śrīdurgadattanijavaṃśahimādrisānu- gaṅgāhradāśrayasutāmṛtabhānusūnuḥ | ratnākaro lalitabandham idaṃ vyadhatta candrārdhacūlacaritāśrayacāru kāvyam || 1 ||

sa kila kavir evam uktavān—

lalitamadhurāḥ sālaṃkārāḥ prasādamanoramā vikaṭayamakaśleṣodāraprabandhanirargalāḥ | asadṛśagatīś citre mārge mamodgirato giro na khalu nṛpate ceto vācaspater api śaṅkate || 2 || sāndrānandāmṛtarasaparispandaniḥsyandinīnām asmadvācām atiśayajuṣāṃ vastutattvābhidhāne | prauḍhajyotsnādhavalavikasaddigvadhūkarṇapūra- brahmastambhastabakayaśasāṃ ko 'pi ṭāṅkāraṭaṅkaḥ || 3 || dhārā kāvyaprabandhapraṇihitamanasaḥ śrotrapeyā kavīnāṃ bhāṣāṣaṭke 'pi yasya kvacid api na gatā bhāratī bhaṅguratvam | prāptajñeyāvasānasphuradamalataraprātibhajñānasaṃpat so 'haṃ ratnākaras te sadasi kṛtapadaḥ kṣmāpa vāgīśvarāṅkaḥ || 4 || yasyodaye 'ndhatamasaṃ dadhato viśuddhir āvirbhavaty aniśam eva jalāśayānām | tadgrastavāṅmayasamudram avehi rājan ratnākaraṃ sadasi sādyam agastyam aurvam || 5 || dṛbdhaṃ satprajñakair yan na jagati kavibhir vastu tan nāsti kiṃcit kṣuṇṇe kṣuṇṇatvacintāgahanaviṣayatā tasya dūre 'stu tāvat | tat saṃdarbhapragalbhaprasaragurugirām agraṇīr bāṇa eko rājan ratnākaraś ca jvalanavad avanau jājvalīti dvitīyaḥ || 6 || haravijayamahākaveḥ pratijñāṃ śṛṇuta kṛtapraṇayo mama prabandhe | api śiśur akaviḥ kaviḥ prabhāvād bhavati kaviś ca mahākaviḥ krameṇa || 7 ||