma pauṣpam|
cārubhruvaḥ pracurasaurabhalobhalīna-
śiñjānahārimadhupāvalikiṅkiṇīkam||111||
uttaṃsabhāgakucabandhurakaṃdharāgra-
kāñcīguṇāspadavicitravinidrapuṣpāḥ|
rejuḥ kuśeśayadṛśaḥ kusumāyudhasya
sugrīṣmakeṇa racitā iva hetiśālāḥ||112||
atha vipinavihāraklāntijanmānanendu-
grahagaṇaparivārasvedabindūdramānām|
L
śriyam iva parimāṣṭuṃ śvāsasaugandhyalubhya-
nmadhukarakulapakṣairvījyamānāḥ salīlam||113||
kallolānilaloladolanalalaccāmīkarāmbhoruhāṃ
ratnakṣodaparāgasaikatabhuvaṃ maṅktuṃ surasyandinīm|
preyobhiḥ samamucchvasatkucabharaklāmyannitambasthalī-
līlāmantharacāracārucaraṇanyāsā natāṅgyo yayuḥ||114||
(yugalakam)
iti śrībālabṛhaspatyanuīvino vāgīśvarāṅkasya vidyādhipatayparanāmno mahākave rājānakaśrīratnākarasya kṛtau ratnāṅke haravijaye mahākāvye kusumāvacayavarṇano nāma saptadaśaḥ sargaḥ|