triṃśaḥ sargaḥ|
itthaṃ sarāgaśaśabhṛtparibhogalīlā-
vicchinnarātriraśanāmaṇikiṅkiṇībhiḥ|
nakṣatrasaṃtatiṣu saṃdadhatīṣu sāmya-
mastādrisānupadavīparipuñjitāsu||1||
viṣyandamānamadhuśikaralobhalīna-
bhṛṅgāvalīcaraṇabandhurakesareṣu|
padmākareṣu vikasatsu śanairnidāgha-
dhāmāṃśubhinnadalamaṇḍalasaṃdhibandham||2||
prātastanānilavikampitapuṇḍarīka-
pakṣmāgrakoṭighaṭite salilāśayeṣu|
nidrāvimuktivalitāvayavāpaviddha-
lakṣmīvadhūparimalaśriyi dhūlicakre||3||
śailālivatsphuṭayati sphuṭasarvabhāva-
vyaktikrameṇa divase mukharāgaśobhām|
abhyarcya kālamusalaścaraṇau mṛgāṅga-
cūḍāmaṇerudapataddhruvadhāmavīthīm||4||
(cakkalakam)
tena vyaloki divamutpatatāgravarti
vispaṣṭalakṣma pariṇāhi mṛgā"kabimbam|
unnidrakundadalapāṇḍuramaṇḍapiṇḍa-
madhyāsyamānamiva kāliyapannagena||5||
saṃpaśyati sma sa taḍitsphuraṇānubandha-
mādīrghamabhraśakalaṃ sthitamantarikṣe|
ucchvāsalakṣyarudhirāruṇakāntikaṇṭha-
cchedaṃ mahājhaṣamivāmbhasi paṅkalīnam||6||
anyonyasaṃvalanavellitapallavāgra-
viśleṣanirdalitaketuśikhāṃśukaughāḥ|
unmūlyamānaśikharaskhaladardhacandra-
ratnaprabhākhacitakāñcanatoraṇāgrāḥ||7||
ābhyāhatā viśaśarurjavamārutena
tasyāśu dikṣu surasiddhavimānasaṃghāḥ|
bāṇāgnidīpitapuratrayatāyamāna-
nānāvidhāvayavavibhramamūhivāṃsaḥ||8||
(yugalakam)
keśeṣu tasya kṛtasaṃnidhayo muhūrtaṃ
kaṃsātatāyina ivāñjananīlabhāsaḥ|
uṣṇīṣaratnakiraṇadviguṇāyamāna-
saudāmanīvalayino jaladā babhūvuḥ||9||
tasyotthitasya sahasā dhanavartmasīmni
dhatte sma karṇaśikharaṃ śriyamavyavasthām|
uṣṇīṣabhinnahṛdayastanayitnulagna-
saudāmanīvikaṭahāṭakamañjarīkam||10||
piṅgordhvalocanakṛśānuśikhāsahasra-
masyānvakāri mukhamaṇḍalamantarikṣe|
sāmbhobhareṇa gamanotthamarudvivarta-
bhājāmbuvāhaśakalena tadidvatāgre||11||
tasya pratīpamagamadgamanānilena
vikṣipyamāṇasalilā kṣaṇamantarikṣe|
mandīkṛtoṣṇakaramaṇḍalabhāsurordhva-
netrāgnitāpakṛtaśoṣabhiyeva gaṅgā||12||
vistraṃsitoḍuraśanaṃ galadindugaura-
gaṅgādukūlamakarotsa divastadānīm|
vistīrṇamambaranitambamanambudendu-
bimbānānāmburuhacumbanabaddhatṛṣṇaḥ||13||
jahre mano 'sya mṛdumārutapūryamāṇa-
randhrairhimādritaṭakīcakacakravālaiḥ|
gambhīratāramadhurakvaṇitairnayadbhi-
rutkarṇatāṃ taraṇikūbarivājipaṅktim||14||
aikṣiṣṭa visphuritakāñcanakalpavallī-
vistāripakṣmaśikharacchadacakravālam|
kailāsaśailamasakṛtsa jagattrayaika-
lakṣmyāḥ sthitaṃ dhavalavibhramapuṇḍarīkam||15||
phenāvalīdhavalacāmaracakravāla-
bhūṣābhirāmajavanasthirasaptavāhām|
bhāgīrathīṃ rathadhurāmiva dharmaraśme-
rvīkṣyaikapiṅgalagirau sa mudā vavande||16||
tena skhalatkhalakhalāmukharā karāla-
kailāsakūṭavikaṭorgighaṭāsahasrā|
saṃkrāntakaiṭabhanisūdanapādapadma-
preṅkhannakhaccavirivaikṣata jahnukanyā||17||
majjatkuberataruṇīgalitāvataṃsa-
hāsābhirāmataṭamārgamasāvapaśyat|
vistārimānasasaraḥ salilormibhaṅga-
paryastaśīkarasakāñcanavālukāmbhaḥ||18||
vīcīsamīradhutakāñcanapuṇḍarīka-
paryastakesaraparāgapiśaṅgitāmbhaḥ|
acchodamaikṣata sa devapurandhripāda-
lākṣāruṇīkṛtaśilātalatīralekham||19||
ārādhanapravaṇakāsaradaityavaṃśa-
kaṇṭhaprasādhanadhiyeva vilabhyamānāḥ|
caṇḍyā yadīyamaṇikaṃdaramandirāgra-
vistāritoraṇagatāḥ pravibhānti ghaṇṭāḥ||20||
sthūlendranīlamaṇiśṛṅgaruco 'tha tasya
kalmāṣitākhiladigantaramunmiṣantī|
bhūyastarāṃ taraṇimārgarurutsayāśu
muktāḥ śikhā iva dadarśa sa mekalādreḥ||21||
(yugalakam)
līlānimagnaśabarīkucakumbhapīṭha-
saṃkṣobhajarjaritavīcighaṭāsahasrām|
revāmasaus saralavañjulajālajambū-
stambaprasādhitataṭāmavalokya reme||22||
kaṇṭhagrahapraṇayinā dadṛśe 'tha tena
vindhyaśriyo maṇiśikhojjvalamekhalāyāḥ|
revāpagāmbupṛthupīnanitambabimba-
visrastamambaramivātanupādalagnam||23||
saṃvītatīravanarūḍhatamālakhaṇḍa-
lolānilākulitanīlajalāṃśukaśrīḥ|
tena vyaloki varuṇālayavallabhāgra-
līlābhisāraṇadhiyeva kalindakanyā||24||
sevāvicakṣaṇatayeva davāgnidagdha-
kālāgurupracuradhūmaśikhākadambaiḥ|
kurvantamaikṣata mahendramasāvanalpa-
kalpadrumāṃśukatatīḥ surabhīḥ surāṇām||25||
vispaṣṭaphenadhavalā viralormibhaṅga-
niḥsaṅgasaṃgatapayaḥplavarodhasaṃ saḥ|
lāṅgūlinīṃ saritamākalayāṃcakāra
tatpādagocaragatāmiva saurabheyīm||26||
vīkṣyāvataṃsitavikāsilavaṅgapuṣpa-
mālāḥ sa sahyagirikānanaśākhivīthīḥ|
remetarāṃ suramataṅgajagaṇḍakāṣa-
līlāvarugṇasaralonnatatālakhaṇḍāḥ||27||
utphullatīratarukhaṇḍalatāsakhibhīḥ
saṃgrathyamānanijapuṣpabharāvataṃsāḥ|
ābibhratīṃ bhramaranīlarucaḥ sa vīci-
veṇīlatāstadanu bhīmarathīmapaśyat||28||
āmagnakuntalavadhūkucakumbhabhāra-
hāraprabhādviguṇitacchaviphenahāsām|
godāvarīṃ caraṇacuñcucakoracakra-
cañcvagracumbitavilolajalāmapaśyat||29||
ullāsiśīkarakarālaphaṇāsahasra-
kallolanāgakulasaṃkulamadhyabhāgām|
veṇāṃ sphurattimiratātigabhīratālu-
mūlāṃ rasātalabhuvaḥ sadṛśīṃ dadarśa||30||
tasyopayuktataṭakānananārikela-
vallīphalaprakaraśītalagarbhatoyāḥ|
anvāyinaḥ kaṭakavartmasu pāriyātra-
śailasya cakrurupabhogasukhānnivāsān||31||
mīnāvalīsarabhasāplutighaṭṭitāmbu-
vīcī vilolaviruvatkurarī karālam|
kāveryalakṣyata jalaṃ dadhatī ca tena
niḥśaṅkaraṅkukulasaṃkulakūlakacchā||32||
āvirbhavatsmitamanoharagaṇḍabhitti-
bhāgaścamūcarapuraṃdhrigaṇaḥ salīlam|
carmaṇvatīpulinavartmani tasya hāri-
hārītakaṇṭhavirutārpitakarṇa āsīt||33||
āvāsitasya taṭavartmani tasya tāla-
khaṇḍaprakāṇḍadalatāṇḍavanapragalbhāḥ|
siprātaraṅgamaruto 'nucarāṅganānāṃ
pīnastanakṣatarujaṃ surateṣu jahnuḥ||34||
saṃvādikānanatalasya niveśalakṣmī-
madrerasāvadhikamṛkṣavato 'bhyanandat|
pādāvanau katicideva dināni baddha-
saṃstho niśīva tamasāhṛtadṛṣṭirāsīt||35||
gacchanviśaṅkaṭamasau kaṭakaṃ suvela-
śailasya kāñcanaśilāśakalāvakīrṇam|
velāvilolavaruṇālayavīcibhaṅga-
paryastavāḍavakṛśānumivaikṣatārāt||36||
tena vyalokyata kapolatalāyamāna-
vispaṣṭapākalavalīphalakandalāḍhyā|
ghrāṇānulepi navacandanakhaṇḍagandha-
hṛdyāmalā malayaparvatakānanaśrīḥ||37||
lakṣmībhṛtastribhuvanākramaṇapragalbha-
sarvonnatermalayabhūmibhṛto 'bhrasindhum|
puṇyasthitiṃ murariporiva pādamūla-
bhāgotthitāmabhinananda sa tāmraparṇīm||38||
paryastaratnakira.anaṅkuradantureṣu
velātaṭeṣu kṛtasainikasaṃniveśaḥ|
ambhonidhiṃ sa niravarṇayadullasadbhi-
ruttambhitoḍupathamūrmighaṭāsahasraiḥ||39||
unnālanīlanalavañjulanālikera-
tāmbūlavallivalayākulakūlakaccham|
āścaryadhāma dadhataṃ satataprasanna-
mapyaprasannamupapāditaśobhamambhaḥ||40||
visraṃsamānasalilāmalanīvibandha-
māsphālayantamatikāmamivormihastaiḥ|
ābaddharatnavalayojjvalakāñcidāma-
kelāṅganāpulinapīnanitambabimbam||41||
utsaṅgasa'ngivilasattaṭinīpuraṃdhri-
līlārpaṇārabhasayeva niveśayantam|
āvartacakracaṣakeṣu taraṅgahasta-
vyākṛṣṭatīratarupuṣpabharāvataṃsān||42||
preṅkhatkapālaśakalāmalaśaṅkhaśukti-
mācchāditāmbaraghanāmitavīcibāhum|
aurvāgnipiṅgalaśikhāvikarālakeśa-
mutplutya bhairavamivāsakṛdārasantam||43||
lakṣmīsurāvimalakaustubhapārijāta-
candrāmṛtāpaharaṇotthitayā śuceva|
hemādrikūṭavikaṭārciṣi nirvyapekṣa-
mātmānamaurvadahane vinipātayantam||44||
gambhīragarbhaghaṭitāspadakālakūṭa-
śeṣāgnidāhaśamanārthamiva kṣapāsu|
jyotsnāsudhāṃ vikaṭamauktikadantāpaṅkti-
śobhādharairvivṛtaśuktimukhaiḥ pibantam||45||
preṅkhatpravālakiraṇācchuritaṃ vahanta-
māvartacakraparivartagabhīramambhaḥ|
saṃvādikaustubhamayūkhaśikhāvakīrṇa-
daityāyudhavraṇakarālamurārivakṣaḥ||46||
śailābhighātaśakalīkṛtamapyakhaṇḍa-
mākṛṣṭaratnamapi ratnanidhitvamāptam|
lakṣmīmadagdhadaśamapyasamaurvavahni-
dāhākulaṃ ciragatāmapi notsṛjantam||47||
vajrābhighātabhayakātaratoyalīna-
māhendranīlamaṇiśailaśataprakāśam|
garbhāndhakāramiva śeṣaphaṇāsahasra-
māṇikyaraśmigalahastitamudgirantam||48||
preṅkhatkarālamaṇiraśmiśatābhinaddha-
kallolaketupaṭalasthagitāntarikṣam|
uddāmavājigajasadhanamabhyupetya
gṛhṇantamāśu vijigīṣumivākhilāśāḥ||49||
velā'Nganābhirabhito dhutavīcitāla-
vṛntānilākulitaphenadukūlapaṭṭam|
tābhyo diśantamasakṛjjalaveganunnā
ratnāvalīraviralāḥ sphuradindugaurīḥ||50||
utthāya dūramasakṛtsuranāthamukta-
vajrābhighātakalanāśaraṇāgatānām|
kṣoṇībhṛtāmaniśamapyakutobhayānāṃ
sarvāsu dikṣu bhayahetumivekṣamāṇam||51||
digbhyaḥ kramādaviralotkalikānubandha-
mabhyeyuṣīḥ sarabhasaṃ saritaḥ sarāgāḥ|
vispaṣṭadugdhajalakapravijṛmbhamāṇaḥ-
cetoharasthiti pariṣvajamānamārāt||52||
jyotsnātapaṃ vikaṭavīcighaṭāsahasra-
madhyāspadaṃ sapadi dugdhadhiya vivektum|
āvāñchatāṃ sarabhasaṃ taṭarājahaṃsa-
yūthena bandhuragalena niṣevyamāṇam||53||
visphūrjadaurvaśikhikālanipīyamāna-
mālokya saṅkasukamāyurivābhito 'mbhaḥ|
prāptaṃ kramādvirasatāṃ bhajamānamā'su
satkūrcakesaraghanāṃ taṭakānanorvīm||54||
aurvāgnihetiśatamapyakṛśānutāpa-
muttānamapyatigabhīratayānuyātam|
sannāgamapyanavasannagiriprakāṇḍa-
minduprabhojjhitamapi sphuṭacandrikāḍhyam||55||
dikcakravālarabhasopagatapraviṣṭa-
susvādunirjharavatījalasaṃplave 'pi|
ambhaḥśriyā virasayāprakṛterivaurva-
vahnyāravairabhidadhānamasutyajatvam||56||
gāmbhīryaśāli maṇirāgapiśaṅgamambha-
statrāpyanantabhujagādhipabhogaśayyām|
tāmāśritaṃ vikaṭakuksipuṭasthaloka-
mabhyudvahantamadhikaṃ harimeva sāram||57||
utkṣiptapañcaphaṇamaṇḍalabhogihasta-
mabhraṃkaṣolbaṇaśikhaṃ grasamānamambhaḥ|
velānilāhativighaṭṭitavīcighoṣaiḥ
saṃtarjayantamiva saṃtatamaurvavahnim||58||
āvartamaṇḍalakukundarabaddhaśobha-
kallolapīvaranitambataṭāntareṣu|
paryastaśuktinayanaṃ galadacchahāri-
ratnaprabhānivasaneṣu saridvadhūnām||59||
sannāgamakṣatatimiśritamutpravāla-
mudrāgamākulamalaṅghanatāmavāptam|
saśrīphalaspṛhataratplavagaṃ vanaugha-
muttālamuccamarasatvajuṣaṃ vahantam||60||
ullāsibhiḥ pratidiśaṃ vikaṭormibhaṅgai-
rbālāṣṭamīśaśadharapratibimbagarbhaiḥ|
uttaptahemaghaṭitāṃ parikalpayanta-
māyānapaṅktimiva toyaturaṃgamāṇām||61||
saṃsaktabindupaṭalānaviluptaśukti-
matsyaśriyo makaradantakabaddhaśobhān|
vīcīnkrameṇa dahatā bhiṣajeva śaśva-
daśvānamuktamabhito vaḍavāgninārāt||62||
sindhūrvipāṇḍurarucisphuṭaphenahāsa-
dūrāvagāḍharasanirbharamāpatantīḥ|
paśyantamādaravaśādiva nirviśeṣa-
māvartacakranayanairmadhuraṃ valadbhiḥ||63||
vicchādakāṃśumaṇivicchuritācchavīci
vicchedaśīkarasamīrataraṅgyamāṇāḥ|
vallīrdrumābhimukhamunmadanā ivātta-
kampāḥ karālitataṭopavanā vahantam||64||
udbhinnaratnakiraṇāruṇadhāturvarti-
preṅkhatphaṇāṅgulibhujaṃgamabhogahastam|
ropādivānadhigataprasaraṃ valantīḥ
sotkaṇṭhamūrmiphalakeṣu nadirlikhantam||65||
ullāsibhirdiśi diśi sphuradunmarīci-
māṇikyaraśmiśabalormighaṭāsahasraiḥ|
vistāribhirbhuvanamaṇḍalamaṇḍalapasya
vaidūryakuḍyaracanāmiva saṃdadhānam||66||
phullajjapākusumapāṭalarāgaramyaiḥ
kalmāṣitākhiladiśaṃ maṇibhiḥ sphuradbhiḥ|
velānilāhativilolaśikhāśatasya
sthūlaiḥ sphuliṅganikarairiva vāḍavāgneḥ||67||
āvartacakramudarāspadarandhranābhi-
paryantaghūrṇitamaṇiprakārāṃśuśāram|
bibhrāṇamacyutamivāñcitaśaṅkhaśobha-
mambhodamecakaruconnatavicidoṣṇā||68||
velāniloddhataśikhasya viṭaṅkaheti-
varticchaṭābhiranalasya nipetuṣībhiḥ|
ābibhrataṃ piśunitā iva kukṣibhāga-
baddhapratiṣṭhagirisānunidhānabhūmīḥ||69||
(ejatriṃśadbhiḥ kulakam)
yasyādhikaṃ dadhati irmalanīramadhya-
bimbāgatā jalabhṛto 'bhrakapaṅkanīlāḥ|
kukṣipraviṣṭakamaṭhaśvasitavyudasta-
pātālarandhragatakardamarāśilīlām||70||
velāvilāsaviśarārutaraṅgarāśi-
pāriplavīkṛtatimivrajapṛṣṭhapakṣāḥ|
yasmiñjanena niracāyiṣatodarādri-
kūṭabhramaṃ vidadhato bhramatā taṭorvyām||71||
velāpuraṃdhrirabhiyogapaṭuprapañca-
mukteva cañcalataraiḥ śriyamūrmihastaiḥ|
yasya pravālamaṇiśobhibhireti danta-
cchedaprakārasadṛśaiḥ sphuṭabindumālaiḥ||72||
devāsurabhramitamandaraśailamūla-
līlāvaloḍanavilolajalotthitasya|
mārgaṃ rasena turagādhipaterivārā-
dābhāti yatra vaḍavāmukhamīkṣamāṇam||73||
ślāghyo gavāmadhipatistimirakṣayārghya-
rūpasthitirjaladamārgatalāvalambī|
saccandrikaṃ śiśiraraśmirivātmabimba-
mambho bibharti hariṇādhyuṣitaṃ ya ekaḥ||74||
yo grāvalagrabahalormikayā cirāya
kurvāṇayā rucirasaiktayā vyavasthām|
lakṣmīṃ sabhogivalayo jalasaṃpadaiti
śailādhirājasutayeva śaśāṅkamauliḥ||75||
chāyāgatarkṣapatibimbavidhānapiṇḍa-
līlāprasāritavisāritaraṅgahastaḥ|
dhatte sma yaḥ sphuritavidrumatāmrarāga-
tālūrasatsthitiribhādhipaterabhikhyām||76||
pratyagravidrumavitānamarīcigāḍha-
rāgormilāñchitatayā rajanīṣvabhīkṣṇam|
yasyonnatānugatalakṣmaṇacittavṛtti-
rābhāti candrakiraṇollasitasya velā||77||
bhindaṃstamo bhuvanavāsagṛhe kṛtaika-
deśasthitiryamadhitiṣṭhati niṣṭhurārciḥ|
vistāripātramiva nirmalatyoyataila-
pūrṇodaraṃ vidadhadaurvaśikhipradīpaḥ||78||
lakṣmyā kulīracitayā śrita eka eva
prāpnoti yaḥ sma mahimānamalaṅghyadhāmā|
yodhairiva kṣitipatiḥ sthitimetyamanda-
pātālavāsibhiranekavidhaiśca sattvaiḥ||79||
dhatte jalāśayapatiḥ sthitimambhasāṃ sma
sārādhikastimitatāmarasāṃ ya ekaḥ|
yasyāśritena pulināñcitayā śriyā ca
vīcivrajena hariṇā ca ciraṃ vavalge||80||
(ekādaśabhiḥ kulakam)
ullaṅghya varṣagirivīcimatīśatāni
nānāvidhānyatah tadīkṣaṇabaddhatoṣaḥ|
dūrādilāvṛtamasāvavipannameru-
cchāyaṃ viḍambitahimādrimasāvapaśyat||81||
dhatte samudraparikhāvalayāvalīḍha-
paryantavartmaparimaṇḍalabhūpratiṣṭhaḥ|
yaḥ kūrmapṛṣṭhapṛthukarparasaṃniviṣṭa-
rukmāṃśuvicchuritamandaraśailaśobhām||82||
vistāraśālikuruvindaśilānitamba-
bhāgotthitaṃ vahati yaḥ karacakravālam|
skandhāvagharṣaṇavilagnamahāvarāha-
viśliṣṭakesarasaṭānikurumbaśobham||83||
yena prasādhitamilāvṛtamācakāsti
ratnaprabhāśabalakāñcanasānunoccaiḥ|
padmāsanena ca vinidrapalāśacakra-
mutpattipaṅkajamanujjhitakarṇikāṅkam||84||
yasminvibhāti śiśirāṃśukalāmṛṇāla-
vallīsanāthapṛthupuṣkarabhūmirarvāk|
stambhe hiraṇmaya iva kṣaṇadāndhakāra-
cchāyākareṇuralinīlarucirnibaddhā||85||
vistāritārkamaṇipallavaniryadagni-
dhautāgniśaucaśucikalpalatādukūlaiḥ|
viṣyandisāndrajalabindukaṇendukānta-
vallīvimardakṛtadurdinamūlabhāgaiḥ||86||
baddhāspadakṣaṇavinihnutavahnitīvra-
tāpānumeyadivasādhipamaṇḍalābhiḥ|
śākhāspadabhiraruṇāśmavitardikābhiḥ
saṃdarśitakṣayaniśāmukhasāṃdhyarāgaiḥ||87||
vajrāṅkurāhitaśatakratucāpacakra-
muktāphalastabakamañjuramañjarīkaiḥ|
ratnāṃśupiñjaritakhañjanakhañjarīkaiḥ|
mañjīramañjutaraśiñjalatānikuñjaiḥ||88||
sthūlendranīlaśakalagrathitālavāla-
madhyaprabhājanitasekajalaughaśaṅkaiḥ|
abhraṃkapāgraviṭapāspadaśātakaumbha-
kumbhīphalānumitaśevadhisaṃniveśaiḥ||89||
tasyānuvelamalivallabhavellitāgra-
vallīvilolamaṇipallavavallarīkaiḥ|
aikṣiṣṭa kalpatarubhiḥ kalilāmanalpa-
saṃkalpasādhanaphalairmaṇimekhalāṃ saḥ||90||
(navabhiḥ kulakam)
gachankramadatha vilambitaratnadāma-
dolādhirohataralīkṛtatārakaudham|
abhyunmiṣanmarakatāṃśuśikhāyamāna-
lagnārkakūbarituraṃgasaṭāvalīkam||91||
stambhaskhalajjhaṇajhaṇāraṇitābhirāma-
ghoṣānubandhisurasiddhavimānaghaṇṭam|
āśliṣṭatārakamṛgollikhitāntarikṣa
saṃdehitenduśakalasphuradardhacandram||92||
nirdhūtacāmaraśikhāśatavījitārka-
mucchrāyinākamaṇigoṣuratoraṇaṃ saḥ|
ānanditālivigalanmakarandabindu
mandāradāmakṛtabandanāmālamāpat||93||
(tilakam)
tasya śyāmāyamānasthagitadinakarākāśasaṃkāśakāya-
cchāyāpītātapāśātaṭanimitadṛśo ratnasānusthalīṣu|
pratyāsannatriyāmāmukhasaraladhiyaḥ satvaratvaṃ vibhūṣā-
vinyāsaṃ pratyavāpuḥ smararabhasarasaplāvyamānāstaruṇyaḥ||94||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye mārgavibhāgarvarṇano nāma triṃśaḥ
sargaḥ|