Kāvyamālā 22, E Text Acharya

[description of manuscript]

More ▾
Title Haravijaya
Commentary [title of commentary]
Author [author]
Commentator [commentator]
Physical description
Language/Script [Sanskrit in Latin script.]
Format e-text
Material digital
History
Date of production unclear
Place of origin
Provenance [record of ownership]
Acquisition [how it was acquired]

tṛtīyaḥ sargaḥ|

atha sa manthagirau sakalartubhir nijanijaprasavojjvalayā śriyā|
samam asevi kadācid upāśrito girijayārijayānaghadordrumaḥ||1||
madhupa rāji parājita māninī jana manaḥ sumanaḥ surabhi śriyam|
ābhṛta vāritavarijaviplavāṃ sphuṭitatāmratatāmravaṇaṃ jagat||2||
drutam apāsya yamena niṣevitām abhinavotkatayeva divākaraḥ|
diśam aśiśriyad aiḍaviḍāśrayām asumatāṃ sumatāṃ vidadhat sthitim||3||
sthitim adhur madhurām avalambitastabakadarpaṇapallavapāṇayaḥ|
satilakojjvalapattralatā girer avanayo vanayogakṛtaśriyaḥ||4||
L
kṛtakuśeśayinīrucayo madhuvyatikarād abhimantharagāminaḥ|
madhuliho divasāś ca vadhūr vyadhuḥ paravatīr avatīrṇamanobhavāḥ||5||
dhruvam anekarasābhyavahārataḥ kṛtarasāyanasaṃgrahasusthitā|
madhulihām asukhāyata saṃhatir vṛtimatītim atītya kṛtasthitiḥ||6||
madhurayā parapuṣṭagirā śanaiḥ savayaseva sametya madhuśriyā|
mṛgadṛśo ghaṭitāḥ saha vallabhair mudam adhur damadhuryamanohṛtaḥ||7||
surabhitāṃ dadhati pramadānvito navamadhūpahitatviṣi campake|
surataharmya ivāracitasthitir navaratām baratāṃ madhupo 'nvabhūt||8||
kusumitā girikānanabhūmayaḥ kisalayādharakhaṇḍanalālasaiḥ|
parabhṛtaiḥ śradadhāyiṣata priyāḥ sumadanā madanāditaṣaṭpadāḥ||9||
madhurajṛmbhaṇavibhramamādhavīmadhurasāsavapānamadotkaṭāḥ|
madhuliho vyathayantu malīmasāḥ smarasahā rasahāsavātīḥ striyaḥ||10||
dadhadudañcitapakṣmakarālatāṃ kurabakastabako madhubodhitaḥ|
tadasamañjasameṣa dunoti yacchucitayā citayāpi viyoginīḥ||11||
tadabhidhāya tamānaya satvaraṃ madhuravādini tattaditi striyaḥ |
rasaniyuktasakhīvacanāgatapriyatamāyatamānamuco 'bhavan||12||
(tilakam)
L
jaraṭhapaṅkajabījasamatviṣo madhu nipātumabhiprajagalbhire|
madhuliho virahe kṛtadiṅmukhavyavadhayo vadhayogakṛtaḥ striyaḥ||13||
surabhimāsi kadācidanujjhitā jaḍatayāpi navāliśatānvitāḥ|
śamavatāmapi tāmarasākarāḥ sthiratarā ratarāgakṛto 'bhavan||14||
sarasamantharatāmarasādarabhramarasajjalayā nalinī madhau|
jaladhidevatayā sadṛśīṃ śriyaṃ sphuṭatarāgatarāgarucirdadhau||15||
caramapādavidhūtarajaḥ kaṇaprakaradhūsarapakṣatisaṃpuṭaḥ|
nyaviśatānugiraṃ kamalākarānrasamanāḥ samanādamalivrajaḥ||16||
mṛgadṛśo malayānilanirdhute sapadi mānarajasyapi sāgasaḥ|
nadayitānabhicukrudhurūrjitasmaratayā ratayānasamutsukāḥ||17||
taralapallavatāmrakarā babhau samadhumullasitabhramarotpalam|
kusumakoṣamivārpayituṃ latā vivalitā balitāpahṛtastaroḥ||18||
bhramarapaṅktinibhena manasvinībhrukuṭibandha ivāgalito 'bhavat|
kamalabhūmiṣu mānahatisphuṭaprasarakesaraketuśate madhau||19||
śiśirabhāsi cireṇa dinaśriyā kṛtasamāgamavighna upāgate|
kaluṣatāpi mukhe madhusaṃgamānna niśayāniśayāpitamānayā||20||
L
sarabhasaṃ śayanīya ivottaracchadakṛtatviṣi pītamadhūtkaṭaiḥ|
madhukarairvinipatya sajātibhiḥ sarasijorasi joṣamavasthitam||21||
nidhuvanāvasare kamiturvadhūrahṛta kuṭṭamitena bhṛśaṃ manaḥ|
taralalocananirjitavisphuratkuvalayā valayāvaliśobhinī||22||
smarasakhasya padaṃ surabheriva stanavatī dadhatī samamīmanat|
alakadeśaniveśaparisphurannavayavāvayavābharaṇaśriyam||23||
vidadhataḥ pathikakṣapaṇaṃ prati smṛtibhuvo nijaśaktyupabṛṃhaṇam|
dadhurahāryataṭāḥ sahakāritāmanavamā navamādhavasaṅginaḥ||24||
alibhirañjanabindumalīmasaiḥ smarabalairiva kaṅkaṭitairvṛte|
maruti saurabhaśālini nābhavansarati ke ratikelirasākulāḥ||25||
vikacapattrapuṭaṃ surabhiśriyaḥ sarasavibhramakāñcanapaṅkajam|
vyadhita campakam unmadanā vadhū rasakalāsakalālikulāravaiḥ||26||
rasabhayopagatāḥ pathikā gṛhān madhukarāñjanacūrṇavaśīkṛtāḥ|
mumudire parirambhasokhocchvasannijavadhūjavadhūtatanuklamāḥ||27||
L
śivapurīmiva śaivalasacchriyaṃ niviśamānamanargalamabjinīm
bhramarayugmamavekṣya na ka priyairyuvatayo bata yogamupāyayuḥ||28||
madhukarāñjanabindumanoramaprakaṭapattralatābharaṇojjvalāḥ|
na surabhāvabhavannatimuktakavratatayo tatayogaguṇaśriyaḥ||29||
mukhanilīnaśilīmukhacūcukaṃ kamalinīmukulamburuhastanam|
adadaratkamiteva na rāgvāndinakaro na karotkarakoṭibhiḥ||30||
smaramataṅgajadānajalacchaṭāvipinavāridhividrumavibhrage|
bhramarasaṃhatirāviravībhavatpracapalā ca palāśatarau śriyam||3||
animiṣākṣivilokitavibhramāṃ surabhimunmanaso navamālikām|
suravadhūmiva vīkṣya manobhuvo 'navaśamā vaśamāśu madhau yayuḥ||32||
suparimṛṣṭakapolatalasphuranmaṇikarālitakāñcanakuṇḍalaḥ|
na khalua bhīrujano 'nvabhavanmadhau na samado 'samadolanavibhramam||33||
smaramadīdipadūrdhvavilocanaṃ purariporiva yacchikhipiṅgalam|
sphuṭadaśokamudīkṣya tadutsukā na kamitā kamitāramalaṃ vadhūḥ||34||
L
vidhutapakṣmarajaḥ kapiśabhramabhramarasaṃhatimabjamukhāśriyam|
sacaṭulātilakāmiva padminī ghanarasa narasārthahṛdā dadhau||35||
[iti vasantaḥ]
śucidināgatirāplutiśītalāḥ sarasacandanapaṅkabhṛto 'karot|
priyasakhīva vataṃsitamallikāḥ stanavatīrnavatīvratanuklamāḥ||36||
spṛśati tigmarucau kakubhaḥ karairdayitameva vijṛmbhitatāpayā|
atanumānaparigrahayā sthitaṃ rucirayā cirayāyidinaśriyā||37||
sarasacandanapaṅkavilepanā kṛśatanurdadhatī sajalārdratām|
priyatamārahitāpi viyoginīsthitimitātimitākṣarasatkathā||38||
dinapateḥ kṣitimuttapataḥ punarvikaṭaṭaṅkanikuṭṭanaghaṭṭitam|
galati dhāma kimetaditi bhramaṃ bhṛtavatītavatī janatā klamam||39||
L
rucirayā girikānanamaṇḍalī śriyamadhattatarāṃ smaradīpikā|
rāpadi mallikayā racitasthitirna na ghanānaghanādavihaṃgamā||40||
ghaṭitaṣaṭpadapeṭakapāṭalāpaṭalasaṃpuṭapāṭanapāṭavam|
sphuṭatayā navabandhurasasurabhaprasaratā saratā marutā dadhe||4||
jitamahaṃ sukumāratayānayā praticikīrṣu śirīṣamitīkṣitam|
atiruṣeva viyogavatīṃ śūcaṃ sarasahāsadalaṃ sadalambhayāt||42||
[iti grīṣmaḥ]
dadhati yatra payodharapaṅktayo giriśakaṇṭharuciṃ jalamantharāḥ|
sa kṛtapānthavdhūjanavepathu rasamayaḥ samayaḥ sma vijṛmbhate||43||
aśamayaccirasaṃbhṛtamambhasās manasi mānakalaṅkamapi striyāḥ|
adhidaritri payodharadhoraṇī kimu rajo murajorjitagarjitā||44||
bhuvanasaṃvananātanubhasmabhiḥ kuṭajakesaradhūlikaṇaiścitāḥ|
surabhyo marutaḥ kṛtakāminīsmaravikāravikāsamavāsiṣuḥ||45||
vidadhatā navacandrakalāñchitāmanukṛtasmaravairitanuṃ śriyam|
phaṇibhujā samaye gurutāṇḍavavyasaninā saninādadhate sthitam||46||
prakaṭajātiśarīraruco dadhurvanabhuvo 'ntaramārgagatāṃ śriyam|
bharagalanmakarandakaṇacchaṭākavalanāvalanakulaṣaṭpadāḥ||47||
L
vikaṭamekalahemalatāspadāṃ ruciratāmacirārciracūcurat|
sajalameghagatāśu manasvinījanatayānatayāsakṛdīkṣitā||48||
smṛtibhuvo nijakārmukakarṣaṇaklamaviniḥśvasitairiva mārutaiḥ|
mṛgadṛśāmupavallabhamullasatpulakatālakatāṇḍavikairdadhe||49||
sphuritaśakraśarāsanahāriṇā kalayatā caturaṅgabalaśriyam|
ka iva te 'nuṛtorjitabhūbhṛtā ghanacayena ca ye na vaśīkṛtāḥ||50||
saharigopakamaikṣata bhūtalaṃ vrajamivāñcitalāṅgalikaṃ janaḥ|
kṣaṇarucāṃ samaye samadadhvanaddhanavare 'navareṇuhṛti kṣiteḥ||51||
nabhasi ketakacandradalojjvale kuṭajapuṣpacayena vikāsinā|
himavipāṇḍurucoḍugaṇāyitaṃ kalayatālayatāmānoḥ śriyaḥ||52||
vikira vāri vilolaya vidyuto nabhasi garja tiraskuru diktaṭān|
iti ghano viyutāmakṛtācaranna navaśāṃ navaśāntiparāṅmukhīm||53||
L
avasare malino 'pyupakārakaḥ kvacid itīva ravaistaruṇānbhraman|
stanitabhītapuraṃdhrinigūhanasthitimato 'timato 'bhidadhau ghanaḥ||54||
navadaladvayaśobhi dhanāgamaśriya ivābharaṇaṃ śravaṇāśrayam|
vyadhita hāri kadambamapi striyaḥ smaravśā ravaśāliśilīmukham||55||
dhanatamasyabalāḥ samavartinā dadṛśire virahaglapitā na yāḥ|
jagati tā iva darśayituṃ taḍitpraviralāviralātanibhābhavat||56||
sphuṭatarāmalakandalasacchriyaḥ pratidiśaṃ kamalinya ivābabhuḥ|
madhukaraurvakasadgirimallikāśabalitā valitā vanarājayaḥ||57||
kuṭajakandalanīpaśilīndhrajāṃ surabhitāṃ dadhadambudamārutaḥ|
vyadhita roṣarajaḥprasarojjhitā na na vadhūrnavadhūrgatamanmathāḥ||58||
smṛtibhuvo virahe navamālatīmukulamudgara eva vadhūrvyadhāt|
sphuṭamapaścimaghātavimūrchitā madarasādarasāravaṣaṭpadāḥ||59||
hariradāgra ivotthitakalike glapitamānatamā nabhasi sthite|
kamiva nāma na bāhulatāntatraṃ priyatamāyatamānayadīpsitam||60||
[iti varṣāḥ]
sphuritacārutarāpaghanaśriyā hṛdayanandanaśobhanaveṣayā|
dayitayeva janaḥ śaradāśrito mudamalaṃ damalaṅghanamācarat||61||
L
drutagatipravaṇāsturagā iva klamabhṛto divasā dhutakaṃdharāḥ|
śaradṛtordadhatīṃ śriyamūhire kamalakomalakorakahastatām||62||
patati ṛṣṭirasau mayi nādhunā dinakarātapasevanalālasam|
iti vikāsamagādiva cintayacciramudāramudā yutamambujam||63||
jaladakālaniśāpagame sphuratsphuṭatarāmalacandrakarājitaiḥ|
kvacidavāpyata citraśikhaṇḍibhirna rucirā rucirākaluṣīkṛtaiḥ||64||
gaganamīyivadāplavanakriyāsamabhihāramivāmbumucāṃ jalaiḥ|
abhṛta candramasā samamuccakairavikalaṃ vikalaṅkatayā śriyam||65||
bhuvanatāpavighātaviparyayasthitivilakṣatayeva vipāṇḍavaḥ|
śaradi nūnamayukchadakānanairasamahāsamahāsiṣatāmbudāḥ||66||
asalilāhimaśītamahāhradāḥ śaśabhṛto janatādavathuchidaḥ|
kumudakhaṇḍagataṃ madhupāyināmadalayandalayantraṇamaṃśavaḥ||67||
sthagayituṃ pratikūlavilokanāḥ kusumitāḥ kakubho na viyoginām|
kamaladhūlimudānayatādhikastavanato vanato 'nilasaṃhatiḥ||68||
L
ruciratanyata nirjhariṇītaṭaiḥ śakunipādahatairgalitāmbubhiḥ|
nakhapadāṅkanirambarasundarījaghanajā ghanajālatiraskṛtau||69||
kusumamārtavamudvahaducchavasanmadhukarīracitasthiti kānanam|
na navamāttavatāṃ madhupāyināmalasatā lasatāmabhavatkvacit||70||
na khalu bāṇagaṇena śarāsanaśriyam ṛtor dadhatā vitathākhyatā|
priyaviyuktapuraṃdhrimanobhidā balavatālavatāpakṛtā dadhe||71||
sthitiravāpi rasakriyayeva ca sphuṭatarāgamaśodhitatārayā|
kṣapitakālikacandrarucollasatkamalayāmalayā śaradaḥ śriyā||72||
prasṛtamandasamīrahatikvaṇatkaṇiśarāśiśarajjayaghoṣaṇām|
ciramiva vyadhitāvanimaṇḍalaṃ sakalamaṃ kalamandraravākulam||73||
śaradi haṃsagaṇasya kuṭumbinīrasavitīrṇabisasya riraṃsayā|
samavagāḍhumadhautavinirmalaṃ navasaro 'vasaro 'ticirādabhūt||74||
salilatonmadahaṃsaravākulo bhavanamārga ivātimanoharaḥ|
abhṛta niṣkuṭajāṃ śriyamuccakaiḥ sa samayo 'samayogaśaśiprabhaḥ||75||
L
madhupaśāvamapāyayaduccakairaviśadāravamaṅkavivartinam|
stanamiva stabakaṃ vratatiḥ sravannijarasaṃ jarasaṃ vyatipetuṣī||76||
sarabhasātmapuraḥ sarasārasīrasabharāplutasārasarāsitam|
sarasakesaratāmasaraṃ saraḥ sarasatāmalināṃ rasatāṃ vyadhāt||77||
prakaṭatālalayaṃ śukavāraṇe kalamagopavadhūnavagītakam|
mṛgagaṇasya manaḥ śrutamākṣipatpracurasasyarasasya jighatsataḥ||78||
srutamado girikānanavartmani pratikarīti karīrakulākule|
marudayukchadasaurabhasaṃbhṛtaḥ kṣubhitatābhitatanakṛta dvipān||79||
[iti śarat]
himaṛtau nalinī nalinānanaśriyamudūḍhamanoramakarṇikām|
tuhinareṇujarāgamaviplavairvimalitāpakṛtaṃ dadhau||80||
atanuśītapariplavabhītitaḥ sahimamārutavellitayā babhau|
saparirambha ivopavanadrumaścaturayāturayā latayā kṛtaḥ||81||
L
maruti vāti tuṣārakaṇākule kamiturāhitasītkṛtavibhramā|
abhimukhaṃ valati sma dhutasphuratkaratalā ratalālasayā vadhūḥ||82||
[iti hemantaḥ]
samaya eva guṇo 'pyupayujyate saparirambharuciṃ dayitaṃ striyāḥ|
stanayugoṣmabharaḥ śiśirāgame yadakarodakaroṣṇimagopatau||83||
aviralaṃ ghanasaracayairiva sphuṭitapuṣpaparāgakadambakaiḥ|
churayati sma mukhānyabhito diśāmanavaro navarodhramahīruhaḥ||84||
sthagitadiṅmukhahaimarajaḥplutaṃ madhukaraḥ kamalākaragatyajat|
tyajati kaḥ prakṛtopakṛtiṃ janaḥ sapadi nāpadi nāma malīmasaḥ||85||
apaciteṣu pareṣu viṣaṇṇatāmupagtaṃ kuṣumeṣvahamutthitam|
tapasi kundamitīva hasatkvaṇanmadhukarālikarālitamabhyadhāt||86||
dayitakaṇṭhagatā api visphuṭannavalavaṅgasamīrahatāḥ striyaḥ|
himaṛtorudakaṇṭhiṣatodayādaraśanai raśnairjaghanaiścitāḥ||87||
priyaviyuktavadhūhṛdayaiḥ samaṃ śiśiravāyubhiretya vikampitāḥ|
kusumitāḥ phalinītatayo babhurmadhurasādhurasārthimadhruvatāḥ||88||
agaṇitaprasavāntaraviplavavyatikaraḥ sphuṭasaurabhamāśritaḥ|
aliramaṃsta mahattapasaḥ phalaṃ navalavaṅgalavaṃ gahane gireḥ||89||
dhṛtagurūṣmapayodharamaṇḍalīnibiḍapīḍitavallabhavakṣasām|
kṣaṇadayā sudṛśāṃ suratotsavakṣamatayā matayā ratirādadhe||90||
L
smṛtibhuvā hṛdi śalya ivārpite dadhati dārḍhyamatīva ca khadire|
na rajanīrajanīcarayoṣitā jagati kā virahe 'vacakhādire||91||
mṛgadṛśāmabhavatsaha vallabhairasamahāsaratālavalīlata|
śriyamadhānmadhunā kṛtaṣaṭpadīrasamahā saratā lavalīlatā||92||
kopaḥ ka eva dayite tamihānayestva-
māliṃ gatā navamamandarasānunīti|
tenāgatena lalanā gamitā prasāda-
māliṅgatā navamamandarasānunīti||93||
lakṣmīṃ vahantamṛtubhirnagamityudaṃśu-
ratnasthalīvikasitāmalakesarāgam|
draṣṭuṃ prabhurniragamallulite salīla-
mīṣatspaṣṭaśangirisutāmalake sarāgam||94||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye ṛtuvarṇano nāma tṛtīyaḥ sargaḥ|