pañcāśaḥ sargaḥ|
bhagneṣvadhokṣajapitāmahavāsaveṣu
daityādhipena sakalaiḥ saha lokapālaiḥ|
pañcākṣamityabhidadhe bhagavānsaroṣa-
māsphālya niṣṭhuramathonnatakoṭicāpam||1||
paśyādhunāmumuragāśanaketumatra
bhagnaṃ virugṇaraṇarāgamito 'ndhakena|
yasya vyadhāyiṣata candramarīciśubhraiḥ
sādhāraṇāṃśukabhṛtaḥ kakubho yaśobhiḥ||2||
daityaindramārgaṇagaṇābhihatasya paśya
ratnacchaṭāruṇitamātmabhuvaḥ śarīram|
nidrāvimuktamadhusūdananābhipadma-
niṣpandisāndramadhudigdhamivādhunāpi||3||
paśyātatāyikaṭhināsthiśilāvibheda-
kuṇṭhīkṛtāśi kuliśaṃ yudhi nirjitasya|
daityaiḥ kare śatamakhasya bhayodayottha-
gharmāmbusiktamiva saṃtanute na tejaḥ||4||
daiyāshivajrakaṣakuṇṭhatarāracakraṃ
cakraṃ trapāparicayacyutacaṇḍacaryam|
viṣṇorbhayākulatayā vyapalīnavahni-
dhūmāyamānamavalokaya pāṇilagnam||5||
ābaddhakopaditijādhipabāhucakra-
cakrīkṛtātanuśarāsanabāṇapātaiḥ|
bhaṅgīśataiḥ prakaṭarandhraparītamadhya-
māpūrṇameti vitataśriyamarkabimbam||6||
nārācanirdalitabimbatayaiṣa bhagna-
saṅgrāmadurlalitadurdharadhairyabandhaḥ|
adhyāsyamānahṛdayo hariṇena paśya
saṃkrāntakātaratadīyamanā ivenduḥ||7||
paśyāstaparvatamivrābhrakapa"kanīla-
māsādya dānavacamūpatimetadagre|
paryākulo 'dhikamanūṣmatayā raṇe 'tra
bhagnaḥ pratapavibhavena sahaiva bhānuḥ||8||
bibhradgadāṃ vidalitārikapālagurvīṃ
līlāvilambitamanoharaśaṅkhapadmaḥ|
vyāpāritāyudhaśato 'ndhakabāṇavarṣai-
rnābhāti śauririva jarjaritor 'thanāthaḥ||9||
paśyaiṣa nirjayakṛtabhrukuṭīvibhaṅga-
cchāyopabṛṃhitanavāñjanapuñjavarṇām|
vaktraśriyaṃ ghṭitanīlapaṭāṃ hriyeva
dhatte yamaḥ pariharanmama dṛṣṭimārgam||10||
dhatte mukheṣu varuṇo ripuroṣavahni-
jvālāruṇāṃ tanumasāvasamāptakampaḥ|
nityāvabaddhamakarālayavāsalagna-
durvāravāḍavakṛśanuśikhāmivaitām||11||
utsṛṣṭadiggajagalanmadavārigaṇḍa-
piṇḍīkṛtairaviralaṃ bhramaraiḥ patadbhiḥ|
paśyaiṣa kiṃśukavanabhramamohamandai-
ranvīyate 'gnirasurairvihitoṣmabhaṅgaḥ||12||
sāndrībhavatyamalamecakakhaḍgamegha-
ghorāndhakāranikaraḥ sthagitāntarikṣaḥ|
saṃtrāsavihvalavalatpratipattimūḍha-
gāḍhānilocchvasitadhūmaśikhāsahasraiḥ||13||
yatkīrtanādapi nijeṣu niketaneṣu
bhītairmarudbhirudavijyata baddhakampam|
udyacchamānamavalokya tamāhavāgre
saṃbhremuṣā suragaṇena yato 'pasasre||14||
tatsyandanaṃ sapadi codaya darpamūḍha-
daityādhipābhimukhamūrjitasiṃhavāham|
ūṣmāṇametamadhunā viṣameṣuvarṣaṃ
saṃtyājayāmi yudhi śailamivātra yāvat||15||
ityūcuṣi smararipau tarasā mumoca
sūto 'ndhakaṃ pratirathaṃ kṛtamerukampam|
daityādhipasya na cacāla ratho 'pi yantṛ-
saṃcoditaḥ kimapi bhāvi bhiyeva paśyan||16||
vyasyannivāśu bhuvanatritayādhirājya-
lakṣmīṃ patatramarutātha sumerukuñjāt|
gṛdhraḥ paretapatidūta iva dhvajāgra-
madhyāsta tasya rabhasādaruṇottamā"gnaḥ||17||
sasyandire jalabhṛto bhuvanāravinda-
koṣapratiṣṭhamakarandarasāyamānam|
sānandagṛdhrakulaṣaṭpadacakravāla-
vāñchāvipūraṇamanargalamastravarṣam||18||
khaḍgājughū karaṇaghāñjughuru(?)rghanaughā
nirghātaghoraghaṭanāsthitimāpa pṛthvī|
vajrābhighātaparuṣaṃ piśitāśinaśca
cakrurmahāpralayaśaṃsinamaṭṭahāsam||19||
dhairyāvadhīritaśubhetaraghorarūpa-
cihnasya dānavāpateḥ samarājirorvyām|
śaṃbhośca dṛṣṭajayaliṅganirākulasya
vegātsamīyaturathātirathau tatha tau||20||
ahrādi dundubhibhirāhananādaguñji
guñjāgaṇena vidhurairmukharairabhāvi|
akvāṇi gomukhaśataiḥ paṇavairarāṇi|
tasmiṃstayoratha raṇe prvijṛmbhamāṇe||21||
āhanyamānakikharānakagomukhādi-
vāditraghoṣamukharāḥ kakubho babhūvuḥ
daityāśca śailakuharapratiśabdadīrgha-
ghorā trayeṇa(?) mumucuryudhi siṃhanādam||22||
yodhā yudhe kṛtadhiyo rabhasena valgu-
saṃvādiphalgunamaphalguphalaṃ vavalguḥ|
pāṇisthitākṛpakṛpāṇanipatapīta-
mattadvipākṛpakṛpāṇakṛpīṭapaṭṭāḥ||23||
saṅgrāmamaṅgalamupetya jaguḥ sakampa-
hastāṅgulīśithilakoṇahatā vipañcīḥ|
śaṃbovilokananirargalajṛmbhamāṇa-
pīnadhvajāḥ sarasamapsaraso dadhatyaḥ||24||
tasyātha mūrdhni madamantharitadvirepha-
pakṣānilābhihatakampitakesarāgrā|
ānandanirbharanabhaścaracakrahasta-
muktā papāta surapādapapuṣpavṛṣṭiḥ||25||
ābhādakheṭakhaṭakāmukhahastadīrgha-
raktāṅgulīnakhamaṇipratibimbagarbham|
pratyuptadīptatararatnamivocchikhāccha-
raśmicchaṭaṃ kanakakuṇḍalamandhakasya||26||
tasmindudhūvuṣi dhanurdharadhairyabandha-
māyodhane dhanadayodhajanena sārdham|
senānakā iva tadā girayo vinedu-
rmaurvīninādamukharīkṛtarandhrabhāgāḥ||27||
kodaṇḍakoṭighaṭitoragarājamaurvī-
vellatphaṇāmaṇigaṇapratibimbagarbham|
māṇikyaśekharamivāmṛtaraśmikhaṇḍa-
bhīṣatkirīṭaghaṭitaṃ bibharāṃcakāra||28||
tasyormibhaṅgaviṣamonnatabāhudaṇḍa-
khaṇḍāndahandhanuṣi dānavasindhunāthān|
jvālākarālitamukhastarasātigāḍha-
maurvīkṛtasthitirarājata bhogirājaḥ||29||
kodaṇḍadaṇḍaghaṭitāṭanigāḍhabandha-
tāntena tasya vikasatphaṇacakravālam|
nāgeśvareṇa papire śiśirāḥ śiraḥstha-
mandākinījalataraṅgaghaṭāsamīrāḥ||30||
śūtkāripakṣamarutaḥ sphuradagniśāta-
śalpāḥ śarāḥ śaśikalāṅkitabāhumadhyāt|
niścakramurditisutābhimukha. himādri-
kuñjāntarālagahanādiva rājahaṃsāḥ||31||
chāyāmayīṃ vidadhato bhuvaneṣvakāṇḍa-
kalpāvasānarajanīmiva tasya saṃkhye|
ākarṇakṛṣṭavalayīkṛtacārucāpa-
caktracyutā bhuvanamānaśire śaraughāḥ||32||
maurvīkṛtasya khaṭakāmukhapāṇikṛṣṭa-
madhyaṃ krameṇ phaṇinaḥ phaṇacakravālam|
phūtkārapāvakaśikhā dhanuṣo 'tha tasya
cakrīkṛtādiṣugaṇāśca samaṃ nipetuḥ||33||
rūḍhāruḍhaṃ(paṃ)tadurasi sphuṭakekipiccha-
puṅkhāḥ śarā ditijakārmukacakramuktāḥ|
kalpadrumā iva mahīdhrataṭīvicitra-
saṃphullaratnakusumastabakā nipetuḥ||34||
kṛttopavītabhujagādhipamūrdharatna-
puṣpopakārakṛtasaṃyugavartmaśobhaiḥ|
vakṣaḥsthale purariporasurendracāpa-
cakracyutaiḥ śaraśataiścaturaṃ nipete||35||
kallolajālakalilā vivalatkapāla-
kūrmodarāḥ śirasi tasya śarāśrayāśaiḥ|
mandākinījalarayāḥ papire patadbhi-
rahnāya sindhava iva pralayārkapādaiḥ||36||
saṃdhāsyamānakṛtamāgaṇasaṃdhiyoga-
cakrībhavanmaṇiśarāsanabāhujālaḥ|
daityādhipaḥ sphuradanekaśaśaṅkakhaṇḍa-
mātaṇḍamaṇḍala ivāmbaramārga āsīt||37||
manye ca tasya valayīkṛtakārmukasya
saṅgrāmakarmaṭhakaṭhorakarālavāhoḥ|
prāgātatāyipṛtanāsubhirbhyapāti-
paścānniśātatarśalyamukhairvipāṭhaiḥ||38||
ābaddhakopaditijādhipabāhudaṇḍa-
madhyānnirīyuratha saṃyugavartma bāṇāḥ|
saṃhāramārutaparahatasindhuvīci-
cakrādivojjvalitavahnimukhā bhujaṃgāḥ||39||
niṣṭhyūtatīvraśikhinaḥ śitikaṇṇṭhamaulī-
mālākapālaśakaleṣu niśātaśalyāḥ|
niṣpeturarkakiraṇā iva karkaśeṣu
kailāsaśailaśikhareṣu surāribāṇāḥ||40||
tatpātanirdalitamaulikapālapaṭṭa-
dhūmacchaṭāmalitamaulikapālapaṭṭa-
dhūmacchaṭāmalikalocanamāviśantīm|
sevāvicakṣaṇa iva śvasitairnirāsa
karṇāvataṃsabhujagaḥ śaśikhaṇḍamauleḥ||41||
uddāmadāhaparivartitajihmakoṭi-
ruttaṃsacandrakalikā śirasi smarāreḥ|
daityādhirājaviśikhāgniśikhāsahasra-
niryatsudhāsrutirabhūtsaviśeṣatanvī||42||
tasyāhave vikaṭapicchakalāpabhāra-
śaṅkucchalasphuṭitacandrakikhaṇḍyamānāḥ|
uddāmakopaditijādhipacāpacakra-
muktāḥ śarā viṣadharā iva saṃnipetuḥ||43||
abhyāpatanmuditakhecaracakravāla-
sāmājikastimitalocanacakradṛṣṭaḥ|
daityādhipo 'dbhūtavidhāyi vijṛmbhamāṇa-
viśliṣṭasaṃdhiḍimaḍambaracāraṇo 'bhūt||44||
ānemuṣo vijahatā dadhuṣaśca darpa-
mānighnatā juhuvuṣo 'bhimukhaṃ yātārāt|
tenākhilā yudhi parasparamūyire 'tha
gāḍhaṃ śarairdaśadiśo dṛḍhacāpamuktaiḥ||45||
ākarṇakuṇḍalitakarka'sakāladaṇḍa-
cakrāyamāṇamaṇikāmukanirgatena|
bāṇena vakṣasi jaghāna mṛgāṅkamauli-
mābaddhamatsaramathāvasare 'surāriḥ||46||
devo 'pi dānavapateḥ pṛthujatrusīmni
tiṣṭhetyudīrya śaraghātavivṛddhamanyuḥ|
preṅkhanmukhāgraśihinaṃ nicakhāna bāṇa-
mutsaṃkhyasaṃkhyakṛtapuṅkhatayorupuṅkham||47||
tāvuttarottaraduruttaratāratamya-
tāmyaddīnākṛśakṛśānuparītabāṇau|
saṅgrāmavartmani paraspararandhralābha-
bandhābhisaṃdhi ciramakramatāmavandhyam||48||
vakṣo 'ndhakasya nijaghāna ghanāghanatvi-
ḍīśastaḍinnibiḍacaṇḍakaḍārakāṇḍaiḥ|
kūlādrisānukaṭakaṃ vika.aistaraṅga-
bhaṅgaiḥ savāḍvaśikhairiva kūrmaketuḥ||49||
pre"Nkhacchikhā viśikhasaṃhatirandhakena
muktā tataḥ śirasi śūlabhṛtaḥ śarāroḥ|
cūlāvacūlaphaṇiphūtkṛtivahniheti-
saṃpluṣṭapakṣatipuṭā viṣamaṃ nyapaptat||50||
karṇāvataṃsitaphaṇisphuritasphuliṅga-
phūtkāravahnitapanātapadagdhapakṣaḥ|
vyomnaḥ patanditisutādhipaśailamūrdhni
saṃpātivibhramamadhatta vṛṣāṅkabāṇaḥ||51||
vistāriśalyamukhanirgatarohidaśva-
śārīkṛtāmbaratalā bhayamadadhānāḥ|
taccāpamaṇḍalaviniṣpatitāḥ prasasru-
rulkāpiśācanicayā iva dikṣu bāṇāḥ||52||
dūraṃ daridrihi dareṇa vidārayādrī-
ndarpoddhatāñjahi jahīti narānarātīn|
ityāharnpravijahāra sakarṇajāha-
raktāntanetrayugalo vijahau ca khedam||53||
guñjadguṇāviralaśabdavimiśragāḍha-
maurvīvirāvamukharo 'tha śilīmukhaughaḥ|
dūrādaśiśriyadivāmbaracāricakra-
mānandamasya survairivadhāhitaṃ saḥ||54||
vaktrāmṛtāṃśupariveṣapṛṣatkapīṭha-
niṣṭhyūtaniṣṭhuravipāḥavijarjarāṃsaḥ|
yodhānmucoca raṇamūrdhniṃ mumūrṣuṣo 'tha
randhrena jātu ripuṣu praharanti dhīrāḥ||55||
tatpattribhiḥ suraripoḥ śakalīkṛtānā-
mākāśa eva kaladhautśilīmukhānām|
rejuḥ patatpracuracūrṇaparāgadigdha-
bālārkaraśmiśabalā iva śailakūṭāḥ||56||
saṅgrāmanaṭakavilokanakautukātta-
saṃcārakhecarasahasravimānapaṅktīḥ|
ūrdhvaṃtarāṃ taraṇimārgarudhaḥ pracaṇḍa-
kodaṇḍanirgataśarāmanayatsmarāreḥ(?)||57||
taccāpanirgatanirargalamārgaṇaugha-
pakṣānilāhativijarjaritābhramāsīt|
vyapāryamāṇavividhāyudhaghātarūḍha-
gāḍhāsitavraṇakiṇāṅkamivāntarikṣam||58||
āpīyata sthagitabhāskarabimbabīja-
koṣairnavātapamadhusphuṭapattraśobhaiḥ|
jyāghos.agītimukharairbhuvananāravinda-
garbhāspadaṃ sapadi daityaśilīmukhaughaiḥ||59||
vistārya cāpamatha visphuradagniheti
niḥśaṅkahuṃkṛti nidhānamahaṃkṛtīnām|
daityādhipaḥ kuṭilitabhrukuṭīvibhaṅga-
bhāsvallalāṭa iti dhūjaṭimābabhāṣe||60||
tiṣṭhādhunā kva nu baṭo mama dṛṣṭimārgā-
dgantāsi puṣpaviśikho 'smi na mandavīryaḥ|
kālo 'thavā na kṛpaṇaḥ kṛmikīṭajantu-
jīvāpahāracaturo na gajāsuro vā||61||
anyā hi nṛttarabhasotthitadattatāla-
vetālamālitatalā pitṛmandirorvī|
saṅgrāmabhūmiraparā bhaṭacaṇḍacakra-
dordaṇḍadarpanikaṣopalapaṭṭikā'srīḥ||62||
ityūcivānnirabhinatsmayamāna eva
taṃ pañcabhirjvalitavahniśikhaiḥ pṛṣatkaiḥ|
kiṃcittadīyaviśikhāśanipātabhinna-
vakṣaścacāla ca śśāṅkakalāvacūlaḥ||63||
tasminmanākcalati ṣaṇmukhadattadṛṣṭi-
dṛṣṭārtileśasadapatrapalambavaktre|
āmardakastvaritamandhakamabhyadhāva-
dutpāṭitasthagitabhānusumerukūṭaḥ||64||
daityādhipastamatha saṃmukhamāpatanta-
mālokya kopavivaśo viśikhairarautsīt|
taccoditaṃ śikharamucchikharatnasāra-
masyābhinattilatulāmadhirūḍhamanyaiḥ||65||
tasmai rathā'ngamakiranmurajinmahāji-
helo halī haritasaptisutaśca daṇḍam|
saṃstabhya tānatha śaraiḥ sa sahasrasaṃkhyaiḥ
saṃkhye jaghāna laghu pañcabhirindumaulim||66||
kodanḍadaṇḍaśikharasthaphalāsahasra-
phūtkāravahnikaṇatārakitāntarikṣam|
ciccheda vāsukiguṇaṃ kirataḥ pṛṣatkā-
nāsādya randhramatha tasya śaraiḥ surāriḥ||67||
pratuptadīptamaṇidīdhiticakravāla-
saṃkīryamāṇavikaṭonnatakoṭidaṇḍam|
vicchinnapannagaguṇaṃ dhanurindumaule-
rindrāyudhaśriyamadīdharadantarikṣe||68||
sa cchinnavāsukiguṇo jayalābhaliṅga-
māliṅgitāmbaraśikhāgraśikhāsphuliṅgam|
jagrāha kopakuṭilabhrukuṭīvibhaṅga-
piṅgekṣaṇānanadurīkṣyavapustriśūlam||69||
niḥśeṣalokakavalagrahaṇāya valga-
dālolahetirasanastarasotpatiṣyan|
tasyābhivādayitumaurvamivāgnimāśu
huṃkāravahnirudadhau jhagiti nyapaptat||70||
tenātha śaṃkarakarabhramitena tūrṇa-
makṣuṇṇameva ghanavartmani gharmaraśmeḥ|
ābadhyata trigunamāśu vivṛttilola-
śākhātrayānalaśikhāpariveṣacakram||71||
ākṛṣṭaśailaśikharaṃ taralīkṛtārka-
candraṃ samudrasalilaplutanākamārgam|
puñjīkṛtoḍḍu dalitakṣitipīṭhapṛṣṭha-
māsīdanubhramaṇalolamamuṣya bimbam||72||
śūlāgnitāpadalitopalamūlasaṃdhi-
bhāgāni bhagnataṭakalpatarūṇi tūrṇam|
peturvimuktivikaṭīkṛtadūradṛśya-
pṛṣṭhapratiṣṭhitanabhāṃsi śirāṃsi meroḥ||73||
tasmiṃśca dhūrjaṭikarabhramite vidhūta-
sindhurmisaṃhatipariplutanākapṛṣṭhe|
pusphora taddahanapīvaravisphuliṅga-
viśliṣṭabhedamahimāṃśumarīcibimbam||74||
ūhuḥ pinākaśikhātāpavilīyamāna-
vistīrṇakāñcanaśilāśikharapravṛttāḥ|
ratnopalaskhalanabhinnajalāḥ sumeroḥ
kūlaṃkaṣāḥ kaṭakabhūmiṣu nirjhariṇyaḥ||75||
śākhāntarālaparivartavilolavahni-
jvālākalāpavikaṭāñjalibhistadānīm|
tenodapīyata paribhramaṇānubandha-
saṃjātadurdharadaśeva surasravantī||76||
jvālākalāpakavalīkṛtasaptasindhuṃ
tāpasphuradvikaṭaṭāṃkṛti śailakūṭam|
caṇḍālikajvalanamūrjitamutsasarja
saṃvartakāla iva vaktratalena śaṃbhuḥ||77||
tenāndhakasya vikaṭonnatacāpacakra-
muktāḥ śarāḥ sthagitadiktaṭamāpatantaḥ|
nirdehire jaraṭhahetiśataiḥ sarīḍha-
maurvāgnineva makarākaravīcibhaṅgāḥ||78||
taṃ śūlaśaktimusalāśanipaṭṭiśāsi-
paṭṭairnihatya purajidditijaṃ jughora|
ghorāstravṛṣṭibhirarthādidadandhako 'pi
tasminpunaḥ sa vavṛdhe saviśeṣamagniḥ||79||
kodaṇḍamaṇḍalavinirgatamasya bāṇa-
jālaṃ yudhi prasabhamindudharo nihatya|
vegādrathaṃ prati sasāra tamājaghāna
daityādhipo 'pi gadayā guruśūlahastam||80||
daityādhiperigadādalitottamāṅga-
viṣpandisāndrarudhirokṣitadanturārciḥ|
jajvāla dhurjaṭimukhāgniruvoṣa cātha
tatsyandanaṃ saturagadhvajasūtacakram||81||
kapiśitadaśadigbhirvahninā heticakrai-
stripura iva tadānīṃ syandane tena dagdhe|
śiśirakarakirīṭaṃ daityanātho jighṛkṣuḥ
sarabhasamatha darpādutpapātāntarikṣam||82||
smitavikasitagaṇḍabhittibhāgastamabhimukhaṃ guruvegamāpatantam|
samamabhinadaśeṣadaityakāntājanahṛdayaistriśikhena śūlapāṇiḥ||83||
tadvakṣaḥ sphuritakṛśānuśūlakoṭiṃ jhāṃkārāravabadhirīkṛtāntarikṣam|
sasyande rudhiramakāri yena saṃdhyātāmrāṃśucchuritamivābhracakravālam||84||
ditijarudhiradhārāsiktaśūlāśribhāga-
jvalanajanitadhūmaśyāmalaṃ sūryabimbam|
vigalitaruciṭaṅkāghātassaṃsaktamūla-
kṣatajamiva tadānīmantarikṣe ruroca||85||
sasyande triśikhavidāritātsurāreryadvakṣaḥkaṭakataṭādasṛkchaṭāmbhaḥ|
viśveṣāmakuruta tatpratāpavahnipluṣṭānāmapi jagatāṃ tadeva śāntim||86||
triśikhamukhavibhedādañjanakṣodapuñja-
cchaviravanimamuñcadvyomasīmnyardyamānaḥ(?)|
gaganabhuvi sa evālokyatārātisainyai-
rditisutakulalakṣmīsaṃkṣayotpātameghaḥ||87||
tadvakṣaḥ kaṭakadasṛṅnipatitaṃ sāndraṃ kapālodare
pītvā tatpariṇāmapāṭalamivātāmraṃ vapurbibhratī|
cāmuṇḍāṅgulikoṭibhāgamalanāttadvīryabījāṅkurā-
nacchinnākhilasaṃtatīnsarabhasaṃ cakre praticchandakān||88||
triśikhadahanajvālātāpakvathadbahalāsṛjaḥ
sapadi vapuṣastasyāśeṣātkṛtādatha bhasmasāt|
stimitanayanavrātairdṛṣṭaṃ surāsuramaṇḍalaiḥ
śaśidharakalāmaulerjyotiḥ śariramathāviśat||89||
grāsīkṛtarditasurāsuracakravāla-
saṅgrāmasāgaragatāndhakakālakūṭaḥ|
nirdhūtacāmaramarutparivījitāṃsa-
pīṭhe dideśa haraye 'tha sa rājyalakṣmīm||90||
unmūlitākhilavipakṣagaṇāsu tūrṇa-
masyājñayā pura ivāmaralokapālāḥ|
dikṣu kramādatha yathāyathameva gupti-
hetoḥ sthitiṃ pramadaphulladṛśo babandhuḥ||91||
nipatitamarisainyābhyāhataṃ saṃyugorvyaṃ
nijakaraparimarśānniṣprahāravraṇaṃ saḥ|
śaśiśakalakirīṭasyandamānāmṛtāmbhaḥ
srutikṛtapariṣekaṃ jīvayāmāsa sainyam||92||
diśi diśi makarandasyandamādyaddvirephāḥ
surabhitaghanamārgāḥ puṣpavṛṣṭīḥ kirantaḥ|
pratinavamukharāgānekavāditraghoṣā-
stamahitavadhatuṣṭāstuṣṭuvuḥ siddhasādhyāḥ||93||
jaguramarataruṇyo maṅgalaṃ tāramandra-
kramataralitahārotkampipīnastanāgrāḥ|
aviratavividhabhrūbhaṅgasaṃlakṣyamāṇa-
sphuṭataragurucetovāsanā nākamārge||94||
tridaśagaṇapatīṃstānviślathanmauliratna-
praṇatinataśiraskānsaṃyuge dṛṣṭabhaktīn|
abhimatavaralābhaiḥ so 'tha saṃbhāvya devyā
saha sukhamanubhāvātsvāṃ purīmadhyatiṣṭhat||95||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye devadevapratiṣṭhāpanaṃ nāma
pañcāśaḥ sargaḥ|
samāpto' yaṃ granthaḥ|