iti saṃhṛtasaṃyugābhiyoge sadasi vyomni payomucīva tasmin|
abhigarjati sādhuvādakekākalakolāhalanīlakaṇṭhacakre||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
L
L
L
L
L
L
L
pañcadaśaḥ sargaḥ
calite samarotsavāptikālapramadotphullavilocanāravindam|
pralayānaladhāmadurnirīkṣyatviṣi saṃbhāvitapauruṣaṃ bhaṭaughe||2||
kathametaditi vyupāyacintābharayogāñcitamūrdhni śūnyadṛṣṭau|
sthitavatyaparatra nītigarbhe
sphuṭanimnonnatapṛṣṭhabhugnavakṣaḥ||3||
mukulīkṛtadṛṣṭi phullagaṇḍaṃ parivāhyāśu śiro mukhaṃ dadhāne|
jaḍamaiḍaviḍe 'rimaṇḍalaśrīkṣayakaṇḍūbharaḍimbaḍambarasthe||4||
paradeśamupetya yasya bhītyānavamañjīrakamaṇḍalīsanātham|
caraṇāmburuhaṃ vipakṣalokaḥ smarati sma vyasanāturaḥ puraṃdhryāḥ||5||
L
gamanādiva mantharatvamuccaiḥ paripāṇḍutvamivācchagaṇḍabhāgāt|
kṛśatā bhṛśamādade ca madhyādiva yasyārinitambinīvapurbhiḥ||6||
parivṛttiparītahārivarṇasvaramabhyujjhitasaṃdhiyogamuccaiḥ|
ripucakramanūṣmatāṃ dadhānaṃ sapadi prākṛtameva yasya jajñe||7||
yudhi yena vivalgatā salīlaṃ karikumbhā galadacchamauktikaughāḥ|
karavālasahāyabāhunā strīstanabhāraiḥ saha cakrire ripūṇām||8||
sphuṭapakṣaparigraheṇa śaśvaddadhatāpyāhavamūrdhnyapakṣatitvam|
kṣayakālanabhasvateva śailāstarasāpikṣata yeva vidviṣantaḥ||9||
yudhi vargati yatra tigmatejaḥ pratipakṣāstamayapradoṣakhaḍge|
ditijā bhujavīryasaṃpadoccairadaridrāsiṣuradrisāradehāḥ||10||
śriyameti ca yasya khaḍgayaṣṭirvipulā pāṇḍuradantamaṇḍalāṅkā|
uḍupāṇḍunijāṇḍapiṇḍaniryattimiravrātavidhūsaroragaśrīḥ||11||
prathayanbhujapādapālitasya sphuṭakeyūramadā(sā)raraśmibhaṅgyā|
kadalīdalasaṃniveśamuccairiva durvāraparākramadvipasya||12||
bhuvanapralayānalastrilokīdahanāyeva śikhāvalīrvikīrṇāḥ|
sa dadhatparipiṅgalā jaṭālīrgurusaṃrambhavidhūnitottamāṅgaḥ||13||
gurukāryavicāraṇāvitarkasphuradudvṛttapuṭāṃ dṛśaṃ dadhānaḥ|
pramathādhipaternirākariṣyangiramaurjityavatīṃ vivṛtya kiṃcit||14||
daśanāṃśubhiṣeṇa nandiṣeṇaḥ śucinā darśitatīrakāśaśobhām|
apamṛṣṭakalaṅkadoṣaramyāmiti niścitya sarasvatīṃ sasarja||15||
(pañcadaśabhiḥ kulakam)
sphuritādharadhāturāgadhūlicchuritā dantamarīcayo 'sya śubhrāḥ|
śucimānasanirjharābhirāmāṃ śriyamāseduratho viniṣpatantyaḥ||16||
harasaṃsadi tasya cābhidhitsorgiramuccairanabhiplutārthagurvīm|
kakubhaḥ samavastrayannivaitā daśanāṃśūtkaraminduraśmigauram||17||
anapekṣya bhavādṛśāṃ puro yallaghuvāgmitvamabhivyanakti mādṛk|
aparādhyati tatra nūnameṣā tadanāryā khalu kāryanimnataiva||18||
pratipādayituṃ yadanyathārthānkuśalatvena jano vyavasyatīmān|
sakalaḥ sa guṇo 'sya vāgmitāyāḥ satataṃ te punarātmarūpaniṣṭhāḥ||19||
nijaśaktiparikṣayeṇa loko bhayameṣa vyavalambatāṃ nayākhyam|
pṛthageva parākramastu siddhyai ghaṭate dordrumadarpadarpaṇo vaḥ||20||
ripuṇā vyavaropiteṣu dhāmnaḥ parimṛṣṭāvayavārthasaṃjñakeṣu|
sakaleṣu kṛteṣu nākasatsu prasabhaṃ hrīpadavṛttijītiveṣu||21||
asurījanakarṇapūralīlāvyavaluptāmalaratnapallaveṣu|
suraśākhikadambakeṣu dūraṃ dṛḍhatāpāspadatāmupāgateṣu||22||
ditijāpahṛtāmarendrabandīratasākṣitvamupeyivaddadhatsu|
vikasanmaṇipuṣpanetracakraṃ tridaśākrīḍalatāgṛhāntareṣu||23||
sphuṭalakṣmagavākṣamārganiryannavakālāgurudhūmaśāramadhyam|
vidadhatsviva maṇḍalaṃ himāṃśorapanīteṣu vimānamaṇḍaleṣu||24||
vinimagnasurāricakrakāntākucakāśmīrakapiñjarīkṛtāsu|
vyavaropitaratnapaṅkajāsu tridaśodyānalatāravindinīṣu||25||
karalāṅgalanirdayāvakṛṣṭaprakaṭārāvavipakṣavāhinīke|
halinīva hṛte himāṃśuśubhratviṣi dugdhodadhijanmani dvipendre||26||
guruduḥkhabharānubandhakāṣṭhāruditocchūnavipāṭalekṣaṇāsu|
sakalamararājavṛndabandījanatāsu vyasanaughaviplutāsu||27||
jagadapratimalladarpakaṇḍūbharasaṃbhinnabhuje bhujiṣyabhāvam|
nayati prasabhaṃ prasāritejaḥprasare saṃprati devarājaśatrau||28||
pratibaddhajayāśa indumaulau suraloke samameva lokapālaiḥ|
gamayatyapi vāsarankathaṃciddayitāliṅganamaṅgalābhilāṣāt||29||
adhunāpi kimāsyate jayaśrīrabhasākarṣaṇabaddhaniśrayānām|
nanu tāmyati mānasaṃ bhaṭānāṃ kimupāyāntaracintanāntarāyaiḥ||30||
(daśabhiḥ kulakam)
anapekṣitakālayāpanānāṃ bhujadaṇḍe 'driśilāviśaṅkaṭāṃse|
yugapannivasanti sattvabhājāmasisaṅgrāmajayaśriyo bhaṭānām||31||
kṛtameva hi mantracintaya vaḥ samarasyonmiṣataḥ śatāśripāṇeḥ|
kavalīkurute yadastabhītirgrahakallola upetya candrasūryau||32||
yudhi daityapatau vijṛmbhamāṇe vayamāsiṣmahi yannirastayatnāḥ|
prabhuśāsanalābhaśūnyatāyāḥ pariṇāmaḥ kaṭukaḥ sudāruṇo 'yam||33||
pinaṣāma kimāśu cūrṇapeṣaṃ vinimeṣāntarataḥ surāhitānām|
iti candrakirīṭa dehyanujñāṃ tvadanudyogahatā hi no jayaśrīḥ||34||
durtamitthamatarkite gate 'pi dvividhaṃ kālamaveta śauryaśauṇḍāḥ|
samayākhyamupasthitaṃ raṇe naḥ suraśatroḥ samavartisaṃjñamanyam||35||
raṇamūrdhani daityarājalakṣmyā didaridrāsati nūnamandhako 'sau|
yadanena kṛtāḥ prakupyatāṃ vo bhrukuṭībhaṅgataraṅgitā lalāṭāḥ||36||
apajahnuvire yayāśu jahnostanayāyāḥ patitā divo jalaughāḥ|
sakalāsuravaṃśanāśahetustava saikaiva jaṭāstu nātha muktā||37||
raṇamūrdhni jayaśriyaṃ bhaṭaughe dṛḍhamāśliṣṭavati dyulokanāryaḥ|
suranātha bhavantu dūracintā madanākūtavighātabaddhamūrchāḥ||38||
kavacāni pinehivāṃsa ete samarāya pramathāḥ saghoragarjāḥ|
kṣayakālaghanāghanaughaghaṭiṃ dadhatu vyoma javādvilaṅghayantaḥ||39||
gaṇanātha bhavantamutsukatvātpariṣiṣvaṅkṣuraviślathaṃ jayaśrīḥ|
pulakodgamakarkaśāṃ bibharti dhruvamāyodhanamūrdhni dehayaṣṭim||40||
sthiraniścitavairamānasena prabhutāmapyadhijagmuṣā trilokyām|
dviṣatā malinātmakena śaṃbhostimireṇeva na bhāsvato 'sti saṃdhiḥ||41||
bhajate hi na sādhyatāṃ sa sāmnā sakaloccheditayāptavānprabhutvam|
niyataṃ vibudheṣu baddhavairā api tanmaṇḍalavartino na bhedyāḥ||42||
na tadasti jagattraye 'pi ratnaṃ na kṛtaṃ tena yadātmasātkilādau|
bhavatāṃ tadupapradānasādhyāṃ sthitimīyāditi vārtameva manye||43||
iti daṇḍa ihāvaśiṣyamāṇe sakalāḥ santu varūthinīcarā naḥ|
sphuṭakuṭṭanavibhramāsayo 'mī suranārījanasaṃgameṣvarīṇām||44||
athavā kimamībhirindumaulirbhrukuṭībhinnalalāṭabhittirāstām|
kṣaṇamekamapi vrajantu cāripramadānāṃ smaraṇīyatāṃ vilāsāḥ||45||
śikhitāpavilīnameruśṛṅgasrutakārtasvaranirjharadraveṣu|
pravilaṅghitasīmasaptasindhuplavamagnāvanipīṭhamaṇḍaleṣu||46||
paripuñjitatārakaprasarpatpavanāghūrṇitasaptaviṣṭapeṣu|
gurugarjitapūritākhilāśāmukhasaṃvartakameghamaṇḍaleṣu||47||
bhuvanapralayeṣu somasūryajvalanānekamarudgaṇā viśantaḥ|
pṛthuvaktragabhīratālumūlaṃ bahudhā viśvasṛjo mayāsya dṛṣṭāḥ||48||
(tilakam)
avipannavibhāvasūcitatvaṃ dadhaduddīpitamīnaketu cakṣuḥ|
śriyamāpadamuṣya citrabhedasphuṭaśṛṅgārarasaprabandhakalpam||49||
dviṣatāmayatiṣyatāyameko bhuvanopaplavavadāyināṃ vadhe cet|
samapatsyata nedṛśo nikārastadayaṃ nākasadāṃ sadaiva tebhyaḥ||50||
bahunā kimudīritena nātha tvadupekṣāvasareṇa daityalokaḥ|
sakalānapunaḥprarohahetoḥ smṛtiśeṣānamarānvidhāsyate 'sau||51||
upayuktamṛṇālasūtragarbhasthitiratrāhitabhītito marutvān|
apanidrayatīti pakṣapātādiva yasyāmbujakhaṇḍamuṣṇaraśmiḥ||52||
namucipramadālatāsu yasya smitapuṣpodgamaśobhitāṃ dadhānāḥ|
kuliśāgniśikhāhatā ivaite na yayurvibhramapallavāḥ praroham||53||
avadhīritaghoravajravahnernamucerniṣṭhurakaṇṭhapīṭhamūlam|
gamitaṃ sapadi cchidāṃ mayeti svarucetīva jahāsa yasya phenaḥ||54||
punarapyaravindanālasūtrasthitimāsādya sa dānavendrabhīteḥ|
kraśimātiśayena śokadīnaḥ sa vikāsaspadatāṃ puraiti śakraḥ||55||
(cakkalakam)
śikhini pralayaṃ krameṇa nīte dviṣatāyodhanamūrdhni tadvadhūnām|
sa bhaviṣyati dāhasatkriyāyai sphuṭamevānyamayo viyogavahniḥ||56||
pradhane nidhanaṃ prabhañjano 'pi prasabhaṃ dānavamaṇḍalena nītaḥ|
suranāthapurāvarodhanārīguruniḥśvāsamayaḥ pravartate 'sau||57||
ditijāstrakṛśānutāpaśuṣkaḥ punarapyāpsyati nūnamātmalābham|
guruduḥkhabharāvarodhanastrīstravadastrastrutinirjharaiḥ pracetāḥ||58||
vinihatya yamaṃ ca daityayodhā narakadvārakavāṭasaṃpuṭālīḥ|
dalayanti purā paretacakraprasabhākarṣaṇaharṣabaddhahāsāḥ||59||
iti ḍāmaramastu maiva tāvatsurakarṇoḍumarapraṇādacaṇḍam|
raṇasindhutaraṇḍabāhudaṇḍā ripulakṣmīharaṇe bhaṭāḥ kramantām||60||
(pañcabhiḥ kulakam)
rathakuñjaravājipattisainyaṃ prathatāṃ dikṣu rasātalodaraṃ vaḥ|
vidadhadbharanamrabhūmitāmyatphaṇiphūtkānaladhūmadhūmragarbham||61||
saṃkṣiptametadiha durdharadhairyadarpā-
dudvelavārinidhikampitaśailacakrāḥ|
nāyānti yāvadasurādhipatidhvajinya-
stāvatkṣamaṃ tadabhiṣeṇanamindumauleḥ||62||
ākrāntibhugnabhujagendraphaṇāgrapīṭha-
pāriplavakṣititalā pṛtanā smarāreḥ|
prasthāpyatāṃ rūrdhuṣī dinanāthavartma-
kalpāvasānajaladheriva vicipaṅktiḥ||63||
udvṛttadānavakulapralayotsavāya
devo yadaiva calitaḥ pṛtanāsahastraiḥ|
L
tadgrāsaghasmaratayā vivṛtauṣṭhavaktra-
mabhetya dhāvati tadaiva puro 'sya mṛtyuḥ||64||
helānirastaharihetivilūnakaṇṭha-
pīṭhaḥ surāriṣṭatanānikurumba uccaiḥ|
prāpnotu sāṃpratamavigrahatāmupoḍha-
siṃhīsutānukṛtirarditacandrasūryaḥ||65||
kṣundantu dantaparighaprasabhābhighāta-
nirdhūtakāñcanaparāgapiśaṅgitāṅgāḥ|
vaprābhighātaghaṭitāḥ kariṇo virugṇa-
kalpadrumaughaviṣamāni taṭāni meroḥ||66||
āvāsitasya śiśirāṃ'subhṛto 'dhimeru
mandākinīhradajalaṃ vinimajjaneṣu|
kurvantu sainikavadhūjanatā mukhendu-
lāvaṇyakāntijitakāñcanapadmaśobham||67||
utpātā eva nūnaṃ sakaladitisutagrāsasaṃrambhadhāva-
nmṛtyuvyādhūtakalpānalakapilaśikhāvibhramorkākalāpāḥ|
śaṃsantyudvelaratnākarasalilarayādhmātatīrādrirandhra-
dhvānaiḥ saṅgrāmagoṣṭhīmuditasuravadhūcakrasaṃcārikāṃ vaḥ||68||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye nandiṣeṇanayābhiṣeṇanavarṇano nāma pañcadaśaḥ sargaḥ|