saptacatvāriṃśaḥ sargaḥ |
saṅgrāma mūrdhni dalitāsura cakra vālām
ālokya tatra vikasat pulaka prabandhāḥ |
ābaddha gocara pariṣṭhita vāk prapañcaṃ
saṃtuṣṭuvur bhagavatīm iti siddha sādhyāḥ || 1 ||
kiṃ citram atra dalitaṃ ripu cakravāla -
m etat tvayā janani yat prasabhaṃ raṇāgre |
nirbhindatī bhavana varti niśāndhakāra -
m āścarya dhāma nahi dīpa śikhā kadācit || 2 ||
dordaṇḍadṛptamanasaḥ subhaṭā vipakṣam
anye ’pi yad raṇamukheṣu parājayante |
tac chaktirūpam anaghasthitisaṃśritāyā
leṣāṃśabhāgaparamāṇuvijṛmbhitaṃ te || 3 ||
daityaiḥ purā suracamūsu vinirjitāsu
tadguptikāraṇavaśād asamāptaśaktiḥ |
dhyātvā sanātanapadaṃ kila śaṃkareṇa
sṛṣṭāsi tatpatitajīvanabaddhavṛttiḥ || 4 ||
nistriṃśam udvahasi saṃprati nīlakaṇṭha -
kaṇṭhaprabhāsadṛśa ity anurāgahetoḥ |
huṃkārasaṃbhramacalatsakalātatāyi -
cakrā na jātu raṇalālasayā punas tvam || 5 ||
āyodhaneṣu sakalāmaracakravālair
ālokitā tvam asurādhipavaṃśaketuḥ
vistāridarpaṇam ivodaradeśalagnam
abhraṃkaṣoṣṇakaramaṇḍalam udvahantī || 6 ||
kārkaśyam aśmanikarād iva saṃyugeṣu
dūrvāpravālavalayād iva kāntir aṅge |
saṃkrāntim āpad iva devi himasthalībhyo
hāsacchavis tava tuṣāragirer vipāṇḍuḥ || 7 ||
mārgaṃ purā kila sahasraruco rurutsu -
r udyannagastyamunināpi niṣiddhavṛttiḥ |
vindhyācalas tvayi guhāgṛhabhāji sapta -
lokādhikaṃ dhruvam avāpa samunnatatvam || 8 ||
saṃcintya rūpam atulaṃ tava puṣpaketu -
dāhānutāpavaśataḥ śvasitoṣṇavātān |
ākṛṣṭakaṇṭhakuharāspadakālakūṭa -
kūṭānalān iva mumoca mṛgāṅkamauliḥ || 9 ||
sadmājiraṃ tava nabhaścaracakravāla -
puṣpopakāranipatanmadhupāvalīkam |
vicchinnabhaktabhavabandhanalohapāśa -
jālāvakīrṇam iva rājati mekalādrau || 10 ||
nistriṃśaghātavinikṛttapaśūpahāra -
jīvā ivāpya sugatiṃ paridīpyamānāḥ |
vindhyādrikaṃdharajuṣo bhuvanāndhakāra -
nirbhedino ’ntikagatās tava bhānti dīpāḥ || 11 ||
brahmāṇḍaśaṅkham upapāditakaṇṭhabhāga -
randhraṃ viniḥśvasitamārutapūrṇagarbham |
saṃhārarātriṣu vipūrayasi tvam eta -
m ālambya bhairavavapuḥ prasabhaṃ karābhyām || 12 ||
āviṣkṛtapralayadurdharakālarātri -
mūrter udagravikaṭāvayavāntareṣu |
paryāptim eti tava saṃhṛtasaptaloka -
lokāsthisaṃbhṛtiśatair api maṇḍanaṃ kim || 13 ||
nirmāṃsatādhavalarāhuśiraḥkapāla -
kāṃsyāgrapītabhuvanakṣatajāsavaśrīḥ |
viśrāṇayasy atanutatpiśitāvadaṃśa -
leśānuviddhadaśanāmba na kasya bhītim || 14 ||
āhanyamānakanakācalalāḍanottha -
nādānubandhabadhirīkṛtasaptalokam |
kalyāṇi vādayasi kālavibhāvarīṣu
padmāsanāṇḍavikaṭordhvakavāṭaghaṇṭām || 15 ||
helāviniḥśvasitapītakaṭhorakaṇṭha -
nāḍīnirargalagalatkṣayasāgarāmbhaḥ |
rūpaṃ bibharṣi valayīkṛtasaptasaṃkhya -
dvīpoṣṇaraśmikiraṇāvadhiśailacakram || 16 ||
saṃhārakālarabhasotthitadhūmaketu -
nirdagdhasaptabhuvanendhanajo na mātaḥ |
manye lalāṭataṭapuṇḍrakamātrake ’pi
paryāptim eti tava bhasmaparāgapuñjaḥ || 17 ||
aurvo nirargalakarālaśikhāsahasra -
bhasmīkṛtārṇavajalas tava jāṭharo ’gniḥ |
śvāsās tavaiva marutaḥ pralayāgameṣu
helānipātitakulācalacakravālāḥ || 18 ||
vakṣaḥsthalīvinimitāmaraśailadaṇḍa -
lagnendukhaṇḍanavabhāsvadalābupātrām |
āśrāvayasy atanuśeṣaśarīratantu -
tantrīguṇāṃ pralayarātriṣu kāṇḍavīṇām || 19 ||
saṃkalpakalpitaviśaṅkaṭakaṇṭhabhāga -
m antaḥsthasaptajalaśevadhivāripūrṇam |
brahmāṇḍam eva sahasā vidadhāsi caṇḍi
līlākamaṇḍalum imaṃ pralayāgameṣu || 20 ||
vaikuṇṭhacakraparikalpitaśaṅkhapattra -
saṃruddharandhravikarālavilambipāśam |
karṇaṃ bibharṣi bhagavaty abhirāmam eka -
m anyaṃ ca hemagirikāñcanatālapattram || 21 ||
abhyucchvasatphaṇapalāśakarālajihva -
pratyagrapakṣmanikurumbaśarīranālam |
karṇe ’vataṃsayasi pāṇḍurapuṇḍarịka -
śobhaṃ bhavāni bhujagādhipam apy anantam || 22 ||
astodayādrinamitonnamitārkacandra -
vistīrṇabimbamaṇikandukakīrṇahastā
cikrīḍitha tvam iha caṇḍi kumārabhāva -
m ātasthuṣī bhuvanavismayanīyamūrtiḥ || 23 ||
tārakvaṇaḍḍamarukā karusīṣu caṇḍi
saṃhārakālamuditā vicarasy amandam |
skandhādhiropitaviṭaṅkavirañcikāya -
kaṅkālabhāganinadatsamavartighaṇṭā || 24 ||
nāḍīsahasrasaśirāmbaragarbhavartma-
saṃcāracātura(?)karī tdṛdi saṃniviṣṭā|
śaktis tvam eva paramātmaparāparārtha-
brahmārkamaṇḍalagamāgamagūḍhaguptiḥ||93||
spaṣṭībhavadgaganagañjacitiprakarṣam
ātmīkṛtākhilasatattvagatiprapañcam|
kāpi tvam eva nanu dāśavalāvabodha(?)-
sattvānubhāvaparameśvaradevatādyā||94||
lokeṣvanādinidhanaṃ parivartate 'rtha-
tattvena yatprakṛtikāraṇaśabdatattvam|
brahmākṣaraṃ śivamayaṃ guṇagauri tasya
nirjagmiṣā(?)nanatalāt kila mātṛkā tvam||114||
yogābhiyogapaṭavo 'dhisamādhi.................
mūrchaddhanasthitiraṇatkṛtitāradīrgham|
udgītham om iti yad akṣaram āmananti
tasya tvam eva nirupaplutir īrayitrī||115||
tattatkālaṃ kālarātriprakopakrūrārambhottambhanaṃ varjayadbhiḥ|
āsede 'nyair dainyam aprāptadaityaiḥ(?) śaureḥ śūrair antikaṃ ratnasānau||170||