ekonacatvāriṃśaḥ sargaḥ|
niṣkramya kāñcanagireratha nākasindhu-
kallolaśīkarakaṇakṣapitādhvakhedaḥ|
majjannamarṣabhuvi pārṣadapuṃgavo 'sā-
vabhyājagāma śaśiśekhararājadhānīm||1||
tasmai sabhātalagatāya kṛtapraṇāmaḥ
sarvaṃ nyaedayadarātiviceṣṭitaṃ tat|
tasyājñayātha samarapravaṇasya dadhyau
nandī jagattrayajuṣāṃ pramathādhipānām||2||
abhyeyivāṃsyatha gaṇādhipasādhanāni
pātālaśailajaladhitridivālayebhyaḥ|
saṃdarśayannasakalendubhṛto didṛkṣo-
rityagrataḥ praṇatamaulirasāvavocat||3||
ālokayotkalakakalāni raṇotkacitta-
vṛttīni nātha gaṇanāthabalānyamūni|
niḥ'seṣadaityapṛtanādalanotsukānāṃ
tulyānubhāvabalatā bhavataiva yeṣām||4||
bibhrajjaṭāḥ kaṇiśaśūkaśikhāpiśaṅgī-
rākāśayānaguruvegavilolabandhāḥ|
vaikuṇṭhanābhisarasīruhakesarāgra-
saṃkrāntadhūlikapilā iva dairghyabhājaḥ||5||
ekena māsamiva darśitaparvasaṃdhi-
māṣāḍhamakalayatā karapallavena|
anyena viṣṭarasaroruhakhaṇḍanārthi-
haṃsopamāspadakamaṇḍalunā virājan||6||
puñjīkṛtācchaśubhabījamanohareṇa
ratnākṣasūtravalayena virājamānaḥ|
aṃsāvalambi śabalaṃ mṛgacarma bibhra-
dākāśadeśamiva lagnamudaṃśutāram||7||
acchāṅgulīyakaśikhāśikharasthahāri-
hārītadehaharitāśmamarīcicakaḥ|
ambhojīnīvanamivāsanapuṇḍarīka-
khaṇḍāntaraprasavakāraṇamudvahaṃstam||8||
vedhāḥ svayaṃ sa vidhutāsanapuṇḍarīka-
pakṣmacchaṭāvikaṭakoṭiparāgapiṅgāḥ|
āsannadaityadalanotsavaviprakīrṇa-
piṣṭātakā iva diśaḥ samupaiti kūrvan||9||
(pañcabhiḥ kulakam)
śārṅgaṃ nadatyadhiviropitakoṭilagna-
kalpakṣayānalaśikhojjvalaśiñjinīkam|
śaureḥ pravālavalayaprabhayāvalīḍha
ullolamaṇḍalamiva kṣubhitasya sindhoḥ||10||
vakṣaḥsthalāmbarakṛtāspadakaustubhārka-
vispaṣṭapāṭalamayūkhaśikhāvamṛṣṭam|
nīlotpalākaramiva svayameva mukta-
koṣaṃ samīkarabhasena bibharti khaḍgam||11||
asyātasīkusumadāmarucaḥ kṛpāṇa-
paṭṭena nirmalakarālakareṇa bāhuḥ|
saṅgrāmabhūmiṣu bhayaṃkaratāṃ kalinda-
kanyājalaugha iva kāliyabhogināpat||12||
ātāmrakaustubhamarīciśikhāvalīḍhaṃ
yuddhonmukhī mukhamapāvṛtamudvahantī|
daityendraśoṇitarasāsavapānagoṣṭhī-
yogyāmivāsya suranātha gadā vidhatte||13||
asyādhipāṇi racitasthitireṣa lakṣmī-
mīṣadvinidramukhakairavakorakaśrīḥ|
kundatviṣā daśanacandrikayāvakīrṇa-
mūrtirbibharti śaśiśekhara pāñcajanyaḥ||14||
vakṣaḥsthakaustubhamarīcivilaṅghyamāna-
masyaścakāsti karapaṅkajavarti cakram|
pratyagraṭaṅkavinikuṭṭanamuktarakta-
dhārāruṇīkṛtamivāhimaraśmibimbam||15||
daityāsravisravikaṭāśriśikhāsahasra-
niṣṭhyūtadhūsaritadiṅmukhavarti(hni)dhūmam|
vajraṃ pulomatanayāpatirapyamukta-
nīlābhragarbhamiva bibhradasāvupetaḥ||16||
helādhutaśravaṇatāpalāśakoṭi-
bhāgādhirūḍhadhavalacchaviśaṅkhahaṃsam|
ābhāti bhāsurarucirdahano 'dhiruhya-
sūryaprakāśa iva pāṇḍurapuṇḍarīkam||17||
eṣo 'ñjanadviradamūrjitadānavāri-
dhārāndhakārabharanihnutabhāskarāṃśum|
paśyāñjanācalamivonnatagaṇḍaśaila-
māruhya saṃyugarasānmarudabhyupetaḥ||18||
merāviva sphuritakāñcanagaurabhāsi
saṃhāradhūmanikarāñjanamecakārciḥ|
stamberame kṛtapadastarasā paraiti
paśyāmareśa yama eṣa gṛhītadaṇḍaḥ||19||
śmaśruprarohajaṭilaṃ bhuvanatrayaika-
grāsaspṛhāvivṛtamūrdhvapiśaṅgakeśam|
vaktraṃ dadhadvikaṭamādivarāhaghora-
ghoṇābhighātadalitāvanirandhraraudram||20||
niḥśeṣavadhyajanatākaravīrapuṣpa-
śeṣāmivekṣaṇaruciṃ dadhadasratāmrām|
āruhya kāsaramakhaṇḍitadaṇḍacaṇḍa-
hastaḥ puro 'sya ramasadupayāti mṛtyuḥ||21||
(yugalakam)
saṃdhyānubandh gaganaṃ caṭulīkaḍāra-
cūḍātḍidbhiriva paśya vidarśayantaḥ|
āyānti kajjalamalīmasadehadīpti-
luptātapaprasaramīśvara yātudhānāḥ||22||
pāśī spṛśanpaśamivāntakarasya pāśa-
māruhya nāgamupagacchati supratīkam|
ālolakarṇaśikharānilavegakṛṣṭa-
kumbhasthalaskhalitamauktikatārahāram||23||
paśyārthanathamavalambitśaṅkhapadma-
magre gadādalitadaityacamūttamāṅgam|
śārṅgāyudhaṃ javavatātra garutmateva
padmaprabheṇa kariṇāntikamāpatantam||24||
siṃhājināni paridhārabhasavyudāsa-
saṃdaṣṭatārakatayā ghaṭitānyuraḥsu|
nirbhinnagandhagajakumbhataṭāvasakta-
muktāphalairiva nakhaiḥ pravibhānti yeṣām||25||
tanvanti vītavasaneṣu vapuḥṣu mauli-
mugdhāmṛtāṃśukalikā rabhasena yeṣām|
jyotsnātapāmbaramalaṃ vimalaṃ svakānti-
saṃtānasaṃśayitabhūtiparāgalekham||26||
abhyāpatanti ta ime vikaṭonnatāni
rudrāḥ sureśa phaṇikaṅkaṇibhiḥ karāgraiḥ|
āsphālya visphuradarātiruṣā nijāṃsa-
kūṭaiḥ sahaiva kakudāni kakudmatāṃ vaḥ||27||
(tilakam)
dānāmbuvṛṣṭimabhito vikaṭaiḥ kirantaḥ
saṃvartadurdinaghanairiva gaṇḍabhāgaiḥ|
vinyastapādabharabandhuritāvanīdhra-
mete 'dhirūḍhavasavaḥ kariṇo 'bhyupetāḥ||28||
niḥśeṣaśātravakulapralayāgnidhūma-
daṇḍāyamānakarakṛṣṭakṛpāṇapaṭṭāḥ|
vidyādharādhipatayaḥ śibiraṃ viśanti
pāriplavaśravaṇakuṇḍalamaṇḍabhāgāḥ||29||
āsajya sajjasamarā viśikhāndhanuḥṣu
hastāṅgulīlaghuvivartanatāranādān|
ete viśanti śibiraṃ śivaśevadheste
viśve 'śvinau ca tuṣitāśca sasiddhasādhyāḥ||30||
niṣṭhyūtanākanagarapratibaddhasindhau
bimbodare śabalimānamupādadhānā|
chāyā ca yasya śaśalakṣmamayī vibhāti
viṣyandamānayamunājalanirjharaśrīḥ||31||
sa śvetadiggajapateradhiruhya pṛṣṭha-
mabhyeti dīrghavikaṭaiḥ pṛtanāṅganānām|
netrotkarairamṛtavarṣibhirindureṣa
dattāñjanairnijakarairiva dṛśyamānaḥ||32||
(yugalakam)
yoktrīkṛtaiḥ phaṇigaṇairatigāḍhabandha-
tīvrārtisītkṛtisamīranibhena śītān|
skhandhānilāniva nipīya punarvamadbhi-
rābaddhavājini rathe racitapratiṣṭhaḥ||33||
kalmāṣitāmbaratalonnatapakṣmabhāra-
nirdhūyamānasitacāmaramaṇḍalīkaḥ|
saṃkocabandhaparihāradhiyā salīla-
manvīyamāna iva nātha kumudvatībhiḥ||34||
yogāśritāparavapurjaraṭhapratāpa-
saṃpattireṣa haritacchavisaptapattraḥ|
bhānuḥ śaratsamayavibhrama eti paśya
riktīkṛtāvajitavāsavavāsaraśrīḥ||35||
(tilakam)
rūḍhagūḍhacaraṇolbaṇamārgaṇāni
kallolacāpavalayāni vinirdhuvantaḥ|
saptāpyamī kalakalākulitāntarikṣa-
mabhyāgatā jaladhayaḥ sataraṅgiṇīkāḥ||36||
kṣoṇībhṛto 'pyupagatāḥ śibiraṃ navābhra-
kārāgṛhānkaṭakabhūmiṣu bibhrataste|
bandīkṛtakṣapitapakṣatidṛṣṭasāra-
vajrārbhakāniva ca garbhagatācirāṃśūn||37||
saṃvartavāridaghaṭāpi gabhīraghora-
ghoṣānubandhabadhirīkṛtasaptalokā|
abhyeti vaḥ samaradundubhitāṃ cikīrṣu-
reṣāṃ taḍitkiraṇakoṇakṛtāñcitaśrīḥ||38||
abhyāpatanti vikasatphaṇacakravāla-
ratnotkaraiḥ kirṇapallavitāntarikṣāḥ|
dikpadminīrvikacapāṭalapuṇḍarīka-
khaṇḍā ivoragabalāni vidarśayanti||39||
udbhūtacandrakarapāṇḍuracāmaraugha-
mojasvitāṃ dadhadadhaḥkṛtavātaraṃhaḥ|
ābhāti karka'sabalaṃ surarājasainya-
maśvīyamañcitataraṃ ca rasatkhalīnam||40||
savyālabhūṣaṇatayonnatakāyamāna-
śobhā nitāntamalagardabharāsabhīkā|
caṇḍī narendraśibirakṣitinirviśeṣa-
rūpā karālakarabhā rabhasādupaiti||41||
ratnākṣasūtravalayaṃ parivartayantī
nakṣatramaṇḍalamiva kṣaṇadātitāram|
brāhmī karākalitadaṇḍakamaṇḍaluśrī-
reṣā śivātra śibire kṛtasaṃnidhiryaḥ||42||
ābhātyasau saralamugdhamṛṇālakāṇḍa-
kandāvalīkavalanākulatāṃ dadhānaiḥ|
kundacchadachabibhiracchatadīyagarbha-
dugdhacchaṭāpariṇateriva vāhahaṃsaiḥ||43||
(yugalakam)
udvṛttadānavacamūpatikaṇṭhapīṭha-
niṣṭyūttaśoṇitamalīmasaśātadhāram|
prācīva diktapanabimbamudaṃśurāśi
cakraṃ dadhatyupanatānagha vaiṣṇavīyam||44||
traiyambakī kaṭakameti vijihmakoṭi-
meṣā kirīṭaghaṭitāṃ dadhatīndulekhām|
bhāsvattṛtīyanayanabhrukuṭivyudasta-
vinyastabhāsmanaparāgalalāṭikābhām||45||
cāmuṇḍayā paruṣabhasmaparāgapūrṇa-
mākīrṇamasthiśakalaiḥ sakapālakhaṇḍam|
bibhrāṇayā vapuradhiṣṭhitamīśa dūra-
metacchbhaśānagṛhadevatayeva sainyam||46||
candrasya ca pratikṛtiḥ krtarāgabhaṅga-
cetaḥ prasādadhavalāṃśusudhāmarīciḥ|
āgacchati cchuritadivichavirṃ tavāccha-
hāsacchaṭābhiriyamucchalitamburāśiḥ||47||
preṅkhatkapālaraśanāguṇarāsabhīya-
carmāmbarāṅkitabhayaṃkaramūrtireṣā|
yāmyā tavaiti śibiraṃ śiva śāvahasta-
karṇāvataṃsakalānukulitānanaśrīḥ||48||
ākasmikapralayaghasmaravahniheti-
bhasmīkṛtākhilakulācalanirviśeṣaiḥ|
śeṣāṃ nibadhya dhavalairapi lokapāla-
pālīkapālapa.alairiyamuttamāṅge||49||
gaṅgātaraṅgaparimṛṣṭaviṭaṅkakoṭi-
khaṭvāṅgasaṅgiparameṣṭhijaṭānikuñjā|
preṅkhatparetapatipattraviṣāṇagarbha-
niṣpītasaptabhuvanakṣatajāsavaśrīḥ||50||
adhyāsya rāsabhasabhādhipatiṃ trilokī-
saṃhāraragarabhasena sabhīti sainyaim|
saṃrambhabhāsvaramukhī bisabhaṅgagaura-
dantāṃśureti śibiraṃ tava kālarātriḥ||51||
(tilakam)
kālī ca kokilakalāparuciḥ karāla-
daṃṣṭrāṅkuraiti samarotkalikākulaiṣā|
nirdagdhakāla kalikālakalaṅkaketu-
rudbhinnaratnakalikeva vidūrabhūmiḥ||52||
iti giramupakarṇyodīritāṃ nandināgre
sakalasamarasenācakravālaṃ smarāriḥ|
nijaśibiraniveśāvāsabhūmīḥ praṇāma-
ślathavikaṭakirīṭaṃ prahiṇottanmukhena||53||
tigmāṃśusyandanāśvadrutakhuradalitavyomavaidūryaratna-
kṣodacchāye 'tha sāyaṃ malinayati tamaḥ paṅkapūre dharitrīm|
ruddhālokāḥ kulāyagraharabhasarasatpattrinādānubandhai-
ranyonyālāpamārādvidadhuriva niśi vyākulā digvayasyāḥ||54||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye sainyasaṃbhāro
nāmaikonacatvāriṃśaḥ sargaḥ|