V. Dūtasampreṣaṇam

iti tatra subahubhāratīṃ anusaṃdhātum avandhyayā girā| gurusaṃgarakāmyayā kathāṃ vidadhāneṣu nṛpeṣu niṣṭhuram|| 1 || upayāti ruṣāvile bale bahusaubāhavasūktisaktayā| sarasaḥ samatāṃ vijṛmbhayā vikarālotkalikāvivartinaḥ|| 2 || phaṇinīva muhur muhuḥ krudhā rasanāliṅgitasāndrasṛkvaṇi| pṛthukampavaśe suśarmaṇi śvasati śvāsahutāśakarkaśam|| 3 || kupitākulakālaghaṭṭanā- vidaladdantaninādadāruṇam| mṛditāṅgulimarmamarmara- dhvanitaṃ tanvati tāraṃ āhvṛcau|| 4 || raṇarūḍhikathābhibhāṣiṇaṃ yavane yauvanabhīṣaṇoṣmaṇi| pibatīva subāhuṃ ādarāt satataṃ saṃgaraśauṇḍayā dṛśā|| 5 || valayīkṛtabāhumaṇḍalī- dṛḍhaparyaṅkaniveśananiścale| stimitastimitaṃ śatadhvaje nṛpacakrasya matāni jighrati|| 6 || pṛthuvephathusaṃgater gade daśanacchedavisaṃsthulasthiteḥ| smitadīdhitidaṇḍadhāraṇāṃ vidadhāne 'dharapallavakṣiteḥ|| 7 || gurudhāmani bhūridhāmani sphuṭam uttambhya bhujaṃ vijṛmbhayā| karapaṭṭacapeṭapiṭṭanaiḥ bhavanastambhavapūṃṣi piṃṣati|| 8 || dadhati bhrukuṭīviśaṅkaṭaṃ nayaromanthanamantharasthiti| śvasitāni kirat karandhame karaparyaṅkaniṣaṇṇaṃ ānanam|| 9 || layalolitapādapallave raṇalābhotsavanartitabhruvi| adharopari romakūrcikāṃ karayugmena nale nimṛdnati|| 10 || pibatīva hṛdi krudarciṣāṃ kṣaṇasaṃdhukṣaṇakāmyayoddhatān| vivṛtena mukhena rukmiṇi kṣitipakṣobhabhuvo nabhasvataḥ|| 11 || viracayya sabhāṅgaṇakṣitiṃ śvasitamlāpitapuṣpasaṃstarām| vadanena natena niścalaṃ kim api dhyāyati bhīmabhūbhuji|| 12 || karavālakarālite kare yudhi yasyāntakakāṅkṣiṇaḥ kṣaṇāt| dadhate phalalābhaśālitāṃ trijagadgrāsamahāmanorathāḥ|| 13 || sadasi bruvataḥ pṛthusphurat- palitaśmaśrumiṣena yasya sā| vahatīva sarasvatī mukhe calalīlāñcitacāmaraśriyam|| 14 || ripurogabhiṣak sa bhīṣmakaḥ kramaśuśrūṣitasabhyam abhyadhāt| nayatantravimarśanīṃ śanaiḥ aśaniṃ mohamahāgirer giram|| 15 || abhimāni mahārthaṃ ūrjitaṃ yad udāhāri subāhunā vacaḥ| upadhitrayaśuddhito 'sya kiṃ kanakasyeva paraṃ parīkṣaṇam|| 16 || nayaneyadhiyo mahīyasi prabhukṛtye kṛtamantratantraṇāḥ| akathaṃkathasaṃkathāḥ kathaṃ prakṛtāpāyi vadeyur īdṛśāḥ|| 17 || tad apīyam apāyadarśanāt ayavīyastvavitīrṇacodanā| mukarīkurute balena māṃ nṛpatipremaṇi sammatā matiḥ|| 18 || kṣamam eva punaḥ punaḥ kathāṃ tanituṃ nītivimarśadarśinīm| na hi jātu bhavanti bhaṅgurā matibhūyastvavivecitāḥ śriyaḥ|| 19 || vijayāya jagajjigīṣuṇā karaṇīyaḥ susahāyasaṃgamaḥ| na hi naiti vipattivandhyatāṃ nipuṇāmātyapariṣkṛto nṛpaḥ|| 20 || sa sakhā sukhaduḥkhayoḥ samaḥ vijayī śauryabhujaḥ prajābhujaḥ| ahitān vinihanti yanmataiḥ yudhi śastrair iva śāstrasaṃskṛtaiḥ|| 21 || kiyad apy ata eva vo vayaṃ pratibhāsānugam uddidikṣavaḥ| ucitaṃ hi pade priyārthināṃ abhidhātuṃ hitasaṃhitaṃ vacaḥ|| 22 || ghaṭitāṅgam upāyakīlitā guṇasopānaparamparonnatā| gururājyapadādhirohaṇe nayaniḥśrenir upaiti hetutām|| 23 || vijayasya paraṃ padaṃ nayaḥ tam atho mantapariṣkṛtaṃ jaguḥ| sa dhiyā sudhiyāṃ samedhate samaye so 'pi phalāya kalpate|| 24 || vaśitāṃ paramaṃ parīpsayā kramasādhye 'pi vidhau vidhitsataḥ| kim asāmpratam apratīpagāḥ niviśante yad asūn vipattayaḥ|| 25 || guṇacakravicāracāriṇī caracaryā caritādicicyuṣī| vitatā ca matir mahībhujā vijitā cārṇavamekhalā kṣitiḥ|| 26 || na vibhāti nirudyamo nayaḥ na nayātikramakṛt parākramaḥ| param eti hi siddhir iddhatāṃ nayagarbhā vyavasāyasādhanī|| 27 || dadhate niyataṃ jigīṣavaḥ bhuvam ambhodhipariṣkṛtāṃ hṛdi| manasaḥ katham anyathā jaye vijayante nikhilaṃ mahītalam|| 28 || tad ihānavadhau vidhunvatā nṛpate dhairyadharaṃ vidhīyate| kim amarṣamahāmbubhis tvayā sunayakṣetraparikṣayaḥ kṣaṇāt|| 29 || sakalair api no bhavadvidhaiḥ na parīkṣyāḥ pratipakṣasampadaḥ| kva yathāribalāttaraṅkatā- vimukhasyāsti mahībhujo jayaḥ|| 30 || yad adas tadupādhimatsarāt ajani krodhavirāji rājakam| tad akamprabalaḥ prasenajit dhruvam aśrāvi na viśruto 'munā|| 31 || vibudhāspadam akṣatakṣamaṃ dadhataṃ bandhurajātarūpatām| sthitiṃ īyur alaṃ kulācalaṃ paritas taṃ parivārya bhūbhṛtaḥ|| 32 || kaṭhinaṃ kuliśāśrikuṇṭhane prathamācāryakam eti yadvapuḥ| sa sameṣyati tasya bhedyatāṃ na sukhenāśmavad aśmakeśvaraḥ|| 33 || nayaśobhitaśauryaśālinā na sa bhavyavyavasāyasampadā| manaseva viyujyatetarāṃ aviṣādena niṣādabhūbhṛtā|| 34 || sahadevasurandhramadraka- drumasauvīrabakaśrutarvabhiḥ| saguṇair iva saptabhiḥ svaraiḥ avinaṣṭāsya ca gīyate sabhā|| 35 || iti tatra nirastasamplavaiḥ ciracintyatvam upāgate guṇaiḥ| praviśantv aparīpsaṃ īpsita- sthithaye yuṣmadupāyayuktayaḥ|| 36 || vahanāya mano mahīyasaḥ yugapat krodhatitikṣayoḥ kṣamam| prabibharty udadhir virodhinī samam evāsamaśocir ambhasī|| 37 || suciropacitān priyocitān kulakīrtyātmasuhṛtsvabāndhavān| samareṇa kṛtāntabandhunā sumatiḥ kaḥ sahasāpahārayet|| 38 || tad upāyati yātu kaścana dviṣad okas tava śāsanāt puraḥ| ripusamplavajiṣṇubhūbhujāṃ paramāstraṃ khalu dūtabhāratī|| 39 || prahitaṃ hitaśaṃsi puṇyataḥ bhavatā sāhasikaikavṛttinā| na sa sāma samāhitaḥ samaṃ na mahānugrahaṃ āśu maṃsyate|| 40 || yadi cāntikaṃ āntakaṃ prayāt na pathi sthāsyati tāvake tadā| na nayānugavartmanāṃ na naḥ sthitam atyūrjitarāji rājakam|| 41 || asakāv udayāya cintyatāṃ nayamārgo 'tinirargalāgamaḥ| vikaṭāṃsavisaṅkaṭo mama sthita evāyam ato 'nyathā bhujaḥ|| 42 || vadatīti samaṃ samāhite vidhivanmantram udūṣamabhīṣmake| samavṛttyupabhogibhogināṃ kraśitakrodhaviṣaṃ mano 'bhavat|| 43 || sphuṭayā prakaṭīkṛtāśayā sa babhau bhīṣmakabhūbhujo girā| śaradeva viśāradaśriyā nṛpacandro 'tha paraṃ prasedivān|| 44 || na ca tasya vacasvitā tadā dadṛśe harṣulataiva tu vyabhāt| prakṛtānumataprakāśinī rabhasā dṛṅ mahatāṃ hi bhāratī|| 45 || avasādadurāsadaṃ sadaḥ samaṃ ālocya ciraṃ svatejasā| akirat karaṇīyakovide nayadigdarśini darśake dṛśam|| 46 || sa samagrasukhāvahaṃ vahan atha tasmai smayamānaṃ ānanam| dviṣataḥ puri dūtyaṃ īyivān niviśasveti nideśaṃ ādiśat|| 47 || nṛpaśāsanaṃ ārtiśāsanaṃ sa paraṃ lābham amanyatādṛtaḥ| iyam ujjvalatānujīvinaḥ samaye sa smṛtim eti yat prabhoḥ|| 48 || sa cirasya nirasya tat sadaḥ janitajyotkṛti satkṛtaḥ kṛtī| vavṛte vivṛtadyutir diśaṃ carituṃ citraśikhaṇḍimaṇḍitām|| 49 || atrāntare nṛpam upetya vicitrabāhuḥ vidyādharo malayakūṭataṭīkuṭīraḥ| prīter ayācata taṃ ātmapure prayāṇaṃ premṇaḥ phalaṃ khalu parasparagehagoṣṭhyaḥ|| 50 || tadvākyād atha bhūaptir vidadhivān sārthāṃ tadabhyarthanāṃ sauhārdadravasāndravṛtti suhṛdi prasphārya cetaḥ śivam| śuddhāntaiḥ saha śuddhadhīr udacalad vidyādharāṅkaṃ dharaṃ draṣṭuṃ dṛṣṭanayair udūḍhajagatīrājyasthitir mantribhiḥ|| 51 ||

kapphiṇābhyudaye mahākāvye dūtasampreṣaṇo nāma pañcamaḥ sargaḥ||