Provisional Edition

Provisional Edition of the Haravijaya. Correction of P11/P18, and newly edited sections go here.

More ▾
Title Haravijaya
Author Ratnākara
Physical description
Language/Script Sanskrit in Latin script.
Format digital
Material digital
Extent something we need here.
History
Date of production 2020
Place of origin Hamburg
atha sa manthagirau sakalartubhir nijanijaprasavojjvalayā śriyā |
samam asevi kadācid upāśrito girijayārijayānaghadordrumaḥ || 1 ||
A° sa devo mandarācale girijayāvalambito yugapad eva sarvartubhir asevyata. prasavāḥ kusumāni. arīṇāṃ vijetṛtvād anaghā acchadmacāriṇo 'pratihatā vā bhujataravo yasya || 1 ||
U° atha: sa devo manthagirau mandare sarvartubhiḥ samaṃ sevitaḥ. prasavaḥ puṣpam. śatrujaye 'naghā niśchadmāno bāhudrumā yasya |
madhupa rāji parājita māninī jana manaḥ sumanaḥsurabhiśriyam |
abhṛta vārita vārija viplavāṃ sphuṭita tāmratatāmravaṇaṃ jagat || 2 ||
A° madhupānāṃ rājibhiḥ parājitamanasvinīmanasaḥ sumanasaḥ puṣpāṇi yatra, tādṛśaṃ jagat surabher vasantasya śobhām avahat. sumanobhiḥ surabhi sāmodaṃ jagac chriyaṃ dadhre, iti vā yojanā. viplavo bādhaḥ. sphuṭitāni bhinnāni tatāny āmravaṇāni yatra. ‘vibhāṣauṣadhi-’*ityādinātra nakārasya ṇakāraḥ || 2 ||
    • vibhāṣauṣadhivanaspatibhyaḥ (Aṣṭādhyāyī 8.4.6).
U° madhu: jagac chobhāṃ dadhre. bhramararājibhiḥ parājitāni māninīnāṃ manāṃsi yatra. sumanobhiḥ puṣpais surabhi. vārijāni padmāni. sphuṭitāni vikasitāny ata evāruṇāni tatāni vistīrṇāni āmravanāni yatra |
drutam apāsya yamena niṣevitām abhinavotkatayeva divākaraḥ |
diśam aśiśriyad aiḍaviḍāśrayām asumatāṃ sumatāṃ vidadhat sthitim || 3 ||
A° yamena sevitā dig dakṣiṇā, tām apāsya ravir aiḍaviḍo dhanada āśrayaḥ patir yasyāḥ, tāṃ diśam uttarām aśiśriyat sevitavān. utkatānurāgas teneva. utsuko hi kāmī yathā yameneva kenacid adhiṣṭhitāṃ yuvatim utsṛjya kasyacid artheśvarasya ramaṇīṃ pratipadyate. asumatāṃ prāṇināṃ sumatām atīvaśītoṣṇayor abhāvād atyantarucitām || 3 ||
U° druta: yamena niṣevitāṃ dakṣiṇāṃ diśaṃ tyaktvā aiḍaviḍasya vaiśravaṇasyāśrayām uttarām āśritavān asumatāṃ prāṇināṃ suṣṭhu matāṃ sthitiṃ kurvan. atha ca yathā kaścit krūrasevitāṃ yoṣitām apāsya jaḍaprāyāśrayām abhiyuṅkta ity arthāntarasya pratītiḥ |
sthitim adhur madhurām avalambita stabaka darpaṇa pallava pāṇayaḥ |
satilakojjvalapattralatā girer avanayo vanayogakṛtaśriyaḥ || 4 ||
A° tilakais tarubhedair ujjvalapattrābhiś ca latābhiḥ saha vartamānā giribhuvo ramyāṃ sthitim adhārayan. vanāni kānanāni jalāni vā. tilakaś citrakaḥ. pattralatāḥ pattrabhaṅgāḥ. tatsahitāś ca kāminyo manoharasthitayaḥ. vanānām atra kāmitā pratīyate, samāsoktivaśāt || 4 ||
U° sthiti: girer avanayo bhuvo madhurāṃ sthitiṃ babhruḥ. avalambitastavakadarpaṇāḥ pallavā eva pāṇayo yāsām. saha tilakākhyais tarubhir ujjvalaiś ca pattrair latābhiś ca vartante yāḥ. vanena kānanena jalena vā yogaḥ sambandhaḥ, ataś cāvanivanayoḥ śṛṅgāratvam. priyasaṅgatā hi kāntā, ādarśaṃ bibhrāṇā, tilakaṃ pattralatāṃ ca karoti ||
kṛtakuśeśayinīrucayo madhuvyatikarād abhimantharagāminaḥ |
madhuliho divasāś ca vadhūr vyadhuḥ paravatīr avatīrṇamanobhavāḥ || 5 ||
A° rucir abhilāṣaḥ kāntiś ca. madhu puṣparasaḥ, madhuś ca vasantaḥ. avatīrṇamanobhavatvāt paravatīḥ paratantrāḥ || 5 ||
U° kṛta: bhramarā vāsarāś ca vadhūr avatīrṇakāmāḥ ata eva paravatīś cakruḥ. rucir ābhilāṣaś śobhā ca. madhunā kiñjalkena vasantena ca saṃbandhān mantharagāmitvam ubhayatrāpi.
sphuṭam anekarasābhyavahārataḥ kṛtarasāyanasaṃgrahasusthitā |
madhulihām asukhāyata saṃhatir dhṛtimatītim atītya kṛtasthitiḥ || 6 ||
A° madhuliho bhramarāḥ. teṣāṃ saṃhatir asukhāyata sukham anvabhūt. ‘sukhādibhyaḥ kartṛvedanāyām’* kyaṅ. kutaḥ? kusumauṣadhisaṃbandhino rasasya saṃgrahaḥ pānam, tena susthitā śobhanam āsitā. uktaṃ ca-‘anekaraso 'bhyavahāro rasāyanam’* iti || 6 ||
    • sukhādibhyaḥ kartṛvedanāyām (Aṣṭādhyāyī 3.1.18).
    • anekaraso 'bhyavahāro rasāyanam (Yet unidentified).
U° sphuṭa: abhyavahāro bhojanam. rasāyanaṃ bhramaramākṣikam atra. anyo 'pi pāratādirasābhyavahārakṛtena rasāyanasaṅgraheṇa susthito bhavati. asukhāyata sukham anubabhūva, ītim upadravam atītyātikramya.
Stein Or.d 72 anekasya kusumauṣadhisaṃbandhino rasasyāsvādanāt kṛto yo rasāyanasaṃgrahaḥ pānam, tena susthitā śobhanam āsitā. uktam: anekarasābhyavahārato rasāyanānām anya iti. yadi vā rasāyanam atra madhu, tatsañcayena susthitā, sampūrṇodaratayā manāg api calitum aśaktā rasābhyavahāreṇa sukham anvabhūd ity arthaḥ.
madhurayā parapuṣṭagirā śanaiḥ savayaseva sametya madhuśriyā |
mṛgadṛśo ghaṭitāḥ saha vallabhair mudam adhur damadhuryamanohṛtaḥ || 7 ||
A° 7 ||
U° madhu: vasantaśriyā vayasyayeva kokilagirā karaṇabhūtayā mṛgadṛśo vallabhais saha yojitāḥ satyo mudaṃ harṣaṃ babhruḥ. damadhuryā munayaḥ.
surabhitāṃ dadhati pramadānvito navamadhūpahitatviṣi campake |
surataharmya ivāracitasthitir navaratāṃ varatāṃ madhupo 'nvabhūt || 8 ||
A° ......varo jāmātā ca || 8 ||
U° sura: bhramaraḥ pramadānvitaḥ saharṣo navena madhunā vasantena kiñjalkena vā kṛtakāntau campakapuṣpe navaratāṃ varatām utkṛṣṭatām atha ca jāmātratvam anubhūtavān. varo hi pramadayā kāntayānvitaḥ suratageha āste. tatra navamena utkṛṣṭena dhūpena hitā tviṭ.
kusumitā girikānanabhūmayaḥ kisalayādharakhaṇḍanalālasaiḥ ||
parabhṛtaiḥ śradadhāyiṣata priyāḥ samadanā madanāditaṣaṭpadāḥ || 9 ||
A° kusumitā rajasvalā api priyāḥ prītihetavaḥ. madanaś ca kāmaḥ. parabhṛtāḥ pareṇa poṣitāḥ pṛthagjanā api. madena nāditā mukharīkṛtāḥ ṣaṭpadā bhramarā viṭāś ca yābhis tāḥ || 9 ||
U° kusu: kisalayāny evādharāḥ, tatkhaṇḍanecchubhiḥ kokilaiḥ puṣpitā vanabhuva ādṛtāḥ. priyā abhimatāḥ. madanākhyās taravaḥ. madena kiñcitkṣībatayā nāditā rasitāḥ. ataś ca priyāḥ kāntā iva. tā api kusumitāḥ saṃjātarajodarśanāḥ sakāmāś ca.
madhurajṛmbhaṇavibhramamādhavīmadhurasāsavapānamadotkaṭāḥ |
madhuliho vyathayantu malīmasāḥ smarasahā rasahāvavatīḥ striyaḥ || 10 ||
A° madhuretyādi viśeṣakam. ratirasena visṛṣṭā yāḥ savayaso vacanenāgate priyatame viṣaya āyataṃ mānaṃ muñcanti yāḥ, tathāvidhā yoṣito babhūvuḥ. mādhavy atimuktakalatā. malīmasāḥ pāpāḥ. smarasya sahāḥ samucitāḥ taruṇīr ity arthaḥ || 10 ||
U° madhu: manojñavikāsā yā mādhavīlatāyā madhupānena mattā malīmasāś ca kṛṣṇā, atha ca pāpina iva bhramarāh striyo vyathayantu. nāma yat kuravakatarustabakaś citayā spītayā śucitayā śuddhatvenopalakṣito 'pi virahiṇīr vyathayati, tad ayuktam iti dvābhyāṃ kriyā. śatro spaṣṭarasaḥ śṛṅgārādibhiḥ hāvo 'kṣibhrūvikārādinā, tatsūcako vyāpāraḥ.
dadhad udañcitapakṣmakarālatāṃ kurabakastabako madhubodhitaḥ |
tad asamañjasam eṣa dunoti yac chucitayā citayāpi viyoginīḥ || 11 ||
A° pakṣmabhiḥ kesaraiḥ karālatā vyāptir bhāsuratvaṃ vā. śucitayāpy upalakṣito yad eṣa stabakas tāpayati tad ayuktam. viśadātmatvāt paropatāpanābhāvāt. citayā pravṛddhayā. pakṣmāṇi netralomāny api. karālaṃ bhīṣaṇam api. madhu madyam api || 11 ||
tad abhidhāya tam ānaya satvaraṃ madhuravādini tat tad iti striyaḥ |
rasaniyuktasakhīvacanāgatapriyatamāyatamānamuco 'bhavan || 12 ||

tilakam

A° tat tasmāt tat tad bahuvidham uktvā taṃ dayitaṃ satvaram ānaya! na vayaṃ kālakṣepasahiṣṇava iti bhāvaḥ || 12 ||
U° tada: he madhuravādini! yasmāt kurabakastabako 'pi vyathayati, tat tasmāt tat tan nānāprakāraṃ kiñcid abhidhāya taṃ priyam ānayeti rasena sakhīṣu niyuktavacanā abhavan. ata eva gate sati priyatame dīrgham api mānaṃ muñcanti yāḥ. kecit tu sākhīvacanād āgateṣu priyatameṣu mānamuca ity ahuḥ ||
jaraṭhapaṅkajabījasamatviṣo madhu nipātum abhiprajagalbhire |
madhuliho virahe kṛtadiṅmukhavyavadhayo vadhayogakṛtaḥ striyaḥ || 13 ||
A° paṅkajabījaṃ padmākṣaḥ. vyavadhir ācchādanam. striyā virahe sati vadhayogakṛto ghātukāḥ. strīhananāc ca madyapānaprāgalbhyaṃ malinātmanāṃ kiyat || 13 ||
U° jara: pariṇataiḥ paṅkajabījaiḥ padmākṣais tulyatviṣo bhṛṅgāḥ. madhu niḥśeṣeṇa pātuṃ pragalbhā āsan. vyavadhiḥ hāraṃ. virahe sati striyo vadhayogakṛtaḥ mārakāḥ.
surabhimāsi kadācid anujjhitā jaḍatayāpi navāliśatānvitāḥ |
śamavatām api tāmarasākarāḥ sthiratarā ratarāgakṛto 'bhavan || 14 ||
A° jaḍatayā maunena na tyaktāḥ. bāliśatayā ca maugdhyena na sahitā iti virodhaḥ. jaḍatayā śaityenānapākṛtāḥ. navāni ca yāny aliśatāni, tair anvitāḥ. ... || 14 ||
U° sura: jaḍatā śaityam. navair aliśatair bhramaravṛndair anvitāḥ. ataś ca ye jaḍatayā maurkhyenātyaktāḥ, te kathaṃ bāliśatayā mūrkhatvena yuktā na syur iti. virodhaḥ: munīnām api rate surataviṣaye rāgaṃ kurvanti ye.
sarasamantharatāmarasādarabhramarasajjalayā nalinī madhau |
jaladhidevatayā sadṛśīṃ śriyaṃ sphuṭatarāgatarāgarucir dadhau || 15 ||
A° ... aruṇā rucir yasyā iti cārthadvāreṇa viśeṣaṇam 15 ||
U° sara: sarasaṃ mantharaṃ ca kṛtvā tāmarasaviṣayenādareṇa bhramarāṇāṃ sajjaḥ pratyāsanno laya 'śeṣo yasyām. sphuṭatarāgatā jātā rāgeṇāruṇatayā rucir yasyāḥ. aparatra sarasā manthe ca ratā ye 'marāḥ, teṣāṃ sādam avasādaṃ rāti dadāti yo bhramo bhramaṇam, tena rasat saśabdaṃ jalaṃ yasya. tayāgasya mandarādrer yaḥ taras taraṇam, tenāgena ca pārijātataruṇā rucir yasyāḥ, iti vibhaktivipariṇāmena yojyam.
caramapādavidhūtarajaḥkaṇaprakaradhūsarapakṣatisaṃpuṭaḥ |
nyaviśatānugiraṃ kamalākarān rasamanāḥ samanādam alivrajaḥ || 16 ||
A° caramaḥ paścimaḥ. saṃpuṭo dvayam. anugiraṃ girisamīpe, ‘gireś ca senakasya’* iti ṭac. rase madhuni mano yasya saḥ. samanādaṃ tulyadhvaniṃ kṛtvā || 16 ||
    • gireś ca senakasya (Aṣṭādhyāyī 5.4.112).
U° cara: caramāḥ paścimāḥ. anugiraṃ parvate. rasena yuktaṃ mano yasya. samo nādo rutaṃ yatra tathā kṛtvā |
mṛgadṛśo malayānilanirdhute sapadi mānarajasy api sāgasaḥ |
na dayitān abhicukrudhur ūrjitasmaratayā ratayānasamutsukāḥ || 17 ||
A° 17 ||
U° mṛga: mṛgākṣyas sāgasas sāparādhān api dayitān nābhicukrudhur iti krudhi druhīti caturthī bādhikā. ‘krudhadruhor upasṛṣṭayoḥ’* iti dvitīyā. ūrjita udbhaṭo 'pi yaḥ smaraḥ, tadbhāvena. ratārtham yānaṃ gamanam.
    • krudhadruhor upasṛṣṭayoḥ karma (Aṣṭādhyāyī 1.4.38).
taralapallavatāmrakarā babhau samadhum ullasitabhramarotpalam |
kusumakoṣam ivārpayituṃ latā vivalitā balitāpahṛtas taroḥ || 18 ||
A° kusumam eva koṣaś caṣakam, tam eva taror nāyakabhūtasyārpayituṃ latā vivalitā saṃmukhaṃ parivṛttā. madhu makarandaḥ surā ca. balī haladharaḥ. tāpaḥ kāmajvaro 'pi || 18 ||
U° tara: pallava eva tāmraḥ karaḥ samadhuṃ kiñjalkaṃ puṣpakośaṃ taror arpayitum iva vivalitā nāyikāpi priyasya samadyaṃ kośaṃ caṣakam arpayati. balī mahān tāpaḥ kāmakṛto 'pi
bhramarapaṅktinibhena manasvinībhrukuṭibandha ivāgalito 'bhavat |
kamalabhūmiṣu mānahatisphuṭaprasarakesaraketuśate madhau || 19 ||
A° kesarāṇi bakulāny eva. ketūnāṃ dhvajānāṃ śatāni yasmin || 19 ||
U° bhrama: nibho vyājaḥ kesarāṇi bakulāṇy eva ketuśatāni yatra || ||
śiśirabhāsi cireṇa dinaśriyā kṛtasamāgamavighna upāgate |
kaluṣatāpi mukhe madhusaṃgamān na niśayāniśayāpitamānayā || 20 ||
A° madhor vasantasya saṃgamān niśayā mukhe prārambhe kaluṣatā nāpi na prāptā. tadā diśām atiśayena vaiśadyāt. aniśaṃ sadā yāpitam ativāhitaṃ mānaṃ parimāṇaṃ dairghyaṃ yayā. vasante rātrīṇāṃ tānavotpatteḥ. kāminī dvitīyakāminyā kṛtasamāgamavighnatvāc cireṇāpi samāgate preyasi na vadane kāluṣyam āpnoti madyasaṃparkāt. madhu madyam api. māno 'bhimāno 'pi || 20 ||
U° śiśi: candre cirād apy upāgate niśāyā mukhe prārambhe madhor vasantasya saṃgamāt kāluṣyaṃ nāpi na prāptam. aniśaṃ yāpitaṃ gamitaṃ vasantayogād eva mānaṃ pramānam. yathā nāyikayāś cānyayoṣitā kṛtapratyūhe cireṇāpi prāpte preyasi madyasamparkād vadane kāluṣyaṃ na bhavati tathā mānaḥ priyaṃ prati |
sarabhasaṃ śayanīya ivottaracchadakṛtatviṣi pītamadhūtkaṭaiḥ |
madhukarair vinipatya sajānibhiḥ sarasijorasi joṣam avasthitam || 21 ||
A° sarasijānām urasi madhye bhramarair joṣam avasthitaṃ sukhaṃ viśrāntam. uttaracchadaḥ pracchadapaṭaḥ. sajānibhiḥ sabhāryaiḥ. ‘jāyāyā niṅ’* || 21 ||
    • jāyāyā niṅ (Aṣṭādhyāyī 5.4.134).
U° sara: uttaracchadā bahiḥpattrāṇi pracchadapaṭāś ca madhu kiñjalkaṃ madyaṃ ca ṣaṭpadais sabhramarīkaiḥ śṛṅgāribhir iva joṣaṃ saprīti kṛtvā sthitam.
nidhuvanāvasare kamitur vadhūr ahṛta kuṭṭamitena bhṛśaṃ manaḥ |
taralalocananirjitavisphuratkuvalayā valayāvaliśobhinī || 22 ||
A° kuṭṭamitākhyena ceṣṭitena manaḥ kāntasya vadhūr ahṛta samāvarjayat. ‘prāṇeśagāḍhabhujapāśanipīḍitānām uddāmaharṣabharanirbharamānasānām | hī duḥkhayasy alam alaṃ dṛḍhamūḍhavākyaiḥ saukhye 'pi duḥkha iva kuṭṭamitaṃ vadanti*’ || 22 ||
    • prāṇeśagāḍha° (Unidentified).
U° nidhu: suratāvasāne vadhūḥ kuṭṭamitena kāntasya mano jahāra. keśastan*āparādhasya...
    • keśastana° (Nāṭyaśāstra 22.20).
smarasakhasya padaṃ surabher iva stanavatī dadhatī samamīmanat |
alakadeśaniveśaparisphurannavayavāvayavābharaṇaśriyam || 23 ||
A° stanavatī yuvatiḥ. sā smarasyāsau sakheti vasantasya saṃsthitim iva samamīmanat saṃmānayāmāsa. yato navo yavasyāvayava ekadeśo 'ṅkura evābharaṇaṃ yatra tādṛśīṃ śriyaṃ dhārayantī || 23 ||
U°...padam iva sammatavatī. yatas sa kāmasya mitram. niveśo racanā. navo yavāṅkura evābharaṇam yatra tathāvidhām śriyaṃ dadhatī.
vidadhataḥ pathikakṣapaṇaṃ prati smṛtibhuvo nijaśaktyupabṛṃhaṇam |
dadhur ahāryataṭāḥ sahakāritām anavamā navamādhavasaṅginaḥ || 24 ||
A° ahāryā girayaḥ. teṣāṃ taṭāḥ smṛtibhuvaḥ kāmasya śakter upacayaṃ kurvantaḥ, tathā pathikānāṃ hananaṃ kurvāṇasya kusumeṣoḥ śaktipoṣaṇaṃ prati sahakāritāṃ sahāyatvam udavahan. sahakāriṇo hi pratyayāḥ prakriyāntarasyopādānabhūtasya kāryaṃ prati śaktim upacinvanti bījasyeva jalādayaḥ. anavamāḥ śreṣṭhāḥ. mādhavo vasantaḥ || 24 ||
U° vida: ahāryaḥ parvataḥ. tasya taṭāḥ kāmasya virahikṣapaṇaṃ prati nijaśakter vardhanaṃ kurvatas sahakāritāṃ sāhāyyaṃ dadhuḥ. atha ca sahakārākhyavṛkṣavattvam api. yathā salilādayaḥ sahakāriṇo 'ṅkurādāv upādānakāraṇasya bījādeḥ śaktiṃ vardhayanti. anavamā utkṛṣṭāḥ. navaś ca mādhavo vasantaḥ.
alibhir añjanabindumalīmasaiḥ smarabalair iva kaṅkaṭitair vṛte |
maruti saurabhaśālini nābhavan sarati ke ratikelirasākulāḥ || 25 ||
A° janā ratikrīḍārasena vyākulā babhūvuḥ. kaṅkaṭitaiḥ sasaṃnāhaiḥ || 25 ||
U° ali: kaṅkaṭitaiḥ kavacitair vāyau sarati vāti sati ke śṛṇgāriṇo ratikrīḍārasenākulā nābhavan.
vikacapattrapuṭaṃ surabhiśriyaḥ sarasavibhramakāñcanapaṅkajam |
vyadhita campakam unmadanā vadhū rasakalāsakalālikulāravaiḥ || 26 ||
A° ...kiṃjalkāsvādanena kalair madhurair asakalaiś cāvyaktaśrutibhir alināravaiś campakākhyaṃ kusumaṃ samudgatamadanā yoṣitaś cakāra || 26 ||
U° vika: vasantalakṣmyā vilāsārthahemapadmam iva campakaṃ kartṛ rasavaśān madhurair asakalaiś ca spaṣṭaiḥ bhramarāravair vadhūr utpannakāmāś cakāra |
rabhasayopagatāḥ pathikā gṛhān madhukarāñjanacūrṇavaśīkṛtāḥ |
mumudire parirambhasukhocchvasannijavadhūjavadhūtatanuklamāḥ || 27 ||
A° rabhasā tvarā. madhukarā evāñjanamayaṃ vaśīkaraṇaprakāracūrṇam. nijābhir vadhūbhir javena dhūtas tiraskṛtaḥ śarīraśramo yeṣām || 27 ||
U° rabha: bhramarā eva vaśīkaraṇārtham añjanacūrṇam āśleṣasukhenāsvasantībhir nijavadhūbhir javena tvarayā dhūtaḥ śarīraklamo yeṣām |
śivapurīm iva śaivalasacchriyaṃ niviśamānam anargalam abjinīm
bhramarayugmam avekṣya na kāḥ priyair yuvatayo bata yogam upāyayuḥ || 28 ||
A° śaivalena śevālena satī śobhanā, śaivaiś ca śivabhaktair lasantī śrīr yasyāḥ. bateti vismaye || 28 ||
U° śiva: śaivalena śevālena satī śobhanā śaivānāṃ cānandavaśāl lasatām krīḍatām śrīr yatra kā mānaṃ tyaktvā priyaiḥ saha yogaṃ na gatāḥ.
madhukarāñjanabindumanoramaprakaṭapattralatābharaṇojjvalāḥ |
na surabhāv abhavann atimuktakavratatayo 'tatayogaguṇaśriyaḥ || 29 ||
A° atimuktakavratatayo na tatayogā guṇaśrīr yāsāṃ tādṛśyo nābhavan, saṃvistīrṇaguṇaśrīyogā babhūvur ity arthaḥ. prakaṭapattralatāḥ śākhā evābharaṇaṃ tenojjvalā ramyāḥ. pattralatābhir ābharaṇaiś cojjvalā vitataguṇaśobhāś ca yoṣito bhavanti || 29 ||
U° madhu: pattrāṇi latāś caivābharaṇaṃ tenojjvalā ramyāḥ. yoṣito 'pi pattralatābhiḥ kapolādimaṇḍanair ābharaṇaiś cojjvalā. atimuktakākhyāvratatayo latā atatayogaguṇaśriyo nābhavan vistīrṇaguṇaśobhā āsann ity arthaḥ.
mukhanilīnaśilīmukhacūcukaṃ kamalinīmukulāmburuhastanam |
adadarat kamiteva na rāgavān dinakaro na karotkarakoṭibhiḥ || 30 ||
A° kamitā kāntaḥ. adadarad bibheda, ‘at smṛdṝtvaraprathamradastṝspaśām*‘ ity abhyāsakāryam adantādeśaḥ. rāgo 'nuraktir api. karaḥ pāṇir api || 30 ||
    • at smṛdṝtvaraprathamradastṝspaśām (Aṣṭādhyāyī 7.4.95).
U° mukha: bhramarā eva cūcukaṃ yatra. na nādadarat api tu bibheda. kamitā kāntaḥ. rāga ujjvalyam anuraktatā ca. karau raśmihastau.
smaramataṅgajadānajalacchaṭāvipinavāridhividrumavibhrame |
bhramarasaṃhatir āvirabībhavat pracapalā ca palāśatarau śriyam || 31 ||
A° palāśaḥ kiṃśukaḥ. tatra bhramarāṇāṃ saṃhatiś capalā svām abhikhyām āvirabībhavat prakaṭīcakāra. vibhramaḥ sadṛśaḥ || 31 ||
U° smara: kāma eva gajaḥ, tasya madacchaṭeva vanam evābdhiḥ, tatra vidrumabhūte palāśākhye tarau prakarṣeṇa capalā bhṛṅgāvalī śriyaṃ prakaṭīcakāra.
animiṣākṣivilokitavibhramāṃ surabhim unmanaso navamālikām |
suravadhūm iva vīkṣya manobhuvo 'navaśamā vaśam āśu madhau yayuḥ || 32 ||
A° anavaś ciraprarūḍhaḥ śamo yeṣāṃ te munayaḥ kāmasya vaśaṃ yayuḥ. animiṣair animīladbhir akṣibhir ālokito vīnāṃ pakṣiṇāṃ bhramarāṇāṃ bhramo yasyām. animiṣaś cākṣṇor daśanasya vilāso yasyāḥ. navamālikā saptalā. anavamaṃ cotkṛṣṭam alikaṃ lalāṭaṃ yasyāḥ || 32 ||
U° ani: na nimiṣantīty animeṣāṇi. ‘igupadha°*’ iti kaḥ. tathāvidhair akṣibhir vilokito vīnāṃ pakṣiṇām upacārād bhramarāṇāṃ bhramo vā yasyām, tāṃ navamālikākhyāṃ latām apsarasam iva nirnimeṣanetrāvalokitavibhramaḥ, anavamaṃ cotkṛṣṭam alikaṃ lalāṭaṃ yasyām, tāṃ dṛṣṭvā anavaśamāś ciraprarūḍhaśāntayo 'pi munayas sotkaṇṭhāḥ kāmasya vaśaṃ jagmuḥ.
    • igupadhajñāprīkiraḥ kaḥ (Aṣṭādhyāyī 3.1.135).
aparimṛṣṭakapolatalasphuranmaṇikarālitakāñcanakuṇḍalaḥ |
na khalu bhīrujano 'nvabhavan madhau na samado 'samadolanavibhramam || 33 ||
A° bhīravo yoṣitaḥ. tāsāṃ janaḥ samadatvād asamaṃ dolanavibhramaṃ dolāvilāsaṃ na nānvabhavat, api tu anubhūtavān eva. parimṛṣṭaṃ spṛṣṭam || 33 ||
U° apa: lalanājanas samadas san ananyatulyaṃ dolāvilāsaṃ na na anvabhūd anubhūtavān eva. aparimṛṣṭetyādinātivegavattvam.
smaram adīdipad ūrdhvavilocanaṃ puraripor iva yacchikhipiṅgalam |
sphuṭad aśokam udīkṣya tadutsukā na kam itā kamitāram alaṃ vadhūḥ || 34 ||
A° adīdipad iti dīpanaṃ prabodhanaṃ dahanaṃ ca. śikhī vahniḥ. tadvat tena ca piṅgalaṃ kapiśam. vadhūḥ kamitāraṃ kāmukaṃ na kam itā kaṃ na prāptā. nāsau vallabho babhūva yaḥ priyayā na yukta ity arthaḥ || 34 ||
U° smara: yad agnivat piṅgalam aśokaṃ kāmam uddīpitavat tat sphuṭad vikasad dṛṣṭvā kaṃ kamitāraṃ priyaṃ vadhūr netā. śambhor cordhvanetraṃ vahninā piṣaṅgaṃ san kāmam adhakṣīd lakṣyate |
vidhutapakṣmarajaḥkapiśabhramadbhramarasaṃhatim abjamukhaśriyam |
sacaṭulātilakām iva padminī ghanarasā narasārthahṛd ādadhau || 35 ||
A° ‘suvarṇaśṛṅkhalābaddho nānāratnavibhūṣitaḥ | lalāṭalamby alaṃkāraś caṭulātilakaḥ smṛtaḥ ||*’ raso makarando jalaṃ vā. narasārthahṛt sarvajanamanoramā || 35 ||
    • suvarṇaśṛṅkhalābaddho ... (unidentified).
U° vidhu: catulātilako lalāṭālamby alaṅkāraḥ. tattulyā kiñjalkakapiśā bhṛṅgāvalī. ghano raso makarandaṃ jalaṃ vā yasyā narasārthahṛt samastajanamanoharā kāminī ca ghanaśṛṅgārarāgā narān āharati. vasantaḥ.
[iti vasantaḥ]
śucidināgatir āplutiśītalāḥ sarasacandanapaṅkabhṛto 'karot |
priyasakhīva vataṃsitamallikāḥ stanavatīr navatīvratanuklamāḥ || 36 ||
A° śucir āṣāḍho māsaḥ. āplutiḥ snānam. vataṃsitā śekharīkṛtā mallikā kusumabhedo yābhir yāsāṃ vā. ‘vaṣṭi bhāgurir allopam avāpyor upasargayoḥ*’ ity avaśabdākāralopaḥ || 36 ||
    • vaṣṭi bhāgurir allopam avāpyor upasargayoḥ (cf. Laghusiddhāntakaumudī403 on Aṣṭādhyāyī 2.4.82).
U° śuci: śucir grīṣmaḥ āplutir jalakrīḍā vataṃsitā avataṃsīkṛtā mallikā yābhiḥ. ‘vaṣṭi bhāgurir allopam avāpyor upasargayoḥ.*’ stanavatīḥ praśastakucās striyo navo virahasyānanubhūtatvāt tīvraś ca śarīraklamo yāsām. sāpi ca saklamānāṃ vayasyānāṃ snānādi karoti.
    • vaṣṭi bhāgurir allopam avāpyor upasargayoḥ (cf. Laghusiddhāntakaumudī403 on Aṣṭādhyāyī 2.4.82).
spṛśati tigmarucau kakubhaḥ karair dayitayeva vijṛmbhitatāpayā |
atanumānaparigrahayā sthitaṃ rucirayā cirayāyidinaśriyā || 37 ||
A° karāḥ pāṇayo 'pi. tāpaḥ khedo 'pi. mānaṃ dairghyam abhimānaś ca. cirayāyīni dināni graiṣmikā vāsarāḥ. atra tigmaruceḥ kakubhāṃ ca kāmitā pratīyate, liṅgaviśeṣopādānāt. yathā-‘sarale saha vāsaraśriyā nibhṛtaṃ kvāpi gataḥ sa bhāskaraḥ | vada tena vinābjinī kathaṃ kṣaṇadām adya natāṅgi neṣyati ||*’ iti. evaṃ dinaśriyo 'pi nāyikātvapratītau yathoktam eva saṃbhavatīti dayitayety upamānapadam apuṣṭārtham iti sahṛdayāḥ || 37 ||
    • sarale saha ... (Navasahāsāṅkacarita 12.34).
U° spṛśa: cirayāyidinānāṃ grīṣmadivasānāṃ śriyā evaṃvidhayā sthitam. kakubhāṃ sapatnītvam. karai raśmibhir api, tāpaḥ santāpo 'pi, mānaḥ pramāṇam api. tigmarucau rucirayā ceti sākūtaṃ caṇḍatvasaukumāryapratipādanāt.
sarasacandanapaṅkavilepanā kṛśatanur dadhatī sajalārdratām |
priyatamārahitāpi viyoginīsthitim itātimitākṣarasatkathā || 38 ||
A° priyatamasahitāpi kṛśāṅgī virahiṇyāḥ sthitim itā prāptā. jalārdraṃ jalaplutaṃ vastram. atimitākṣarā svalpavarṇā || 38 ||
U° sara: kṛśāṅgī priyeṇārahitā svādhīnabhartṛkāpi virahiṇīsthitiṃ prāptā, jalārdrāṃśukādidhāraṇāt. atiśaye mitākṣarā parimitavarṇā kathā yasyāḥ.
dinapateḥ kṣitim uttapataḥ punar vikaṭaṭaṅkanikuṭṭanaghaṭṭitam |
galati dhāma kim etad iti bhramaṃ bhṛtavatītavatī janatā klamam || 39 ||
A° ṭaṅkanikuṭṭanena śastrakāhatyā ghaṭṭitaṃ calitam. raviḥ kila purā priyatamānurodhena duḥsahataraṃ svadhāma tvaṣṭuṣ ṭaṅkena śātayāmāsa. janatā klamam itavatī gatā || 39 ||
U° dina: ṭaṅkeṇa śastrakeṇa nikuṭṭanam āhatiḥ. sūryeṇa kila tvaṣṭur bhrama ātmānam āropya dhāma śātitam abhūt. bhramaṃ bhrāntiṃ bhṛtavatī klamam itavatī gatā.
rucirayā girikānanamaṇḍalī śriyam adhattatarāṃ smaradīpikā |
sapadi mallikayā racitasthitir na na ghanānaghanādavihaṃgamā || 40 ||
A° dīpikā lohādimayī dīpādhārabhūtā yaṣṭir api. mallikā tailabhājanam api. ghano 'naghaś ca nādaḥ kvaṇitaṃ yeṣām || 40 ||
U° ruci: smarasya dīpikā uddīpanavibhāvasannidheḥ. na na ghanāpi tu nibiḍā. anaghanādo 'ninditāravaḥ.
ghaṭitaṣaṭpadapeṭakapāṭalāpaṭalasaṃpuṭapāṭanapāṭavam |
sphuṭayatā navabandhurasaurabhaprasaratā saratā marutā dadhe || 41 ||
A° bandhuro ruciraḥ saurabhaprasaro yasya tadbhāvaḥ saratā vātena dhṛtā. peṭakaḥ samūhaḥ. pāṭalaḥ puṣpabhedaḥ. saṃpuṭā mukulāḥ || 41 ||
U° ghaṭi: saṃlagnaṣaṭpadasamūhasya pāṭalākhyapuṣpavṛndasya dalasampuṭapāṭanacāturyam prakaṭayatā vāyunā saratā prasārayatā satā navasya manoharasya ca saurabhasya yaḥ prasaraḥ, tadbhāvo dhṛtaḥ.
jitam ahaṃ sukumāratayānayā praticikīrṣu śirīṣam itīkṣitam |
atiruṣeva viyogavatīṃ śucaṃ sarasahāsadalaṃ sad alambhayat || 42 ||
A° itīva ruṣā pratikartukāmaṃ śirīṣaṃ nāma kusumam īkṣitaṃ sad ālokitamātraṃ sat virahiṇīṃ śokam alambhayat prāpayāmāsa. sarasaḥ pratyagro hāsa udbhedo yeṣām || 42 ||
U° jita: śirīṣapuṣpam itīva pratikriyāṃ kartum icchur īkṣitaṃ sat dṛṣṭamātram eva virahiṇīṃ śokam ...
iti grīṣmaḥ
dadhati yatra payodharapaṅktayo giriśakaṇṭharuciṃ jalamantharāḥ |
sa kṛtapānthavadhūjanavepathū rasamayaḥ samayaḥ sma vijṛmbhate || 43 ||
A° giriśo haraḥ. ‘girau ḍaś chandasi*’ iti pratyayadvāreṇa cchandasi niyamitatvād giriśaśabdasya bhāṣāyāṃ prayogaḥ pramādajaḥ. rasaḥ salilaṃ rāgaś ca. tanmayaḥ samayo varṣārātraḥ || 43 ||
    • girau ḍaś chandasi (Kāśikavṛtti and Mahābhāṣya ad Aṣṭādhyāyī 3.2.15).
aśamayac cirasaṃbhṛtam ambhasā manasi mānakalaṅkam api striyāḥ |
adhidharitri payodharadhoraṇī kimu rajo murajorjitagarjitā || 44 ||
A° payodharāṇāṃ dhoraṇī paṅktiḥ. kimu bhuvi rajo nāśamayad iti nañ atra sāmarthyalabhyaḥ || 44 ||
bhuvanasaṃvananātanubhasmabhiḥ kuṭajakesaradhūlikaṇaiś citāḥ |
surabhayo marutaḥ kṛtakāminīsmaravikāravikāsam avāsiṣuḥ || 45 ||
A° saṃvananaṃ vaśīkaraṇam. atanuḥ kāmaḥ. avāsiṣur vavuḥ || 45 ||
vidadhatā navacandrakalāñchitām anukṛtasmaravairitanuṃ śriyam |
phaṇibhujā samaye gurutāṇḍavavyasaninā saninādaghane sthitam || 46 ||
A° saninādāḥ payomuco yatra tasmin kāle mayūreṇa nṛttavyasanavatā sthitam. navaiś candrakaiḥ picchair lāñchitā lakṣitā, candrasya ca kalayāñchitā saṃgatā || 46 ||
prakaṭajātiśarīraruco dadhur vanabhuvo 'ntaramārgagatāṃ śriyam |
bharagalanmakarandakaṇacchaṭākavalanāvalanākulaṣaṭpadāḥ || 47 ||
A° antaramārgo gahanaḥ pradeśaḥ. tadgatāṃ śriyaṃ vanabhuvo 'vahan. jātir mālatī tayā śarīraruk svarūpaśobhā prakaṭā yāsām, tathā jātayaḥ śuddhavikṛtabhedenāṣṭādaśa ṣāḍjīṣaḍjamadhyamadhyamāprabhṛtayaḥ. tatsvarūpasyeva ca rug yāsām, tāsām eva ca viśeṣo 'ntaramārgo bhavati. dviśrutyadhikayor niṣādagāndhārayor yathākramaṃ kākalyantarasvarasaṃjñatvakalpanāt. kavalanā grāsaḥ, tadarthaṃ valanā paribhramaṇam || 47 ||
vikaṭamekalahemalatāspadāṃ ruciratām acirārcir acūcurat |
sajalameghagatāśu manasvinījanatayānatayāsakṛd īkṣitā || 48 ||
A° mekalo vindhyaḥ, tena meghasya sāmyam asitavarṇatvāt. acirārciḥ saudāmanī. ānatayā punaḥpunar ullasanena dauḥsthityam asmāsu na janayitavyam ity āśayena prahvayā || 48 ||
smṛtibhuvo nijakārmukakarṣaṇaklamaviniḥśvasitair iva mārutaiḥ |
mṛgadṛśām upavallabham ullasatpulakatālakatāṇḍavikair dadhe || 49 ||
A° alakānāṃ tāṇḍavikair nartakaiḥ || 49 ||
sphuritaśakraśarāsanahāriṇā kalayatā caturaṅgabalaśriyamcaturaṃ gavalaśriyam |
ka iva te 'nukṛtorjitabhūbhṛtā ghanacayena ca ye na vaśīkṛtāḥ || 50 ||
A° śakradhanurmanohareṇa ca gavalasya mahiṣaśṛṅgasya śyāmatayā śobhāṃ gṛhṇatā ca ghanānāṃ cayena bhūbhṛteva caturaṃ kṛtvā na ye vaśīkṛtās te ka iva janāḥ? na kecit. rājā punar anargharatnayogena sphuritendradhanur yo hāraḥ, tadvān, caturaṅgasya balasya hastyaśvarathapattilakṣaṇasya sainyasya śobhāṃ kalayati || 50 ||
saharigopakam aikṣata bhūtalaṃ vrajam ivāñcitalāṅgalikaṃ janaḥ |
kṣaṇarucāṃ samaye samadadhvanad ghanavare 'navareṇuhṛti kṣiteḥ || 51 ||
A° harigopā indragopākhyāḥ prāṇinaḥ harigopaś ca goparūpadhārī viṣṇuḥ. vrajo gavāṃ nivāsaḥ. añcitā śreṣṭhā lāṅgalikā auṣadhiviśeṣo yatra. añcitaś ca pūjito lāṅgalī haladharo yatra. anavo reṇuś cirasaṃcitaṃ rajaḥ || 51 ||
nabhasi ketakacandradalojjvale kuṭajapuṣpacayena vikāsinā |
himavipāṇḍurucoḍugaṇāyitaṃ kalayatālayatām atanoḥ śriyaḥ || 52 ||
A° atanoḥ kāmasya bahulāyāś ca śriya ālayatvaṃ kalayatā gṛhṇatā kuṭajākhyakusumanicayena nakṣatragaṇavad ācaritam. nabhasi śrāvaṇe 'ntarikṣe ca. candrākārair dalaiḥ pallavaiḥ, candrasya ca dalena khaṇḍenojjvale rucire || 52 ||
vikira vāri vilolaya vidyuto nabhasi garja tiraskuru diktaṭān |
iti ghano viyutām akṛtācaran na na vaśāṃ navaśāntiparāṅmukhīm || 53 ||
A° vāri vikira jalaṃ vikiran ityādikam ācaran jalado viyutāṃ viyoginīṃ na na vaśām, api tv āyattām eva cakāra. vikiretyādau ‘samuccaye 'nyatarasyām’ iti loṭ*. hir ādeśaś ca. ācaran iti sāmānyavacanasyānuprayogaḥ ‘samuccaye sāmānyavacanasya*’ iti || 53 ||
    • samuccaye 'nyatarasyām (Aṣṭādhyāyī 3.4.2).
    • samuccaye sāmānyavacanasya (Aṣṭādhyāyī 3.4.5).
avasare malino 'py upakārakaḥ kvacid itīva ravais taruṇān bhraman |
stanitabhītapuraṃdhrinigūhanasthitimato 'timato 'bhidadhau ghanaḥ || 54 ||
A° nigūhanena sthitimataḥ sukhitān ittham iva ravais taruṇān ambudo 'bhyadhāt. atimato 'tīvābhipretaḥ, samāgamakāraṇatvāt || 54 ||
navadaladvayaśobhi ghanāgamaśriya ivābharaṇaṃ śravaṇāśrayam |
vyadhita hāri kadambam api striyaḥ smaravaśā ravaśāliśilīmukham || 55 ||
A° 55 ||
ghanatamasy abalāḥ samavartinā dadṛśire virahaglapitā na yāḥ |
jagati tā iva darśayituṃ taḍit praviralāvir alātanibhābhavat || 56 ||
A° alātam ulmukam, tatsadṛśī taḍid āvirabhavat prakaṭībabhūva. samavartī yamaḥ || 56 ||
sphuṭatarāmalakandalasacchriyaḥ pratidiśaṃ kamalinya ivābabhuḥ |
madhukarair vikasadgirimallikāśabalitā valitā vanarājayaḥ || 57 ||
A° āmalais tarubhedaiḥ kandalaiś ca latāviśeṣaiḥ satī śobhanā śrīr yāsām. amalaiś ca kandair bisair anyair vā mūlair lasantī śrīr yāsām. girimallikā kuṭajam, tacchabalitatvād bhramarair valitā veṣṭitāḥ || 57 ||
kuṭajakandalanīpaśilīndhrajāṃ surabhitāṃ dadhad ambudamārutaḥ |
vyadhita roṣarajaḥprasarojjhitā na na vadhūr navadhūrgatamanmathāḥ|| 58 ||
A° navo dhūrgataś ca paradhārādhirūḍhaḥ kāmo yāsāṃ tathāvidhā vadhūr abhrapavanaś cakāraiva. kuṭajādayo vārṣikāḥ kusumaviśeṣāḥ || 58 ||
smṛtibhuvo virahe navamālatīkusumamudgara eva vadhūr vyadhāt |
sphuṭam apaścimaghātavimūrchitā madarasādarasāravaṣaṭpadaḥ || 59 ||
A° mālatīkusumam eva mudgaraḥ praharaṇaviśeṣaḥ, sa eva smṛtibhuvaḥ sakāśād āgatena apaścimena prahārāntarāpekṣiṇā prahāreṇa mūrchitā yoṣitaś cakāra. mālatīkusumam eva kāmasya mudgara iti tu na yuktam, mudgaraśabdasyātra sāpekṣatayā samāsāprasaṅgāt. madarase madajanake madhuny ādaraḥ saṃbhramo yeṣāṃ tathāvidhāḥ sāravāś ca bhramarā yasmin || 59 ||
hariradāgra ivotthitakālike glapitamānatamā nabhasi sthite |
kam iva nāma na bāhulatāntaraṃ priyatamāyatam ānayad īpsitam || 60 ||
A° āyataṃ bhujalatāmadhyaṃ priyatamā kam īpsitaṃ priyaṃ nānayat? sarvam eva nijā vadhūḥ pariṣasvaje. harir aśvaḥ. rado dantaḥ. kālikā meghapaṅktiḥ, aśvānāṃ vayovijñānacihnaṃ ca. māna eva tamaḥ, mālinyahetutvāt || 60 ||
iti varṣāḥ
sphuritacārutarāpaghanaśriyā hṛdayanandanaśobhanaveṣayā |
dayitayeva janaḥ śaradāśrito mudam alaṃ damalaṅghanam ācarat || 6 1 ||
A° śaradā hetunā mudam āśrito janaḥ sutarāṃ damasya śānter laṅghanam akarot. apaghanā megharahitā. apaghanāś cāṅgāni. hṛdayahāriśobho nava iṣa āśvayujo yasyām. hṛdayanandanaś ca śobhano veṣo yasyāḥ. veṣo veśa ākalpa ity anarthāntaram || 61 ||
drutagatipravaṇās turagā iva klamabhṛto divasā dhutakaṃdharāḥ |
śaradṛtor dadhatīṃ śriyam ūhire kamalakomalakorakahastatām || 62 ||
A° kamalānāṃ komalaṃ kuḍmalaṃ janānāṃ haste yatra tadbhāvaṃ dadhatīṃ śriyaṃ śaraddivasā ūhire dadhuḥ. turagā iva. tair api kamalahastā śrīr uhyate, tatsaṃnidhau śriyaḥ sthānāt. kaṃ jalaṃ śiraś ca dhārayantīti kaṃdharā jalabhṛto grīvāś ca. ‘saṃjñāyāṃ bhṛtṝvṛjidhārisahitapidamaḥ*’ iti khac || 62 ||
    • saṃjñāyāṃ bhṛtṝvṛjidhārisahitapidamaḥ (Aṣṭādhyāyī 3.2.46).
patati vṛṣṭir asau mayi nādhunā dinakarātapasevanalālasam |
iti vikāsam agād iva cintayac ciram udāramudā yutam ambujam || 63 ||
A° udārayā mudā yuktam itīva cintayaj jalajam ātapasevāsaspṛhaṃ vyakasat || 63 ||
jaladakālaniśāpagame sphuratsphuṭatarāmalacandrakarājitaiḥ |
kvacid avāpyata citraśikhaṇḍibhir na rucirā rucir ākaluṣīkṛtaiḥ || 64 ||
A° candrakai rājitāḥ śobhitās taiś citraiḥ śikhaṇḍibhir mayūrai rucirā rucir nālabhyata. citraśikhaṇḍinaś ca saptarṣayaḥ. taiś candrakarair ajitair api niśāpagame na dīpyate || 64 ||
gaganam īyivad āplavanakriyāsamabhihāram ivāmbumucāṃ jalaiḥ |
abhṛta candramasā samam uccakair avikalaṃ vikalaṅkatayā śriyam || 65 ||
A° īyivat gatam. samabhihāraḥ paunaḥpunyam. avikalaṃ samagram || 65 ||
bhuvanatāpavighātaviparyayasthitivilakṣatayeva vipāṇḍavaḥ |
śaradi nūnam ayukchadakānanair asamahāsam ahāsiṣatāmbudāḥ || 66 ||
A° tāpavighātasya viparyayo 'nyathātvam atrāparighātaḥ. tatsthityā vilakṣatā trapā. ayukchadāḥ saptacchadās teṣāṃ kānanaiḥ, ayukchadakānāṃ vā ānanair mukhair asamahāsaṃ kṛtvā niyatam ambudā ahāsiṣata. vayam adhunā tāpopaghātapaṭavaḥ, na yūyam itīva vikasvaratvena hasitā ity arthaḥ. hāso vikāso hasanaṃ ca. ahāsiṣatety upadhāvṛddhir ātmanepadaviṣayatvāc ciṇvadbhāvaprasaṅgāc ca. tasmāt kānanakartṛko 'samo hāso yatra tathā kṛtvā aha kaṣṭaṃ āsiṣateti yojyam || 66 ||
asalilāhimaśītamahāhradāḥ śaśabhṛto janatādavathucchidaḥ |
kumudakhaṇḍagataṃ madhupāyinām adalayan dalayantraṇam aṃśavaḥ || 67 ||
A° candrāṃśavo bhramarāṇāṃ kumudeṣu dalayantraṇaṃ pattrabandham adalayan bibhiduḥ. davathuḥ saṃtāpaḥ || 67 ||
sthagayituṃ pratikūlavilokanāḥ kusumitāḥ kakubho nu viyoginām |
kamaladhūlim udānayatādhikastavanato vanato 'nilasaṃhatiḥ || 68 ||
A° adhikastavanato ramyatayā bahalastutibhājo vanataḥ kānanāj jalād vā kamalarajo vātānāṃ samūhaḥ ..., kusumitatvād viruddhadarśanā diśaḥ pidhātum iva. kusumitā rajasvalā api. nuśabda ivārthe || 68 ||
rucir atanyata nirjhariṇītaṭaiḥ śakunipādahatair galitāmbubhiḥ |
nakhapadāṅkanirambarasundarījaghanajā ghanajālatiraskṛtau || 69 ||
A° ghanānāṃ jālasya tiraskṛtir antardhānaṃ yatra tasyāṃ śaradi nadītaṭair jaghanajā kāntir atanyata. śakunayaḥ khagāḥ || 69 ||
kusumam ārtavam udvahad ucchvasanmadhu karīracitasthitiucchvasan madhukarīracitasthiti kānanam |
na navam āttavatāṃ madhupāyinām alasatā lasatām abhavat kvacit || 70 || '
A° ucchvasan madhu makarandaṃ yatra, karīraiś ca tarubhedaiś citā vyāptā sthitir yasya tādṛśaṃ vanaṃ gṛhītavatāṃ bhramarāṇām alasatā kvacin nāsīt. kusumam apy ucchvasad vikasvaraṃ madhukarībhiś ca racitasthiti kṛtāvasthānam. ṛtuḥ prāpto 'syārtavam, ‘ṛtor aṇ*’ ity aṇ. lasatāṃ krīḍatām || 70 ||
    • ṛtor aṇa (Aṣṭādhyāyī 5.1.105).
na khalu bāṇagaṇena śarāsanaśriyam ṛtor dadhato vitathākhyatā |
priyaviyuktapuraṃdhrimanobhidā balavatālavatāpakṛtā dadhe || 71 ||
A° vitathā niṣphalā ākhyā pratītir yeṣāṃ tadbhāvo bāṇākhyakusumasamūhena śaratsaṃbandhinā dhṛtaḥ, viyoginīmanobhedanāt. bāṇāś ca śarāḥ sūkṣmaśaravyabhedakā vitathapratītayo na bhavanti. śarā asanāś ca tarubhedāḥ, śarāsanaṃ ca dhanuḥ. alavaṃ prabhūtaṃ tāpaṃ karoti yas tena || 71 ||
sthitir avāpi rasakriyayeva ca sphuṭatarāgamaśodhitatārayā |
kṣapitakālikacandrarucollasatkamalayāmalayā śaradaḥ śriyā || 72 ||
A° rasaḥ pāradaṃ tatkriyā dhātuvādas tayeva śaracchriyā sthitir avāpi padaṃ nibaddham. āgamaḥ pravṛttiḥ śāstrasaṃpradāyaś ca. tārā nakṣatrāṇi tāraṃ ca rūpyam. kālikā kalaṅko vyājaś ca tāmrādikṛtaḥ. candraḥ śaśī suvarṇaṃ ca. kamalāni padmāni, kamalā ca lakṣmīḥ || 72 ||
prasṛtamandasamīrahatikvaṇatkaṇiśarāśi śarajjayaghoṣaṇām |
ciram iva vyadhitāvanimaṇḍalaṃ sakalamaṃ kalamandraravākulam || 73 ||
A° kaṇiśaṃ sasyamañjarī. kalamaḥ śālibhedaḥ. kalo manoharo mandraś ca yo ravas tenākulaṃ kṛtvā || 73 ||
śaradi haṃsagaṇasya kuṭumbinīrasavitīrṇabisasya riraṃsayā |
samavagāḍhum adhautavinirmalaṃ navasaro 'vasaro 'ticirād abhūt || 74 ||
A° navaṃ saro viloḍayituṃ haṃsānāṃ gaṇasyāvasaraḥ prasaṅgaś cirād abhūt. kuṭumbinyaḥ priyā haṃsyaḥ || 74 ||
salilatonmadahaṃsaravākulo bhavanamārga ivātimanoharaḥ |
abhṛta niṣkuṭajāṃ śriyam uccakaiḥ sa samayo 'samayogaśaśiprabhaḥ || 75 ||
A° niṣkuṭajā kuṭajarahitā, kuṭajānāṃ vārṣikatvāt. niṣkuṭā gṛhārāmās tebhyaś ca jātā. asamo 'nanyasadṛśaḥ. śaśiprabhā yoṣito 'pi, śaśinaḥ prabhā yāsām iti kṛtvā || 75 ||
madhupaśāvam adhāyayad uccakair aviśadāravam aṅkavivartinam |
stanam iva stabakaṃ vratatiḥ sravannijarasaṃ jarasaṃ vyatipetuṣī || 76 ||
A° apāyayat pāyayāmāsa. kvacit ‘adhāpayat’ iti pāṭhaḥ, tatra ‘pādiṣu dheṭa upasaṃkhyānam*’ iti ‘nigaraṇa-*’ iti prāptasya parasmaipadasya niṣedhāt kartrabhiprāye kriyāphale ‘ṇicaś ca*’ iti taṅ. raso madhu stanyaṃ ca. jarasaṃ vyatipetuṣī jarām atikrāntā. ‘jarāyā jaras anyatarasyām*’ iti jaras || 76 ||
    • pādiṣu dheṭa upasaṃkhyānam (Mahābhāṣya ad Aṣṭādhyāyī 1.3.89).
    • nigaraṇacalanārthebhyaś ca (Aṣṭādhyāyī 1.3.87).
    • ṇicaś ca (Aṣṭādhyāyī 1.3.74).
    • jarāyā jaras anyatarasyām (Aṣṭādhyāyī 7.2.101).
sarabhasātmapuraḥsarasārasīrasabharāplutasārasarāsitam |
sarasakesaratāmarasaṃ saraḥ sarasatām alināṃ rasatāṃ vyadhāt || 77 ||
A° sarabhasenātmanā hetunā puraḥsarāsu sārasīṣu anurāgabhareṇa pūritā ye sārasā lakṣmaṇās tair mukharitaṃ saro bhramarāṇāṃ kvaṇatāṃ sarasatvam akarot. raso rāgaḥ || 77 ||
prakaṭatālalayaṃ śukavāraṇe kalamagopavadhūnavagītakam |
mṛgagaṇasya manaḥ śrutam ākṣipat pracurasasyarasasya jighatsataḥ || 78 ||
A° tālāḥ karayoḥ parasparam abhighātāḥ, teṣāṃ layaḥ śobhā śleṣo vā. gītam eva gītakaṃ gānam. gītakaṃ madrakādiviśiṣṭaṃ gītaṃ prakaṭatālalayaṃ bhavati. tatra tālāś cañcapuṭacācapuṭādayaḥ. teṣāṃ layo drutamadhyavilambitabhedena tridhā kālāntarānuvṛttiḥ. uktaṃ ca-‘tālaḥ kālāntarasthāyī drutamadhyavilambitaḥ | tridhā laya iti prokto badarāmalabilvavat ||’ iti. pracure sasye raso yasya. jighatsatas tad evāttum icchataḥ || 78 ||
srutamado girikānanavartmani pratikarīti karīrakulākule |
marud ayukchadasaurabhasaṃbhṛtaḥ kṣubhitatābhitatān akṛta dvipān || 79 ||
A° samadaḥ pratigajo 'treti bhrāntyā kṣubhitatā kṣobhas tayā vyāptān anilaḥ kuñjarān akarot || 79 ||
[iti śarat ]
himaṛtau nalinī nalinānanaśriyam udūḍhamanoramakarṇikām |
tuhinareṇujarāgamaviplavair vimalitām alitāpakṛtaṃ dadhau || 80 ||
A° himaṛtāv ity atra ‘ṛty akaḥ*’ iti prakṛtibhāvaḥ. karṇikā bījakoṣaḥ karṇābharaṇaṃ ca, karṇau ca śrotre. vimalitā mṛditā dhavalitā ca, ata evālināṃ tāpakṛt || 80 ||
    • ṛty akaḥ (Aṣṭādhyāyī 6.1.128).
atanuśītapariplavabhītitaḥ sahimamārutavellitayā babhau |
saparirambha ivopavanadrumaś caturayāturayā latayā kṛtaḥ || 81 ||
A° śītabādhabhayenārtayeva latayā sāliṅganaḥ kṛtas taruḥ śuśubhe. caturayā prauḍhayā || 81 ||
maruti vāti tuṣārakaṇākule kamitur āhitasītkṛtavibhramā |
abhimukhaṃ valati sma dhutasphuratkaratalā ratalālasayā vadhūḥ || 82 ||
A° rate lālasā ruciḥ || 82 ||
[iti hemantaḥ ]
samaya eva guṇo 'py upayujyate saparirambharuciṃ dayitaṃ striyāḥ | |
stanayugoṣmabharaḥ śiśirāgame yad akarod akaroṣṇimagopatau || 83 ||
A° nāsti karāṇām uṣṇimā saṃtāpo yasya tādṛśo gopatir aṃśumān yatra || 83 ||
aviralaṃ ghanasāracayair iva sphuṭitapuṣpaparāgakadambakaiḥ |
churayati sma mukhāny abhito diśām anavaro navarodhramahīruhaḥ || 84 ||
A° ghanasāraṃ karpūram. mukhāni vadanāny api. anavaraḥ śreṣṭhaḥ || 84 ||
sthagitadiṅmukhahaimarajaḥplutaṃ madhukaraḥ kamalākaram atyajat |
tyajati kaḥ prakṛtopakṛtiṃ janaḥ sapadi nāpadi nāma malīmasaḥ || 85 ||
A° haimaṃ tuhinasaṃbandhi. kamalākaraḥ śrīprado 'pi. āpadi malinaḥ ko nāma prakarṣeṇa kṛtopakāram api na muñcati. ‘praṇayaprakṛtim’ iti pāṭhe snehakāraṇam ity arthaḥ || 85 ||
apaciteṣu pareṣu viṣaṇṇatām upagataṃ kusumeṣv aham utthitam |
tapasi kundam itīva hasat kvaṇanmadhukarālikarālitam abhyadhāt || 86 ||
A° kvaṇatāṃ bhramarāṇāṃ paṅktyābhivyāptatvād ittham iva kundaṃ tapasi māghe 'bhyadhāt. hasad vikasat || 86 ||
dayitakaṇṭhagatā api visphuṭannavalavaṅgasamīrahatāḥ striyaḥ |
himaṛtor udakaṇṭhiṣatodayād araśanair aśanair jaghanaiś citāḥ || 87 ||
A° himartor udayāt aśanair amandaṃ aṅganā udakaṇṭhiṣata sotkaṇṭhā jātāḥ. lavaṅgaṃ puṣpabhedaḥ. araśanaiḥ śītavaśān mekhalāśūnyaiḥ || 87 ||
priyaviyuktavadhūhṛdayaiḥ samaṃ śiśiravāyubhir etya vikampitāḥ |
kusumitāḥ phalinītatayo babhur madhurasādhurasārthimadhuvratāḥ || 88 ||
A° phalinī priyaṃgulatā. sādhuḥ śreṣṭhaḥ. madhuvratā bhramarāḥ || 88 ||
agaṇitaprasavāntaraviplavavyatikaraḥ sphuṭasaurabham āśritaḥ |
alir amaṃsta mahat tapasaḥ phalaṃ navalavaṅgalavaṃ gahane gireḥ || 89 ||
A° girigahane bhramaro lavaṅgasya lavam āśritas tapaso māghasya phalaṃ tam evājñāsīt. girigahanasthaś ca munis tapaso vratasya phalaṃ dvandvasahiṣṇutādi samanubhavati. prasavo janmāpi. saurabhaṃ yaśo 'pi || 89 ||
dhṛtagurūṣmapayodharamaṇḍalīnibiḍapīḍitavallabhavakṣasām |
kṣaṇadayā sudṛśāṃ suratotsavakṣamatayā matayā ratir ādadhe || 90 ||
A° kṣaṇadā rātriḥ, tasyāḥ suratotsave kṣamatvaṃ dīrghataratvāt || 90 ||
smṛtibhuvā hṛdi śalya ivārpite dadhati dārḍhyam atīva ca khādire |
na rajanīrajanīcarayoṣitā jagati kā virahe 'vacakhādire || 91 ||
A° rajany eva rākṣasī tayā ca kā yoṣito nāvacakhādire? sarvā eva grastāḥ. khādiraṃ śalyaṃ khadiradārumayaḥ kīlakaḥ || 91 ||
mṛgdṛśām abhavat saha vallabhair asamahāsaratālavalīlatā |
śriyam adhān madhunā kṛtaṣaṭpadīrasamahā saratā lavalīlatā || 92 ||
A° nāsti lavaś chedo yasyās tādṛśī līlā yasya tadbhāvo yoṣitām āsīt. asamahāsam asādhāraṇahasitaṃ rataṃ nidhuvanaṃ yasyāṃ sā. madhunā puṣparasena. saratā pravahatā. kṛtaḥ ṣaṭpadīnāṃ rasamaho rāgotsavo yayā sā lavalīnāma latā ca śuśubhe || 92 ||
kopaḥ ka eva dayite tam ihānayes tvam
āliṃ gatānavamamandarasānunīti |
tenāgatena lalanā gamitā prasādam
āliṅgatā navam amandarasānunīti || 93 ||
A° ‘dayitaṃ prati na kopo yuktaḥ, tam ānaya tvam’ ity āśayena yoṣid anavame śreṣṭhe mandarasya sānuni āliṃ gatā sakhī jagāma. navam apūrvaṃ amandarasā bahalānurāgā anunītiḥ prārthanā yatra tathā kṛtvā ca tena āliṅgatā saṃpariṣv ajamānena sā prasāditā || 93 ||
lakṣmīṃ vahantam ṛtubhir nagam ity udaṃśu-
ratnasthalīvikasitāmalakesarāgam |
draṣṭuṃ prabhur niragamallulite salīlam
īṣat spṛśan girisutām alake sarāgam || 94 ||
A° sthalīṣu vikasitā amalāḥ kesarāgā bakulataravo yasya taṃ giriṃ draṣṭuṃ sarāgam alake gaurī spṛśann īśvaro viniryayau. lulite kuṭilīkṛte || 94 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye ṛtuvarṇano nāma tṛtīyaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote tṛtīyaḥ sargaḥ ||