aṣṭatriṃśaḥ sargaḥ
sthite 'tha tasminatha jṛmbhamāṇasarambhamudgīrya vacaḥ surārau|
uvāca dūtaḥ punareva vākyamojasvitādurdharadhairyabandhaḥ||1||
śrutidīpatiraskṛtāndhakārā pratibhāsaṃpadamakṣatāṃ vahantī|
jayati vyavahāraheturekā matirevārthavinirṇayaṃ vidhātrī||2||
viśinaṣṭyaniśaṃ śarīrabhājāṃ karaṇagrāmamaśeṣameva jihvā|
kṛtadhīrayathodgatānumānā kurute yatra sarasvatī pratiṣṭhām||3||
bhaktyaikabhāvitamanāḥ prabhave trikāla-
kalyāṇi yatkathayate hitabhāgibhṛtyaḥ|
tasyāśu nūnamavadhīraṇamāryavṛttāḥ
paśyantyanarthapariṇāmamito 'pi kecit||4||
daityodadherasya ca vākyaratnairvisadbhirantaḥ śravaṇodarebhyaḥ|
taṭācalānāmiva kaṃdarebhyo nirastameṣāṃ ghanamandhakāram||5||
prāptā suvarṇaghaṭanāṃ śubhabījasūti-
heturgṛhītatdṛdayātisuvṛttabhāvāt|
vāṇī sato madhuratāmani'saṃ vahantī
kaṃ karṇikā ca na harediha paṅkajasya||6||
gambhīraghoṣaparipūritadigvibhāga-
masminpuraḥ sphurati vārimucīva tāram|
daityadhinātha samarotkalikā bhaṭānā-
mabhyullasanti śikhināmiva candrakorvyaḥ||7||
vibhinnacittaiḥ pravibhidyamānamebhirvacaḥ sādhviti mā maniṣṭhāḥ|
vivekabhājo viralā hi loke vyatītasaṃkhyā nanu santi mūrkhāḥ||8||
prāyaḥ kṛśairapi guṇairbahumānagurvīṃ
saṃbhāvanāṃ vidadhadātmani mūḍhacetāḥ|
bibhranmano guṇamahastvapi sāvahelaṃ
hāsyatvameva laghuvṛttirupaiti lokaḥ||9||
dūravyapoḍhacaritātiśayāḥ svaśaṃsāṃ
kurvanti nīcamatayo rasanāsahasraiḥ|
ślāghyātmanāṃ guṇagaṇagrahaṇe tu nūnaṃ
stamberamā iva bhavanti vivṛttajihvāḥ||10||
sanmaṇḍalasthitikṛtā tanunāpi nūnaṃ
kodaṇḍadaṇḍa iva bhāti guṇena sādhuḥ|
nīcastu tasya saralonnatasādhuvṛtteḥ
saṃbhāvyate kuṇiriva grahaṇe 'pyayogyaḥ||11||
yaḥ sajjano jagati yaśca khalaikavṛtti-
rdvāvapyalīkavacasāvabhidadhmahe tau|
eko guṇānasata eva yataḥ parasya
vaktītaraḥ kila sato 'pi vinihnute tān||12||
āropya dūramasato 'pi guṇānbravītu
sādhuḥ khalastu tadapahnavavṛttirāstām|
cetaḥ samāśvasiti yasya punaḥ prakarṣa-
paryantageṣvapi na teṣu sa kaścidekaḥ||13||
āvarjyate 'vasara eva hi cittavṛtti-
ratyantadakṣiṇatayā sujanasya vāgbhiḥ|
prāpte madhāvavirataṃ navacūtayaṣṭi-
rullāsyate malayamārutavellanābhiḥ||14||
vaktraśriyaṃ vitanute navasindhuvāra-
puṣpaprakāṇḍalavalīva sataḥ śuciśrīḥ|
śūlaṃ karoti śiraso viṣamañjarīva
karṇe kṛtā khalajanasya tu vāgabhīkṣṇam||15||
ābibhrataḥ khalu kalāvati pakṣapāta-
mudvṛttakāmajayino vṛṣayānabhājaḥ|
vākyaṃ malīmasamapi pratanoti kaṇṭha-
śobhāṃ sato viṣamiva triśikhāyudhasya||16||
%pj.489
gāmbhīryaśāli hṛdayaṃ mahatāmagādha-
dhairyaṃ bhavatyanukṛtākhilasāgarāmbhaḥ|
prāptaṃ nisargalaghusattvasamāśrayatva-
manye tu taddadhati tulyamudumbarasya||17||
sādhāraṇairapi guṇairbahumānameti
bhūyiṣṭhameva puruṣo laghucittavṛttiḥ|
lokottarairapi na tairaparastu dhatte
dolāyamānamatiruddhurakaṃdharatvam||18||
yasminparisphurati śeṣaguṇaprakāśo
mandāyate śaśabhṛtīva ca tārakaughaḥ|
saṃtoṣiṇo jagati so 'pi guṇo 'stu nāma
tenāpi cetasi mado dhigapatrapatvam||19||
khyātiṃ pumāniti pumānbhajate sa eva
yo 'laṃkṛto guṇagaṇaiḥ śiśirāṃśuśubhraiḥ|
so 'śmaiva saṃprati maṇiḥ prathitākaro 'pi
yasya sphuranti na karā dalitāndhakārāḥ||20||
ālambite 'pi hi vikāsavidhau nirartha-
mānāvalepapavanakṣatabuddhigandhāḥ|
vṛntāvaśeṣakusumākṛtayo na lakṣmī-
māsādayanti puruṣā guṇahīnarūpāḥ||21||
svacchandatā khalagirāṃ na bhavanti vastu-
tattvaspṛśo jagati kecana tāsu śabdāḥ|
ātmastutiṃ sujanasaccaritāpalāpa-
pāpaṃ ca tena vidadhīta kathaṃ na mūḍhaḥ||22||
yogyo 'hameva mama ye tu guṇā na santi
tāndūṣayedasata eva kathaṃ hyasādhuḥ|
lokāpavādaparidhūsaratāmavāptai-
rdūyanta eva guṇino nanu tairabhīkṣṇam||23||
ye nirguṇāḥ paraguṇeṣu dṛḍhānurāgā-
stebhyo namaḥ sakalasajjanaśekharebhyaḥ|
yeṣāṃ punarguṇavatāmapi sābhyasūyaṃ
ceto 'nyadīyaguṇasaṃpadi dhikkhalāṃstān||24||
śūnyātmanastvabhavanirjagtīha tasya
puṃso 'niśaṃ paraguṇagrahaṇābhiyoge|
dhattetarāṃ sadasi saṃyugasaṃkaṭe ca
jihvendriyaṃ karatalaṃ ca na yaḥ kiṇāṅkama||25||
āścaryavṛtti hṛdayaṃ mahatāmaho nu
vistīrṇavṛtti hṛdayaṃ mahatāmaho nu
vistīrṇatālavakaṇānvayinākamārgam|
ābaddhyate tanubhirapyakhilaṃ guṇairya-
dakrītadāsamaniśaṃ vimalaiḥ pareṣām||26||
na prāpnuvanti samatāmakhilairmadīyai-
rete guṇaiḥ paraguṇeṣviti yānti nerṣyām|
prāptā ca taiḥ sadṛśatādhikatāthavaiṣāṃ
jātaśca sādhurapi matsaramūḍhacetāḥ||27||
uddāmamatsaravimūḍhadhiyo bhavantu
mā vā pare malinitacchavivaktraśobhāḥ|
udbhinnapīnapulakābharaṇo bhavāmi
yatsatyamanyaguṇakīrtanato 'hamekaḥ||28||
śakyo na toṣayitumātmani yaḥ kṛtāsthaiḥ
saṃkhyātigairapi guṇairgurutāṃ dadhadbhiḥ|
svalpairaso paragataiḥ parituṣyatīti
vismāyi ceṣṭitamaho mahatastadetat||29||
vyaktaṃ khaṭuṅkajanatāpihitātmano 'pi
nirmatsarāḥ satatamunnamayanti sādhoḥ|
santo guṇānghanarasātalatālupaṅka-
magnānmaṇīñjalanidheriva vīcibhaṅgāḥ||30||
ātmābhimānaviṣamagrahanighnacitta-
vṛtteḥ parasya na guṇeṣu kadācidāsthā|
anyo 'bhinandati tanūnapi tānavaśya-
marghyātmano jagati maṅgalamauktikābhān||31||
kurvantu nāma bahiranyaguṇeṣu keci-
datyantamatsaravimūḍhadhiyo 'bhyasūyām|
teṣāṃ punarjagati ye hṛdayānyabhīkṣṇaṃ
nāvarjayanti nitarāṃ na guṇairguṇastaiḥ||32||
prāptāḥ prakarṣapadavīmamṛtormibhaṅga-
śītāḥ śaśāṅkarucayo ghanamatsarāṇām|
yeṣāṃ sukhopakaraṇaṃ nu guṇāḥ pareṣā-
mātmadruho dhigadamānhatajanmanastān||33||
dattvā bahiḥ paraguṇeṣvapi sādhuvāda-
mantastu matsaraviṣānaladahyamānaḥ|
nirvāti mūḍhahṛdayaḥ svavikalpaśilpa-
saṃkalpitaṃ kamapi teṣvadhiropya doṣam||34||
ślāghyaḥ sa eva nijavaṃśasumerukuñja-
kalpadrumaḥ sucaritātiśayena yasya|
vandyā guṇāstribhuvane 'pi na saṃbhavanti
śaureḥ kramā iva vinirgatakīrtigaṅgāḥ||35||
tejodaridrā varamastu buddhiḥ prajñāvihīnena kimojasā syāt|
kiṃ vāride garjati dattajhampaḥ prāpnoti nāśaṃ śarabho na tena||36||
candraprabhadhavalacāmaracakravāla-
līlāvidhūnananibhena bhayākulatvāt|
yeṣāṃ jagattrayakacagrahadurnivāra-
rūpā virājati jareva palāyamānā||37||
mahiṣaṃ mamāpi raṇamūrdhniṃ mā vadhītsurapakṣapātarabhasena caṇḍikā|
iti bibhrateva samavartinā bhayaṃ parijahrire vijitamṛtyavo 'pi ye||38||
te 'pi triviṣṭapasado vijitā bhavadbhi-
ryasyānubahavavaśato vijitairapi prāk|
kālo nirargalatayā bhuvanatraye 'tra
krīḍatyaho jayaparājayalīlayāsau||39||
(tilakam)
krūrasya kālakariṇo dṛḍhadīrghahasta-
pāśasya naiva sasurāsuracakravālam|
paryāptimeti jagadekavidhānapiṇḍa-
līlāvakīṛṇakavalagrahavibhramāṇām||40||
daityādhipā ditijakaṇṭhavivartamāna-
phenacchaṭāvalayasaṃbharaṇena yasya|
adyāpi bibhyati vadhūjanakaṇṭhalagna-
muktāphalagratitahāralatāvalībhyaḥ||41||
āyodhaneṣu nirajīyata so 'pi yena
vajrānalendhanadharādharapakṣalakṣaḥ|
kiṃ kathyate ka iva vā jayaniścayo 'sti
kroḍīkṛtaṃ jagadanityatayā hi sarvam||42||
(tilakam)
pṛthvīvināśāhitaśokadīnāḥ kallolasaṃghaṭṭaravairdigantān|
ākrandaśabdairiva pūrayanti parasparaṃ saṃvalitāḥ samudrāḥ||43||
śeṣasya kuñcitakarālaśirāvitāna-
vistāraśūnyaparipīvarakaṇṭhapīṭham|
srastāṃsamantharaviniḥśvasitaṃ bibharti
viśliṣṭabhāralaghuvṛtti phaṇāsahasram||44||
apoḍhabhārātiśayasya śaurikūrmasya visrastavikūṇitāṅgeḥ|
nakhāṅkuśāghātavighaṭṭanotthāṃ na diggajendrā rujamāpnuvanti||45||
pātālatālutalametya vanāntavallī-
śyāmatviṣaṃ kamaṭhapṛṣṭhakṛtāspado yaḥ|
dordaṇḍalāṅgalamukhena nināya dūra-
mūrvīṃ kalindatanayāmiva sīrapāṇiḥ||46||
kvāsau hiraṇyākṣamahāsurendraḥ kroḍākṛtiryaṃ vinihatya śauriḥ|
surendralakṣmyā samamujjahāra pātālamagnāṃ sahasā dharitrīm||47||
(pañcabhiḥ kulakam)
uttambhite 'vanitale sahasaiva bhinna-
pātālarandhragatasaṃtamasāḥ karaughāḥ|
śeṣottamāṅgamaṇidīdhitibhiḥ sahoṣṇa-
raśmeḥ pratāpitabhujaṃgagaṇā ghaṭante||48||
kalpādikolakalanākulitāṃ salīla-
murvīṃ didṛkṣuriva vismayamānacetāḥ|
visrastamūlaśithilātanukarṇaśukti-
rutkaṃdharībhavati kūrmapatiḥ sthirāṅghriḥ||49||
daṃṣṭrāṭanikrakacanirdalitālagarda-
mambhodhimadhyabhuvi saṃcarataḥ salīlam|
lakṣyībhavatyavanirāyatakarṇarandhra-
niṣpītatatsaliladṛśyatayā purastāt||50||
ghoṇānilenābhihatā patantī rasātalāntaḥ punarevaḥ bhūmiḥ|
ālambate gāḍhakaragrahendumarīcigauracchavimāśu daṃṣṭrām||51||
potrābhighātadalitācalacakravāla-
muttambhitātanurasātalatālunaḥ kṣmā|
ābhāti muktapṛthuśeṣaphaṇāspadeva
gāḍhāvalambitaniśākaragauradaṃṣṭrā||52||
vapuralaghu vighūrṇayanvinighnanghurughurughargharaghoraghoṣaghoṇam|
vighaṭayati saṭānilābhighātairanaghaghaṭāghaṭanānghanāghanaughān||53||
potrasthalasthagitavāridavartmaruddha-
visrambhasaṃcaraṇasauṣṭhavajihmyamānāḥ|
āmanvate 'nyabhuvanodarasaṃpraveśa-
mutkīrṇakarṇakuharāśrayiṇaḥ samīrāḥ||54||
tārāgaṇairabhimukhaṃ tarasā patadbhi-
rabhyarcyate dhutasaṭānilaghaṭyamānaiḥ|
digdevatākaratalaprahitairdharitrī
muktāphalāgranikarairiva potralagnā||55||
nirdhautāmalakaravālanīlabhāsi brahmāṇḍaṃ vapuṣi samagramaśnuvāne|
ākāśaṃ dadhadavakāśaśūnyatāṃ ca svacchāyācchalata ivākhilaṃ nilīnam||56||
pātālarandhratamaseva navābhranīla-
māliṅgitaṃ durupalakṣyatayā parītam|
potrasthalasthagitabhānuniśāndhakāre
daṃṣṭrā vyanakti vapurutthitamantarikṣe||57||
ityuddhṛtakṣititalasya harervarāha-
rūpasya tatpura ivāmbudanīlamīkṣe|
śālukakandamiva kundalatāvadāta-
daṃṣṭrāṭanikrakacakoṭivilambamānam||58||
(ekādaśabhiḥ kulakam)
bhedonmukhasvacchanakhātmadarśavispaṣṭabimbodayaghoravaktre|
yathārthatāmeva cirādupaiti pañcānanatvaṃ karakālacakre||59||
jṛmbhāvikāsimukhakaṃdaranirgatā ca
jihvā samudvahati vahniśikhāpiśaṅgī|
niḥśvāsamārutavikampitagūḍhanābhi-
padmocchvasacchithilapāṭalapattralīlām||60||
gambhīratārataraghargharaghoraghoṣa-
śikṣopadeśarabhasādiva nākamārge|
saṃvartavāridaghaṭā ghaṭitābhyudeti
saṃrambhanirdhutasaṭānilaghaṭṭanābhiḥ||61||
nipatati ghanavisphuliṅgacakro vikaṭamukhodarakaṃdarātkṛśānuḥ|
suragiririva kīrṇaratnarāśiḥ pralayanirargalamārutavyapāstaḥ||62||
chāyāviḍambitataḍitpracayā vibhāti
roṣāruṇā ditijavakṣasi saṃpatantī|
antarnigūḍhanivasannavanābhipadma-
garbhasravanmadhugadābiliteva dṛṣṭiḥ||63||
nirdhūtakesarasaṭānilaghaṭyamāna-
mindoḥ puraḥ patati maṇḍalāntarikṣāt|
tīkṣṇāgrakoṭinakhadāraṇasaṃbhrameṇa
lakṣīkṛtaṃ sapadi rūpamivopahartum||64||
viniṣpataddhorahutāśavartiprakopahuṃkāravirāvabhīvāḥ|
diśo bhavanti sphuṭitācirāṃśuraktacchaṭāvicchuritābhramārgāḥ||65||
ākarṇya ruñjitaravaṃ jitavārigarbha-
saṃvartakālajaladastanitātighoram|
aṅgeṣu bhītibharasaṃkucitā nijeṣu
vāñchanti dūramiva dikkariṇaḥ praveṣṭum||66||
karakalitakarālacakradhārāpariṇatayeva nakhāgrakoṭibhāgāḥ|
vighaṭitavikaṭāsthijatruvakṣo vidadhati tīkṣṇatayā parīyamāṇāḥ||67||
aṅke kunāṭaka ivottamanāyakasya
nāśaṃ kavirvyadhita yasya murāririttham|
ākrāntakṛtsnabhuvanaḥ kva gataḥ sa daitya-
nātho hiraṇyakaśipuḥ saha bandhubhirvaḥ||68||
(daśabhiḥ kulakam)
surāsuravrātakirīṭakoṭiratnaprabhāpāṭalitāṅghriśākhā|
kharvātmanā saṃhriyate svamūrtiḥ pūrvaṃ tato dānavavaṃśalakṣmīḥ||69||
saṃpīḍitāvayavasaṃdhigatāḥ kathaṃci-
dīṣadvivṛtya sarito 'bhimukhaṃ vrajantyaḥ|
yānti pratīpamatisaṃkaṭakukṣirandhra-
baddhāspadodadhitaraṅgavighaṭyamānāḥ||70||
ābadhatoṣabalidānavahastakumbhā-
darghāmbahsā nipatitaṃ karapuṇḍarīke|
ambhojaviṣṭarakamaṇḍalutaśca daṇḍa-
pāde virugṇajagadaṇḍakavāṭakhaṇḍe||71||
niḥśeṣalokākramaṇotthitasya kalindakanyālilatviṣo 'ṅghreḥ|
śyamībhavantyāśu diśāṃ mukhāni daityāṅganānāṃ ca rucā sphurantyā||72||
śeṣorageṇa bhuvanāvasathāṇḍakhaṇḍa-
ruddhāvakāśavirasollasite 'ṅghripadme|
saṃbhāvitānyacaraṇena rasātalānta-
ruttambhyate kathamapi kṣitirāviśantī||73||
uttasthuṣo laṅghayituṃ jaganti pradakṣiṇāvartapinaddhapaṅktiḥ|
bibhāti ratnāṅgadavibhrameṇa pādasya saptarṣigaṇo 'dhigulpham||74||
vistāribāhukarabaddhamuhūrtasaṃstha-
candrārkamaṇḍalarucā sthagitāntarikṣam|
lakṣmīṃ bibharti ghaṭitāparacāruśaṅkha-
cakreva mūrtiradhikaṃ tarasollasantī||75||
trailokyalaṅghananirargaladaṇḍapāda-
ghātocchvasatkanakakarparavibhrameṇa|
uttambhyate maghavatastridaśādhipatya-
līlātapatramiva nirjaravaṃśalakṣyā||76||
itthaṃ samagrabhuvanākramaṇena śārṅga-
pāṇerasau kva nu gatā balidānavaśrīḥ|
prakṣālitena caraṇena samaṃ viriñca-
hastāravindakarakārghajalacchaṭābhiḥ||77||
(navabhiḥ kulakam)
līlāvidhau bharanipīḍitaśeṣabhoga-
śayyājuṣo murariporapi nābhipadmam|
yenāmburāśitanayāhṛdayena sāka-
mākampitaṃ karatalāgravighaṭṭanābhiḥ||78||
udbhavyate jalataraṅgaghaṭāmarudbhi-
rambhonidhāvabhihataṃ harinābhipadmam|
adyāpi yatkaratalavyaparoṣaṇābhi
ghātasmṛtivyatikarādiva baddhakampam||79||
kvāsau madhurnanu gataḥ saha kaiṭabhena
yasyādipūruṣakaronmalanādasṛgbhiḥ|
vyapte 'mbhasi sphuṭadalakṣitatāmrakaṇṭha-
cchedā jhaṣā jhaṣanidho śvasiteṣu celuḥ||80||
(tilakam)
kiṃ kīrtitairbahubhiratra mahāurendrai-
rindrānujena raṇabhūmiṣu jaghnire ye|
saṃkṣepa eṣa ditijādhipa matpratīpa-
vārtāntarāyamabhiṣeṇanamindumauleḥ||81||
vispaṣṭadaṇḍaghaṭanā sphuṭamaṣṭamūrti-
senādhunā śithilitavyavasāyabandhā|
abhyetya bhasmadhavalā bhavatāṃ karoti
kampaṃ jarāgamadaśeva vijṛmbhamāṇā||82||
uttaṃsitoḍḍapatikhaṇḍamṛṇālakāṇḍa-
kalmāṣitānalakaḍārakarālacūḍam|
phenacchaṭāśabalitāviralapravāla-
vallinikuñjamiva dugdhamahāsamudram||83||
pratyagroṣṇīṣacandrāmalakiraṇaśikhāśleṣanihnūyamāna-
preṅkhaccūḍākapālodarakuharadarīghūrṇanāmandavegaiḥ|
śaṅkhakṣodāvadātaiḥ skhalanakhalakhalārāvamaukharyabhāgbhi-
rmandākinyā jalaughairlulitagirisutābhāgadhammillabandham||84||
svaḥsindhoḥ kapilajaṭānikuñjavellacchevālāmalajalavīcisicyamānaiḥ|
utkhātāṃ pulinagataiḥ kapālahaṃsairbibhrāṇaṃ bisalatikāmivendulekhām||85||
āsādya saṃyugamukhe śaśikhaṇḍamauli-
mahnāya jarjaritadurdharadhairyabandhāḥ|
muktābhimānalaghavaḥ kakubho bhajanti
sārdhaṃ tadīyayaśasā na cireṇa daityāḥ||86||
(cakkalakam)
uddaṇḍāmbhojakhaṇḍaślathanibiḍapuṭakroḍadhūlīkaḍāra-
krīḍatkaṇḍūlagaṇḍāmaragajamṛditāpāṇḍuḍiṇḍirapiṇḍā|
piṇḍeśurāḥ puro vaḥ punarapip laḍahākhaṇḍalastrīstanāgra-
pre"khatkallolakāṇḍā bhavati surasarinmattakārṇḍavaśrīḥ||87||
jṛmbhārambhābhirāmaślathamukulamukhālakṣyalakṣmīkapakṣma-
preṅkhadbhūlīpiśaṅgabhramarakavalitāmandaviṣyandagarbhaḥ|
krīḍantyaḥ kalpavallīkisalayakalikāḥ komalāḥ karṇapūra-
premṇā lumpanti hastaiḥ sarabhasamacirānnandane nākanāryaḥ||88||
tāvadbāṣpāmbupūraplutanayanayugasvarganārīkarāgrai-
rjyotsnāgauratviṣo 'mī tava sadasi dhutāścāmarā visphuranti|
yāvatsaṃhāravelāmiva na gaṇacamūmāgatāṃ saptalokī-
citrākāravyavasthāvighaṭanacaturāmīkṣase candramauleḥ||89||
saṃpratyeva krodhavahnau pataṃgā jātā gehenandino yanna yūyam|
tanme nājñāmaṇḍalasragvibhūṣāṃ prāpto mūrdhā dhūrjaṭerdaityanāthāḥ||90||
ityākṣipya pragalbhaṃ danutanujapatīnroṣarūkṣāruṇākṣāṃ-
statkālālaṅghyatejaḥprasaragurubharavyāhatārkaprakāśaḥ|
piṃṣanratnāṅgadālīṃ dhutakapiśarajaḥ kalpitāśāṅgarāgāṃ
sāṅgārāpāṅgadṛṣṭiḥ kathamapi kupitastatsabhāṃ dūta aujjhīt||91||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye dūtapratigarjitaṃ
nāmāṣṭātriṃśaḥ sargaḥ|