Kāvyamālā 22, E Text Acharya

, ,
Known as: , (NCC).
Siglum: K

[description of manuscript]

More ▾

Title	Haravijaya
Commentary	[title of commentary]
Author	[author]
Commentator	[commentator]

Physical description
Language/Script	[Sanskrit in Latin script.]
Format	e-text
Material	digital

History
Date of production	unclear
Place of origin
Provenance	[record of ownership]
Acquisition	[how it was acquired]

aṣṭāviṃśaḥ sargaḥ|

atha tapanabhayānniśāṅganayāḥ śaśadharamaṇḍaladarpaṇe 'stasānau|

uṣasi nipatite navoḍupaṅktitsarumaṇiśṛṅkhalayānyato viśaśre||1||

abhimatajanabhāviviprayogajvaravidhurā vidadhe yadāravaiḥ strī|

akṛta hṛdayaśūnyatānurūpaṃ tadavasitakṣaṇadāhato mṛdaṅgaḥ||2||

dayitatamabhujopadhānalīlāsukhaviniṣaṇṇatanurnisargamugdhā|

na khalu kila vibhāvarī gateti kṣaṇavinimīlitadṛṣṭireva tasthau||3||

sapadi vigalitaprabhenduvaktrā śithilagatiḥ smaraśaṅgināṃ triyāmā|

tanutimiraniruddhatārakaśrīratha rataye na babhūva yātayāmā||4||

alamativalanena dehayaṣṭeḥ sutanu tanustava bhaṅgameti madhyaḥ|

iti kalaraṇitena kambupaṅktiḥ sadṛśamivābhidadhe vijṛmbhamāṇām||5||

dṛḍhataraparirambhavibhrameṇa priyahṛdaye hṛdayaṃ tadā natabhrūḥ|

drutataramiva bhāviviprayogakṣatadhṛti saṃgamayāṃcakāra kācit||6||

babhuratanudṛśāṃ tathā na pūrvaṃ satilakapattralatāḥ kapolabhāgāḥ|

pratiyuvativirūkṣakākṣidṛṣṭāḥ priyadarśanāṅkabhṛto yathā prabhāte||7||

udayagiritaṭe tirohitasya sphuṭamiva mātumaśeṣamaṇḍalamūrdhvam|

viratitatamasaḥ karāḥ śitāṃsordrutamudahāsata hāsitāravindāḥ||8||

adhigamanatalaṃ parisphurantī kapiśitakauśikadiṅmukhā babhāse|

dinakararathabandhatāntabhogiśvasitakṛśānuśikhālīva saṃdhyā||9||

udayaśikhariśṛṅgamuṣṇaraśmiḥ pracuratarā vidhutāpadastadānīm|

sarabhasamabhajanniśāvaśāne sapadi diśastadabhīṣavaśca dīrghāḥ||10||

dadhati dṛḍhatamaṃ tamāṃsi māṃsīmalanamalīmasabhāṃsi māṃsalatvam|

uṣasi cakarire vibhākarasya pralayavibhāvasubhāsuraiḥ karāgraiḥ||11||

pratikakubhamadhogalanti saṃdhyākapiśitabhāṃsi kulāni tārakāṇām|

vidadhati bhuvanāravindakoṣacyutamadhuśīkarabinduvṛndalīlām||12||

divasagajapatermṛgāṅkalekhādhavalamṛṇālasanāthapuṣkarasya|

śriyamabhimukhamāpa cīnapiṣṭaprakarakarālarajaśchaṭeva saṃdhyā||13||

gaganamakuruta prabhābhirudyannavaśavalannayanābhiruṣṇaraśmiḥ|

uṣasi dadṛśire ca kāminībhiḥ sarasavivartitakaṃdharaṃ yuvānaḥ||14||

pratidiśamuḍuratnarāśayo 'tha stimitatamobhiduratviṣaḥ praṇeśuḥ|

dinakarakiraṇaiḥ samunmiṣadbhiḥ sapadi kuvaikaṭikairivānuviddhāḥ||15||

sphuritabahulasāṃdhyarāgavahnau satimiradhūmaśikhe 'mbarāmbarīṣe|

uṣasi viralabhṛjyamānalājāśriyamuḍusaṃhatayaḥ kṣaṇaṃ vitenuḥ||16||

madavigalitalajjayā yuvatyā dayitahṛtāmbarayāsmi na vyapāstaḥ|

iti pavanavighūrṇitaḥ prabhāte pramadavaśādiva nṛtyati sma dīpaḥ||17||

sphuradamalaruciḥ prabhātavelā diśi diśi saṃdadhatī prabodhajṛmbhām|

prasaradatanusaurabhābhirāmā śriyamamalāmaravindinīva dadhre||18||

diśi diśi makarandapānalobhādrutamupari bhramaraiḥ paribhramadbhiḥ|

pyadhiṣata kumudāni bhānavīyaṃ karaparimarśamivābhito niroddhum||19||

adhiśiṣayiṣamāṇapyadhatta bhramarakulaṃ nalinīṃ tathaitya dūrāt|

kṣaṇasamayamalapsyatāvakāśaṃ taruṇiruco na yathāśu tāṃ vibhettum||20||

dalitakamalakuḍmalābhirāmasphuṭatarasaurabhavāsito nabhasvān|

salilamabhisaransaroruhiṇyā hṛdayamivotkalikākulṃ cakāra||21||

vyarucadatha sarojinī manojñasthiticaturabhramarā sahaṃsapakṣā|

sphuritaviśadaśobhinālapadmā sattamasaṃyutahastasaṃhatiśrīḥ||22||

taraṇikiraṇadaṇḍaghaṭṭanābhirvighaṭitasaṃtamasatvaco 'mbarasya|

sphuradaruṇakarātapacchalena kṣatajamiva pratibaddhamāvirāsīt||23||

daduruṣasi vinidrapuṇḍarīkaprakaraparagapiśaṅgitāntarikṣāḥ|

avirataramardatāntakāntākucakarajakṣatinirvṛtṃ samīrāḥ||24||

dinakarakaraghātatāḍitaṃ sadrajanijalāśrupariplutaṃ tadānīm|

kumudanayanamāśu kairaviṇyāḥ prabalarujeva kṛtavyathaṃ nyamīlat||25||

udayati haridiṅmukhāruṇāmbhaḥ sarasaviśeṣakabindumaṇḍaler 'ke|

stimitatamatamālakhaṇḍanīlairatamitamāmabhitaistamītamobhiḥ||26||

kramavighaṭitaśārvarāndhakārasphuṭatarakūṭaviśaṅkaṭaṃ tadānīm|

diśidiśi dadṛśe 'mburāśimadhyāttvaritamivottaradadricakravālam||27||

anukṛtabhujagendrabhogaśayyāsukhaviniṣaṇṇamurārinābhicakram|

śriyam uṣasi saraḥ sadarpasarpanmadhukarakampitapuṇḍarīkamāpat||28||

dinakarakiraṇapravālavallīvalayabhṛtaḥ shuritoḍupāttaśobhāt|

bhuvanapulinasīmni bhāsuraśrīrdivasamaṇiḥ prasasāra kālasindhoḥ||29||

kumudamuṣasi saṃkucatsakhedaḥ kamalamaho vikasatprahṛṣṭacetāḥ|

ubhyaravisaṃsthulo rasāyurmadhuramadhusrutinirbharaṃ lileha||30||

udayagiriśikhāgavākṣabhūmau bhuvanavilokanakautukāvasaktam|

mukhamiva divasaśriyo vireje dhṛtanavakuṅkumalepamarkabimbam||31||

atha

viśadahimāṃśuraśmibhinnasphuṭadalasaṃdhivimuktabaddhabhṛṅgam|

uṣasi kumudakānanāyamānaṃ kamalavanaṃ bibharāṃ cakāra lakṣmīm||32||

mrdumarudavadhūtapakṣmapālībharavigalanmakarandapaṅkileṣu|

madhumadavivaśaiḥ kuśeśayanāṃ dalaśikhareṣu śilīmukhaiścakhañje||33||

pravighaṭitadalārari prabhāte mukharaśilīmukhamaṅkhacakravālam|

na kamalapuṭabhedanaṃ na cakre divasakaraḥ sthitidhāma cāru lakṣmyāḥ||34||

sphuṭamadhigatasaṃbhramā bhavantyaḥ śaśini lilambiṣamāṇadhūmrabimbe|

uṣasi mṛdusamīraghaṭyamānā viśadamavepiṣatāśu kairaviṇyaḥ||35||

vikasitamavalokya puṇḍarīkaṃ viracitasaṃhati saṃmadena tāvat|

madhuramadhupipāsayā patadbhirbhramarakulairdudhuve patatrapaṅktiḥ||36||

tadanilarayakampikesarāgraskhalitarajaḥsthagitekṣaṇā na yāvat|

dadṛśurapi sadeśavarti tatte ślathayati kātaratepsitārthsiddhim|||37||

(yugmam)

kamalamukulapañjarodareṣu pratihatiroṣavidhūtakesarāṇām|

pratidiśamudajṛmbhata praṇādo madhukarakesariṇāṃ vinidritānām||38||

kṣititalaśayanotthitasya paṅkaplavamalinaṃ karaṭasthalaṃ kareṇoḥ|

madhukaranikaro jahāvasādhuvyatikarato nahi kiṃcidasti sevyam||

navayavayavasānavāptikhedātkhuraśikharaiḥ khuradhāraṇīrlikhantaḥ|

jahuratha parivardhakopanītaṃ vikaṭakaḍaṅgaramāśu ghāsamaśāḥ||40||

drutataramavatīrya vāsayaṣṭerbhujagabhujaḥ pratimāgataiḥ śikhaṇḍaiḥ|

vividhamaṇimayīrivāśu cakrurnṛpatigṛhāṅganaratnakuṭṭimaurvīḥ||41||

aviramadanunāsikābhirāmasphuṭataratāvirāvakuñcitāṅghriḥ|

avirati virurāva tāmracūḍaḥ sphuritanatonnatakaṇṭhakaṃdharāgraḥ||42||

ravikaraparimarśabaddhanidraṃ tadudarasaṃkaṭayantritā dvirephāḥ|

vighaṭitadalasaṃpuṭaṃ tathaiṣurbharacalitā nijavigrahapraṇodaiḥ||43||

kumudamapi yathā kṣaṇaṃ vinidraṃ sapadi tadutplavanānukūlamāsīt|

nanu vipadi viṣādadurgatānāṃ kimiva hi dustaramasti saṃhatānām||44||

(yugalakam)

drutamayamavamocayatyapāsya cchadapaṭalodarayantraṇāṃ ravirvaḥ|

iti kalaraṇitairivāmbujānāmupari caranmadhupānuvāca bhṛṅgaḥ||45||

dalitsakalaśārvarāndhakāraḥ kṛtaparabhāgaguṇaṃ saroruhiṇyāḥ|

kamalamanayadunmukhatvamarkaḥ sphuṭadalamaṇḍalasacchriyāśu dīptyā||46||

diśi diśi vihagāstanūḥ samantādanalasapakṣatayopacīyamānāḥ|

uṣasi jigamiṣākulāstadānīṃ dayitaviyogadaśā vadhūśca dehuḥ||47||

kṣapitataruṇakhañjarīkaṇṭhasphuṭatarabindumalīmasāndhakāraḥ|

śriyamabhṛtatarāṃ sahasraraśmistribhuvanmaṇḍalapuṇḍarīkabimbaḥ||48||

śaśadharamaṇisālabhañjikābhirbhavanaviṭaṅkaṭaṅkitābhiḥ|

dinakarakiraṇāhatābhirindau vinipatite śuśuṣe śuceva sadyaḥ||49||

akṛta kumudinīvikāsamārādahatatamaskamamīlitāravindam|

nabhasi vigalitaprabhaṃ himāṃśoḥ payasi ca bimbamabhinnarūpamāsīt||50||

sphuṭadalamaṇiśuktigarbapītasphuradaruṇātapaśīdhuśīkaraughaḥ|

madavivaśa iva prabhātavātavyatikarataḥ kamalākaraścakampe||51||

tvaritamadhisarojini vrajantī madhupatatiḥ kumudākarāccakāśe|

divasakarabhayātpalāyamānā timirapariplavadhūsareva rātriḥ||52||

vikaṭabhujagaśṛṅkhalāvanaddhaṃ sapadi rathaplavamaryamādhirūḍhaḥ|

grahamaṇinicayaṃ jighṛkṣurāpa sphuṭa iva potavaṇiṅnabhaḥsamudram||53||

śakunibhiradhiśiśriye vanorvī sphuṭamadanānaladāhatāpayogām|

sthitimupadadhatī manorathaiśca tridaśavadhūjanatoṣasi vrajantī||54||

upagatamaparatra vāsateyīṃ drutamapavāhya punaḥ prabhātakāle|

krudha iva ravimakṣamekṣituṃ dyauravanatamindumukhaṃ ciraṃ babhāra||55||

dinakaramuditaṃ nirīkṣya candraḥ sphuritatadaṃśuśikhāvamarśabhītām|

sphuṭahariṇanibhena rātrimaṅke dadhadiva saṃbhramato 'staśailamabhyait||56||

tribhuvanavipine kaṭhorabhāsvatkiraṇakuṭhāranuipātalūnamūrteḥ|

sphuṭamalamadhupo niśālatāyā rajanikarastabakaḥ krameṇa mamlau||57||

dayitatamamamuṃ vidhūya tejo dinakara mā paribhūrniśākaraṃ me|

iti viracitakuṅmalāñjaliśrīstamatiśuceva kumudvatī yayāce||58||

madhukarapaṭalīṃ madhuspṛhāndhāmupari kuśeśayinī paribhramantīm|

aracayaduṣasi priyasya bhānoḥ kuvalayavandanamālikāmivārāt||59||

viśadamadhurasāraṇānubandhakvaṇadalisaṃhativallakīninādaiḥ|

janitasukhamiva kṣapāvasāne kumudavanaṃ pratipannanidramāsīt||60||

sarasijamukulasya pārśvabhūmermadhukarapaṅktirupāttamadhyabhāgā|

haritamaṇisamudrakasya kṛṣṇā śriyamabhṛta prakaṭeva sāṃdhirājiḥ||61||

adhiniśamavanerapūrayadyānkapiśitadigvalayaṃ tamo 'vakāśān|

na tapanarucibhiḥ pupūrire te bata malinasya hi bhūyasī vibhūtiḥ||62||

k.apitarajanirāgato 'paratra prakaṭitarāga na lajjase karairmām|

spṛśasi yadadhunā jahīhi kasya tvamiti dinātyayakhaṇḍanāṃ smarantī||63||

viralaviṣamapattrasaṃsthamabjaṃ caladali pallavahastacāru kṛtvā|

bhramaravirutibhirjagāda serṣyā tapanamitīva sarojinī saroṣam||64||

(yugalakam)

śaradiva divasāvatāralīlā sakalamakāśatayā śriyānvitāsau|

kṣatatimiramalā nināya dūraṃ sarita ivāśu diśaḥ prasādalakṣmīm||65||

prakṛtiśucitayā parāvamarśaṃ sapadi visoḍhumivākṣamābhirārāt|

spṛśati dinakare karaiḥ sarāgaṃ diśi diśi saṃkucitaṃ kumudvatībhiḥ||66||

aruṇakiraṇadaṇḍaghaṭyamānasphuṭatimiraughaviṣā niśābhujaṃgī|

grahagaṇamaṇimaṇḍitā tadānīṃ vigalitacandramarīcikañcukāsīt||67||

divasaviratikhaṇḍanāparādhasmṛtisaruṣo 'mbhasi bimbito 'mbujinyāḥ|

nyapatadanuninīṣayaiva bhāsvānaruṇadalāṅgulipādapadmamūle||68||

nipatati śaśimaṇḍalaṃ hahā kiṃ nabhasi na dṛśyata eva tārakaughaḥ|

kumudavanamitīva garbhabaddhabhramararavairatha paryadevatārāt||69||

sphuradaruṇaśikhābhirāmayoccairuṣasi vikāsitapadmayāṃśumālī|

tridaśapatipureva sṃdidīpe viśadamarīcitayā śriyollasantyā||70||

drutakanakasacchaṭābhirāmasphuradaruṇāṃśuśikhāvarugṇamūlaiḥ|

pratidiśamatha caskhale tamobhirgaganajalāśaya kāsarāyamāṇaiḥ||71||

grahamaṇiśabalaṃ nabhaḥsamudraṃ sapadi lilaṅghayiṣurnidāgharaśmiḥ|

diśi diśi vicakāra dairghyabhājaḥ plavanarasādiva dūramaṃśubāhūn||72||

divasakarakarāhataṃ tadānīmadaśanapaṅkti kṛtāvabhāsahāsam|

amadhumadakṛtāmadhatta tāmratviṣamaravindamukhaṃ kuśeśayinyāḥ||73||

uṣasi ghanatarāndhakārapaṅkavyatikaramārjananirmalaṃ karāgraiḥ|

akṛta divasadarpaṇaṃ trilokyāḥ sapadi vilokanayogyamaṃśumālī||74||

kumudavanamalaṃ vyayoji lakṣmyā mudamajahādatikhedavānulūkaḥ|

pralayamupajagāma tārakaughaḥ sapadi vidhau vidhuratvamabhyupete||75||

sphuradaruṇapalāśatālu bibhrannavaghanasaurabhatāmupoḍhanidram|

kamalamukhamajṛmbhatābhirāmaṃ sphuṭatarakesaradantamambujinyāḥ||76||

gurukalaharatālasacchriyoccaiḥ kṛtamakarandarasaspṛhā nalinyā|

diśi diśi gurunṛttalīlayeva bhramaraghaṭākulitā mithastadāsīt||77||

madhulihi makarandapānalobhādvikasitatāmradalāgrabhāgalagne|

dinakṛti kamalekṣaṇaṃ nalinyā racitakaṭākṣamivodvavāha lakṣmīm||78||

kṣayasamayasamīraṇābhighātakṣubhitamivātha mahāsamudramadhyam|

abhavaduṣasi jihbhyamānakānti sphuṭataralakṣmamalaṃ mṛgāṅkabimbam||79||

udayaśikhariśṛṅgavedikāyāṃ navarudhirāruṇakānti bhānubimbam|

anukṛtadivasapraveśalakṣmīprasavaviśaṅkaṭagarbhaśayyāmāsīt||80||

navavinihitacīnapiṣṭacarcācchuritaviśeṣakabindubhānubimbam|

mukhamabhṛta tiraskṛtendukānti sphuradaravindavilocanaṃ dinaśrīḥ||81||

uṣasi vigalitāndhakārapaṅkaplavaśabalaṃ dhanavartma dūramāsīt|

madhurataraṇitāpayogatāraṃ kamalavane madhupāyināṃ ca paṅktiḥ||82||

aviralaśikhigarbhabhānavīyasphuritamarīcivitānadhāvyamānam|

dinamabhajata sarvato 'gniśaucaṃ vasanamiva kramaśo 'tinirmalatvam||83||

diśi diśi divaseśvarasya pādyasthitimiva paṅkaminī rasena ditsuḥ|

navakisalayapāṭalānvireje kamalakarāgrapuṭānprasārayantī||84||

uditavati divākare 'staśailadviradapatiḥ kumudacchaṭāvadātaiḥ|

śriyam atanuta bhūribhūticarcācchurita

ivāmṛtadīdhitermayūkhaiḥ||85||

guruvirahaśucā kuśeśayinyāścakita iva kṣaṇadāmbubāṣpabindūn|

vipuladalavilocanāntarālāduṣasi karairahimāṃśurunmamārja||86||

śriyamabhṛta divākaraḥ prabhāte gaja iva bhinnakarāladhāturodhāḥ|

sphuradaruṇakarābhighātabhagnapracuratamālasadañcitātanuśrīḥ||87||

diśi diśi japatāṃ navārkaraśmicchuraṇavipāṭaladantamālamāsyam|

śriyam anucitagāḍhanāgavallīdalakṛtarāgamiva vrate 'pyavāpat||88||

udayagirigate sahasraraśmau navakapiśā divasāvatāralakṣmīḥ|

sphuritasarasanālikābhirāmasthiticaṣakānucakāra

pānagoṣṭhīm||89||

prakaṭakuliśakuntacakrabhāsvatparavalabhīhitamattavāraṇāṅkā|

diśi diśi dadṛśe niśāntapaṅktiḥ samaravimardabhuvaṃ viḍambayantī||90||

amṛdu mamṛduṣā ni'sātamastadvyatikaradoṣamalīmasatvamāptāḥ|

sphurāruṇarucā ruṣeva dūraṃ divasakareṇa nirāsire daśāśāḥ||91||

udayagirimathodito vivasvānvicakariṣuḥ kiraṇair niśāndhakāram|

sphuradaruṇimabhiḥ karairakārṣīddavadahanairiva ruddhasarvadikkam||92||

grahapaṭalamaśe.amūṣuṣībhirdinakaradīdhitibhiḥ kṛtābhighātam|

timiramapādantarikṣamārgātkuvalayavṛndamivābhranirjhariṇyāḥ||93||

kṣitidharatanayeva pūritāśā prahatanirargaladundubhipraṇādaiḥ|

śriyamabhṛta niśāvasānalīlā navamaharāgamasaṃmadaṃ vahantī||94||

vighaṭitatimiraughadigvibhāgaprakaṭanabhasyabhavanniśāvasāne|

sphuṭadalanamanāśca padmakhaṇḍāḥ sapadi himetaradīdhitiśca teṣām||95||

diśi diśi niśi saṃbhṛtaṃ karāgraistimiramanargalamaryamācakhaṇḍat|

kṣaṇamapi sahate nahi pragalbhāṃ kvacidahitasya puraḥ sthitiṃ mahasvī||96||

sphuradaviralakesarārgalāṅkaprakaṭapalāśakavāṭapadmagehāḥ|

madhupaśabarasaṃniveśapallyo diśi diśi śiśriyire śriyaṃ nalinyaḥ||97||

dayitamatiruṣā vilokayantyaḥ sarasavipakṣanakhakṣatāṅkitāṅgam|

abhavadaruṇitākṣṇi tatra nūnaṃ nivasati cittabhuvaḥ pratāpavahniḥ||98||

pramadagalitatārakāṃśuśārīkṛtarucirodarabāṣpabindubhaṅgyā|

abhisarati rasārdratāṃ vidhitsurdrutamaparāparanetramaṇḍalīva||99||

vikasanarabhasena hṛtprave'saprasaramivābigatasay dātumantaḥ|

apasaratitarāṃ rasātibhārasphuṭataramantharitāpi pakṣmapaṅktiḥ||100||

sarabhasamapi tārakaḥ kathaṃcidvrajati na yāvadapāṅgavartma dīrgham|

saratisapadi tatprabhā purastāccirapi tāvadivākṣamā visoḍhum||101||

iti dayitavilokanābhilāṣasphuraṇapṛthūbhavadātmanastaruṇyāḥ|

smaraśarataralākṛterjajṛmbhe nayanayugasya sarāgavibhramā śrīḥ||102||

(cakkalakam)

śrutipathajuṣi tāratūryanāde taraladṛśamalasaṃ vikāsalakṣmīm|

yadukulamiva netrayugmamāpnodanavamakṛṣṇavalakṣatābhirāmam||103||

pramadabharabhṛtaḥ kapolabhāgātkamaladṛśo 'gurupaṅkapattrabhaṅgaḥ|

vyagaladatanubāṣpapātabhinno nanu malinasya kutaściraṃ vyavasthā||104||

prathamamatanurāgasaṃpadaṃ tāṃ caramamanujjhitapūrvarūpaśobhām|

uṣasi rucamavāpya sādhumaitrīṃ na khalu tarāṃ jahṛṣurna cakravākāḥ||105||

dhavalabisalatā rasena kokaḥ pravikaṭacañcupuṭoddhṛtāścakhāda|

krudha iva śaśino viyogahetorgaganatalātpatitāḥ kalāḥ kahaṃcit||106||

sarasi vikaṭacañcukoṭilagnāṃ sarabhasavṛttirupetya cakravākyāḥ|

hṛda iva virahavyathāśalākāṃ bisakalikāṃ vicakarṣa cakravākaḥ||107||

cañcvagrakhaṇḍitamukhādvicakarṣa sūtra-

jālaṃ mṛṇāla'sakalātkṣaṇadāpriyasya|

koko nilīnamahimāṃśubhayāttadīya-

randhrodareṣu karacakramiva krudhendoḥ||108||

visrastapattrapuṭakesarakoṭidaṣṭa-

paryantabhāgavikaṭonnatakarṇikāgrāḥ|

ucchvāsabhagnaharitacchavayor 'karaśmi-

jālairajṛmbhiṣata paṅkajakoṣadaṇḍāḥ||109||

dikpadminīparisarāspadatāmrapādaḥ

kurvanvikāsiṣu ruciṃ nalineṣu haṃsaḥ|

āpīvaroḍupatibimbamṛṇāladaṇḍa-

khaṇḍāccakarṣa śanakaiḥ karasūtrajālam||110||

āpātabhītinamitonnamitārdhadeha-

baddhasthirakramavidhūtapatatrapaṅktiḥ|

uccaiḥ kvaṇannavatatāra nivāsayaṣṭi-

koṭeḥ śikhī vidhurayanvirahāturāḥ strīḥ||111||

abhyutthitā śayanastvaritaṃ yiyāsuḥ

saṃpīḍitocchvasitanīvinitambabimbam|

saṃpaśyator 'dhavinimīlitadṛṣṭi bhartu-

raṅke hriyā kila papāta cakoracakṣuḥ||112||

śroṇītaṭe na raśanā karajakṣatāṅka-

saṃjatagāḍharuji cārudṛśā babandhe|

bhūṣā parā guruṇi tatpadapaṅktireva

tasmiṃstu kāñcanaśilāvikaṭe tadāsīt||113||

ākṛṣya pāṇikamalena ca karṇapālī-

mekena vallabhavilokanani'scalākṣam|

tasthau puraṃdhrirapareṇa na labdhasaṃdhi-

rmāṇikyakuṇḍalamiti pravighūrṇayantī||114||

dvāri sthitā vinihitaikakavāṭapaṭṭa-

ruddhārdhavigrahatayā girikanyakāśrīḥ|

preyāṃsamaikṣata vadhūḥ stimitaikatāra-

śāreṇa yāntamaparā natapakṣmaṇākṣṇā||115||

stanaparisarabhāge dūramāvartamānāḥ

śritatanimani madhye kiṃcideva skhalantaḥ|

vavuratanunitambābhogaruddhā vadhūnāṃ

nidhuvanarasakhedacchedinaḥ prāhṇavātāḥ||116||

vighaṭitadalamudrābandhasaugandhikāna-

rnibiḍapuṭakuṭīrakroḍakārāvimuktaiḥ|

udayagatamanāvīvāruvadbhirdvirephai-

staruṇamaruṇaratnacchāyamuṣṇāṃśubimbam||117||

preṅkhatpiṅgārkadhāmacchuraṇakapiśitaścyotadacchinnanaiśa-

sthulāmbho binduvṛndāhita madhuramadhusyandasaṃdehamugdhaiḥ|

saṃrambhārabdhakolāhalamukharamukhaiḥ pattrarandhraprave"as-

prāptānandairvirejurmadhukaranikaraiḥ pūritāḥ padmakhaṇḍāḥ||118||

kurvāṇā ratnadhīnāṃ śaśadharapatanopaplaveneva tanvīṃ

toyāvasthāṃ krameṇa prakaṭitakakubhaḥ saṃbhṛtāmbhojahāsāḥ|

tanvantaḥ khaṃ kharāṃśostaruṇataratamaḥstomasaṃpiṇḍitaṃ sa-

tpratyagraṣṭhyūtalākṣārasaruciraruco dūramusrāḥ prasastruḥ||119||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākae rājānakaśrīratnākarasya kṛtau ratnāṅke haravijaye mahākāvye pratyūṣavarṇano nāmāṣṭāviṃśaḥ sargaḥ|