catustriṃśaḥ sargaḥ |

krodho 'tha tāṃ timiraviplavamandadṛṣṭi- r ābaddhavepathur atikramayogavṛddhaḥ | ābaddhamūrdhavidhutiḥ śvasitānubandha- pāriplavādharadalaḥ śanakair avikṣat || 1 ||

timirasya cakṣurdoṣasya viplavo vikāras teneva tenaiva ca mandā dṛṣṭir yasmin_ | atikramo maryādātyajanam_ | tadyogena vṛddhaḥ prakarṣeṇa vṛddhaḥ | atha ca sāmarthyābhāvād atikrāntaḥ kramayogo gamanasaṃbandho yasya tādṛśo vṛddhaḥ sthaviraḥ | tasyāpy etat sarva samānam_ || 1 ||

abhyāpatann uśanasāsuracakravāla- huṃkāradhūmanikaro dadṛśe purastāt | āliṅgitākhilavapurvratakāryapāna- paryāptasaṃstavavaśād iva dhūmitārkaḥ || 2 || 1. ‘dhūmritārkaḥ’ kha.

vratavaśāt pānena prāptaḥ saṃstavaḥ paricayas tadvaśād ivāliṅgitavapurdhūmanikaraḥ śukreṇa paridṛṣṭaḥ || 2 ||

vakṣaḥsthalīmalanasaṃbhriyamāṇadhūma- lekhāvalīśabalitāṃ kupito 'gnidaṃṣṭraḥ | ālagnapīnadayitākucakumbhapīṭha- kālāguruprakarapattralatām ivohe || 3 ||

malanaṃ mardanam_ | agnidaṃṣṭrādayo daityāḥ | ūhe babhāra || 3 ||

saṅgrāmadohadarasasphuṭitai rarāja pīnaṃ hiraṇyakaśipostanayasya vakṣaḥ | sthūlāsthiśṛṅkhalanipātavirugṇakhaḍga- dhārārajaḥkaluṣitakṣatajair vraṇaughaiḥ || 4 ||

4 ||

krodhān mayena racitā bhrukuṭiḥ kirīṭa- māṇikyaraśmikapiśaśramavāribinduḥ | saṃhārakālarajanīva rarāja sāṃdhya- rāgachaṭāruṇitatārakamaṇḍalaśrīḥ || 5 ||

5 ||

karṇāvataṃsavikacotpalakāntibhinna- saṃrambhapāṭalakapolatalo 'ṃsakūṭam | rākāpradoṣa iva rāhupariplutendu- bimbaḥ kareṇa śatadundubhir āhatoccaiḥ || 6 ||

aṃsaśikharaṃ kareṇāhata kaṇḍūlatvād atāḍayat_ | ‘svāṅgakartṛkāc ca’ iti taṅ_ | rākā paurṇamāsī || 6 ||

svedāmbuśīkarakaṇaprakarāvakīrṇa- vakṣaḥsthalavraṇadarīkuharo vikumbhaḥ | dadhre vibhinnakarikumbhamṛgārihasta- visrastamauktikaguhāgṛhaśailalīlām || 7 ||

7 ||

sotsekamatsaradhiyo 'nalatārakasya niṣpetur āhavarasasphuṭitavraṇebhyaḥ | vakṣaḥsthalīvikaṭavaprataṭābhighāta- bhagnāmaradviradarājaviṣāṇakhaṇḍāḥ || 8 || 1. ‘daṇḍāḥ’ ka.

utsekamatsarau darpadveṣau || 8 ||

saṃrambhabhāsuraruco harikaṃdharasya vaktreṇa saṃbhṛtarūṣaḥ sphuṭahāsabhāsā | udgīrṇadagdhasalilārṇavabhasmadhūli- saṃtānavāḍavamukhānukṛtir vidadhre || 9 ||

udgīrṇo dagdhasalilasyābdher bhasmanicayo yena tathāvidhasya vaḍavāmukhasyānukṛtiḥ sphuṭahāsatvād ānanena dhṛtā || 9 ||

ātāmradṛṣṭikiraṇacchuritācchagharma- vāricchaṭākaṇaphaṇāmaṇirullasantī | chāyākalindatanayājalajālamadhya- magnā kaler bhrukuṭikāliyamūrtir āsīt || 10 ||

chāyaiva yamunājalam_ || 10 ||

rāhor alakṣyata mukhaṃ dṛḍhadantayantra- niṣpeṣadhūmamalinīkṛtatālumūlam | daityādhipaiḥ kavalitendukalaṅkapaṅka- saṃsargadhūsaram iva pravijṛmbhamāṇam || 11 ||

11 ||

siṃhīsuto daśanapaṭṭavighaṭṭanottha- dhūmacchaṭā bhujaganāyakabhogadīrghāḥ | grāsīkṛtasya śaśalakṣmabhṛtaḥ kalaṅka- lekhā ivodagiradantaritāntarikṣāḥ || 12 ||

nāyakaḥ svāmī || 12 ||

niṣṭhyūtayā kavalitāmṛtadhārayeva vaktrāntarālabhuvi bhūribharād amāntyā | tasyātiniṣṭhuraruṣo vikaṭāṭṭahāsa- bhāsavabhāsitasabhābhavanaṃ babhāse || 13 ||

amāntyā avartamānayā || 13 ||

svedāmbukardamitacūrṇitatārahāra- dhūlicchaṭādhavalitā tanur induketoḥ | vinyastacandanaraseva rarāja vairi- lakṣmīsamāgamasamutsukamānasasya || 14 ||

14 ||

jṛmbhāvikāsigurumatsaradurnirīkṣya- m ātāmramānanam arājata vajrabāhoḥ | autpātikaṃ vikaṭarandhraniruddhamadhya- m udraśmimaṇḍalam iva sphuṭam uṣṇadhāmnaḥ || 15 ||

utpātasya nimittam autpātikam_ | ‘tasya nimittaṃ saṃyogotpātau’ iti ṭhañ_ || 15 ||

kālāntakasya sakalārikulakṣayāya dhūmacchaṭā malayato 'tha lalāṭapaṭṭam | puṣpāvataṃsavigalanmakarandabindu- pānārthinī madhupapaṅktir iva nyapaptat || 16 ||

16 ||

roṣāruṇekṣaṇamarīcivilaṅghyamāna- jihmotkaṭabhrukuṭi vahniśikhasya vaktram | antarviṣānalaśikhāśatapiṅgayamāna- kāloragādriśikharaśriyam āsasāda || 17 ||

17 ||

abhyunmiṣacchikhiśikhāpaṭalaṃ subāhu- r anyonyabāhumalanena karadvayastham | tvaṣṭā viṭaṅkataraṭaṅkanikuṭṭanottha- m ādhatta cakraghaṭanārtham ivārkatejaḥ || 18 ||

cakraṃ sudarśanam_ | taddhaṭanārtham iva viśvakarmā ravitejaḥ subāhur jvālāpaṭalam adhāt_ || 18 ||

saṃrambhiṇaḥ kṣitisutasya kaṭhorakopa- rāgāruṇacchavi vilokya vapus tadānīm | daityādhipāḥ kṣaṇam aśaṅkiṣatān apoḍha- gāḍhorugarbhaśayanakṣatajacchaṭārdram || 19 ||

kṣitisuto narakāsuraḥ | garbhaśayanam ulvam_ || 19 ||

ṭāṃkārayan vikaṭakuṭṭimapaṭṭapṛṣṭha- m aṅguṣṭhakoṭidṛḍhaṭaṅkakaṭhoraghātaiḥ | naṣṭāṣṭadiktaṭatamaśchaṭamaṭṭahāsa- m aṭṭālakūṭabhiduraṃ vyadhitāgnidaṃṣṭraḥ || 20 ||

aṭṭālā mahānti bhuvanāni | tatsamūhānāṃ bhiduraṃ vegavattvād dvidhābhavanahetum_ | karmakartarīva kartary api ‘vidibhidi—’ iti kurajbhavati | svabhāvāt_ | uktaṃ ca—‘bhidurādayaḥ karmakartari kartari ca’ iti || 20 ||

cakre 'tigāḍhakarapiṣṭakarālahāra- tārāvalīvilulitātanuccurṇapūrṇam | vajravraṇaugham avacūrṇanakāmyayeva saṃrambhagarbharabhasasphuṭitaṃ vidarbhaḥ || 21 ||

tārāmauktikāni avacūrṇanaṃ prabhāvavatā cūrṇenāvaroha(pa)ṇam_ || 21 ||

kṣmāmaṇḍalaṃ bibhidivān gurupārṣṇighāta- pātena kopakaluṣo 'tha hiraṇyanemiḥ | cakre rasātalam adṛṣṭacarārkabimba- saṃdarśanākulakutūhalikādraveyam || 22 ||

adṛṣṭacaraṃ pūrvam adṛṣṭam_ | ‘bhūtapūrve caraṭ_’ | kādraveyā nāgāḥ || 22 ||

vispaṣṭajihmataraceṣṭitacittavṛtti- r utsṛṣṭasādhucaritapratipattiduṣṭaḥ | krodhaḥ kṣaṇād avinayaikaraso 'bhyasūyāṃ kurvanmṛgāṅkamukuṭe narakaṃ jagāhe || 23 ||

sadācārāśrayaṇasyotsarjanāt sadoṣaḥ krodho narakaṃ dānavam agāhata | asūyāṃ kurvann iti hetau ‘lakṣaṇahetvoḥ kriyāyāḥ’ iti śatā | yaś ceśvarāyāsūyati sa narakaṃ rauravādikam āśrayati || 23 ||

vakṣaḥsthalīlulitahāramṛṇāladaṇḍa- khaṇḍaḥ prakopamahiṣeṇa vigāhyamānaḥ | chāyājalaughakalilaḥ kaluṣākulaśrī- r uddāmavepathur athelvalapalvalo 'bhūt || 24 ||

ilvalākhyo 'sura eva palvalo naḍvalam_ || 24 ||

saṃvartakasya karavajraśikhānipāta- piṣṭāṅgadāṃsaśikharotthitadhūmaketuḥ | cāmīkarottham aparaṃ bibharāṃcakāra keyūrabandham iva saṃsadi bāhudaṇḍaḥ || 25 ||

dhūmaketur agniḥ || 25 ||

daṣṭauṣṭhapṛṣṭhavikaṭabhrukuṭīkarāla- tāmrānanasya karasaṃpuṭapeṣajanmā | antaḥsthaśeṣaphaṇaratnanidhānabhūmi- pīṭhe papāta śarabhasya kṛśānuvartiḥ || 26 ||

kṛśānur eva vartir dhūmaśikhā | yatra ca nidhānasaṃbhavas tatra tatsūcikā dhūmavartiḥ patatīty uktam_ || 26 ||

saṃhāramārutadhutapralayāgniheti- tālūracakraparimaṇḍalacakṣuṣoccaiḥ | vindhyāsureṇa bhayakātaradaityadṛṣṭāṃ caṇḍīṃ ruṣaṃ dhṛtavatā paruṣaṃ jagarje || 27 || 1. ‘juguñje’ kha.

hetīnāṃ tālūracakram āvartamaṇḍalam_ || 27 ||

pādābhighātadalitaṃ kṣitipīṭhabandha- m agre 'nusaṃdhirabhasād iva kālacakraḥ | cakre 'tigāḍhakarasaṃpuṭapiṣṭahāra- tārāvalīlulitadhūlikaṇāvakīrṇam || 28 || 2. ‘calitaṃ’ kha. 3. ‘abhisaṃdhi’ kha.

anusaṃdhiḥ saṃyojanam_ || 28 ||

abhyuttatāma karatāmarasāvamṛṣṭa- timyallalāṭaphalako 'stamayāya śatroḥ | ātāmradṛṣṭir atimatsaratastamāla- nīlacchaviḥ kṛtatamītimiro 'timāyaḥ || 29 || 4. ‘kaṭako’ ka.

abhyuttatāma tatvare khinno vābhūt_ | tamī rātriḥ || 29 ||

svedodabinduśabaloṣmavilīnamauli- viṣpandihemarasamiśratayā lalāṭe | bhrūbhedarājirajitasya rarāja kopa- līlāpuraṃdhricaṭulātilakāyamāna || 30 ||

‘suvarṇaśṛṅkhalābaddho nānāratnavibhūṣitaḥ | lalāṭalambyalaṃkāraś caṭulātilakaḥ smṛtaḥ ||’ ity asakṛd uktam_ || 30 ||

preṅkhannakhāṃśuparikalpitakaṇṭhadāma- durdarśanaḥ parimamarśa kareṇa kopāt | vajrābhighātavikaṭavraṇabaddhasaṃstha- vicchinnahārakaṇakarburakānti vakṣaḥ || 31 || 1. ‘nakhāṃśubhara’ kha.

karburā dhūsarā || 31 ||

dikcakravālam anaghasmaraghasmarendu- maulīkṣaṇasmaraṇasaṃbhṛtasaṃbhram ārdram | krodhāgnidīprataratārakatārakākṣa- kākṣekṣitaṃ na kathamapy aśanair adhākṣīt || 32 || 2. ‘saṃbhramasaṃbhramāntam_’ kha. 3. ‘kākekṣitaṃ’ ka. 4. ‘asya śanaiḥ’ ka.

tārakākṣasyāsurasya kākṣekṣitaṃ kutsitenākṣṇā vilokanam_ || 32 ||

jṛmbhāvikāsimukhakaṃdaradṛśyamāna- jihvālataḥ sapadi vihvalayan surārīn | āvartagahvaraparisphuritapravāla- vallīkarālajaladhiśriyam āpa dhundhuḥ || 33 || 5. ‘sphuṭita’ kha. 6. ‘bandhuḥ’ kha.

33 ||

vajraprabheṇa vikaṭāduraso vilūya muktāphalastabakadāma vikīrṇam ūrdhvam | āsannadeśaracitasthitiśītaraśmi- tārāpuraṃdhriparivāravilāsam āpat || 34 ||

34 ||

krodhoddhatabhrukuṭibandhakabandhavaktra- cchāyāndhakāravisaraprasaropaghātam | cakruḥ karāladaśanāṃśuśikhāsahasra- śobhābhṛtaḥ sapadi ketumato 'ṭṭahāsāḥ || 35 ||

kabandho rāhuḥ || 35 ||

vajrānalo 'py analabhāsuraghoradṛṣṭi- pātair dahann iva jagadgurumatsaraśrīḥ | smeraḥ savibhramam abibhramadudgatāṃśu- cakrāhitārkaparidhiṃ karapadmaśākhām || 36 || 1. ‘bhāsvara’ ka.

paridhiḥ pariveṣaḥ | karapadmasya śākhām aṅgulīṃ savibhramam abibhramadbhramayāmāsa || 36 ||

tena krudhā dudhuvuṣoddhatam uttamāṅga- m ullāsibhiḥ kanakamaulimarīcicakraiḥ | dṛṣṭavyudastaraviraśmir iva vyadhāyi saṃbhrāntakhecaragaṇā divasasya lakṣmīḥ || 37 ||

dṛṣṭanaṣṭā ravikarā yatra tādṛg iva dinaśrīs tena maulikiraṇaiḥ kṛtā | dudhuvuṣā kampitavatā || 37 ||

saṃbhremuṣā suragaṇena vilokito 'tha jīmūtaketur abhinanditasaṃprahāraḥ | hārān salīlam alunāttaruṇārkabimba- durdarśalocananipītatadātapaśrīḥ || 38 || 2. ‘durdharṣa’ kha.

38 ||

mūko 'pi bhrukuṭitaraṅgitaṃ lalāṭaṃ bibhrāṇaḥ karatalatāḍitāṃsakūṭaḥ | saṃrambhasphuradaruṇekṣaṇo jagarja krodhāndho badhiritasaptalokam uccaiḥ || 39 ||

mūko nāma daityaḥ | mūkaś ca vāgvikalo jagarjeti citram_ || 39 ||

vivartitādharavikasatkapolabhūr vicintitāhitaraṇalābhaharṣulaḥ | vikoṣitobhayapuṭaphullatārakāmamarṣaṇo dṛśam animeṣiṇīṃ dadhau || 40 || 3. ‘vicitritā’ kha.

ahitāḥ śatravaḥ | harṣulaḥ saharṣaḥ | vikośitau vikāsitau || 40 ||

visrabdham aicchad avasāditavāsavo 'ṃsa- visraṃsamānavasanaḥ savasāvaseke | vyaṃsāsuraś ciram avisrasavisrutāsra- visrāvanāvasikaraḥ samare visartum || 41 || 1. ‘nihantum_’ kha.

vasā asthirasas tadavasekena saha vartamāne | avisrasā ajarāḥ | nāsti visrasā jarā yeṣām iti kṛtvā | tebhyo visrutasyāsrasya śoṇitasya visram āmagandhas tasyāvanau ca samare visrabdham anākulaṃ kṛtvā visartuṃ vyaṃsanāmāsuro 'bhyalaṣat_ | avasāditavāsavaḥ kadarthitendraḥ || 41 ||

prahrādo vikaṭaviṭaṅkadaṃṣṭramāsyaṃ bibhrāṇaḥ karatalatāḍitāṃsakūṭaḥ | digbhittipratiphalitāṭṭahāsabhāsā saṃhāre hara iva dattasaṃbhramo 'bhūt || 42 ||

viṭaṅkāḥ kuṭilāḥ || 42 ||

diksundarīsphuṭanavāṃśukam indugaura- m ānandanirbharam ivāriyaśaḥ pipāsuḥ | vyādād amandam atha kaṃdarakalpamāsya- m ātāmratālu śatadundubhir āttajṛmbham || 43 ||

43 ||

pādāghātair dānavacakrasya tadānīm āpātālaṃ dṛṣṭagabhīrātanurandhrā | sāsūyasya krodhavaśād indukirīṭe pusphoṭa kṣmā rauravapātārtham ivārāt || 44 || 2. ‘gaurava’ kha.

rauravaṃ narakabhedas tatra pātārtham iva hare sāsūyaṃ doṣāviṣkaraṇaparam_ || 44 ||

siṃhāsanād asahanaḥ sahasojjhihāsu- r utsāhasāhasarasena sahasramāyaḥ | haṃsāṃsahārihasitaḥ sahasārihiṃsā- sajjāhavo yudhi jaharṣa jahāsa coccaiḥ || 45 ||

ujjihāsur ujjigamiṣuḥ | sahasā hasitaḥ || 45 ||

saṃrambhaghoratarahuṃkṛtidhūmaketu- hetisphuliṅganikarair aśaniprabhasya | pratyūyire sapadi hāralatā muhūrta- m ātāmraratnanikarair iva dānavānām || 46 || 3. ‘huṃkṛta’ ka. 4. ‘pratyūṣire’ ka. 5. ‘paṭalaiḥ’ kha.

pratyūyire syūtāḥ || 46 ||

kṛtabhuvanavināśāśaṅkahuṃkāragarbhāḥ sapadi paruṣaroṣaviṣkṛteḥ sūciromṇaḥ | madhukarakulanīlacchāyatas tārakāgrā- j jalabhṛta iva vidyunniṣpapātojjvalārciḥ || 47 ||

arcir jvālā || 47 ||

gīrvāṇarājapṛtanāḥ savicittavīrya- sāras tadāhavanirargalacittavṛttiḥ | nācintayatkurucamūr iva pāṇḍusūnu- r uccāvacāstracaturo yudhi vipracittiḥ || 48 || 1. ‘savicitravīrya’ ka.

saha vicittena jaḍena vīryeṇa araṇyatvād asurāṇāṃ (?) vā cetasaiva vipracittir nāmāsuro nājīgaṇat_ | dhanañjaya iva kurupṛtanāḥ | tā api vicittavīryasya dhṛtarāṣṭrajanakasya saṃbandhinā sāreṇāvaṣṭambhena saha vartamānāḥ | uccāvacāni vividhāni || 48 ||

kulagirigarimasthānalpakāyo 'timāyaḥ karakuliśatalenāsphālayan bhūtadhātrīm | gurutarabharatām yaddiggajaskandhapīṭhī- luṭhitavidhurasaṃsthārugṇabandhāṃ cakāra || 49 || 2. ‘lulita—’ ka.

garimastho garimāṇam atyajann analpaḥ kāyo yasya | tiṣṭhatir evam ādau ahānau vartate | yathā ‘samaye tiṣṭha sugrīva mā vālipatham anvagāḥ’ iti | saṃsthā sthitiḥ || 49 ||

cakṣmāyire kṣitibhṛtaḥ karapiṣṭahāra- muktāśilāśakalakarkaśaśarkarābhiḥ | abhyāhatāḥ kṣaya ivāsuracakravāla- niḥśvāsadurdharasamīraparamparābiḥ || 50 || 3. ‘tāra’ ka. 4. ‘karkarābhiḥ’ kha.

cakṣmāyire vidhunitāḥ | ‘kṣmāyī vidhūnane’ | śarkarāḥ kaṇikāḥ || 50 ||

saṃkṣobhavibhramaviśīrṇavikīrṇahāra- muktāphalācchakarakākaṇacakravālam | abhyutpatadditisutastanayitnucakra- m ākrāntakṛtsnabhuvanatritayaṃ tadāsīt || 51 || 5. ‘vaśena’ ka.

viśīrṇaṃ viśarāru kṛtvā vistīrṇāni vikṣiptāni karakā aśanivarṣāṇi | stanayitnur meghaḥ || 51 ||

karatalamalanotthaṃ mantharībhūtabhānu- prabham analam analpajvālamālākarālam | sakalam amaravaṃśaṃ dagdhum utpādayantu kṣayataraṇidurīkṣyaś cukṣubhe kāñcanākṣaḥ || 52 || 6. ‘mandarībhūta’ kha.

jvalatīti jvālaḥ | ‘jvalati kasantebhyo ṇaḥ’ | nuśabda ivārthe || 52 ||

bibhraty udārataramānasadṛśyamūka- śailakṣamārabhasalaṅghanadurdharatvam | mattā valīmukhavarūthavatīva dṛṣṭa daityādhirājagurumatsaravikrīyāsīt || 53 ||

udārataraṃ mānasaṃ yasya tādṛgdṛśyo mūkāsura eva śailo yatra tādṛśaṃ kṣamāyāḥ kṣānter laṅghanaṃ parityāgaḥ | udārataraṃ ca mānaṃ parimāṇaṃ yasya tādṛśasya sataḥ ṛśyamūkākhyasya śailasya kṣamā bhūmis tasyālaṅghanam ākrāntiḥ | mattā viśṛṅkhalā | valīmukhavarūthinī markaṭasenā || 53 ||

teṣām arociṣata cūrṇitapadmarāga- ratnāṅgadaprakarapāṭaladhūlidigdhāḥ | spaṣṭāṭṭahāsacalitātanusaṃdhibandha- viṣyandisāndrarudhirā iva digvibhāgāḥ || 54 || 1. ‘dalitā’ kha.

54 ||

kalmāṣitāmbaratalāḥ pralayāvatāra- śaṅkākulīkṛtajagattrayadṛśyamānāḥ | ulkālatā vavṛṣire vṛṣarājaketu- saṃrambhabhāsurasurāhitadṛṣṭipātaiḥ || 55 ||

vṛṣarājaketau hare saṃrambhaḥ krodhaḥ | surāhitā daityāḥ || 55 ||

viṣyandamānaparipītavipakṣakhaḍga- dhārānipātasalilā iva dānavānām | svedāmbuśīkaramuco vibabhur viśāla- vakṣaḥsthalīṣu vikaṭavraṇakaṃdaraughāḥ || 56 ||

dhārāyamāṇanipātapradhānaṃ salilaṃ chāyāviśeṣaḥ | dhārānipātasalilaṃ cāsārāt pataj jalaṃ tayor abhedam a(dā)dhyavasāyaḥ | viṣyandamānety utprekṣā || 56 ||

āsannasaṃyugatayā sumanībabhūvu- r uccais tarāṃ jahasur āhasatāṃsakūṭān | hārāṃś ca cakṣudurudasthur athāsanebhyo mṛtyor api kṣabhiyo na śaśaṅkire 'nye || 57 ||

sumanībabhūvuḥ prakṛṣṭā jātāḥ | ‘arurmanaścakṣuścetorahorajasāṃ lopaś ca’ iti cvisalopau | āhasata nijaghnuḥ || 57 ||

sabrahmadhūrjaṭiharīṃs tridaśāṃs tṛṇāya vispaṣṭamatsaradhiyo yudhi manyamānāḥ | daityādhipāś cakamire kamalāsanāṇḍa- m utplutya pāṭayitum utkaṭaroṣarūkṣāḥ || 58 || 1. ‘pātayituṃ’ kha.

‘manyakarmaṇy anādare’ ity atra bhāṣye prakṛṣya kutsitagrahaṇasya kartavyatvena sthāpitatvān na tvāṃ tṛṇāya manya iti prayoga itivac caturthīpravartanāt tṛṇāya tridaśān manyamānā iti tatpravṛttiś cintyā || 58 ||

tai rāhukopajanitapratipakṣapakṣa- saṃhārabhītibhir apākṛtadhairyabandhaiḥ | āsthāny asau suraripor bibharāṃcakāra durdharṣatāṃ yadupater iva vṛṣṇisainyaiḥ || 59 || 2. ‘bhūribhiḥ’ kha. 3. ‘durdarśatāṃ’ kha.

rāhoḥ kopena janitā āhukena ca vṛṣṇikulotpannena kenacid upajanitā | āsthānī sabhā yatra janadarśanaṃ vidhīyate | yadupatiḥ kṛṣṇaḥ || 59 ||

itthaṃ ruṣendhanavinākṛtam apy adhūma- m ūrdhvekṣaṇaṃ smararipor iva dagdhakāmam | jajvāla dānavasadaḥ pralayārkabimba- durdarśaghoraghaṭitānalatārakaṃ tat || 60 || 4. ‘durdharṣa’ ka.

adhūmaṃ kṛtvā dānavasado jvalitam_ | kāmaḥ śatror icchā madanaś ca | ghaṭitaḥ saṃnihito 'nalatārakākhyo daityo yatra | ghaṭitānalaṃ ca saṃyuktāgnikaṃ tārakaṃ kanīnikā yasya || 60 ||

vidadhur avasare 'tra daityacakrapralayaparisphuṭapaiśunotthitāni | sakalabhuvanamaṇḍale 'py asaktaṃ bhayam animittaśatāni dāruṇāni || 61 ||

paiśunaṃ sūcakatvam_ | asaktam aviratam_ | animittāny aśakunāni || 61 ||

pratidinam apavargadvārarandhrād amandaṃ dinakṛta iva bimbād argalādīrghadaṇḍāḥ | pratikakubham akalkāḥ petur ulkāḥ kṣayāgne- r bhuvanadahanahelāsūtrapātāyamānāḥ || 62 ||

apavargo mokṣas taddvārasya randhrād iva ravibimbād ulkāḥ patitāḥ | akalkā nirmalāḥ || 62 ||

tvaṣṭṛṭaṅkaghaṭanānikuṭṭitagrāvasāravikaṭāsthisaṃbhavam | dhūmarāśim iva bhānumaṇḍale lagnam aikṣata kabandham āsuram || 63 ||

grāvasāraḥ sudṛḍhaḥ pāṣāṇas tadvad vikaṭāni kaṭhināni | āsuram asurasamūho bhānubimbe ravimaṇḍale lagnaṃ kabandhaṃ rāhum apaśyat_ || 63 ||

nirgacchan rajanikarasya bimbamadhyād utpātaprasaravaśna dhūmadaṇḍaḥ | vaidagdhīṃ kuvalayadāmanīlabhāsaḥ khaḍgasya vyadhita vilagnadattamuṣṭeḥ || 64 || 1. ‘dhūmagaṇḍaḥ’ kha.

64 ||

utpātadhumamalinair nijakopacakra- garbhacyutaiḥ pariṇatiṃ samupeyivadbhiḥ | akīryatāśu kamalāsanapuṇḍarīka- bījair ivāmbaratalaṃ grahacakravālaiḥ || 65 ||

koṣaḥ karṇikā pariṇatiḥ paripākaḥ || 65 ||

abhimukhapatināśāśaṅkayeva pradīptaṃ viviśur analam āśā dāhayuktyā tadānīm | sphuritavikaṭaketuvyāptadikcakravālaṃ gaganam api bhaviṣyatsaṃyugacchāyam āsīt || 66 ||

patyur andhakasya nāśāśaṅkayā diśo digdāhavyājenāgnim ivāviśan_ | ketavo 'nimittasūcakāni jyotīṃṣi dhvajāś ca || 66 ||

kṣubhitaviṣamaveloddāmaratnākarāṇi kṣayataraṇiruco nājīgaṇaṃs tāni daityāḥ | pratikakubham akāṇḍoḍḍāmarākhaṇḍalaśrī- haraṇarabhasakaṇḍūcaṇḍadordaṇḍakhaṇḍāḥ || 67 || 2. ‘kṣatataraṇi’ ka.

ākhaṇḍalasya śrīharaṇe hevāko yatra tathāvidhahevākenodbhaṭayā kaṇḍvā pracaṇḍabhujā daityās tāny animittāni nājīgaṇan na gaṇayāmāsuḥ | ‘ī ca gaṇaḥ’ itītvam abhyāsasya || 67 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye andhakāsurasabhākṣobho nāma catustriṃśaḥ sargaḥ ||

iti rājānakajayānakasūnor alakasya kṛtau haravijayaviṣamapadoddyote catustriṃśaḥ sargaḥ ||