|| śrī gaṇeśāya namaḥ ||

oṁ bhagneṣv adhokṣajapitāmahavāsaveṣu daityādhipena sakalais saha lokapālaiḥ| pañcākṣamityabhidadhe bhagavān saroṣam āsphālya niṣṭhuramathonnatakoṭicāpam_||1|| paśyādhunā¯muragāśanaketumatra bhagnaṃ virugṇaraṇarāgamito ndhakena| yasya vyadhāyiṣata candramarīciśubhrais sādhāraṇāṃśukabhṛtaẖ kakubho yaśobhiḥ||2|| daityendramārgaṇagaṇābhihatasya paśya ratnacchaṭāruṇitamātmabhuvaś śarīram_ nidrāvimuktamadhusūdananābhipadma- viṣpandisāndramadhudigdham ivādhunāpi||3|| paśyātatāyikaṭhināsthiśilāvibheda- kuṇṭhīkṛtāśi kuliśaṃ yudhi nirjitasya| daityaiẖ kare śatamakhasya bhayodayotka- gharmāmbusiktam iva sattanute na tejaḥ||4|| daiyāsthivajrakaśakuṇṭhitarāracakra- cakran dapāpanicayacyutacaṇḍacaryam_ viṣṇor bhayākulatayā vyapalīnavahni- dhūmāyamānam avalokaya pāṇilagnam_||5|| ābaddhakopaditijādhipabāhucakra- cakrīkṛtātanuśarāśanabāṇapātaiḥ| bhaṅgīśataiḫ prakaṭarandhraparītamadhyam āpūrṇam eti vitataśriyam arkabimbam_||6|| nārācanirdalitabimbatayaiṣa bhagna- saṅgrāmadurgalitadurdharadhairyabandhaḥ| adhyāsyamānahṛdayo hariṇena paśya saṅkrāntakātaratadīyamanā ivenduḥ||7|| paśyāstaparvatam ivābhrakapaṅkanīlam āsādya dānavacamūpatim etad agre| paryādhiko dhikamanūṣmatayā raṇe tra bhagnaḫ pratāpavibhavena sahaiva bhānuḥ||8|| bibhradgadāṃ vidalitārikapālagurvīṃ līlāvilambitam|anoharaśaṅkhapadmaḥ| vyāpāritāyudhaśato ndhakabāṇavarṣair nābhāti śaurir iva jarjarirtor thanāthaḥ||9|| paśyaiṣa nirjayakṛtabhrukuṭīvibhaṅgac- chāyopabṛṃhitanavāñjanacūrṇavarṇāṃ| vaktraśriyaṃ ghaṭitanīlapaṭāṃ hriyeva dhatte yamaḫ pariharanmama dṛṣṭimārgam_||10|| dhatte mukheṣu varuṇo ripuroṣavahni- jvālāruṇān tanupasāvasamāptakampaḥ| nityāvabaddhamakarālayavāsalagna- durvāravāḍavakṛṣāṇuśikhām ivaitām_||11|| utsṛṣṭadiggajagalanmadavārigaṇḍa- piṇḍīkṛtair aviralaṃ bhramaraiḫ patadbhiḥ| paśyaiṣa kiṃśukavanabhramamohamandair anvīyate gnir asurair vihitoṣmabhaṅgaḥ||12|| sāndrībhavaty amalamecakakhaḍgāmegha- ghorāndhakāranikaraḥ sthagitāntarikṣaḥ| santrāsavihvalavalatpratipattimūḍha- gāḍhānilācchvasitadhūmaśikhāsahasraiḥ||13|| uddāmadāhaparivartitajihmakoṭi- ruttaṃsacandrakalikā śirasi smarāreḥ| daityādhirājaviśikhāgniśikhāsahasra- niryatsudhāsrutir abhūt saviśeṣatanvī||14|| tasyāhave vikaṭapicchakalāpabhāra- śaṅkucchalasphuritacandrikikhaṇḍyamānāḥ| uddāmakoṭiditijādhipacāpacakra- muktāś śarā viṣadharā iva sannipetuḥ||15|| abhyāpatan muditakhecaracakrarvāla- sāmājikas timitalocanacakradṛṣṭaḥ| daityādhipo dbhūtavidhāyi vijṛmbhamāṇa- viśliṣṭasandhiḍimaḍambaracāraṇot_||16|| ānemuṣo vijahatā dadhuṣaś ca darpam ānighnatā juhuvuṣo bhimukhaṃ yatārāt_| tenākhilā yudhi parasparamūyire tha| gāḍhaṃ śarair daśadiśo dṛḍhacāpamuktaiḥ||17|| ākarṇakuṇḍalitakarkaśakāladaṇḍa- cakrāyamānamaṇikārmukanirgatena| bāṇena vakṣasi jaghāna mṛgāṅkamaulim ābaddhamatsaramathāvasare surāriḥ||18|| devo pi dānavapateḫ pṛthujatrusīmni tiṣṭhaty udīrya śaraghātavivṛddhamanyuḥ| preṅkhanmukhāgraśikhino cicakhāna bāṇam utsaṅkhyasaṅkhyakṛtapuṅkhatayorupuṅkham||19|| tāvuttarottaraduruttaratāratamya- tāmyaddinākṛśakṛśāvuparītabāṇau| saṅgrāmavartmani parasparaladhvaratna- bandhābhisandhi viramakramatāmavandhyam_||20|| vakṣo ndhakasya nijaghāna ghanāghanatvi- ḍīśastaḍinnibirḍacaṇḍakaḍārakāṇḍaiḥ| kūlādrisānukaṭakaṃ vikaṭais taraṅga- bhaṅgais savāḍavaśikhair iva kūrmaketuḥ||21|| preṅkhacchikhā viśikhasaṃhatirandhakena muktā tataś śirasi śūlabhṛtaś śarāroḥ| cūlāvacūlaphaṇaphūtkṛtivahniheti- saṃpluṣṭapakṣatipuṭā viṣaman nyapaptat_||22|| karṇāvataṃsitamaṇisphuritasphuliṅga- phūtkāravahnitapanātapadagdhapakṣaḥ| vyomnaḥ patadditisutādhipaśailamūrdhni sampātivibhramamadhatta vṛṣāṅkabāṇāḥ||23|| vistāriśalyamukhanirgatarohidaśva- śārīkṛtāmbaratalā bhayamādadhānāḥ| taccāpamaṇḍalaviniṣpatitāḫ prasasrur ulkāpiśācanicayā iva dikṣu bāṇāḥ||24|| dūraṃ daridrihi dareṇa vidārayādrīn darpoddhatāñ jahi jahīti narān arātīn_ ity āharan pravijahāra sakarṇajāha- raktāntarebhrayugalo vijahau ca khedam_||25|| guñjadguṇāviralaśabdavimiśragāḍha- maurvīvirāvamukharo tha śilīmukhaughaḥ| dūrād aśiśrava ivāmbaracāricakram ānandam asya svaravairivadhātiśaṃ saḥ||26|| vaktrāmṛtāṃśupariveśapṛṣaṭkapīṭha- niṣṭhyūtaniṣṭhuravipāṭhavijarjarānsaḥ| yodhān mumoca raṇamūrdhni mumūrcchuṣo tha randhrena jātu ripuṣu praharanti dhīrāḥ||27|| tatpattribhis suraripoś śakalīkṛtānām ākāśa eva kaladhautaśilīmukhānām_| reju◻ḫ patatpracuracūrṇaparāgadigdhā- bālārkaraśmiśabalā iva śailakūṭāḥ||28|| saṅgrāmanāṭakavilokanakotukātta- saṃñcāraśekharasahasrarvimānapaṅktīḥ| ūrdhvaṃtanās taraṇimārgarucaḫ pracaṇḍa- kodaṇḍanirgataśarāmanayaḥ smarāreḥ||29|| taccāpanirgatanirargalamārgaṇaugha- pakṣānilāhativijarjaritābhramāsīt_| vyāpāryamāṇavividhāyudhaghātarūḍha- gāḍhāsitavraṇa¯¯ṅkam ivāntarikṣam_||30|| āpīyata sthagitabhāskarabimbabīja- kośair navātapamadhusphuṭapattraśobhaiḥ| jyāghoṣagītimukharair bhuvanārabinda- garbhāspadaṃ sapadi daityaśilīmukhaughaiḥ||31|| vistārya cāpam avadhisphuradagniheti niśśaṅkahuṅkṛti nidhānam ahaṅkṛtīnām_| daityādhipaḥ kuṭilitabhrukuṭīvibhaṅga- bhāsvallalāṭam iti dhūrjaṭim ābabhāṣe||32|| tiṣṭhādhunā kva nu baṭo mama dṛṣṭimārgād gantāsi puṣpaviśikho smi na mandavīryaḥ| kālo thavā na kṛpaṇaḥ kṛmikīṭajantu- jīvāpahāracaturo na gajāsuro vā||33|| anyā hi nṛttarabhasotthitadattatāla- vetālamālitatalā pitṛmandirorvī| saṅgrāmabhūmir aparā bhaṭacakradaṇḍa- dordaṇḍadarpanikaṣopalapaṭṭakāśrīḥ||34|| ityūcivānnirabhinatsmayamāna eva tat pañcabhir jvalitavahnisukhaiḫ pṛṣaṭkaiḥ| kiñcit tadīyaviśikhāśanipātabhinna- vakṣaś cacāla ca śaśāṅkakalāvacūlaḥ||35|| tasmin manāg dalati ṣaṇmukhadattadṛṣṭi- dṛṣṭartileśasadapattrapalambavaktre| āmardakas tvaritam andhakam abhyadhāvad utpāṭitasthagitabhānusumerukūṭaḥ||36|| daityādhipastamatha sanmukhamāpatantam ālokya kopavivaśo viśikhair arautsīt_| taccoditaṃ śikharamucchikharatnasāram asyābhinattilatulām adhirūḍhamanyaiḥ||37|| tasmai rathāṅgamakiranmurajinmahāji- helo halī haritasaptisutaś ca daṇḍam_| saṃstabhya tān atha śarais sa sahasrasaṅkhyais saṅkhye jaghāna laghu pañcabhir indumaulidm_||38|| kodanḍadaṇḍaśikharesthaphaṇāsahasra- phūtkāravahnikaṇatārakitāntarikṣam_| ciccheda vāsukiguṇaṃ kirataḥ pṛrṣaṭkā- nāsādya randhram atha tasya śarais surāriḥ||39|| pratyuptadīptamaṇidīdhiticakravāla- saṅkīryamāṇavikaṭonnatakoṭidaṇḍam_| vicchinnapannagaguṇaṃ dhanur indumauler indrāyudhaśriyam adīdharad antarikṣe||40|| sa cchinnavāsukiguṇaḥ jayalābhaliṅgam āliṅgitāmbaraśikhāgraśikhāsphuliṅgam_| jagrāha kopakuṭilabhrukuṭīvibhaṅga- piṅgekṣaṇānanadurīkṣavapus triśūlam_||41|| niśśeṣalokakavalagrahaṇātha valga- dālolahetirasanas tarasotpatiṣyan_| tasyābhivādayitum aurvam ivāgnimāśu huṅkāravahnir udadhau dhagiti nyapaptat_||42|| tenātha śaṅkarakarabhramitena tūrṇam akṣuṇṇam eva ghanavartmani gharmaraśmeḥ| ābadhyate triguṇam āśu vivṛttalola- śākhābhrayānalaśikhaṃ pariveśacakram_||43|| ākṛṣṭaśailaśikharaṃ taralīkṛtārka- candraṃ samudrasalilaplutanākamārgam_ puñjīkṛtoru dalitakṣitipīṭhapṛṣṭham āsīd anubhramaṇalolam amuṣya bimbam_||44|| śūlāgnitāpadalitopalamūlasandhi- bhāgāni rabhagnataṭakalpatarūṇi tūrṇam_| tepur vimuktivikaṭīkṛtadūradṛśya- pṛṣṭhapratiṣṭhitanatāṃsi śirāṃsi meroḥ||45|| tasmiṃś ca dhūrjaṭikarabhramito vidhūta- sindhurmisaṃhatipariplutanākapṛṣṭhe| pusphora taddahanapīvaravisphuliṅga- viśliṣṭabhedamahimāṃśumarīcibimbam_||46|| ūhuḫ pinākaśikhitāpavilīyamāna- vistīrṇakāñcanaśilāśikharapravṛttāḥ| ratnopalaskhalanabhinnajalās sumeroẖ kūlaṅkaṣāḥ kaṭakabhūmiṣu nirjhariṇyaḥ||47|| śākhāntarālaparivartavilolavahni- jvālākalāpavikaṭāñjalibhis tadānīm_ tenodapīyata paribhramaṇānubandha- sañjātadurdharardaṣeva surasravantī||48|| jvālākalāpakavalīkṛtasaptasindhuṃ tāpasphuradvikataṭāṃkṛti śailakūṭam_| caṇḍālikajvalanamūrjitam utsasarja saṃvartakāla iva vaktratalena śambhuḥ||49|| tenāndhakasya vikaṭonnatacāpacakra- muktāś śarās sthagitadiktaṭamāpatantaḥ| nirdehire jaraḍhahetiśatais sarīḍha- maurvāgnineva makarākaravīcibhaṅgāḥ||50|| taṃ śūlaśaktimusulāśanipaṭṭiśāsi- paṭṭair nihatya purajidditijaṃ jughora| ghorāstravṛṣṭibhirathārditadandhako pi tasmin puras sa vavṛdhe saviśaeṣam agniḥ||51|| kocāṇḍamaṇḍalavinirgatam asya bāṇaṃ jālaṃ yudhi prasabham indudharo nihatya| vegād rathaṃ prati sasāra tamājaghāna daityādhipo pi gadayā guruśūlahastam_||52|| daityādhiperitagadādalitottamāṅga- viṣpandisāndrarudhirokṣitadanturārciḥ| jajvāla dhurjaṭimukhāgnir uvauṣa cātha tatsyandanaṃ saturagaṃdhvajasūtacakram_||53|| kapiśitadaśadigbhir vahninā heticakrais tripura iva tadānīṃ syandane tena dagdhe| śaśirakalakirīṭaṃ daityanātho jighṛkṣuḥ sarabhasamada darpādutpapātāntarikṣam_||54|| smitavikasitagaṇḍabhittibhāgastam abhimukhaṃ guruvegam āpatantam_| samamabhinadaśeṣadaityakāntājanahṛdayais triśikhena śūlapāṇiḥ||55|| tadvakṣas sphuritakṛśānuśūlakoṭin jhāṅkārāravabadhirīkṛtāntarikṣam_ sasyande rudhiramakāri yena sandhyātāmrāṃśucchuritam ivābhracakravālam_||56|| ditijarudhiradhārāsiktaśūlāśribhāga- jvalanajanitadhūmaśyāmalaṃ sūryabiddham_ vigalitaruciṭaṅkāghātasaṃsaktamūḍha- kṣatajam iva tadānīm antarikṣe rurodha||57|| sasyande triśikhavidāritātsurārer yadvakṣaḥkaṭakataṭādasṛkchaṭāmbhaḥ| viśveṣām akuruta tatpratāpavahnipluṣṭānām api jagatāṃ tadeva śāntim_||58|| triśikhamukhavibhedādañjanakṣodapuñja- cchaviravanimamuñcadvyomasīmnyardvamānaḥ| gaganabhuvi sa evālokyatārātisainyair ditisutakulalakṣmīsaṅkṣayātpātameghāḥ||59|| tadvakṣaḥ kaṭakādasṛṅnipatitaṃ sāndraṃ kapālodare pītvā tatparimāṇapāṭalam ivātāmraṃ vapur bibhratī| cāmuṇḍāṅgulikoṭibhāgamalanāttadvīryabījāṅkurān acchinnākhilasantatīs sarabhasaṃ cakre praticchandakān_||60|| triśikhadahanajvālātāpakvacidbahalāsṛjas sapādi vapuṣas tasyaśoṣātkṛtād atha ¯smasāt_| stimitanayanavrātair dṛṣṭaṃ surāsurasainikaiś śaśadharakalāmauler jyotiś śarīram athāviśat_||61|| grāsīkṛtarditasurāsuracakravālaṃ saṅgrāmasāgaragatāndhakakālakūṭaḥ| nirdhūtacāmaramarutparivījitāṃsa- pīṭhe dideśa haraye tha sa rājyalakṣmīm_||62|| unmūlitākhilavipakṣagaṇāsu tūrṇaṃm asyājñayā pura ivāmaralokapālāḥ| dikṣu kramād atha yathāyatham eva gupti- hetoḥ sthitiṃ pramadaphulladṛśo babandhuḥ||63|| nipatitamarisainyābhyāhataṃ saṃyugorvyān nijakaraparimarśān niṣprahāravraṇaṃ saḥ| śaśiśakalakirīṭasyandamānāmṛdambhas srutikṛtapariṣekaṃ jīvayām āsa sainyam_||64|| diśi diśi makarandasyandamādyaddvirephās surabhitaghanamārgāḫ puṣpavṛṣṭīẖ kirantaḥ| pratinavamukharāgānekavāditraghoṣais tamahitavadhatuṣṭās tuṣṭuvus siddhasādhyāḥ||65|| jaguramarataruṇyo maṅgalaṃ tāramandra- kramataralitahārotkampipīnastanāgrāḥ| aviratavividhabhrūbhaṅgasaṃlakṣyamāṇaḥ sphuṭataragurucetovāsanā nākamārge||66|| tridaśagaṇapatīn svāṃ viślathan mauliratna| praṇatigatiśiraskāṃsaṃyuge dṛṣṭabhaktīn_| abhimatavaralābhais so tha sambhāvya devyā saha sukhamanubhāvāt svāṃ purīm adhyatiṣṭhat_||67||

śroībālabṛhaspatyanujīvino vāgīchoice>gvaśvarāṅkasya mahāka◻ve ratnākasya kṛtau haravijaye| mahākāvye devadevapratiṣṭhāpanaṃ nāma pañcadaśas sargasamāptaḥ||