||śrī gaṇeśāya namaḥ||

atha tām aviśan nīlamaṇimandirasaṅkulām_ | vindhyabhūmim iva vyaktagaṇḍaśailāṃ gaṇābhdhipaḥ || 1 || padmarāgamayāṭṭālaprakāśena prathīyasā | gaganāmbhodhigarbhaurvavahninā racitaśriyam_ || 2 || vicittrasthānakopetāḥ sukumārāṅgavartanāḥ | nṛtte cittre ca dadhatīm ākṣiptahṛdayāḥ striyaḥ || 3 || paurais sadāśeṣabhogabhāgbhir vaikuṇṭhavibhramam_ | bibhradbhir āhitābhikhyāṃ samudragṛhakāspadaiḥ || 4 || dadhatīṃ madhyamagrāmamūrchanāprakriyām iva | sakalopanatodārapauravīracitāṃ śriyam_ || 5 || pravālapāṇibhir vallīḥ pāṇipadmaiś ca yoṣitaḥ | padmānanaiś ca nalinīr bibhratīm apaśobhitāḥ || 6 || ¯¯¯¯ talpalopāttamanoharataratviṣam_ mātaṅgapṛṣṭhavaṃśorvīm iva vistṛtadīrghikām_ || 7 || bibhradbhir geyavaidagdhīm upakaṇṭhakṛtāspadaiḥ | tālākṣaracitābhikhyaiḥ kānanair upaśobhitām_ || 8 || sasūkṣmatilakāṃ vṛkṣacchāyāṃ gārutmatīm iva | giraṃ ca sāmṛtodgārāṃ dadhatīr dadhuṣīṃ striyaḥ || 9 || antaryuktān mahāmātraiḥ patadgrahaśatākulān_ | niśāntāndadhatīm arkakṛtānakaluṣatviṣaḥ || 10 || adṛṣṭanigrahasthānāṃ prauḍhavādavidām iva || sadācāryāhitacchāyāṃ ṛttalīlāviḍambinīm_ 11 || bhinnaṃ layam iva tredhā drutamadhyavilambitam_ | valibhaṅgaṃ dadhānābhiḥ kṛtaśobhāṃ purandhribhiḥ || 12 || daśanenduprabhālokais svacchamānasanirjharaiḥ | madanastavakodbhedais strīṇāṃ hāsair virājitām_ || 13 || naktaṃ nakṣatramālābhiḥ kṛtamūrdhavibhūṣaṇaiḥ | alindā nākulaṃ harmya gajair bibhradbhir ācitām_ || 14 || satkāñcanaparīkṣāyāḥ sadṛśīṃ dṛṣṭihāriṇīm_ | nikaṣopalasallekhām adabhrāṃ bibhratīṃ śriyam_ || 15 || śubhaprastāvanāhṛdyāṃ prakhyātodāttanāyakām_ nānārthaprakṛtiślāghyāṃ nāṭakaprakriyām iva || 16 || vyāptāṃ kṛtayugasthāsvasthiti bhogibhir uddhataiḥ | rathasaṃsthām ivoṣṇāṃśo rathyāvalivirājitām_ || 17 || anāptagotraskhalanām avipakṣām iva striyam_ | guruprakṛtivistārāṃ vīṇāvādyavidhām iva || 18 || sārdhacandrapatākatvaṃ dadhatas tena vīkṣitāḥ | tasyām asaṃyutā hastāṃ iva devagṛhāḥ puraḥ || 19 || vyaloki vismayavatā śubhamadhyamadarśanāḥ|| sīmantinījanas tena dadhan mādhyamikaśriyam_ || 20 || sa kāñcanojjvalas tasyāṃ visphuranmaṇibandhanāḥ | alaṅkārāvalīr bāhulatāś caikṣata subhruvām_ || 21 || prāptānalasanāthatvaṃ tena tatra gṛhāvalī ||| paṭalopahṛtacchāyā damayantīva vīkṣitā || 22 || tenaikṣyata sudhāpāṇḍucchāyāsanmālanasālayā | nagaryā dadhatī sāmyaṃ krītākamalinī puraḥ || 23 | mahān apy anahaṅkāraprasūtir avalokitaḥ | tārako py amunā bibhral loko nakṣigataḥ śriyam_ 24 || vidagdhamaṇḍalīm ārād goṣṭhībandhamanoramām_ sadākṛtigaṇopetāṃ sadvṛttiṃ sa vyalokayat_ || 25 || tenāṅganājanas tasyām anapekṣitabhūṣaṇaḥ | svarūpaśobhayākrāntaḥ śakrahasta ivekṣitaḥ || 26 || jaharṣa sāmānyaguṇadravyasaṃyogasusthitām_ tāṃ kaṇavratasiddhāntaprakriyām iva vīkṣya saḥ || 27 || saṃkrāntayāñjanacchāyadehapratimayātha saḥ | praviśansphaṭikāgārān aindranīlān ivākarot_ || 28 || apūrvadarśanākutakutūhalavaladdṛśaḥ | ditijāstaṃ visṛṣṭānyakartavyā niravartayan_ || 29|| tatparijñānaśūnyena cetasāhitakautukāḥ| papracchur maṇḍalībandhaiḥ ko yam ity asurā mithaḥ || 30 || anyair vijñāyamānatvād anyasyābhiniveditām_ | sa śṛṇvann ātmano bhikhyāṃ rājamārgān alaṅghayat_ || 321 || muktāpravālavaidūryaprāyaratnapariṣkṛtāḥ | jahau niṣadyāvīthīs sa sindhuvelāviḍambinīḥ || 332 || prāptavān atha daityendrasiṃhadvāraṃ vibhūtimat_ trailokyasanniveśasya pratyādeśam iva sthitam_ || 33 || sanāgayakṣadaiteyavasvādityamarudgaṇam_ anekāś caryasandohaṃ viśvarūpam iva sthitam_ || 34 || nā|nāsuragaṇākīrṇaṃ purīdarpaṇabhūtale | adṛṣṭapārasaṃsārapratibimbam ivotthitam_ || 35 ||

tilakam_||

vikāsikiṃśukacchāyād vanād iva vibhāvasoḥ | tatkṣaṇāpahṛtān pattraśukān aikṣata savyathaḥ || 36 || candrāṃśugaurasatpaṅkṣabālabhārān pracetasaḥ | dadarśa vāhahaṃsāṃś ca cāmarāṃś ca hṛtān asau || 37 || caturdiksphaṭikāgāraprabhākṣīrapariplutam_ | dadarśa coccaiś śravasam uttiṣṭhan tam ivodadheḥ || 38 || trailokyalakṣmyās sa dadhallīlādolām ivāgrataḥ | vilolamuktāprālambavyājenaikṣata toraṇam_ || 39 || dadarśa toraṇāmuktāś caṇḍīsiṃhasaṭārvalīḥ | utpātendukalā daityapralayāśaṃsinīr iva || 40 || adṛṣṭapāraparyantān arpaṇīyakarān asau | dadarśa vividhān rājño digvibhāgān ivāgatān_ || 41 || utkhātaśeṣamāṇikyakaṇṭhakāśūnyakandharān_ | rabhasāliṅgitasvasstrīstanavāsābilorasaḥ || 42 || bhartuḫ prasādalabdhāni devayānāni satvaram_ nirgatyārohato daityarājaputrān dadarśa saḥ 43

yugalakam_||

athādhibhūmi vinyastakarajānubhir ādarāt_ | nyavedyata dvāragataḥ sa bhartre pratihartṛbhiḥ || 44 || avajñācirasaṃbodhamuktayaitviti tadgirā | nirdiśyamānamārgasthais sa daityendrasado viśat_ || 45 || bhāsvanmaṇiśirodaityabhogimaṇḍalasaṅkulam_ | taddehamalinacchāyātimiraplavapūritam_ || 46 || vaidūryakuṭṭimacchāyajalanirbharasamplavam_ praviṣṭaḥ kṣaṇam aikṣiṣṭa pātālam iva tatsadaḥ || 47 || (yugmam)

yugmam_||

tatra siṃhāsanāsīnāṃ tamālaśyāmalatviṣam_ | sphuraddaṃṣṭrānanāṃ mūrtiṃ kauśikīm iva bibhraratam_ || 48 || kuṇḍalāspadaratnāṃśubālātapavilaṅghitam_ | bibhrāṇam animitte pi roṣāruṇam ivānanam_ || 49 || cāmarādhūnanavyagrakarapaṅkajayāniśam_ | niṣevyamānam abhitas trailokyavijayaśriyā || 50 || bibhrāṇaṃ śoṇamāṇikyabhūṣāṃśucchuritaṃ vapuḥ | aśāntavajrasaṃpātavahniśeṣam iva kvacit_ || 51 || jayakuñjaranakṣatramālām amalamauktikām_ | dadhataṃ vikaṭāṃ hāralatāṃ pīnena vakṣasā || 52 || diṅnāgadānaviṣyandakṛtapattrāṅkuraśriyaḥ | bibhrataṃ bhuvanābhogavanatālatarūn bhujādn_ || 53 || keyūrāsitaratnāṃśujaladhārāś ca bibhratam_ | vajrānalaśikhādāhaśāntihetor iva srutāḥ || 14 || urassthale niṣaṇṇāyā datnaparyaṅkavibhramam_ | bibhrataṃ diggajādhīśadantabhaṅge suraśriyaḥ || 55 || dadarśāndhakam ābaddhaṃmadhyaṃ kanakaśṛṅkhalaiḥ | nitambaparivṛttārkaraśmirekham ivācalam_ || 16 ||

navabhiḥ kulakam_||

trailokyaśrīkareṇostamālānībhūtadordrumam_ vilokyeṣannataśirā vinayāt praṇanāma saḥ || 17 || atha bāhuṃ prasāryārād diṅnāgakarapīvaram_ | ita ity asurendreṇa nirdiṣṭaṃ svayam antike || 58 || hemapīṭham asau cittraratnajālapariṣkṛtam_ adhyāsta lokasaṃvartamegho merum ivonnatam_ || 59 ||

yugalakam_||

avalambhitasatkāraṃ tam uvācāndhakāsuraḥ | dantajyotsnācchalenāriyaśaḥpītam ivodgiran_ || 60 || gaurīvigrahasandhānasamāsāditanirvṛteḥ | gaṇeśa kuśalaṃ kaccid avyāhati pinākinaḥ || 61 || cireṇa bata kenāpi hetunā smṛtigocaram_ āgacchāma vayaṃ śaṃbhor yeneha tvāṃ vyasarjayat_ || 62 || jayalakṣmyopagūḍhasya purā jitamarutvataḥ | na mamāṅgeṣu sañjātas tādṛśaḫ pulakodgamaḥ || 63 || nirvyājaprītipiśunaḥ śaśiśekharaśāsanāt_ | īyuṣi tvayi sauhārdarasasyandini yādṛśaḥ || 64 ||

yugalakam_||

ime vajakaṇā harṣasphuradraṇamukhotthitāḥ | romāñcodgamakārkaśyam aṅgeṣv adhikayanti me || 65 || saptalokādhipatyena na tayonnatim āgatāḥ | yathāviṣkṛtasadbhāvabhavasambhāvitā vayam_ || 66 || kartavyaṃ tan na paśyāmi kṛtakṛtyo pi dhūrjaṭiḥ | yac cetasi nidhāya tvaṃ prāhiṇodas madantikam_ || 67 || tadādeśaya sandeśam indumauler vivakṣitam_ kutūhali dadāty asmān mano nodāsituṃ yataḥ || 68 || ity ukte tena dantāṃśupuṣpitādharapallavaḥ | avāptāvasaro vaktuṃ dūta ity upacakrame || 69 || kalyāṇīṃ giram utsraṣṭuṃ viralā eva jānate | satyāṃ rekhāṃ vilikhituṃ citrakarmavido yathā || 70 || yad evam ādarārūḍho bahumānāspadaṃ tvayā | kriyate kuśalapraśnas tenādya kuśalī vibhuḥ || 71 || yaśoṃśubhāsuracchāyaḥ kṣatadaurgatyaviplavaḥ | vibhāty anarghaḥ saṃsārasāgaraikamaṇirbhavān_ || 72 || sārambhatve pi satataṃ vispaṣṭaparighaṭṭanam_ | tava jātaṃ dviṣaccakraṃ śuṣkaṃ geyam ivāpadam_ || 73 || tvayā naiyāyikeneva satpakṣāśrayaśālinā | hetau vidadhatā yatnaṃ parapakṣo nirākṛtaḥ || 74 || uparyeva tava sthāsnu śaraccandrāṃśupāṇḍuram_ | yaśaś chattram ivābhāti cchattraṃ yaśa ivojjvalam_ || 75 vaidagdhīṃ bibhṛyuḥ śailā nissīmitamarutvataḥ | vajrānalaśikhājālapluṣṭapakṣāḥ kathaṃ nu te || 76 || sphuraty adhitaṭaṃ sindhoryāmuktākiraṇacchaṭā | sā vaḥ saṅkocitāristrīmukhābjā kīrticandrikā || 77 || pluṣyaty arīn pratāpas te nirvāpayati cetarān_ || dāhātmakatvam adhikaṃ vahnaier aikāntikaṃ punaḥ || 78 || krūre pi mārdavopetā vāmācāre pi dakṣiṇāḥ | pāpe pi śuddhamatayas tvādṛśā bhuvi durlabhāḥ || 79 || anekajanyaśobhī tvaṃ bhartālaṅkṛtavigrahaḥ | tvamūhithāmuktakarām asaṅgo pi jayaśriyam_ || 80 || daśām anuguṇāṃ dagdhvā nādhāraṃ tāpayaty alam_ | na snehaṃ kṣapayaty uccair vaṃśadīpo paro bhavān_ || 81 || vyajeṣṭhā gocarātīta guṇagauravato dhikam_ agādham api dugdhābdhiṃ surāsuraviloḍitam_ || 82 kathaṃ śaśadharādhīnavṛddhikṣayatayāniśam_ sādṛśaṃ tava dugdhodasindhunā yaśaso bhavet_ || 83 || viralās tvādṛśā loke dordaṇḍadalitadviṣaḥ | nirdagdhāśeṣabhuvanāḥ kiyanto vahnayaḥ kṣaye || 84 || svacchaṃ bimbitaniśśeṣanītisaṅgrahasusthitam_ | tvam eva mānasaṃ dhatse prajñāvibhramadarpaṇam_ || 85 || dordaṇḍadalitoddāmasaṅgrāmārātimaṇḍalaḥ| na bibharṣi guṇottuṅgo garvam anyāsurendravat_ || 86 || guṇāṃs tava girāṃ nātho vakti tenāthavāpy alam_ | sindhos taṭeṣu sikatākaṇān gaṇayitāsti kaḥ || 87 || iti saṃsadi vaktur me citraṃ yat kṣīyate na vāk_ kva vā kāvyavikalpānāṃ guṇānāṃ ca tavāvadhiḥ || 88 || itthaṃ pratāpasampattiparākrāntamahībhṛtaḥ | na kulyotsādanaṃ yuktaṃ tava grīṣmaraver iva || 89 || evam āha vibhurmānya jagatsargasthitikrame|| 89 || niyujya druhiṇopendrāv audāsīnye smi nirvṛtaḥ || 90 || surāsuracamūvaṃśasantānasthitir āsadat_ kaśyapo mānasotpattisammatāṃ parameṣṭhinaḥ || 91 || sa labdhvātmabhuvo nujñāṃ cittrasargacikīrṣayā || upāyatātmano yogyā vidhivaddakṣakanyakāḥ || 92 || danudityaditiṣvāsāmudabhūvaṃs tataẖ kramāt_ | dānavāś caiva daityāś ca devāś ca balaśālinaḥ || 93 || prātikūlikatāṃ matvā mithas teṣāṃ svayambhuvā | vāsaḫ pātālamūle ca sumerau ca vyabhajyata || 94 || praśāntaraṇasaṃrambhaṃ svadharmāvasthitaprajam_ | tena niśśeṣam evāsīt trailokyam anupaplavam_ || 95 || atha durvāradordaṇḍadarpakaṇḍūpratāritaḥ | ācchinaddhāma devānāṃ hiraṇyākṣamahasuraḥ || 96 || sa jaghne suraśatrūṇāṃ miṣatāṃ kroḍamūrtinā | trailokyopaplavārakṣābaddhakakṣeṇa śauriṇā || 97 || ninye ca marutāṃ patyur nihatyāsuramaṇḍalam_ trailokyaśrīḥ punar līlācāmaravyagrahastatām_ || 98 || yāte kāle tha durvāradarpakaṇḍv atidurdharaḥ || hiraṇyakaśipur jiṣṇos tām etya punar ācchinat_ || 99 || tadvakṣo dadaradvajradhārādalanakarkaśam_ nṛsiṃhamūrtir nakharair nakharāgrair janārdanaḥ || 100 || ittham anyāṃś ca jagato vipravakartṝn mahāsurān_ anayaddīpacakrāgnijvālāpañjarayantraṇām_ || 101 || jyotsnā candrakrameṇaiva kṣīyate vṛddhim eti ca | śūrāṇāṃ tu raṇe kīrtir gatā na vinivartate || 102|| tadarhanty adhunā prāgvad avigrahaparigrahāḥ| rasātalanivāsena saṃvibhāgaṃ mahāsurāḥ || 103 || pureva lokapālānāṃ daityānāṃ ca niratyayā | anāviṣkṛtasaṃrambhā sthitir astu yathāyatham_ || 104 || dhāmāny adhyūṣuṣām itthaṃ premṇā nijanijāni vaḥ | santv āviṣkṛtavisrambhāḥ parasparagṛhāgamāḥ || 105 || gāsati tvayi pātālaṃ tridivaṃ ca purandare | sasurāsuracakrasya trailokyasyāstv anāmayam_ || 106 || nivartite virodhe pi yuvayor adhunā mithaḥ | apahastitaniśśeṣavairaṃ prema vivardhatām_ || 107 || atisaṅgharṣatas sindhumandārācalayoḥ purā | prāk kālakūṭasambhāraḥ paścād amṛtam utthitam_ || 108 || iti sthite samutsṛṣṭavigrahaikarasasthiteḥ | marutvatā samaṃ manye sakhyameva tava kṣamam_ || 1049 || yasya hāralatānyāsabhāsurā phenasaṃhatiḥ | vyāvartamānā namuceḥ kaṭhinaṃ kaṇṭham acchinat_ || 110 || yasyādyāpi dadhaty ete vajravicchinnapakṣatīḥ | sābhrāḥ pārśvabhuvo baddhavraṇapaṭṭā ivādrayaḥ || 111 || yasyāntarvajradahanajvālājālam ivojjvalam_ | cakāra nīrasaṃ daityanārīhṛdayamaṇḍalam_ || 112 || taṃ dordaṇḍamadoddāmadaityadānavasūdanam_ | vajrodbhāsikaraṃ ko vā mittraṃ na bahu manyate || 113||

cakkalakam_||

surais sahāmarākrīḍakalpavallīgṛheṣu vaḥ | āpānagoṣṭībandhena bandhuprītir vivardhatām_ || 113 || sadānanirjhareṣv ārād gaṇḍaśaileṣu dantinām_ | anāyasamukhās tāvan nipatantu śilīmukhāḥ || 114 || avāptanarakāsaṅgā mānubhūvanmahāsurāḥ || krūrāsipattrasaṃpātanirargalakadarthanām_ || 115 || suraditisutadaityakanyakānāṃ sarabhasam āplutikelilīlayāmbhaḥ | bhavatu kucataṭīnitambabimbaskhalanavijarjaramambarāpagāyāḥ || 116 || ity abhyudīrya giram ujjvaladantaratna- niryatprabhādhavalitāṃ virarāma dūtaḥ| tasthau taduttaraviśeṣaparīpsayā ca daityādhipasya vadane vinidhāya dṛṣṭim_ || 118 ||

iti śrīmahākavirājānakaratnarviracite haravijaye mahākāvye dūtavyāhāro nāma dvātriṃśas sargaḥ ||