krūrakrudhāmatha karābhihatāṃsakūṭa-
mullāsitabhrukuṭi dantavighaṭṭitauṣṭham|
teṣāmanekavidhaghoravikāraceṣṭa-
mātāmradṛṣṭi sadasi sphuritaṃ tadāsīt||1||
Kāvyamālā 22, E Text Acharya
- , ,
- Known as: , (NCC).
- Siglum: K
[description of manuscript]
More ▾
| Title | Haravijaya |
| Commentary | [title of commentary] |
| Author | [author] |
| Commentator | [commentator] |
| Physical description | |
|---|---|
| Language/Script | [Sanskrit in Latin script.] |
| Format | e-text |
| Material | digital |
| History | |
|---|---|
| Date of production | unclear |
| Place of origin | |
| Provenance | [record of ownership] |
| Acquisition | [how it was acquired] |
- K
L
L
L
L
L
L
saptamaḥ sargaḥ|
vinyastapādabharakampitakuṭṭimāgra-
māghaṭṭanāvighaṭitāmalamaulibandham|
krodhaḥ sabhāṃ nyaviśatāṅgadakoṭilagna-
visrastakomaladukūladaśaṃ smarāreḥ||2||
vakṣaḥsthale gaṇapateḥ kupitasya hāra-
cchedocchaladbahalamauktikapaṅktirādhāt|
prāgvidrutāṅkaśaraṇāgataśatrulakṣmī-
svedodabindubisaracchuriteva śobhām||3||
chāyāṃ kiranmalinitāmbaradigvibhāgā-
māvirbhavadbhrukuṭibhaṅgabhayānakena|
vaktreṇa kālamusalaḥ sakalāriloka-
saṃhārarātrighaṭanāmiva kartumaicchat||4||
saṃrambhagarbhagurumanyumanāścakāra
huṃkārabhairavaravaṃ yudhi vīrabhadraḥ|
jṛmbhāvikāsivikaṭānanakaṃdarādhaṃ-
bhāgāntarālakuharapratiśabdadīrgham||5||
uddāmaroṣabharanirbharabhairavīya-
bhīyantraṇārahitahuṃkṛtanādasāndrāḥ|
L
aṃsasthalābhihatitāraravā bhaṭānāṃ
saṃdhiṃ kahaṃcidabhidanna divaspṛthivyoḥ||6||
cikṣepa pāṇikamalena rupā vilūya
viṣyandisāndramakarandavilīnabhṛṅgām|
kaṇṭhasrajaṃ ratarasāgataśatrulakṣmī-
līlāvighātarabhasādiva meghanīlaḥ||7||
krūrakrudhaḥ karatalena lalāṭapaṭṭa-
māpāṭalaṃ malayataḥ sadasi trimūrteḥ|
ālakṣyatopari tṛtīyavilocanasya
bhrūmañjarīva navadhūmaśikhotpatantī||8||
jihmībhavadbhrukuṭipāṭalarāgadṛṣṭi-
tiryagvivṛttavadanaṃ hasitāṃśugauraḥ|
śauryoṣmaṇā prathitasāranirargalena
bhasmībhavanniva bhujaḥ śikhināluloke||9||
vaktraṃ dadhaddaśanadaṃśabhayādivāśu
kampākulādharadalasthiti vajramuṣṭiḥ|
dordaṇḍamāhata kareṇa surāribhaṅga-
saṃrambharāgavikasatpulakaprabandhaḥ||10||
śvāsānilā natamukhasya karābhighāta-
bhinnāvaniprakaṭarandhrapathapraviṣṭāḥ|
pātālagarbhanalinīmanalasya cakru-
ruddhūtaśeṣaphaṇapāṇḍurapuṇḍarīkām||11||
uttaṃsapuṣpanavakesarasāndradhūli-
piṅgīkṛto madhumadena papāta bhṛṅgaḥ|
L
nirmathnataḥ sapadi bhṛṅgiriṭerlalāṭa-
mūrdhvākṣitāraka ivāgniśikhāpiśaṅgaḥ||12||
roṣāruṇīkṛtadṛśo naḍakūbarasya
huṃkāradhūmapaṭalīṃ mukharandhrabhāgāt|
daityādhirājakavalīkaraṇādareṇa
kṛtyāmivaikṣata janaḥ sahasotpatantīm||13||
kaṇṭhāvalambimakarandarasātipāna-
visrambhamantharavilīnaśilīmukhaughā|
dṛptārisaṃgarajalāśayakuñjarasya
bhāti sma śṛṅkhalamivotpaladāma jiṣṇoḥ||14||
niryannakhāṃśusalilaughakṛtābhiṣeka-
mekaṃ sahāyamanaghaṃ yudhi manyamānaḥ|
bāhudrumaṃ karatalena parāmamarśa
durdarśamūrtiratha karśitasarvalokaḥ||15||
preṅkhallalāṭakaṣaṇotthitasāndradhūma-
lekhānuṣaṅgakṛtalagnakabandhamoham|
tigmāṃśubimbamasudarśabhayaṃkaraika-
mūrtiḥ sumūrtiradadarśadakarśitaśrīḥ||16||
anyonyagāḍhamalanena rarāja dhūma-
varticchaṭā karapuṭādviyadutpatantī|
īṣadvinidradalamaṇḍalapuṇḍarīka-
koṣodarādbhramarapaṅktirivāgnikasya||17||
krodheśvarasya ca kirīṭakapālapaṅkti-
rūrdhvekṣaṇānalaśikhāpaṭalāvamarśāt|
saṃhārabhānukaratāpitaśailakūṭa-
ṭāṃkāratāraravamasphuṭaduttamāṅge||18||
niḥśeṣamākulitaśeṣaśarīranāla-
māghūrṇamānavikaṭābhrapalāśakhaṇḍam|
caṇḍeśvarasya sarupo bhuvanāravinda-
muṣṇoṣṇaniḥśvasitatāpavaśenaṃ mamlau||19||
sasvedaśīkaramakampata tālaketu-
rātāmratālutalabhīṣaṇajṛmbhavaktraḥ|
saṃkalpanirjitapuraḥsthitavairilakṣmī-
gāḍhopagūhanavaśāduta tīvramanyoḥ||20||
tiryagvivartitamukhasya lulāyaketo-
rhāsacchaṭādhavalabhāsmanabhakticitraḥ|
bāhurjayadviradahasta ivārarāja
pīnāṃsakūṭavikaṭonnatakumbhapīṭhaḥ||21||
sasyandire sadasi dharmajalāni sāndra-
sindūratāmramukharāgarucaḥ prakopāt|
saṃdehitendukiraṇāṅkuragauratāra-
hārācchabindupaṭalāni sunandakasya||22||
caṇḍe ca caukrudhipi taccaraṇātibhāra-
khedākulonnamitapīvaradīrghadoṣṇā|
L
śeṣeṇa kuñcitakarālaphaṇāsahastra-
vistraṃsinī kṣitirabhāritarāṃ kathaṃcit||23||
kruddhaṃ mayūrapatiketanamaṃśujālai-
rna dvādaśāpi kakubhaḥ paridīpayantaḥ|
saṃhāravāsaramivātanudrunirīkṣya-
rūpaṃ vilocanasahastraruco na cakruḥ||24||
kṣuṇṇāṅgadāruṇaśilāśakalotthasāndra-
dhūlicchaṭāpaṭalakuṅkumapaṅkacarcā|
pañcākṣakopavikṛtiḥ kṛtamaṇḍaneva
sasvedaśīkarakaṇotkaramauktikāsīt||25||
diṇḍeḥ sphuliṅgakaṇikāḥ saruṣaḥ kiradbhi-
ranyonyapāṇimalanotthitadhūmadigdhaiḥ|
nāploṣi dhūrjaṭisadaḥ kathamapyathaurva-
saṃvāditāṃ vidadhataḥ paruṣākṣipātaiḥ||26||
viṣyandamānaghanagharmakaṇāvakīrṇa-
mucchvāsikuṅkumavilepanamagnidhāmnaḥ|
vibhrāntatārakaviśaṅkaṭaśātakaumbha-
śailādhirājakaṭakaśriyamāpa vakṣaḥ||27||
niṣpiṣṭahāravidhutoddhādhūlipuñja-
bhasmacchaṭābhiraruṇacchavilocanaśrīḥ|
kṣmāmaṇḍalaṃ jvara ivākulayāṃcakāra
durvārakopavikṛtiḥ sadasi trimūrdhā||28||
bhāsvatphaṇāmaṇikaṇolbaṇavahnicūrṇā-
kalmāṣitāmbaratalānmukharandhrabhāgāt|
valmīkakūṭakuharāduragā ivāgni-
ketornirīyuratha huṃkṛtadhūmadaṇḍāḥ||29||
āmardakasya suravairivimardino 'pi
dikkāminīmukhanavāgurupattralekhā|
huṃkāradhūmapaṭalī bhuvanāravinda-
kopodarabhramarapaṅktiradhatta śobhām||30||
krodhāpaviṣṭaśaśabhṛtkiraṇacchaṭācha-
hārāvalīvivalitāgniśikhasya dhūliḥ|
saṃrambhavibhramadiśāmukhajṛmbhamāṇa-
lakṣmīkapolatalarodhrarajaśchaṭāsīt||31||
jyotiṣmataḥ śikhiśikhānikurumbapiṅga-
jihmotkaṭabhrukuṭibhaṅgabhayaṃkaratviṭ|
sāmbhobharasthirataḍidguṇameghaśobhi
vaktraṃ vilokya sabhayā bibhayāṃbubhūve||32||
tārasya tāratarahuṃkṛtiroṣagarbhāṃ
vinyasyato 'gnikapiśāṃ dṛśamāśu tiryak|
tattāpayogagalitātanupatrabhaṅga-
hemāṅgadāṃsaśikharo bhujadaṇḍa āsīt||33||
niḥśeṣamekakavalagrahasauṣṭhavena
mṛtyoriva tribhuvanaṃ-saruṣo jighatsoḥ|
jṛmbhāvikāsi vadanaṃ vikarālajihva-
mālokya saṃsadi vijahvalurasya lokāḥ||34||
niḥśaṅkahuṃkṛtakṛśānukaṇāvakīrṇa-
vistīrṇatāmratalatāluvijṛmbhamāṇam|
saṃdhyāpi'saṅgamaruṇāṃśuśikhāvamarśa-
śoṇagrahaṃ nabha ivorjitavaktramāsīt||35||
jṛmbhāvikāsi mukhamagnimukhasya tāmra-
jihvākarālavikaṭasphuṭadantamālam|
reje 'mbarīṣamiva nirgatavahniheti-
paṅktipratiṣṭhadhavalodaralājagarbham||36||
dīrghaṃ viniḥśvasati tindukinīprasūna-
vispaṣṭapāṭaladṛśi triśikhe samanyau|
āsannameva bhuvanapralayāvatāra-
mābaddhavepathuramanyata rājalokaḥ||37||
keyūracakradalanocchaladindranīla-
khaṇḍāvalī karatalābhihatāṃsabhitteḥ|
kālasya kuṭṭimatalāmburuhopahāra-
gandhākulabhramarasaṃhativibhramābhūt||38||
saṃcūrṇitāṅgadakarālakarāhatāṃsa-
kūṭotthaniṣṭhuravirāvavipūritāśam|
akrodhi bodhitasurāsuracakravāla-
saṃhāradurdharaparākramamantakena||39||
caṇḍānanasya karatāḍanakhaṇḍyamāna-
keyūraratnakaṇakoṇakaṇatkṛtiśrut|
daityakṣayādhikasaropakṛtāntadanta-
saṃghaṭṭabhairavaravānukṛtiṃ cakāra||40||
āghātabhagnavikaṭavraṇakaṃdharāṃsa-
kūṭocchalacchithilitāṅgadadoḥpracaṇḍaḥ|
mṛtyoriva pratikṛtiḥ sa cukopa kopa-
kampākulotpulakapīnakapolabhittiḥ||41||
cakrāyudhaṃ sapadi cukrudhivāṃsamaṃsa-
kūṭāvamardamṛditormikapāṇiyugmam|
saṃhārabhāskaradurīkṣyamukhaṃ nirīkṣya
no sasmaruḥ svamapi jātabhiyaḥ suraughāḥ||42||
cakre diśo ditisutāhavasāvahela-
hāsollasaddaśanadīdhiticakravālaḥ|
vyaṅgyāhitapralayapaiśunajṛmbhamāṇā-
kāṇḍe(?) tarūtthakusumā iva nīlavajraḥ||43||
saṃrambhiṇaḥ śikhitamasya puraḥ prakīrṇāṃ
huṃkāravahnikaṇasaṃtatimattumaicchat|
krīḍāśukaḥ śikhibhuvaḥ paripākatāmra-
piṇḍīrapiṅgakaṇaśaṅki vimugdhacetāḥ||44||
piṅgekṣaṇasphuradakalkamarīcivalga-
dulkāgnidāhabhayaviklavatāmivāptam|
L
bhrūbhaṅgapuñjitamadhatta lalāṭapaṭṭa-
māghaṭya kuṭṭimatalaṃ caraṇena nandī||45||
uttānavaktrakuharotthitayāṭṭahāsa-
hāsatviṣā kaluṣayā bibharāṃbubhūve|
preṅkhatyanargalarasātalagarbhanirya-
dinduprabhādhavalaśeṣaśarīralakṣmīḥ||46||
romāñcapūritavikampikapolabhāga-
mudvartamānapuṭatāravipāṭalākṣam|
vaktraṃ vidaṣṭavikaṭauṣṭhavikṛṣṭanāsa-
mudbhrūvibhaṅgamabhṛtāruṇamabhraketuḥ||47||
saṃprāpya saṃnahanamāhavagāḍharāga-
mujjṛmbhitaḥ sapadi roṣa ivaiṣa sākṣāt|
pātālagahvaragabhīraravāvamarda-
pārṣṇiprahāravidhurāmacakampadurvīm||48||
paryantabhāgavilasatpulakaṃ babhāra
hetivraṇaṃ saghanagharmajalaṃ jayantaḥ|
stokāvaśiṣṭajalatīravirūḍhabāla-
śaṣpāṅkurahradasarūpamuraḥsthalena||49||
vyāvṛttivegaviśarārukarālahāra-
tārāvakīrṇamaṇikuṭṭimaṣṭaṣṭhabhāgaḥ|
visraṃsitoḍugaṇaśāritabhūmipīṭha-
saṃhāramārutavilāsamasāvalāsīt||50||
sāmarṣaharṣabharapārṣadapārṣṇipāṇi-
līlābhighātavidhurā dharaṇī rarāṇa|
L
pātālatāluni sasaṃbhramanāgabhīru-
garbhapragalbhavinipātanaghoraghoṣam||51||
keyūracakranikaraistridaśādhipānā-
maṃsāvamardapatitairmaṇikuṭṭimorvī|
reje puraṃdarakareritavajrapāta-
vicchinnapakṣatipuṭairiva bhudharāṇām||52||
daityapratāpaśikhiśāntimiva kṣaṇena
kartuṃ viśaṅkaṭalalāṭataṭasthalībhyaḥ|
te dharmaśīkarakaṇaprakarānsalīla-
mākṛṣya karkaśaruṣaścakaruḥ karāgraiḥ||53||
jṛmbhāvikāsaghaṭanāvikaṭairapāṅga-
paryantaniryadatanujvalanasphuliṅgaiḥ|
vaktrairgaṇādhipatayaḥ saruṣaḥ kṣaṇena
dikcakramagrasiṣateva karāladaṃṣṭraiḥ||54||
teṣāṃ vivartanabhareṇa parasparāṃsa-
kūṭāvaghaṭṭaghaṭanādalitāṅgadānām|
sastraṃsire vikaṭakuṭṭimasīmri rugṇa-
bandhāḥ saroṣakarapeṣabhiyeva hārāḥ||55||
līlāvalokitakarālakṛpāṇapaṭṭa-
paryākulotpulakakañcukalokapālam|
niṣprakramaṃ pracukupe kapilaiḥ kapola-
bhāgaiḥ kapālisadasīti gaṇādhināthaiḥ||56||
L
pratyāsīdatpārṣadaśvāsahelākṣiptakṣmābhṛtkūṭaṭāṃkāraghorā|
gaurībhartuḥ kliṣṭasatvā sabhā sā dadhre kalpāpāyavelānukāram||57||
vispaṣṭamuṣṭikarasaṃkarapiṣṭahāra-
muktāphaloddhataparāgavipāṇḍurāgraiḥ|
meghāvasānasamayairiva nākasadbhi-
rastokakoparacitasthitibhirbubhūve||58||
anyonyapāṇimalanakṣatapadmarāga-
ratnormikoddhataparāgakaṇaiścakāra|
brāhmī jagatkapiśitākhiladikprabhāta-
veleva phullakamalā karadhūlipuñjaiḥ||59||
krodhodgatākṛśakṛśānuśikhāsahasra-
niryāsabhāsvaritarukṣakaṭākṣamokṣaiḥ|
tryakṣākṛtiḥ kṣaṇamadīpi jagattrayolkā-
daṇḍairiva tridaśasaṃbhramamākṣipadbhiḥ||60||
cakraṃ surāhitacamūgalacakravāla-
cchedābhilāṣarabhasādbhramayāṃcakāra|
caṇḍī karālasaralā'ngulikoṭibhāga-
lagnaṃ kare śravaṇapūramivājilakṣmyāḥ||61||
dalitamasuracakrakrodhasaṃrambhagarbhaṃ
karakamalavidarbhaṃ vaiṣṇavī tatra dadhre|
vigalitamakarandaṃ padmarāgormikāgra-
kṣatividhutapiśaṅgacchāyadhūlicchalena||62||
bhrukuṭikuṭilitabhrūvibhramavyājacañca-
ccaṭulamadhupaveṇībandhamādhatta tāmram|
mukhamakhilavipakṣakṣodasaṃrambhalakṣmī-
karakisalayalīlāpaṅkajaṃ bhadrakālī||63||
itthaṃ hāroddalanavigalattāramuktāphalaugha-
jyotiścakrākramaṇaśabalānkurvatī digvibhāgān|
sā veleva kṣubhitaviṣamā ratnarāśestadānīṃ
sthāṇorgarjadgaṇapatiśatollolajālā sabhāsīt||64||
iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānaka śrīratnākarasya kṛtau ratnāṅke haravijaye mahākāvye sabhākṣobhavarṇano nāma saptamaḥ sargaḥ|