II. Caravākyopanyāsa

athottarāśānṛpamaṇḍalakriyā- vicārahetoḥ prahito hitakriyam| kadācid enaṃ samaye sabhāsadaṃ pratīpam āpa praṇidhiḥ prajāpatim|| 1 || prajāḥ śriyo 'rthān prakṛtīr aśeṣato ripor aniścitya na sa nyavartata| prabhuṣv iyaṃ sānṛṇatānujīvināṃ bhavanti yad vastuṣu tattvavedinaḥ|| 2 || na yasya lokāntaradīpanaiś caraiḥ prapūryate pāṭavalakṣama maṇḍalam| mahākarais tyaktatanuḥ sa tejasā kva nāma kāle matimān bhaved inaḥ|| 3 || pareṇa puṃsā paramaṃ samāsthitā bhṛtaprasādaprabhavaprabhā sabhā| agāhi tenāvitathārthavedinā samādhinevānumatā matir muneḥ|| 4 || karālakeyūraviṭaṅkamaṇḍalī- niviṣṭaratnadyutipuñjapiñjaraiḥ| jvalatpratāpajvalanair iva dyutiṃ babhāra yā bhūmibhujāṃ bhujadrumaiḥ|| 5 || vinā yugāntaṃ yugapat sthitiṃ yadi vrajet sumeroḥ śikhareṣu bhāsvatām| tatis tayāṣṭāpadaviṣṭarasthitā tulām iyād yatra narendramaṇḍalī|| 6 || uraḥkapāṭair vikaṭair mahībhujāṃ parasparāśleṣaviśeṣaśālibhiḥ| pidhānayogād iva muṣṇatī dṛśo mumoca yasyāṃ na gabhīratā ratim|| 7 || mahībhṛtāṃ bhittiṣu citravartināṃ puraḥsthitānāṃ ca bhayena niścalam| nṛpāsanādhyāsini yatra kapphiṇe paro viśeṣo na nimeṣato 'bhavat|| 8 || analpasattvāḥ kaṭakaiḥ pariṣkṛtāḥ prakṛttapakṣocchritayaḥ samunnatāḥ| udanvataḥ kukṣim iva praviśya yāṃ na bhūbhṛtaḥ prāpur atiprakāśatām|| 9 || sabhāṅgaṇe tatra sa lokasaṃkulā vilaṅghya kakṣyāḥ kṣitipālam aikṣata| tapodhanaḥ sattvarajastamobhuvaḥ paraṃ vyatītyeva pumāṃsam avyayam|| 10 || dadhānam agrasthitavārasundarī- prakīrṇakotkīrṇasamīraṇeritām| kathaṃ kṣitau vakṣasi tejasāṃ śriyo vilāsadolām iva hāravallarīm|| 11 || vilāsato mantharamantharaṃ muhur vivartayantaṃ maṇikandukaṃ kare| raṇeṣu nirjitya juhūṣuṃ āhṛtaṃ dviṣadyaśaḥpiṇḍam iva svatejasi|| 12 || mayūkhabhaṅgaiḥ kanakāṅgadodgataiḥ śikhāsahasrair iva śauryatejasaḥ| bhujadrume prārabhamāṇam ujjvalair jayāya nīrājanaṃ ājighasmare|| 13 || kirīṭakūṭena viṭaṅkarājikā- virājijāmbūnadajātatejasā| viḍambayantaṃ nayanānalāmśubhiḥ kapālapālīṃ kapilāṃ kapālinaḥ|| 14 || calāmalaśyāmalapakṣmalakṣmaṇā taraṅgitāpāṅgavivṛttavṛttinā| abhīkṣṇam akṣṇā dadataṃ kṣitikṣitāṃ prasādanīlotpalamālikā iva|| 15 || abhaṅguragrāmam apāśritaśruti svareṣu sammūrchitamūrchanocchriti| kalāpravīṇair upavīṇayadbhir ity upāsyamānaṃ kuśalaiḥ kuśīlavaiḥ|| 16 || prakoṣṭhakoṣṭhe kaṭakena saṅginā vicitravicchittijuṣā virājitam| bhujadrumālānitaśauryakuñjara- prakāśakārtasvaraśṛṅkhalaśriyā|| 17 || udastam ekaṃ caraṇābjaṃ āsane dadhānam uttānatalocchvasacchavi| nakhāṃśuśārīkṛtasabhyabhūminā bhujena sambhāvitajānumaṇḍalam|| 18 ||

navakulakam

aruddhamārgaḥ pratihāravedanāt puraḥ parāgatya sa medinīpateḥ| vidhāya lolāñjalidanturaṃ śiraḥ kṛtapraṇāmo niṣasāda bhūtale|| 19 || prakāśitaprema nṛpaḥ prasedivān siṣeca tasmin sa vilokanāmṛtam| bhavanti te bhājanam arthasampadāṃ vidanti ye bhṛtyajanānurañjanam|| 20 || sa tattvaviśvastatayā sabhāsadāṃ viviktavācyām api cārabhāratīm| samakṣaṃ ākarṇayituṃ pracakrame raho hi tad yatra na santy asaṃstutāḥ|| 21 || vibhāvya dīprapratibhāprabhaḥ sabhāṃ sa bhūbhujotsṛṣṭacalākṣicoditaḥ| dviṣatkriyācāravicāracārudhīr udāharat sūtritasaṅgarā giraḥ|| 22 || dhiyaiva nirṇītanigūḍhakarmaṇāṃ bhavādṛśāṃ pārthiva vediyam asti kim| asau mamāpatrapatā tato 'pi yan nayāmi vācaḥ punaruktavācyatām|| 23 || vivṛtya śāṭhyetaramāṃsalaṃ mano vaco hi vācyaṃ hitaṃ āyatau caraiḥ| ataḥ pramāṇaṃ paratas tu bhūpateḥ svatantravṛttā vidhayo vidher iva|| 24 || tathāpi kālocitam asya karmaṇaḥ karomi pṛthvīśa punaḥ prabodhanam| vicitracintācalacetasaṃ pade hitaiṣiṇo hi smarayeyur īśvaram|| 25 || samāśritaṃ śāśvatayānapātratāṃ śriyām anāruhya niketanaṃ caram| vigāhate yaḥ kṣubhitaṃ parārṇavaṃ sa tadbalaughena cirasya hīyate|| 26 || caleṣv avaśyeṣu viruddhavṛttiṣu prayojya vīryeṇa guṇeṣu ṣaṭsv api| nṛpaś caraṃ cittam ivendriyeṣv atho nirūpaṇīyaṃ munivannirūpayet|| 27 || nayānugā dhīradhiyo 'tha dhūrdharā vicāriṇaś cāracariṣṇucakṣuṣaḥ| ayaṃ kim alpo 'pacayo bhavadvidhā vidanti nottānam avadyam adya yat|| 28 || idaṃ hi tāvat prathamaṃ pṛthudyute vicāryatām arya nijena cetasā| kim u kvacit kṛṣṭadhanurdharoṣmaṇaḥ tava pratāpasya bhaved agocaraḥ|| 29 || mahāprabhāva prabhavasya tasya te jvalaty avicchitti parākramānale| vidagdhadhīr dagdhum ihātmanaḥ kulaṃ vipakṣapakṣe samabhāvi bhūbhṛtā|| 30 || samṛddhibhūr asti nirastadurgati- pradeśa deśo diśi yakṣarakṣiṇaḥ| jagāma satkauśala kauśalā iti prajāsu yaḥ prājyajanaḥ prakāśatām|| 31 || śriyāṃ padaṃ tatra durāsadaṃ parair amāya nirmāya purūpamaḥ puram| vijṛmbhate bibhrad akamprasenatāṃ prasenajij jātamahā mahīpatiḥ|| 32 || anaśvareṇeśvarabhūtibhāginā kṣamābhṛtā sambhṛtavāhinīśriyā| prabhām ubhābhyāṃ bhajate dig uttarā prasādhitā tena himācalena ca|| 33 || svake sukarmātha pare parantapo nirantarāyaṃ na sa veda nāntaram| vipattayo hi antarapaṇḍitaṃ naraṃ tyajanti siṃhaṃ hariṇāṅganā iva|| 34 || manorathaṃ dharmyam ivānaghāḥ śriyaḥ sahasranetraṃ divi devatā iva| upāsate taṃ subhagaprajaṃ prajāḥ kṣapāpatiṃ vyomani tārakā iva|| 35 || śritena śuddhiṃ paripūritā sabhā nṛpeṇa sā tadyaśaseva dikpaṭī| cakāsti lāvaṇyamayāmṛtasrutā śarattriyāmeva tuṣārarociṣā|| 36 || guṇāyatair āyativedibhiḥ samaṃ samair amātyair avamatya durmatīḥ| nayaty asau maṇḍalacintayā dinaṃ pravṛttaṣāḍguṇyakatho 'kathaṃkathaḥ|| 37 || vimarśasiddhāñjanarañjanojjvalaṃ viveśya mārgeṣu vicāralocanam| pade pade kaṇṭakasaṃkulā bhuvo nirmārṣṭy asau nītimayena hetinā|| 38 || tanoty atāntaḥ prakṛtiṣv asau tathā samāsu sīmānam upāyasampadā| prakarṣam asyośanaso 'pi śāsanān nayo yathā yāti yayātitejasaḥ|| 39 || jayodyamecchāsamalaṃkṛtaṃ mano jagajjigīṣāṃ vyavasāyabhūṣaṇām| kriyorjitatvaṃ vibhavaprasādhanaṃ vahaty anutsekavirājitāṃ śriyaṃ || 40 || udāratānunnatir unnatā dhṛtiḥ śamaḥ kṣamā dakṣiṇatā dayā damaḥ| imām asau bibhrad amātyasampadaṃ kṣiṇoti śārīravipakṣasaṃhatim|| 41 || anekam eko jagadantaraṃ taran sa cintitadvādaśamaṇḍalodayaḥ| vahan samūhaṃ mahasāṃ mahīyasāṃ paraṃ padaṃ krāmati bhānumān iva|| 42 || priyaṃ diśan nābhiyunakti bhūriśaḥ karaiḥ samāśliṣyati nātikarkaśaiḥ| iti prajāṃ lālayate sa peśalaṃ vadhūṃ navoḍhām iva lambhayan dhṛtim|| 43 || abhinnamaryādam udūḍhabhūbharaiś caturbhir akṣobhyagabhīravṛttibhiḥ| pariṣkṛtā rājati tasya rājatā sthirair upāyaiḥ kṣitir arṇavair iva|| 44 || sadaḥsu dūtatrayakāryaṃ āryadhīḥ pravartya nirvartitavāsarakriyaḥ| śṛṇoti doṣair adhidoṣam ujjhitā giraḥ sa gūḍhāḥ paracakracāriṇām|| 45 || analpasatkārasahasrasaṃyataiḥ sudurlabhapratyupakāraduḥkhibhiḥ| raṇotsukair bandhujanair asūyyate tad asya saubhāgyam abhūtaśātravam|| 46 || pramādyaduddāmamahebhamaṇḍalī- taraṅgitottuṅgaturaṅgasaṅgibhiḥ| yugāntameghaughaghaṭāviśaṅkaṭāṃ karoty asau dikṣu balais tiraskriyām|| 47 || idaṃ pure citrataraṃ ca tatra yan nṛpasya nīcaiś caritaṃ cicīṣatām| pathi prakāśe 'pi kutaḥ pi dṛśyate dṛśāṃ tamaḥ sāndram amandratandri naḥ|| 48 || adhiṣṭhitaṃ nūnam anūnadhāmabhiḥ puraṃ suraiḥ kair api tanmaharddhibhiḥ| abhīrutā tasya kuto 'nyathā tathā jayorjite jāgrati bhūbhuji tvayi|| 49 || narendracanrasya yathā yathodayād vijṛmbhate tasya sa sainyasāgaraḥ| tathā tathā nūnam imām api kṣitiṃ purā haraty eva hi kārmukormibhiḥ|| 50 || tad ittham uttiṣṭhati tatra dāruṇe dine dine roga ivolbaṇe ripau| prakopanāma praśamāya vṛṣyatāṃ vṛṣadyute durviṣahaṃ viṣaṃ mahat|| 51 || āyāntu dviradarathāśvapuñjabhājāṃ paurāṇāṃ ninadaparamparāḥ puras te| tasyārer dhutadhṛtidhāma duḥśravās tāḥ śrāvastyāṃ śravaṇaguhānavātithitvam|| 52 || iti nṛpatisamājakṣobhapaiśunyakāri praṇidhir adhimahārthaṃ vākyam uccair udīrya| śramaśamaśivabhūbhṛdvīkṣaṇāmbho.abhiṣiktaḥ sapadi sa virarāma prāptasatkārasāraḥ|| 53 ||

kapphiṇābhyudaye mahākāvye caravākyopanyāso nāma dvitīyaḥ sargaḥ||