Pasedach 2011

Siglum: P11

Provisional Edition of the Haravijaya.XXX FIX HEADER XXX

More ▾

Title	Haravijaya
Author	Ratnākara

Physical description
Language/Script	Sanskrit in Latin script.
Format	digital
Material	digital
Extent	something we need here.

History
Date of production	2011
Place of origin	Hamburg

Sarga 2: Tāṇḍāvavarṇanaḥ

krīḍārasena sa kadācid athādhisānu

līlāvalambitahimādrisutākarāgraḥ |

pratyagrakāñcanalatāñcitasaṃniveśam

ākrīḍamaṇḍapam amaṇḍayad aśmadhāmnaḥ || 01 ||

Utpala: oṃ namo vighnahantre || krīḍā | aśmadhāmno 'dreḥ prakaraṇāc ca mandarasyaiva sānuni udyānamaṇḍapaṃ bhagavān alaṃcakāra || 1 ||

tasmin kṛtāsanaparigraham adrirāja-

kanyānukūlarasadigdhakathāvidagdham |

anyonyaghaṭṭanavicūrṇitaratnabandha-

hemāṅgadās tam amarādhibhuvo 'dhijagmuḥ || 02 ||

Utpala: tasmi | rasadigdhāḥ śṛṅgārācitāḥ hemamayāny aṅgadāni keyūrāṇi amarādhibhuvo deveśās tam abhiyayuḥ || 2 ||

vellajjaṭāpaṭalaśevalavallarīkāṃ

cūḍendukhaṇḍakuṭilorumṛṇāladaṇḍām |

ākāśasindhum avataṃsakapālahaṃsa-

hāsām amī dadhatam aikṣiṣatainam ārāt || 03 ||

Utpala: vella | calajjaṭāvalayam eva śevālalatā yatra cūḍeṇḍukhaṇḍa eva bisadaṇḍo yasyāḥ tathāvidhāṃ gaṅgāṃ bibhrāṇam enaṃ haraṃ deveśā aikṣiṣanta | adrākṣur iti | dantaprabhetyādiślokaṃ L yāvat kriyā || 3 ||

karṇāvataṃsaghaṭitotphaṇadandaśūka-

phūtkāramārutaparāhatalocanotthaiḥ |

riktīkṛtāṃ śikhikaṇaprakaraiḥ satoṣa-

gaurīkṣitāṃ suranadīm śirasā vahantam || 04 ||

Utpala: karṇā | dandaśūka uragaḥ | agnikaṇair alpīkṛtatvāt satoṣayā gauryā īkṣitāṃ sapatnībhūtatvāt || 4 ||

cūḍāgatena jaḍadīdhitinā tanutvam

āseduṣā sarabhasaṃ pravivikṣuṇārāt |

bhāsvallalāṭataṭanākatalārkabimbam

adhyāsyamānam iva bibhratam ūrdhvacakṣuḥ || 05 ||

Utpala: cūḍā | lalāṭam eva vyoma tatrārkabimbam iva ūrdhvacakṣur dadhatam | jaḍadīdhitinā candreṇa tanutvam prāptena satā tatraiva praveṣṭukāmenaivādhyāsyamānam | śaśī hi kṣīṇaḥ san vṛddhaye sūryamaṇḍalaṃ viśati || 5 ||

śailātmajāvadanacandramasaḥ kathaṃ nu

lekhāpi me na sadṛśī śaśinā saśokam |

ūrdhvekṣaṇotthaśikhinīva nipitsunettham

adhyāsitonnatalalāṭataṭopakaṇṭham || 06 ||

Utpala: śailā | saśokaṃ kṛtvā lalāṭanetrāgnau patitukāmeneva || 6 ||

stamberamājinagalatkṣatajāvaseka-

saṃpāditāruṇarucā kvacid uttamāṅge |

tāmbūlarāgaparipāṭalayeva danta-

paṅktyā virājitakirīṭakapālakhaṇḍam || 07 ||

Utpala: stambhe | stambheramājinaṃ gajacarma kṣatajaṃ rudhiraṃ || 7 ||

jyotsnārucāmbaram alaṃ vimalaṃ diśantam

induṃ nidhāya mukuṭe dayitāyamānam |

tallāñchanacchavim ivātanukālakūṭa-

cchāyāchalena dadhataṃ pṛthukaṇṭhalagnām || 08 ||

Utpala: jyotsnā | ambaram atiśayena vimalaṃ diśantaṃ candraṃ maulau nidhāya tatraivalāñchanacchāyām iva dadhatam | anyo 'pi durlabhaparivāraṃ kaṇṭhalagnaṃ bibharti || 8 ||

saṃhārakālakavalīkṛtasaptalokām

ambhodhibhārabharamantharameghanīlām |

kaṇṭhāntarālaparivartinipītadhūma-

vartitviṣaṃ viṣamayīṃ dadhataṃ ca lekhām || 09 ||

Utpala: saṃhā | lokagrāsānantaraṃ | pītāyāḥ kaṇṭhāntarvartinyā dhūpavarter iva tviḍ yasyāḥ || 9 ||

preṅkhatkarālamaṇiśaṅkhasahasraśāra-

hāroragendraphaṇabhaṅguravīcicakram

kaṇṭhasthitotkaṭaviśaṅkaṭakālakūṭa-

kūṭaprabhāprakarakūrmagṛhaṃ vahantam || 10 ||

Utpala: preṅkha | sphuranto maṇaya eva śaṅkhās tacchavalasya hārāheḥ phaṇā iva vīcijālaṃ yatrotkaṭo bhīṣaṇo viṣaṅkaṭaś chavis tīrṇo yaḥ kālakūṭarāśis tasya prabhā prakaraḥ samūhaḥ kūrmagṛhaṃ samudraḥ || 10 ||

bhasmāṅgarāgadhavalaṃ parapuṣṭapiccha-

cchāyāṅgadoragaphaṇākulitāṃsakūṭam |

aurvāgnidhūmamalinīkṛtavīcibhaṅga-

dugdhormimālisadṛśīṃ śriyam āśrayantam || 11 ||

Utpala: bhasma | parapuṣṭāḥ kokilāḥ | dugdhormimālī kṣīrābdhiḥ || 11 ||

keyūrapannagaviniḥśvasitāhatāṃsa-

kūṭotthitena navadhūlanabhasmanoccaiḥ

sāvartacakram upari bhramatendubimba-

saṃvāditām upagatena virājamānam || 12 ||

Utpala: keyū | aṅgadārthaṃ pannaga uragaḥ sāvartacakraṃ kṛtvopari bhramatāta evendubimbasāmyam gatena || 12 ||

gambhīrakaṇṭhakuharāspadakālakūṭa-

niryatprabhādhikamalīmasabhogihāram |

vakṣaḥsthalaṃ tuhinaśailaśilāviśālam

ālambinīlanalinasrag ivodvahantam || 13 ||

Utpala: gambhīra | nīlanalinasrak kuvalayadāma || 13 ||

aṅkāśrayāṃ rucirakāñcanabhaṅgapiṅga-

cchāyābhirāmavapuṣaṃ himaśailakanyām |

kurvantam añjanamalīmasakālakūṭa-

kaṇṭhaprabhābhir abhitaḥ punar eva kālīm || 14 ||

Utpala: aṅkā | kanakabhaṅgavat piṅgā gaurī chāyā kāntiḥ punaḥ kālīṃ kurvantaṃ yato devyāḥ kālīty aparaṃ nāma || 14 ||

saṃvījyamānam asakṛt kakudopadhāna-

baddhāspadaṃ dviguṇitonnatabāhudaṇḍam |

lāṅgūlacāmarakarālaśikhāmarudbhir

udbhinnabhaktimanaseva kakudmatārāt || 15 ||

Utpala: saṃvī | [missing] || 15 ||

sevāgatāmaragaṇādhipapārijāta-

karṇāvataṃsasurabhīkṛtam aṅghriyugmam |

gandhānubandhimadhupapratibimbalakṣma-

śārodarair nakhaśaśiprakarair dadhānam || 16 ||

Utpala: sevā pārijātākhyaṃ devapuṣpaṃ nakhā eva śaśiprakarās tair upalakṣitam || 16 ||

dantaprabhādalitakaṇṭhaviṣāndhakāra-

cchāyasya saṃnidhijuṣaḥ karivaktramūrteḥ |

ūrdhvekṣaṇānalaruco ghanacīnapiṣṭa-

dhūlicchaṭā iva mukhe viniveśayantam || 17 ||

kulakam

Utpala: danta | sannidhijuṣo nikaṭavartino vināyakasya mukhe ūrdhvekṣaṇāgnirucas sindhuracchaṭā iva haṭhād viniveśayantam || 17 ||

tasmai praṇamya maṇimauliviṭaṅkakoṭi-

ṭaṅkāhatikvaṇitakāñcanapādapīṭham |

śailādinā nataśiraḥsu nivediteṣu

teṣūcitāsanaparigrahanirvṛteṣu || 18 ||

Utpala: [See 2.19.]

ājaghnire svaraviśeṣakṛtāsthamārga-

citrapracārayatipāṇilayābhirāmāḥ |

vispaṣṭavādyavidhayaḥ karaṇānubandha-

bhājaḥ krameṇa murajāḥ sphuṭamārjanāṅkāḥ || 19 ||

yugalakam atra pāṭhāntaram

Utpala: tasmai | teṣu deveṣu śailādinā śilādāpatyena nandinā nivediteṣu | yathocitāsanaparigrahaś ca nirākuleṣu satsu murajā ājaghnire L āhatā iti dvābhyāṃ kriyā | maṇimayeṣu mauliṣu ye viṭaṅkā unnatā bhāgās tatprāntā eva ṭaṅkāḥ śastrakāṇi tadāhatyā raṇitapādapīṭhaṃ kṛtvā praṇamya svaraviśeṣeṣu ṣaḍjādiṣu kṛtasthitayo ye mārgā āliptān tritagomukhavitastākhyāḥ cittrā nānāvidhāḥ pracārāḥ samapracārā viṣamapracārās samaviṣamapracārāś ceti yatayas samās srotogatā gopucchāś ceti pāṇayaḥ samapāṇir avapā[-] ṇir uparipāṇiś ceti layā drutamadhyavilambitākhyāḥ etair abhirāmā vādyavidhayas tattvāghānugatākhyāḥ karaṇāni rūpaṃ kṛtapratikṛtaṃ pratibhedo rūpaśeṣa oghaḥ pariśuṣkā ceti mārjanāḥ māyūrī avamāyūrī karmāravī ceti | ślokasyāsya paro 'prāktano bhedaḥ kevalaṃ tatra vacaḥ kaṭabhāvaḥ pañcamaśūnyāmarahalāś ca | etacchlokārtha evoddeśaprasaṅganamunināpy artho yathā ṣoḍaśākṣarasampannaṃ caturmārgaṃ tathaiva ca dvivālaṃ ṣaṭkaraṇakaṃ triyati trilayaṃ tathā trigataṃ tripracāraṃ ca trisaṃyogaṃ tripāṇikam | †daśāvapāṇiprahabhaṃ† tripracāṛaṃ trimārjanam | viṃśatyalaṅkārayutaṃ tathāṣṭādaśajātikam | ebhiḥ prakāraiḥ sampannaṃ vādyaṃ puṣkarajaṃ bhaved iti | atra sarvatra lakṣaṇaṃ granthagauravabhayān nālekhi || 19 ||

nandīśanirdayakarāhatapuṣkareṣu

mandraṃ dhvanatsu murajeṣu vibhajya taṇḍuḥ |

āsāriteṣu parikalpitasaptabheda-

paryāptaśobham atha tāṇḍavam abhyagāyat || 20 ||

Utpala: nandī | nandirudreṇāhatāni puṣkarāṇi mukhāni yeṣām | ata eva mandram aparuṣaṃ raṇatsu murajeṣu | tāṇḍur nāma tāṇḍavaṃ tena proktaṃ gītakaviśeṣaṃ vibhajyā 'vāpādinā vibhāgīkṛtya jagau | kecit tu tāṇḍavasya sukumārāviddhabhedena dvaividhyād devīstave sukumāraṃ bhagavatsutau cāviddham iti vibhāgārtham āhuḥ | āsāriteṣu jyeṣṭhamadhyakaniṣṭhapūrveṣu L parikalpitā saptabhir bhedair āvāpaniṣkrāmavikṣepapraveśasya tālasannipātakhyair bahulā sobhā yatra || 20 ||

kroḍīkṛtādritanayāḥ śaśikhaṇḍamauli-

maulāpadānaracitastuti mātaras tat |

līlālalāmalalitābhinayaprapañca-

saṃcāracāru rasabhāvadṛśo 'bhininyuḥ || 21 ||

Utpala: kroḍī | maulam ādyam | apadānaṃ śubhaṃ karma | garbhībhūtā tadviṣayā stutir yatra tan mātaro devatā abhininyuḥ līlayeṣṭajanānukāre utkṛṣṭo lalitāś cābhinayasyāṅgikavācikā hāryasāttvikabhedāt prapañcas tadvaśāt saṃcāriṇyaś śūnyādibhedenāta eva | cārvo rasadṛṣṭayaḥ kāntādyā bhāvadṛṣṭayaś ca snigdhādyā yāsām || 21 ||

āpītapāṭalasitetarakundagaura-

dehatviṣo lalitanartanavibhramasthāḥ |

bhremur gaṇādhipatayo 'bhinayakriyāsu

mūrtā rasā iva pariṣkṛtaraṅgapīṭhāḥ || 22 ||

Utpala: āpī | āpītādidehakāntaya āhāryābhinayavaśāt gaṇādhipāś cārīprayogavaśād bhremuḥ | pariṣkṛtam alaṅkṛtam aṅgapīṭhaṃ yair mūrtāḥ śarīriṇo rasā iva te 'pi nānāvarṇāḥ | yad uktaṃ śyāmo bhavati śṛṅgāras sito hāsyaḥ prakīrtita ityādi || 22 ||

teṣāṃ puraḥ puraripau viṣamaprayoga-

nṛttopadeśarabhasāt svayam ujjihāne |

pātālarandhram abhavan natabhūmipīṭha-

niṣpiṣṭaśeṣaphaṇaratnakaṇāvakīrṇam || 23 ||

Utpala: teṣāṃ | purārau svayam ujjhihāne uttiṣṭhati sati || 23 ||

so 'bhyutthito bhuvanam ākulayāṃcakāra

vispaṣṭadṛṣṭatimiravyapalīnahaṃsam |

līlāvarāha iva dhūmajaṭāsaṭāgra-

viṣpandisindhujalaśīkaradurdinārdram || 24 ||

Utpala: so 'bhyu | spaṣṭadṛṣṭatimiratvena vyapalīno haṃsaḥ sūryo haṃsaś ca śuklacchadā pattriṇo yatra | kecitu dṛṣṭas timir matsyaprādurbhāvo yasyeti līlāvarāhaviśeṣaṇaṃ pṛthag āhuḥ | jaṭā eva saṭās tadagrāviṣyandinī sindhur gaṅgā | aparatra samudraḥ || 24 ||

bhasmāṅgarāgadhavaleṣu bhujeṣu tasya

kalmāṣayatsu gaganaṃ karavartanābhiḥ |

śubhrābhrarājicakitāḥ paripuñjyamāna-

picchāvacūlavapuṣaḥ śikhino vidadruḥ || 25 ||

Utpala: bhasmā | karavartanā udveṣṭitāpaveṣṭitavyāvṛttaparivartitākhyāḥ kamalavartanādyā vā śubhramegharājitaḥ śaratkālabhrāntyā bhramāś śikhino mayūrāḥ vidrūtāḥ || 25 ||

gāḍhāṅgadoragaphaṇāmaṇiraśmirāga-

rugṇāndhakāranikarāparapārśvabhūmeḥ |

śailasya bhāskararucām avadhes tadīya-

bāhudrumaiḥ sapadi cukṣudire 'śmakūṭāḥ || 26 ||

Utpala: gāḍhā | bhāskararucām avadheś śailasya lokālokasya śṛṅgāṇi cukṣudire cūrṇīkṛtāni || 26 ||

vikṣiptabāhunivahasya vihasya dikṣu

tasyāṅgahārakaraṇakramakampimūrdhnaḥ |

agrātipātisalilā surasindhur āpac

cīnāṃśukojjvalatiraskaraṇīvilāsam || 27 ||

Utpala: vikṣi | aṅgahāraḥ karaṇāni anyās sthirahastādayaḥ teṣāṃ karaṇaṃ prayuktiḥ | yad vā karaṇāni yuddhāny eva talapuṭādyāni gaṅgaiva paṭṭāṃsukanibhā śobhā prāpat || 27 ||

agre ninartiṣata eva vilocanāgnir

asyāśu piñjaritadiṅmukhacakrabālaiḥ |

tigmāṃśubimbakaṭakapratibaddhavṛttir

arcirbhir ātapatiraskariṇīṃ nirāsthat || 28 ||

Utpala: agre nartitum icchata ivāsyāgre sūryabimbam eva kaṭakaṃ tadbaddham | ātapam eva tiraskariṇīṃ netrāgnir arcirbhir nirāsthat | raṅgapīṭhāvatīrṇasya hi naṭasyāgrāj javanikā apasāryate || 28 ||

ākṣipyamāṇavividhābhinayaprabandha-

saṃdarśanārtham iva sarvadiśāṃ purastāt |

vispaṣṭarecakarayākulabāhudaṇḍa-

piṣṭādrikūṭanikarān akarot sa mārgān || 29 ||

Utpala: ākṣi | vividhāś catvāro 'bhinayā āṅgikādyāḥ | recako viśiṣṭaṃ bhramaṇaṃ | grīvā bāhvādīnāṃ diśāṃ nāyakatvam atra || 29 ||

tasyāṅgahāravalitātanunṛttahasta-

bhasmāṅgarāgadhavalonnatapīnabāhoḥ |

sāvartacakravikaṭormighaṭāsahasra-

saṃkīrṇadugdhajaladhipratirūpatāsīt || 30 ||

Utpala: tasyā | aṅgahārārthaṃ valitā bāhavo nṛttahastāś caturaśrādayaḥ | | tadvalanāt tulyam āvartacakraṃ pratirūpatā sāmyam || 30 ||

vistāraśālikanakācalabījakoṣa-

cakrasya nṛttavalanāsu sahasrasaṃkhyaiḥ |

phullajjapāruṇatalair bhuvanāravinda-

koṣasya pattrapaṭalāyitam asya hastaiḥ || 31 ||

Utpala: vistā | kanakācalo merur eva karṇikā yatra vikasajjapākhyapuṣpavad aruṇair hastaiḥ pattrapaṭalatvam ācaritam || 31 ||

pīnāṃsakūṭaghaṭitaṃ galakālakūṭa-

cchāyāniśānusaraṇārtham ivābhyupetam |

tenottamāṅgavidhutiślathamaulibandha-

visrastam induśakalaṃ bibharāṃbabhūve || 32 ||

Utpala: pīnā | kālakūṭacchāyaiva rātriḥ || 32 ||

tasyordhvalocanamarīcimato viśīrṇa-

piṅgatviṣaś ciram abhāvitarāṃ purastāt |

ābaddhavartanatayā vikasatkarāla-

raktāṅgulīdalakulaiḥ karapadmakhaṇḍaiḥ || 33 ||

Utpala: tasyo | ūrdhvalocanam eva marīcimān sūryaḥ tadagre karair eva padmair vikasadaṅgulīdalenaiva bhāvikūtam || 33 ||

saṃdehitādhavalabhāsmanadhūlidigdha-

taddordrumānilarayoddhatavīcibhaṅgāḥ |

dugdhodadher nabhasi paprathire muhūrtam

āliṅgitātanutarotkalikābhragaṅgāḥ || 34 ||

Utpala: sande | dhavalayā bhāsmanadhūlyāliptānāṃ tasya bhagavato bāhudrumāṇām anilavegenoddhatā vīcibaṅgā dugdhābdeḥ sambandhino vyomni prathitāḥ ata eva sandehitāḥ kiṃ bhasmācitā bhagavadbhujā utataraṇgāḥ iti athaś ca āsandehitāśca ā samantād bhasmadigdhair bhujair anilarayoddhatāś ca tā iti yojyam | kecit tu sandehitāḥ dhavalabhāsmanabhaktidigdhā iti pṛthak paṭhanti utkalikā laharyo gaṅgāyāś ca samāsoktyā nāyakatvād †draruhikā† api || L 34 ||

pātālaveśmagatabandhudidṛkṣayeva

vikṣipyamāṇamaṇibandhanabaddhasaṃsthāḥ |

tasya vyadhuḥ phaṇabhṛtaḥ phaṇacakramukta-

phūtkāramārutaviśīrṇajalān payodhīn ||35 ||

Utpala: pātā | maṇibandhanaṃ bāhuvalayasthānam | vyadhuḥ cakruḥ || 35 ||

vyaktāṅgahārakaraṇakramakīryamāṇa-

dordaṇḍamaṇḍalatayā bibharāṃcakāra |

saṃhāramārutavikampitakalpavṛkṣa-

kailāsaśailasadṛśīṃ śriyam indumauliḥ || 36 ||

Utpala: vyakta | kalpavṛkṣatulyā bāhavaḥ || 36 ||

tena vyadhīyatatarām iva vellitāgra-

dordaṇḍabhasmakaṇarājibhir ujjvalābhiḥ |

nirmitsyamānanijanṛttabharābhiyoga-

yogyāntarālabhuvanāntarasūtrapātaḥ || 37 ||

Utpala: tena | nirmartum iṣṭasya nijanṛttābhiyoge yogyāntarālasya paratrabhāgasya sūtrapāta iva bhagavatā sthapatineva kṛtaḥ || 37 ||

ārabdhanartanakarāṅgulikoṭibhāga-

niṣṭhyūtadīdhitiśikhālikhitācchalekham |

tasyābhavat sphuradanekasahasrasaṃkhya-

jihmāmṛtāṃśukalikāṅkam ivāntarikṣam || 38 ||

Utpala: āra | nakhāgranirgatadīdhitilekhitalekhatvād anekakuṭilacandrakalāṅkitam iva vyomābhūt || 38 ||

uddāmarecakarayabhramaṇānubandha-

saṃbaddhabudbudakaṇākulasiddhasindhuḥ |

lakṣmīm anujjhitakirātadaśāvanaddha-

nāgendrakañcuka ivāsya babhāra jūṭaḥ || 39 ||

Utpala: uddā | recako grīvāyā evātra | anubandhaḥ paunaḥpunyam | nāgendrasya vāsukeḥ | kañcuko nirmokaḥ || 39 ||

tadbāhughūrṇanavalanmṛgarājakṛtti-

vajrāśriśātanakhakoṭinipātabhītaiḥ |

digdantibhis tvaritakuñcitajānuparva-

kharvībhavadvikaṭakumbhataṭair viṣede || 40 ||

Utpala: tadbā | tasya | mṛgarājakṛttis siṃhacarma | tatra vajrakoṭivat śātās tīkṣṇā ye nakhās tatpātabhītair diggajair niṣaṇṇam || 40 ||

tasyāṅgahārakaraṇākulabāhudaṇḍa-

khaṇḍāspadā sapadi kesarirājakṛttiḥ |

tārāś cakarṣa karajaiś caṭulīkaḍāra-

cūḍājuṣaḥ priyam ivoḍupateś cikīrṣuḥ || 41 ||

Utpala: tasyā | caṭulī ulkā tadvat kapilā yā cūḍā tatsevinaś candrasya kāntāprāpaṇāt priyam iva kartum icchus siṃhakṛttis tārā ācakarṣa || 41 ||

dordaṇḍamārutavighaṭṭitaśailakūṭa-

dhūlicchaṭāpaṭaladhūsaram uṣṇadhāmnaḥ |

uddhūlanonmṛditabhasmarajobhir aicchad

īśaḥ pramārṣṭum iva bimbatalātmadarśam || 42 ||

Utpala: dordaṇḍa | īśo bhagavān bhasmarajobhir uṣṇadhāmno raver bimbam evādarśaṃ pramārṣṭum ivābhilalāṣa || 42 ||

lakṣmīpater iva nirargaladaṇḍapāda-

śākhāgrakoṭighaṭitaḥ kṣaṇam uṣṇaraśmiḥ |

tasyābabhāv adhinabho 'rghajalāvasakta-

padmāsanānamitaratnakamaṇḍaluśrīḥ || 43 ||

Utpala: lakṣmī | nirargalo niṣpratibandhaḥ śākhā aṅgulyaḥ adhinabho vyomni viṣṇor arghajalārtham iva sakto lagno brahmaṇānamito ratnamayo yaḥ kamaṇḍalus tattulyaśobhaḥ | hareḥ kila trailokyam ākramato brahmaṇā pādaḥ kṣālitaḥ || 43 ||

tasyāstarīṣata navābhinayakriyāsu

dikcakravālam abhitaḥ sthagitāntarikṣāḥ |

ambhodhimārgagamanābhimukhāḥ śirastha-

sindhupravāhanivahā iva bāhudaṇḍāḥ || 44 ||

Utpala: tasyā | āstarīṣata ācchādayāmāsuḥ || 44 ||

tena vyalokyata valadbhujadaṇḍakhaṇḍa-

caṇḍānilāhativighaṭṭanaviprakīrṇam |

prabhraṣṭam ambaratalād vidhutottamāṅga-

visrastaśekharakapāladhiyendubimbam || 45 ||

Utpala: tena | śekharakapālabhrāntibuddhyā indubimbaṃ dṛṣṭaṃ || 45 ||

brahmāsanāmburuham āhitasarvaloka-

kampe vibhoḥ śiśirakāla ivānukāre |

paryastabāhuvanadhūlanabhasmadhūli-

nīhārapātadalitacchadaśobham āsīt || 46 ||

Utpala: brahmā | bhayaśītakṛto vepatuḥ | anukāre nṛtte bhasmadhūlir eva himam || 46 ||

graiveyakoragaphaṇāmaṇicakravāla-

saṃdhyāruṇoḍuśabalaṃ sthagayāṃcakāra |

diṅmaṇḍalaṃ pralayakālaniśeva tasya

kaṇṭhaprabhā timiranīlaruciḥ sphurantī || 47 ||

Utpala: graive | grīvālaṅkārasyoragasya phaṇamaṇirāga eva sandhyālohitā uḍavas tārāḥ | uragaphaṇeṣūdgatarāgāṇi ratnāny eva † sandhyāruṇā tarava † iti tu pāṭhaḥ śreyān | timiravat nīlā rucir yasyāḥ kalpāntarātriś ca raktanakṣattraśavalā sāndhakārā ca || 47 ||

cūḍājaḍāṃśur api jūṭajaṭānikuñja-

baddhāspadaḥ pratidiśaṃ sucirād avāpa |

ārabdhanartanakarānilaghaṭyamāna-

tārāpuraṃdhriparirambhasukhāni śaṃbhoḥ || 48 ||

Utpala: cūḍā | jaḍāṃśuś candro 'tha ca jalaprakṛtir api †bhagavat kā† vartanāniloddhūyamānās tārā eva puranddhrayas tadālinganasukhāni prāpa | jaṭā eva nikuñjam | śṛṅgārī hi nāyikayā saha nikuñjabhāge āste || 48 ||

līlāvadhūtaśiraso 'sya valajjaṭāgra-

viṣyandisāndrasalilokṣitakoṭibhāgāt |

uccaṇḍatāṇḍavarasasya vinirjagāma

mandākinī madhuripor iva daṇḍapādāt || 49 ||

Utpala: līlā | asya śambhor līlāvadhūtāc chiraso viṣṇupadād iva gaṅgā niryayau || 49 ||

tasyāśu śoṇitam ivojjagarur gariṣṭha-

dordaṇḍaghātavidhurā girayas tadānīm |

udvartanānilarayotthitadhātavīya-

dhūlicchaṭāruṇitanirjharavīcibhaṅgāḥ || 50 ||

Utpala: tasyā | ujjagaruḥ †udavasann† iva | gariṣṭhā gurutarāḥ | dhātavīyā gairikādisambandhinī || 50 ||

tena vyadhāyiṣata bāhuvanaprakoṣṭha-

baddhāsitoragaphaṇāmaṇirāgapiṅgāḥ |

saṃhārakālarabhasotthitadhūmadaṇḍa-

kalmāṣitānalaśikhā iva digvibhāgāḥ || 51 ||

Utpala: tena | vyadhāyiṣata kṛtāḥ | prakoṣṭham antaraṃ vidyād āratnimaṇibandhayoḥ | asitāḥ kṛṣṇāḥ || 51 ||

tasyādhinṛttam analolbaṇadṛṣṭipāta-

lakṣyīkṛteṣu phaṇino maṇibandhaneṣu |

tattāpakhedaparivartanalakṣyamāṇa-

pītodarāḥ kanakakambuvilāsam āpuḥ || 52 ||

Utpala: tasyā | nṛttakāle maṇibandhanasthā phaṇino netrāgnilakṣīkṛtatvena aruṇodarāḥ kanakavalayaśobhāṃ prāpuḥ | kambuśabda upacārād valayamātravācī || 52 ||

sānandanandikaratāḍitapuṣkarāgra-

cetoharāṅkikapayodharanādahṛṣṭaḥ |

ārabdharecakalayaḥ kalayāṃcakāra

līlāṃ sa mecakagalaḥ sphuṭacandrakaśrīḥ || 53 ||

Utpala: sāna | nandī nāma gaṇas tatkarābhyāṃ tāḍitaṃ mukhaṃ yasya so 'ṅkikākhyo muraja eva meghaḥ | ārabdho grīvarecakasya layaś śleṣo drutādilayena sa mecakagalaḥ śarvo līlām iṣṭhajanānukāram kalayāṃ cakāra prārebhe | alpaś candraś candrakaḥ | mecakagalo 'pi mayūro meghanādahṛṣṭas saṃlayaṃ kṛtvā †līlāyāṃś† candrakaśobhī ca bhavati || 53 ||

sāvartanābhir abhito lalitāṅgahāra-

śobhā manoramaparikramatāṃ vahantī |

ceto jahāra dayitā rasabhāvahṛdya-

rūpā kriyā puraripoḥ śubhahastadṛṣṭiḥ || 54 ||

Utpala: sāva | sā śambhor līlārūpā kriyā vartanābhir udveṣṭitādikarakriyābhiś cetaḥ ahṛta | aṅgahārāḥ sthirahastādayaḥ | parikramo vṛttibhedena gativiśeṣaḥ | dayitā ramyā | rasāḥ śṛṅgārādayaḥ | bhāvā ratyādayaḥ | sthāyivyabhicāryanubhāvarūpāḥ | hastāḥ patākādayaḥ | saṃyutāsaṃyutanṛttahastabhedabhinnāḥ | dṛṣṭayaḥ kāntādyā rasabhāvasaṃcārabhedinyaḥ | ataś ca dayitā kānteva | tasyās sāvartanābhiḥ aṅgahāro muktādāma paritaḥ kramaṇaṃ parikramaḥ rasaḥ kāntānurāgaḥ | tasya bhāvas sattā | śubhau hastau dṛṣṭiś ca || 54 ||

dordaṇḍakhaṇḍavalanāny atisaṃkaṭatvam

utprekṣya no vidadhire kakubhāṃ purastāt |

vinyastamandacaraṇaṃ paricakrame ca

bhūmaṇḍalaṃ vidalatīti dayānubandhāt || 55 ||

Utpala: dorda | itthaṃ śaśiśekharasya nṛttam ādhārasya bhuvo daurbalyāt savistaraṃ nābhūd iti dvābhyāṃ kriyā | kakubhāṃ saṅkaṭatvam āśaṅkya bāhuvalanāni na kṛtāni | paricakrame parikrāntam || 55 ||

brahmāṇḍakarparaparisphuṭanābhisaṃdher

ūrdhvaṃ vyaracyata tathā na ca daṇḍapādaḥ |

itthaṃ na śītakiraṇābharaṇasya nṛttam

ādhāradurbalatayā savilāsam āsīt || 56 ||

yugalakam

Utpala: brahmā | abhisandhir ākalanaṃ || 56 ||

kukṣipraviṣṭasuranirjhariṇītaraṅga-

jhāṃkāratāraninadair nṛkapālapaṅktiḥ |

nṛttakriyāsu vidadhāv iva sādhuvādaṃ

yasyottamāṅgabhuvi sātiśayāsv amandam || 57 ||

Utpala: kukṣi | atiśayaḥ kauśalam ata eva tatra sādhuvādaḥ || 57 ||

ālokitas tuhinaśailabhuvā sahāsam

ākṛṣya śekharaśaśāṅkakalāṃ smarāreḥ |

nṛtyan vidūṣakabhuvaṃ bhujagāriketur

agre cakāra kuṭilonnatadaṇḍakāṣṭham || 58 ||

Utpala: ālo | bhujagārir mayūraḥ ketau yasya sa kumāraḥ śarvasyāgre vidūṣakabhūmikāṃ nṛtyan candrakalām eva kuṭilaṃ daṇḍakāṣṭham akarot | vidūṣako hi sahāsam ālokyate || 58 ||

etāni tāni talapuṣpapuṭādikāni

cetoharāṇi karaṇāni gaṇādhināthāḥ |

ity aṅgahāravidhayaḥ sphuṭatatprapañca-

yogāñcitasthitibhṛtaḥ sthirahastamukhyāḥ || 59 ||

Utpala: [See 2.60.]

itthaṃ tridhātmakaraṇaṃ gaṇamaṇḍalīṣu

saṃkrāntim asya nayato rabhaseṇa saṃyak |

paryāptadarśanasukhaṃ vinimeṣapakṣma

cakṣuḥsahasram abhavat spṛhaṇīyam aindryāḥ || 60 ||

Utpala: etā | asya bhagavato gaṇeṣu karaṇādisaṅkrāntiṃ nayata upadiśatas sataḥ aindryā devatāyāṃ nayanasahasram niścalapakṣmatvāt paryāptadarśanasukham ata eva spṛhaṇīyam abhūd iti | dvābhyāṃ kriyā | teṣāṃ karaṇānāṃ prapañcayogenāñcitā pūjitā sthitiḥ | karaṇasampādyatvād aṅgahārāṇāṃ karaṇam | tridhātma tribhiḥ prakāraiḥ pādābhyāṃ kramaṇam yat tu karaṇaṃ nāma tad ity ekam | tathā talapuṣpapuṭādikam vyāvṛttādi L ceti | †bhaumam ākāśo kam† ubhayātmakaṃ ceti kecit | yadvā karaṇaśabdasya nṛttavācitvāl lāsyatāṇḍavamiśrabhedāt traividhyam || 60 ||

āviṣkṛtānukṛtivibhramanāgavaktra-

līlābhyudastakarakoṭivipāṭyamānāḥ |

ambhobhṛtaḥ śiśiraśīkarabinduvṛnda-

viṣyandino 'bhinayajaṃ klamam asya jahruḥ || 61 ||

Utpala: āvi | prakaṭitā anukṛtivibhramā nṛttaceṣṭāviśeṣā yena tathāvidho nāgavaktro vināyakas tena līlayābhyudastaḥ kṣiptaḥ || 61 ||

itthaṃ salīlam abhineyavijṛmbhamāṇa-

vispaṣṭabhāvarasavṛtti niṣevya nṛttam |

sārdhaṃ nyavartata gaṇair vibhur uttamāṅga-

gaṅgātaraṅgakaṇasaṃbhṛtibhinnakhedaḥ || 62 ||

Utpala: itthaṃ | vispaṣṭā bhāvā rasāś ca vṛtayo bhāratīsātvatīkaiśikyārabhaṭyo yatra nṛttaṃ niṣevya vyaraṃsīt || 62 ||

śailātmajāvijitatadgaṇakṛṣyamāṇa-

vṛddhokṣaniṣṭhurakhurāhatamandarādriḥ |

tasya glahīkṛtavimugdhakirīṭacandra-

khaṇḍaḥ kadācana durodaravibhramo 'bhūt || 63 ||

Utpala: śaila | glahīkṛtaḥ pāṇisthāpitaḥ | vimugdho ramyaḥ | kitavaiś ca mugdho mandamatir muṣyate | durodaravibhramo dyūtakrīḍā || 63 ||

iti samayam anaiṣīt tatra tās tāḥ sa ceṣṭā

vidadhad acalakanyāviprayogānabhijñaḥ |

surapatibhir abhīkṣṇaṃ ratnapaṭṭāṅghripīṭhī-

luṭhitamaṇikirīṭāṣṭāpadaiḥ sevyamānaḥ || 64 ||

Utpala: iti | bhagavatpādapīṭhe praṇāmavaśāl luṭhitāni maṇimayakirīṭāṇy evāṣṭāpadāni caturaṅgaphalakāni kirīṭeṣu vāṣṭāpadaṃ suvarṇaṃ yeṣām || 64 ||

utpalakṛte haravijayasāravivaraṇe dvitīyaḥ sargaḥ ||