ekonacatvāriṃśaḥ sargaḥ |

niṣkramya kāñcanagirer atha nākasindhu- kallolaśīkarakaṇakṣapitādhvakhedaḥ | majjannamarṣabhuvi pārṣadapuṃgavo 'sā- v abhyājagāma śaśiśekhararājadhānīm || 1 ||

amarṣa eva bhūs tatra majjanpārṣadapuṃgavo gaṇānāṃ dhuryo harasya rājadhānīṃ jyotsnāvatīm abhimukhaṃ yayau | puṃgavaḥ śrāntaḥ sindhusavidhe vasudhāyāṃ majjann eva vrajati || 1 ||

tasmai sabhātalagatāya kṛtapraṇāmaḥ sarvaṃ nyavedayadarātiviceṣṭitaṃ tat | tasyājñayātha samarapravaṇasya dadhyau nandī jagattrayajuṣāṃ pramathādhipānām || 2 ||

tasmāy iti sarvanāmnā śaśiśekharasya vṛttau tirohitasyāpi prādhānyena vivakṣitatvād anusaṃdhir aviruddhaḥ | yathā—‘atha śabdānuśāsanam_ | keṣām_, śabdānām_ |’ ity atra kiṃśabdena śabdānām_ | pramathādhipānāṃ dadhyāvasmarat_ | ‘adhīgarthadayeśām_’ iti karmaṇi ṣaṣṭhī || 2 ||

abhyeyivāṃsy atha gaṇādhipasādhanāni pātālaśailajaladhitridivālayebhyaḥ | saṃdarśayann asakalendubhṛto didṛkṣo- r ity agrataḥ praṇatamaulir asāv avocat || 3 ||

3 ||

ālokayotkalakakalāni raṇotkacitta- vṛttīni nātha gaṇanāthabalāny amūni | niḥśeṣadaityapṛtanādalanotsukānāṃ tulyānubhāvabalatā bhavataiva yeṣām || 4 || 1. ‘bhavateva’ kha.

anubhāvaḥ pratāpaḥ || 4 ||

bibhrajjaṭāḥ kaṇiśaśūkaśikhāpiśaṅgī- r ākāśayānaguruvegavilolabandhāḥ | vaikuṇṭhanābhisarasīruhakesarāgra- saṃkrāntadhūlikapilā iva dairghyabhājaḥ || 5 ||

bibhrad ityādi pañcabhiḥ kulakam_ | kaṇiśaṃ śilaṃ tasya śūkaḥ kiṃśāruḥ | sarasīruhaṃ padmam_ | tato vedhasaḥ saṃbhavād vaikuṇṭhetyādir utprekṣā || 5 ||

ekena māsam iva darśitaparvasaṃdhi- m āṣāḍham akalayatā karapallavena | anyena viṣṭarasaroruhakhaṇḍanārthi- haṃsopamāspadakamaṇḍalunā virājan || 6 ||

darśitaḥ prakaṭīkṛtaḥ parvāṇāṃ granthīnāṃ saṃdhiḥ saṃśleṣo yena | darśitaś ca saṃjātadarśaḥ parvākhyaḥ saṃdhiḥ pakṣayor ādyantabhāgo yatra | darśas tu yāgaviśeṣaḥ | uktaṃ ca—‘darśas tamisrapakṣānte vidhir vedokta iṣyate | saṃyojyauṣadhibhiḥ kṣīṇaṃ puṣṇātīnduṃ sitosavā (site sa vā ?) ||’ iti | āṣāḍho vratināṃ daṇḍo māsabhedaś ca | haṃsasyopamāyā āspadaṃ haṃsāyamānaḥ kamaṇḍalur yatra || 6 ||

puñjīkṛtācchaśubhabījamanohareṇa ratnākṣasūtravalayena virājamānaḥ | aṃsāvalambi śabalaṃ mṛgacarma bibhra- d ākāśadeśam iva lagnam udaṃśutāram || 7 || 2. ‘manorameṇa’ kha.

śubhair bījaiḥ sadbhir akṣair manorameṇa | puñjīkṛtāni śubhasya tasya yāni bījāni saṃcitya nirmitenetyarthaḥ | tadudgatair aṃśubhis tāram udbhaṭam_ | udaṃśavaś codgatakiraṇās tārā jyotīṃṣi yatra || 7 ||

acchāṅgulīyakaśikhāśikharasthahāri- hārītadehaharitāśmamarīcicakraḥ | ambhojinīvanam ivāsanapuṇḍarīka- khaṇḍāntaraprasavakāraṇam udvahaṃs tam || 8 || 1. ‘svacchā’ ka.

hārītaḥ pakṣibhedas taddehabaddharito 'śmā marakataṃ tanmarīcicakram aṅgulīyakaśikharasthaṃ yasya saḥ | ata eva tam aśmānaṃ marīcicakrākrāntatayā nalinīvanam ivāparasaroruhotpattikāraṇatvād udvahan_ | nakārasyātra ‘naś chavi—’ iti rutvam_ || 8 ||

vedhāḥ svayaṃ sa vidhutāsanapuṇḍarīka- pakṣmacchaṭāvikaṭakoṭiparāgapiṅgāḥ | āsannadaityadalanotsavaviprakīrṇa- piṣṭātakā iva diśaḥ samupaiti kūrvan || 9 || 2. ‘vikaca’ kha.

sa iti yaḥ paramadaivatam_ | piṣṭātakaṃ kuṅkumacchuritaṃ piṣṭam_ || 9 ||

(pañcabhiḥ kulakam_)

śārṅgaṃ nadaty adhiviropitakoṭilagna- kalpakṣayānalaśikhojjvalaśiñjinīkam | śaureḥ pravālavalayaprabhayāvalīḍha ullolamaṇḍalam iva kṣubhitasya sindhoḥ || 10 || 3. ‘rasaty avadhiropita’ kha. 4. ‘kallola’ ka-kha.

śiñjinī jyā | ullolas taraṅgaḥ || 10 ||

vakṣaḥsthalāmbarakṛtāspadakaustubhārka- vispaṣṭapāṭalamayūkhaśikhāvamṛṣṭam | nīlotpalākaram iva svayam eṣa mukta- koṣaṃ samīkarabhasena bibharti khaḍgam || 11 ||

koṣaḥ parivāro mukulatvaṃ ca | samīkarabhaso raṇarasaḥ || 11 ||

asyātasīkusumadāmarucaḥ kṛpāṇa- paṭṭena nirmalakarālakareṇa bāhuḥ | saṅgrāmabhūmiṣu bhayaṃkaratāṃ kalinda- kanyājalaugha iva kāliyabhogināpat || 12 || 5. ‘nīlarucaḥ’ kha.

12 ||

ātāmrakaustubhamarīciśikhāvalīḍhaṃ yuddhonmukhī mukham apāvṛtam udvahantī | daityendraśoṇitarasāsavapānagoṣṭhī- yogyām ivāsya suranātha gadā vidhatte || 13 ||

apāvṛtam udghāṭitam_ | yogyā abhyāsaḥ || 13 ||

asyādhipāṇi racitasthitir eṣa lakṣmī- m īṣad vinidramukhakairavakorakaśrīḥ | kundatviṣā daśanacandrikayāvakīrṇa- mūrtir bibharti śaśiśekhara pāñcajanyaḥ || 14 || 1. ‘korakakairava’ ka-kha.

14 ||

vakṣaḥsthakaustubhamarīcivilaṅghyamāna- m asyāś cakāsti karapaṅkajavarti cakram | pratyagraṭaṅkavinikuṭṭanamuktarakta- dhārāruṇīkṛtam ivāhimaraśmibimbam || 15 ||

15 ||

daityāsravisravikaṭāśriśikhāsahasra- niṣṭhyūtadhūsaritadiṅmukhavarti(hni)dhūmam | vajraṃ pulomatanayāpatir apy amukta- nīlābhragarbham iva bibhrad asāv upetaḥ || 16 ||

asreṇa rudhireṇa bisrā durgandhayaḥ | śakramūrdhā(?)dijo 'nyo 'pi dhūmaḥ saṃbhavatīti vahnināsau viśeṣitaḥ | amukto nīlajaladasya garbho 'bhyantaraṃ yena | vajrasya vidyudrūpeṇa jaladamadhye 'vasthānāt_ || 16 ||

helādhutaśravaṇatāpalāśakoṭi- bhāgādhirūḍhadhavalacchaviśaṅkhahaṃsam | ābhāti bhāsurarucir dahano 'dhiruhya- sūryaprakāśa iva pāṇḍurapuṇḍarīkam || 17 ||

puṇḍarīkādayo dikkariṇaḥ | puṇḍarīkaṃ padmam api || 17 ||

eṣo 'ñjanadviradamūrjitadānavāri- dhārāndhakārabharanihnutabhāskarāṃśum | paśyāñjanācalam ivonnatagaṇḍaśaila- m āruhya saṃyugarasān marud abhyupetaḥ || 18 ||

gaṇḍāv eva śailau | gaṇḍaśailāś ca mahopalāḥ || 18 ||

merāv iva sphuritakāñcanagaurabhāsi saṃhāradhūmanikarāñjanamecakārciḥ | stamberame kṛtapadas tarasā paraiti paśyāmareśa yama eṣa gṛhītadaṇḍaḥ || 19 ||

daṇḍa āyudhabhedaḥ sainyaṃ ca || 19 ||

śmaśruprarohajaṭilaṃ bhuvanatrayaika- grāsaspṛhāvivṛtam ūrdhvapiśaṅgakeśam | vaktraṃ dadhadvikaṭam ādivarāhaghora- ghoṇābhighātadalitāvanirandhraraudram || 20 ||

śmaśrūṇi mukharomāṇi tāny eva prarohā aṅkurāḥ | ūrdhvā unmukhāḥ || 20 ||

niḥśeṣavadhyajanatākaravīrapuṣpa- śeṣām ivekṣaṇaruciṃ dadhadasratāmrām | āruhya kāsaram akhaṇḍitadaṇḍacaṇḍa- hastaḥ puro 'sya ramasad upayāti mṛtyuḥ || 21 ||

karavīranāmnāṃ puṣpāṇāṃ śeṣā mālā tām iva nayanaprabhāṃ bibhrad asya yamasya purato mahiṣam āruhya mṛtyur etat sahāyo 'ntako vegād āgacchati || 21 ||

(yugalakam_)

saṃdhyānubandhi gaganaṃ caṭulīkaḍāra- cūḍātaḍidbhir iva paśya vidarśayantaḥ | āyānti kajjalamalīmasadehadīpti- luptātapaprasaram īśvara yātudhānāḥ || 22 || 1. ‘cuṭulī’ kha. 2. ‘vimarśayantaḥ’ ka. 3. ‘kānti’ ka.

caṭulībhir ānanodgatābhir ulkābhiḥ kapiśābhiś ca cūḍābhir eva vidyudbhiḥ sasaṃdhyam iva gaganaṃ darśayanta iti yojyam_ | yātudhānā nair ṛtāḥ || 22 ||

pāśī spṛśan paśam ivāntakarasya pāśa- m āruhya nāgam upagacchati supratīkam | ālolakarṇaśikharānilavegakṛṣṭa- kumbhasthalaskhalitamauktikatārahāram || 23 ||

pāśī varuṇaḥ | antakasya mṛtyoḥ spaśam iva carasadṛśam_ || 23 ||

paśyārthanātham avalambitśaṅkhapadma- m agre gadādalitadaityacamūttamāṅgam | śārṅgāyudhaṃ javavatātra garutmateva padmaprabheṇa kariṇāntikam āpatantam || 24 || 1. ‘vairi’ ka.

śaṅkhapadmau nidhī jalajau ca || 24 ||

siṃhājināni paridhārabhasavyudāsa- saṃdaṣṭatārakatayā ghaṭitāny uraḥsu | nirbhinnagandhagajakumbhataṭāvasakta- muktāphalair iva nakhaiḥ pravibhānti yeṣām || 25 ||

siṃhetyādi viśeṣakam_ | paridhā prāvaraṇaṃ tatra rabhasavyudāso javenotkṣepas tena saṃdaṣṭā garbhīkṛtāḥ || 25 ||

tanvanti vītavasaneṣu vapuḥṣu mauli- mugdhāmṛtāṃśukalikā rabhasena yeṣām | jyotsnātapāmbaramalaṃ vimalaṃ svakānti- saṃtānasaṃśayitabhūtiparāgalekham || 26 || 2. ‘parāgalepāḥ’ kha.

jyotsnaivātapo ghanatvāt_ || 26 ||

abhyāpatanti ta ime vikaṭonnatāni rudrāḥ sureśa phaṇikaṅkaṇibhiḥ karāgraiḥ | āsphālya visphuradarātiruṣā nijāṃsa- kūṭaiḥ sahaiva kakudāni kakudmatāṃ vaḥ || 27 ||

va iti rudrā viśeṣyante || 27 ||

(tilakam_)

3. ‘tribhiḥ kulakam_’ kha. dānāmbuvṛṣṭim abhito vikaṭaiḥ kirantaḥ saṃvartadurdinaghanair iva gaṇḍabhāgaiḥ | vinyastapādabharabandhuritāvanīdhra- m ete 'dhirūḍhavasavaḥ kariṇo 'bhyupetāḥ || 28 || 4. ‘api’ kha.

bandhuritāḥ kharvitāḥ || 28 ||

niḥśeṣaśātravakulapralayāgnidhūma- daṇḍāyamānakarakṛṣṭakṛpāṇapaṭṭāḥ | vidyādharādhipatayaḥ śibiraṃ viśanti pāriplavaśravaṇakuṇḍalamaṇḍabhāgāḥ || 29 ||

29 ||

āsajya sajjasamarā viśikhāndhanuḥṣu hastāṅgulīlaghuvivartanatāranādān | ete viśanti śibiraṃ śivaśevadhes te viśve 'śvinau ca tuṣitāś ca sasiddhasādhyāḥ || 30 || 1. ‘nādam_’ kha.

śivasya śreyasaḥ śevadhinidhānam_ | tasya tava skandhāvāraṃ viśveprabhṛtayaḥ saṃghadevā viśanti || 30 ||

niṣṭhyūtanākanagarapratibaddhasindhau bimbodare śabalimānam upādadhānā | chāyā ca yasya śaśalakṣmamayī vibhāti viṣyandamānayamunājalanirjharaśrīḥ || 31 || 2. ‘dadhāne’ kha.

nākam eva nagaraṃ tatra pratibaddhā niyamena sthitā sindhur mandākinī | sā ca purā candramaṇḍalān nirgatety āgame śrūyate | yad uktam_—‘svarge caiva purā saiva saṃsthitā somamaṇḍale | somāc caiva viniḥsṛtya purākāśe vyavasthitā ||’ caśabdo bhinnakramaḥ | induś cety evam anvayāt_ || 31 ||

sa śvetadiggajapater adhiruhya pṛṣṭha- m abhyeti dīrghavikaṭaiḥ pṛtanāṅganānām | netrotkarair amṛtavarṣibhir indur eṣa dattāñjanair nijakarair iva dṛśyamānaḥ || 32 ||

añjanaṃ kalaṅko 'pi || 32 ||

(yugalakam_)

yoktrīkṛtaiḥ phaṇigaṇair atigāḍhabandha- tīvrārtisītkṛtisamīranibhena śītān | skandhānilān iva nipīya punar vamadbhi- r ābaddhavājini rathe racitapratiṣṭhaḥ || 33 || 3. ‘kandā’ kha.

yoktrīkṛtair ityādiviśeṣakam_ | yoktraṃ bandhanarajuḥ | skandhā nabhasi vātānāṃ sthānabhedāḥ || 33 ||

kalmāṣitāmbaratalonnatapakṣmabhāra- nirdhūyamānasitacāmaramaṇḍalīkaḥ | saṃkocabandhaparihāradhiyā salīla- m anvīyamāna iva nātha kumudvatībhiḥ || 34 || 1. ‘baddha’ ka.

34 ||

yogāśritāparavapurjaraṭhapratāpa- saṃpattir eṣa haritacchavisaptapattraḥ | bhānuḥ śaratsamayavibhrama eti paśya riktīkṛtāvajitavāsavavāsaraśrīḥ || 35 || 2. ‘yonāśritā’ kha.

yogena samādhināśritam aparaṃ karacaraṇādiyuktaṃ vapur yena | yogaḥ kanyāsavitroḥ samāgamaḥ | tatrāśritam aparaṃ prāvṛṣeṇyād rūpād vilakṣaṇaṃ vapur yena | pratāpa ātapo 'pi | saptasaṃkhyāni pattrāṇi vāhanāni | saptapattrāś ca saptaparṇās taravaḥ | avajitavāsavāḥ paribhūtapuraṃdarā daityāḥ | ta evāsthirarūpatayā vāsarāḥ | teṣāṃ śrīs tanūkṛtā yena | avajitaś ca vāsavas tatprayuktavṛṣṭinirodhād yais teṣāṃ vāsarāṇāṃ śrīr alpīkṛtā yena | tadā dinānāṃ tānavotpatteḥ || 35 ||

(tilakam_)

3. ‘tribhiḥ kulakam_’ kha. ārūḍhagūḍhacaraṇolbaṇamārgaṇāni kallolacāpavalayāni vinirdhuvantaḥ | saptāpy amī kalakalākulitāntarikṣa- m abhyāgatā jaladhayaḥ sataraṅgiṇīkāḥ || 36 ||

gūḍhacaraṇāḥ sarpāḥ || 36 ||

kṣoṇībhṛto 'py upagatāḥ śibiraṃ navābhra- kārāgṛhān kaṭakabhūmiṣu bibhratas te | bandīkṛtakṣapitapakṣatidṛṣṭasāra- vajrārbhakān iva ca garbhagatācirāṃśūn || 37 ||

kṣoṇībhṛtaḥ parvatā rājānaś ca | śibiraṃ senāniveśaḥ | kaṭako 'drinitambaḥ sainyaṃ ca | bandīkṛtā haṭhena nibaddhāḥ kṣapitapakṣater vajrasya śiśavo yeṣu || 37 ||

saṃvartavāridaghaṭāpi gabhīraghora- ghoṣānubandhabadhirīkṛtasaptalokā | abhyeti vaḥ samaradundubhitāṃ cikīrṣu- r eṣāṃ taḍitkiraṇakoṇakṛtāñcitaśrīḥ || 38 ||

samarabherītvaṃ vo vidhitsuḥ kalpāntaghanānāṃ ghaṭā paṅktir āgacchati | koṇo vādanabhāṇḍam_(daṇḍaḥ) || 38 ||

abhyāpatanti vikasatphaṇacakravāla- ratnotkaraiḥ kiraṇapallavitāntarikṣāḥ | dikpadminīr vikacapāṭalapuṇḍarīka- khaṇḍā ivoragabalāni vidarśayanti || 39 || 1. ‘antarikṣaiḥ’ kha. 2. ‘ca darśayanti’ ka.

diśa eva padminyas tā vikacāruṇakamalavanā darśayanti santy uragāṇāṃ balāny āyānti || 39 ||

udbhūtacandrakarapāṇḍuracāmaraugha- m ojasvitāṃ dadhad adhaḥkṛtavātaraṃhaḥ | ābhāti karkaśabalaṃ surarājasainya- m aśvīyam añcitataraṃ ca rasatkhalīnam || 40 ||

karkaśaṃ kaṭhoraṃ balaṃ sauṣṭhavaṃ yasya | karkaiś ca sitair aśvaiḥ śabalaṃ vicitram_ | aśvīyam aśvasamūhaḥ | ‘keśāśvābhyāṃ yañchāvanyatarasyām_’ iti cchaḥ | rasacchabdāyamānam_ | khalīnam antarikṣe lagnam_ | rasac ca khalīnaṃ kavikā yasya || 40 ||

savyālabhūṣaṇatayonnatakāyamāna- śobhā nitāntamalagardabharāsabhīkā | caṇḍī narendraśibirakṣitinirviśeṣa- rūpā karālakarabhā rabhasād upaiti || 41 ||

vyālāḥ sarpā mattakariṇaś ca | unnatā kāyamānasya dehaparimāṇasya śobhā yasyāḥ | unnatena ca kāyamānena gṛhaviśeṣeṇa śobhā yasyāḥ | ‘pakveṣṭakābhir vihitaṃ sadyaḥ kārujanena yat_ | rājocitaṃ mahāveśma kāyamānaṃ tad ucyate ||’ nitāntam atyarthamalagardānāṃ phaṇabhṛtāṃ bharo yasyāḥ | asabhīkā saha bhayena yā na vartate | nitāntamalāś ca yatra tatra luṭhanāt kāṅkṣitamālinyā gardabhāḥ kharā rāsabhyaś ca kharyo yasyām_ | ‘tamu kāṅkṣāyām_’ | karālā bahalā karabhā pāṇiśobhā yasyāḥ | karālāś ca bhīṣaṇāḥ karabhā uṣṭrā yasyām_ || 41 ||

ratnākṣasūtravalayaṃ parivartayantī nakṣatramaṇḍalam iva kṣaṇadātitāram | brāhmī karākalitadaṇḍakamaṇḍaluśrī- r eṣā śivātra śibire kṛtasaṃnidhir vaḥ || 42 ||

kṣaṇadā rātriḥ saiva nakṣatramaṇḍalam akṣasūtravalayaṃ parivartayantī brāhmī bhrājate | brāhmyādayo mātaraḥ || 42 ||

ābhāty asau saralamugdhamṛṇālakāṇḍa- kandāvalīkavalanākulatāṃ dadhānaiḥ | kundacchadachabibhir acchatadīyagarbha- dugdhacchaṭāpariṇater iva vāhahaṃsaiḥ || 43 || 1. ‘yānahaṃsaiḥ’ kha.

43 ||

(yugalakam_)

2. ‘yugalakam_’ kha-pustake nāsti. udvṛttadānavacamūpatikaṇṭhapīṭha- niṣṭhyūtaśoṇitamalīmasaśātadhāram | prācīva diktapanabimbam udaṃśurāśi cakraṃ dadhaty upanatānagha vaiṣṇavīyam || 44 ||

44 ||

traiyambakī kaṭakam eti vijihmakoṭi- m eṣā kirīṭaghaṭitāṃ dadhatīndulekhām | bhāsvattṛtīyanayanabhrukuṭivyudasta- vinyastabhāsmanaparāgalalāṭikābhām || 45 ||

tryambakasyeyaṃ traiyambakī māheśvarī | ‘na yvābhyāṃ padāntābhyāṃ—’ iti vṛddhipratiṣedha aijāgamaś ca | bhṛkuṭyā vyudastā viśeṣeṇopari nītā yā bhasmarajaḥsaṃbandhinī lalāṭikā lalāṭālaṃkāras tasyā iva śobhā yasyāḥ || 45 ||

cāmuṇḍayā paruṣabhasmaparāgapūrṇa- m ākīrṇam asthiśakalaiḥ sakapālakhaṇḍam | bibhrāṇayā vapuradhiṣṭhitam īśa dūra- m etac chmaśānagṛhadevatayeva sainyam || 46 ||

46 ||

candrasya ca pratikṛtiḥ krtarāgabhaṅga- cetaḥprasādadhavalāṃśusudhāmarīciḥ | āgacchati cchuritadikchiviraṃ tavāccha- hāsacchaṭābhir iyam ucchalitāmburāśiḥ || 47 || 1. ‘sphurita’ ka. 2. ‘ambarābhiḥ’ kha.

sudhāmayā marīcayo yasyās tādṛśī candrasya pratikṛtiś cāndrī devatā tava śibiraṃ tvaritam āyāti || 47 ||

preṅkhatkapālaraśanāguṇarāsabhīya- carmāmbarāṅkitabhayaṃkaramūrtir eṣā | yāmyā tavaiti śibiraṃ śiva śāvahasta- karṇāvataṃsakalanākulitānanaśrīḥ || 48 ||

śāvaḥ śavasaṃbandhī || 48 ||

ākasmikapralayaghasmaravahniheti- bhasmīkṛtākhilakulācalanirviśeṣaiḥ | śeṣāṃ nibadhya dhavalair api lokapāla- pālīkapālapaṭalair iyam uttamāṅge || 49 ||

ākasmiketyādi viśeṣakam_ | pālī paṅktiḥ || 49 ||

gaṅgātaraṅgaparimṛṣṭaviṭaṅkakoṭi- khaṭvāṅgasaṅgiparameṣṭhijaṭānikuñjā | preṅkhatparetapatipattraviṣāṇagarbha- niṣpītasaptabhuvanakṣatajāsavaśrīḥ || 50 ||

khaṭvāṅgaṃ mahāvratinām aṃse dhvajaḥ | pattraṃ vāhanaṃ tasya viṣāṇagarbheṇa pītā rudhirāsavasaṃpadyayā | āsavapānaṃ ca parimṛṣṭe nikuñja eva ślāghyam_ || 50 ||

adhyāsya rāsabhasabhādhipatiṃ trilokī- saṃhāraragarabhasena sabhīti sainyam | saṃrambhabhāsvaramukhī bisabhaṅgagaura- dantāṃśur eti śibiraṃ tava kālarātriḥ || 51 || 3. ‘bhāsura’ kha.

kālarātriḥ kṛtāntamahiṣī || 51 ||

(tilakam_)

4. ‘tribhiḥ kulakam_’ kha. kālī ca kokilakalāparuciḥ karāla- daṃṣṭrāṅkuraiti samarotkalikākulaiṣā | nirdagdhakāla kalikālakalaṅkaketu- r udbhinnaratnakalikeva vidūrabhūmiḥ || 52 || 5. ‘nirdaṣṭakāla’ kha.

nirdagdhakāleti bhagavantaṃ saṃbodhayati | kalaṅkasya pāpasya ketur vināśikā || 52 ||

iti giram upakarṇyodīritāṃ nandināgre sakalasamarasenācakravālaṃ smarāriḥ | nijaśibiraniveśāvāsabhūmīḥ praṇāma- ślathavikaṭakirīṭaṃ prahiṇottanmukhena || 53 || 1. ‘ciraṃ’ kha.

53 ||

tigmāṃśusyandanāśvadrutakhuradalitavyomavaidūryaratna- kṣodacchāye 'tha sāyaṃ malinayati tamaḥ paṅkapūre dharitrīm | ruddhālokāḥ kulāyagraharabhasarasatpattrinādānubandhai- r anyonyālāpam ārād vidadhur iva niśi vyākulā digvayasyāḥ || 54 || 2. ‘ruddhālokān_’ kha.

54 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye sainyasaṃbhāro nāmaikonacatvāriṃśaḥ sargaḥ |

iti rājānakajayānakasūnor alakasya kṛtau haravijayaviṣamapadoddyota ekonacatvāriṃśaḥ sargaḥ ||