dvātriṃśaḥ sargaḥ |

atha tām aviśannīlamaṇimandirasaṃkulām | vindhyabhūmim iva vyaktagaṇḍaśailāṃ gaṇādhipaḥ || 1 ||

nīlamaṇayo marakatāni || 1 ||

padmarāgamayāṭṭālaprakāśena prathīyasā | gaganāmbhodhigarbhaurvavahninā racitaśriyam || 2 ||

aṭṭālās tricaturapurāṇi harmyāṇi || 2 ||

vicitrasthānakopetāḥ sukumārāṅgavartanāḥ | nṛtte citre ca dadhatīm ākṣiptahṛdayāḥ striyaḥ || 3 || 2. ‘citte’ kha.

sthānakam ālīḍhādi vapuṣaḥ saṃniveśaviśeṣaḥ | citre 'pi pṛṣṭhāgatādyaṅgānāṃ vartanā tadveṣṭitā yā valanā (?) āsūtraṇāni ca | ākṣiptaṃ hṛtam_ || 3 ||

pauraiḥ sadāśeṣabhogabhāgbhir vaikuṇṭhavibhramam | bibhradbhir āhitābhikhyāṃ samudragṛhakāspadaiḥ || 4 ||

aśeṣā bhogāḥ samagrāṇi sukhāni śeṣasya cānantasya bhogaḥ śarīram_ | samudraṃ pratīhāraniyantritaṃ gṛham eva gṛhakam_ | anye ‘samudragṛhakam iti dīrghikālaṃkṛtaveśmanaḥ saṃjñā’ ity āhuḥ | samudra eva gṛhaṃ tasya kaṃ salilam_ || 4 ||

dadhatīṃ madhyamagrāmamūrchanāprakriyām iva | sakalopanatodārapauravīracitāṃ śriyam || 5 ||

pravālapāṇibhir vallīḥ pāṇipadmaiś ca yoṣitaḥ | padmānanaiś ca nalinīr bibhratīm upaśobhitāḥ || 6 || 1. ‘nalinīṃ’ kha.

mūrcchanāḥ sāraṇāḥ | paurāś ca vīrāś ceti dvandvaḥ | taiḥ sakalair gītayuddhādikuśalaiḥ samagrair vopanatair itastataḥ prāptair udārais tyāgibhiś citāṃ vyāptām_ | kalopanatā pauravī ca mūrcchanābhedau | tābhyāṃ ca racitām_ || 5 || 6 ||

aśasā(bhūyasā) talpalopāttamanoharataratviṣam | mātaṅgapṛṣṭhavaṃśorvīm iva vistṛtadīrghikām || 7 ||

aśasā (?) bāhulyena talpānāṃ mahāveśmanāṃ lopo vināśas tadabhāvo 'talpalopam_ | arthābhāve 'vyayībhāvaḥ | tenāttā śrīr yayā | talpalā ca vaṃśasya pārśvabhāgaḥ | tenopāttā gṛhītā | vaṃśo nāḍiś ca | vistṛtā dīrghikāḥ puṣkariṇyo yasyām_ | vistṛtā cāsau dīrghā cāsāv iti ca samāsaḥ | dīrghaiva dīrghikā || 7 ||

bibhradbhir geyavaidagdhīm upakaṇṭhakṛtāspadaiḥ | tālākṣaracitābhikhyaiḥ kānanair upaśobhitām || 8 ||

upakaṇṭhaṃ samīpaṃ kaṇṭhasya ca samīpam_ | tālās taruviśeṣāḥ akṣā vibhītakās tai racitā | cañcupuṭāditālagataiś cākṣaraiś citā vyāptā || 8 ||

sasūkṣmatilakāṃ vaktracchāyāṃ gārutmatīm iva | giraṃ ca sāmṛtodgārāṃ dadhatīr dadhuṣīṃ striyaḥ || 9 || 2. ‘vṛkṣacchāyāṃ’ ka.

sakṣmatilakam amṛtodgāraṃ ca gāruḍaṃ śāstram api || 9 ||

antaryuktān mahāmātraiḥ patadgrahaśatākulān | niśāntān dadhatīm arkakatānakaluṣatviṣaḥ || 10 ||

mahāmātrair analpadhanair antaryuktaṃ yogo yeṣām_ | prabhāta iva ............ samādhānasamayaḥ | patadgrahāḥ sauvarṇāni niṣṭhīvanapātrāṇi patantaś ca grahāś candrādayaḥ | niśāntā gṛhāṇi rātryavasānāni ca | arkaḥ sphaṭikaḥ sūryaś ca || 10 ||

adṛṣṭanigrahasthānāṃ prauḍhavādavidhām iva | sadācāryāhitacchāyāṃ nṛttalīlāviḍambinīm || 11 || 3. ‘vidām iva’ ka-kha.

nigrahasthānaṃ yatra caurādayo hanyante, asādhanāṅgavacanam adoṣodbhāvanaṃ ca vādiprativādinoḥ parājayahetuś ca | sadbhir ācāryaiḥ sadā ca cārībhir āhitaḥ kṛtaḥ | ‘ekapādapracāro yaḥ sa cārīty abhidhīyate | pādābhyāṃ kramaṇaṃ yat tu karaṇaṃ nāma tad bhavet_’ || 11 ||

bhinnaṃ layam iva tredhā drutamadhyavilambitam | valibhaṅgaṃ dadhānābhiḥ kṛtaśobhāṃ puraṃdhribhiḥ || 12 || 1. ‘vijṛmbhitam_’ kha.

drutaṃ pratanu madhyam udaraṃ tatra vilambitaṃ valīnāṃ bhaṅgaṃ layam iva tridhā bhinnaṃ dhārayantībhiḥ | layo 'py anusvāra(na)rūpadrutādibhedena tridhaiva | yad uktam_—‘tālaḥ kālāntarasthāyī drutamadhyavilambitaḥ | tridhā laya iti prokto badarāmalabilvavat_’ || 12 ||

daśanenduprabhālokaiḥ svacchamānasanirjharaiḥ | madanastabakodbhedaiḥ strīṇāṃ hāsair virājitām || 13 ||

mānasaṃ sarobhedo 'pi | madanas tarubhedo 'pi || 13 ||

naktaṃ nakṣatramālābhiḥ kṛtamūrdhavibhūṣaṇaiḥ | alindā nākulaṃ harmya gajair bibhradbhir ācitām || 14 || 2. ‘gaṇaiḥ’ kha.

nakṣatramālā gajābharaṇam api | ālindān dvāradeśasthalīr ākulaṃ saṃkaṭaṃ kṛtvā aliṃ ca bhramaraṃ dānākulaṃ madavyagraṃ dhārayadbhiḥ || 14 ||

satkāñcanaparīkṣāyāḥ sadṛśīṃ dṛṣṭihāriṇīm | nikaṣopalasallekhāmadabhrāṃ bibhratīṃ śriyam || 15 || 3. ‘sadṛśaṃ’ kha.

nikaṣā samīpe upalasanto lekhāḥ surā yasyām_ | nikaṣopale ca parīkṣāpāṣāṇe satī lekhā rājir yasyām_ | adabhrāṃ prabhūtām_ || 15 ||

śubhaprastāvanāhṛdyāṃ prakhyātodāttanāyakām | nānārthaprakṛtiślāghyāṃ nāṭakaprakriyām iva || 16 ||

śubhasya sukṛtasya prastāvanā prārambhaḥ | śubhā ca sulakṣaṇā prastāvanā nāṭakasya mukham_ | nāyakaḥ svāmī kathāpuruṣaś ca | nānārthī bahuvidhadhanāḥ prakṛtayo 'mātyaprabhṛtayaḥ | nānārthaprakṛtayaḥ pañca bindvākhyāḥ ‘prayojanānāṃ vicchedair yadavicchedakāraṇam_ | yāvat samāptiṃ bandhasya sa bindur iti kīrtitaḥ ||’ ityādyālakṣitāḥ kecana dhamāḥ || 16 ||

vyāptāṃ kṛtayugasthāsnusthitiṃ bhogibhir uddhataiḥ | rathasaṃsthām ivoṣṇāṃśo rathyāvalivirājitām || 17 ||

kṛtayugasaṃbandhinī sthirā sthitir yatra kṛtā ca yugasya rathāvayavasya dṛḍhā sthitir yatra | bhoginaḥ sarpā api | rathyā viśikhā aśvāś ca | rathaṃ vahantīti ‘tadvahati rathayugaprāsaṅgam_’ iti yat_ || 17 ||

anāptagotraskhalanām avipakṣām iva striyam | śubhaprakṛtivistārāṃ vīṇāvādyavidhām iva || 18 || 4. ‘skhalitāṃ’ kha. 5. ‘vidāṃ’ kha.

gotrāḥ parvatāḥ, gotraṃ ca nāma | avipakṣā niḥsapatnīkāḥ | śubhaḥ prakṛtīnāmamātyādīnāṃ vistāro yasyām_, śubhasvabhāvaś ca vistāro nāma dhātur yasyām_ || 18 || kulakam_ ||

(aṣṭādaśabhiḥ kulakam_)

sārdhacandrapatākatvaṃ dadhatas tena vīkṣitāḥ | tasyām asaṃyutā hastā iva devagṛhāḥ puraḥ || 19 ||

ardhacandro vibhūṣaṇaviśeṣaḥ | patākā vaijayantī | ardhacandrapatākākhyau cāsaṃyutau hastau || 19 ||

vyaloki vismayavatā śubhamadhyamadarśanaḥ | sīmantinījanas tena dadhanmādhyamikaśriyam || 20 || 1. ‘vilokya’ kha.

madhyamam udaram_ | darśane locane | madhyamadarśanaṃ ca śūnyavādaḥ | mādhyamikā bauddhabhedāḥ || 20 ||

sa kāñcanojjvalās tasyāṃ visphuranmaṇibandhanāḥ | alaṃkārāvalīr bāhulatāś caikṣata subhruvām || 21 ||

kāñcanena kāñcanavac cojjvalā dīptāḥ | maṇibandhanaṃ hastasya saṃdhir api || 21 ||

prāptānalasanāthatvaṃ tena tatra gṛhāvalī | paṭalopahṛtacchāyā damayantīva vīkṣitā || 22 ||

analaso nāthaḥ svāmī yatra nalena ca rājñā sanāthā sabhartṛkā tadbhāvaṃ prāptā | paṭalaṃ chadiḥ | tenopahṛtā ḍhaukitā chāyā ātapābhāvo yasyāḥ | paṭasya ca vāsaso lopena dvidhākaraṇena hṛtacchāyā naṣṭakāntiḥ | nalo hi pṛṣṭhād ambaram apahārya nagno damayantyā vasanārdhamasinā nikṛtya paridadhat tasyā viṣādahetur āsīt_ || 22 ||

tenaikṣyata sudhāpāṇḍucchāyasanmānasālayā | nagaryā dadhatī sāmyaṃ krīḍākamalinī puraḥ || 23 ||

sudhāvatpāṇḍucchāyāḥ sanmānāḥ śobhanaparimāṇāḥ sālāḥ prākārā yasyāṃ tayā || 23 ||

mahān apy anahaṃkāraprasūtir avalokitaḥ | tārako 'py amunā bibhralloko 'nakṣigataḥ śriyam || 24 ||

mahān buddhiḥ | sāhaṃkārākhyaṃ tattvaṃ na prasūta iti virodhaḥ | uktaṃ hi—‘prakṛter mahāṃs tato 'haṃkāraḥ’ ityādi | avirodhas tu—mahān prabhāvayukto na cāhaṃkāraṃ garvaṃ karotīti | tārakaḥ kanīnikā | so 'kṣigato locanasthito na bhavatīti virodhaḥ | tārakas tu vipadāṃ hantā | anakṣigataś cādveṣya iti na virodhaḥ || 24 ||

vidagdhamaṇḍalīm ārād goṣṭhībandhamanoramām | sadākṛtigaṇopetāṃ sadvṛttiṃ sa vyalokayat || 25 ||

sadā satataṃ kṛtināṃ gaṇaiḥ samūhair upetām_ | santaś cākṛtigaṇāḥ pacādivadasamāptā dhātvādipāṭhāḥ | satī vṛttir vartanaṃ yasyāḥ | atha ca satī vṛttiḥ sūtrāṇāṃ vivaraṇam_ | yathādyatve kāśikā || 25 ||

tenāṅganājanas tasyām anapekṣitabhūṣaṇaḥ | svarūpaśobhayākrāntaḥ śakrahasta ivekṣitaḥ || 26 ||

svasya rūpasya śobhayā svaroś ca vajrasyopaśobhayā krāntaḥ || 26 ||

jaharṣa sāmānyaguṇadravyasaṃyogasusthitām | tāṃ kaṇavratasiddhāntaprakriyām iva vīkṣya saḥ || 27 ||

saṃkrāntayāñjanacchāyadehapratimayātha saḥ | praviśan sphaṭikāgārānaindranīlān ivākarot || 28 ||

apūrvadarśanākūtakutūhalavaladṛśaḥ | ditijās taṃ visṛṣṭānyakartavyā niravartayan || 29 || 1. ‘kartavyaṃ’ kha.

tatparijñānaśūnyena cetasāhitakautukāḥ | papracchur maṇḍalībandhaiḥ ko 'yam ity asurā mithaḥ || 30 || 2. ‘vṛndaiḥ’ ka.

anyair vijñāyamānatvād anyasyābhiniveditām | sa śṛṇvann ātmano 'bhikhyāṃ rājamārgān alaṅghayat || 31 || 3. ‘niveśitām_’ kha.

sāmānyaiḥ sarvasādhāraṇair gaṇaiḥ śauryādibhir dravyeṇa ca dhanena yaḥ saṃyogas tena susthitā sukhenāsitā | sāmānyaṃ jātiḥ | guṇāḥ śuklādayo dravyadharmāḥ | tadādhāro dravyam_ | saṃyogo 'tra samavāyaḥ | taiś ca susthitā sudṛḍhā | kaṇavratasya kaṇādasya siddhānto darśanaṃ vaiśeṣikaśāstram_ || 27 || 28 || 29 || 30 || 31 ||

muktāpravālavaidūryaprāyaratnapariṣkṛtāḥ | jahau niṣadyāvīthīḥ sa sindhuvelāviḍambinīḥ || 32 ||

niṣadyā āpaṇaḥ || 32 ||

prāptavān atha daityendrasiṃhadvāraṃ vibhūtimat | trailokyasaṃniveśasya pratyādeśam iva sthitam || 33 ||

siṃhadvāraṃ dvārasya purataḥ suvistīrṇo deśaḥ | pratyādeśaḥ pratyākhyānam_ | abhibhāvukam ityarthaḥ || 33 ||

sanāgayakṣadaiteyavasvādityamarudgaṇam | anekāścaryasaṃdohaṃ viśvarūpam iva sthitam || 34 ||

nānāsuragaṇākīrṇaṃ purīdarpaṇabhūtale | adṛṣṭapārasaṃsārapratibimbam ivotthitam || 35 ||

daiteyā daityāḥ || 34 || 35 ||

(tilakam_)

4. ‘tilakam_’ kha-pustake nāsti. vikāsikiṃśukacchāyād vanād iva vibhāvasoḥ | tatkṣaṇāpahṛtān pattraśukān aikṣata savyathaḥ || 36 ||

pattraṃ vāhanam_ || 36 ||

candrāṃśugaurasatpakṣabālabhārān pracetasaḥ | dadarśa vāhahaṃsāṃś ca cāmarāṃś ca hṛtān asau || 37 || 1. ‘pakṣma’ ka.

caturdiksphaṭikāgāraprabhākṣīrapariplutam | dadarśa coccaiḥśravasamuttiṣṭhantam ivodadheḥ || 38 ||

candrāṃśuvadgaurapakṣā haṃsāḥ | gauravālās tu cāmarāḥ || 37 || 38 ||

trailokyalakṣmyāḥ sa dadhallīlādolām ivāgrataḥ | vilolamuktāprālambavyājenaikṣata toraṇam || 39 ||

dadarśa toraṇāmuktāś caṇḍīsiṃhasaṭāvalīḥ | utpātendukalā daityapralayāśaṃsinīr iva || 40 || 2. ‘toraṇaṃ’ kha.

dolām iva bibhrāṇaṃ toraṇam aikṣatāpaśyat_ || 39 || 40 ||

adṛśyamānaparyantān arpaṇīyakarān asau | dadarśa vividhān rājño digvibhāgān ivāgatān || 41 || 3. ‘adṛṣṭapāra’ ka.

arpaṇīyam upāyanaṃ dātavyaṃ ca | karaḥ pāṇī rājagrāhyo bhāgaś ca || 41 ||

utkhātaśeṣamāṇikyakaṇṭhakāśūnyakaṃdharān | rabhasāliṅgitasvaḥstrīstanavāsāvilorasaḥ || 42 || 4. ‘utkhātāśeṣa’ ka. 5. ‘kaṇṭhikā’ ka.

bhartuḥ prasādalabdhāni devayānāni satvaram | nirgatyārohato daityarājaputrān dadarśa saḥ || 43 ||

kaṇṭhakaṃ grīvābharaṇam_ || 42 || 43 ||

(yugalakam_)

6. ‘yugalakam_’ kha-pustake nāsti. athādhibhūmi vinyastakarajānubhir ādarāt | nyavedyata dvāragataḥ sa bhartre pratihartṛbhiḥ || 44 || 7. ‘athādi’ kha.

pratihartā pratīhāraḥ || 44 ||

avajñācirasaṃrodhamuktayaitv iti tadgirā | nirdiśyamānamārgas taiḥ sa daityendrasado 'viśat || 45 || 8. ‘saṃbodha’ ka.

bhāsvanmaṇiśirodaityabhogimaṇḍalasaṃkulam | tadehamalinacchāyātimiraplavapūritam || 46 ||

vaidūryakuṭṭimacchāyajalanirbharasaṃplavam | praviṣṭavān athaikṣiṣṭa pātālam iva tatsadaḥ || 47 ||

etv iti tasya daityendrasya vācā gaṇas tatsabhābhāgam aviśat_ || 45 || 46 || 47 || tatretyādinavabhiḥ kulakam_ ||

(yugmam_)

tatra siṃhāsanāsīnāṃ tamālaśyāmalatviṣam | sphuradaṃṣṭrānanāṃ mūrtiṃ kauśikīm iva bibhratam || 48 ||

kuṇḍalātaparatnāṃśubālātapavilaṅghitam | bibhrāṇam animitte 'pi roṣāruṇam ivānanam || 49 ||

cāmarādhūnanavyagrakarapaṅkajayāniśam | niṣevyamāṇam abhitas trailokyavijayaśriyā || 50 ||

bibhrāṇaṃ śoṇamāṇikyabhūṣāṃśucchuritaṃ vapuḥ | aśāntavajrasaṃpātavahniśeṣam iva kvacit || 51 ||

jayakuñjaranakṣatramālām amalamauktikām | dadhataṃ vikaṭāṃ hāralatāṃ pīnena vakṣasā || 52 ||

siṃhopalakṣitam āsanaṃ siṃha eva cāsanaṃ tam adhiruhya sthitatvāt_ | kauśikī caṇḍikā || 48 || 49 || 50 || 51 || 52 ||

diṅnāgadānaviṣyandakṛtapattrāṅkuraśriyaḥ | bibhrataṃ bhuvanābhogavanatālatarūn bhujān || 53 ||

keyūrāsitaratnāṃśujaladhārāś ca bibhratam | vajrānalaśikhādāhaśāntihetor iva srutāḥ || 54 ||

pattrāṅkurāḥ pattracchedyabhedāḥ pallavaprarohāś ca || 53 || 54 ||

uraḥsthale niṣaṇṇāyā ratnaparyaṅkavibhramam | bibhrataṃ diggajādhīśadantabhaṅgaṃ suraśriyaḥ || 55 ||

dadarśāndhakam ābaddhamadhyaṃ kanakaśṛṅkhalaiḥ | nitambaparivṛttārkaraśmirekham ivācalam || 56 ||

(navabhiḥ kulakam_)

trailokyaśrīkareṇostamālānībhūtadordrumam | vilokyeṣannataśirā vinayāt praṇanāma saḥ || 57 ||

atha bāhuṃ prasāryārād diṅnāgakarapīvaram | ita ity asurendreṇa nirdiṣṭaṃ svayam antike || 58 ||

vibhramaḥ śobhā | dantabhaṅgo daśanakhaṇḍam_ || 55 || 56 || 57 || 58 ||

hemapīṭham asau citraratnajālapariṣkṛtam | adhyāsta lokasaṃvartamegho merum ivonnatam || 59 ||

(yugalakam_)

atha lambhitasatkāraṃ tam uvācāndhakāsuraḥ | dantajyotsnāchalenāriyaśaḥpītam ivogiran || 60 ||

lokasaṃvartaḥ kalpāntaḥ || 59 || 60 ||

gaurīvigrahasaṃdhānasamāsāditanivṛteḥ | gaṇeśa kuśalaṃ kaccid avyāhati pinākinaḥ || 61 ||

cireṇa bata kenāpi hetunā smṛtigocaram | āgacchāma vayaṃ śaṃbhor yeneha tvāṃ vyasarjayat || 62 ||

vigrahaś ca virodhaḥ | saṃdhānaṃ ca maittrī | gauryā saha tatkaraṇena prāptanirvṛtir asau śatruviṣaye tvatkiṃcitkara eveti dhvanyate || 61 || 62 ||

jayalakṣmyopagūḍhasya purā jitamarutvataḥ | na mamāṅgeṣu saṃjātas tādṛśaḥ pulakodgamaḥ || 63 ||

marutvān indraḥ || 63 ||

nirvyājaprītipiśunaḥ śaśiśekharaśāsanāt | īyuṣi tvayi sauhārdarasasyandini yādṛśaḥ || 64 ||

64 ||

(yugalakam_)

ime vajrakaṇā harṣasphuṭadvraṇamukhotthitāḥ | romāñcodgamakārkaśyamaṅgeṣv adhikayanti me || 65 ||

65 ||

saptalokādhipatyena na tathonnatim āgatāḥ | yathāviṣkṛtasadbhāvabhavasaṃbhāvitā vayam || 66 ||

bhūrbhuvasvastapojanamahaḥsatyāni sapta lokāḥ || 66 ||

kartavyaṃ tan na paśyāmi kṛtakṛtyo 'pi dhūrjaṭiḥ | yaccetasi nidhāya tvaṃ prāhiṇodasmadantikam || 67 ||

67 ||

tadāvedaya saṃdeśam indumauler vivakṣitam | kutūhali dadāty asmān mano nodāsituṃ yataḥ || 68 ||

udāsitum audāsīnyena sthātuṃ mano 'smān na dadāti | kautūhalād audāsīnyaṃ [na] muñcatītyarthaḥ || 68 ||

ity ukte tena dantāṃśupuṣpitādharapallavaḥ | avāptāvasaro vaktuṃ dūta ity upacakrame || 69 ||

69 ||

kalyāṇīṃ giram utsraṣṭuṃ viralā eva jānate | satyāṃ rekhāṃ vilikhituṃ citrakarmavido yathā || 70 ||

vilikhitum iti ‘saṃjñāpūrvako vidhir anityaḥ’ iti guṇābhāvaḥ || 70 ||

yad evam ādarārūḍho bahumān āspadaṃ tvayā | kriyate kuśalapraśnas tenādya kuśalī vibhuḥ || 71 || 1. ‘mān apadaṃ’ kha.

ādarārūḍho gauraveṇa kṛtaḥ | bahoś ca mānasya pūjāyā āspadam_ | ślāghya ityarthaḥ || 71 ||

yaśoṃśubhāsuracchāyaḥ kṣatadaurgatyaviplavaḥ | vibhāty anarghaḥ saṃsārasāgaraikamaṇir bhavān || 72 || 2. ‘bhāsvaracchāyākṛtadaurgatya’ ka.

72 ||

sārambhatve 'pi satataṃ vispaṣṭaparighaṭṭanam | tava jātaṃ dviṣaccakraṃ śuṣkaṃ geyam ivāpadam || 73 || 3. ‘vimṛṣṭa’ ka.

ārambho hi vijigīṣutā | parighaṭṭanam upaghātaḥ | apadaṃ nijapadād bhraṣṭam_ | śuṣkagītam apy apadaṃ padaśūnyam_ | śuṃ ṭuṃ ityādirūpasya tasyābhidheyābhāvāt_ | tatpakṣe 'py ārambhas tasyaiva prastāvaḥ | parighaṭṭanā tantrīṇāṃ kaṇṭhasya vottejanam_ || 73 ||

tvayā naiyāyikeneva satpakṣāśrayaśālinā | hetau vidadhatā yatnaṃ parapakṣo nirākṛtaḥ || 74 || 4. ‘nidadhatā’ kha.

satpakṣāḥ susahāyās tadāśrayaṇaśālinā hetau cāyudhe yatnam abhyāsaṃ kurvatā tvayā parapakṣaḥ śatruvargo nirākṛtaḥ | tārkikeṇeva | so 'pi satpakṣaṃ pratyakṣādivirodharahitāṃ pratijñām āśritya parapakṣaṃ paravādimataṃ pratikṣipati | yadi hetau pakṣadharme parijñānāya yatnaṃ kuryāt_ | anyathā hetor asiddhaviruddhānaikāntikatvodbhāvanād anyena parājīyeta || 74 ||

upary eva tava sthāsnu śaraccandrāṃśupāṇḍuram | yaśaśchattram ivābhāti cchattraṃ yaśa ivojjvalam || 75 ||

75

vaidagdhīṃ bibhṛyuḥ śailā niḥsāritamarutvataḥ | vajrānalaśikhājālapluṣṭapakṣāḥ kathaṃ nu te || 76 || 5. ‘niḥsīmita’ ka-kha.

niḥsārito nirvāsitaḥ || 76 ||

sphuraty adhitaṭaṃ sindhor yāmuktākiraṇacchaṭā | sā vaḥ saṃkocitāristrīmukhābjā kīrticandrikā || 77 || 1. ‘sindhor āmukta’ kha.

muktā mauktikāni || 77 ||

pluṣyaty arīn pratāpas te nirvāpayati cāparān | dāhātmakatvam adhikaṃ vahner aikāntikaṃ punaḥ || 78 ||

78 ||

krūre 'pi mārdavopetā vāmācāre 'pi dakṣiṇāḥ | pāpe 'pi śuddhamatayas tv ādṛśā bhuvi durlabhāḥ || 79 ||

79 ||

anekajanyaśobhī tvaṃ bhartālaṃkṛtavigrahaḥ | tvam ūhithāmuktakarām asaṅgo 'pi jayaśriyam || 80 || 2. ‘asaṅgo vijayaśriyam_’ kha.

tvaṃ jayaśriyam apy ūhitha dhṛtavān_ | asaṅgo 'pi tvaṃ jayaśriyam ūhitha pariṇītavān iti ca virodho dhvanyate | janyaḥ saṅgrāmo mahārāja(vara)sahāyaś ca | bhartā dhārayitā | alam atyarthaṃ kṛtavigraho vibhūṣitadehaś ca | amuktaḥ karo 'rthagrahaṇaṃ yasyām_, amuktaś ca gṛhītaḥ karaḥ pāṇir yasyāḥ | asaṅgo viratirahito viraktaś ca || 80 ||

daśām anuguṇāṃ dagdhvā nādhāraṃ tāpayaty alam | na snehaṃ kṣapayaty uccair vaṃśadīpo 'paro bhavān || 81 ||

daśā avasthā vartiś ca | anuguṇā yogyā anuguṇas tantuś ca | snehas tailam api | dīpaḥ prakāśaḥ pradīpaś ca || 81 ||

vyajeṣṭhā gocarātītaṃ guṇagauravato 'dhikam | agādham api dugdhābdhiṃ surāsuraviloḍitam || 82 ||

vyajeṣṭhāḥ vijitavān asi | 'viparābhyāṃ jeḥ' iti luṅy ātmanepadam_ || 82 ||

kathaṃ śaśadharādhīnavṛddhikṣayatayāniśam | sādṛśyaṃ tava dugdhodasindhunā yaśaso bhavet || 83 ||

83 ||

viralās tv ādṛśā loke dordaṇḍadalitadviṣaḥ | nirdagdhāśeṣabhuvanāḥ kiyanto vahnayaḥ kṣaye || 84 ||

kṣayaḥ kalpāntaḥ || 84 ||

svacchaṃ bimbitaniḥśeṣanītisaṃgrahasusthitam | tvam eva mānasaṃ dhatse prajñāvibhramadarpaṇam || 85 ||

85 ||

dordaṇḍadalitoddāmasaṅgrāmārātimaṇḍalaḥ | na bibharṣi guṇottuṅgo garvam anyāsurendravat || 86 ||

86 ||

guṇāṃs tava girāṃ nātho vakti tenāthavāpy alam | sindhos taṭeṣu sikatākaṇān gaṇayitāsti kaḥ || 87 ||

87 ||

iti saṃsadi vaktur me citraṃ yat kṣīyate na vāk | kva vā kāvyavikalpānāṃ guṇānāṃ ca tavāvadhiḥ || 88 || 1. ‘tathāvadhiḥ’ kha.

88 ||

itthaṃ pratāpasaṃpattiparākrāntamahībhṛtaḥ | na kulyotsādanaṃ yuktaṃ tava grīṣmaraver iva || 89 ||

pratāpaḥ śauryotthaḥ prabhāva ātapaś ca | mahībhṛtaḥ parvatā rājānaś ca | kulyāḥ kule bhavāḥ svalpāś ca nadyaḥ || 89 ||

evam āha vibhur mānyaṃ jagatsargasthitikrame | niyujya druhiṇopendrāv audāsīnye 'smi nirvṛtaḥ || 90 ||

vibhur maheśvaraḥ | mānyaṃ tvām andhakam_ | sthitiḥ pālanam_ | druhiṇo brahmā | upendro viṣṇuḥ || 90 ||

surāsuracamūvaṃśasaṃtānasthitir āsadat | kaśyapo mānasotpattisaṃmatāṃ parameṣṭhinaḥ || 91 ||

camūḥ samūhaḥ | tadvaṃśaprabandhasya sthitiḥ sthitikāraṇam_ | kāraṇe kāryopacārāt_ | mānasaṃ manaḥ | tad evotpattiḥ sadma yasya | tadbhāvam āsadat prāpa | surāsurāṇām anvayasthitiṃ kārayituṃ brahmā kaśyapaṃ manasā nirmama iti piṇḍārthaḥ || 91 ||

sa labdhvātmabhuvo 'nujñāṃ citrasargacikīrṣayā | upāyatātmano yogyā vidhivaddakṣakanyakāḥ || 92 ||

upāyata pariṇītavān_ | ‘upādyamaḥ svakaraṇe’ iti taṅ_ || 92 ||

danudityaditiṣv āsām udabhūvaṃs tataḥ kramāt | dānavāś caiva daityāś ca devāś ca balaśālinaḥ || 93 ||

āsāṃ madhye danvādiṣu yathākramaṃ dānavādayo jātāḥ || 93 ||

prātikūlikatāṃ matvā mithas teṣāṃ svayaṃbhuvā | vāsaḥ pātālamūle ca sumerau ca vyabhajyata || 94 ||

pratikūlaṃ vartate prātikūliko virodhī | ‘tatpratyanupūrvamīpalomakūlam_’ iti ṭhak_ || 94 ||

praśāntaraṇasaṃrambhaṃ svadharmāvasthitaprajam | tena niḥśeṣam evāsīt trailokyam anupaplavam || 95 ||

95 ||

atha durvāradordaṇḍadarpakaṇḍūpratāritaḥ | ācchinaddhāma devānāṃ hiraṇyākṣamahāsuraḥ || 96 ||

dhāma sthānam_ | ācchinad apajahāra || 96 ||

sa jaghne suraśatrūṇāṃ miṣatāṃ kroḍamūrtinā | trailokyopaplavārakṣābaddhakakṣeṇa śauriṇā || 97 || 1. ‘kakṣyeṇa’ ka.

miṣatāṃ paśyatām_ | anādare ṣaṣṭhī | kroḍo varāhaḥ || 97 ||

ninye ca marutāṃ patyur nihatyāsuramaṇḍalam | trailokyaśrīḥ punar līlācāmaravyagrahas tatām || 98 ||

98 ||

yāte kāle 'tha durvāradarpakaṇḍūtidurdharaḥ | hiraṇyakaśipurjiṣṇos tām etya punar ācchinat || 99 || 2. ‘loke’ kha. 3. ‘kaṇḍvāti’ ka.

kaṇḍūtiḥ kaṇḍūḥ | kaṇḍūyater yagantāt pratyayāt_ ityakāreṇa bhāvyam iti ktiprayogaś cintyaḥ | jiṣṇur indraḥ || 99 ||

tadvakṣo 'dadaradvajradhārādalanakarkaśam | nṛsiṃhamūrtir nakharair kharāntair janārdanaḥ || 100 || 4. ‘na kharāgrai’ kha.

adadarad vidāritavān_ | na kharāntair mṛduprāntaiḥ || 100 ||

ittham anyāṃś ca jagato viprakartṝn mahāsurān | anayaddīptacakrāgnijvālāpañjarayantraṇām || 101 ||

viprakartāro bādhakāḥ || 101 ||

jyotsnā candrakrameṇaiva kṣīyate vṛddhim eti ca | śūrāṇāṃ ca raṇe kīrtir gatā na vinivartate || 102 ||

na cāsurāṇāṃ samare vipattir aśreyasītyāha—jyotsneti | gatā prasṛtā || 102 ||

tad arhanty adhunā prāgvadavigrahaparigrahāḥ | rasātalanivāsena saṃvibhāgaṃ mahāsurāḥ || 103 ||

103 ||

pureva lokapālānāṃ daityānāṃ ca niratyayā | anāviṣkṛtasaṃrambhā sthitir astu yathāyatham || 104 ||

104 ||

dhāmāny adhyūṣuṣām itthaṃ premṇā nijanijāni vaḥ | santv āviṣkṛtavisrambhāḥ parasparagṛhāgamāḥ || 105 ||

105 ||

śāsati tvayi pātālaṃ tridivaṃ ca puraṃdare | sasurāsuracakrasya trailokyasyās tv anāmayam || 106 ||

āmayasyābhāvo 'nāmayaṃ svāsthyam_ || 106 ||

nivartite virodhe 'pi yuvayor adhunā mithaḥ | apahastitaniḥśeṣavairaṃ prema vivardhatām || 107 || 1. ‘nivartatāṃ virodhaḥ’ ka. 2. ‘vijṛmbhatām_’ kha.

apahastitaṃ nirākṛtam_ || 107 ||

atisaṃgharṣataḥ sindhumandarācalayoḥ purā | prākkālakūṭasaṃbhāraḥ paścād amṛtam utthitam || 108 ||

108 ||

iti sthite samutsṛṣṭavigrahaikarasasthiteḥ | marutvatā samaṃ manye sakhyam eva tava kṣamam || 109 ||

109 ||

yasya hāralatānyāsabhāsurā phenasaṃhatiḥ | vyāvartamānā namuceḥ kaṭhinaṃ kaṇṭham acchinat || 110 ||

yasyetyādi kalāpakam_ || 110 ||

yasyādyāpi dadhaty ete vajravicchinnapakṣatīḥ | sābhrāḥ pārśvabhuvo baddhavraṇapaṭṭā ivādrayaḥ || 111 ||

111 ||

yasyāntarvajradahanajvālājālam iva jvalat | cakāra nīrasaṃ daityanārīhṛdayamaṇḍalam || 112 || 3. ‘ujjvalam_’ ka.

nīrasaṃ rāgarahitaṃ śuṣkaṃ ca || 112 ||

taṃ dordaṇḍamadoddāmadaityadānavasūdanam | vajrodbhāsikaraṃ ko vā mittraṃ na bahu manyate || 113 ||

113 ||

(cakkalakam_)

suraiḥ sahāmarākrīḍakalpavallīgṛheṣu vaḥ | āpānagoṣṭībandhena bandhuprītir vivardhatām || 114 ||

ākrīḍa udyānam_ || 114 ||

sadānanirjharesv ārād gaṇḍaśaileṣu dantinām | anāyasamukhās tāvan nipatantu śilīmukhāḥ || 115 ||

nāsty āyasaṃ lohamayaṃ mukhaṃ yeṣāṃ te śilīmukhā bhramarāḥ, na tu śarāḥ || 115 ||

avāptanarakāsaṅgā mānubhūvanmahāsurāḥ | krūrāsipattrasaṃpātanirargalakadarthanām || 116 || 4. ‘saṃghāta’ kha.

narako daityabhedo rauravādiś ca | asipattraṃ khaḍgapaṭṭo narakaviśeṣaś ca || 116 ||

suraditi(danu)sutadaityakanyakānāṃ sarabhasam āplutikelilīlayāmbhaḥ | bhavatu kucataṭīnitambabimbaskhalanavijarjaram ambarāpagāyāḥ || 117 || 1. ‘sainya’ kha.

kanyakā duhitaraḥ | āplutiḥ snānam_ || 117 ||

ity abhyudīrya giram ujjvaladantaratna- niryatprabhādhavalitāṃ virarāma dūtaḥ | tasthau taduttaraviśeṣaparīpsayā ca daityādhipasya vadane vinidhāya dṛṣṭim || 118 ||

parīpsā paryāptum icchā || 118 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye dūtavyāhāro nāma dvātriṃśaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote dvātriṃśaḥ sargaḥ ||