trayastriṃśaḥ sargaḥ|
daityādhipaḥ śrutataduktavacaḥ prapañca-
sāsūyamānasatayātha sitasmitaśrīḥ|
prastāvamantikasado bhṛgunandanasya
vaktuṃ dideśa madhuroddhṛtayā bhruvaiva||1||
abhyunmiṣatkanakaśṛṅkhalacakravāla-
raśmicchaṭāpaṭalavicchuritāṃ dadhānaḥ|
kālīṃ kalindatanayāmiva dehakānti-
mullāsitakāliyaphaṇāmaṇirāgabhinnām||2||
(yugalakam)
taccoditaḥ sa daśanaprabhayā surārī-
nandrīnmṛgāṅka iva candrikayā vilimpan|
dūtaṃ śaśāṅkaśakalābharaṇasya vākya-
mitthaṃ vimṛṣya śanakairuśanā babhāṣe||3||
āsannavartidanujendraśarīrakānti-
kalmāṣitā tanuradṛśyata tasya gaurī|
svacchātmatāsphuṭataravratapītakukṣi-
bhāgasthadhūpamaṭaleva sabhātalasthaiḥ||4||
durvāravīryakaradīkṛtaviṣṭapasya
sā yasya paśyati mukhaṃ caraṇāśrayā śrīḥ|
nūnaṃ natipravaṇadurjayalokapāla-
pālīkirīṭamaṇidarpaṇamaṇḍalīṣu||5||
ābhāti yasya namitākhiladiglatāgra-
candrātapāmalayaśaḥstabakojjvalaśrīḥ|
śauryadrumo bhuvanakānanasīmnyarāti-
sīmantinījanajaṭādṛḍhamūlabandhaḥ||6||
preṅkhatkarālakiraṇaprakarā ca yasya
hastāravindaghaṭitā karavālavallī|
baddhapratiṣṭhanadarājasutākarābja-
lobhātpatadbhramarapaṅktirivābabhāse||7||
saṃbhramya yaṃ praṇamatāṃ maṇipādapīṭha-
nirgharṣaṇādiva lalāṭataṭasthalībhyaḥ|
daityadruhāṃ guruṇi satyapi nābhimāna-
bīje 'bhyudaiyata punarbhrukuṭīlatābhiḥ||8||
śyāmībhavatyanudinaṃ ripumaṇḍalasya
yasyāhae viracito niśitāsipāṇeḥ|
ākrāntadigvalayasainikacakravāla-
nirdhūtabhūtalaparāgahateva kīrtiḥ||9||
yena vyalokiṣata saṃyati vṛtraśatru-
līlānirastakuliśāgniśikhā vilagnāḥ|
bāhudrumeṣu rucirāṅgadapadmarāga-
ratnaprabhābhramavisaṃbhramamāhaveṣu||10||
helāvinirjitaharerna puro 'bhidhātu-
masyāsti te 'tra gaṇakheṭa khaṭuṅka śaṅkā|
itthaṃ isargataralapramathaplavaṅga-
saṃsargadurlalitatāsuvacaṃ vacaḥ kim||11||
(saptabhiḥ kulakam)
prāgdarśitāsuravināśavibhīṣikeṇa
mādhuryasaṃbhṛtiviśe.ajuṣā ca paścāt|
saṃdeśadānavacasā śabalena te 'tra
cetaḥ kṛtaṃ kimapi naḥ pratipattimūḍham||12||
durlaṅghyasāragahanāsu raṇāṭavīṣu
sthāṇāvivāśu vivaśaṃ vinipatya yasmin|
cakre 'bhyupeyuṣi vivartanabhāji bhaṅgaṃ
śārṅgāyudho vighaṭamānamanoratho 'bhūt||13||
anyaḥ sa eṣa bhujavajradṛḍhābhighāta-
niṣpiṣṭaśātravakulācalacakravālaḥ|
yenojjhitā yudhi dayāmṛdunātinamrā
yāthārthyamāpuramarāḥ prathitasya nāmnaḥ||14||
asyārivaṃśadāhanānuguṇapratāpa-
cchāyaikadeśalavaleśamapūrayiṣyat|
dhāmādhipo jagati yadyabhaviṣyadeṣa
na tvaṣṭṭaṭaṅkavinikuṭṭanaghaṭṭitaujāḥ||15||
vaktraṃ yathā smitavikāsikapolabhitti
dhatte na vakti ca yathā sphuṭameṣa kiṃcit|
manye bhaviṣyati tathā suracakravāla-
dāvānalaḥ sphuritahetiśikhāsahasraḥ||16||
dūre 'stu tāvadathavaiṣa surendralakṣmī-
masyānugeṣvapi mahatsu harirna labdhā|
pattrairapi kṣitiruhaḥ pratibaddhavṛtti-
rāsādayatyavanimuṣṇakarātapaḥ kim||17||
adhyāsitāṃ puramimāmasuronnatena
saṃbibhrataḥ prathitamānaparigrahatvam|
na hrepayanti danusūnubhaṭānpragalbha-
mete kimarkakiraṇā api laṅghayantaḥ||18||
chāyāvibhaṅgakaluṣaḥ kriyate yadindu-
ruṣṇatviṣānudivasaṃ pratikāraśūnyaḥ|
nirdahyate jalanidhirvaḍavāgninā ca
tajjāḍyajṛmbhitamavaimi tayorvigarhyam||19||
kāmaṃ bhavanti śataśo jagatīha kulyā-
stulyānubhāvabalatā kuta eva teṣām|
āliṅgyate tadatiriktaguṇodayaśrī-
ryatsaṃpadā tadapi vācyapadaṃ jaḍānām||20||
kālakramādadhigatodayamekato 'pi
bījāṅkurātsapadi yātamadhīmukhatvam|
vallīkulāya kimasūyati mūlajāla-
mūrdhavakāśaracitasthitaye tarūṇām||21||
pātālamandiratale kimivātra kṛtya-
manyairvyatītagaṇanaiḥ phaṇināṃ śirobhiḥ|
ślāghyaṃ tadekamapi śeṣaphaṇāsahasra-
mūrvīṃ bibharti yadaśeṣagirīndragurvīm||22||
viṣpandaśītarucinirjharavāridhauta-
dikkāḥ sahasragaṇanā nanu santi śailāḥ|
kṣmāpīṭhadhāraṇasahāḥ katicittu nūna-
mavyāhatasthitikulavyapadeśayogyāḥ||23||
daityādhipaḥ smitamukho visasarja sorja-
māvarjito 'ti dayayā yudhi jīvato yān|
rūḍhatrayā vada rasātalatāluvāsa-
marhanti te kimamarāḥ kimathāsurendrāḥ||24||
ityūjcuṣi tridaśavairigurāvamarṣa-
garbhaṃ vidhūnitaśirāstripurāridūtaḥ|
tuṅgābhimānagirinirjharajhāṃkṛtena
vākyena pūritasabhāgṛhamityavocat||25||
kiṃ kathyate balavatī bhavitavyatātra
śocyaṃ sabhātalamidaṃ danujādhipasya|
yasyāsi vatsarasahasranipītagāḍha-
dhūmāndhakāritamatirgurutāmupāsthāḥ||26||
mā bhūtparasparavirodhisurāsuraugha-
saṃmardaduḥsthitamidaṃ jagadapyaśeṣam|
uktaṃ mayeti yadanujjhitakṛtyavastu
tadbāliśena bhavatāparathā gṛhītam||27||
sarvatra vastu vitathapratibhāsameva
niḥsaṃśayaṃ bhavati viplavamandadṛṣṭeḥ|
mandākinīsalilamindumarīcigaura-
mutprekṣyate kṣatajamityaniśaṃ piśācaiḥ||28||
abhyudvahandhavalatāmapi śītaraśmi-
śobhādharāmahitapakṣagataḥ surāreḥ|
atyantavakrahṛdayo raṇarāgameva
śaṃsanvirājasi na śaṅkha iva tvamittham||29||
nindyānapi stuvata eva guṇānubhāva-
vandhyānadhikṣipata eva vimūḍhavṛtteḥ|
duḥsvāminastanubhṛtāmatidainyabhājaṃ
bhāvānuvṛttirasikāmanujīvitāṃ dhika||30||
saṃpratyamī budhajanasya na cittavṛtti-
māhlādayanti bhavato 'bhihataprakāśāḥ|
adyāpi kukṣikuharāspadapītadhūma-
śyāmīkṛtā iva bhṛgūdvaha vāci varṇāḥ||31||
antardadhatkaluṣatāmapi jihmavṛtti-
rāviṣkaroti guṇameva bahiḥ prakāmam|
kukṣipraviṣṭaviṣasaṃhatiruttamāṅga-
ratnaprakāśamiva gūḍhapado vimūḍhaḥ||32||
vyaktaṃ samāśrayavaśādiha tatsvarūpa-
śūnyo 'pi tatprakṛtitāṃ bhajate jano 'yam|
śvāsānilaḥ saralatāmupayāti veṇau
śaṅkhodare kuṭilatā punarasya siddhā||33||
yasyātatāyihṛdayāni nadanbibheda
niḥśvāsavātamukharīkṛtarandhramārgaḥ|
saṃkrāntakukṣikuharāspadasaptasindhu-
saṃghaṭṭaghorataraghoṣa ivāśu śaṅkhaḥ||34||
preṅkhatkarāṅguliśikhāgravivṛttivega-
vātāhatā jalabhṛtaḥ kakubhāṃ mukheṣu|
cakrasya yasya kiraṇaiśchuritāḥ karāla-
dhārānikṛttadinakhaṇḍaruco nipetuḥ||35||
līlā harerabhṛta yasya kaṭhorakopa-
huṃkārapāvakaśikhā vadanātskhalantī|
niḥśvāsadhūtahṛdayāspadagūḍhanābhi-
padmocchvasatkapiśakesaradhūlilīlām||36||
yasya sthitaṃ karahatastanapṛṣṭhasīma-
sīmantinīruditaśabdakṛtānubandhaiḥ|
adyāpi pallavitapūritapāñcajanya-
śaṅkhasvanairiva mahāsuragehagarbhaiḥ||37||
tasyādhipāṇi surayauvatavaktrapadma-
vispaṣṭahāsaghaṭanācaturārkabimbam|
draṣṭāsi kaiṭabhariporasurendrakaṇṭha-
pīṭheṣu cakramacirātparivartamānam||38||
(pañcabhiḥ kulakam)
nāpnoti yasya yudhi dānavahetighāta-
mūrcchāndhakārapaṭalaṃ hṛdaye 'vakāśam|
grāsīkṛtoragasahasraphaṇapratiṣṭha-
māṇikyaraśmibhiriva pravilupyamānam||39||
ucchvāsikāñcanapatattrasamīravega-
visraṃsitaṃ nabhasi śītamarīcibimbam|
yenāṇḍakhaṇḍa iti nirdudhuve 'ṅgalagna-
mākampitatribhuvanaṃ bhramatāhaveṣu||40||
adyāpi pakṣapavano bhramatīha yasya
pātālavartmani javena viceruṣaḥ prāk|
vaidhavyaviklavabhujaṅgavadhūsahasra-
sāsrānubandhaguruniḥśvasitāpadeśāt||41||
pratyagrasaurabhabharākulitadvirepha-
mālāhaṭhāhṛtasudhārasaśīkarārdrāḥ|
bibhratsudhautakaladhautapatattrapaṅktī-
rjvālāvalīriva sadhūmaśikhāḥ kṛśānuḥ||42||
tārkṣyo yudhi svakaralūnapatattramukti-
saṃmānitasphuradamoghanipātavajraḥ|
nīlābhrakacchavimuṣaḥ kusṛtipragalbhā-
nekaḥkṣaṇātsa dalayiṣyati bhogino vaḥ||43||
(pañcabhiḥ kulakam)
niḥśeṣalokaparivartavinodadakṣa-
dakṣārirūkṣatarasā gaṇasenayaite|
yāsyanti kāmapi daśāmasurā virugṇāḥ
saṃhāramārutaparamparayeva śailāḥ||44||
diksyandinīṣu suravāraṇadānapaṅka-
śyāmīkṛtātapajalāsu vipannapakṣāḥ|
mattā mahāsurajhaṣāḥ paridṛṣṭakaṇṭha-
cchedā bhavanti na cireṇa samucchvasantaḥ||45||
tiṣṭhantu tāvadatha vākhilasaptaloka-
saṃcāracāturajuṣaḥ pramathādhināthāḥ|
dordaṇḍayantraparivartitaratnasānuḥ
pātālavāsmahameva karomi kiṃ vaḥ||46||
iti kathayati rūkṣālāpagarbhaṃ gaṇendre
dititanayapatīnāṃ krodhasaṃrambhahetoḥ|
karatalahataratnastambhapaṅktiḥ sabhā sā-
vamaragiritaṭīvoddhūtakalpadrumāsīt||47||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye bhārgavanirbhartsanaṃ nāma
trayastriṃśaḥ sargaḥ||