triṃśaḥ sargaḥ |

itthaṃ sarāgaśaśabhṛtparibhogalīlā- vicchinnarātriraśanāmaṇikiṅkiṇībhiḥ | nakṣatrasaṃtatiṣu saṃdadhatīṣu sāmya- mastādrisānupadavīparipuñjitāsu || 1 || 1. ‘paribhāga’ kha. 2. ‘raśanāmala’ ka.

ittham ityādi kalāpakam_ | paribhogaḥ saurato mardaḥ | paripuñjitā rāśībhūtāḥ || 1 ||

viṣyandamānamadhuśikaralobhalīna- bhṛṅgāvalīcaraṇabandhurakesareṣu | padmākareṣu vikasatsu śanair nidāgha- dhāmāṃśubhinnadalamaṇḍalasaṃdhibandham || 2 ||

caraṇavadbandhurā manojñāḥ | caraṇāyamānā ityarthaḥ | nidāghadhāmā raviḥ || 2 ||

prātastanānilavikampitapuṇḍarīka- pakṣmāgrakoṭighaṭite salilāśayeṣu | nidrāvimuktivalitāvayavāpaviddha- lakṣmīvadhūparimalaśriyi dhūlicakre || 3 ||

valitair aṅgair vimukto yaḥ parimalo 'ṅgarāgas tasminn iva dhūlipuñje pakṣmaprāntebhyaḥ salilāśayeṣu patita iti yojyam_ || 3 ||

śailālivatsphuṭayati sphuṭasarvabhāva- vyaktikrameṇa divase mukharāgaśobhām | abhyarcya kālamusalaś caraṇau mṛgāṅka- cūḍāmaṇer udapatad dhruvadhāmavīthīm || 4 ||

bhāvāḥ padārthās teṣāṃ vyaktiḥ | mukham ārambho vadanaṃ ca | rāgo 'ruṇimā kāntiś ca | dhruvasya jyotiṣo dhāma padam_ || 4 ||

(cakkalakam_)

1. ‘caturbhiḥ kulakam_’ kha. tena vyaloki divam utpatatāgravarti vispaṣṭalakṣma pariṇāhi mṛgāṅkabimbam | unnidrakundadalapāṇḍuramaṇḍapiṇḍa- madhyāsyamānam iva kāliyapannagena || 5 ||

aṇḍaṃ pannagādīnāṃ garbhaśayyā || 5 ||

saṃpaśyati sma sa taḍitsphuraṇānubandha- m ādīrgham abhraśakalaṃ sthitam antarikṣe | ucchvāsalakṣyarudhirāruṇakāntikaṇṭha- cchedaṃ mahājhaṣam ivāmbhasi paṅkalīnam || 6 ||

6 ||

anyonyasaṃvalanavellitapallavāgra- viśleṣanirdalitaketuśikhāṃśukaughāḥ | unmūlyamānaśikharaskhaladardhacandra- ratnaprabhākhacitakāñcanatoraṇāgrāḥ || 7 ||

anyonyasaṃvalanaṃ veṣṭanaṃ yatra tathā kṛtvā calitānām añcalāgrāṇāṃ viśleṣo vighaṭanaṃ tena nirdalitā jīvatvam upanītā (?) dhvajāgreṣu paṭaughā yeṣām_ || 7 ||

ābhyāhatā viśaśarur javamārutena tasyāśu dikṣu surasiddhavimānasaṃghāḥ | bāṇāgnidīpitapuratrayatāyamāna- nānāvidhāvayavavibhramam ūhivāṃsaḥ || 8 ||

viśaśarur viprakīrṇāḥ | tāyamānā vistāryamāṇāḥ | ‘tanoter yaki’ ity āttvam_ || 8 ||

(yugalakam_)

keśeṣu tasya kṛtasaṃnidhayo muhūrtaṃ kaṃsātatāyina ivāñjananīlabhāsaḥ | uṣṇīṣaratnakiraṇadviguṇāyamāna- saudāmanīvalayino jaladā babhūvuḥ || 9 ||

kaṃsasyātatāyī ripur viṣṇuḥ | tasya keśeṣu meghāḥ saṃnidhīyanta ity āmnāyavidaḥ | uktaṃ ca—‘yasya keśeṣu jīmūtā nadyaḥ sarvāṅgasaṃdhiṣu | kukṣau samudrāś catvāras tasmai toyātmane namaḥ’ || 9 ||

tasyotthitasya sahasā dhanavartmasīmni dhatte sma karṇaśikharaṃ śriyam avyavasthām | uṣṇīṣabhinnahṛdayastanayitnulagna- saudāmanīvikaṭahāṭakamañjarīkam || 10 ||

avyavasthā calā | stanayitnur meghaḥ | tato lagnā vidyud eva svarṇamañjarī yasya || 10 ||

piṅgordhvalocanakṛśānuśikhāsahasra- m asyānvakāri mukhamaṇḍalam antarikṣe | sāmbhobhareṇa gamanotthamarudvivarta- bhājāmbuvāhaśakalena tadidvatāgre || 11 ||

taḍitvate śikhitvate (?) | bahutvād dhūmni matup_ || 11 ||

tasya pratīpam agamadgamanānilena vikṣipyamāṇasalilā kṣaṇam antarikṣe | mandīkṛtoṣṇakaramaṇḍalabhāsurordhva- netrāgnitāpakṛtaśoṣabhiyeva gaṅgā || 12 ||

12 ||

visraṃsitoḍuraśanaṃ galadindugaura- gaṅgādukūlam akarot sa divas tadānīm | vistīrṇam ambaranitambam anambudendu- bimbānanāmburuhacumbanabaddhatṛṣṇaḥ || 13 ||

anambudaṃ nirabhracandrabimbam evānanāmburuhaṃ mukhapadmam_ || 13 ||

jahre mano 'sya mṛdumārutapūryamāṇa- randhrair himādritaṭakīcakacakravālaiḥ | gambhīratāramadhurakvaṇitair nayadbhi- r utkarṇatāṃ taraṇikūbarivājipaṅktim || 14 ||

kīcakā veṇubhedāḥ | kūbarī rathaḥ || 14 ||

aikṣiṣṭa visphuritakāñcanakalpavallī- vistāripakṣmaśikharacchadacakravālam | kailāsaśailam asakṛt sa jagattrayaika- lakṣmyāḥ sthitaṃ dhavalavibhramapuṇḍarīkam || 15 ||

kalpavallya eva pakṣmāṇi kesarā yeṣām_ | śikharāṇy eva cchadāḥ pattrāṇi | sthitam acalam_ || 15 ||

phenāvalīdhavalacāmaracakravāla- bhūṣābhirāmajavanasthirasaptavāhām | bhāgīrathīṃ rathadhurām iva gharmaraśme- r vīkṣyaikapiṅgalagirau sa mudā vavande || 16 ||

pheno 'śvalālāpi | vāhāḥ pravāhā aśvāś ca | ekapiṅgalo dhanadaḥ || 16 ||

tena skhalatkhalakhalāmukharā karāla- kailāsakūṭavikaṭormighaṭāsahasrā | saṃkrāntakaiṭabhanisūdanapādapadma- preṅkhannakhaccavir ivaikṣata jahnukanyā || 17 || 1. ‘avaikṣata’ ka-kha.

skhalatā vahamānena khalakhalety evaṃrūpeṇa dhvaninā mukharā saśabdā | kaiṭabhanisūdano hariḥ | tasya pādāj jāhnavī saṃbhūteti tatra tadīyanakhaprabhāyāḥ saṃkramaṇaṃ saṃbhāvitam_ || 17 ||

majjatkuberataruṇīgalitāvataṃsa- hāsābhirāmataṭamārgam asāv apaśyat | vistārimānasasaraḥsalilormibhaṅga- paryastaśīkarasakāñcanavālukāmbhaḥ || 18 ||

ūrmibhaṅgaiḥ kṣiptāḥ kaṇā yena | suvarṇasikatāsahitaṃ cāmbho yasya || 18 ||

vīcīsamīradhutakāñcanapuṇḍarīka- paryastakesaraparāgapiśaṅgitāmbhaḥ | acchodam aikṣata sa devapurandhripāda- lākṣāruṇīkṛtaśilātalatīralekham || 19 ||

acchodākhyaṃ saraḥ || 19 ||

ārādhanapravaṇakāsaradaityavaṃśa- kaṇṭhaprasādhanadhiyeva vilabhyamānāḥ | caṇḍyā yadīyamaṇikaṃdaramandirāgra- vistāritoraṇagatāḥ pravibhānti ghaṇṭāḥ || 20 ||

kāsaradaityo mahiṣāsuraḥ | tatsaṃtānasya caṇḍikārādhanaparatvaṃ pitṛvadhakṛtāt trāsāt_ | vilabhyamānā dīyamānāḥ | caṇḍī vindhyavāsinī || 20 ||

sthūlendranīlamaṇiśṛṅgaruco 'tha tasya kalmāṣitākhiladigantaram unmiṣantī | bhūyas tarāṃ taraṇimārgarurutsayāśu muktāḥ śikhā iva dadarśa sa mekalādreḥ || 21 ||

mekalo vindhyaḥ || 21 ||

(yugalakam_)

līlānimagnaśabarīkucakumbhapīṭha- saṃkṣobhajarjaritavīcighaṭāsahasrām | revām asau saralavañjulajālajambū- stambaprasādhitataṭām avalokya reme || 22 ||

revā narmadā | saralā devadāravaḥ | vañjulā vetasāḥ | jambūnāmānaś ca kecana taravaḥ || 22 ||

kaṇṭhagrahapraṇayinā dadṛśe 'tha tena vindhyaśriyo maṇiśikhojjvalamekhalāyāḥ | revāpagāmbupṛthupīnanitambabimba- visrastam ambaram ivātanupādalagnam || 23 ||

kaṇṭhaḥ śikharasaṃnikṛṣṭaḥ | grahas tasyopasevanam_ | kaṇṭhagrahaś cāliṅganam_ | śikhā raśmayaḥ | mekhalā upatyakā kāñcī ca | nitambaṃ madhyabhāgaḥ śroṇī ca | pādāḥ paryantaśailāḥ parisaro vā, caraṇaś ca || 23 ||

saṃvītatīravanarūḍhatamālakhaṇḍa- lolānilākulitanīlajalāṃśukaśrīḥ | tena vyaloki varuṇālayavallabhāgra- līlābhisāraṇadhiyeva kalindakanyā || 24 ||

tamālakhaṇḍaṃ lolayati yo 'nilaḥ tadākulitaṃ nīlajalam evāṃśukaṃ tasya śrīḥ parihitā yayā | varuṇālayaḥ samudraḥ | sa eva vallabhas tadagram ivābhisartum_ | abhisāraṇam abhisaraṇam eva | sarateś curāditvāt svārthe ṇic_ | yathā—‘rāmo rājyam akārayat_’ ity atra karoteḥ | na vai saratiś curādiṣu paṭhyata iti cet_, na | curādīnāṃ pāṭhasyodāharaṇārthatvāt_ | yad uktam_—‘bahulam etan nidarśanam_’ iti || 24 ||

sevāvicakṣaṇatayeva davāgnidagdha- kālāgurupracuradhūmaśikhākadambaiḥ | kurvantam aikṣata mahendram asāv analpa- kalpadrumāṃśukatatīḥ surabhīḥ surāṇām || 25 ||

mahendrācalo giriviśeṣaḥ || 25 ||

vispaṣṭaphenadhavalā viralormibhaṅga- niḥsaṅgasaṃgatapayaḥplavarodhasaṃ saḥ | lāṅgūlinīṃ saritam ākalayāṃcakāra tatpādagocaragatām iva saurabheyīm || 26 ||

phenaiḥ pāṇḍubhir ūrmikhaṇḍair avirataṃ saṃgatapayaḥplavaḥ salilapūro yayoḥ | tādṛśe rodhasī yasyāḥ | phenavac ca sitair vais taraṅgabhaṅgaiḥ saṃgataṃ payaḥ kṣīraṃ tena pravaram ūdho yasyāḥ | atra pakṣe ‘bahuvrīher ūdhaso ṅīṣ_’, ‘ūdhaso 'naṅ_’ iti ca ṅīṣanaṅau prāpnutas tatra pratividhīyate—anaṅ atra na pravartate, samāsāntavidher anityatvāt_ | yathā—‘dhṛtadhanuṣi bāhuśālini śailā na namanti yattad āścaryam_’ iti | tadabhāvāt_ ṅīṣ_ na bhavati | abhidhānābhāvāt_ | nahi kevale ṅīṣi kuṇḍodhasītyādyabhidhānam asti | uktaṃ ca—“ṅīṣ_vidhau ‘ūdhaso 'naṅ_’ iti samāsānte kṛte ‘ano bahuvrīheḥ’ iti ṅīp_ṭāp_pratiṣedhayoḥ prāptayor idam ucyate”| lāṅgūlinī praśastapucchāpi | tasya mahendrasyāpi | pādaḥ parisaraḥ | sa eva gocaro viṣayaḥ gavāṃ saṃcārabhedaś ca | saurabheyī gauḥ || 26 ||

vīkṣyāvataṃsitavikāsilavaṅgapuṣpa- mālāḥ sa sahyagirikānanaśākhivīthīḥ | remetarāṃ suramataṅgajagaṇḍakāṣa- līlāvarugṇasaralonnatatālakhaṇḍāḥ || 27 ||

27 ||

utphullatīratarukhaṇḍalatāsakhibhīḥ saṃgrathyamānanijapuṣpabharāvataṃsāḥ | ābibhratīṃ bhramaranīlarucaḥ sa vīci- veṇīlatās tadanu bhīmarathīm apaśyat || 28 ||

bhīmarathyādayo nadībhedāḥ || 28 ||

āmagnakuntalavadhūkucakumbhabhāra- hāraprabhādviguṇitacchaviphenahāsām | godāvarīṃ caraṇacuñcucakoracakra- cañcvagracumbitavilolajalām apaśyat || 29 ||

kuntalā janapadabhedāḥ | caraṇacuñcavaḥ saṃcāreṇa viditāḥ | ‘tena vittaś cuñcup_caṇapau’ || 29 ||

ullāsiśīkarakarālaphaṇāsahasra- kallolanāgakulasaṃkulamadhyabhāgām | veṇāṃ sphurattimiratātigabhīratālu- mūlāṃ rasātalabhuvaḥ sadṛśīṃ dadarśa || 30 ||

śīkarā eva phaṇāḥ | kallolā eva nāgāḥ | veṇā kṛṣṇaveṇīti prasiddhā | sphurantyas timiṣu ratāḥ krīḍatā ātaya āṭikāḥ [pakṣiviśeṣāḥ] yatra | tādṛśaṃ gabhīraṃ tālupṛṣṭhaṃ mūlaṃ ca yasyāḥ | sphurattimiraṃ yasya tadbhāvenātiśayena gabhīre ca tālumūle yasyāḥ || 30 ||

tasyopayuktataṭakānananārikela- vallīphalaprakaraśītalagarbhatoyāḥ | anvāyinaḥ kaṭakavartmasu pāriyātra- śailasya cakrur upabhogasukhān nivāsān || 31 || 1. ‘upaśobha’ ka.

upayuktaṃ pītam_ | anvāyino 'nucarāḥ || 31 ||

mīnāvalīsarabhasāplutighaṭṭitāmbu- vīcī vilolaviruvatkurarī karālam | kāveryalakṣyata jalaṃ dadhatī ca tena niḥśaṅkaraṅkukulasaṃkulakūlakacchā || 32 ||

kurarī vihagayoṣidbhedaḥ | raṅkur mṛgaviśeṣaḥ || 32 ||

āvirbhavatsmitamanoharagaṇḍabhitti- bhāgaś camūcarapuraṃdhrigaṇaḥ salīlam | carmaṇvatīpulinavartmani tasya hāri- hārītakaṇṭhavirutārpitakarṇa āsīt || 33 || 1. ‘tārahāri’ kha.

hārītaḥ pakṣiviśeṣas tasya kaṇṭharutaṃ || 33 ||

āvāsitasya taṭavartmani tasya tāla- khaṇḍaprakāṇḍadalatāṇḍavanapragalbhāḥ | siprātaraṅgamaruto 'nucarāṅganānāṃ pīnastanakṣatarujaṃ surateṣu jahruḥ || 34 || 2. ‘kṣiti’ ka-kha.

34 ||

saṃvādikānanatalasya niveśalakṣmī- m adrer asāv adhikam ṛkṣavato 'bhyanandat | pādāvanau katicid eva dināni baddha- saṃstho niśīva tamasāhṛtadṛṣṭir āsīt || 35 ||

niveśaḥ saṃsthānam_ | ṛkṣavān nāma parvataḥ | kānanaṃ ca ṛkṣavad bhallūkayuktam_ | tamasā nadībhedaḥ | tamasā cāndhakāreṇa | hṛtā pralobhitā hatā ca | dṛṣṭir mano netraṃ ca || 35 ||

gacchanviśaṅkaṭam asau kaṭakaṃ suvela- śailasya kāñcanaśilāśakalāvakīrṇam | velāvilolavaruṇālayavīcibhaṅga- paryastavāḍavakṛśānum ivaikṣatārāt || 36 ||

36 ||

tena vyalokyata kapolatalāyamāna- vispaṣṭapākalavalīphalakandalāḍhyā | ghrāṇānulepi navacandanakhaṇḍagandha- hṛdyāmalā malayaparvatakānanaśrīḥ || 37 ||

pākojjvalatvāt kapolatalākṛtibhir lavalīphalaiḥ kandalaiś ca latāviśeṣair āḍhyā samṛddhā lakṣmīḥ śobhā ramā ca || 37 ||

lakṣmībhṛtastribhuvanākramaṇapragalbha- sarvonnater malayabhūmibhṛto 'bhrasindhum | puṇyasthitiṃ muraripor iva pādamūla- bhāgotthitām abhinananda sa tāmraparṇīm || 38 ||

sarvebhyaḥ sakāśād unnatir ucchrāyaḥ | puṇyā manojñā pavitrā ca | pādaḥ parisaro 'ṅghriś ca || 38 ||

paryastaratnakiraṇāṅkuradantureṣu velātaṭeṣu kṛtasainikasaṃniveśaḥ | ambhonidhiṃ sa niravarṇayadullasadbhi- r uttambhitoḍupatham ūrmighaṭāsahasraiḥ || 39 ||

39 ||

unnālanīlanalavañjulanālikera- tāmbūlavallivalayākulakūlakaccham | āścaryadhāma dadhataṃ satataprasanna- m apy aprasannam upapāditaśobham ambhaḥ || 40 ||

yat prasannaṃ tad aprasannaṃ katham iti virodhaḥ || 40 ||

2. prasannā surā tad rahitam iti parihāraḥ. visraṃsamānasalilāmalanīvibandha- m āsphālayantam atikāmam ivormihastaiḥ | ābaddharatnavalayojjvalakāñcidāma- velāṅganāpulinapīnanitambabimbam || 41 ||

atikāmam atīva kāmākrāntam_ || 41 ||

utsaṅgasaṅgivilasattaṭinīpuraṃdhri- līlārpaṇārabhasayeva niveśayantam | āvartacakracaṣakeṣu taraṅgahasta- vyākṛṣṭatīratarupuṣpabharāvataṃsān || 42 ||

rabhasā vāñchā || 42 ||

preṅkhatkapālaśakalāmalaśaṅkhaśukti- m ācchāditāmbaraghanāmitavīcibāhum | aurvāgnipiṅgalaśikhāvikarālakeśa- m utplutya bhairavam ivāsakṛd ārasantam || 43 || 1. ‘asitavīci’ kha. 1. ‘ānamantam_’ kha.

śuktiḥ pānapātram api | ambaraṃ kṛttir api || 43 ||

lakṣmīsurāvimalakaustubhapārijāta- candrāmṛtāpaharaṇotthitayā śuceva | hemādrikūṭavikaṭārciṣi nirvyapekṣa- m ātmānam aurvadahane vinipātayantam || 44 ||

44 ||

gambhīragarbhaghaṭitāspadakālakūṭa- śeṣāgnidāhaśamanārtham iva kṣapāsu | jyotsnāsudhāṃ vikaṭamauktikadantāpaṅkti- śobhādharair vivṛtaśuktimukhaiḥ pibantam || 45 ||

45 ||

preṅkhatpravālakiraṇācchuritaṃ vahanta- m āvartacakraparivartagabhīram ambhaḥ | saṃvādikaustubhamayūkhaśikhāvakīrṇa- daityāyudhavraṇakarālamurārivakṣaḥ || 46 ||

46 ||

śailābhighātaśakalīkṛtam apy akhaṇḍa- m ākṛṣṭaratnam api ratnanidhitvam āptam | lakṣmīm adagdhadaśam apy asamaurvavahni- dāhākulaṃ ciragatām api notsṛjantam || 47 ||

akhaṇḍaṃ paripūrṇam api | ratnāni candraprabhṛtīny api | lakṣmīḥ śobhāpi | nāsti dagdhā daśā yasya | dagdhā upahatā api || 47 ||

vajrābhighātabhayakātaratoyalīna- māhendranīlamaṇiśailaśataprakāśam | garbhāndhakāram iva śeṣaphaṇāsahasra- māṇikyaraśmigalahastitamudgirantam || 48 || 2. ‘sāndrendranīla’ kha.

indranīlaśailānāṃ prakāśaṃ tama iva galahastitaṃ paribhūtaṃ vamantam_ || 48 ||

preṅkhatkarālamaṇiraśmiśatābhinaddha- kallolaketupaṭalasthagitāntarikṣam | uddāmavājigajasadhanam abhyupetya gṛhṇantam āśu vijigīṣum ivākhilāśāḥ || 49 ||

vājino gajāś ca jalagatā api | sādhanaṃ phalam_ || 49 ||

velāṅganābhir abhito dhutavīcitāla- vṛntānilākulitaphenadukūlapaṭṭam | tābhyo diśantam asakṛj jalaveganunnā ratnāvalīr aviralāḥ sphuradindugaurīḥ || 50 ||

velā jalavikṛtayaḥ || 50 ||

utthāya dūram asakṛt suranāthamukta- vajrābhighātakalanāśaraṇāgatānām | kṣoṇībhṛtām aniśam apy akutobhayānāṃ sarvāsu dikṣu bhayahetum ivekṣamāṇam || 51 ||

kṣoṇībhṛtaḥ parvatāḥ | teṣāṃ bhayakāraṇam iva paśyantam_ | yato dūram utthāya sthitam iti vākyaśeṣaḥ || 51 ||

digbhyaḥ kramād aviralotkalikānubandha- m abhyeyuṣīḥ sarabhasaṃ saritaḥ sarāgāḥ | vispaṣṭadugdhajalakapravijṛmbhamāṇaḥ- cetoharasthiti pariṣvajamānam ārāt || 52 || 1. ‘abhyeyuṣaḥ’ kha.

utkalikā utkaṇṭhā api | rāgaḥ prabhā vyasanaṃ ca | dugdhajalakavanmiśrībhāvāt kṣīranīrayor iva jṛmbhamāṇā sthitir yatra | dugdhajalakaṃ ca kṣīranīrākhyam āliṅganam_ || 52 ||

jyotsnātapaṃ vikaṭavīcighaṭāsahasra- madhyāspadaṃ sapadi dugdhadhiya vivektum | āvāñchatā sarabhasaṃ taṭarājahaṃsa- yūthena bandhuragalena niṣevyamāṇam || 53 ||

bandhuro nataḥ || 53 ||

visphūrjadaurvaśikhikālanipīyamāna- m ālokya saṅkasukam āyur ivābhito 'mbhaḥ | prāptaṃ kramād virasatāṃ bhajamānam āśu satkūrcakesaraghanāṃ taṭakānanorvīm || 54 ||

aurvāgnir eva kālas tena nipīyamānatvāt saṅkusukam asthiram āyur iva salilam ālokya kṣārajalayogād visvādutāṃ bhajantaṃ kānanabhūmim āpannam_ | yaś ca vivekī kālena pīyamānatvād asthiram āyuḥ paśyati sa sarvakarmasu vairasyam āśrayann ekāntabhūmiṃ bhajate | kūrcakesarā nārikelāḥ || 54 ||

aurvāgnihetiśatam apy akṛśānutāpa- m uttānam apy atigabhīratayānuyātam | sannāgam apy anavasannagiriprakāṇḍa- m induprabhojjhitam api sphuṭacandrikāḍhyam || 55 ||

hetayo jvālās tā yatra santi tatra kṛśānor agnes tāpo na bhavatīti virodhaḥ | uttānaṃ prakaṭam udgatavistāraṃ veti na virodhaḥ | santo nāgā bhujagāḥ kiṃnarā vā yasya | anavasannāś ca sukhasthitāḥ | anavaṃ kṛtvā vā sannā girayo yatreti tu na virodhaḥ | atra prakāṇḍaśabdaḥ praśaṃsāvacano virodhacchāyāṃ pratibadhnātīti svārthe 'vagantavyaḥ | indoḥ prabhayā tyaktaṃ candrikayā ca samṛddham iti virodhaḥ | tayor ekatvāt_ | indos tato nirgatatvāt tatprabhojjhitam_ | yadā ca candrodayas tadā jyotsnayāḍhyaṃ samucchalitam iti tu na virodhaḥ || 55 ||

dikcakravālarabhasopagatapraviṣṭa- susvādunirjharavatījalasaṃplave 'pi | ambhaḥśriyā virasayā prakṛter ivaurva- vahnyāravairabhidadhānam asutyajatvam || 56 || 1. ‘praviṣṭaṃ susvāda’ kha. 2. ‘prakṛter abhīkṣṇa’ kha.

prakṛtiḥ svabhāvaḥ || 56 ||

gāmbhīryaśāli maṇirāgapiśaṅgam ambha- s tatrāpy anantabhujagādhipabhogaśayyām | tām āśritaṃ vikaṭakuksipuṭasthaloka- m abhyudvahantam adhikaṃ harim eva sāram || 57 ||

anantaḥ śeṣaḥ | adhikam adhijalam api || 57 ||

utkṣiptapañcaphaṇamaṇḍalabhogihasta- m abhraṃkaṣolbaṇaśikhaṃ grasamānam ambhaḥ | velānilāhativighaṭṭitavīcighoṣaiḥ saṃtarjayantam iva saṃtatam aurvavahnim || 58 ||

pañcaphaṇā eva maṇḍalaṃ valayo yasya tādṛgbhujaga eva hastaḥ sa utkṣipto yena | pañcāṅgulakarasyotkṣepeṇa vandanasaṃbhavāt_ || 58 ||

āvartamaṇḍalakukundarabaddhaśobha- kallolapīvaranitambataṭāntareṣu | paryastaśuktinayanaṃ galadacchahāri- ratnaprabhānivasaneṣu saridvadhūnām || 59 ||

‘kukundare nitambasya pārśvayoḥ kūpakau smṛtau’ || 59 ||

sannāgam akṣatatimiśritam utpravāla- m udrāgam ākulam alaṅghanatām avāptam | saśrīphalaspṛhataratplavagaṃ vanaugha- m uttālam uccamarasatvajuṣaṃ vahantam || 60 ||

sannāgaṃ nimagnaparvatam_ | akṣatais timibhiḥ śritam_ | utpravālam udgatavidrumam_ | udrāḥ kecana prāṇinas teṣām udgamenākulaṃ viṣamam_ | alaṅghanatām avāptam alaṅghyam | śriyaḥ phalaṃ bhogādi tatra spṛhayā saha ye vartante te tarantaḥ sāṃyātrikā yasmin_ | uttālam udbhaṭam_ | uccaṃ nabhovyāpi | arasatvaṃ visvādutāṃ juṣate śrayati yas tam evaṃvidhaṃ vanaughaṃ jalapravāhaṃ vahantam_ | vanaughaṃ taṭeṣu kānanasamūham api sannāgaṃ sadibhaṃ śobhanapuṃnāgataruṃ vā | akṣāṇāṃ vibhītakānāṃ tatibhir miśritam_ | utpravālam udgatapallavam_ | ata evodrāgam aruṇam_ | ākulaṃ caṭulam_ | alamatyarthaṃ ghanatvam avāptaṃ ghanam_ | saha śrīphaleṣu bilveṣu spṛhayā ye vartante te tarantaḥ plavagā markaṭā yatra tam_ | uttālam udgatatālākhyatarum_ | udghatāṃś camaranāmnaḥ sattvān bhajati yas tādṛśaṃ dhārayantam_ || 60 ||

ullāsibhiḥ pratidiśaṃ vikaṭormibhaṅgai- r bālāṣṭamīśaśadharapratibimbagarbhaiḥ | uttaptahemaghaṭitāṃ parikalpayanta- m āyānapaṅktim iva toyaturaṃgamāṇām || 61 ||

bālatvena śaśinaḥ pāṭalatvam uktam_ | āyānam aśvālaṃkāraḥ || 61 ||

saṃsaktabindupaṭalānaviluptaśukti- matsyaśriyo makaradantakabaddhaśobhān | vīcīn krameṇa dahatā bhiṣajeva śaśva- daśvān amuktam abhito vaḍavāgninārāt || 62 || 1. ‘bhiṣajīva’ kha.

aśvān iva vīcīn dahatā vāḍavenāśvavaidyena vā tyaktam_ | bindavo 'ṅgād dāhakarmaniṣpādyās tilakā api | śuktayo matsyāś cāvartaviśeṣā api | makarāṇāṃ prāṇināṃ dantā eva dantakāḥ makaradantāś ca kuṇḍalākṛtayaḥ svastikāḥ | kramo 'śvaśāstraprasiddho 'pi paripāṭī | dahatā svedayatāpi || 62 ||

sindhūr vipāṇḍurarucisphuṭaphenahāsa- dūrāvagāḍharasanirbharam āpatantīḥ | paśyantam ādaravaśād iva nirviśeṣa- m āvartacakranayanair madhuraṃ valadbhiḥ || 63 || 2. ‘sindhūrmi’ kha.

raso 'nugo 'pi || 63 ||

vicchādakāṃśumaṇivicchuritācchavīci vicchedaśīkarasamīrataraṅgyamāṇāḥ | vallīrdrumābhimukham unmadanā ivātta- kampāḥ karālitataṭopavanā vahantam || 64 || 3. ‘vicchāṭakāṃśu’ ka.

vicchādakāḥ saṃhatībhavantaḥ prasaranto vāṃśavo yeṣām_ || 64 ||

udbhinnaratnakiraṇāruṇadhātuvarti- preṅkhatphaṇāṅgulibhujaṃgamabhogahastam | roṣād ivānadhigataprasaraṃ valantīḥ sotkaṇṭham ūrmiphalakeṣu nadīr likhantam || 65 || 4. ‘toṣād ivānadhigataṃ’ ka.

udbhinnāḥ padmarāgakiraṇā evāruṇadhātumayī vartis tūlikā yatra | valantīḥ parāvartamānāḥ | ūrmiphalakeṣu nadīlekhanāt sotkaṇṭham iva | ivaśabdo 'trāpy upajīvyaḥ | yo hy utkaṇṭhitaḥ sa vinodāya phalake vartikām ādāya priyāṃ likhati || 65 ||

ullāsibhir diśi diśi sphuradunmarīci- māṇikyaraśmiśabalormighaṭāsahasraiḥ | vistāribhir bhuvanamaṇḍalamaṇḍalapasya vaidūryakuḍyaracanām iva saṃdadhānam || 66 ||

kuḍyaṃ bhittiḥ || 66 ||

phullajjapākusumapāṭalarāgaramyaiḥ kalmāṣitākhiladiśaṃ maṇibhiḥ sphuradbhiḥ | velānilāhativilolaśikhāśatasya sthūlaiḥ sphuliṅganikarair iva vāḍavāgneḥ || 67 ||

67 ||

āvartacakram udarāspadarandhranābhi- paryantaghūrṇitamaṇiprakārāṃśuśāram | bibhrāṇam acyutam ivāñcitaśaṅkhaśobha- m ambhodamecakaruconnatavīcidoṣṇā || 68 ||

āvartacakram āvartarūpaṃ sudarśanam api | maṇīnāṃ prakarasyāṃśubhiḥ maṇeś ca kaustubhasya prakaraiḥ pradhānair aṃśubhiḥ śāraṃ śabalam_ | śaṅkhaḥ pāñcajanyo 'pi || 68 ||

velāniloddhataśikhasya viṭaṅkaheti- varticchaṭābhir analasya nipetuṣībhiḥ | ābibhrataṃ piśunitā iva kukṣibhāga- baddhapratiṣṭhagirisānunidhānabhūmīḥ || 69 ||

hetaya eva vartayo dīpadaśās tāś ca sarṣapavan nidhibhūmiṣu patitā nidhānāni sūcayantīti nidhiśāstreṣu prasiddham_ || 69 || kulakam_ ||

(ekatriṃśadbhiḥ kulakam_)

yasyādhikaṃ dadhati nirmalanīramadhya- bimbāgatā jalabhṛto 'bhrakapaṅkanīlāḥ | kukṣipraviṣṭakamaṭhaśvasitavyudasta- pātālarandhragatakardamarāśilīlām || 70 || 1. ‘pratiṣṭha’ kha. 2. ‘randhraśata’ kha.

abhrakaṃ dhātubhedaḥ || 70 ||

velāvilāsaviśarārutaraṅgarāśi- pāriplavīkṛtatimivrajapṛṣṭhapakṣāḥ | yasmiñ janena niracāyiṣatodarādri- kūṭabhramaṃ vidadhato bhramatā taṭorvyām || 71 ||

timīnāṃ pṛṣṭheṣu pakṣāḥ śailaśikharabhrāntim utpādayanto janena niracāyiṣata niścitāḥ | samīpaṃ prāpyeti bhāvaḥ | cinoteḥ karmaṇi luṅi ‘syasicsīyuṭ_tāsiṣu’ itīṭ_ ciṇvadbhāvaś ca || 71 ||

velāpuraṃdhrir abhiyogapaṭuprapañca- mukteva cañcalataraiḥ śriyam ūrmihastaiḥ | yasya pravālamaṇiśobhibhir eti danta- cchedaprakārasadṛśaiḥ sphuṭabindumālaiḥ || 72 || 3. ‘prapañcā’ ka. 1. ‘śobhirater adhattacchedya’ ka. 2. ‘indumauleḥ’ kha.

abhiyogo ratam_ | pravālamaṇayo bindumālāś ca dantauṣṭhakṣataviśeṣāḥ | yad uktam_—‘dantauṣṭhayogātiśayāt pravālamaṇiḥ kapole nipuṇena sādhyaḥ | sarvāgradantair maṇibindumāle’ iti || 72 ||

devāsurabhramitamandaraśailamūla- līlāvaloḍanavilolajalotthitasya | mārgaṃ rasena turagādhipater ivārā- d ābhāti yatra vaḍavāmukham īkṣamāṇam || 73 || 3. ‘viloḍana’ ka.

turagādhipater uccaiḥśravaso mārgam ivotthāya sthitatvād īkṣamāṇaṃ yatra vaḍavāmukham aurvāgnir ācakāsti | vaḍavāyāś ca mukhaṃ rāgavaśād bhartur adhvānam īkṣate || 73 ||

ślāghyo gavām adhipatis timirakṣayārghya- rūpasthitir jaladamārgatalāvalambī | saccandrikaṃ śiśiraraśmir ivātmabimba- m ambho bibharti hariṇādhyuṣitaṃ ya ekaḥ || 74 || 4. ‘iva sma’ kha.

gavām ambhasāṃ raśmīnāṃ ca | timīnāṃ rakṣayā pālanena timirasya ca kṣayeṇa ca nāśena | candrikā alpaś candro jyotsnā ca | hariṇā viṣṇunā hariṇena cādhyuṣitam ākrāntam_ || 74 ||

yo grāvalagnabahalormikayā cirāya kurvāṇayā rucirasaiktayā vyavasthām | lakṣmīṃ sabhogivalayo jalasaṃpadaiti śailādhirājasutayeva śaśāṅkamauliḥ || 75 ||

grāvasu lagnā ūrmayo yasyāḥ | ‘śeṣād vibhāṣā’ iti kap_ | agre ca karasyāvalagnā ūrmikā vālikā yasyāḥ | rucirāṇi saikatāni yasyās tayā | vyavasthā vīnāṃ pakṣiṇāṃ sthitiḥ | rucirasābhyāṃ cābhilāṣaśṛṅgārābhyām ekatā harasyātmanaś ca śarīrayor aikyaṃ tena vyavasthā niyamaḥ | bhogināṃ valayāḥ samūhāḥ | bhogina eva ca valayāḥ kaṭakāḥ || 75 ||

chāyāgatarkṣapatibimbavidhānapiṇḍa- līlāprasāritavisāritaraṅgahastaḥ | dhatte sma yaḥ sphuritavidrumatāmrarāga- tālūrasatsthitir ibhādhipater abhikhyām || 76 || 5. ‘gatākṣapati’ kha.

ṛkṣapatiḥ śaśī | vidhānaṃ hastyannam_ | sphurito vidrumāṇāṃ tāmrarāgo yeṣāṃ tais tālūrair āvartaiḥ satī sthitir yasya | vidrumavattāmratāluḥ rasantī ca sthitir yasya || 76 ||

pratyagravidrumavitānamarīcigāḍha- rāgormilāñchitatayā rajanīṣv abhīkṣṇam | yasyonnatānugatalakṣmaṇacittavṛtti- r ābhāti candrakiraṇollasitasya velā || 77 ||

gāḍhāruṇair ūrmibhir lāñchitam_ | gāḍhānurāgayā cormilayā lakṣmaṇavadhvā āñchitam ākṛṣṭam_ || 77 ||

bhindaṃs tamo bhuvanavāsagṛhe kṛtaika- deśasthitir yam adhitiṣṭhati niṣṭhurārciḥ | vistāripātram iva nirmalatyoyataila- pūrṇodaraṃ vidadhadaurvaśikhipradīpaḥ || 78 || 1. ‘nidadhat_’ kha.

78 ||

lakṣmyā kulīracitayā śrita eka eva prāpnoti yaḥ sma mahimānam alaṅghyadhāmā | yodhair iva kṣitipatiḥ sthitim ety amanda- pātālavāsibhir anekavidhaiś ca sattvaiḥ || 79 ||

kulīraiḥ karkaṭākhyaiḥ prāṇibhiś citayā lakṣmyā yaḥ śrito māhātmyam āpa | sattvaiś ca sthitim eti | rājeva yodhaiḥ | so 'pi kulī mahākulo lakṣmyā ca racitayā tatra tatra dattayā śritaḥ | dhāma sthānaṃ tejaś ca | amandaṃ kṛtvā pātāle vasanti tacchīlāḥ | amandaś ca pāto yeṣāṃ te 'lavāḥ sthūlā asayo yeṣāṃ taiḥ || 79 ||

dhatte jalāśayapatiḥ sthitim ambhasāṃ sma sārādhikastimitatāmarasāṃ ya ekaḥ | yasyāśritena pulināñcitayā śriyā ca vīcivrajena hariṇā ca ciraṃ vavalge || 80 || 2. ‘saurādhika’ kha.

sāreṇotkarṣeṇādhikaḥ prakṛṣṭo yas timibhis tatāmarasāṃ ca | stimitāni tāmarasāni yasyāṃ tādṛśīṃ ca jalasthitim adhāt_ | pulinamañcati prasarpati pulināñcī tadbhāvena śriyā śobhayā śritena vīcinicayena hariṇā pulineṣv añcitayā śriyā sevitena sphuritam_ || 80 || kulakam_ ||

(ekādaśabhiḥ kulakam_)

ullaṅghya varṣagirivīcimatīśatāni nānāvidhāny atha tadīkṣaṇabaddhatoṣaḥ | dūrād ilāvṛtam asāv avipannameru- cchāyaṃ viḍambitahimādrim asāv apaśyat || 81 || 1. ‘chāyāviḍambita’ ka.

varṣeṣu bhāratādiṣu bhūmibhāgeṣu girayo himavadādyāḥ | vīcimatī nadī | ilāvṛtaṃ nāma varṣam_ | ilayā ca bhūmyā vṛtaṃ dhāraṇāya prārthitam_ | avipannā meroś chāyā.........ātapābhāvo yatra || 81 ||

dhatte samudraparikhāvalayāvalīḍha- paryantavartmaparimaṇḍalabhūpratiṣṭhaḥ | yaḥ kūrmapṛṣṭhapṛthukarparasaṃniviṣṭa- rukmāṃśuvicchuritamandaraśailaśobhām || 82 ||

dhatte ityādi navabhiḥ kulakam_ || ya iti sāmarthyān meroḥ parāmarśaḥ | karparaṃ mahāsthi | rukmaṃ suvarṇam_ || 82 ||

vistāraśālikuruvindaśilānitamba- bhāgotthitaṃ vahati yaḥ karacakravālam | skandhāvagharṣaṇavilagnamahāvarāha- viśliṣṭakesarasaṭānikurumbaśobham || 83 ||

kuruvindaṃ padmarāgabhedaḥ | vilagnaḥ pravṛttaḥ | kesarā ūrdhvamukhāni skandhalomāni | adhomukhāni tu saṭāḥ || 83 ||

yena prasādhitam ilāvṛtam ācakāsti ratnaprabhāśabalakāñcanasānunoccaiḥ | padmāsanena ca vinidrapalāśacakra- m utpattipaṅkajam anujjhitakarṇikāṅkam || 84 ||

yena maṇḍitam ilāvṛtaṃ brahmaṇā ca paṅkajaṃ cakāstīty antargatopamaṃ dīpakam_ | palāśāḥ kiṃśukataravaḥ pallavāś ca | karṇikāyā aṅko lakṣaṇaṃ tad atyaktaṃ yena | ilāvṛtasya karṇikāvṛttyā kṣiter madhye 'vasthānāt_ | karṇikaiva cāṅkaḥ || 84 ||

yasmin vibhāti śiśirāṃśukalāmṛṇāla- vallīsanāthapṛthupuṣkarabhūmir arvāk | stambhe hiraṇmaya iva kṣaṇadāndhakāra- cchāyākareṇur alinīlarucir nibaddhā || 85 ||

puṣkaram antarikṣaṃ karikarāgraṃ ca | arvāk_ paścime bhāge | chāyaiva kareṇur hastinī || 85 ||

vistāritārkamaṇipallavaniryadagni- dhautāgniśaucaśucikalpalatādukūlaiḥ | viṣyandisāndrajalabindukaṇendukānta- vallīvimardakṛtadurdinamūlabhāgaiḥ || 86 ||

86 ||

baddhāspadakṣaṇavinihnutavahnitīvra- tāpānumeyadivasādhipamaṇḍalābhiḥ | śākhāspadabhir aruṇāśmavitardikābhiḥ saṃdarśitakṣayaniśāmukhasāṃdhyarāgaiḥ || 87 || 1. ‘pātānu’ ka.

vitardikā vedikā || 87 ||

vajrāṅkurāhitaśatakratucāpacakra- muktāphalastabakamañjuramañjarīkaiḥ | ratnāṃśupiñjaritakhañjanakhañjarīṭa- mañjīramañjutaraśiñjalatānikuñjaiḥ || 88 || 2. ‘cakraṃ’ kha. 3. ‘mañjuruta’ ka.

vajrā hīrakamaṇayaḥ | mañjurā hṛdyāḥ | khañjanā gativikalāḥ | khañjarīṭākhyāḥ pakṣiṇaḥ | śiñjā kvaṇitam_ || 88 ||

sthūlendranīlaśakalagrathitālavāla- madhyaprabhājanitasekajalaughaśaṅkaiḥ | abhraṃkaṣāgraviṭapāspadaśātakaumbha- kumbhīphalānumitaśevadhisaṃniveśaiḥ || 89 ||

śātakumbhaṃ suvarṇam_ | kumbhī ghaṭikā | śevadhir nidhiḥ || 89 ||

tasyānuvelam alivallabhavellitāgra- vallīvilolamaṇipallavavallarīkaiḥ | aikṣiṣṭa kalpatarubhiḥ kalilām analpa- saṃkalpasādhanaphalair maṇimekhalāṃ saḥ || 90 ||

anuvelaṃ muhurmuhuḥ | kalilā vyāptā || 90 ||

(navabhiḥ kulakam_)

gacchan kramād atha vilambitaratnadāma- dolādhirohataralīkṛtatārakaugham | abhyunmiṣanmarakatāṃśuśikhāyamāna- lagnārkakūbarituraṃgasaṭāvalīkam || 91 ||

gacchann ityādiviśeṣakam_ || 91 ||

stambhaskhalajjhaṇajhaṇāraṇitābhirāma- ghoṣānubandhisurasiddhavimānaghaṇṭam | āśliṣṭatārakamṛgollikhitāntarikṣa saṃdehitenduśakalasphuradardhacandram || 92 ||

tārakamṛgo mṛgaśirāḥ | tena vicitreṇa nabhasi saṃśayitaṃ candraśakalaṃ yena so 'rdhacandras toraṇālaṃkāra āśliṣṭo yena tam_ || 92 ||

nirdhūtacāmaraśikhāśatavījitārka- m ucchrāyinākamaṇigopuratoraṇaṃ saḥ | ānanditālivigalanmakarandabindu- mandāradāmakṛtabandanamālam āpat || 93 ||

nākamaṇer arkasya (?) puradvāratoraṇaṃ prāpat_ || 93 ||

(tilakam_)

tasya śyāmāyamānasthagitadinakarākāśasaṃkāśakāya- cchāyāpītātapāśātaṭanimitadṛśo ratnasānusthalīṣu | pratyāsannatriyāmāmukhasaraladhiyaḥ satvaratvaṃ vibhūṣā- vinyāsaṃ pratyavāpuḥ smararabhasarasaplāvyamānās taruṇyaḥ || 94 || 1. ‘sphurita’ kha.

tasya gaṇasya nabhonibhadehacchāyayā pītā......taṭeṣu diktaṭeṣu kṣiptanayanā yoṣitaḥ pradoṣaśaṅkayā maṇḍanāvidhiṃ prati tvarām agaman_ || 94 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye mārgavibhāgarvarṇano nāma triṃśaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote triṃśaḥ sargaḥ ||