pañcatriṃśaḥ sargaḥ
ityahitatribhuvanakṣayasaṃbhramārti
dikcakravālagaganakṣitigocareṣu|
utpātaviplavaśateṣu samudbhavatsu
tasminkṣaṇe pralayaśaṃsiṣu dānavānām||1||
saṃrambhagarbhauruniḥśvasitānilottha-
dhūmacchaṭābhirasurādhipamaṇḍaleṣu|
medhāvalībhirabhitaḥ sthagayatsu loka-
saṃvartadurdinamukheṣviva digvibhāgan||2||
daṣṭauṣṭhapaṭṭavikaṭabhrukuṭīvibhaṅga-
māveganirdhutaśiraḥ smaravairidūtam|
paśyatsu jihmamanalolbaṇadṛṣṭipāta-
pluṣṭaprakīrṇakaśikhaṃ ditijādhipeṣu||3||
antaḥprakopadahanoddhatahetidāha-
bhītyeva kaṇṭhavikacotpalamālikāsu|
vakṣaḥsthalīnikaṣaṇotthakṛśānudhūma-
vyājātpalāyanaparāyaṇatāṃ gateṣu||4||
adyaiva te 'stu nidhanaṃ sadasītyaśakla-
kliṣṭākṣaraṃ nigadataḥ kramayogaśūnyam|
saṃtarjayatsu taralīkṛtatarjanīka-
mitthaṃ gaṇādhipatimāhavadurmadeṣu||5||
saṃrambhagāḍhavalitāṅgulipallavāgra-
murdgūrya muṣṭimapareṣu ruṣabhihantum|
utthāya daṣṭavikaṭauṣṭhamavadhyadūta-
buddhdyā śanairupaviśatsu nijāsaneṣu||6||
anyeṣu dhīralalitasthiti kṛtyavastu-
cintāpraveśavivaśīkṛtaśemuṣīkam|
saṃrambhaśūnyamamarāriṣu nistaraṅga-
bhaṅgormimālisadṛśīṃ śriyam āśriteṣu||7||
premānubandhiparimārjanalagnarāja-
lakṣmīdukūlapaṭallavavibhramābhiḥ|
vibhrājitena nakhadīdhitimañjarībhi-
rākramya pādaphalakaṃ caraṇena haimam||8||
cetoharasmitavikāsikapolabhitti-
bhrūkṣepalolalalitāṅgulihastaceṣṭam|
candrāṃśugaurarucikalpalatādukūla-
paryaṅkabandhavikaṭonnatapīnavakṣāḥ||9||
daityādhipo mukharitākhiladiṅmukhena
vākyena dānavacamūpatikarṇakukṣīn|
āpūrayanpralayamegha ivādrirandhra-
bhāgānviśeṣasparuṣākṣaramityavādīt||10||
(daśabhiḥ kulakam)
kiṃ sāṃprataṃ taraladūtavacaḥprapañcai-
rebhiḥ kilākulitasattvadhiyaḥ stha daityāḥ|
saṃbhāvyate śikhariṇāṃ nahi mugdhapattri-
śabdaśrutikṣubhitakesarikaṃdaratvam||11||
etena dūtavacasāpi vijṛmbhamāṇa-
saṃrambhametadavalokya surāricakram|
śaṅke kulācalakulaṃ kalaviṅkapota-
parysapakṣapavanāhatibaddhakampam||12||
yadbālabhāvasulabhaṃ śaśalakṣmamauli-
dūto 'bhyadhādayamaśaṅkitacittavṛttiḥ|
vaktuṃ kṣamaṃ pitṛgṛhe tadaśeṣameva
śrotāsti yatra rabhasena sa mātṛvargaḥ||13||
trailokyasāragurudhāma sadaḥ kilaita-
nnaiva smaśānamaśivātma śivāśavāḍhyam|
daityā ime ripukulācalacakravāla-
niṣpeṣakalpamaruto na gaṇaplavaṃgāḥ||14||
daityādhirājavinipātavibhīṣikābhi-
rabhyetya bhāyayasi dūta diteḥ sutānyat|
tadvyāhataṃ laghughanāghanamuktatoya-
dhārābhireti na yataḥ śamamaurvavahniḥ||15||
nirjitya saṃyugamukhe surarājacakra-
mapyātmasājjagadakāri yadaiva daityaiḥ|
kvāsau tadā samabhavatkathayendumauliḥ
skando 'thava kva nu gaṇāḥ kva nu te kva nandī||16||
āśvāsayannasilatāvanatālavṛnta-
vātairnṛsiṃhanakharakṣatavigrahāṃ ye|
lakṣmīṃ punarditijarājakulasya kāla-
daṇḍapracaṇḍaparipīvarabāhudaṇḍāḥ||17||
kiṃ tairna nandanagatairdayitājanasya
gīrvāṇapauruṣamiva svarucā hasantī|
āpānabandhamuditairapanidraratna-
puṣpāvataṃsaracanā kriyate 'surendraiḥ||18||
(yugalakam)
kiṃ vāvalokanakutūhalibhistrilokyā-
māruhya bāhujitadevavimānavīthīḥ|
nābhrāmyatāsurabhaṭaiḥ samarāttagandha-
gandharvakiṃpuruṣagītavinodyamānaiḥ||19||
māṇikyapuṣpabharamantharakalpavalī-
līlāgṛhodaragatairharadūta daityaiḥ|
kiṃ nānvabhūyata vidagdhavilāsadigdha-
mugdhārivāravanitāratakelilīlā||20||
kiṃ vā na vibhramavibhūṣitadaityanārī-
hastāravindapadadurlalito gṛhāntaḥ|
adhyāvasankaravimṛṣṭakalaṅka eti
yāthārthyameva gṛhacandra iti sma candraḥ||21||
kiṃ vāvarodhanavadhūdayitatvapakṣa-
pātātsuraiḥ satatasaṃnihitīkṛtārkāḥ|
svādhīnavallabhatayā pratipannahāri-
hāsā vyalokiṣata no na gṛhāmbujinyaḥ||22||
piṅgasphuratkiraṇakesaraśāritāśā-
smerasya no kimupadīkriyate surendraiḥ|
utkhātaśeṣaphaṇabhṛtphaṇacakravāla-
māṇikyapuṣparacitā mama maṅgalasrak||23||
vispaṣṭasaṃhṛtanirargalasaptaloka-
pūrapragalbharasitā mṛdumañjugarjāḥ|
kiṃ me na yāmapaṭahatvamavāpnuvanti
saudāmnīkanakakoṇabhṛtaḥ kṣayābdāḥ||24||
prāleyaśailataṭakānanadevatābhi-
rabhyetya no mṛgamadāgurukuṅkumena|
saṃpādyate kimavarodhavadhūjanasya
daityādhirājapuri vibhramamaṇḍanaśrīḥ||25||
daityādhipairyudhi jitasya mṛṇālasūtra-
garbhe sthitirbhayavaśatpunaratra mā bhūt|
nonmūlitāḥ kimamarādhiopateritīva
maddantibhirbhavanakānanapaṅkajinyaḥ||26||
kiṃ vā vighaṭṭanavirugṇasuparṇaketu-
nābhīhradāmbujajaradbisadaṇḍakhaṇḍaiḥ|
daityairapuṣyata mama vyapahṛtya harmya-
vāpīṣu na druhiṇadhoraṇahaṃsapaṅktiḥ||27||
vispaṣṭabhaṅgalaghucāpalatāparītaḥ
sa śrīphalaikarasiko harirāhavāgre|
sthairyaṃ bibharti kuta eva viśaṅkaṭeṣu
daityādhirājakaravālalatāgṛheṣu||28||
cintābharānatamukhapratibimbalagna-
lolaikakuṇḍalasitetararatnakhaṇḍam|
tasyācireṇa dayitā vahati stanaṃ 'srī-
rviśrāntaṣaṭcaraṇacakramivāravindam||29||
lakṣmyā bhaviṣyati raṇe bhayabaddhakampa-
lolāṅguliślathagṛhītakarālanālam|
visraṃsi sāndradalamaṇḍalapakṣmakhaṇḍa-
mutkarṇikaṃ tadapi vibhramapuṇḍarīkam||30||
pratyagramecakarucirvikarālalola-
kallolapīvarakarāhatapuṣkaraśrīḥ|
svacchandameva cakṛṣe sahasāśu yena
sīrāṅkuśena kariṇīva kalindakanyā||31||
saṃkhye jitasya halino 'pi mayaiti tasya
nūnaṃ trapābharavhastatayottamāṅgam|
antarnigūḍhamaṇiśāraśiraḥsahasra-
bhārātigauravavaśādiva bandhuratvam||32||
(yugalakam)
krīḍāpatattrirabhasotthajighṛkṣayārā-
tkṣipto mayāpi vinatātanayasya tasya|
pāśaḥ prasādanavilagnabhujaṃgabhoga-
līlāṃ puraiti caraṇāṅgulikoṭilagnaḥ||33||
kodaṇḍamaṇḍalakaṭukvaṇitaṃ madīya-
māyodhane śrutavato hṛdayātsmarāreḥ|
dhairyaṃ gamiṣyati niruddhaśarīrabhīru-
cittasthabhītipariṇāmavaśādivoccaiḥ||34||
kodaṇḍamandaragiriśravaṇāntakṛṣṭa-
maurvīkṛtāhighaṭitonnatapṛṣṭhabhāgaḥ|
yasyācyuto 'pyabhidaduṣṇamarīcibimba-
durdarśabhāsuramukhastripuraṃ pṛṣatkaḥ||35||
muñcanti śātravavadhūnayanāravinda-
mālāḥ karāhatapayodharamaṇḍalāgram|
adyāpi dīpitapuratrayatāyamāna-
dhūmābhighātaghaṭanādiva yasya bāṣpam||36||
ālambitāṃ karajakūṭaśikhāvidaṣṭa-
tārāgaṇāṃ vapuṣi vīkṣya mṛgendrakṛttim|
yasyojjhitaḥ śucimarīcicayaścakāsti
bhītyeva lakṣmahariṇena kirīṭacandraḥ||37||
ūrdhvekṣaṇānalamanindhanamapyavaimi
dhatte mayā yudhi haraḥ sa vijīyamānaḥ|
roṣānubandhamalinālikapaṭṭapṛṣṭha-
niṣṭhyūtdhūmaśabalīkṛtavisphuliṅgam||38||
(cakkalakam)
ākūṇitekṣaṇamukhasya kṛpāṇayaṣṭi-
reṣā raṇeṣu patitorasi candramauleḥ|
hārīkṛtoragaphaṇāmaṇiśāṇakoṇa-
kāṣakrameṇa masṛṇībhavati kṣaṇānnaḥ||39||
paśyasyavaśyamacireṇa vikhaṇḍyamāna-
dordaṇḍadarparabhasasya mayā raṇeṣu|
śyāmāyamānamalikekṣaṇavahnidhūma-
cchāyāvilaṅghitamivānanaminduauleḥ||40||
āpātajarjaritajahnusutājalaugha-
nirmṛṣṭalāñchanakalaṅka ivācchalekhaḥ|
haste yaśoṅkura ivaiti purā harasya
helā jayena mama so 'pi kirīṭacandraḥ||41||
āyodhane 'pi vijitasya mayā smarāre-
rūrdhvekṣaṇānalaśikhābhihato lalāṭe|
pāṇiḥ puraiti ghaṭanāṃ nakhakoṭiraśmi-
saṃdehitāmalakirīṭaśaśāṅkakhaṇḍaḥ||42||
pīnāntarālaparivartitamatkṛpāṇa-
cchāyānubandhabahalacchavikālakūṭam|
kaṇṭhaṃ bibharti na cirādiva saṃbhramārta-
śailādhirājatanayekṣitamindumauliḥ||43||
cakrīkṛtātanudhanurguṇaguñjitena
saṅgrāmamūrdhni mayi rundhati śailakuñjān|
jihretu tasya hṛdayaṃ tanulagnabhīru-
cittārdhabhāgaviditacyutadhairyabandham||44||
nirdhautakajjalalavāmapi baddhaghora-
mūrchāndhakāragahanāṃ ruditena gaurī|
nyastāñjanāmiva vidhāsyati pakṣmapaṅkti-
rudvṛttatārakamayūkhaśikhāvalībhiḥ||45||
cintāgṛhītadayitāśithilopagūḍha-
kaṇṭhasya manyubharaduḥsthitacittavṛtteḥ|
śayyāntare sairidivaiṣyati bhaṅgamaśu
sā vartanī rasikatānugatā smarāreḥ||46||
tāraṃ śarāsanaguṇakvaṇitaṃ bhayena
saṃstambhitaśravaṇatālamudañcitākṣāḥ|
ākarṇayantu samare mama janmasāma-
ghoṣodayātirabhasādiva diggajendrāḥ||47||
grāsīkṛtākhilajagattritayo 'dhunaiva
sāndrāndhakāramalināmasurādhināthāḥ|
kiṃ dhūmavartimiva tāmapi kālarātri-
mekaḥ pibāmi bhavatāmadhunā purastāt||48||
nighnannakheṭakhaṭakāmukhahastakṛṣṭa-
maurvīvinirgalavinirgatamārgaṇaughaiḥ|
tāṃ revatīmapi khaṭākhumavaimi saṃkhya-
mārge 'tiśuṣkamalinacchavidehayaṣṭim||49||
āropya kiṃ punarapi bhramamuṣṇaraśmi-
bimbaṃ krameṇa harihetijigīṣayaikaḥ|
ṭaṅkābhighātavinikuṭṭitatanniśāta-
tejaśchaṭābhiraparaṃ ghaṭayāmi cakram||50||
māṇikyakandukamivoṣṇamarīcibimba-
māsphoṭya pāṇikamalena salīlametat|
kurve tadīyaśikhigarbhamayūkhatāmra-
mārūḍhapākamiva kiṃ kṣitipīṭhapṛṣṭham||51||
abhyāhatā nipatatā karavālamegha-
dhārājalena gurusaṃgaradurdineṣu|
muñcantu tāvadadhunā cirasaṃbhṛtaṃ ta-
mūṣmāṇamunnatijuṣaḥ pratipakṣaśailāḥ||52||
muktāśilāśakalakomalabhāsi bāla-
bhāre 'stu duḥkhavidhurā camarīva tāvat|
ucchrāyi daityapatikīcakacakravāla-
bhagne 'dhunā yaśasi nirjaravaṃśalakṣmīḥ||53||
gāmbhīryarecitamanūrjitakaiṭabhāri-
tāpānubandhavisaratvamabhīkṣṇamāptam|
tatstokameva surasainyamavaimi tāva-
dāyodhane 'tra marumārgajalāyamānam||54||
manye nisargamahatāṃ hṛdayeṣu pūrva-
micchaiva niṣpratighatāmanaghāṃ vahantī|
paścādupāyaghaṭanā sakaleṣu kṛtya-
vastuṣvananyasadṛśīmupayāti siddhim||55||
vispaṣṭamuṣṭighaṭanāguṇayogabhāja-
stīkṣṇīkṛtā bhaṭajanena kṛpāṇapaṭṭāḥ|
kāryaprāndhaghaṭanāvahitaiḥ sunīti-
margāśca bhīruhṛdayairnanu saprapañcāḥ||56||
yasminnisargamahatāṃ caramaḥ prakṛṣṭa-
mārambhamādyamatiśeta iha prayatnaḥ|
taṃ tāratamyabharasaṃbhṛtijṛmbhamāṇa-
saṃrambhaśūnyaphalamādriyate 'vidagdhaḥ||57||
aurjityamujjhitavatāṃ bata vītaśaṅkaṃ
kāryaṃ kariṣyati ca nītiviṣūcikā vaḥ(cet)|
vandhyāsutaḥ śaśaviṣāṇadhanurvidhāya
mokṣyatyavaśyamacireṇa sa nākabāṇān||58||
vispaṣṭaluttha(ṇṭha)nakathāṃ vijahīta nīti-
kanthāmamantharaparākramamārgapanthāḥ|
tandrālubhirna sulabha nanu dhairyaśaurya-
śauṭīryahāryahṛdayā kvacideva lakṣmīḥ||59||
nūnaṃ malīmasapayodharamaṇḍalāsu
jātāsu dikṣviva vipakṣanitambinīṣu|
saṃprāpyate madhujiteva viṭaṅkaratna-
paryaṅkaśeṣaghaṭitena mayāpi nidrā||60||
kṛpaṇavirutilagnā rātriśobhādhare 'smi-
nnabhipatati tamisrā dhūsare matkṛpāṇe|
virahavidhuracetāḥ pārśvamutsrakṣyati drā-
ktuhinaśikharikanyā cakravākīva bhartuḥ||61||
ityāvirbhūtadarpaprasaramabhidadhatyandhake baddhamanyā-
vālakṣyāntarvivakṣāsphuradadharapuṭaścukṣubhe kāñcanākṣaḥ|
ratnaprālambamālāmalakiraṇaśikhānirjharāmbhaśchaṭābhi-
rbibhrannirvāpyamāṇātanukuliśaśikhiploṣamuccairivoraḥ||62||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye andhakāsuravyāhāro nāma
pañcatriṃśaḥ sargaḥ||