ekacatvāriṃśaḥ sargaḥ
atha kathamapi tasyāḥ saṃkaṭadvārasīmna-
stridaśagaṇavariṣṭhairañjasanvīyamānaḥ|
śrutaharijayaśabdaḥ sphītavāditraghoṣai-
rgirikaṭakataṭāntānnirjagāmendumauliḥ||1||
kvaṇitamukharaghaṇṭācakravāladhvajāgraṃ
rathavaramadhiruhya prasthitasyotpatākam|
svayamavahitacetā maṅgalaṃ saṃvidhitsuḥ
sarabhasamabhidadhmau vaiṣṇavī tasya śaṅkham||2||
navadhavaladukūlaiḥ kalpitāḥ sainikānāṃ
'saśikarasitakīrtikṣīrasindhūrmibhaṅgāḥ|
dviradaghanabalākāḥ prollasantyastadānī-
manilabalavilolā vaijayantyo virejuḥ||3||
sphuṭamaṇipariṇāhaprasphuratpuṣkaraśrī-
rdrutamupari niyantrā hantumutkṣipyamāṇaḥ|
udayagiriśikhāgrādūravartyarkabimba-
śriyam atanumatānīḍḍiṇḍimaḥ kuñjarasya||4||
pratigajamadagandhāgrāṇahelāvyudastaḥ
sphuradudaraniviṣṭaspaṣṭarekho 'grahastaḥ|
śriyam abhṛta kareṇornākasaṃrohaṇāya
drutamiva subhaṭānāṃ baddhasopānapaṅktiḥ||5||
diśi diśi makarandaṃ puṇḍarīkodarebhyaḥ
sarabhasamapi pītvā hārimādhuryamuccaiḥ|
dviradapatimadāmbhastiktamāsvādayanto
virasarasanamantarvaktramuhurdvirephāḥ||6||
pratigajamadhikopādbhāvatāṃ kuñjarāṇāṃ
sapadi mukhapaṭenācchādya vaktrāṇyalīnām|
aviralamadatoyāpānagoṣṭhīnirāse
bahuguṇamapi manye doṣahetuṃ kadācit||7||
śriyam atanuta rakṣābhūtivinyāsapāṇḍuḥ
sapadi madajalena ścyotatā saptadhorvyām|
dviradapatiranīcairvisphuradgaṇḍaśaila-
stridaśanagaragaṅgāsrotasevārkaśailaḥ||8||
dadhurabhinavalākṣārañjitaiścāmaraughaiḥ
śriyam anukṛtavātyāraṃhasaḥ sainikānām|
khuraśikharanipātakṣudyamānākhilorvī-
janitaśikhiśikhaughāśliṣṭarūpā ivāśvāḥ||9||
sthagitasakaladikkānekasaṃkhyānasenā-
janitagurubharoccairanvabhūddbhūri śaṃbhoḥ|
kramavidhṛtavimuktoddāmaniḥśvāsatāmya-
tphaṇipatiphaṇadolāndolanaṃ bhūtadhātrī||10||
kariharirathapattivrātanirdhūtadhūli-
prakarajanitakārśyamanvabadhnādadhastāt|
laghuvidalanabhītivyākulātmā kathaṃci-
tphaṇanigaḍasahasreṇāhinātho dharitrīm||11||
balasamudaya aiśe 'tītya gavyūtimātraṃ
sthitavati śibirāgrāvāsabhūmirgṛhītva|
prathamamiva tadānīṃ saugatānāṃ pramāṇaṃ
dviradakulamanalpaṃ kalpanāpoḍhamāsīt||12||
surabalamavalokyāvāsitaṃ kānanāgre
śakunaya urupakṣā dūramutpatya vegāt|
drumaviṭapaśikhāgrābaddhanīḍapratiṣṭha-
svatanayagatatṛṣṇāścerurākāśa eva||13||
kṛtagurutarakampāndolanavyākulāyāṃ
bhuvi vinimitapādaṃ jaṅgamāndrīndrakalpaḥ|
atinibīḍanibaddhaiḥ kalpavṛkṣeṣu senā-
dviradapatibhirāpe na tripadyā vilāsaḥ||14||
dṛḍhaniyamitarajjuskandhasaṃdānitānaṃ
srutamadajalagaṇḍābhogakāṣairgajānām|
tvagapatadavarugṇā kānanānokahebhyaḥ
sahajamapi vimūḍhāḥ kaṃ na viśleṣayanti||15||
srutaghanaghanasārakṣodasaugandhyabhājo
maṇitaṭakṛtavīcikṣobhamandākinīkāḥ|
drumagahanaviluptārkāṃśusaṃtāpaśītāḥ
śikharikaṭakabhūmīradhyavātsūrdhvajinyaḥ||16||
sphuṭitavikaṭagṇḍābhogamādyadvirephā
vikasadaviralailākandalīkānanāḍhyāḥ|
upamaṇiguhamadreḥ phullakośātakīkā
yuvatibhiranuyātāḥ kecidāsedururvīḥ||17||
atha śaśadharamauleḥ sainikāḥ sānudeśe
diśi diśi vicarantaḥ kalpitairvājisainyaiḥ|
pratibhayataralākṣaṃ dṛśyamānā mṛgaughaiḥ
sthitiriti ciramāsandarśitācchodanecchāḥ||18||
sarabhasamanubiddhā kenacitsādinoccaiḥ
sphuritataralatārā śyāmalāṃśucchaṭābhiḥ|
vyavadhimiva vidhātuṃ bhītipāriplavākṣī
hariṇayuvatiraicchatsaṃbhramādātmamūrteḥ||19||
druttaramapi naṣṭā sādisainyāvamardā-
ttanayamanavalokya kvāpi tatraiva yātam|
punarasunirapekṣaṃ kṛṣṇasārāṅganāgā-
tpadamiha na vipatteḥ kasya tṛṣṇāthavā syāt||20||
śravaṇaghaṭitamaurvīmaṇḍalībhūtacāpa-
cyuticaturataraśrīrdhanvinānvīyamānam|
hariṇamanaparādhaṃ mārgaṇo maṅkṣu bhīttvā
tvaritamiva vilakṣo 'lakṣitaḥ kṣmāmavikṣat||21||
kṣititalagatapuṅkheneṣuṇottambhyamāna-
sphuṭataragalanālaḥ kaścidudgrīva eva|
drutamiva calitānāṃ vallabhānāṃ tadānīṃ
hariṇaśiśurasūnāmūrdhamaikṣiṣṭa mārgam||22||
na khalu jagati śūnyaṃ kiṃcidastīha dhāmnā
yuvatimanusarantaṃ garbhabhārālasāṃ yat|
vikaṭakuṭilaśṛṅgāghātapātena kaṃci-
dvanabhuvi hariṇo 'pi svairamāhantumaicchat||23||
vikaṭaguruviṣāṇādabhrarāṇyavāñci
prasabhamabhihatānāmuttamāṅgāni pūrvam|
giribhuvi hariṇānāmāśu paścādvapūṃṣi
srutadhiralaghuni vyomamārgānnipetuḥ||24||
prakaṭavikaṭaśṛṅgaiḥ kānanaṃ mandarādre-
rdadhata iva nivāsaprītiyogācchirobhiḥ|
nabhasi pṛṣatayūthā dūramutplutya petu-
rdaśanakhuravirugṇālagnanārācapuṅkhāḥ||25||
upagatamavalokyāvajñayā sainyamuccai-
ragaṇitagurubhītirmuktasaṃrambhamagre|
hariṇaparivṛḍho 'sthādanyathā sattvabhājaḥ
kathamiva gurudhairyasyojasāsyopamā syāt||26||
vyapagataghṛṇamārānmandarasyāṅkavarti
ghnati suragaṇasainye dvīpi siṃhādisattvam|
pratikakubhamudasthurmanyumantastadānīṃ
tadanu varavarāhāḥ pratyanīkāyamānāḥ||27||
camarahariṇavṛndaṃ vālabhārākṣipātai-
ranukṛtanijanārīkeśahastekṣaṇatviṭ|
kvacidapi parihṛtyādhāvatāṃ sainikānāṃ
hariśarabhavarāhadvīpi hantavyamāsīt||28||
surabhikusumabhajo rupaśobhāṃ dadhatyā-
staralahariṇadṛṣṭeḥ kānanorvīramaṇyāḥ|
surata iva mṛgavyāvibhrame 'nyor 'dhacandra-
sphuṭakarajanipātaiḥ pāṭayāmāsa gaṇḍam||29||
śikharibhuvi śikhaṇḍī valgubarhātibhārā-
dalasitagatirarāddhanvinānvīyamānaḥ|
tvaritataramaśaknonna ghnato naṣṭumasmā-
dvipadi bhavati kāciddoṣarūpā guṇaśrīḥ||30||
iti vihitamṛgavyairmuktaparyāṇapaṭṭā
vavaluravanipīṭhe sādibhiḥ kṛṣṭavalgāḥ|
śramajalakaṇajālāśliṣṭajāmbūnadorvī-
vidhutaghanaparāgāliṅgitāṅgāsturaṃgāḥ||31||
rayacaturataraṅgakṣobhaśītairmarudbhi-
rdhrutakapilasaṭāgrāḥ saikate nākasindhoḥ|
adhijalamavaterurmaṅktumutprothaghoṇāḥ
kharakhuraśikharāgrakṣuṇṇapāṭhīnacakrāḥ||32||
vighaṭitadalamudrānpaṅkajaughānvihāya
pramadavidhutapakṣāstoya eva dvirephāḥ|
api madajalabindūndūramanvīyurelā-
stabakasurabhigandhīnmajjatāṃ vāraṇānām||33||
surasariti na yāvallakṣyamāṇādhvakhedāḥ
sarabhasamavaterurmajjanāyāmaraughāḥ|
drutamasicata tavacchīkarairagratastā-
nkarakalitalavaṅgāmodahṛdyairgajendraḥ||34||
dviradapatisahasraiḥ srotaso 'ntarnimagna-
kṣitidharagurudehālakṣyavaktrāgrahastaiḥ|
tridaśasaridanekoddāmagarbhābhinirya-
dgaṇapatiriva dūrātsainikairāluleki||35||
kṛtagurumadagaṇḍābhogabhūṣaṃ gajānāṃ
bhramarakulamapohuḥ śīkarā hastamuktāḥ|
kimaparamathavā syādāśritānāṃ jalebhyaḥ
sapadi madabharāndhairdūramāropitebhyaḥ||36||
plutisukhamanubhūya prājyasindurareṇu-
cchuraṇakapiśitormeḥ sindhugarbhādgajendrāḥ|
kṣitibhṛta iva pakṣacchedino vajrapāṇeḥ
punarabhayamavāpyāpyujjihānā virejuḥ||37||
salilagurusaṭāgrā vibhrato rugṇamūlāḥ
khuraśikharavilagnā hemaśevālavallīḥ|
tridaśasarita uccaistīramutprothaghoṇāḥ
śvasitataralitormivrātamutteruraśvāḥ||38||
śramaśithilitakaṇṭhaṣṭhyūtaniḥśvāsavāta-
vyatikaradhutasenādhūliruddhāntarālāḥ|
taralasaralapucchaṃ cerurśvāḥ sthalībhyo
marakatamaṇisūcīkomalāñśaṣpakhaṇḍān||39||
vidadhati gurupakṣotsekamajñā jalānāṃ
sphuṭamiha malinānāmāśaye vartamānāḥ|
yadamaragaṇasenāreṇupaṭṭā(ṅkā)vilāsu
pratikakubhamamādyannimnagāsveva matsyāḥ||40||
kṣitidharapatibhūmiṃ dūramullaṅghya vegā-
datha harikaripattisyandanaṃ kalpitaṃ sat|
drutataramuḍuvīthīmārgamabhyāhatābhraṃ
sarabhasamudapaptadvyāptaviśvaṃ smarāreḥ||41||
pratikakubhamudasthātsāmi yatsainikānā-
magamadatha samāptiṃ tena sarvaṃ vihāyaḥ|
aparamapi yadardhaṃ dūramutpitsu tasthā-
vabhavadavanipṛṣṭhaṃ tena niṣṭhāpratiṣṭham||42||
diśi diśi pariśuṣyaddānatoyasrutīnāṃ
tridaśagajaghaṭānāṃ dūramutpetuṣīṇām|
dinakarakaratāpopaplavādākulānā-
matinikaṭatayoccaiḥ pusphuṭuḥ karṇaśaṅkhāḥ||43||
punarupagatapakṣoḍḍīnaniḥśeṣaśaila-
sphuṭaśikharaśikhāmbhaḥsyandasaṃdehamugdhaiḥ|
diśi diśi ghanavṛndaiḥ pīyate sma dvipānāṃ
vikaṭakaraṭabhittibhraṣṭamārānmadāmbhaḥ||44||
atanusalilagarbhāḥ kajjalaśyāmabhāso
nabhasi jaladalekhā vellyamāna marudbhiḥ
kṣaṇavalanavilolā vāraṇānāṃ navāndū-
nibiḍanigaḍalīlāṃ pādalagnā vitenuḥ||45||
anukṛtagiriśṛṅgābhogagaṇḍasthalāgra-
skhalitavikaṭabhasvattāranakṣatramālā|
srutamadajalalekhābimbitā vāraṇānāṃ
śriyam atanuta tārāpaṅktirārātphurantī||46||
śravaṇaśikharabhūṣācāmarānmā sma dhākṣī-
didamaviditavidyuddamasaptārcipārāt|
jaladakulamitīvānudyatoccaiḥ purastā-
ddiśi diśi gajatābhiścaṇḍaśūtkāravātaiḥ||47||
churitasurapathāsuttuṅgakumbhasthalīṣu
śravaṇadhutihatābhi'scīnapiṣṭacchaṭābhiḥ|
kṣaṇaghaṭanavilolā nākanakṣatramālāḥ
śriyam ananṛtamayyastenire vāraṇānām||48||
vikaṭakanakakakṣyādāmasaudāminīkaṃ
dviradakulamabhāsīdanyadāsīnamurvyām|
suragaṇapatisenāruddhanākāvakāśa-
vyatikaragurukhedasrastameghaughakalpam||49||
aruṇamṇikirīṭacchāyayā laṅghyamānā
galitamadajalārdre bimbitā gaṇḍabhāge|
śiśirakiraṇalekhā lakṣyate sma dvipānāṃ
nabhasi vikaṭakumbhasrastahemāṅkuśaśrīḥ||50||
akalitaguruvidyuddāmabhiḥ śyāmitāśai-
rasalilagurugarbhairunnamadbhiḥ salīlam|
dviradapatibhiruccaistastare nākamārgaḥ
pratidiśamavarugṇālokamakṣuṇṇameghaiḥ||51||
glapitapavanavegaṃ vyomni paścārdhabhāga-
sthirakhuraśikharāgrairapyanālambameva|
giritaṭavikaṭoraḥpreritāsannatāraṃ
caṭulacaraṇakoṭinyāsamaśvaiḥ prasakhe||52||
nabhasi turagasainyaṃ dūramutkarṇaghoṇa-
sphuritamukhamanīcairutplutīrādadhānam|
hariṇakulamivāsīdvisphuraccitraratna-
vyatikaraśabalābhirbhrājamānaṃ guḍābhiḥ||53||
javanapavanadhūtairvellitā visphuradbhi-
rnabhasi vibabhuraśvā lākṣikaiścāmaraughaiḥ|
vikaṭakhuraśikhāgrakṣobhabhinnābhragarbha-
skhalitacaṭulaśampāśliṣṭarūupā ivoccaiḥ||54||
ravikaraparimarśādvisphuradbhistadānī-
mapagataghanapaṅkaṃ nākamīlīsahasraḥ|
sarabhasaparivartālakṣyapāṇḍūdarārdhaiḥ
sara iva śapharaughirghūrṇamānairabhāsīt||55||
vikaṭaśikharalagnāḥ ketudaṇḍāvalīṣu
sphuritavividharatnacchāyakalmāṣabhāsaḥ|
navajaladharakhaṇḍāḥ kekipicchātapatra-
śriyam adadhuradhastādgacchatāṃ sainikānām||56||
sphuritamaṇikirīṭagranthigarbhāntarāla-
pratimitamahimāṃśormaṇḍalaṃ vyomni teṣām|
pratiphaladamalāṃśuvrātamāśāmukheṣu
sphuṭakanakaśirastrābhinnarūpaṃ tadāsīt||57||
rathaturagakhurāgrakṣudyamānātpurastā-
tpratipadamuḍucakrādutthitā dhūlilekhā|
śriyam atanuta muktāvālukāyāstadānīṃ
gaganamakarasadmanyaśnuvānā digantān||58||
sphuradatanutaḍitkā vellyamānā marudbhi-
rdadhuraviralanīlaśyāmabhāso 'bhralekhāḥ|
kṛtakavalanalīlārambhalagnaurvavahni-
sphuṭavikaṭatarārciḥ sindhubhaṅgīvilāsam||59||
saparuṣarasitasyāmbhodharasyopariṣṭā-
tsaruṣamabhipatantaṃ siṃhamālokya caṇḍyāḥ|
jagati viphalameva prajñayā śūnyamuccaiḥ
sphuṭamanuta tejastādṛśāṃ sainikaughaḥ||60||
pramathapatirayāsīddānatoyārdragaṇḍa-
pratimitamaṇicitracchāyavaikuṇṭhaśārṅgaḥ|
vikaṭaśikharabhāgālakṣyavṛtrāricāpa-
kṣitidharapatilīlāṃ bibhradabhraṃkaṣaśrīḥ||61||
śriyam abhṛta purastādindumaulestadānīṃ
gaṇapatirativegātprasthito nākamārgam|
dadhadaparamivendorbhāgamuṣṇīṣabhājaḥ
paraśumukhamamandollāsanāśāritābhram||62||
dviradamadanadībhiḥ sainyametatpurastā-
tkaluṣayati purā me candrikāgauramambhaḥ|
sacakitamiti mārgādbhītayevāpasasre
khagapatiguruvegavyastayā nākanadyā||63||
sphuṭamiha vimalānāṃ svacchatā ślāghyarūpā
visadṛśamupadhānaṃ tatra doṣāya nūnam|
pratimitamamaraughā menire yannirīkṣya
kṣititalamapi śitābhīśubimbe kalaṅkam||64||
itthaṃ sena smarārerjaladharapadavīṃ dūramullaṅghya vegā-
dāsīnā ratnasānostaṭabhuvi vividhavyūhavistārabhājaḥ|
tasthurgavyūtimātraṃ dhṛtagurusamarārambhadaityendrasenā-
niryāṇāpekṣamuccairdiśi diśi vikasaccitravāditraghoṣāḥ||65||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye sainyaprasthānaṃ
nāmaikacatvāriṃśaḥ sargaḥ|