Kāvyamālā 22, E Text Acharya

, ,
Known as: , (NCC).
Siglum: K

[description of manuscript]

More ▾

Title	Haravijaya
Commentary	[title of commentary]
Author	[author]
Commentator	[commentator]

Physical description
Language/Script	[Sanskrit in Latin script.]
Format	e-text
Material	digital

History
Date of production	unclear
Place of origin
Provenance	[record of ownership]
Acquisition	[how it was acquired]

ṣaṭcatvāriṃśaḥ sargaḥ|

sakālakūṭaṃ vahatīva yo galaṃ kalindakanyāsahitaṃ sahāryayā|

surasravantyāśca jalaṃ samīrayankaliṃdakanyāsahitaṃ sahāryayā||1||

ravibimbamivābhiniryadaṃśucchuritākāśamathāmunā raṇāgre|

dhanurācakṛṣe ripukṣayāya sphuṭaṭaṅkāracitāṃ śriyaṃ dadhānam||2||

(yugalakam)

so 'bhramadvitatakārmuko raṇe mānaśevadhirudāravājibhiḥ|

taccharaiśca girirarkatejasāmānaśe 'vadhirudāravājibhiḥ||3||

kṣayārkavaivasvatakālavahnibhiḥ kathaiva kā saṃharaṇakramodyataiḥ|

babhūva nātmāpyupamānamāhave durāsadatvena kapālamālinaḥ||4||

gaṇasenayā pratidiśaṃ tarasā prathamānayā sasmamayā ca tatam|

abhayaṃ surāripṛtanā samiti prathamānayā samamayācata tam||5||

raṇavartma himādrijāpatāvavateruṣyatha maṅgalecchayā|

surasadmabhuveva rambhaya rucirākhaṇḍalayajñayā jage||6||

śaśilekhayā śirasi yasya mugdhayā na vaśasya mānasamaraṃsta naddhayā|

tamavāpya vairipṛtanā nanāśa sā navaṃśasyamānasamaraṃ stanaddhayā||7||

viṣyandisāndrarudhirāruṇadhāturāga-

raktāni tasya viśikhairviśikāsanāstaiḥ|

kṛttānyaloṭhiṣata daityaśirāṃsi gaṇḍa-

śailaśriyaṃ dadhati kāñcanaśailaśṛṅge||8||

natalokahitakriyāsamānānavamā yasya titāṃsatāṃ sadastraḥ|

yudhi śaktimasau dviṣāṃ sma hartuṃ navamāyasyati tāṃ satāṃ sadastraḥ||9||

turagakhuraśikhānipātapiṣṭatridaśamahīdranitambadhūlipuñjaiḥ|

kapiśabalamathāmarāricakraṃ sphuṭamiva jāmbavadṛkṣasainyamāsīt||10||

senābhirasyākriyatāricakramahāsamājāvaniśaṃ sitābhiḥ|

yaśaśchaṭābhirdadhato 'tha lakṣmīṃ mahāsamājāvaniśaṃsitābhiḥ||11||

sasṛje śaravṛṣṭirandhakādyairditijaistatra vicitrahemapuṅkhā|

vimukhīkriyate sma sā patantī paṭuhuṃkāraravaiḥ svayaṃprabheṇa||12||

gīrvāṇavṛndamasurānadhisaṃyugorvi-

nāśakrameṇa samamardayataḥ samāyan|

matto mataṅgaja ivāśu sarojakhaṇḍa-

nāśakrameṇa sa mamarda yataḥ samāyān||13||

tadguptyai raṇabhuvi nandiṣeṇamukhyā daityendraṃ pratimumucurmahāstravṛṣṭīḥ|

śṛṅgīvātanukuliśāśribhinnasaṃdhistābhiḥ sa drutamatha bhaṅguratvamāpat||14||

yudhi bhānnihatena vairiṇā sa hi ḍimbena jaṭāsurājitaḥ|

atha bhīma ivābhyayuṅkta tānsahiḍimbena jaṭāsurājitaḥ||15||

ājaghnuratrāvasare 'tha daityagaṇādhipāḥ saṃgararāgabhājaḥ|

kodaṇḍasaṃvartakameghacakrakreṃkāragarjāravapūritāśāḥ||16||

jaghāna tāṃstridivabhido 'ripauruṣaṃ sa hāravānakalayato 'vadhānataḥ|

jigāya ca stanitamathāmbuvāhināṃ sahāravānakalayato 'vadhānataḥ||17||

śriyamāpa sa candraśālikāntāṃ ciramāsevitabhasmapāṇḍurāṃ saḥ|

sphuṭasaudhatalasthitāṃ tadānīṃ dadhadayodhanavartivīkṣitaśrīḥ||18||

nijaghāna nāsuravarūthinīṃ javānna batāyamānaki raṇaṃ samāśritām|

śriyamasya śūlamatanocca saṃdadhannavatāyamānakiraṇaṃ samāśritām||19||

śeṣaḥ kimeṣa na kimasya phaṇāsahasra-

mālokyate himagirirnanu niścalaḥ kim|

ityāhavābhimukhabhindukalāvataṃsa-

māyāntamīkṣya samaśerata daityayodhāḥ||20||

raṇamūrdhni vicitraśastrajālairvyadhamandānavasādino 'bhiyātān|

pramathā rabhasena yudhyamānā vyadhamandānavasādino bhiyā tān||21||

ghaṭitaparikaro 'tha nālikābhiḥ prakaṭitavistṛtakālakhaṇḍanābhiḥ|

divasa iva nipatya gṛdhracakrairyudhi pidadhe mṛtavigrahaḥ sa teṣām||22||

sa prāṃśurojasyasurānsma hantuṃ na hastirodhī yatate yave 'gāt|

senārajobhiḥ samare ca tasminnahastirodhīyata tena vegāt||23||

surāribāṇairatha hanyamānastadā cakampe na mṛgāṅkamauliḥ|

bhujaṃgabhīmaiḥ kṣubhitāmburāśestaraṅgabhaṅgairiva tīraśailaḥ||24||

sa surayuvatibhirmṛdhe vivalgannavaśavalannayanābhirabhramābhiḥ|

vidadhadasakṛdaikṣyata svakāntyā navaśabalaṃ nayanābhirabhramābhiḥ||25||

vakṣaḥ śilāhanamatheṣubhirullilekha

tasyāndhako 'dhiraṇasindhu vivartamānaḥ|

śṛṅgāgrakoṭibhiradhokṣajabāhuyantra-

mandīracakramiva mandarabhūdharendraḥ||26||

abhāji sakreṅkitamasya kārmukaṃ namatsareṇāvahitasya sādinaḥ|

raṇe pṛṣatkānkirato 'tha śaṃbhunā na matsareṇāvahitasya sādinaḥ||27||

taṃ jaghāna ripumattakāśinīvaktrapaṅkajavanakṣapākṛtā|

ardhacandraviśikhena dānavo maṇḍalīkṛtadhanuścyutena saḥ||28||

kīrtiṣvavasthitamanā bhāydo bhuvātha

sadyogajāsu ravadhūnitayā samāṃsaḥ|

kīrtiśriyā samuditaḥ samare cacāra

sadyo 'gajāsuravadhūnitayāsamāṃ saḥ||29||

prahlādādibhiratha sainyabhaṅgamājau paśyadbhistvaritamupetya daityanāthaiḥ|

jaghne sa triśikhakṛpāṇabāṇavṛṣṭyā kālābhrairiva śikharī sadhoragarjaiḥ||30||

raṇabhuvamajito 'vatīrya dhāmnā samaravi mardanatāṃ tatāṃ tadāpat|

tridaśagirirapi smarārisenāsamaravimardanatāntatāṃ tadāpat||31||

prasṛtavahniśikhāsaralāṅguliṃ sa yamahastamivātha śilīmukham|

yudhi sasarja ruṣā suravidviṣe sa vapurasya nināya kabandhatām||32||

sa guṇai raṇeṣvapi yaśaḥpaṭaṃ tato 'mṛduvāyaseṣu samado rasaṃ gataḥ|

rucimāndhanurmukharayandviṣañcamūmṛduvāya seṣu samadorasaṅgataḥ||33||

ekatra tridaśagaṇairabhidrutānāmanyatra pramathabalaiśca dānavānām|

kīrtyaivāhavabhuvamujjhatāmaśeṣāṃ paryāptā daśa kakubho 'pi no babhūvuḥ||34||

nākadviṣāmatha gaṇaṃ yudhi cakṛvāṃsa-

māyāsabhājamahitāntakaraṃhasaṃ tam|

tuṣṭāva sāmbarasadāṃ muditāvarugṇa-

māyā sabhājamahitāntakaraṃ hasantam||35||

daityānīkeṣvāyasasaṃnāhanipātādākarṇyoccaistārakhaṇatkāramasīnām|

sasmāraugho nākasadāṃ parvatapālīpakṣacchedakrūravirūkṣadhvanitānām||36||

sa mānayāmāsa dṛśāsamānayā samānayā saṃyati bhāsamānayā|

samānayādreḥ sutayāsamānayā samānayāto 'virahaṃ samānayā||37||

ditijasamitināyakena tasminnatha raṇavāsagṛhe viluptamānā|

kusumaśararipoḥ priyeva bhejenavanakharājividāritorudaṇḍā||38||

sa mānasīmāttasamānasīmā sindhorvidhāyārijanasya pīḍām|

hasanniveśaṃ sahasanniveśaṃ sphuratkapolāmalakāntirasthāt||39||

nirāsa taṃ bāṇagaṇairgaṇādhipastato 'sya tenāpratimena karmaṇā|

jagāma vailakṣyagṛhītatanmukhatviṣeva sārdhaṃ paripāṇḍutāṃ yaśaḥ||40||

akṛta yudh ivināyako vidviṣāṃ na ca kmatanutāpadāvaṃ citam|

mṛtamamaravadhūḥ śritā vibhramānacakamata nūtāpadā vañcitam||41||

bhogīndrabhogāyatabaddhaśobhapraveṣṭanābhiḥ sa raṇājirorvyām|

vyarājata kṣīrasamudramanthasarambhasajjīkṛtamandaraśrīḥ||42||

mukhaśriyaṃ bibhradasau vinirjitasvaruṃ tu dantena samānanāgatām|

jaghāna meghānvyatipetivānraṇe svaruṃtudaṃ tena samānanā gatām||43||

stamberamā vinihitāñcitacīnapiṣṭa-

vispaṣṭapāṭalimasaṃbhṛtakumbhaśobhāḥ|

saṃbhāvitāḥ pradhanamūrdhni dadhurmadāmbhaḥ-

saṃbhāriṇo gaṇapateḥ parivāralīlām||44||

kathamapi sānakapaṭahā raṇabhūmīḥ prāpya varcasā na kapaṭahā|

sthagitāśo 'bhanagaṇḍaṃ druhiṇasya dadhanmukhaṃ sa śobhanagaṇḍam||45||

vyacarattarasātha ṣaṇmukho yudhi śaktyobhayarūpayā śritaḥ|

asamārcirivāhutīrvahansphuṭasaṃpannavaṣaṭpadāḥ srajaḥ||46||

surayuvatijanasya tatra nānāsurabhidi vibhramadakṣatāmalāsīt|

śriyamatanuyaśaśca tasya śrubhraṃ surabhi divi bhramadakṣatāmalāsīt||47||

saṃvartameghamalinā dadhato 'tha taikṣṇya-

makṣuṇṇapāṭavajuṣaḥ pratipakṣabhede|

tasyodaghāniṣata daityabhaṭāḥ kṛpāṇa-

paṭṭāśca gāḍhaparivāragaṇāḥ svasainyaiḥ||48||

raṇāṅganorvīṃ dadhadāhitonmadadvipakṣayo dhāma sa kṛttadānavaiḥ|

cakara bāṇairbahulāsutaḥ skhaladvipakṣayodhāmasakṛttadā navaiḥ||49||

niḥśeṣāṃ sakanakakambunetraśobhaḥ śaṅgrāmāvanikalaśīṃ viloḍya śatroḥ|

rīḍhābhiḥ prakaṭitasāra eka uccairvaiśākhaḥ sapadi babhūva bāhudaṇḍaḥ||50||

daityānahimahima himataro 'ddhā roddhā dalayati yatibhayatdṛdyaḥ|

tdṛdyaḥ sa jagati gatitdṛdasaṃkhye saṃkhye kṛtaratiratigururāsīt||51||

mahājigoṣṭhīpratibaddhasauṣṭhavairvidagdhalokairiva karṇaśālibhiḥ|

tadāhave satkavikāvyapāyibhirdadhe mukhaśrīḥ pṛtanāturaṅgamaiḥ||52||

sa senayā jaganmanomṛdurvaśīkayā jitaḥ|

aviskhalaṃstadā ruṣāmṛdurvaśī kayājitaḥ||53||

gurumuṣṭighātaparipīḍitaṃ javādvinipātya vṛtramatha kuñjarānanaḥ|

paraśuprahāravikaṭavraṇorasaṃ sa sahasramāyamakarotparāṅmukham||54||

kedārayantaṃ samadantamālamarātilokaṃ śaralāṅgalānām|

ke dārayantaṃ samadaṃ tamālanīlaṃ hariṃ jetumalaṃ babhūvuḥ||55||

savisarāsurasāravasāsave suravaro viarāsurasāsravaḥ|

sa varavīravasāvuruvairisūravasare virasaṃ virarāsa saḥ||56||

(tryakṣaraḥ)

maṇiśatakarabhāsurāṅganānāṃ ditijacamūghaṭamānasaṃsadaṃ saḥ|

akṛta ca samaraṃ surāṅganānāmatanu dadhacchucimānasaṃ sadaṃsaḥ||57||

jetā vegāṃstīvrabhā vāyavīyānvṛtrarāterbaddhabhāvā yavīyān|

śrutvātdṛṣyattatra cāṇūrapīḍāḥ prākkartāsau dṛptacāṇūrapīḍāḥ||58||

bhātyākāśaśyāmale yasya dehe vāsaśchāyā sannavā pītaraṅgā|

paryaṣkāri dvārikā yena pūrvaṃ nānāharmyāsannavāpītaraṅgā||59||

raṇe natā yena riporvarūthinī sahāsamāsannavadhe 'nukampitā|

śaśaṃsa yaḥ sīriṇamahavakriyāsahāsamāsannavadhenukaṃ pitā||60||

saṃpratyarātipṛtanāḥ sahasā vijitya

tā rakṣa vīra samare cakitāḥ samāyāḥ|

ityarthivāgbhirajahātsa tu tāstatīrna

tārakṣavīrasamarecakitāḥ samāyāḥ||61||

vahati karatalena baddharāgaṃ raṇadali tāmarasaṃ ca yaḥ sahāsam|

yudhi mayatanayo 'munā nijaghne raṇadalitāmarasaṃcayaḥ sahāsam||62||

nākaukasāṃ vidadhatīḥ pṛtanāstadānīṃ

vyāpāryamāṇakaravālalatā nikṛttāḥ|

senāḥ śarairdanubhuvo 'nugato balena

vyāpāryamāṇakaravālalatā nikṛttāḥ||63||

diśi diśi śamayadbhirdūramanvīyamānaṃ

divasakaramarīṇāṃ cāmarairvījyamānam|

samiti ripugaṇo 'nyairnātisaṃrambhavegā-

diva sakaramarīṇā cāmarairvījyamānam||64||

sthitavati tatra goptari bhaṭaistridaśāṅganābjinī-

savitari tuṅgatodayamanekaparājayorjitāḥ|

ditijagaṇasya bhītimatidurdharatāṃ dahau kriyāḥ

sa vitarituṃ gato 'dayamanekaparājayorjitāḥ||65||

bibhradbhujau muraripuḥ pratipakṣabhānu-

rāhū tadā navacamūravadhūyamānāḥ|

āśiśvasatsumanasāṃ pṛtanāścamūbhi-

rāhūtadānavacamūravadhūyamānāḥ||66||

tridivavartma ghaṭitānsahasāhitakampayā

samadanāgamatayā tarasā rathino dadhau|

raṇamayagahane valinā ruruce śriyā

samadanāgamatayātarasārathinodadhau||67||

puropavanapaddhatīrvasatirambarastrīśriyā-

madhūnitarasāpapāvanatamānasānuttamāḥ|

pravi'sya ca ratotsukā navatamālavalligṛhaṃ

madhūnī tarasā papāvanatamānasānuttamāḥ||68||

sa saṃyati patattriṇāṃ nijarucārikāntīrjaya-

nnamandarasamāṃsadorjitamadaḥ samāyojayan|

vyathāmagamaduddhato ditijamaṇḍalaṃ mṛtyunā

namandarasamāṃsadorjitamadaḥ samāyojayan||69||

diśi diśi vīrabhadra ucitānniveśya pṛtanābhaṭānvidalaya-

npramathanavastuto 'tra samatāsakhedamakarodarātigajavān|

vigalitasaṃprahārarabhasaṃ dadhānamamarārisainyamatanu

pramathanavastutotrasamatāsakhedamakaro darātigajavān||70||

saśrīmānamṛdurnisargagahane darpānnikṛttadviṣo

vaṃśyaścāruyaśastadā dadhadadhaḥ sadyo hṛtaśrīripoḥ|

dattārgho nayamārgagocaraguṇaḥ puṣṭībhavanmāraṇe

sevānamralasatkarāñjalipuṭairvītāriśaṅkaṃ suraiḥ||71||

itthaṃ durdharadarpadordrumatayā mṛdnaṃścamūrātatā

bhāsvānsānumati kṣapā iva tadā sūdāraśobhānugaḥ|

ṭāṃkārairvyathitārisaṃhati dhanurvratyā (rvrātā)ttakīrtī raṇe

yatnāsañjitaśiñjinīkasaraṭaḥ kāmaṃ tamavyaṃsayat||72||

(yugalakam)

"śrīdurgadattavaṃśyaḥ sahṛdayagoṣṭhīrasena lalitāṅkam|

idamamṛtabhānusūnurvyadhatta ratnākaraḥ kāvyam||"

(ityetadutthāryā)

āsanraṇe vidalitāḥ kariṇā yaśāṃsi

mandā radā mahati bhīrucite 'napete|

rāgāmbudhau muditadevavadhūkṛtābhi-

rmandāradāmahatibhī rucitena pete||73||

raṇabhuvamadhunā jayāśaṃsayā dordrumālambano dārayanvidviṣo 'tyūrjitā

nanu vikaśalitāpadosannayā saṃgarakṣobhayā nuttamoheti bhīrūḍhayā|

nanu vikaśalitāpadosannayāsaṃgarakṣobhayā nuttamohetibhīrūḍhayā

kimiva bata bhiyetibherīravairabhyadhāyīva koṇāhatiprastutairyudbhuvā||74||

(caṇḍavṛṣṭiprapātadaṇḍakena garbhayamakam)

itthaṃ vīrāhatasuracamūrdattahastāvalamba-

svargārohipramuditabhaṭāstasya nākārisainyaiḥ|

ścyotaddānāsavasarabhasāpānalolālimālā-

sāndracchāyāsitamukhapaṭoddāmadikkuñjaraśrīḥ||75||

nānādhutyāgapakṣe sabharasarabhasakṣepagatyā dhunānā

nādāsaktāraṇatrāviralabalaravitrāṇaraktā sadānā|

nādhāvatsādipakṣetarasarasaratakṣepaditsāvadhānā

nāhāsaktārirugbhīmudasarasadamugbhīruriktā sahānā||76||

(sragdharayānulomapratilomābhyāṃ cakracatuṣṭayam)

tāvacca śaṃbhubhṛkuṭī nibhṛtaikamukhyā

saṅgrāmakānanakarālatamālavallyā|

cāmuṇḍayā vikaṭavikramasindhuvīcyā

prāstāvi daityadalane yudhi ko 'pi kopaḥ||77||

vigalitadānavasārthaṃ bhayaśuṣkakarīndrakaraṭadānavasārtham|

cakre 'ndhitāndhakabalaṃ tayā samīkaṃ yamasya bāhukavalam||78||

caṇḍīdordaṇḍacaṇḍaprasarasarabhasottambhitāstraprabandha-

vyāpārāpārasīdadditidanutanujānīkasaṃkīrṇamadhyā|

jajñe sā tatkṣaṇena kṣatajanadanadīmagnasūdvignalagna-

prāṃ'sustamberamāśvā samaravasumatī krīḍanaṃ kārarātryāḥ||79||

sārāviṣṭābhisārā janitatatanijakrodhadīprāvasārā

sārāvaprāsiśūrāharaharaṇarahaḥ svargakanyā viśālāḥ|

śālāvinyāyakaśrīranamamamanaravrātayuktā samāsā

sāmāsaktā yadāsīdamataśatapadacchedavṛṣṭāvirāsā||80||

(ṣoḍaśadalapadmabandhaḥ)

ratnādrau caṇḍikāyā vikaṭakarikaṭāṭṭālakuṭṭākakoṭi-

truṭyaṭṭāṃkāriṭaṅkakrakacakarakarārāvagurvī raṇorvī|

pre"khatkhaḍgāgrakṛttaprakaṭabhaṭaśiraḥ pīvaraskandhacakra-

krīḍānyañcatkabandhakramavidhuradharādhāribandhā tadābhūt||81||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye icaṇḍikāsamarākṣepo nāma ṣaṭcatvāriṃśaḥ sargaḥ|