Hahn 2007

Siglum: MH07

This is a transcription of the Kapphiṇābhyudaya from Michael Hahn's 2007 critical edition. Transcription done by Yuko Yokochi for Cantos 1-17 and 20, and Peter Pasedach for canto 19. Canto 18 has been transcribed by Alessandro Battistini from Hahn 2013, therefore it is not included in this file. TEI encoding for all cantos by Peter Pasedach.

More ▾

Title	Kapphiṇābhyudaya
Author	Ratnākara

Physical description
Language/Script	Sanskrit in Latin script.
Format	book
Material	paper
Extent	239 pages.

History
Date of production	2007
Place of origin	Kyoto

Published in 2007 by Hōzōkan Publishing Company in Kyoto.

MH07

III. Sabhāsaṃkṣobha

samprāpya praṇidhigirāṃ garīyasīnām

ity antaṃ taralitatāmratārakānām|

saṃrambhabhrukuṭicalabhrubabhrubhāsāṃ

krodhena prasabham ajṛmbhi bhūpatīnām|| 1 ||

sārambhaṃ karatalatāḍanaiḥ kaṭhoraiḥ

keyūraṃ maṇimayam acchidat krudhāndhaḥ|

doḥstambhapraṇayiparākramadvipasya

prārambhe yudha iva śṛṅkhalaṃ subāhuḥ|| 2 ||

bhūpālaḥ karapuṭapeṣataḥ pravṛddhaṃ

krodhāndho dadhad adhidhāmadhūmadaṇḍam|

saṃhartuṃ bhuvanam adarśi darśakākhyaḥ

kṣubdhātmā yama iva daṇḍavān upetaḥ|| 3 ||

aṅge 'ṅge pratiphalitair mahīpatīnām

ākāraiḥ pratighanagharmabindu bindhuḥ|

abhyūhe kurukulakopitāsuradviṭ-

saṃrambhaprakaṭitaviśvarūpalīlām|| 4 ||

cikṣepa pramṛditamarmarormikotthaṃ

ratnāśmaprakaram anekam ekalavyaḥ|

pāṇibhyāṃ bhuvi kusumāñjalikramena

pratyarthikṣayanavanāṭyasūtradhāraḥ|| 5 ||

ācchoṭacchidurakarālahāramukto

muktaughaḥ prakaram avākirat subandhoḥ|

unmādyadgurubhujaśauryavāraṇodyat-

pūtkāracyutaśuciśīkarotkaraśrīḥ|| 6 ||

āsphoṭasphuṭamaṇibhaṅgam aṅgadānām

uttuṅgadyutinikaracchalena jiṣṇuḥ|

dordaṇḍaprasaradasṛksirāsahasrair

ātena balim iva kopakālarātyai|| 7 ||

jṛmbhābhiḥ sphuṭamukhagahvarasya jihvā

tāmbūlavyatikarapiṅgalā balasya|

nirdagdhuṃ parabalapuñjam ujjihānā

jvāleva vyacalad amarṣapāvakasya|| 8 ||

ātāmrā sapadi suśarmaṇo mukhaśrīḥ

ālakṣi kṣubhitakaṣāyitāyatākṣī|

pratyagrapracaladasṛkprakopakālī-

pārīva pravikacapiṅgapaṅkajāṅkā|| 9 ||

dantāgrakrakacakaṭhoraghaṭṭanotthaṃ

sāmarṣaṃ dhvanitam adhatta bhūridhāmā|

krodhāgnisphuṭataratīvratāpatapta-

sthūlāsthitruṭitataṭatkṛtānukāram|| 10 ||

pāṇḍyasyāpy adhita piśaṅgitāṅgadānāṃ

kṣodaḥ kṣmāṃ kaṭhinakarāgrakuṭṭitānām|

āsphoṭair vikaṭataṭāṃsakumabhakūṭāt

saindūraṃ raja iva vikramadvipasya|| 11 ||

yaj jṛmbhāvikaṭamukhāvaṭottham aujjhīd

uṣṇoṣṇaṃ śvasitasamīraṇaṃ surāṣṭraḥ|

saundaryaṃ lalitaguṇālimāli mamlau

tenaiva pratibalakīrtikānanānām|| 12 ||

tālvagrapratiphalitapratipraṇādaṃ

kruddhātmā yad akṛta huṃkṛtaṃ suketuḥ|

lokānāṃ tad iha jhaṣadhvajaṃ didhakṣau

traiyakṣe vapuṣi lulokiṣāṃ lulāva|| 13 ||

kṣmāpālaḥ kṣaṇadhutadhūsaroṣṭham ujjhan

niśvāsaśvasanam udūṣma bhīṣmakākhyaḥ|

kopāgnipraṇayini citta eva dagdhuṃ

saṃkalpaiḥ samupanināya vairivargam|| 14 ||

bhīṣmoṣmā malitabhujadrumaprasarpad-

dhūmaughaḥ prahatapṛthūrughoraghoṣaḥ|

vavrājāruṇataratārakāsphuliṅgaḥ

sphītatvaṃ yavanavane prakopadāvaḥ|| 15 ||

sārambhaṃ bhujatarupañjarāntarāle

kirmīraḥ karaparimarśaṃ ādadhānaḥ|

uttāmyat tvaritam arātidāraṇārthaṃ

bhūyiṣṭhaṃ mana iva matsarād arautsīt|| 16 ||

keyūrāruṇadṛśadāṃ karaprahāraiḥ

piṣṭānāṃ pihitavapuḥ paraṃ parāgaiḥ|

utpātaprasarapidhānadhūsarasya

prārebhe pralayaraver viḍambam andhraḥ|| 17 ||

jṛmbhāsu prasabham avihvalasya jihvā

jajvālojjvalamukhagahvarā āhvṛceḥ|

sā kruddhorjitajanamejayādhvarādhva-

preddhāgnibhramitabhujaṅgavibhramābhūt|| 18 ||

antaḥsthasphuradurumanyuvahni-

kaṣṭaspaṣṭoṣṇakvathanaviśoṣaśaṅkayaiva|

bhīmasya drutataravidrutaṃ nirīya

svedāmbho bahu bahir ānaśe śarīram|| 19 ||

bhrūbhaṅgabhrukuṭiviśaṅkaṭormir uccair-

āvartaprakaṭamukhāvaṭograghoṣaḥ|

cukṣobha prasaradamarṣavarṣukābhro

nirmudraṃ sapadi samudravat sumadraḥ|| 20 ||

aṅge 'ṅge karadalitāṅgadāruṇāśma-

kṣodhaughaṃ pracuraparasparaṃ pratīcchan|

āślikṣad dṛḍhadhanur āpipṛcchiṣecchuḥ

kopāgniṃ drutam iva vairidāraṇāya|| 21 ||

krodhāgneḥ sadasi yadaiva hetijālair

jajvāla jvalitadigambaro 'mbarīṣaḥ|

nūnaṃ te 'navadhivirodhakāḥ kilājau

lājaughā iva paricakvathus tadaiva|| 22 ||

medinyāḥ karahatijanmanojjahāra

prājyorjaṃ gurutaragahvareṇa kahvaḥ|

pātālāt sitataraśeṣabhogabhāsaṃ

krodhoṣmaklamaśamanīṃ sudhām ivoccaiḥ|| 23 ||

pusphora sphuṭitaruciprakoṣṭham oṣṭhaḥ

svedāmbhaḥsnapitatanoḥ śatadhvajasya|

atyugrāṃ japata iva prakopakṛtyāṃ

nirmātuṃ dviṣadabhicārimantratantram|| 24 ||

sasyandaṃ pariṇamatā nipatya hāra-

kṣodena kṣaṇakṛtapāṇipeṣajena|

svedāmbho vapuṣi pupoṣa kopavahni-

kvāthotthasphuṭapṛthuphenakāntim andhoḥ|| 25 ||

dordaṇḍe karamalanena dhūmalekhāṃ

sollāsām asilatikām ivāśritasya|

śiślikṣuḥ sraji parimaṇḍalabhramo 'bhād

bhṛṅgaughaḥ phara iva visphuran nalasya|| 26 ||

dordaṇḍe śatadhanur aṃsakuṭṭanotthaiḥ

saṃghaṭṭair vighaṭitahāṭakāṅgade 'pi|

krodholkākulakapilair vivṛtya paśyan

keyūraṃ vyaracayateva dṛṣṭipātaiḥ|| 27 ||

tatratyaiś cakitataraṃ nirīkṣyamāṇā

sambhāvyatribhuvanaghasmarograśaktiḥ|

kṛtyeva bhrukuṭir atisphuṭā lalāṭe

sālvasya prasaradamarṣam ullalāsa|| 28 ||

yaj jṛmbhāprathima pṛthudhvajena vaktraṃ

vyādāyi truṭadacalendrarandhraraudram|

na prāpat katham api tatkṣaṇena tatra

trāsārtā kavalalavāpadaṃ trilokī|| 29 ||

jambhasya jvaladavikalpakalpitolkā-

kalkāktaṃ pravitataṃ āsyam anvahārṣīt|

taptāṃśoḥ pralayanavāvatāravelā-

paiśunyaprasṛtabilāvilaśri bimbam|| 30 ||

ākāṅkṣan samaram uraḥ karāvamarśe

pradyotaḥ sumukhanakhonmukhair mayūkhaiḥ|

ūṣmāṇaṃ kaṣitum iva prakopavahneḥ

svacchaiḥ sma cchurayati candanacchaṭaughaiḥ|| 31 ||

svedāmbupraśamavijṛmbhi vījanārthaṃ

yad babhruḥ prasabham abibhramad dukūlam|

krodhāgner adhivapur uccakair atṛpyan

saṃdhukṣīkaraṇam ivātatāna tena|| 32 ||

utkhātāhitakaṭakāṃ nivedayiṣye

kṣmām evātyucitam upāyanaṃ svabhartre|

prākārṣīd ata iva maṇḍanāṃ gado 'syā

vicchinnāṅgadamaṇihāramauktikaughaiḥ|| 33 ||

hantuṃ dviḍdvipakulaṃ āsyakandarāyāṃ

sāvajñasmitakiraṇacchaṭāsaṭaughaḥ|

huṃkāradhvanitagurur vyaloki mūrtaḥ

prothasya pratighaharir vrajan vijṛmbhām|| 34 ||

tanvāne tatakarapaṭṭapiṭṭyamāna-

krūrorudhvanitam udagaram ugrasene|

tatkālaṃ nibiḍam akāṇḍabhaṅgabhītāś

cakranduḥ pratininadacchalena kāṣṭhāḥ|| 35 ||

krodholkaiḥ sadasi sadasyadṛṣṭipātair

mā bhūd bhūḥ prasabham akāṇḍacaṇḍadāhā|

ity asmād iva vavṛṣetarām amarṣāt

svedāmbhaḥkaṇanikaraḥ karandhamena|| 36 ||

saṃtrasyatkṣititatadanti dantavakraś

cakre yad bhuvi karapaṭṭakuṭṭanāni|

sasmārāsuraripukelikolaghūrṇad-

ghoṇāgraprahatim ataḥ sphuratphaṇīndraḥ|| 37 ||

saṃtāpair gurudaśanādharacchidābhiḥ

pāṇyagraprakaṭalalāṭapaṭṭakāṣaiḥ|

mārṣṭi sma kṣitipacamūprasādhanāya

krodhāgnau nijabhujavīryarukma rukmī|| 38 ||

vyāvṛtya sthirabhujapīḍitoru yad yad

digvaktraṃ kṣubhitam udīkṣate sma tat tat|

dṛṣṭīnām analakaṇair akalkam aulkaiḥ

sauvalkaḥ sakalam ajijvalaj jvaladbhiḥ|| 39 ||

cikṣepa srajam abhijṛmbhamāṇamanyuḥ

kauravyaḥ kuvalayakalpitām urastaḥ|

saṃkalpākalitapuraḥsthitārisenā-

saṃhāraprakaṭitakālapāśaśaṅkām|| 40 ||

duḥṣeṇaḥ kaṭhinacapeṭapiṣṭaluṭhyat-

keyūrocchalitarajaśchaṭācchalena|

yat pluṣṭatribhuvanamaṇḍaloṣmamaṇḍaṃ

dordaṇḍāt tad anavamaṃ vavāma dhāma|| 41 ||

kṣmāpālāḥ kiṃ mṛṇālamradimasu malanaṃ nirdhunānā dharitrīṃ

krodhonnaddhāḥ kurudhve phaṇiṣu param itīvārthanārthena teṣām|

prāptāḥ pātālamūlāc chiduramaṇiguṇacchadmanā pādamūle

petuḥ pādaprahāraprabhavabharabhavadbhogabhaṅgā bhujaṅgāḥ|| 42 ||

itthaṃ saṃrambhajṛmbhāvibhavasarabhasabhrāntabhūyiṣṭhabhūbhṛd-

bhūriprāgalbhyabhīmābharaṇabhujabharair bhaṅgurastambhagarbhā|

sollāsaṃ lāsyavelladvikaṭaśivabhujādaṇḍaṣaṇḍotthavāta-

kṣubdhakṣoṇīdharakṣmāvalayavilasitaṃ sā sabhā sambabhāra|| 43 ||

kapphiṇābhyudaye mahākāvye sabhāsaṃkṣobho nāma tṛtīyaḥ sargaḥ||