Hahn 2007

This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.

More ▾
Title Kapphiṇābhyudaya
Author Ratnākara
Physical description
Language/Script Sanskrit in Latin script.
Format book
Material paper
Extent 239 pages.
History
Date of production 2007
Place of origin Kyoto

Published in 2007 by Hōzōkan Publishing Company in Kyoto.

XI. Dināntavarṇanam

atha sudṛśāṃ priyapraṇayavibhramabhāvanayā
samudabhavac ca naiśasuratotsavasaspṛhatā|
ravir api saṃjahāra karaḍambaram ambarataḥ
phalam abhivāñchitānupadabhāvi hi bhavyadhiyām|| 1 ||
avasitavāsarāvasaranṛttarasollasita-
tripuraripūttamāṅgatalatāḍanato vidhutam|
niravadhi vedhasaḥ kanakadhāma samiddham adho
nyapatad akhaṇḍam aṇḍam iva maṇḍalam uṣṇarucaḥ|| 2 ||
diśi diśi vṛddhaye prahitam ambujakoṣaruci-
prasṛtakaro dadhat kanakadhāturasasya tulām|
vapur atimandaṃ āpya ravir āsthitapātabhayaḥ
vaṇig iva maṇḍale 'tha samajīghaṭad aṃśudhanam|| 3 ||
adhikaviṣaktakūbariyugānamadaṃsabhuvo
vicalitakarṇacāmaratirohitatāntadṛśaḥ|
katham api nātikarkaśakhalīnadhṛtā viyataḥ
savitur avātarann aparaśailaśiras turagāḥ|| 4 ||
anusṛtaṃ ārdrayā kamalinīmakarandarucā
pariṇatakokaśokavaśavīkṣaṇabāṣpabharam|
ratarasikāṅganānayanaharṣajalasnapitaṃ
samadhita mandatāṃ sapadi dhāma gabhastimataḥ|| 5 ||
ravirucitāpanadrutamahārajatādriśilā-
bahalarasāṅkapaṅkapaṭasannaśaphaṃ patatām|
samajani vājināṃ gatir apāstajavāstagirau
ahar ahar atyaye 'pi parivṛddhim ivānayatām|| 6 ||
adhigatajihmabhāvam upapāditasaṃghaṭanāḥ
sapadi bhaviṣyadandhatamasaughabhiyeva bhṛśam|
paragiriśṛṅgaṃ āruruhur uṣṇakarasya karāḥ
paraparibhūtiṣu prathamam eva na jāgrati ke|| 7 ||
sphuradaruṇaprabhābharaṇabhāsvarabhāvabhṛtā
bhṛśaparimaṇḍalena bahaloṣmaviśeṣamucā|
ura iva śārṅginaḥ kham atha kuṅkumakāntijuṣā
jaladhisutāstanena kṛtaṃ ākapiśaṃ raviṇā|| 8 ||
tridivasadāṃ sadā prakaṭitāśa...yā prathito
vijitatamogatir viditaviṣṇupadaḥ patanam|
ravir api nāma sāmpratam asāmprataṃ āpad aho
bata duratikramā kṛtadhiyām api kālagatiḥ|| 9 ||
gururathapātasaṃkṣubhitasindhusamucchalita-
sphuraduruvāḍavānalaśikhāpaṭalītulayā|
kapiśimaśālinīm abhiniviśya daśām aśanair
aśiśiraśociṣo daśaśatī ruruce 'tha rucām|| 10 ||
caramamahīdhramastakataṭasthagitasya raver
anavanatiṃ gatāḥ sarasakuṅkumakāntarucaḥ|
upadadhur aṃśavaḥ paruṣapūṣapadūṣmavaśa-
drutajagadaṇḍakhaṇḍakanakasrutisundaratām|| 11 ||
nipatitam ujjihīrṣur abhisaṃgatapiṅgalima
grahapatipadmarāgamaṇikandukam ambunidhau|
samavatarann atiṣṭhipad ahaḥpuruṣo 'tipaṭuḥ
paṭam iva pāṭalātapam adhidyutaṭi prakaṭam|| 12 ||
dhṛtavitatoṣmaṇaḥ samabhipatya bhuvo nibiḍaṃ
vruḍitatanor dinadvipapateḥ prasabhaṃ jaladhau|
upacitacīnapiṣṭaparipuṣṭavibhāvibhavaṃ
vapur atha kumbhakūṭam iva dṛśyam abhāt taraṇeḥ|| 13 ||
idam udayopayogi punar apy abhibhāvi hi mā
jvalanamayaṃ jalair mama virodhibhir āpatataḥ|
asamarucāv itīva vinidhāya rucāṃ paṭalaṃ
payasi virocano niviviśe vivaśo 'mbunidheḥ|| 14 ||
paṭukaṭukoṣmabhiḥ kaṭakadhāturasasya gireḥ
kuharakaṭāhakeṣu ravidhāmabhir utkvathataḥ|
upari bharād ivocchalitayā cchaṭayā gaganaṃ
pratinavasandhyayā sapadi saṃvalitaṃ śuśubhe|| 15 ||
kṛtavikarālakālakaravālavilūnaviyad-
vikaṭaśiro'nukāriravimaṇḍalaniḥsṛtayā|
asulabharodhayā rudhiradhārikayeva samaṃ
samajani saṃdhyayā ghaṭitapāṭalima dyutaṭam|| 16 ||
pariṇamatā dṛḍhaṃ dinapatidviradena tathā
dadhaditi dīrghadīdhitimayair daśanair aśanaiḥ|
dalitam abhūt parādrimaṇisānu rajaśchaṭayā
cchaṭiti yathodamajji divi sāṃdhyarucicchalataḥ|| 17 ||
praṇatiparāyanā parikalayya dināpacaye
pariṇatiṃ īyivāṃsam abhisaṃdhyam aśītakaram|
karapuṭakuḍmalāni niyamena dadhe janatā
na hi mahatāṃ kṣaye 'pi guṇagauravam eti hatim|| 18 ||
acalataṭītirohitatayonmukhabhāvabhṛtāṃ
upari rucāṃ gatā vitatatāṃ sthitasāṃdhyaruciḥ|
akaluṣapuṣparāgagurudaṇḍabhṛtābhraghaṭā
dyutim atanod vimānagavitānapaṭīva raveḥ|| 19 ||
ravirathapātanirdhutapayodhitaraṅgatati-
vyatikaradhāvyamāna iva yāvad agād galanam|
dinavigamāruṇātapakusumbhakaṣāyarasaḥ
kṣataruci tāvad ambaram adhāt paridhūsaratām|| 20 ||
timiraviṣāṇakoṭibhir ahaskarahemataṭe
madaparuṣaṃ pradoṣavṛṣabheṇa ruṣollikhite|
viyad abhito babhāra kṛśasāṃdhyarucipracayaiḥ
pracurasuvarṇacūrṇapaṭalair iva pāṭalatām|| 21 ||
gaganavane gabhastidalasaṃtatibhis taruṇas
taraṇitaruḥ pradoṣasamadadviradoddalitaḥ|
ciram acalat tathānupadam asya yathā viśadaṃ
diśi diśi śīryamāṇam uḍupuṣpakulaṃ dadṛśe|| 22 ||
anatiśayena bhuktasahavāsasukhāḥ sudhiyo
dhruvam anuyānti sauhṛdabhuvāṃ vikṛtiprakṛtī|
yad abhivibhāvya bhāskaraviyogahatāṃ nalinīṃ
jahur iha cakravākamithunāny api saṃgatatām|| 23 ||
sphurati tad eva maṇḍanavidhau madhupāyikulaṃ
vikasati saiva sāndramakarandarasojjvalatā|
atha ca gate 'stam aṃśumati naiva babhau nalinī
dhruvam asupāta eva dayitacyutir eṇadṛśām|| 24 ||
ślathadaliveṇayaḥ patati bhartari tigmakare
vapur avanamrapadmavadanāḥ śatapatrabhuvaḥ|
viyutarathāṅganāmapṛthupakṣatinirdhutibhiḥ
karatalatāḍanābhir iva jaghnur atha vyathitāḥ|| 25 ||
śritavati śāntiṃ ūṣmaṇi kaṭhoratare taraṇes
taralitatārakotkarakuśeśayakośakulaiḥ|
samam udamajji paṅkapaṭalīmalinacchavibhir
vanamahiṣair iva dyusarasas timiraprasaraiḥ|| 26 ||
gatavati kālameghaparivṛṣṭatamaḥsalilaiḥ
pracayibhir ambare vana ivāśu pariplutatām|
śikhiśikhayeva dhūmaparidhūsarabhāvabhṛtā
na caramasaṃdhyayā niviviśe na śanair naśanam|| 27 ||
muṣitavivekavṛttir upapannabahuskhalitaḥ
suratasukhābhilāṣajanano jitadṛṣṭidhṛtiḥ|
mada iva vallabhāvasathagatyupadeśaguruḥ
parivavṛdhe pradoṣabahulaḥ prasaras tamasām|| 28 ||
samadamahebhabhinnakaṭadānanadīmalinair
jagad avagāhyate sma divasāntatamovisaraiḥ|
asucirabhāviśītakarasaṃgamadigvanitā-
ratigṛhadagdhadhūpavisṛtair iva dhūmapaṭaiḥ|| 29 ||
diva iva niḥsṛtair girinadībhya ivocchvasitair
bhuva iva samplutaiḥ kṣititalād iva collasitaiḥ|
jaladhijalodbhavair iva kakubbhya ivotphalitaiḥ
timirakulair anīṣad udameṣi masīkaluṣaiḥ|| 30 ||
kusumakarālitāsu kabarīṣu kuraṅgadṛśāṃ
kuvalayakūṭakuḍmalakuṭīṣu saritsu tamaḥ|
madamuci dantināṃ kaṭakaṭāhakakoṭarake
kuṭitam ajīghaṭad vikaṭaṣaṭpadapeṭakatām|| 31 ||
anukaraṇābhimukhyabharabhairavabhairavatā-
vahabahubāhuṣaṇḍaparipuñjanayā nu param|
ajani parasparānvayavidhir jagadākramaṇa-
pravaṇamahodayena tamasā nu tadā kakubhām|| 32 ||
jagadudare nidhāya sasamudranagādrivanaṃ
payasi niṣeduṣā kramavilaṅghitalokabhuvā|
anavasitaśriyā duravabodhanayodgatinā
sapadi na kṛṣṇatā na samabhāri tamītamasā|| 33 ||
yad uruhiraṇyagarbhakanakāṇḍakavāṭatale
dinakaradīpakajjalajam ahni sasajja rajaḥ|
tad idam uṣāvatāramarudāhatiśātanayā
vigalitam andhakārapaṭalacchalam ucchalitam|| 34 ||
priyavasatiprayāṇasamaye pidadhat padavīṃ
idam upakāri nas tama itīva nimagnagamāḥ|
alimalinasya veṇivalayasya rucāṃ nicayair
abhisaraṇotsukāḥ priyatayā pupuṣuḥ sudṛśaḥ|| 35 ||
timiram abādhatātha viyutaṃ mithunaṃ patator
vidhivad upākṛtābhisaraṇotkadhiyas tu vadhūḥ|
viṣayaviśeṣabhedapariṇāmi guṇāguṇayor
na hi jagataḥ svabhāvasamavāyi samunmiṣitam|| 36 ||
ity udvṛttasamuddhatāndhatamasavyādhūtaviśvasthitau
kalpāpāyamahābhaye 'pi sahasā magnā tamisrāmukhe|
dhyātvāgre śivaśekharodayam anudvignaiva tasthau prajā
pratyāsannasukhodayo hi na manaḥ kliśnāti duḥkhodgamaḥ|| 37 ||

kapphiṇābhyudaye mahākāvye dinānatavarṇano nāmaikadaśamaḥ sargaḥ||